Post: #1
Title: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 03:12 AM
Parent: #0
شايف يا معاوية الكلام دخل الحوش ،
رسالة الفاتح جبرا للفساد شخصيا.
Quote: عزيزي الفساد
تحية طيبة وبعد
أرجو أن تكون في أتم الصحة والعافية (مع إنو ده شئ مفروغ منو) .. أكتب إليك هذه الرسالة لما بيننا من معرفة قديمة بلغت سنين عددا ، فقد عاصرت نشاتك يا عزيزى منذ أن كنت طفلاً صغيراً يقوم (المسئولون) بتقويمك وتأديبك متى ما أردت أن تمارس هوايتك فى السرقة والإختلاس والمحسوبية حيث كانوا حينها يقيمون لك مجالس المحاسبة ويحولون بعض ما تجنيه يداك عند الضرورة إلى المحاكم المختصة لتحاكم وفق القانون وتنال جزاك الرادع حتي تكون عبرة لمن يعتبر
|
|
Post: #2
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 03:18 AM
Parent: #1
لسة الرسالة طويلة يا معاوية معناه ريحة الفساد عمت القري والحضر.
Quote: عزيزي الفساد :
الآن وقد كبرت واصبحت رجلاً مفتول العضلات عريض المنكبين متين البنيان تعوس وتجول في البلاد طولا وعرضا غير ابه بآهات المواطنين الذين تفتك بأموالهم وآمالهم وأحلامه فى حياة كريمة رأيت أن أخاطبك عل وعسي أن يرق قلبك و(تخفف اللعب شويه) وترضي (بالقليل) الذي لا يؤثر علي معاش الناس وحياتهم فالناس -عزيزي الفساد- قد وصلت إلى حالة من الفقر في ظل (الهبر واللغف) الذي يتم بإسمك لم تصل إليها من قبل (وقالت الروب عديل) .
|
|
Post: #3
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 03:22 AM
Parent: #2
والله الفاتح جبرا دا زول حكيم وساخر فعلا
Quote: عزيزى الفساد :
أكثر ما يدهشني في أمرك هو أنه رغم ممارستك اليومية لعملك البغيض وإكتشاف امرك وعرضه علي الملا على أعمده الصحف مدعماً بالوثائق والبراهين الدامغة إلا أن أحدا من المسئولين لا يستطيع محاكمتك وأن الحكومة لسبب نجهله لا تستطيع مواجهتك والوقوف أمامك ، لقد تساءلت وتساءل معي الكثيرون عن هذه الحصانة المتينة التى تمتلكها وهذه الحماية التى تجدها ولكن لم نجد لتساؤلاتنا إجابة مقنعة !
|
|
Post: #4
Title: Re: فلاحتكم فى معاوية عبيد تعالوا شوفوا الرسالة دى
Author: باسط المكي
Date: 10-30-2011, 03:23 AM
Parent: #2
تحياتي نجاة
كلو بتكنس كنس
من شارك ومن باااارك
|
Post: #6
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 03:28 AM
Quote: تحياتي نجاة
كلو بتكنس كنس
من شارك ومن باااارك |
شكرا الاخ باسط والله منظرين اليوم دا بشدة،
تسلم لمرورك الانيق واحيك واحى اللافتة الزرقاء.
|
Post: #5
Title: Re: فلاحتكم فى معاوية عبيد تعالوا شوفوا الرسالة دى
Author: Hani Arabi Mohamed
Date: 10-30-2011, 03:25 AM
Parent: #2
شكراً جزيلاً للمبدع جبرا
|
Post: #7
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 03:31 AM
Parent: #5
| Quote: شكراً جزيلاً للمبدع جبرا |
تسلم يا هانى ولعلك بعافية ويسلم جبرا وكمان معاوية.
|
Post: #8
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 03:33 AM
Parent: #7
Quote: عزيزي الفساد :
علي الرغم من أنو (عمايلك) بقت ظاهرة وواضحة للقاصي والداني و ما عاوزه ليها أمثله (وإنتا عارفا زى جوع بطنك الما بتجوع) لكن هنالك بعض الأمثلة من أفعالك يحار فيها المرء (عديل كده) ولا يدانيه أى شك في انك قمت بالإستعانه فى تنفيذها بعد مقدر من (الأبالسة) وجهابذة الشياطين كفعلتك تلك التى نجوت فيها – حتى الآن- عندما قمت ببيع خط (هيثرو-الخرطوم) والشئ المحير كبف إنك أستطعت (دغمسة الحكاية) لحدت ما (اللجان الإتكونت) دى كووووووولها ما قدرت تعرف الحاصل شنو؟ والمواطن ذاااتو قنع من الموضوع
|
|
Post: #9
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 03:39 AM
Parent: #8
تم تمليك 42000 (إتنين وأربعين ألف متر مربع) لمنظمة إسمها (أهل الميمنة) !! .. في الحتة دى ممكن (تعمل رايح وما عارف)
والله يا الفاتح جبرا لو جبت ليهم شهادة البحث ح يعملوا رايحين برضو
Quote: عزيزى الفساد :
خليك من كده .. خلينى أديك واحده (خطيرة) من إنجازاتك (المدهشة) .. أمبارح القريبة دى قرأت في تقرير للبرلمان عن تجاوزات المدينة الرياضية (البقت ميدان باسكت) إنو تم تمليك 42000 (إتنين وأربعين ألف متر مربع) لمنظمة إسمها (أهل الميمنة) !! .. في الحتة دى ممكن (تعمل رايح وما عارف) وتسألنى تقول ليا : طيب المدهش في الموضوع شنو؟ أقول ليك وأنا مندهش من (عبقريتك الفذة) بأن التقرير يقول أن هذه المنظمة غير مسجلة لدى (مسجل التنظيمات) !! يعني منظمة (وهمية) ، بالله يا عزيزى الفساد (دى عملتها كيف؟) والله دى مفروض تدخل بيها موسوعة (غينيس للفساد المدهش) منظمة وما (مسجله) وكم أربعين ألف متر مربع؟؟ (طيب لو مسجلة كانوا أدوها كم) ؟
|
|
Post: #10
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 03:40 AM
Parent: #9
Quote: عزيزى الفساد:
هل تعتقد أن الإسلام يبيح ما تقوم به من أعمال قبيحة شريرة تؤذى البشر وتفقر المجتمع وتهتك نسيجه الإجتماعي ؟ لا يا عزيزى .. عفوا .. إنك لا تعرف ديننا الحنيف لذا دعنى (أديك عينه منو) : عن عائشة . أن قريشاً أهمّهم المرأة المخزومية التي سرقت ، فقالوا : من يكلم فيها رسول الله ، ومن يجترىء عليه إلا اسامة ، فكلمه أسامة ، فقال الرسول : أتشفع في حد من حدود الله ، ثم خطب فقال : إنما أهلك من كان قبلكم إذا سرق فيهم الشريف تركوه وإذا سرق الضعيف أقاموا عليه الحد ، وايم الله ! لو أن فاطمة بنت محمد سرقت لقطعت يدها ، فأمر النبي بقطع يدها . ( رواه البخاري ومسلم) !!
|
|
Post: #11
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 03:45 AM
Parent: #10
Quote: عزيزي الفساد :
لا تفرح لأنك تسرح وتمرح وتتمدد في كافة المرافق والمؤسسات دون أن يسألك أحد تلت التلاته كم؟ فمهما تراكمت أفعالك القبيحة ونزلت عليها (ستائر النسيان) كما تقول (أم كلثوم) إنما يؤخرك الله ليوم تشخص فيه الأبصار ...يوم لا توجد فيه (حصانة) ولا (صهينة) ولا يحزنون .. (وبعدين شيل شيلتك)
كسرة :
عزيزنا الفساد ده يكون عامل للحكومة (عمل) عشان تصهين جنس الصهينة دى؟
|
يوم لا توجد فيه (حصانة) ولا (صهينة) ولا يحزنون .. (وبعدين شيل شيلتك)
دا مجاز خطير يا جبرا اليوم دا ح يجى كان طال الزمن او قصر...
|
Post: #12
Title: Re: فلاحتكم فى معاوية عبيد تعالوا شوفوا الرسالة دى
Author: ABUHUSSEIN
Date: 10-30-2011, 05:58 AM
Parent: #11
Up
|
Post: #13
Title: Re: فلاحتكم فى معاوية عبيد تعالوا شوفوا الرسالة دى
Author: جمال خضر
Date: 10-30-2011, 06:35 AM
Parent: #12
الأخت نجاة سيد أحمد
لك ألف تحية
وللصنديد الفاتح جبرا مليون تحية
على ما ظل يتحفنا به من مقالات ساخرة
تسلط الضوء على سرطان الفساد الذى نخر فى جسد
السودان فأحاله حطاما فقد صارت السرقة والإختلاس
ديدن ذو الأيدى المتوضئة أصحاب المشروع
الحضارى ناس هى لله هى لله لا للسلطة ولا للجاه.
الله يورينا فيكم يوم
يمهل ولا يهمل
|
Post: #23
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 05:21 PM
Parent: #13
Quote: الله يورينا فيكم يوم
يمهل ولا يهمل |
اآميين يارب العالمين تسلم الاخ جمال للمرور والمشاركة.
|
Post: #14
Title: Re: فلاحتكم فى معاوية عبيد تعالوا شوفوا الرسالة دى
Author: محمد أبوالعزائم أبوالريش
Date: 10-30-2011, 06:35 AM
Parent: #12
تحياتي أستاذة نجاة ....
نفتقد بشدة الأستاذ الفاتح جبرة (ساخر سبيل) وبوستاته القوية وواضحة.
|
Post: #15
Title: Re: فلاحتكم فى معاوية عبيد تعالوا شوفوا الرسالة دى
Author: ود الباوقة
Date: 10-30-2011, 06:39 AM
Parent: #14
يا لطيف ...
|
Post: #16
Title: Re: فلاحتكم فى معاوية عبيد تعالوا شوفوا الرسالة دى
Author: أميرة فاروق عبد العال
Date: 10-30-2011, 07:10 AM
Parent: #15
الأمر ضعيف...
|
Post: #17
Title: Re: فلاحتكم فى معاوية عبيد تعالوا شوفوا الرسالة دى
Author: نور الدين عثمان
Date: 10-30-2011, 07:27 AM
Parent: #16
ايها الفاسدون المفسدون ارجو ان تذكروا يوما لاينفع فيه مال ولابنون الا من اتى الله بقلب سليم.
|
Post: #18
Title: Re: فلاحتكم فى معاوية عبيد تعالوا شوفوا الرسالة دى
Author: Alshafea Ibrahim
Date: 10-30-2011, 07:40 AM
Parent: #16
شكرا الطاهر ساتي لعله يستحي ويستجيب ويرحم نفسه وعباد الله ...
شكرا الأخت نجاة ....
شكرا أيها الفساد فقد دخلت بيوتنا البعيدة التي كانت تنتظر وعود الإنقاذ البراقة .... فكنت أول من دخلها وغابت وأختفت البقية ...
الشفيع
|
Post: #19
Title: Re: فلاحتكم فى معاوية عبيد تعالوا شوفوا الرسالة دى
Author: مازن فيصل هلال
Date: 10-30-2011, 07:55 AM
Parent: #18
| Quote: عن عائشة . أن قريشاً أهمّهم المرأة المخزومية التي سرقت ، فقالوا : من يكلم فيها رسول الله ، ومن يجترىء عليه إلا اسامة ، فكلمه أسامة ، فقال الرسول : أتشفع في حد من حدود الله ، ثم خطب فقال : إنما أهلك من كان قبلكم إذا سرق فيهم الشريف تركوه وإذا سرق الضعيف أقاموا عليه الحد ، وايم الله ! لو أن فاطمة بنت محمد سرقت لقطعت يدها ، فأمر النبي بقطع يدها . ( رواه البخاري ومسلم) !! |
صدق رسول الله صلي الله عليه و علي آله و سلّم
--------------------------------------------------------------
واحد صاحبنا كان جنو و كل تفكيرو يسافر و يهاجر الي استراليا ... المهم بعد كم سنة كدة اخيرا تحقق حلمه و (دقّو) ليهو التاشيرة بتاعة استراليا ... المهم صاحبنا اثناء الكشف اكتشف انو عند سكري _وتلالة صلائب_ راح مكنصل فكرة السفر زاتو .. وزي ما تقول الدنيا مسخت ليهو
----------------------
حسي ناس الفساد ديل لو اكتشفو ما ينتظرهم من حساب و عذاب جراء شر اعمالهم و فسادهم.... الدنيا ما بتمسخ ليهم!؟
---------------
Manubia
|
Post: #20
Title: Re: فلاحتكم فى معاوية عبيد تعالوا شوفوا الرسالة دى
Author: الطيب رحمه قريمان
Date: 10-30-2011, 08:27 AM
Parent: #19
الاخت العزيزة نجاة سيد احمد
لك التحية الطيبة و عبرك مثلها للفاتح جبرا
ان الفساد قد عم كثير من مناحى الحياة فى السودان هذا ان لم يكن كل مناحى الحية خاصة الرسمية
فمن لم يكن فاسدا فهو متستر عليه و عامل اضان الحامل طرشاء "ضارب طناش"
الله يشيل الكيزان و يريح اهل السودان منهم و من فسادهم الذى ازكم الانوف
تحياتى للاستاذ معاوية .
|
Post: #21
Title: Re: فلاحتكم فى معاوية عبيد تعالوا شوفوا الرسالة دى
Author: معاوية عبيد الصائم
Date: 10-30-2011, 09:50 AM
Parent: #20
شكرا نجاة
هولاء الكيزان السفلة فى السهلة واذنابهم كذلك
تحياتى للولاد
|
Post: #22
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 05:10 PM
Parent: #12
سلام يا ابو جبص تسلم يا ميريخابى لرفع البوست.
up
|
Post: #24
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 05:28 PM
Parent: #22
سلام يا ود الباوقة وشكرآ للمرور ، وبنقول معاك يالطيف تلطف على عبادك المظلومين وتورينا يوم فى الظالمين الهم آآآمييييين.
|
Post: #25
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 05:33 PM
Parent: #24
Quote: تحياتي أستاذة نجاة ....
نفتقد بشدة الأستاذ الفاتح جبرة (ساخر سبيل) وبوستاته القوية وواضحة. |
شكرآ الاخ محمد ابو العزائم ،ساخر سبيل دائمآ مقالاتو فى الصميم.
|
Post: #26
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 05:36 PM
Parent: #25
تسلمى الاخت أميرة ،، فعلآ الامر ضعيف
|
Post: #27
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 05:41 PM
Parent: #26
Quote: ايها الفاسدون المفسدون ارجو ان تذكروا يوما لاينفع فيه مال ولابنون الا من اتى الله بقلب سليم.
|
سلام يا استاذ نور الدين ديل ناسين اليوم دا عايشين فى النعيم الدنيوى وضاربين طناش
|
Post: #28
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 05:45 PM
Parent: #27
Quote: شكرا أيها الفساد فقد دخلت بيوتنا البعيدة التي كانت تنتظر وعود الإنقاذ البراقة .... فكنت أول من دخلها وغابت وأختفت البقية ...
الشفيع |
مرحب بيك الاخ الشفيع تسلم وتشكر للمرور
|
Post: #30
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 05:50 PM
Parent: #28
Quote: حسي ناس الفساد ديل لو اكتشفو ما ينتظرهم من حساب و عذاب جراء شر اعمالهم و فسادهم.... الدنيا ما بتمسخ ليهم!؟
---------------
|
الاخ العزيز مازن ديل ناسين انو ح يكون فى يوم للحساب فى الدنيا ولا فى الاخرة ، تسلم للمرور والمشاركة.
|
Post: #29
Title: Re: فلاحتكم فى معاوية عبيد تعالوا شوفوا الرسالة دى
Author: معاوية عبيد الصائم
Date: 10-30-2011, 05:46 PM
Parent: #27
نجاة ....جبرا مسحراتى دائم
Quote: صحيفة الرأى العام
الأربعاء 20 يونيو 2007م
موقع الكاتب www.alfatihgabra.com
1- لا تندهش :
كل ما يثير الدهشة لديك كمواطن قد حدث .. تانى المندهش ليها شنو؟ قالو (السلام) ح يجى وح تقيف منصرفات (الحرب) الكل يوم كم مليون (دولار) وإنت كمواطن ح (تنعنش) ..الحرب قامت وقفت و(لدهشتك) لقيت مصروفات (السلام) أكتر من (مصروفات الحرب) !! قالو (البترول) يطلع وحياتك ح تبقى آخر حلاوة ودخلك السنوى ح يزيد .. طلع البترول و(لدهشتك) زادت أسعار(البنزين) و(الجازولين) و(السكر) والسلع الضرورية .. إذن مفروض تكون إنت (كملت) دهشتك ومافى حاجه تانى تثير الدهشة فيك فلا تندهش !
2- لا تتظاهر :
أذا تظاهرت فلا أحد يضمن لك العودة إلى بيتك سالما ويمكن بكل بساطه أن تصبح (أسماء فى حياتنا) بغض النظر إن كنت تتظاهر فى ميدان (أب جنزير) أو (شارع الحرية) أو (الجمهورية) وبغض النظر إن كان موضوع التظاهر هو (زياده أسعار) السلع الضرورية أو (الماده 130) أو (اليوم الوطنى لبناء السدود) ولا تعتمد على إنك (بتتظاهر) بصورة (سلمية) معتمدا على (الدستور) الذى يكفل لك ذلك فالكفيل الله !!
3- لا تأكل :
لا تحاول أن تأكل (حق الناس) لأنو (الناس) ما عندها (حق من أصلو) بعدين حتى لو عندها حق فهنالك (هيئات) و(دواوين) و(محليات) تقوم بمهمة (أكل حقها) خير قيام .. إنت خليك بس فى (الفول) و(البوش) والطماطم بالدكوة إذا إستطعت إليها سبيلا أما باقى الأكل فهنالك عباد أختصهم الله بذلك .
4- لا تضحك :
الضاحك ليها شنو؟ أمشى كدى أول حاجه شوف (الجمرة) فاضل فيها كم؟ وأدى الأولاد الواقفين ديل حق الفطور والمواصلات وأدفع لبتاع النفايات ده قبلما يودوك (الحراسة) وجيب لى (أم العيال) الراقده (سلطه) دى دواء (الملاريا) لو فى حاجه تضحك عليها أضحك على روحك !!
5- لا تتردد :
لا تتردد فى قبول أى (عمل) تجده مهما كان متدنيا ولا يتناسب مع ما لديك من (شهادات) وخبرة وخلافه فوجود فرصة عمل (شريفه) مهما كانت أصبحت مستحيلة كما الغول والعنقاء والخل الوفى خاصة إذا لم يكن أحد أفراد (قبيلتك) أو (عائلتك) أو (جماعتك) يحتل أحد المراكز المرموقه .
6- لا تلعب :
لأنك ما ح تقدر تلعب مع (الكبار) و(الدوليين) ديل لأنو أصلا إنت ما عندك مساحه عشان تلعب فيها .. يبقى أحسن ما تلعب ؟؟ هو إنت عندك حيل تلعب بيهو (البوش والطماطم) ديل ما فيهم أى (سعرات حرارية) خلى (اللعب) لى ناس (الحليب البارد) و(تمر المدينه) وفواكه (لبنان) و(الخرفان المشوية) !! حريفين وبعرفو ليهو كويس .. ممكن غايتو تلعب ليك (عشرة طاولة) بس ما تدمن الشغلانه وتقعد كتير لأنو لو جاتك (بواسير) دى علاجا براهو عاوز ليهو (مليون) وشوية !!
7- لا تحلم :
الحلمان ليها شنو؟ هو فى زول (ميت) بيحلم؟ وأفرض حلمت غير ما تحلم بى إنك زائغ بالشوارع وواحد لابس (أبيض) بيطارد فيك وشايل ليهو دفتر (إيصالات) أو تحلم إنك عاوز تعمل (عملية) لى ولدك وما عندك (حقها) ح تحلم يعنى بشنو؟ .. من أجل صحتك وحيلك المهدود أصلا .. لا تحلم !! إذا أردت أن تحلم فنام فى سرير طفلك الصغير حتى تحلم (أحلام كرتونية) بعيدا عن واقعك المرير !!
8- لا تتألم :
بالرغم من إنو جلدك مفروض يكون (تخن) وما فيش حاجه فى الكون مفروض تألمك نسبة لما عانيته من آلام ومعاناة ومصائب أقلها أنك صابر على (مرتبك الشهرى) الذى يساوى بالتمام والكمال قيمة (إيجار المنزل) الذى تسكنه بالرغم من ده كلو فحاول الا تتألم لأنو إذا إتألمت أو ما إتألمت مش ح يحس بيك زول وإبتعد من الأشياء المؤلمة حقا كـ(التلفزيون) و(نشرات الأخبار) !!
|
|
Post: #31
Title: Re: فلاحتكم فى معاوية عبيد تعالوا شوفوا الرسالة دى
Author: معاوية عبيد الصائم
Date: 10-30-2011, 05:51 PM
Parent: #29
Quote: 9- لا تقرأ :
لا تقرأ لأنو القراية ذاتا بقت (مستحيلة) لو عاوز تشترى ليك كتاب إلا تدخل ليك (صندوق) ولو دخلت ليك صندوق الناس كلها لأنها متضايقه ح تقول عاوزة (الصرفة الأولى) وح يدوك (الصرفه الأخيرة) ولما تصرفها وتمشى تشترى (الكتاب) ح يلاقيك بتاع (النفايات) فى السكه يشيل منك (القروش) .. ريح دماغك وأبعد من (القرايه) بلا (قراية) بل غم ما من زمان وإنت قاعد تقرأ .. القراية عملت ليك شنو؟
10- لا تستعجل :
لا تستعجل فالعجله من الشيطان والمثل بيقول (تجرى جرى الوحوش غير رزقك ما تحوش) .. لكن هسع (رزقك زاتو) فى تلتله !!
11 – إبتهج بالأعياد :
حيث أن حياتك أصبحت ضنكا محضا فحاول أن تبتهج بالأعياد .. وأهو عندك عيد (الإنجاز) جاى بعد كم يوم فأخرج إلى السوق لتشترى لك (جلابية) و(عمة) وملابس جديده (للأولاد) وأم (العيال) لزوم العيدية و(الإنبساط) والإحتفال بهذه الذكرى المجيده !!
|
|
Post: #32
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 05:56 PM
Parent: #29
Quote: الاخت العزيزة نجاة سيد احمد
لك التحية الطيبة و عبرك مثلها للفاتح جبرا
ان الفساد قد عم كثير من مناحى الحياة فى السودان هذا ان لم يكن كل مناحى الحية خاصة الرسمية
فمن لم يكن فاسدا فهو متستر عليه و عامل اضان الحامل طرشاء "ضارب طناش"
الله يشيل الكيزان و يريح اهل السودان منهم و من فسادهم الذى ازكم الانوف
تحياتى للاستاذ معاوية . |
لاخ الكريم الطيب رحمة ياخى ديل ما بشبعوا خالص وعينهم ما يملاها الا التراب تسلم وبنقول ربنا ينتقم منهم آآآميين.
|
Post: #33
Title: Re: فلاحتكم فى معاوية عبيد تعالوا شوفوا الرسالة دى
Author: معاوية عبيد الصائم
Date: 10-30-2011, 06:02 PM
Parent: #32
يا جبرااااااااااااااااااااااا ياخ تعال
Quote: نادى المسئول على (مدير مكتبه) فدخل اليه مسرعاً:
- أى أوامر سعادتك؟
- طبعاً فيه أوامر ...يعنى ناديتك ساااكت !
- اؤمر سعادتك
- أنا ملاحظ انو كل ما يجى (اكتوبر)الناس دى قاعده تتكلم وتكتب فى الجرايد وتعمل ندوات وكمان
الشغلانية جابت ليها غناء وأناشيد و(إستادات) !
- هو (أكتوبر) براهو سعادتك ما برضو لمن يجى (أبريل) بيحتفلو وآخر مقالات فى الجرايد والمجلات
وآخر ندوات ولقاءآت وشنو ما بعرف داك !
- أيواا ... يعنى الشعب يحتفل بى عيدين (أكتوبر وأبريل) ونحنا نحتفل بى (يونيو) بس؟ مش كده ؟
- نعمل شنو سعادتك ! مافى حاجه نعملا
- القال ليك منو مافى؟ أنا ناديتك هسه عشان نشوف الموضوع ده
- نشوفو كيف سعادتك
- أيواا أنا قررت إنو نشيل (أكتوبر وأبريل) ديل من شهور السنة ونخلى السنة عشرة شهور !
- ده كلام شنو سعادتك ؟ الدنيا كووولها السنة فيها (إطناشر) شهر
- أنحنا يا إبنى (كوم) وباقى دول العالم دى كووولها (كوم) نحنا لازم تكون حاجاتنا مختلفة ، مالو
لو عملنا تقويم خاص بينا ؟ وإتخلصنا من الشهر الإسمو (إكتوبر) وكمان الشهر الإسمو (ابريل) ده !
- لكن سعادتك كده نحنا ح نخالف (تقويم) العالم كلو
- وأنحنا لمن (جرينا الوكت) ساعة لى وراء الحصل شنو؟ نحنا يابنى لازم يكون عندنا تقويمنا الخاص بينا
ومفيش حد يفرض علينا التقويم بتاعو ... يابنى (من لا يملك تقويمو لا يملك قرارو) - مواصلا- كدى
نادى ليا (مستشار شئون التقويم) حالاً !
لم يمض وقت طويل حتى حضر سعادة المستشار لشئون(التقويم)الذى خاطب المسئول :
- صباح الخير سعادتك
- صباح النور .. (صلاح) مدير مكتبى ما كلمك؟
- لا والله إن شاء الله خير ؟؟ عاوزين (تنقصو الساعة) تااانى؟؟
- لا لا المرة دى عاوزين ننقص الشهور!
- (فى إستغراب) : كيف يعنى !
- عاوزين نشيل (أكتوبر وأبريل) ونشتغل بى (عشرة شهور) ! يعنى السنة تبقى عشرة شهور بس !
- لكن سعادتك ده ما ممكن كده ح نخالف العالم !
- ما ممكن ليه ؟ كل زول حر فى (تقويمو) ! إن شاء الله نعمل السنة (شهر واحد) والساعة (خمسين
دقيقة) .. مش على كيفنا ! وإلا كمان دى فيها أمم متحدة ومجلس أمن ؟
- طبعن سعادتك على كيفنا لكن بس (السنين) بتاعتنا بالنظام ده ح تمشى أسرع وح نفوت العالم !
- النفوتو كان فوتناهو هو العالم ده أصلو ما نفوتو فى حاجه ..
- لا ... لا سعادتك معليش لكن الكلام ده ما بجى كده
- طيب إنت مستشار على شنو؟ ما تورينا الكلام البجى
- (وهو يفكر) : سعادتك إنت عاوز تشيل (أكتوبر وأبريل) من شهور السنة صح؟
- صح
- ونحنا ما عاوزين المسألة دى تخلينا نتأثر بالتقويم العالمى كتير صح
- صح
- خلاص الأيام بتاعت (أكتوبر وأبريل) ديل نوزعا على باقى الشهور وبى كده تكون السنة بتاعتنا 365
يوم قدر السنة الماشى بيها العالم كلو!
تمت إجازة مشروع القرار القاضى بحذف (أكتوبر وأبريل) من شهور السنة وتوزيع أيامهما على بقية الشهور لتصبح بعض الشهور 36 يوما وبعضها 37 يوما ! وقد وجد القرار صدى واسع وتصدر نشرات الأخبار فى معظم القنوات الفضائية العالمية كما أصبح القرار محوراً للمناقشات والونسة فى (بيوت البكا) بدلاً عن (أخبار الكورة) و(الفساد) فهذا أحدهم يسأل فى دهشة :
- معقولة بس الشهر 37 يوم؟ هو أنحنا مرتباتنا كنا بنصرفا أساسا يوم 37 هسه يعنى ح نصرفا متين؟
- شنو يعنى المسألة ما واضحة ! يعنى عاوزه ليها يعنى (درس عصر؟) تانى تصرفوها معنى كده يوم 44 !
بعد عدة أسابيع وبعد أن أثبتت التجربة فشلها الذريع قام المسئول بالإجتماع مع مستشار (شئون التقويم) :
- شوف يا سعادة المستشار .. أنا شايف موضوع (العشرة شهور) فى السنة ده عمل (ربكة شديدة) للناس
فعاوزك تغيرو ليا وتشوف لينا حل تانى
- وأغيرو كيف؟
- تخت لينا شهرين(يونيو) تاانى بدل الشهرين الشلناهم؟
- (فى إندهاش) : يعنى السنة يكونو فيها 3 شهور (يونيو)؟
- ومالو مش نحنا حرين نخت العاوزين نختو ونشيل العاوزين نشيلو؟
- أكيد سعادتك دى طبعن ما فيها شك
- خلاص يبقى يناير فبراير مارس ( يونيو) مايو (يونيو) يوليو أغسطس سبتمبر (يونيو) نوفمبر
ديسمبر !
..
|
|
Post: #34
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 06:07 PM
Parent: #32
Quote: لا تتردد :
لا تتردد فى قبول أى (عمل) تجده مهما كان متدنيا ولا يتناسب مع ما لديك من (شهادات) وخبرة وخلافه فوجود فرصة عمل (شريفه) مهما كانت أصبحت مستحيلة كما الغول والعنقاء والخل الوفى خاصة إذا لم يكن أحد أفراد (قبيلتك) أو (عائلتك) أو (جماعتك) يحتل أحد المراكز المرموقه .
|
والله يا معاوية الحتة دى انا اضررتا منها شخصيا لما مشيت السودان عشان اقعد لى سنة ما لقيت لى ضهر كدا اتكل عليه !!!!
كل الناس بقوا غرباء التعين بالقبائل ،والاننتماء والقرة السوداء فى الجبهة حتى لو مصنوعة فى كشك فى سوق ليبيا .
|
Post: #35
Title: Re: فلاحتكم فى معاوية عبيد تعالوا شوفوا الرسالة دى
Author: معاوية عبيد الصائم
Date: 10-30-2011, 06:18 PM
Parent: #34
جبرااااااااا
Quote: أنا مؤمن تماما بأن أحد اسباب تخلفنا هى مشكلة إسمها التعلق بالمظهرو(القشور) دون النفاذ إلى الجوهر .. ويمكننى أن أدل على ذلك بمئات القصص والحكايات .. فبدلاً من العمل على التأسى بمناقب وأخلاق (الصحابه) والتابعين (ونشر الكتب والمؤلفات) عن سيرتهم , وإدخالها فى المناهج والمقررات حتى تدرسها الأجيال نجد أن القائمين قد إكتفوا بإطلاقها على بعض الشوارع ومدارس الاساس . بالأمس القريب وجدت إعلاناً لمدرسة (أطفال) أغلب الظن أنها حكومية إسمها مدرسة (إبن الأكوع) طفقت أشحذ ذهنى عمن يكون (إبن الأكوع) هذا ، قلت فى نفسى أن (الرجل) بلا شك سوف يكون (شخصية إسلامية) غير أنى تساءلت (ولماذا التسمية بإسم هذه الشخصية غير المشهورة بين عامة المسلمين؟) فهنالك مئآت إن لم يكن آلاف من الشخصيات الإسلامية الشهيرة المعروفة التى لعبت دورا هاما فى مسيرة الإسلام منذ عهد النبوة وحتى إنهيار الدولة الإسلامية فهل يمكن أن يكون الشخص الذى قام بتسمية تلك المدرسة قد (فط) كل تلك الأسماء المؤثرة وقام بتسمية هذه المدرسة بأسم هذا (الشخص) المغمور ؟
|
|
Post: #36
Title: Re: فلاحتكم فى معاوية عبيد تعالوا شوفوا الرسالة دى
Author: Nagat Sid Ahmed Elshiekh
Date: 10-30-2011, 06:19 PM
Parent: #34
Quote: تمت إجازة مشروع القرار القاضى بحذف (أكتوبر وأبريل) من شهور السنة وتوزيع أيامهما على بقية الشهور لتصبح بعض الشهور 36 يوما وبعضها 37 يوما ! وقد وجد القرار صدى واسع وتصدر نشرات الأخبار فى معظم القنوات الفضائية العالمية كما أصبح القرار محوراً للمناقشات والونسة فى (بيوت البكا) بدلاً عن (أخبار الكورة) و(الفساد) فهذا أحدهم يسأل فى دهشة :
- معقولة بس الشهر 37 يوم؟ هو أنحنا مرتباتنا كنا بنصرفا أساسا يوم 37 هسه يعنى ح نصرفا متين؟
- شنو يعنى المسألة ما واضحة ! يعنى عاوزه ليها يعنى (درس عصر؟) تانى تصرفوها معنى كده يوم 44 !
بعد عدة أسابيع وبعد أن أثبتت التجربة فشلها الذريع قام المسئول بالإجتماع مع مستشار (شئون التقويم) :
|
دى موبالغة ياجبرا،،،
تسلم يا وزير
|
|