سوداتل .. ثابت .. حرام عليكم.

طوال الشهر السابق وأنا في حالة بلاغات مستمره للساده شركة سوداتل وشركتها ثابت ..
بلاغات لتعثر الخدمه في الإنترنت ..
مشكورين أكثر من مره جاءوا ..
ولكن كما جاءوا .. ذهبوا ..
فلا يزال البطء .. والتقطع .. سيد الموقف.
وفي نهاية الشهر ..
ندفع الفاتوره..
رغم كل الضيق الذي تسببه هذه المشكلات من عدم سهولة إنسياب وسرعة الخدمه..

الغريب أن شركة ثابت للإنترنت تطرح تخفيضات في أسعار بيع الخدمه والإشتراك الشهري بين الفينه والأخري لكنها تفرض علي مشتركيها القدامي الأسعار الأعلي ولا سيتمتعون بالتخفيضات التي يستمتع بها المشتركون الجدد ..
كأنما شركة ثابت تكافئ مشتركيها الجدد وتعاقب مشتركيها القدامي بالفئات الأعلي للإشتراك الشهري وكان الأعدل لو أن الشركه تتحري العداله أن يكون سعر الإشتراك الشهري موحداً بين الجدد والقدامي لا أن يدفع المشترك القديم سعر أعلي والجديد سعر أقل ..
ما هذا يا ثابت..
إنتو كده بتطردو ناسكم القدام..

ما فاضل لينا يا ناس ثابت إلا نكورك ليكم تجو تشيلو العده.

والله اليومين ديل النت عندكم التقول راكب ليهو ضهر أبو القدح.

طلبت فحص المودم وباقي العده ..
وجقلبه ومسيه وجيه أكتر من مره ..
والحال في حالو ..
يكون من شنو؟؟
يا ربي يكون من الزرديه.

لكن ..
والشهاده لله ..
وما كسير تلج ..
وبرضو ما عشان يخفضوا لينا رسوم الإشتراك الشهري أسوةً بالناس الجداد ..
أقول ..
الشهاده لله ..
يتمتع موظفو سوداتيل بدرجه عاليه من الذوق ولباقة التعامل وسرعة الوصول للزبون ..
ولكن برضو ..
يجو يشيلو العده.
وللا يزيدو السرعه من ضهر أبو القدح لضهر حمار مكادي.
حمار مكادي زي بتاع عبد الله الكجيك .

يا رب تصبح الواطه..
واحد من إتنين :
يا إما يكون في حل جذري للمشكله ..
أو يفرتقو الأسلاك ويدفعو بدل حراق روح.

والله العظيم ..
منتهي البطء .. والسوء ..
أكتر من أنك تبلغ قسم الشكاوي ..
ويأتونك للمعاينه ..
حتي فحص المودم وغيره .. ومع ذلك لم يستطيعوا التشغيل بالصوره المثلي ..
يبقي إذن هنالك حلقه مفقوده .

محمد قسم الله .. كفارة يا حبيب
والجاتك في مودمك سامحتك
الظاهر عليك صدقت الدعاية دي

محمد جلال ..
سلام ..
إنتا عارف إتأكدتا تمام إنو المشكله مشكلة شبكه ..
الآن شغال سريع زي الحصان ..
والمودم ياهو المودم .. نفس الملامح والشبه ..
الكان محيرني ومشككني .. إنو ناس البلاغات جوني وكشفو علي التلفون والمودم والذي منو وطلعو ولا بِغِم ..
والنت راكب ضهر أبو القدح ..
أنصاص الليالي يفرفر.
طيب ياخي كان علي الأقل يقولو في مشكلة شبكه ..
خليناها حكاية المشتركين القدام والمشتركين بتاعين أمبارح.