Post: #1
Title: اخيرا الواحد حاسي انه بقي مغترب
Author: اساسي
Date: 10-26-2011, 12:30 PM
Parent: #0
زمان لما الواحد كان مواطن سوداني كامل الاهلية وعايش في السودان زيه وزي بقية خلق الله كان عندي استاندر للصفات الملازمة المغتربين السودانين في الخليج والسعودية واي مغترب امرره علي الاستاندر دا من خلال تصرفاته وصفاته كان بينجح نجاح منقطع النظير , اهم الصفات الكنت بشوفها في المغتربين كانت " نضامين باحترافية وكانه مسألة الصمت او الاستماع من العيوب الكانوا بحاولوا يتخلصوا منها " دي اول صفة كانت بتميز السوداني المغترب , الصفة التانية وهي اي مغترب عنده حوالي خمسة الي سبعة نكات وكانه كان بيوزعوها عليهم في المطار , نفس النكات في كل زيارة للسودان تلقي المغترب بيتحين الفرص عشان يردد فرمالاته من النكات ودي ما المشكلة المشكلة انه النكات في مجملها " بيض جدا " الا انه بيحكيها ويضحك عليها بضمير و بصوت عالي اكتر من الذين تم القاء النكتة عليهم ولكن دائما هناك من يجامل وهو طبع جبلنا عليه , الصفة التالتة وهي تكرار الكلام , يعني لو المغترب داير يشرح ليك اي حاجة تلقاهو بيقول الكلام ويقعد يكرره وكانه بيلقن في تيس يشيل ويعيد في الكلام المفهوم من البداية ولو المستمع ما عنده طولة بال عادي ممكن يجيهو شلل اطفال من كثرة تكرار المغترب لكلامه , الصفة الرابعة وهي عملية المقارنة ما بين هنا وهناااك وخاصة في اسعار شراء الحاجات او قيمتها بعملة البلد الجاي منها المغترب , وادمانه لمقولة دي والله هناك بي كذا ريال بس والحاقها بالجملة الشهيرة والله البلد بقت غالية ما بتتهبش , مما يخلق انطباع عريض بانه المغتربين ديل ناس جبارين وجلود رسمي , اللازمة الخامسة والمهمة انه نوعية كلام المغترب والفاظه التي يستخدمها هي الفاظ وكلمات عفي عنها الزمان وتجاوزها القاموس السوداني المتجدد بسرعة الصاروخ , يعني اول ما تسمع مغترب بينضم بينضم بينضم وهو عادة ما لايسكت كما اسلفان يجيك احساس طوالي بانك بتحضر برنامج من الامس , يعني المغترب تلقاهو معلق في نوعية الكلام الكان متداول لحين اغترابه لذا عند الاستماع للمغترب تحن عليهو وتقرب تواسيه بقولك " يا حليلك يا تتي " وكثير من الصفات واللوازم التي تصاحب اي مغترب وفي البوست متسع لذكرها .
اها انا من اغتربت في البلد دي قبل حداشر سنة وانا حريص كل الحرص في عدم التحاق اي صفة من هذه الصفات بي , ولكن بمرور الايام والسنوات بدات اكتشف انه اخوكم اتصيع وبقي زيه وزي اي مغترب ماسورة , قبل كم يوم كدا كنت بتونس فجاة اكتشفت ليك نفسي اني ما سكت من قعدت شغال انضم اضنم لحدي ما حنكي وجعني وما عندي رغبة في السكوت اطلاقا وما قاعد اسمع زاتو غير كلامي , بالنسبة للنكت دي الواحد ما استلم الكوتة حقتو لسع لكن للامانة الادبية وحدها بتجبرني اقول انه كل ما اكون مع اخوي الكاشف " احمد التجاني " يحكي لي في فرمالاته من النكت تلقاني بضحك بعمق ومسؤلية وكاني بسمع النكتة منه لرابع مرة فقط بالرغم من اني توقفت عن حساب المرات التي حكي لي فيها نفس النكتة ^_^ وعلي يقين اني ساضحك مرات اخري في نفس النكت المحكية بضمير واصرار , اما بخصوص عمليات المقارانات فالواحد اكتشف انه المقارنة ما نابعة من جلدنة ولا جبر ولكن لانه المغترب بيكون عمل الممكن والما ممكن وباع الوراهو والقدامه عشان يمشي السودان عشان كدا الواحد مضطر يحسب ويقارن , يعني بصراحة في دي المغتربين معزورين ومجبر اخاك لا جلدة ^_^ , اما الالفاظ القديمة والحنك البايت فكلكم نظر مرة اخوكم بتونس مع اولاد اخته جو من السودان فجاة نط ود اختي الشليق وقال لي والله يا خالو اديتني احساس انه طالع من خشمك غبار يا خالو حنكك دا خلوهو زمان , لكن اخوكم ما كشافة بس ظليت بتونس معاهو لحدي ما حسيت بانه عملت ابديت كويس يؤهلني للنضمي سنتين منظورات .
لكن الخلاصة اجمالا كدا الواحد ممكن بكل ارتياح يتقبل تهانيكم وتبريكاتكم علي انه اصبح مغترب كامل النصاب والصفات وبقي عضو كامل الفعالية في جمعية " تتي "
|
Post: #2
Title: Re: اخيرا الواحد حاسي انه بقي مغترب
Author: وليد محمد المبارك
Date: 10-26-2011, 12:42 PM
Parent: #1
يا اسس
انت قايلنا عاوزن نعمل قاموس الرندوك من هين ؟
ما عشان نتخلص من كلامكم البيض ده
وحا نوزعوا في سودانير مع الكتب الفي جيب الكرسي القدامك داك
زاكر واعمل رفرش وخش توشك
امسخ حاجة الموسيقى التصويرية حقتكم
اداهو بنية طرااخ
وجبدو ليك جبدوت
وخشيت ليهم توووووشك
|
Post: #3
Title: Re: اخيرا الواحد حاسي انه بقي مغترب
Author: بشير أحمد
Date: 10-26-2011, 12:48 PM
Parent: #2
| Quote: مرة اخوكم بتونس مع اولاد اخته جو من السودان فجاة نط ود اختي الشليق وقال لي والله يا خالو اديتني احساس انه طالع من خشمك غبار يا خالو حنكك دا خلوهو زمان |
يعني طلعت من زمن حفرو البحر.
_______
تحياتي يا ابومحمد.
|
Post: #4
Title: Re: اخيرا الواحد حاسي انه بقي مغترب
Author: حيدر حسن ميرغني
Date: 10-26-2011, 12:51 PM
Parent: #3
إذا هرمت يارجل
|
Post: #6
Title: Re: اخيرا الواحد حاسي انه بقي مغترب
Author: محمد إبراهيم علي
Date: 10-26-2011, 01:00 PM
Parent: #3
Quote: اداهو بنية طرااخ
وجبدو ليك جبدوت
وخشيت ليهم توووووشك |
يعني عمر الفاروووغ مغترب ليهو زمن
|
Post: #5
Title: Re: اخيرا الواحد حاسي انه بقي مغترب
Author: أبوعبيدة محمد الأمين
Date: 10-26-2011, 12:53 PM
Parent: #2
أساسي ياقداد
ياخ قديتنا وكمان نسيت حاجات:
كلام المغترب عن التجهيز للسفر ذاتو وجيتو للمطار ووزن العفش وقيام الطائرة وصولها للخرطوم والعفش اللي إتأخر وبتاع الجمارك الثقيل داك
تاني شي تأشيرة العودة والذهاب لجهاز المغربين الوهم ديلاك ورجعوني للشباك تلاتة مرات ولقيت ورقة الضرائب مافي جيت راجع البيت تاني ووووو
بعدين في حاجة متعلقة بالمسألة الفوق دي وهي شغف ووله المغترب - بالذات بتاعين السعودية - بتصوير المستندات - وكمان ما تنسى موضوع تأكيد الحجز
اها يلا واصل
|
Post: #7
Title: Re: اخيرا الواحد حاسي انه بقي مغترب
Author: طارق جبريل
Date: 10-26-2011, 01:06 PM
Parent: #5
يا عمك نسيت ورنيش الجزمة
وسفري قرب
|
Post: #9
Title: Re: اخيرا الواحد حاسي انه بقي مغترب
Author: قيقراوي
Date: 10-26-2011, 01:17 PM
Parent: #5
Quote:
لكن الخلاصة اجمالا كدا الواحد ممكن بكل ارتياح يتقبل تهانيكم وتبريكاتكم علي انه اصبح مغترب كامل النصاب والصفات وبقي عضو كامل الفعالية في جمعية " تتي "
|
الحمد لله الذي عافانا عما ابتلاكم به
--------
اكبر دليل على كلامك دا انك ما شايف اي فرق بين عصر الانترنت العلينا دا ..
وايامك الكنت فلسطين و من الحاقدين على المغتربين ..
بتتكلم عن ياتو مغتربين انت بالضبط ..
لانو صراحة كدا الغربة احساس داخلي ؤ كدا ..
و وصفك دا لمغربين عندهم شلل اطفال وجداني عدييل كدا!
و الحمد لله في البدء و في الختام .. و على كلِ حال
|
Post: #8
Title: Re: اخيرا الواحد حاسي انه بقي مغترب
Author: ماجد حسون
Date: 10-26-2011, 01:14 PM
Parent: #1
اقسم بالله لولاك ودكين ما دخلت سودانيس اونلاين الا لماما
|
Post: #10
Title: Re: اخيرا الواحد حاسي انه بقي مغترب
Author: عبدالله ود البوش
Date: 10-26-2011, 01:27 PM
Parent: #8
المغتربين باختصار شديد :
الراجل كضاب
والمرة سمينة
والشفع جن احمر
وكلامك الكتير دا كلو جزء من البند الاول .
اها واصل قدامك بندين هامين
.
.
اساسي يا مونساتي يا ممتع واصل لمزيد من الامتاع والدهشة
|
Post: #11
Title: Re: اخيرا الواحد حاسي انه بقي مغترب
Author: عمر الفاروق
Date: 10-26-2011, 02:02 PM
Parent: #10
تعريفي للمغترب بسيط جدا ويبدو آنو ود التجاني أكدها..
المغترب..يحكي ليك نفس النكتة خمسة مرات ثم يطالبك بي الإندهاش..
بالنسبة لي النضمي فيبدو إنو فقط أغتربت أمبارح لأنو أمبارح انا نضمت نضمي حق اربعة شهور لي قدام..
تخريمة
أساسي لو في حاجة بتأكد إنك اغتربت فهي مواضيعك البيض الرجعت بيها دي
|
Post: #12
Title: Re: اخيرا الواحد حاسي انه بقي مغترب
Author: احمد التجانى احمد
Date: 10-26-2011, 02:25 PM
Parent: #11
| Quote: أساسي لو في حاجة بتأكد إنك اغتربت فهي مواضيعك البيض الرجعت بيها دي |
والله صدقت يا عمر الفاروق
تماما مواضيعه الاخيرة موغلة فى المحلية (Locality) لذلك سيستعصى هضمها لمن هم خارج فلك جهاز شئون المغتربين
مرة ريال ومرة ملف وقنصلية , المصطلحات دى فى معانا مغتربين فيرست كلاس لسة ما سمعوا بيها
لما تشعر بانه علاقتك اتوضدت بالقنصلية ومواضيع الجالية والروابط المختلفة بعد كدة انسى موضوع العودة
وخلى اسامى اولادك من صهيب ومشعل ولفوق
|
Post: #13
Title: Re: اخيرا الواحد حاسي انه بقي مغترب
Author: عمر الفاروق
Date: 10-26-2011, 02:40 PM
Parent: #12
يا ود التيجاني..أساسي صحبك ده من النوع الأول ما رسلو ليهو يجي السعودية بيكون شبك أصحابو في الحلة انا رسلو لي " الشيكة "..
|
Post: #14
Title: Re: اخيرا الواحد حاسي انه بقي مغترب
Author: حيدر حسن ميرغني
Date: 10-26-2011, 02:58 PM
Parent: #13
| Quote: رسلو لي " الشيكة ".. |
وطلَعت الباسبورطي
وعلي باليمين السعودية دي كان فضل فيها فرد ريال نجابد فيهو الملك زاتوو
|
Post: #15
Title: Re: اخيرا الواحد حاسي انه بقي مغترب
Author: البحيراوي
Date: 10-26-2011, 03:31 PM
متعة يا أساسي
بس بالله سجل لينا حزب عديييييييل كدا وخلينا نصيغ المنافستو ونشوف أدوات العمل .
بحيراوي
|
Post: #16
Title: Re: اخيرا الواحد حاسي انه بقي مغترب
Author: ABUHUSSEIN
Date: 10-26-2011, 03:42 PM
Parent: #15
غايتو يا اساسي البعرفو أنا إنو كل زول بحكم على اللي شافو و إنت حكمت على على المغتربين
بي المغتربين اللي حولك و شكلهم كدا المغتربين بيض زيك...
غايتو يا أساسي الفيك إتعرفت و نحن من زمان مغشوشين فيك
انا غايتو عن نفسي لو لاقاني زول و قال لي بتعرف اساسي و الله بنكرك عديل كدا..
ياخ بقيت فظيع
|
Post: #17
Title: Re: اخيرا الواحد حاسي انه بقي مغترب
Author: ABUHUSSEIN
Date: 10-26-2011, 03:45 PM
Parent: #16
في حاجة نسيتها.........
معرفتك بي أحمد التجاني و ودالقاضي كشفت سطحيتك و إنك زول فعلاً بيض....
|
Post: #18
Title: Re: اخيرا الواحد حاسي انه بقي مغترب
Author: Elawad
Date: 10-26-2011, 04:05 PM
Parent: #17
واصل يا أساسي ستكون أول مغترب يكشف كود المغتربين. شايف ناس أبو حسين كارهين ذاتهم و الجاكين من أصلهم كمغتربين جايين يغتالوا شخصيتك. حتكون بشاشا بتاع المغتربين.
بالجد يا زول والله كتابة جميلة كالعادة.
|
Post: #19
Title: Re: اخيرا الواحد حاسي انه بقي مغترب
Author: عمر الفاروق
Date: 10-26-2011, 04:46 PM
Parent: #18
انا ما محتار إللللا في المستمتعين ديل!!..يكونوا مغتربين ؟ ياربي؟
أساسي ياخ إنت لو واصلت على ذات النهج فزي ح تحذا مع مزارع فقيه ودجاج دو..
|
Post: #21
Title: Re: اخيرا الواحد حاسي انه بقي مغترب
Author: محمد الطيب يوسف
Date: 10-26-2011, 06:12 PM
Parent: #19
فعلا بوست بتاع مغتربين وهم
بالله لو ماوهم في زول لحدي هسي بقول الحاجة دي بيض
والغريبة قيقا يجي يقول ليك مواكب وهو لي هسي بقول المافي شنو
أبسط يا تتي ظهروا ليك أخوان
مغتربين اوت اوف ديت محتاجين ابديت
مغترب سابق
|
Post: #20
Title: Re: اخيرا الواحد حاسي انه بقي مغترب
Author: ismeil abbas
Date: 10-26-2011, 05:00 PM
Parent: #18
ألأخ/أساسى تحياتى...والحمدالله على عودتك وإنضمامك لمنظمة تتى..وحن علينا بالله شوية.
إتصلت بيك ولم ترد وعلى مايبدو ان الوقت صلاة عندكم..سأعاود ألأتصال بأذن الله.
المغتربين فئات فئة غير مواكبة..ودى ماقاعد تزل السودان إلا بعد فترات طويلة..وهذه تنطبق عليها ما كتبته فى هذا البوست الجميل. وماكتبه ألأخ/عبدالله ودالبوش.
بالتحليل البسيط الواحد من ما يطول من ألسودان قلبو بموت وهمتو بتنتهى..ويبدآ الكذب..والمرأة تزداد شحم وألأولاد يبقو عوره لعدم إختلاطهم بأندادهم إلا من رحم ربى.
وربنا يرد غربتنا ويصلح بلدنا ويمتعنا بالصحة والعافية.
|
Post: #22
Title: Re: اخيرا الواحد حاسي انه بقي مغترب
Author: Mahmoud Mustafa Mahmoud
Date: 10-26-2011, 09:05 PM
Parent: #20
سماني يا "ثمين"..
كيفك يا حبيب..وحمدا لله بالشوفة وكدا...
ياخ أنا في الفترات الأخيرة دي لاحظت إني لما أنزل إجازة...البنات بيقولوا يا "عمو"...والشباب بيقولوا لي يا "حاج"...
فااشنو؟؟؟ عرفت ليك روحي من حزب تتي جناح "الوساع"...
طوالي قاعد أقرررررب أعمل سجدة شكر مع انقضاء الإجازة (المرهقة)...
نفس الشعور موش؟؟
يلا شوت.....حمامكم بدي ولا بعضي؟؟ كااااااااااااااااااااك
شكراً على أي حال....
|
Post: #23
Title: Re: اخيرا الواحد حاسي انه بقي مغترب
Author: احمد التجانى احمد
Date: 10-27-2011, 05:57 AM
Parent: #22
| Quote: معرفتك بي أحمد التجاني و ودالقاضي كشفت سطحيتك و إنك زول فعلاً بيض.... |
عمو لقى ليه سيرة بحر جديدة مسك فيها , معاوية الصايم كان ماسك مننا بلاوى
انت ياعمو من المغتربين الاتكسرت اسنانهم وعضامهم فى الاغتراب
ما باقى الا عضم المخروقة تكسرها ونشحنك بصحبة كرسى متحرك
للبلد تمشى تتم باقى هضربتك هناك
انا ح اخليك لود القاضى بيعرف ينظمك تماااام
|
Post: #24
Title: Re: اخيرا الواحد حاسي انه بقي مغترب
Author: ibrahim alnimma
Date: 10-27-2011, 06:21 AM
Parent: #23
اساسي ازيك ياخي والله فعلاً كتابة ممتعة .....
فقط لدي ملاحظة بسيطة ، لاحظت قبل ان اغترب ان قصة الكلام الكتير مش ملازمة المغتربين في السعودية فقط، انما تشمل الحجاج ايضاً فالحاج عند عودته من الحج يلم فيك توصيف للرحلة منذ مفارقة السودان لحين العودة ، ماراً بطواف القدم ثم عرفة ومني وشراب القهوة
في مني ومن ثم لا ينسي المزاحمة ووصف الحجيج من نجيريا اللبنانين ولن ينسي ان الايرانين وزحماهم .
ياخي يبدو ان مثل هذه الصفات يحملونها من السعودية سواء كانو حجاج او مغتربين
Quote: لما تشعر بانه علاقتك اتوضدت بالقنصلية ومواضيع الجالية والروابط المختلفة بعد كدة انسى موضوع العودة
وخلى اسامى اولادك من صهيب ومشعل ولفوق |
والله ياحمد التجاني غايتو انا سمعت انو الواحد من يبدأ يقرأ الصحف الصباحية حقت البلاد المضيف ، يكون خلاص رجوعه اصبح صعب ، وعلي طول ببقي يسأل من الجنسية والتجنس.
|
Post: #28
Title: Re: اخيرا الواحد حاسي انه بقي مغترب
Author: خالد عبد الله محمود
Date: 10-27-2011, 09:15 AM
Parent: #24
| Quote: ود اختي الشليق وقال لي والله يا خالو اديتني احساس انه طالع من خشمك غبار |
والله صحي الولد خال !!
نفس القطامة و طولة اللسان !!
|
Post: #25
Title: Re: اخيرا الواحد حاسي انه بقي مغترب
Author: khaleel
Date: 10-27-2011, 06:33 AM
Parent: #23
يا اساسي
معاك احمد التجاني ثروة قومية خليهو يحكي ليك عن جبارة الله
وعن الزول البياكل الضلعة في كل عرس
وعنده حكايات كثيرة ومثيرة وبعدين لازم كل سنة تمشي السودان وتشوف الجديد المبتكر في المصطلح والغناء
بمناسبة الغناء سمعت اخر اغنية
بتاعة
كلو من بابا علا البوابة
وخلاني اتشابا
|
Post: #26
Title: Re: اخيرا الواحد حاسي انه بقي مغترب
Author: Mahmoud Mustafa Mahmoud
Date: 10-27-2011, 07:40 AM
Parent: #25
ثم إنه ياخي الناس بقوا بستعملوا ليك كلمة "يــلا"...ساي كدا...
آخر مرة مشيت ليك فيها جهاز المغتربين...لعمل تأشيرة الخروج...
أها لقيت لي "بنية" معقبة...طبعاً أعمال ولفظة التعقيب والمعاملة ..كلها ألفاظ عرفناها هنا في البلد دي...
أديتها ليك أوراقي ...فحصتها..قالت لي: "يــلا" الإجراءات دي حا تكون كدا وكدا وكدا..."يلا" الرسوم كدا وكدا وكدا....
أديتها ليك القروش...قالت لي: "يـــلا" إنت يا "عمـــــــو" ممكن تقعد هنا وأنا أخلص ليك الإجراءات...
ما شنو...نظام أنا قاشر بجلابية وعمة...
فااشنو....حمدت الله إنها ما قالت لي يا "حبوبة"...
علي اليمين الواحد بقى يتعقد...
..
|
Post: #27
Title: Re: اخيرا الواحد حاسي انه بقي مغترب
Author: قيقراوي
Date: 10-27-2011, 08:50 AM
Parent: #26
يا (سابقاً)
Quote:
فعلا بوست بتاع مغتربين وهم
بالله لو ماوهم في زول لحدي هسي بقول الحاجة دي بيض
والغريبة قيقا يجي يقول ليك مواكب وهو لي هسي بقول المافي شنو
أبسط يا تتي ظهروا ليك أخوان
مغتربين اوت اوف ديت محتاجين ابديت
|
ياخ [المافي شنو] دي بعث تراث ؤ كدا يعني ياخي!
--------
* غايتو انا و بشاشا كـ(سلفيين افريقانيين) حدنا معاكم ترجعوا لدين الاجداد ..
و عبادة آمون رع..
ويحكم فقد صبأتم!!
|
Post: #29
Title: Re: اخيرا الواحد حاسي انه بقي مغترب
Author: محمد البشرى الخضر
Date: 10-27-2011, 04:47 PM
Parent: #27
Quote: بمناسبة الغناء سمعت اخر اغنية
بتاعة
كلو من بابا علا البوابة
وخلاني اتشابا |
ودا كلو من وايل
وايل قفل الموبايل ...
آخر غنية شنو يا خلي, إنت ما رجعت ليك كم سنة ؟
دي من الفين وستة مدورة يا معلم
|
Post: #30
Title: Re: اخيرا الواحد حاسي انه بقي مغترب
Author: احمد التجانى احمد
Date: 10-28-2011, 01:49 PM
Parent: #29
السمانى ياخ اعمل ليك انترنت فى البيت
الكتابة فى المنابر تفاعلية , وليست "هت اند رين" زى كتابة الجرائد
ولا ما تفتح بوستات فى نهاية الاسبوع
_____________________________
ابو القوق تحياتى ياخ
اساسى بياكل وبيقش خشمه
مع اننا متفقين على شفرة تثبيت "once" انه الحكوة اتقالت من قبل
|
Post: #31
Title: Re: اخيرا الواحد حاسي انه بقي مغترب
Author: جمال الباقر
Date: 10-28-2011, 03:20 PM
Parent: #30
غاب عن المنبر دهرا
ثم عاد له مغتربا كامل النصاب
|
Post: #32
Title: Re: اخيرا الواحد حاسي انه بقي مغترب
Author: jini
Date: 10-28-2011, 04:20 PM
Parent: #31
| Quote: اخيرا الواحد حاسي انه بقي مغترب |
خذلتني يا جوك فإياك بنيت فيلا طابقين
القاك بقيت كامل الدسم ودخلت فى الكاتوغرى بتاع
" نسوانهم سمان وأولادهم مدلعين ورجالهم كضابين"
اها المدام ما بقت تحلف
بي " يبقى لي بخروج نهائى"
والله يا اساسي أنا من كترت النضم لمن بقيت دائر لي كاتم صوت!
على جنبة برة البيت
جني
|
Post: #33
Title: Re: اخيرا الواحد حاسي انه بقي مغترب
Author: يوسف محمد يوسف
Date: 10-28-2011, 06:04 PM
Parent: #32
حبيبنا اساسى
تأسفت و الله يا اساسى لانك بعد حداشر سنة ... ما زلت فى " العلامات الصغرى " للاغتراب !!
بطريقتك دى لو قايل روحك بقيت مغترب .. تبقى غلطان ثم غلطان .. بتاع " الجرجير " فى سوق برى ما يشتغل بيك !!
لذلك انصحك بأن تدخل سريعا دورة تدريبية متقدمة فى " العلامات الكبرى للاغتراب * " !!
خليك مع الزمن !!
ــــــــــــــــــــــــــــــــــــــــــــــــــــــــــ
*" العلامات الكبرى للاغتراب :
العمارة .. المواد المشحونة من أيطاليا .. الحمامات الجاكوزى ..العفش من الصين .. و العربات من المانيا .. اما الخدم فمن الفلبين و اندونيسيا
و شوية ثعابين عشان المساج سيوردها لك " ود شيقوق " من اسرائيل ..
حاجات زى كدا ..
تقول لى نكات .. هو فى سودانى قاعد يضحك .. يا معلم ديل خشومم مصممومة من كترت " الكريج " !!
الحق روحك .. عشان ما يقولوا عليك مغترب .. فالصو
|
Post: #34
Title: Re: اخيرا الواحد حاسي انه بقي مغترب
Author: اساسي
Date: 10-28-2011, 07:17 PM
Parent: #33
انا تفاعلي في البوست دا اتفاعلته وانتهيت يا صحبي , بعدين انت وعمر الفاروق ما جيتو لي تفاعل ^_^
|
Post: #35
Title: Re: اخيرا الواحد حاسي انه بقي مغترب
Author: اساسي
Date: 10-28-2011, 07:28 PM
Parent: #34
وشكرا لكل المداخلات التفاعلية مع البوست
|
|