رأيي المتواضع - والذي يمثلني أنا افقط دون أن يكون له أي انعكاس ديني أو دنيوي -
هو أنّ من لا يستطيع شراء الأضحية نقداَ أو لديه أولويات أهم من الأضحية .... لا داعي أبداً لأن يدخل نفسه في التزامات أقساط بسبب الأضحية .
Post: #12 Title: Re: لا حولااااا .. خروف العيد بالأقساط وبإعلان كمان .. خروف ولا ركشة؟؟ Author: Dr. Ahmed Amin Date: 10-21-2011, 11:53 PM Parent: #11
Quote: هو أنّ من لا يستطيع شراء الأضحية نقداَ أو لديه أولويات أهم من الأضحية .... لا داعي أبداً لأن يدخل نفسه في التزامات أقساط بسبب الأضحية
أخي هاني كلامك صحيح وسليم .. والحكاية بقت بوبار أكتر من واجب ديني
يمكن مجمع الفقه الاسلامي عنده فهم في الفتوى (الغريبة) ده ...
كله شيئ جائز
Post: #13 Title: Re: لا حولااااا .. خروف العيد بالأقساط وبإعلان كمان .. خروف ولا ركشة؟؟ Author: Nagat Sid Ahmed Elshiekh Date: 10-22-2011, 00:44 AM Parent: #12
سلام يا دكتور احمد كلو ممكن فى بلد العجائب المليون، الضحية بالاقساط ، الحج بالبروفة اولآ ثم بالدين،
الرشوة حلال ، السرقة ،القتل ، الاغتصاب ، الدهس بالعربات الحكومية و و و و....
ياخ بلا يخمهم.
Post: #14 Title: Re: لا حولااااا .. خروف العيد بالأقساط وبإعلان كمان .. خروف ولا ركشة؟؟ Author: Dr. Ahmed Amin Date: 10-22-2011, 09:23 AM Parent: #13
أهلا يا نجاة ..
Quote: الضحية بالاقساط ، الحج بالبروفة اولآ ثم بالدين،
ما مشروع حضاري وكده
والناس نايمه في العسل ...
Post: #15 Title: Re: لا حولااااا .. خروف العيد بالأقساط وبإعلان كمان .. خروف ولا ركشة؟؟ Author: Dr. Ahmed Amin Date: 10-22-2011, 08:12 PM Parent: #14
الفاتح جبرة :
Quote:
مع اقتراب عيد الأضحى تبدأ عملية التفكير في توفير (حق الخروف) لدى المواطنين خاصة الفقراء منهم وذوي الدخل (المهدود)، هذا (الخروف) الذي حوّلته التقاليد من سُنّة مؤكدة تجوز عند المقدرة إلى ضرورة حتمية (مية المية) لا يمكن تجاوزها حتى في أحلك و(أفلس) الظروف.
ورغم التطمينات (تطمينات) المسؤولين (السنوية) بأن سعر (الخروف) سوف يكون في متناول مختلف الشرائح، إلا أن الواقع يقول بأن نسبة كبيرة من الأسر سوف لن تستطيع أن (تضحي) هذا العام نسبةً للأسعار الفلكية التي وصلت إليها أسعار (الخرفان) داخل (سلة غذاء العالم) بعد أن وصل سعر كيلو الضأن (كم وعشرين جنيهاً)..!
ولأن مسألة (الضحية) أصبحت كما أسلفت تقليداً اجتماعياً لازم الزول يقوم بيهو بأي طريقة (عندو وللاّ ما عندو) وفي ظل هذه (المسغبة) فالعبد للّه يتنبأ بانتشار محلات (تأجير الخرفان) كما حدث بالفعل في بعض أقطار الجوار (غير المصدرة للماشية):
- أهلاً وسهلاً يا جماعة.. طلبكم شنو؟
- واللّه أنا عاوز ليّا خروف معقول كده لمدة تلاتة يوم.. وكمان أخونا (عباس) ده عاوز ليهو واحد برضو بس عاوزو يومين بس عشان ظروفو بطالة وما بتتحمل..!
- (يؤشر نحو أحد الخرفان): الأسود بأبيض داااك إيجارو اليوم بي كم؟
- سبعين جنيه.
- (مندهشاً) سبعين شنو؟ ياخي هو أصلو (أتوس) وللاّ أكسنت..!
- (عباس متدخلاً): خليك من الأسود بأبيض ده طيب (البني) الشويه تعبان داك؟
- ( وهو يمسك به): الخروف البني ده إيجارو بي خمسين! (مواصلاً): وطبعاً الخرفان دي أكلها عليكم وبنديكم ليهو من هنا تشيلوهو معاكم عشان ما تكتلوها لينا بالجوع.
- بي مناسبة تكتلوها دي هسه خرفانكم الح نشيلا دي أكان حصلت ليها حاجة وكده.
- يا خوي نحنا سلمناك خروف تجيبوا لينا زي ما سلّمناكا ليهو وإلاّ التأمين بتاعك بيسقط..!
- (في إندهاش) تأمين شنو؟
- (يضحك متهكماً): يعني إنتو عاوزين تدفعو ليكم مية وخمسين وللاّ ميتين جنيه إيجار وتشيلو الخرفان دي سااااكت كده؟ ما لازم تختوا ليكم شيك أو وصل أمانة بي تمنا..!
مَا أن دخل (البوكس) الحلة.. وشَق صوت الخروفين أرجاء (الزقاق) الذي يسكنان فيه حتى فتحت الأبواب وخرج الأطفال يجرون وراء البوكس الذي أشار (كمال) لسائقه بالتوقف أمام البيت.
تم إنزال الخروفين حيث قام (كمال) بربط خروفه في (الحنفية) التي بالقرب من (باب الشارع) أما (عباس) فقد ربطه على جزع شجرة النيم التي أمام المنزل..!
- شنو يا جماعة الخرفان السمحة دي جبتوها من وين؟
قالها جارهم (كامل) وهو يقترب من (عباس) الذي كان يضع جردل البلاستيك الملئ بالماء للخروف.
- قلتا ليّا الخروف ده يا (عباس) أدوك ليهو بي كم؟
- خمسين..!
- (مُندهشاً): بالقديم وللاّ بالجديد..؟
- باليوم.. (مستدركاً) أقصد باليورو..!
- شنو اشتريتوهو من البنك الدولي..!
- يا حاج كامل هو تحقيق..؟ ما زول اشترى ليهو خروف.. تحقيق هو..؟
- يا (عباس) ياخ سؤالي ضايقك مالك..؟ أنا بس عاوز ليّا خروف زيو كده وقلتا أعرف الأسعار.
بينما كان (كمال) و(عباس) يجلسان على المسطبة أمام خروفيهما ذات العصر وأمامهما الراديو.
- شركة البدائل للإنتاج الفني يسرها أن تُقدِّم للمواطنين الألبوم الجديد (خروف الضحية).. يحتوي الشريط على (نغمات فردية).. نغمة ثنائي.. نغمات كورالية.. خلفيات مختلفة.. (مثلاً أصوات الشُّفّع وهم قاعدين يلعبوا معاهو)..!
- (الصوت الأنثوي المايع): عزيزي المواطن أحجز نسختك من الآن.. بخمسة جنيهات فقط يمكنك توفير خمسمية جنيه... مع تحيات (شركة البدائل للإنتاج الفني)..!
إلتفت (عباس) إلى (كمال) مخاطباً:
- ياخي ورطتنا ساااكت.. يعني هسه كان اشترينا لينا شريط مش كان وفّرنا حق الإيجار ده..!
- اعمل شنو؟ أنا مفتكر شركات الإنتاج الفني دي بتنتج بس (للحمير).. ما قايلا قلبت (خرفان)..
كسرة:
قال له: باللّه دي حالة بلد فيهو وزارة للثروة الحيوانية والزول ما يقدر يضحي فيها..؟
