مـا حـدث لـي صُـدفـة، اغـرب مـن الـخـيـال !!!

إتصلت علي أخوي في السودان. بعد سلآم ومرحب والسؤال عن الأهل وأحوال
البلد دخلنا في عشرة ونسة، فجأة قال لي: اسمع. يأخي قبل ما انسى اكتب عندك
رقم التلفون دا. أملآني رقم التلفون، بعد كتبتو قال لي: التلفون دا اداني ليهو عوض،
وقال ليك دا تلفون بدر الدين بابكر، وبدر الدين بيقول ليك ضروري جداً تتصل
عليهو لأنو مشتاق يعرف أخبارك بعد مرور كل هذه السنين.
عوض هو صديقي وإبن حِلتي، وبدر الدين بابكر هو خال عيدروس زميلنا في
البورض تربطني به صلة قرآبة، وهو كاتب مسرحي قدير إشتركنا معاهو في
بعض اعماله، وعوض ما زال مواصل.
إستلمت التلفون وقمت بالإتصال علي الأخ بدر الدين. كانت مفاجاءة لبدر الدين،
فقد إفترقنا علي ما اظن عام84. تحدثت معه لقرآبة الساعة والنصف، وكنت إستعمل
كروت للتلفون، وكلما يكمل كرت افتح كرت جديد وإتصل بنفس الرقم. ودعت الأخ
بدر الدين بعد ان تحدثنا حديث مُترع بذكريات ذلك الزمن الجميل، ووعدته بموأصلة
الإتصال...

بعد إسبوع تقريباً قررت إتصل علي الأخ بدر الدين لنعيد ما إنقطع من حديث. إتصلت
علي نفس الرقم.
: ألو...
: مرحبا.
: السلآم عليكم يا بدر الدين.
:يا زول انا ما بدر الدين.
: يا أخي لو سمحت دآير بد الدين بابكر.
: بدر الدين بابكر الأُستاذ في جامعة....( والله نسيت إسم الجامعة، فقد تشابه علينا البقر)
: ايوا.
: والله يا أخي دا ما تلفونو. دا تلفوني وأنا إسمي حسن خليفة.
:!!! غريبة!!! أنا إتصلت قبل فترة وتكلمت مع بدر الدين في نفس الرقم!!!؟
حسن خليفة: اسمع. الرقمين الأخيرآت اقلِبِن. يعني بدل 7733 خليها 3377 بيجيك
تلفون بدر الدين.
: طيّب، كتّر خيّرك كتير يا حسن خليفة، وآسف علي علي الإزعاج.
حسن خليفة: ولا يهمك يا زول. مع السلآمة.

شقلبت الأرقام وتاااااح رُحت متصل حسب خطة حسن خليفة.
: الو... السلآم عليكم.
: وعليكم السلآم.
: كيف حالك يا بدر الدين، إن شاء الله تمام؟؟؟
: يا أخي انا ما بدر الدين. أنا كمال عثمان.
: كمال عثمان!!!
كمال عثمان: أيوا كمال عثمان.
(سبحان الله انا طوالي عرفت الزول.)
: كمال عثمان بتاع كسلآ.
كمال عثمان: ايوا.
: إزيّك يا كمال. كيف أخبارك وأحوالك؟؟؟
كمال عثمان: الحمد لله تمام. إنت منو؟؟؟
: يا زول مُش إنت كمال عثمان، وأخوك فخري عثمان كان بيلعب في التاكا كسلآ؟؟؟
كمال عثمان: أيوا. بس فخري كان بيلعب في المرغني.
: بتذكر كانوا دايرين يسجلوهو ناس الهلآل، واخوك دامبا كان بيلعب في أهلي الخرطوم.
انا مشيت زرتو في راس الخيمة سنة 88.
كمال عثمان: ايوا. بس انا ما عرفتك!!!. إنت منو؟؟؟
: يا كمال يأخي نحن إشتغلنا مع بعض، وقضينا سنين جميلة مع بعض، وانا زرتكم في
كسلآ كمان. يا زول اكلنا مِلِح ومُلآح مع بعض، ومشينا رحلآت مع بعض، وحتي كمان
لعبنا كورة مع بعض. بس يأخي انا والله العظيم ما مصدق!!! لأني كنت بحاول إتصل
بزول تاني، وآخر ما كنت اتوقع تطلع لي إنت بعد كل هذه السنين!!!
كمال عثمان: طيّب آخر مرّة إتقابلنا متين؟؟؟
: آخر مرّة إتقابلنا في زواجي سنة 94
كمال عثمان: طيّب، لعبنا كورة في كسلآ؟؟؟
: لا، لعبنا في الخرطوم.
كمال عثمان: اوووعك تقول لي إنت معاوية المدير!!!
: يا كمال عثمان والله العظيم انا معاوية المدير.
كمال عثمان: والله يا معاوية انا هسّع جسمي قام كلوا شوّك.
قلت ليهو، تعرف يا كمال ربنا سبحانه وتعالى عارف إنو خوتنا لله في لله، لذلك اراد
ان يبعثها من جديد.

الأغرب من ده كلو!!! لمان حكيت لكمال موضوع حسن خليفة قال لي، تصدق انا مرآت
ناس بيتصلوا ويصحوني من النوم نُص الليل يسألوا من حسن خليفة!!!.
طبعاً بدر الدين بابكر طشّا، ولي يوم الليلة ما لآمي فيهو.
يا عماد عيدروس شوف خالك ده وين؟؟؟ انا هيّن...

كلامك الفوق ده أنا مصدقو نُصْ كَلَتش
خُت والله صحي كي تطمئن قلوبنا

...

الأخ معاوية المدير

تحية
ما ذكرته فعلا صدف أغرب من الخيال... كيف يحدث ذلك ؟ وهل هي صدفة؟ الله أعلم... عندما شاهدت فيلم (The Secret) وقرأت بعض الكتب التي تتحدث عن قانون الجذب The Law of Attraction بدأت اقتنع أننا نحن الذين نتسبب أو نجذب ما يحدث لنا سلبا كان أم إيجابا. عموما هذا موضوع يستحق النقاش والتداول.. اضيف أيضا حكاية حدثت معي قبل 30 عاما في مدينة جدة، وقد كتبت قبلا في بعض المنتديات وأسميتها حكاية (طيبة).. واليك الحكاية:

ما زلت وسأظل محتارا في ما حدث، رغم مرور حوالي 30 سنة على تلك الحكاية التي لم أجد لها تفسيرا، اللهم إلا (بركة ناس أم ضوا بان) هي التي تسببت في ذلك... ولكن من هي (طيبة) وما هي حكايتها وما علاقة ناس (أم ضوا بان) بالموضوع.

طيبة يا إخواني هي السيدة الفاضلة طيبة حسن يوسف زوجة أخينا العزيز الشاعر السر عثمان الطيب ، وهي من أم ضوابان (واهلها فقرا). حدثت القصة ، إن لم تخني الذاكرة في عام 1980م بمدينة جدة حيث كنت أقيم. وكان اليوم أربعاء. أرسل السر تأشيرة زيارة لزوجته طيبة وابنتها الصغيرة سارة. وصلت الطائرة ولم يكن السر على علم بوصول أسرته فلم يقابلهم بالمطار... وكلنا نعرف صعوبة الاتصالات في تلك الأيام. كانت الاجراءات تتطلب حضور الزوج لاستلام زوجته وإذا لم يحضر خلال 24 ساعة يتم ارجاع الزوجة من حيث أتت.

كنت وعدد من أبناء القرير نسكن في بيت عزابة في شارع (بن لادن) المتفرع من طريق مكة في كيلو 7 . وكنا كعادة العزابة نتناول وجباتنا بمطعم سوداني قريب من بيتنا. لا أدري ما الذي جعلنا في ذلك اليوم بالذات نذهب الى مطعم سوداني آخر يقع في بداية شارع بن لادن المتفرع من طريق جدة مكة . المهم ، تناولنا طعام الغداء ودفعنا الحساب وذهبت الى سيارتي وفتحت بابها في انتظار بقية الاخوان ليركبوا ونتحرك للبيت. وفجأة وقفت سيارة تاكسي بالقرب من سيارتي وترجل منها شخص سوداني واتجه نحوي مباشرة وسلم علي، فرديت السلام. أخرج من جيبه ورقة، وقال لي: (ياخي تعرف واحد اسمه السر عثمان الطيب؟). قلت له : بالحيل بعرفه... وضع الرجل كلتا يديه على رأسه وبدأ يصيح: ما معقول.. ما معقول.. مش ممكن. قلت له: ياخي شنو الما معقول. حكي لي الحكاية بأنه كان في الصالة الدولية بمطار جدة وقابلته سيدة اسمها طيبة ومعها بنت صغيرة وكانت تتوقع حضور زوجها السر لاستقبالها... شكرته على نخوته، فواصل حديثه قائلا: بالمناسبة في اسم تاني مكتوب في الورقة إنو لو ما لقيت السر أسأل عنه... اسمه (مامان).. قلت له: ايه رايك مامان دا يا هو أنا ذاتي؟؟؟ ... فما كان منه إلا أن جلس على الأرض غير مصدق لما حدث.. وبدأ يردد: لا حول ولا قوة إلا بالله.. لا حول ولا قوة إلا بالله.

سلام يا معاوية و سلام يا مامان
ياخ ديل قصص عجيبة جداً
و يا مامان و الله بكيت مع قصتك


انا حصلت لي قصة بنفس الطريقة مع صديقي و أخي
و زميل المنبر اخونا الفنان و الملحن ضياء
الدين ميرغني و كتبتها هنا زماااان ياريت
ضياء يجي يحكيها قصة اغرب من الخيال .

Quote: طيبة يا إخواني هي السيدة الفاضلة طيبة حسن يوسف زوجة أخينا العزيز الشاعر السر عثمان الطيب

إزيّك يا مامان، وأحوالك.
تاني كمان صدفة اغرب من الخيال!!!
هل تصدق بشير حسن يوسف اخو طيّبة من اعزّ اصدقائي،
وقضينا اجمل الأيام مع بعض. بشير الآن في دبي،
ومازلت علآقتنا قائمة وكلما اكون ماشي السودان
بغشاهو في دبي.
تصدق!!!

أليس من الغريب أن يقفز إلى ذهني كتاب Secret أثناء قراءتي حديث معاوية الشائق ثم يأتي مامان
على سيرة الكتاب الذي يذكرني ب ( تفاءلوا بالخير تجدوه)..

معاوية سلامي جاك، أصدق كل حرف جئت به وكذا رواية مامان بحذفرها وتفصيلها ، بس عايز اقول ليك حاجه
يا العزيز ، ليس هناك ما يسمى (صدفة) في هذا الكون المنظم بدقة تبعث على الدهشة، إن تُرِكت خلجة نفس للصدفة
لانتهى الكون والزمكان ولما كان كل شئ بهذا النسق العجيب الدقيق التقدير.
أثني على شجاعتك في طرح ما مر بك لأن كثيرين مرت بهم غرائب - وأنا منهم - إلا أنهم يبقونها طي الكتمان
إلا في دوائرهم الخاصة حتى لا تنتاشهم سهام السخرية بل والإتهام بالمبالغة إن لم يكن الكذب الصراح.

منذ سنوات قرأت كتابا بعنوان (علم خوارق العادات - البارانورمالوجيا) لثلاث مؤلفين يناقش بالضبط موضوعك
هذا على أساس علمي جميل ولم ينس أولئك المؤلفون تناول مسألة الظاهرة التزامنية Synchronistic Phenomenon بمستوى
علمي يفوق ما كتبه عنها السويسري كارل غوستاف يونغ ، فحوى ذلك المؤلف الكثير المثير .
يا سيدي إن المسألة أكثر تعقيدا وأكبر من أن تكون صدفة ولم يستثن الكتاب التدخل الإلهي في تزامن مع عناصر أخرى تتضمن
الباراسايكولوجي والدين والفلسفة والفيزياء حتى تصل إلى أن المسألة بعض من نظام شامل دقيق ، وكنت أتمنى أن يتاح الوقت
الكافي ويتسع المقام لعرض ذلك الكتاب الشائق والذي لا أود تلخيصه هنا خشية تشويه الفكرة لأنها متكاملة السبك فعليكم بالمصدر
وزي ما قالوا الكلام سمح في خشم سيدو ، لكن الخلاصة أنه لاتوجد صدفة في الكون وتفريعا
على هذا كانت صدفة أجمل صدفه أنا يوم لاقيتك ستكون على شكل مختلف لو عرف الشاعر أنها لم تك كذلك ، وعلى أية حال
رحم الله الجاغريو القائل صادفني الحبيب بحشمه سالمتو .. تركني أميل ثملان ليهو قلبي سلمتو..
وهذه ترد تحت عنوان (متزامنات الريده).




-
إني أتقبل كل ما يحصل في الدنيا بمنتهى الرضا وأقول ، لايحصل أي شئ إلا وقت ما يجب أن يحصل.

(ميخائيل نعيمه).

شيل القعونجه البتكوريك دي
بجيك التلفون
امشي اضرب لامن تقع ليك في نمرة
ما تعرف تتخارج منها كيف
ربنا يسلمك
مودتي

Quote: كلامك الفوق ده أنا مصدقو نُصْ كَلَتش خُت والله صحي كي تطمئن قلوبنا

هووووي يا المطرطش، شيخي ده
بيسختك.
والله صحي...

الجميل معاوية المدير..وألأخوة المتداخلين..لكم التحية..

كما ذكر ألأخوان ما لاقوهوا من صدف وخاصة صدفة أخونا مامان والكثير من الصدف قد تثير الدهشة حين وقوعها ويستغرب ألأنسان بأن كل شى فى هذه الدنيا بقدر وموزون بدقة متناهية

صدفة عادة أحكيها وإلى ألآن مدهشانى ..

ذهبت شهر العسل لآستنبول وإخترت هذه المدينة الجميلة لآنى أعرفها وقد ذهبت لها قبل الزواج.

أصبح الصباح ونحن فى الفندق وقلت لزوجتى اليوم نذهب للجزء ألأسيوى من المدينة.

وقالت لى اليوم ممطر لماذا لا نمشى نتمشى فى البلد من قريب.

وافقتها الرأى وبدأنا ألأستعداد للخروج...وعارفين محركة العرسان!!!!!!

أثناء تجوالنا صادفت إمرأة سمراء تنده لولد بأسم يوسف وهو يبكى يبعد قليلا من امه وخلفها رجل فيه ملامح سودانية صرفة.
أوقفنى الرجل وقال لى ألأخ/سودانى قلت له نعم وأعتقد تأكد من ذلك لأن زوجتى كانت تلبس الثوب السودنى .

وقفت زوجته السمراء وكانت جنسيتها ليبية تمسك بأبنها يوسف أمام محل تجارى وحينها رأتنا نتبادل أطراف الحديث وكنا قد بدأنا نسأل بعض من ألأسئلة التقليدية.
إنت من وين من السودان؟

أجبته من أم درمان..

قال لى أنا متزوج ليبية ومن بنغازى هل تعرف شخص هناك؟.

قلت له نعم عندى إبن خالى أيضآ متزوج ليبية وفى بنغازى.

قال لى فى بنينة..قلت له نعم..وإسمه يوسف.

الراجل قال لاحول ولاقوة إلا بالله....وأخرج محفظته وأرانى صورة يوسف إبن خالى.

قلت ياسبحان الله....وقال لى يوسف هذا مسمى عليه..ونحن جينا من من منزل يوسف على المطار.

ونادى زوجته وتعارفنا أكثر وأصر علينا ان نتعشى معهم فى شقتهم وطلبت من زوجته أن تعمل لى مكرونة باللحمة وبعد العشاء أهدت لزوجتى طقم شاى إستيل مازال موجودآ نتذكرهم به.

عندما أفكر فى الموضوع بعمق أتذكر قدرة الخالق فى إدارة هذا الكون وتوزيعه للأرزاق وألأحداث..وبجزء من الثانية كان يمكن أن لا نلتقى لوللا إرادة الله.

التحية والتقدير للجميع.

Quote: انا هسّع جسمي قام كلوا شوّك

تصدق انا ذاتي جسمي قام شوك

دي من الصدف الجميلة جدا والبتحصل نادرا لكن زي ما بقول ليك الدنيا ضيقة شديد

انا حصل لي فلم قريب من دا برضو

تحياتي يا قريبي

كان تجرب 3737 أو 7373
ممكن تطلع باكتشاف جديد

قاليك ما في حاجة اسمها صدفة أو حظ
كلو مرتب ومسطر بالسنتي

فبخلاف المطرطش
مصدقك مية مية

يا اخي ربنا يجمعنا بي ناس كُتار في البال
والله الواحد الشوق ليهم فتفتو
ولابد يجي يوم
كان بقينا حيين فيها


تحياتي واحترامي
وربنا دائماً يوجه ليك السمح

تحية الي الشفيف بله...

في عام 88 كتيت رسالة الي عنوان بالولايات المتحدة باسم صديقي ودفعتي الدكتور-الان- عبد الرحمن ابراهيم-نقيب المحامين حاليا..وقتذاك كان عبد الرحمن يتابع دراسته للدكتوراه ولكن بكندا..اعيدت لي الرسالة لخطا العنوان..مرت السنوات لاكتشف ان الرسالة كانت الي عنوان الدكتور عبد الرحمن ابراهيم محمد- عضو المنبر حاليا ولاكتشف ايضا ان دكتور عبد الرحمن-البروف حاليا وعضو المنبر كما ذكرت كان زميلنا ايضا وفي نفس المدرسة--ونتواصل حاليا عبر الهاتف احيانا وعبر المنبر حسب مقتضي الحال...

وكما قال الشاعر والصدفة اجمل في الحقيقة من انتظار...

نعم معاوية ومامان والاخوة المتداخلين
تحدث في هذا الكون أشياء إلهية بتقدير منه سبحانه وتعالى

قصة مامان جعلت دموعي تنهمر رغم محاولاتي إيقافها ولكنها أبت إلا تنزل
تقديراً لموقف السيدة طيبة الطيبة بت المشايخ رضي الله عنهم

حدثت لي بعض المصادفات سوف اعود لذكرها بعد اذن صاحب البوست



الصادق

تحية...

في المهجر واثناء ساعات العمل اتصل بي شخص وفي لهجة خليجية مستفسرا عن شخص ما ...اوضحت له ان الرقم خطا...اجاب محتدا (ولماذا ترفع السماعة اذن طالما ان الرقم خطا)... تصور...

ود المدير والمتداخلين ...........سلام

أنا احكى ليكم قصة اقرب الى الخيال فعلا حدثت لى فى الرياض
هنا قبل سنه ونصف تقريبا..واتمنى ان لاينهيكم طولها عن غرابتها.
كنت يومها فى عزاء خالى وبينما نحن فى مكان العزاء اتصل
بى شخص ودار بيننا الحوار الاتى:
الاخ صديق الموج: نعم معاك صديق مرحب حبابك.افتكرته اتصل لتقديم واجب العزاء.
انت يا صديق من امدرمان؟ قلت ليه نعم.منو معاى؟
قال لى ياخى طالما كده ندخل ليك فى الموضوع : قلت له اوكى
فى الحقيقة انت ما بتعرفنى انا اسمى فلان وياخى عندنا
مشكله بسيطه نحن شغالين فى قصر الاميرة فلانه فى الناصرية
(نسيت اسم الاميره). قال لى حوالى الساعه عشرة صباحا
جاء رجل سودانى فى السبعين من العمر داخل فى القصر ويسأل عن شخص افاد انه ابنه.
ولا نعرف شخص بالاسم الذى ذكره والرجل لايحمل اى هوية ويلبس جلابيه
وساعة على معصمه وبقول انه من امدرمان وشقيق شاعر كبير.ويقول انه جاء
الى المملكة قبل ثلاثة ايام فى زيارة الى ابنه،وبعد ان خرج الابن
الصباح للدوام خرج هو ليتمشى ولكنه ضل الطريق الى منزل ابنه و لايعرف
عن ابنه شى غير اسمه. لايعرف له رقم جوال ولا اين يعمل ولا اسم الحى الذى يسكنه.
ولا يحفظ اى رقم فى السودان لاى شخص ولايحمل معه اى هوية ويقول انهم تركهم بالمنزل.
ويتحدث احياناً عن انه درس فى لندن واحياناُ انه انشأ الجامعه هنا.
واتصلنا على بعض الاخوة و افادونا ان هذ الشخص طالما هو من امدرمان لو لم يعرفه
صديق الموج مافى زول ممكن يعرفه ليكم مع قلة المعلومات.
قلت ليه والله طبعا دى اسرة معروفة فى امدرمان ورجالها اعلام لكن الان
انا فى عزاء خالى فالراجل خليه يبيت معاكم والصباح سوف امر عليه
وبلقى ليكم عنوان ولده.ودعت الرجل وانهيت المكالمة على وعد اللقاء صباحاً
حوالى الساعة الثامنه ليلاًً اتصل على الاخ مجدداً وقال
لى والله ياخى المبيت فى القصر معانا صعب لانو اى وقت
ممكن الاميرة تناديك لمشوار وما بقدر اخليه براه فى الغرفة.
قلت ليه طيب انتو قلت من امنتقو وديه الجمعية بتاعتكم
فى شارع الخزان وصباحاتو بيض انا بمر اخده. قال لى كويس.
اتصل على بعد نصف ساعة وكنا وقتها قد رفعنا الفراش ومشيت
المنزل وكان معاى بعض اهلى جونا من مدن السعودية المختلفه
للعزاء عوائل وعزابه والمهم وزعناهم على البيوت وانا سايق
معاى الضيوف المفروض يبيتوا معاى اتصل على الرجل وقال لى
والله الجمعية مالقيت غير ثلاثة اشخاص وقالوا هم شغالين الصباح
ومافى زول فى البيت فكيف يتركوه لحاله عندما يذهبون للدوام؟
اخبرتهم هل ذهبتم الى أقسام الشرطه؟ قالوا ذهبوا لقسمين
وسالو ان كان جاءهم شخص يسأل عن مفقود فى احد المراكز اجابوهم
انه الصباح حوالى الحادية عشر جاءهم سودانى يسأل عن رجل كبير مفقود
ولكن لم يترك عنوان للاتصال.
المهم اعتذر الاخ انه لايستطيع ان يسمح للرجل بقضاء الليله للظروف
انفة الذكر فلو حصل اى شىْ هذه مسئولية كبيرة لشخص لايعرفون من هو.
وقتها اتصلت على اخى فى السودان وكلفته ان يذهب الى اسرة الرجل
فى امدرمان ويخبرهم بالواقعه ويأتى منهم بتلفون الابن فى الرياض.
اتصل اخى فى حوالى الساعه عشرة ونصف وافاد انه لم يجد شخص بالمنزل.
سأل الجيران أجابوه نعم نعرف الرجل لكنه رحل من منزل الاسرة منذ
زمن بعيد ولانعرف تلفون ابنه، اما أخيه الذى يسكن هنا فى مأمورية
وزوجته غير موجودة. ولما كان اخيه شاعر كبير اتصلت على كل من
اعرف فى الوسط الفنى ليمدونى بتلفون اخيه لم يجب احد على التلفون..
رجعت للاخ وسألته اين هو الان؟ قال لى انا فى شارع الخزان.
قابلته حيث اتفقنا وسلمت عليه وشكرته واخذت الرجل الى سيارتى
وبدأت فى سؤاله عن امدرمان وعن اهله فكانت اجابات الرجل مقنعه
ولكن احياناً تكون الاجابات غير منطقية وبدأت فى الاتصال بالاخوان
من ابناء منطقته ممن أعرف عن الرجل فاجابونى انهم
يعرفون هذه الاسرة العريقة ولكن لايعرفون لهم أخ بهذا الاسم
ولما كان منزلى فيه ثلاثة عائلات جاءت للعزاء ذهبت الى احد الفنادق
وطلبت منهم غرفه لشخصين طلب منى الاخ وهو مصرى يعمل فى السنترال عن
الهويات اعطيته هويتى وقلت له ان هوية الوالد نسيناها بالبيت
حيث كنا معزومين ووعدته ان احضرها له الصباح اجاب الرجل بالنفى
القاطع ان هذا من سابع المستحيلات ان ينزل نزيل بدون هوية.ذهبت
لفندق بجواره فى منطقة البطحاء ايضاً موظف السنترال مصرى
اجابنى بنفس الاجابه حتى ظننت ان المصرى الاخر قد اتصل عليه وابلغه.
ذهبت لاكثر من خمس فنادق وتاتى نفس الاجابة الساعة الان الواحده والنصف ليلا فماذا انا فاعل.
اتصلت على سفير السودان استاذنا محمد الامين الكارب
ولا اجابه اتصلت على الوزير المفوض السفير احمد يوسف الان مدير مكتب
على كرتى التلفون لايجيب اتصلت على القنصل ايضا تلفونه لايجيب.
اتصلت على اللواء الطيب المصباح الملحق العسكرى اتصلت على اخونا
الرشيد موسى الزين مدير جوازات المغتربين الحالى ايضاً لم يرد.اخيرا
اتصلت على الاخ مامون الحاج من موظفى السفارة وكنت غاضبا بعد ان
سلمت عليه هجت فى وجهه هيجانًا بالغاً ومامون انسان مهذب
قلت ليه بس تعرفوا تاخدوا الضرائب والجبايات وما تسالوا من
مواطنيكم وقال لى خير ان شاء الله. قلت ليه خير انا بتصل على اى
تلفون من اعضاء السفارة مافى زول رد ياخى يمكن انا داير اموت
لاسنترال السفارة ولا اى احد من مسئوليها يرد على. قال لى كل طاقم
السفارة الذى ذكرت فى حفل وداع الملحق الاقتصادى احمد عمر
ماعدا السفير خارج الرياض وانا ياخى عامل عملية فى عيونى و
لى اسبوعين ما بسوق ولم ارى السفارة فى شنو؟ حكيت له ماجرى وقلت ليه
انا داير زول يجى يدخلنا ببطاقته الدبلماسية دى اى فندق
او شقة مفروشة وسوف ادفع التكلفة والصباح ربك يفرجها. وطلب منى
الانتظار وعاود الاتصال ان لا احد يرد على التلفون ربما لصخب
مكان المناسبه وقال لى خلينى معاك فى الصورة كتر خيره.
بعد قليل اتصل على الاخ مامون واشار لشخص قريبه وانا اعرفه اسمه مضوى
واعرف ان اسرته بالسودان واتصل عليه وفعلا الرجل رحب بالفكرة بعد ان علم
ان منزلى يعج بالضيوف وقال لى اتفضل تعالوا بيتو للصباح تفرج.
المهم سألت الرجل إن كان تناول الدواء فقال لى الصباح الولد ادانى الحبوب.
سالته عن مرضه قال لى والله ياخى كويس بس عندى حاجه بتجينى كده.
طيب اذهب بالرجل الى المستشفى وماذا اقول لهم؟ قلت ليه عندك ضغط
او سكرى اجاب بالنفى.وانا فى الشوارع اساله عن اللوحات واسماء الشوارع
فكان يقراها بسرعه فائقة بالعربى والانجليزى واقول له الا تتذكر
اسم شارع مررت به بعد ان خرجت من منزل ابنك وكان يجيبنى بالنفى.
المهم توكلت على الحى الذى لايموت واخذت الرجل الى منزل الاخ مضوى
وجلسنا مع الرجل نحاوره وتاتينا الاجابات احياناً منطقيه
واحيانا لا. الساعه تشير الان الى الثانية والنصف صباحا.
تذكرت ان معى تلفون اخ من نفس منطقه الرجل وكان يعمل معنا فى الرياض
وانتقل الى العمل فى المنطقه الشرقية.اتصلت عليه ورد الرجل
وكان لايبدو على صوته اثر نوم.المهم سلمت عليه واعتذرت عن الاتصال
المتاخر ودخلت معه فى الحدوته إن كان يعرف الرجل.فصعق الاخ
وقال لى ده ياخى بروفيسور فلان وكان عميداً لكلية ال...
وفعلا هو اقد انشأ كلية ال..بالمملكه فى اوائل السبعينات
وقد سمعت انه فى المملكه منذ ايام مع ابنه جاء للعلاج ولكن لا اعرف تلفون ابنه
ولكن ابن شقيقى فى السودان متزوج بنت هذاالرجل وادينى دقائق وسوف اتصل عليك.
فعلا اتصل على صديقى بعد قليل وجاءنى بالفرج وهو تلفون الابن بالرياض،
واظنه اتصل عليه واعطاه رقم تلفونى وقبل ان اتصل إذا بالابن يتصل علي.
واخبرته كيف اننى التقيت ابيه فسالنى اين انت الان
واخبرته بمكانى فجاء الابن خلال دقائق وحضن والده وهو يبكى
متابطاً العقار الذى يستعمله والده واخبرناه بانه تعشى معنا
فناوله الحبوب وبلعها الرجل.
افادنى الابن ان عائلته فى احد الدول الاوربيه وسوف يصلون خلال ايام
وانه كان بالسودان واحضر معه والده للعلاج وامه متوفية.
وانه صباح اليوم بعد أن اعطى الوالد الفطور والعلاج ذهب للدوام ونسى ان يقفل
الباب فلما تذكر ذلك ولقرب منزله من مكان سكنه رجع ليتفقد الوالد
وهو يعانى من حالة فقدان ذاكرة منذ فترة فلم يجد الوالد وذهب
لاقسام الشرطى مستفسرا ولم يجد بلاغ عن شخص مفقود او ميت.
فسلم امره الى الله منتظرا الفرج.
الاعجب فى هذه القصة ان شقيق البروف هذا كان استاذى فى الثانوى
ومنذ العام 1977م لم اراه ولكننى سمعت انه يعمل فى احد جامعات
نيجريا، فى صبيحة اليوم الثانى اتصل على شخص السلام عليكم
الابن صديق نعم اجبته فحكى لى انه استاذ فلان وشكرنى وقال لى
عندما حكوا له قصة اخي البروف وان شخصً اسمه صديق الحاج الطيب الموج
هو من اوصل البروف الى ابنه تداعت الي المدرسه وتذكرنى تماما ودعى
مترحماً على والدى وقال انه بعد عودته من الخارج عرف انه توفى الى رحمة
خالقه، لاننى كنت معروفاً لكل المعلمين لان والدى كان صول المدرسة الثانوية
التى كنت ادرس فيها وكما لاانكر كنت رأس هوس، وقال لى ياصديق والله هذه
واحده من كرامات هذا الرجل الذى صادفته.
معقول فى الرياض التى يبلغ عدد سكانها عشرة مليون نسمة بينهم اربعمائة الف سودانى
لايقع هذا البروف الا فى ايدك انت.وفعلا والله بعد ان تعاطى البروف الادوية
وعادت اليه ذاكرته تداعى الرجل والله ماتمنيته ان يسكت يحدثك عن الشعر
والادب والنثر والانساب حديث العالم العارف المتفقه فى احوال الدين والدنيا
بتوسع لايضاهى.ويحدثك عن امدرمان واخبار جامعة الخرطوم فى بواكير
صباها حديث من وضع لبانتها وشارك فى بنائها وعراقتها.
معاويةالمدير تذكرت هذه القصة وانا اقرأ قصتك ومثلك انا حائر
لمثل هذه القصص اسف للاطاله، احب ان انوه اننى قصدت ان لا اشير الى
بعض الاسماء هنا فى حين ذكرت البعض الاخر لاننى لم استأذن اصحابها
لارويها على الناس..

ود المدير صاحبي
سلامات ومشتاقين
.
.
صديق الموج صديقي اللذيذ يا مونساتي
نصيحة ليك لمن تكتب حكاية طويلة زي دي ما تكتبها طوالي على المنبر
اسع دي كان عملت انتر وطارت راحت في الصقيعة ساهي تعضي الكيبورد العميكة دا ولا تاكل سكسكانية
ولا نحن ما نكون استمتعنا بالحكي اللذيذ دا
.
.
القصص الزي كتيرة وانا عندي قسة طويلة عريضة
لكن خايف تبقى علي حكاية العنز
بمش اكتبها هناك واجي اكبها هنا كان الله هون
.
.
تحياتي لراعي البوست وكل الضيوف القاعدين يحكوا

السبعات الكتيره ده المره الجاية
بتوصلك بصديق آخر ، لكن بيكون مقيم فى الاردن









...
ود المدير ازيك

سلام يا مدير وسلامات لضيوفك
فعلاً قصتك دي غريبة جداً انه نمرك الطاشة دي ما تقع الا في اصحابك.
انا مرة اتصلت على شقيقتي بالسودان وبالغلط طلع تلفون بنت من
بورتسودان وبعدما اعتذرت ليها قالت لي رقمك ده غريب انت ضارب من
وين؟ قلت ليها ضارب من امريكا، والله البنت دي شبكت فيني شبكة
واصرت انه اشوف ليها اي طريقة تجي امريكا وقلت ليها ما عندك
طريقة غير اللوتري وان شاء الله حظك يضرب، قالت لي "انا حظي عارفاهو
مسجم ومرمد ولغاية ما الوتري يضرب الحر يكون كتلنا والضبان اكلنا"
وفي النهاية قالت لي "كمان لو شفت لي عريس من امريكا تكون حليت لي مشكلتين
بدل مشكلة واحدة" وعشان اتفك منها قلت ليها خلاص بشوف ليك عريس امريكا
مليانة عزابة ورقمك ياهو ده عرفتو واول ما الم ليك في عريس بضرب ليك
والزوغة الياها وان شاء الله ما تكون راجياني لي هسه.
لكن بمناسبة الصدف الغريبة احكي ليك القصة الغريبة دي
الكلام ده حصل سنة 1990 وانا خريج جديد طلعت من الجامعة يوم خميس
بالمساء ومعي صديقي وعضو المنبر عبد الوهاب "هيبة" ابن اخت المرحوم
عبدالعزيز العميري وكنا ماشين لي صديقنا محمد نبق احد طلاب كلية
العلوم وهو الآن في المانيا، ومحمد نبق ساكن في احد الثورات البعيدة
في ام درمان. وفي شارع الجامعة وقفنا انا وهيبة وقلنا نوقف لينا اي
عربية توصلنا ميدان ابوجنزير ومن هناك نركب لينا حافلة للثورة، وبعد
شوية هيبة اشر لي عربية وبالفعل الراجل وقف لينا وركب هيبة قدام وانا
ركبت ورا، وبعدما العربية تحركت شوية الراجل سأل هيبة "ماشين وين؟"
وهيبة رد ليهو "ماشين لي نبق" وبعداك الرجل سكت وما وقف العربية الا
قدام باب بيت صديقنا نبق، واتضح انه جارهم، وقبال ما ننزل من العربية
سألت الرجل "كيف عرفت انه نحن قاصدين نبق جاركم" فقال لي "نبق ود حلتنا
طالب في الجامعة وانتو مرقتو من الجامعة اصلو جامعتكم دي فيها كم نبق؟

معاوية حقا صدف غريبة..
حدثت لي صدفة لا تقل عن ذلك ، كان الأخ يوسف كيخا ( الشعبية - بحري) يدرس بالقاهرة و مرة كنت في اجازة نصف العام و اخدت عنوانه و من محطة رمسيس للعنوان وصلت الشقة و ضربت الجرس و انتظرت ما في زول فتح و لاحظت الشقة مضلمة و كان من ضمن وصف العمارة قال لي في بقالة في العمارة الملاصقة و صاحبها بعرفنا ، نزلت سألت صاحب البقالة قال لي يمكن يكونوا في السينما انتظرهم و انا منتظر امام العمارة جاء الأخ يوسف كيخا و معه الأخ منتصر من اولاد كوستي و يوسف لما شافني خت يدينو في راسو وقعد في الواطة و قال لي : اقول حاجة ما ح تصدقها نحن رحلنا من الشقة دي قبل فترة و هسع جايين بي جاي صدفة!!!

ود المدير

كيفك


بوست زى العسل

حنجيك باغرب الصدف

واصلوا

Quote: اجاب محتدا (ولماذا ترفع السماعة اذن طالما ان الرقم خطا)

ههههههاههههاي
ده بيكون 07 يا ود الكامل.
أما حكاية "نبق" بتاعت الصاوي و هيبة فمبالغة رسمي.
أنا غايتو قبل كده اتنبأت لي بحاجة و حصلت زي ما هي مع أنو ما كان في
أي مؤشرات تدعو للتنبؤ بحدوثها.
بس بالله اعفوني من التفاصيل.

______________________________
سلامات يا ود المدير يا قريبي.

قال تعالى: {وَيَسْأَلُونَكَ عَنِ الرُّوحِ قُلِ الرُّوحُ مِنْ أَمْرِ رَبِّي وَمَا أُوتِيتُم مِّن الْعِلْمِ إِلاَّ قَلِيلاً }الإسراء85
ويقول النبي صلى الله عليه وسلم: ( الأرواح جنود مجندة فما تعارف منها ائتلف وما تناكر منها اختلف)

عالم الأرواح عالم عجيب لا ندري كنهه لأنه مما أخفي عنا علمه
أحيانا ترى إنسانا تحبه من أول نظرة وترتاح له بشدة
وأحيانا أخرى ترى أحدا تنقبض عند رؤيته ويلفظه قلبك
و
قد يجمع الله الشتيتين بعدما ** يظنان كل الظن ألا تلاقيا

Quote: حدثت لي بعض المصادفات سوف اعود لذكرها بعد اذن صاحب البوست

الصادق يا حبيب، وكل الحبايب الذين
اتو ليقصوا علينا احسن القصص
الآف التحايا وعظيم الشكر لكم والبوست
حقكم تب أُخدوا رآحتكم، واتوهط يا الصادق،
وجيب العندك.

تحياتي وشكري ليكم كلللللكم...

Quote: انا حصلت لي قصة بنفس الطريقة مع صديقي و أخي و زميل المنبر اخونا الفنان و الملحن ضياء الدين ميرغني و كتبتها هنا زماااان ياريت ضياء يجي يحكيها قصة اغرب من الخيال .

سفيان يا صاحب،
اخبارك؟؟؟
والله يا سفيان فعلاً حاجة تحيّر!!! يا أخي انا اليوم الإتكلمت
فيهو مع بدر الدين، الكرت كان بيكمل بفتح كرت تاني وبضرب
نفس الرقم. الحكاية دي إتكررت حوالي 4 مرآت، ولا مرّة
بالغلط حسن خليفة طلع لي!!!
يا ريت الأخ ضياء الدين مرغني يمر بجاي عشان
يحكي لينا...

Quote: إني أتقبل كل ما يحصل في الدنيا بمنتهى الرضا وأقول ، لايحصل أي شئ إلا وقت ما يجب أن يحصل. (ميخائيل نعيمه).

هاهو وقت حضورك لساحتي قد حصل، حيث لم يكن حصوله صدفة،
وسعدت غاية السعادة بوجودك في البوست ومداخلتك الثرّة أخي
الأستاذ محمد المرتضى.
لك عظيم شكري، ولي
عودة لمداخلتك بمشيئة الله .


مودتي...

معاوية ...سلامات ياحبيب ..
قصص غريبة وعجيبة والله ...وانا من الناس المابقولوا عنها صدف بل هي اقدار مرتبة ..
عندي قصتين لكن هسه بديك واحدة وفي المرة الجاية التانية ..
كنت شغال في ادارة المرور في الدولة الانا فيها وكنت من طبّاع رخص القيادة فيها..وعادة الدوام بيخلص 2.30 بعد الظهر ..وبعد داك العساكر بمشوا بيوتهم عدا واحد بكون مناوب عشان يوقع باقي الرخص البنطبعها ...في يوم من الايام استلموا معاملات كتيرة مابعرف عددها ووكت الخروج جاء .. ونحن ملزمين الصباح تكون جاهزة ..قلت للعسكري المناوب خلاص انا مرهق ومصدع بمشي البيت اتغدى وانوم وبجي بعد المغرب بكمل باقي الرخص - وانا ماعارف عددها - المهم مشيت اتغديت ونمت ..في المنام شفت نفسي بتصل على المكتب عشان اسال عن عدد الرخص الباقية للطباعة ..فقام في المنام رد على بنغالي شغال هناك من ضمن عدد من البنغالة رغم انه مفروض يرد العسكري المناوب ..قلت ليهو باقي كم رخصة قال لي دقيقة اعدهم ..عداهم وقال لي باقي اربعين رخصة ..قلت ليهو شكراً (ده الحلم ) المهم بعد صحيت من نومي قلت اتصل على العسكري المناوب عشان اساله من عدد الرخص الباقية ..قام رد على نفس الشخص الشفتو في المنام من دون الاخرين ...سالته عن الرخص الباقية قال لي دقيقة اعدهم ..عداهم وقال لي باقى اربعين رخصة ..والله لامن جسمي ارتعش ..



بجيكم راجع للتانية ...



تحياتي للجميع ..

Quote: فقام في المنام رد على بنغالي شغال هناك

أولا يا فايز جرت لي حادثة في حضور عضوي المنبر شيقوق ود. أحمد القرشي بطلها صديق الموج تصل حد الحلم ولايمكن
لأي شخص رابع أن يصدقها وسأضطر لسردها لاحقا.
بالنسبة لقصتك المقتبس منها أعلاه أود أن أقول لك أن بعض المهتمين بظواهر الماورائيات يؤمنون بأن لكل إنسان
جسم أثيري مطابق له وهذا الجسم الأثيري هو الذي يحمل النفس والروح والمشاعر والحسنات والذنوب والحب ضمن
قائمة طويلة من غير المحسوسات. هذا الجسم يتقمص الجسم الأرضي المادي العامل ليهو بطاقة وجواز سفر دا ، لكنه يخرج منه
في حالات معينة إما بصورة مؤقتة أو مستدامة ، الخروج المؤقت يتم في مرحلة من النوم تبدأ فيما يسمى
بال Rapid eye movement stage وهنا يخرج الجسم الأثيري بسرعات ومسافات لاعلاقة لها بقوانين الفيزياء الأرضية فيلتقي
أجساما أخرى مشابهة له ويرى أشياء مادية أخرى كما لو أنك في يقظتك ويظل أثناءها مرتبطا بالجسد المادي
بما يعرف بالحبل الأثيري أو الكوكبي Astral cord ثم يعود بسرعة إلى الجسم المادي القاعد يشخر في سريرو أو في خِدرو ما تألم
وربما في حضن دفئ، فيتطابق معه. هذا الخروج المؤقت يحدث أيضا في حالات الغيبوبة والتخدير الكامل ، أما في الوفاة فيحدث
خروج نهائي (زي العندكم هناك) وينقطع الحبل الأثيري بين الجسم المادي والأثيري ومن ثم ينعتق الجسم الأثيري ليذهب إلى مراق
أخرى ، وكثير من المسلمين المعنيون بهذه النظرية يجدون لها مرجعية في الآية الكريمة (اللَّهُ يَتَوَفَّى الأَنْفُسَ حِينَ مَوْتِهَا وَالَّتِي لَمْ
تَمُتْ فِي مَنَامِهَا فَيُمْسِكُ الَّتِي قَضَى عَلَيْهَا الْمَوْتَ وَيُرْسِلُ الأُخْرَى إِلَى أَجَلٍ مُسَمًّى إِنَّ فِي ذَلِكَ لآيَاتٍ لِقَوْمٍ يَتَفَكَّرُونَ ) صدق الله العظيم ..
فوفقا للنظرية خرج منك في منامك جسمك الأثيري وذهب إلى المكتب ورأى الحقيقة وعاد وهذا يبرر أنك أحيانا تسافر أو تزور
أماكن لأول مرة فتعتقد أنك زرتها قبل ذلك وهذه ظواهر لايتسع المقام لشرحها إلا إذا دخلنا في حديث عي التنويم المغنطيسي
الإسترجاعي regression hypnosis وظواهرالتقمص والدا جي فو إلخ...بس يا ريت المره الجاية تحلم لينا بالجماعه ديل فاتو..

قلبي مالو اليوووووم من جسمي فرَّ وراح؟

لا صدفة لا شتين
انت بس بتعرف نص سكان السودان
الهادى نصرالدين(الضلالى) ما بلحقك

Quote: شيل القعونجه البتكوريك دي بجيك التلفون امشي اضرب لامن تقع ليك في نمرة ما تعرف تتخارج منها كيف ربنا يسلمك مودتي

أُستاذ السني يا عزيز،
يا اخي انا هسّع كنت قايلك جبت لي تلفون بدر الدين بابكر
بحكم إنو الزول ده صديق شخصي لجعفر سعيد الريّح تقول
لي شيل القعونجة؟؟؟ الظاهر عليك الإبتسامة الحلوة بتاعتا
ما عجبتك، عشان كده نسبت لها الكواريك.
غايتو المهابشا ما بقدر اخليها، ربنا يستُر. مرّة ايام الهكر
ضرب لي وآحد خوفني ليك خوُف لحدي ما إتصلت علي
الأخ هارون دياب مستفسراً. تصدق آخر النهاية الزول
طلع محمد البشرى الخضر!!!

جعفر كان سكن معانا فترة في حِلتنا.

تحياتي لبنتنا وولي العهد.
تسلموا ولكم عظيم مودتي...

الأخ معـاويه المـدير ..ســلامات
بوسـت حــلو وأحـلى مـا فـيه تطـرق أخـونا مـامـان
لـبركـات أهـلنا ناس أم ضـوابان.
شـكرا لكمـا.

Quote: عندما أفكر فى الموضوع بعمق أتذكر قدرة الخالق فى إدارة هذا الكون وتوزيعه للأرزاق وألأحداث..وبجزء من الثانية كان يمكن أن لا نلتقى لوللا إرادة الله.

الأخ الحبيب اسماعيل عباس.
ونِعمَ بالله يا اسماعيل، فعلاً دِقة متناهية في تقدير
الأمور، وكلها لأمر يعلمه سبحانه وتعالى.
كتّر خيرك كتير علي المرور يا اسماعيل
وما تحرمنا من طلآتك.

مودتي...

دي بركات (سيدي الحسن) يا معاوية ياخي

Quote: أولا يا فايز جرت لي حادثة في حضور عضوي المنبر شيقوق ود. أحمد القرشي بطلها صديق الموج تصل حد الحلم ولايمكن

مولانا محمد المرتضى ...سلام
رعى الله ايام الهضبة تقول واللا نقول؟؟
هههههههههه،،،،

Quote: رعى الله ايام الهضبة تقول واللا نقول؟؟

يا موج،
أو يا مونج،
والله ديك قصه زي الجن،
سنناديك ( ديك الجن)..
الدمشقي إن أردت..
يا ودالصول..
Son of the Soul
قول ياخ..

Quote: يا موج، أو يا مونج، والله ديك قصه زي الجن، سنناديك ( ديك الجن).. الدمشقي إن أردت.. يا ودالصول.. Son of the Soul قول ياخ..

يا محمد المرتضى وصديق الموج شحتفتو روحنا ياااااخ،
والله صحي...

Quote: تصدق انا ذاتي جسمي قام شوك دي من الصدف الجميلة جدا والبتحصل نادرا لكن زي ما بقول ليك الدنيا ضيقة شديد انا حصل لي فلم قريب من دا برضو تحياتي يا قريبي

طيّب يا قريبي ما تجي تحكي.

يا أخي والله مشتاقين يا قول الغناي...

يا دفعة دي بركات شيخي ... والله صحي
مش بقولوا رب صدفة خير من الف ميعاد

كنت أرتب بعض الأشياء في غرفتي ....

ألقي بعضها في سلّة المهملات .... وأختار مكاناً مناسباً لبعضها الآخر.

فجأة عثرت يدي على قصاصة ورق مثنية .... لم أقرأ ما فيها ولم أعرها اهتماماً لكنني اخترت أن ألقي بها في حقيبة "سامسونايت" بدلاً من إلقائها في سلة المهملات حسبما يوحي مظهرها البالي.

لم أعر الورقة اهتماماً بعدها ولم أدر أساساً ما هي.


بعد هذا الحادث بثلاث سنوات ...... كان أمر مصيري جداً يتوقف على الحديث مع شخص لا أعرفه .... ولا أعرف كيف أصل إليه.

ذهبت إلى الشنطة "السامسونايت" لاستخراج بعض الوثائق التي احتاجها لأمر آخر.

عثرت يدي على الورقة سالفة الذكر.

فتحتها .... وجدت فيها اسم الشخص المطلوب ورقمه

رغم أنني لا أتذكر أصلاً أنني قابلته أو حصلت على رقمه أو كان بيني وبينه أي سابق معرفة.

إلى الآن لا أعرف كيف وصلت هذه الورقة إلي.

وهي مكتوبة بخط غير خط يدي.

Quote: كان تجرب 3737 أو 7373 ممكن تطلع باكتشاف جديد قاليك ما في حاجة اسمها صدفة أو حظ كلو مرتب ومسطر بالسنتي فبخلاف المطرطش مصدقك مية مية يا اخي ربنا يجمعنا بي ناس كُتار في البال والله الواحد الشوق ليهم فتفتو ولابد يجي يوم كان بقينا حيين فيها تحياتي واحترامي وربنا دائماً يوجه ليك السمح

الأخ الفاضل بلة محمد الفاضل.
يا بلة تاني أنا كان شقلبت بشقلب ليكم الحيكومة،
تصدق!!!
يا أخي أسأل الله سبحانه وتعالى ان يديك الصحة والعافية،
ويجمعك مع من تحب، ولك عظيم شكري علي الدعوات،
ولك مني مثلها وزيادة.
يسمحن أيامك يا بلة.

تحياتي وإحترامي لك وللجميع طرفك...

وأنا طالب في السنة الثانية بالجامعة زارني قريبي الذي كان يعمل بالشرطة ، وكان أهلنا بالعاصمة أقلة في ذاك الزمان.. قال لي أنه يريدني في مشوار إلى الدروشاب لنتعرف على أناس يريد أن يتزوج منهم .. وافقت .. وانطلقنا وكان معنا زميل له لم أكن أعرفه من قبل ..
عندما وصلنا إلى المنزل المعني في الدروشاب وجدت المنزل يعج بالناس ، وهناك ترتيبات كبيرة لاستقبال عدد كبير من الضيوف .. سلمنا على الموجودين .. وصاح أحدهم يسأل قريبي :
وين ناسك ؟
ناس شنو ؟ أهو دا زميلي وده ود أخوي طالب في الجامعة .
يا أخي أنت بتلعب تجيب لينا وليد ودايرنا نديك مرة ؟
يا أخي الوليد ده أنا قلت ليك طالب في الجامعة ..
يا أخوي لا بنعرف جامعة لا خلوة ، ولا عندنا ليك مرة ، سوق وليدك وامشوا شوفوا ليكم شغلة .
شعت بحرج كبير ، ولم أكن أتوقع أن قريبي كان مقدما على خطوة رئيسية من خطوات الزواج ، فقد ظننته أتى بي للتعارف فقط .. انزويت بعيدا وجلست على كرسي في طرف الحوش.. جاءني رجل كبير في السن يتوكأ على عصا .. جلس قبالتي ، وسألني بصورة مباشرة :
انت من الضيوف ؟
قلت : نعم .
قال : انتو أهلكم من وين ؟
قلت : من الجزيرة .
قال : وين في الجزيرة ؟
قلت : من غرب الجزيرة .
قال : وين من المناقل ؟
قلت : من معتوق .
قال : معتوق السوق وللا الحلّال ..
قلت : نحن من حلة عجوبة ..
قال : انت ود منو في عجوبة ؟
قلت : ود عبد الباقي ود قاسم
رددها في شكل سؤال : ود عبد الباقي ودقاسم ؟
قلت : أيوة
قال : والزول ده ببقى ليك شنو ؟
قلت : في الحساب عمي .
قال : حساب قريب وللا بعيد ؟
قلت هو ووالدي أولاد خالات ..
فنادى الرجل على أولاده آمرا التوقف عن الكواريك ، وقال ليهم :
يا ناس هوي والله انتو جاتكم قبيلة .. انتو ما بتعرفوا الناس .
ثم اجتمع الناس وحكى لهم الرجل علاقته بوالدي ومعرفته التامة له واتضح أن الرجل جد العروس ..
وأكملنا بقية مهمتنا بنجاح تام ..

أنا أعود لهذا البوست لأنو دخل في مزاجي
مع إنو سيد البوست شاركناهو وما اشتغل بينا الشغلة ^_^

أحد أصدقائي المقربين عليه رحمة الله تعالى
أحسبه من أولياء الله الصالحين
سافر إلى الحج في 2005 من السودان
وكان بحوزته مبلغ 2000 ريال سعودي نشلت منه في الحج
وكان ذلك في آخر أيام وكان محتارا كيف سيرجع إلى السودان

المهم قال حاولت أن أمتهن الحلاقة للحجاج للتحلل
فاشترى امواس وبدأ يحلق بخمسة ريالات
جمع من هذا العمل حوالي 150 ريالا ثم تعب وتركه

قال ذهبت إلى الحرم وأنا مهموم كيف سأرجع وأعوض ما فقدته
فنبتت في ذهنه فكرة أن يذهب إلى أحد أصدقائه في ضواحي مكة
ليستدين منه مبلغا يعينه على الرجوع
وكانت صلته بهذا الصديق قد انقطعت منذ سنوات ولا يعرف كيفية الوصول إليه
يقول بينما أنا جالس مهموم جاءني اثنان من السودانيين لا أعرفهم
وسلموا علي وقالوا لي: انت داير تمشي لي فلان الفلاني؟

قال ليهم أيوه!! وفلان ده هو نفسه كان صديقه الكان محتار كيف يصل ليهو
قام مشى معاهم وقعد مع صاحبو ووراهو الهدف الجاء من أجله
انتو قايلين الموضوع انتهى على كده؟

بعد شوية واحد سعودي دق الباب وكان شاف الجماعة ديل داخلين وشكلهم حجاج
قام قال لصاحب البيت: إنت معاك ناس هنا؟ قال ليهو أيوه
السعودي طلع من جيبو 4000 ريال وأداها ليهو وقال ليهو وزعها ليهم

صاحبو طوالي سلموا 2000 ريال وأدى ديلاك كل واحد 1000
ولا أملك إلا أن أقول: سبحان الله والحمد لله ولا إله إلا الله والله أكبر.

توفي صديقي هذا عليه رحمة الله والطرف الآخر موجود إلى الآن!!!

Quote: أنا أعود لهذا البوست لأنو دخل في مزاجي مع إنو سيد البوست شاركناهو وما اشتغل بينا الشغلة ^_^

محمد جلآل عبد الله،
سلآمات يا رجُل.
يا أخي والله العظيم انا قريت الجزء ده من مداخلتك، وطوالي مشيت البروفايل
بتاعك، ويا ليتني لميّت في رقم تلفونك. لكن إستحلفك بالله العظيم تقبلآ مني هنا
ويشهد عليها كل من يدخل هذا البوست مشاركاً أو قارئاً أنا والله آسف اشدّ
الأسف، وأرجو إنّك تعذرني، وأقسم لك بالله العظيم لو إتحصّل علي رقم
تلفونك إتصل عليك في الحال لأني شايف إعتذاري ده ما كفاية.
ويا محمد جلآل البوست مِلِك للجميع كُلو زول يجي يحكي تجربتو، وأكيد
مثل هذه الأشياء مرّت علي كثير من الناس. لو ملآحظ انا برد علي
المداخلآت بالدور إلا من بعض الإثتثناءت، وأضف إلي ذلك كثرة
المشغوليات الباقية علينا.
أخي محمد جلآل عليك الله تسامحني، وأنا غلطان بعتذر.
شايف برضو أخونا سامي عبد الوهاب مكي سحب مدآخلة
أرجو إنوا ما يكون سحبها لنفس السبب، ولو كان الأمر كذالك،
فيا سامي أنا برضو بعتذر ليك، وبشكركم علي المرور وبشكر
كل من شارك في البوست، ولو ربنا امدّ في الأيام المداخلآت
كلها انا جاييها وبرد عليها. بعتذر إعتذار شديد للجميع، وتجدوني
آسف اشدّ الأسف إن كنت قد قصرت في حقكم، ويمتدّ إعتذاري
لجميع أهل الحوش، ولقراء المنبر.
عموماً البوست مِلِك للجميع، وأرجو ان تتقبلوا عذري.
لكم العُتبى حتي ترضو.

Quote: في المهجر واثناء ساعات العمل اتصل بي شخص وفي لهجة خليجية مستفسرا عن شخص ما ...اوضحت له ان الرقم خطا...اجاب محتدا (ولماذا ترفع السماعة اذن طالما ان الرقم خطا)... تصور...

سلآمات أخي محمد الكامل.
إنت البيوديك تهبش في التلفونات شنو؟؟؟
وصيتي ليك، تاني لا ترفع التلفون وكِت
تكون النمرة غلط.
لكن مباااالغة يا محمد.
والله صحي.

سامى عبد الوهاب مكى .
يا راجل حقك علينا، ومشكور علي المرور...

Quote: معاويةالمدير تذكرت هذه القصة وانا اقرأ قصتك ومثلك انا حائر لمثل هذه القصص

الأخ الحبيب صديق الموج.
فعلاً بتحصل حاجات تحيّر يا صديق. لكن زي ما قالوا
الأخوان كل شئ محسوب بحساب ومُقدّر تقدير دقيق
جداً كما حال كل شئ في الكون، لكن دائماً الأحداث الزي
دي بيكون فيها عنصر المفاجاءة المدهشة.

شيخي ود المدير

بعد ما اتبينت يزورو فيك

Quote: سامى عبد الوهاب مكى . يا راجل حقك علينا، ومشكور علي المرور...

الواحد ممكن يزعل لكن حتى الزعل لا يستطيع أن يصمد أمام الرد المهذب ...ولا يهمك يا حبيب

ما يحدث هنا ابداع اغرب من الجمال
تسجيل حضور ومتابعة

Quote: يا محمد المرتضى وصديق الموج شحتفتو روحنا ياااااخ، والله صحي...

محمد المرتضى شحتفت روح الناس
والله صحى،،،

Quote: : سامى عبد الوهاب مكى . يا راجل حقك علينا، ومشكور علي المرور... الواحد ممكن يزعل لكن حتى الزعل لا يستطيع أن يصمد أمام الرد المهذب ...ولا يهمك يا حبيب

بالله؟

انا افتكرتك خايف من سيد التلفون الجاك بالغلط يقرا البوست ويجي يدفعك الخمسميات

ـــــــــــــــــــــــــــــــــ
دائما ما اراهن على نقاء اصدقائي عندما تختلف وجهات النظر

لكما كل الود اصدقائي سامي وود المدير

بدون تفصيل....
أنا قابلت بالصدفة والدي في أوائل الثمانينات في الحج (منى)
لم يكن يعلم بأني في السعودية وقتها و لم أكن أعرف أنه ينوي الحج في تلك السنة.

أنا أتيت من لندن (و كنت طالبا حينها)و هو من الخرطوم

Quote: أخي محمد جلآل عليك الله تسامحني، وأنا غلطان بعتذر.

حبيبنا ود المدير ولا يهمك يا راجل
والله ردك الجميل ده بالدنيا كلها
العفو يا راجل والله أنا كنت بهظر حتى ختيت الابتسامة دي ^_^

وما قدرت أمس أرد عليك عشان الكوتة خلصت
ورسلت ليك رسالة في المسنجر .. كدي شوف المسنجر
ووالله من أمس مهموم عشان شيلتك قدر الهم ده

ما تبقى حساس أكتر من اللازم والله مافي حاجة
وشكرا ليك كتير على الاهتمام وعلى البوست الجميل

Quote: معاوية سلامي جاك، أصدق كل حرف جئت به وكذا رواية مامان بحذفرها وتفصيلها ، بس عايز اقول ليك حاجه يا العزيز ، ليس هناك ما يسمى (صدفة) في هذا الكون المنظم بدقة تبعث على الدهشة، إن تُرِكت خلجة نفس للصدفة لانتهى الكون والزمكان ولما كان كل شئ بهذا النسق العجيب الدقيق التقدير.

أُستاذنا محمد المرتضى.
سلآم ومودة.
ونِعمَ بالله. حقاً إنّ هذا الترتيب يجعلنا نرجع البصر كرتين، فيرتدّ
إلينا البصر خاسئاً وهو حسير أمام هذا الترتيب والتنسيق المدهش.
لكن أخي محمد المرتضى تبقى المُفردة (صدفة) عائشة في محيط
لغتنا ومتداولة نستعملها في مثل هذه الحوادث العارضة، فمن اين
اتت المفردة؟؟؟ وماوجه إستعمالها الصحيح؟؟؟

مودتي...

Quote: مولانا محمد المرتضى ...سلام رعى الله ايام الهضبة تقول واللا نقول؟؟ هههههههههه،،،،

استاذي محمدالمرتضى ..تقول ولا نتصل الرياض نسمع ؟!!!!!

البوست مالو (بيت عزّابة) يا كافي البلا،

الكرامات دي مابتحوم جهة الجكس ولا شنو...

بجيكم بي واحدة مبالغة...

Quote: استاذي محمدالمرتضى ..تقول ولا نتصل الرياض نسمع ؟!!!!!

مولانا نذيييييع؟؟
الانذار الاخير!!!

Quote: استاذي محمدالمرتضى ..تقول ولا نتصل الرياض نسمع ؟!!!!!

هييك ما يصيّر يا ود القاضي.
والله صحي...

Quote: القصص الزي كتيرة وانا عندي قسة طويلة عريضة لكن خايف تبقى علي حكاية العنز بمش اكتبها هناك واجي اكبها هنا كان الله هون

صاحبي ود البوش،
يا زول حكايتك شنو؟؟؟
إنت قاعد تكتب في ألف ليلة وليلة؟؟؟
!!!


عليك الله جيّب حكاية العز معاك...

Quote: مولانا نذيييييع؟؟ الانذار الاخير!!!

جاتني رسالة من بره تقول (تشموها قدحة )..

سلامات ود المدير .. والمشاركون
متابعون بشغف
سأحكى قصتى العجيبه والتى حدثت فى العام 2003م
أولاً أنا مقيم بالدمام بالسعوديه ولا زلت
كنت متوجهاً للسودان لإتمام مراسم زواجى من إبنة خالى وزوجتى حالياً..
مررت على جده لآداء العُمره وتكملة بعض الأشياء الضروريه
نزلت مع صديقى مهلب على مالك بشمال جده
فى يوم السفر مررت على وكالة السفر بشارع قريش فى العاشره صباحاً
للتأكد من مواعيد الطائره السودانيه .. وإستلام التذكره .. علمت أن مواعيد
الحضور فى الرابعه عصراً ..
إتصل بى شقيقى طالباً كميه من الزهور الصناعيه .. طلبت من مرافقى وإبن عمى
حسن باشاب الذهاب لسوق باب شريف لشراءها ..وكنت أحمل معى فى جيبى مبلغ
ثمانية آلاف دولار هى مصاريف أيام الزواج والذى تبقت له حوالى خمسة أيام
والدولارات من فئة المائة دولار موضوعه فى ظرف أبيض متوسط الحجم ومغلق
وملفوف على حجم ورقة الدولار
وصلنا بعربة حسن لمحلات الزهور الصناعيه. ونزلنا أنا وهو وأشتريناها وقفلنا راجعين إلى شمال جده ..
والمسافه مع الزحمه تاخد حوالى ساعه تقريباً
عند وصولنا لوكالة السفر لإستلام التذكره تفقدت جيوبى وإكتشفت ضياع المبلغ
أخبرت إبن عمى والذى إنزعج إنزعاجاً شديداً وأخذ يقلب فى عربته بحثاً عنها
ولم نجدها.
رجعنا لمنزل مهلب على مالك القريب منا عسى أن نكون نسيناها بالمنزل
وجدنا مهلب وقد رجع من الدوام الصباحى . وإنزعج بدوره وقلبنا البيت ولم نجدها
بالطبع.
ونحن فى أشدَ الحيره قلت لحسن بأنى أشك أن المظروف وقع منى لحظة نزولى من عربته بباب شريف.
قالا لى ( حسن ومهلب ) إذا دا حصل ربنا يعوضك لإنو باب شريف به زحمه لاتوصف.
إقترحت على حسن باشاب العوده لباب شريف مكان نزولى من العربه.
قال لى إنت مجنون .. يعنى عايز تلقاها ؟؟
قلت ليهو : حتى أُقنع نفسى بأنى بحثت فى كل مكان .. وسأُسافر بعد ساعتين
فى كل الأحوال . وإن شاءالله ربنا بتمو ( العرس)
قفلنا راجعين لباب شريف وأنا أحس بأن حسن باشاب متأثر أكثر منى
فقلت له بأن ضياع المال هو أخف الأضرار .. يعنى كان ممكن تلاقينا شاحنه
تودينا الآخره فهون عليك يا إبن عمى..
عند وصولنا لسوق باب شريف .. ونحن لافين على المكان المقصود .. لمحت المظروف الأبيض من بعيد. ...
صِحت فى حسن ياهوداااك . لم يصدقنى ..
قلت ليهو بس أقيف جنبو .. وقف ومددت يدى دون أن أنزل من العربه وتحسسته
وعليه آثار الأحذيه التى مرَت فوقه . .. يلا ياحسن خلاس لقيناهو
أصر حسن باشاب أن أفتح المظروف وأتأكد من المبلغ .. فتحته ووجدت المبلغ
كما هو.
وضع حسن باشاب يديه على رأسه وهو يردد الشهاده.
الطريف أننا فى طريق رجوعنا مررنا بالأخ مهلب والذى أتى لمستشفى جده الوطنى لنأخذه معنا .
وجدناهو بالكافتريا ومعه صديقه وطبيبه دكتور بلال
وقصصنا لهم ما حدث.
بعد حوالى 45 دقيقه وأنا متوجه للمطار. إتصل بى خالى ووالد زوجتى وهنأنى
على توفيقى بحصولى على مالى الضائع .
إستغربت جداً من أين عرف ... قال أن إبنه سامى إتصل به من هجليج وأبلغه ..
طيب سامى عرف كيف ؟؟
تصادف أنه إلتقى بصديقه ( إبن الدكتور بلال ) فى هجليج وقدم له الدعوه لحضور زفاف شقيقته ( زواجى)
فقال له أنا عارف العرس ده .. عرفت من وين ؟؟
فحكى له القصه التى سمعها من والده قبل دقائق من اللقاء بينهما ..
علماً بأن الإثنان لايعملان بهجليج .. بل أتى كل منهما لعمل محدد لمدة يوم أو إتنين ..
...........
بالله شفتو كيف ؟؟ أنا مش ود شيوخ
.......................
لازلت أحتفظ بالمظروف وعليه آثار الأحذيه التى مرت من فوقه

Quote: السبعات الكتيره ده المره الجاية بتوصلك بصديق آخر ، لكن بيكون مقيم فى الاردن

إزيّك يا كوتش.
يا اخي السبعات دي ناسا معروفين
نحن وقعنا فيها بالغلت بس.
والله صحي...

Quote: في شارع الجامعة وقفنا انا وهيبة وقلنا نوقف لينا اي عربية توصلنا ميدان ابوجنزير ومن هناك نركب لينا حافلة للثورة، وبعد شوية هيبة اشر لي عربية وبالفعل الراجل وقف لينا وركب هيبة قدام وانا ركبت ورا، وبعدما العربية تحركت شوية الراجل سأل هيبة "ماشين وين؟" وهيبة رد ليهو "ماشين لي نبق" وبعداك الرجل سكت وما وقف العربية الا قدام باب بيت صديقنا نبق، واتضح انه جارهم، وقبال ما ننزل من العربية سألت الرجل "كيف عرفت انه نحن قاصدين نبق جاركم" فقال لي "نبق ود حلتنا طالب في الجامعة وانتو مرقتو من الجامعة اصلو جامعتكم دي فيها كم نبق؟

هههههههههههه، لكن مبالغة يالصاوي حكاية نبق.
لو كان إسمو نيّم كان أكلتوا نيّم. الجامعة عبارة
عن غابة نيّم.
والله صحي.
لكن جار ناس نبق طلع حصيّف جداً.
مشكور علي المرور يا الصاوي، وإن
شاء الله ربنا يبسطك زي ما بسطتنا.
كامل مودتي...

Quote: يوسف لما شافني خت يدينو في راسو وقعد في الواطة و قال لي : اقول حاجة ما ح تصدقها نحن رحلنا من الشقة دي قبل فترة و هسع جايين بي جاي صدفة!!!

الحاج حمد سلآمات.
تقدير غريب جداً يالحاج!!! يعني الناس ديل مافي سبب بيجيبهم
بهناك غير إنو رب الناس اراد إنّك تلم فيهم.
اشياء غريبة بتحصل في عالمنا نمر عليها مرور الكرآم من غير
حتي نظرة تأمُل.
مشكور يالحاج علي المرور،
وعبرك سلآم وتحايا لعموم أهل الشعبيّة...

سبحان الله يا معاوية زي ما قال أستاذ محمد المرتضى هي ليست صدف بل هي من تدبير من قال (إنا كل شيء خلقناه بقدر) سبحانه. حصلت لي بعض القصص سأعود لروايتها إن شاء الله.

Quote: ود المدير كيفك بوست زى العسل حنجيك باغرب الصدف واصلوا

سِري ود شيقوق،
يا زول نعلّك طِيّبة؟؟؟
محارستنا ليك طالت.
تحياتي وأشواقي...

Quote: أنا غايتو قبل كده اتنبأت لي بحاجة و حصلت زي ما هي مع أنو ما كان في أي مؤشرات تدعو للتنبؤ بحدوثها. بس بالله اعفوني من التفاصيل.

أها، عفيناك يا قريبي،
بس في سؤال وااااحد، بندورك تجاوب عليهو:
النبؤة دي كانت قبل الأربعين واللآ بعدها؟؟؟

Quote: نزلت مع صديقى مهلب على مالك بشمال جده فى يوم السفر مررت على وكالة السفر بشارع قريش فى العاشره صباحاً للتأكد من مواعيد الطائره السودانيه .. وإستلام التذكره .. علمت أن مواعيد الحضور فى الرابعه عصراً .. إتصل بى شقيقى طالباً كميه من الزهور الصناعيه .. طلبت من مرافقى وإبن عمى حسن باشاب الذهاب لسوق باب شريف لشراءها

الاخ معاوية والمتداخلين
تحياتي
البوست شيّق جداً

الاخ اسامة
سلام

اها يلا يا اسامة يا اخوي الشي البيحير الخيال ذاته اني قبل ساعة فقط كنت بقرأ موضوع مرضى الفشل الكلوي وفجأة اتذكرت شقيق حسن باشاب وسألت نفسي ياربي الدنيا عملت فيهو شنو .. وفتحت بالصدفة البوست ده !!!
حسن باشاب كان يعمل معنا في مؤسسة للكمبيوتر بجدة عرفناه من خلال زوجه مهلب ده ذاااتو كانت مديرتنا وكنت متابعة وحريصة اسأل حسن عن اخوهو الى ان شتتنا تصاريف الحياة عبر محيطات وقارات ..
عبرك ارسل التحايا لحسن ومهلب وللغالية هند والاولاد..

Quote: الاخ اسامة سلام اها يلا يا اسامة يا اخوي الشي البيحير الخيال ذاته اني قبل ساعة فقط كنت بقرأ موضوع مرضى الفشل الكلوي وفجأة اتذكرت شقيق حسن باشاب وسألت نفسي ياربي الدنيا عملت فيهو شنو .. وفتحت بالصدفة البوست ده !!! حسن باشاب كان يعمل معنا في مؤسسة للكمبيوتر بجدة عرفناه من خلال زوجه مهلب ده ذاااتو كانت مديرتنا وكنت متابعة وحريصة اسأل حسن عن اخوهو الى ان شتتنا تصاريف الحياة عبر محيطات وقارات .. عبرك ارسل التحايا لحسن ومهلب وللغالية هند والاولاد..

الأخت عرفه

سلامات

أحمد باشاب شقيق حسن بخير ولازال مستمر فى الغسيل

المؤلم أن حسن باشاب نفسه أصيب بداء الفشل الكلوى قبل مده قصيره .. مازال بجده ويقوم بالغسيل مرتين أسبوعياً

وله النيه فى التوجه للسودان فى الأيام القادمه

نسألكم الدعاء له

وسأبلغ تحيايك لجميع من ذكرت

Quote: لكن جار ناس نبق طلع حصيّف جداً. مشكور علي المرور يا الصاوي، وإن شاء الله ربنا يبسطك زي ما بسطتنا. كامل مودتي...

شكراً ليك يا معاوية نيابة عن الصاوي
لانو الصاوي أخوي ( شقيقي )

و اسف لاني لم اتصل عليك. لكن مع تلفوناتك الضاربة دي
نلم فيك كيف؟؟ انت راجل شيخ و لقيت صديقك,,, نحن ال ما شيوخ
نلقي منو؟؟؟ أكيد مصايب بعد الشبايب

لك الود ... و توقع اتصال قريب و ان لم يكن.
أكيد ح أكون ضربت رقم غلط و وقعت في مشكلة

بي سبب بوستك ده

Quote: أحمد باشاب شقيق حسن بخير ولازال مستمر فى الغسيل المؤلم أن حسن باشاب نفسه أصيب بداء الفشل الكلوى قبل مده قصيره .. مازال بجده ويقوم بالغسيل مرتين أسبوعياً وله النيه فى التوجه للسودان فى الأيام القادمه نسألكم الدعاء له

الحمد لله الذي لا إله إلا هو، و هو للحمد أهل و هو على كل شيء قدير،و سبحان الله ،و لا إله إلا الله
،و الله أكبر ،و لا حول و لا قوة إلا بالله.

اللهم اشفهما شفاء ليس بعده سقما ابدا،اللهم خذ بيدهما اللهم احرسهما بعينيك التى لا تنام ،و اكفهما بركنك الذى
لا يرام و احفظهما بعزك الذى لا يُضام ،و اكلأهما فى الليل و فى النهار،و ارحمهما بقدرتك عليهما ّ،أنت ثقتهما
و رجائهما يا كاشف الهم ،يا مُفرج الكرب يا مُجيب دعوة المُضطرين ،اللهم البسهما ثوب الصحة والعافية
عاجلا غير اجلا ياأرحم الراحمين،اللهم أشفهما، اللهم اشفهما، اللهم اشفهما،اللهم امين...

Quote: المؤلم أن حسن باشاب نفسه أصيب بداء الفشل الكلوى قبل مده قصيره .. مازال بجده ويقوم بالغسيل مرتين أسبوعياً

لا حول ولا قوة الا بالله

اللهم لا نسألك رد القضاء ولكن نسألك اللطف فيه

Quote: لك الود ... و توقع اتصال قريب و ان لم يكن. أكيد ح أكون ضربت رقم غلط و وقعت في مشكلة بي سبب بوستك ده

حامد الصاوي سلآمات ومشتاقين.
عشان ما تغلط الرقم بتلقاهو مع الأخ عمر عبد السلآم،
وفي البوست ده إن شاء الله حأحكيلك القصة الحصلت
لنا مع بعض وهي اقرب للخيال.
تحياتي لك وللأولآد ولعمر والصاوي الذي تشرفت
بمعرفته، وموعدنا العيد بمشيئة الله تعالى...

احمد ربك يا معاوية انك ما وقعت في تلفون صاحبنا طارق كرفس

كان قطع ليك ناااشف : ياخ انت "بدر الدين بابكر " دا اصلو هو الشيخ البرعي؟
بس تخبط ليك اي ارقام يطلع ليك هو!؟ .. ما تتاكد من رقمو ياخي!!









------

في سيناريو قريب للحصل معاك دا ..
الو معاي عبد الله!؟

ياخ انت "عبد الله " دا .. اللخ اللخ

دي كان ردو

Quote: قد يجمع الله الشتيتين بعدما ** يظنان كل الظن ألا تلاقيا

نعم أخي محمد جلآل،
وهكذا شاء الله ان التقي
أخي كمال عثمان بعد
مضي كل هذه السنين.
سبحان الله...

Quote: صحيت من نومي قلت اتصل على العسكري المناوب عشان اساله من عدد الرخص الباقية .. قام رد على نفس الشخص الشفتو في المنام من دون الاخرين ...سالته عن الرخص الباقية قال لي دقيقة اعدهم .. عداهم وقال لي باقى اربعين رخصة ..والله لامن جسمي ارتعش ..

مبااااااالغة يا ود القاضي.
والله صحي.


منتظرين التانية...

Quote: لا صدفة لا شتين انت بس بتعرف نص سكان السودان الهادى نصرالدين(الضلالى) ما بلحقك

النصري يا صديق،
الكلآم ده كان زمان زمن الزمن زيّن،
والشعر مغتي الإضنين. زمن عطبرة
الحلوة. لكن هسع وحاتك عطبرة زااااتا
انا بقيت فيها غريب الوجه واليد، واللسان.

أها، ضابح واللآ ما نجي؟؟؟

Quote: الأخ معـاويه المـدير ..ســلامات بوسـت حــلو وأحـلى مـا فـيه تطـرق أخـونا مـامـان لـبركـات أهـلنا ناس أم ضـوابان. شـكرا لكمـا.

لكي اسمى آيات الشكر أخي عبد الله علي
طلّتك البهيّة، وخالص مودتي.
تسلم...

العزيز/ ود المدير

والمتداخلون

بوست رائع

وقصص ممتعة

لك التحية

Quote: دي بركات (سيدي الحسن) يا معاوية ياخي

مافي شك يا تولوس.
تحايا واشواق، وكل شكري
لك علي المرور...

شوف دى يا معاوية ..
وحصلت لى مع بوردابى معانا هنا وكلكم بتعرفو ..
كنت أتحدث مع إبن خالتى بالهاتف وكان يوصف لى منزل نسابته
الذى كنا مدعويين عندهم (سماية)..
وأثناء وصف المنزل أدخل بى جاى وأمرق بى جاى بعد الإستوب طوالى ..
أها وصلت وين ؟
أنا فى الحتة الفلانية ..
حسيت تغير فى الصوت وتداخل فى المكالمة وجانى صوت جمال السنوسى الما بغبانى ..
وقال بس بس بس وصلت تلقانى اللفة الجاية شمالك تلقانى واقف ليك بره !!
جمال السنوسى ؟
آى يا أبودية أنا جمال وأنا جادى والله المحل الإنت فيهو ده بيتنا !
طيب الدخلك فى المكالمة دى شنو ؟
بطريقته المعروفة : كيف أنا ماود شيوخ
لفيت بالمكان القالو لى ووجدت جمال السنوسى بشحمو ولحمو ..
عيدنا عليهو وأدانا عيديه وأنا ومع معى مزهولين حتى اليوم مما حدث !!
وكان مكان السماية بنفس وصف بيت ناس جمال بس عكس الشارع !!!
فسبحان الله !

Quote: يا دفعة دي بركات شيخي ... والله صحي مش بقولوا رب صدفة خير من الف ميعاد

والله صحي يا فردة.
إنت شيخك ده كمان بتصاقع؟؟؟

Quote: بعد هذا الحادث بثلاث سنوات ...... كان أمر مصيري جداً يتوقف على الحديث مع شخص لا أعرفه .... ولا أعرف كيف أصل إليه. ذهبت إلى الشنطة "السامسونايت" لاستخراج بعض الوثائق التي احتاجها لأمر آخر. عثرت يدي على الورقة سالفة الذكر. فتحتها .... وجدت فيها اسم الشخص المطلوب ورقمه رغم أنني لا أتذكر أصلاً أنني قابلته أو حصلت على رقمه أو كان بيني وبينه أي سابق معرفة. إلى الآن لا أعرف كيف وصلت هذه الورقة إلي. وهي مكتوبة بخط غير خط يدي.

سبحان الله.
والله يا هانئ ده فعلاً حدث اغرب من الخيال!!!...

تحياتي...

Quote: ناس شنو ؟ أهو دا زميلي وده ود أخوي طالب في الجامعة . يا أخي أنت بتلعب تجيب لينا وليد ودايرنا نديك مرة ؟ يا أخي الوليد ده أنا قلت ليك طالب في الجامعة ..

والله لكن يا ود قاسم طلعت وِليداً بالحيل ناجح.
دي وآحدة من الأشياء الجميلة المابتتنسي ابداً.
كتّر خيّرك كتيّر يا ود قاسم، والله الحكاية
دي بالحيل بسطتني. بتوريك إنو أهلنا ديل
عندهم تقدير لبعض فايت الحد.

وُد وتحيّة...

Quote: صاحبو طوالي سلموا 2000 ريال وأدى ديلاك كل واحد 1000 ولا أملك إلا أن أقول: سبحان الله والحمد لله ولا إله إلا الله والله أكبر. توفي صديقي هذا عليه رحمة الله والطرف الآخر موجود إلى الآن!!!

نسأل الله له الرحمة والمغفرة.
الرجل يبدو انه كان صادق النوايا، وقصد الحج
طلباً لله سبحانه وتعالى.
نحسبه من الصالحين ولا نذكي علي الله احد.


سلآمات يا محمد جلآل...

Quote: شيخي ود المدير بعد ما اتبينت يزورو فيك

حواري ود الخليفة.
يا زول أنا متبيّن من زماااان، بس إنت ماك
خابر شي ساااكت. كدي اصبر لآمن أحكي
الحكاية التانية عشان تآمن.

مودتي يا صديق...

الاخ ود المدير

بوست شيق واحداث اغرب من الخيال فعلا

وهذه قصتي حدثت في العام 2001

كنت في احدي اجازاتي السنوية في السودان وكان اليوم خميس

وباقي لي من السفر تلاتة يوم، يعني لازم اسافر يوم الاحد

وكان لازم اعمل تأشيرة الخروج من المغتربين يوم الخميس عشان استمتع باخر يومين في الاجازة وانا مرتاح البال

وكان معاي اخي وصديقي عمار عبيد وهو الان بالنرويج رد الله غربته

طلعنا من البيت في ودسلفاب الساعة تمانية صباحا مشينا الحصاحيصا عشان نوصل المغتربين بدري

خاصة وانو انا عندي مشاكل بتاعت متأخرات ضرائب كتيرة

عمار كعادته يقيف مع دا ويسلم علي دا وينادي دا وانا كنت في اشد الضيق

المهم ركبنا متأخرين خالص ووصلنا المغتربين قبل نهاية الزمن بدقيقتين تقريبا

فجأة اتلفت لقيت عمار واقف ليهو مع زول من الحصاحيصا وبدي فيهو في دولارات

الدولارات الكان مفروض ادفعها انا للضرائب لانو الراجل قال لعمار انو الليلة اخر يوم ليهو في الاقامة في السعودية

وانو الجماعة رفضو يتفاهموا معاهو او يأجلوا ليهو الدفع

لمن عرفت القصة من عمار زعلت زعل شديد وكان الوقت المحدد انتهي والمكاتب خلاص قفلت

قلت لي عمار خلاص نرجع البيت لانو المكاتب قفلت ولانو انا تاني ما عندي قروش عشان ادفعها لناس الضرائب

قال لي خلينا النشوف المكاتب قفلت ولا لسع مشينا لقيناها مقفلة قام قال لي خلاص ندخل الصالة ونطلع بالباب التاني

مشيت معاها وانا اكاد اغلي من الزعل فجأة انفتح باب مكتب وطلع منو ضابط برتبة كبيرة ونادي عمار

يا عمار يا عمار سلم عليهو وقال ليهو مالك بي هنا

عمار قال ليهو عاوز اعمل تأشيرة لود خالتي دا لكن ما عندو قروش والمكاتب قفلت

قال ليهو وينو جوازو عمار اداهو الجواز الضابط رجع بعد اقل من دقيقتين والجواز مؤشر

سألت عمار من الضابط قال لي والله ما بعرفو !!!!!

Quote: الواحد ممكن يزعل لكن حتى الزعل لا يستطيع أن يصمد أمام الرد المهذب ...ولا يهمك يا حبيب

ابو المقداد اريتك طيب والولاد

شغال قراية فى الصدفة دى .
كل ما يوم ...ومركز شديد
يالراكز.....ياخ اكتب عندك
الكتير الجميل

سلامة عايدة يا زول


وتحياتى

Quote: ما يحدث هنا ابداع اغرب من الجمال تسجيل حضور ومتابعة

مرحبتين حبابك يا عمار، وإن شاء الله يطيب
لك المقام بيننا في هذا الحوش الماهل.
كتّر خيّرك كتيّر، وخليك متابع.

مودتي...

Quote: بدون تفصيل.... أنا قابلت بالصدفة والدي في أوائل الثمانينات في الحج (منى) لم يكن يعلم بأني في السعودية وقتها و لم أكن أعرف أنه ينوي الحج في تلك السنة. أنا أتيت من لندن (و كنت طالبا حينها)و هو من الخرطوم

بِر الوالدين يفعل الكثير المثير!!!
ده الحج ملآيين يا كوستاوي.

وُد وتحيّة...

سلامات للمدير وضيوفو،

عشان تكون عندك فكره عن حادثتي ود. أحمد القرشي وشيقوق والموج عليك بزيارة رابط
بوست الزميلة عرفة افضل خدعة بصرية في العالم

وشوف إنو فيصل محمد خليل والمكاشفي أنزلا نفس الصورة من بين آلاف الصور في النت عن الخدع البصرية وفي ذات
اللحظة وبينهما - على ما أعرف - آلاف الكيلومترات ، ما حدث في حالتنا تكرر في بوست لي مرتين في بضع دقائق
وعلى التوالي وتفصل بيننا في مسقط والموج في الرياض آلاف الكيلومترات ولا داع للتفاصيل..
تجد أدناه رابط البوست:
صور أهل ساره القيافه وغناويهم..

Quote: بالمناسبة في اسم تاني مكتوب في الورقة إنو لو ما لقيت السر أسأل عنه... اسمه (مامان).. قلت له: ايه رايك مامان دا يا هو أنا ذاتي؟؟؟ ... فما كان منه إلا أن جلس على الأرض غير مصدق لما حدث.. وبدأ يردد: لا حول ولا قوة إلا بالله.. لا حول ولا قوة إلا بالله

ليس فى الامر غرابة ان يسال اى شخص سوداني يقابله عما اذا كان يعرف السر عثمان الطيب انما الغريب العجيب المدهش ان يكون المسئول هو مامان!
يا أهوى دا ما صدفة دا تحير ناس الإحصاء والاحتمالات

ود المدير وضيوفه
استمتعت جداً بقراءة هذا البوست الدسم
والله صحي وصحي والله
جني

الاخ ود المدير

بوست شيق واحداث اغرب من الخيال فعلا

وهذه قصتي حدثت في العام 2001

كنت في احدي اجازاتي السنوية في السودان وكان اليوم خميس

وباقي لي من السفر تلاتة يوم، يعني لازم اسافر يوم الاحد

وكان لازم اعمل تأشيرة الخروج من المغتربين يوم الخميس عشان استمتع باخر يومين في الاجازة وانا مرتاح البال

وكان معاي اخي وصديقي عمار عبيد وهو الان بالنرويج رد الله غربته

طلعنا من البيت في ودسلفاب الساعة تمانية صباحا مشينا الحصاحيصا عشان نوصل المغتربين بدري

خاصة وانو انا عندي مشاكل بتاعت متأخرات ضرائب كتيرة

عمار كعادته يقيف مع دا ويسلم علي دا وينادي دا وانا كنت في اشد الضيق

المهم ركبنا متأخرين خالص ووصلنا المغتربين قبل نهاية الزمن بدقيقتين تقريبا

فجأة اتلفت لقيت عمار واقف ليهو مع زول من الحصاحيصا وبدي فيهو في دولارات

الدولارات الكان مفروض ادفعها انا للضرائب لانو الراجل قال لعمار انو الليلة اخر يوم ليهو في الاقامة في السعودية

وانو الجماعة رفضو يتفاهموا معاهو او يأجلوا ليهو الدفع

لمن عرفت القصة من عمار زعلت زعل شديد وكان الوقت المحدد انتهي والمكاتب خلاص قفلت

قلت لي عمار خلاص نرجع البيت لانو المكاتب قفلت ولانو انا تاني ما عندي قروش عشان ادفعها لناس الضرائب

قال لي خلينا النشوف المكاتب قفلت ولا لسع مشينا لقيناها مقفلة قام قال لي خلاص ندخل الصالة ونطلع بالباب التاني

مشيت معاها وانا اكاد اغلي من الزعل فجأة انفتح باب مكتب وطلع منو ضابط برتبة كبيرة ونادي عمار

يا عمار يا عمار سلم عليهو وقال ليهو مالك بي هنا

عمار قال ليهو عاوز اعمل تأشيرة لود خالتي دا لكن ما عندو قروش والمكاتب قفلت

قال ليهو وينو جوازو عمار اداهو الجواز الضابط رجع بعد اقل من دقيقتين والجواز مؤشر

سألت عمار من الضابط قال لي والله ما بعرفو !!!!!

الاخ ود المدير

بوست شيق واحداث اغرب من الخيال فعلا

وهذه قصتي حدثت في العام 2001

كنت في احدي اجازاتي السنوية في السودان وكان اليوم خميس

وباقي لي من السفر تلاتة يوم، يعني لازم اسافر يوم الاحد

وكان لازم اعمل تأشيرة الخروج من المغتربين يوم الخميس عشان استمتع باخر يومين في الاجازة وانا مرتاح البال

وكان معاي اخي وصديقي عمار عبيد وهو الان بالنرويج رد الله غربته

طلعنا من البيت في ودسلفاب الساعة تمانية صباحا مشينا الحصاحيصا عشان نوصل المغتربين بدري

خاصة وانو انا عندي مشاكل بتاعت متأخرات ضرائب كتيرة

عمار كعادته يقيف مع دا ويسلم علي دا وينادي دا وانا كنت في اشد الضيق

المهم ركبنا متأخرين خالص ووصلنا المغتربين قبل نهاية الزمن بدقيقتين تقريبا

فجأة اتلفت لقيت عمار واقف ليهو مع زول من الحصاحيصا وبدي فيهو في دولارات

الدولارات الكان مفروض ادفعها انا للضرائب لانو الراجل قال لعمار انو الليلة اخر يوم ليهو في الاقامة في السعودية

وانو الجماعة رفضو يتفاهموا معاهو او يأجلوا ليهو الدفع

لمن عرفت القصة من عمار زعلت زعل شديد وكان الوقت المحدد انتهي والمكاتب خلاص قفلت

قلت لي عمار خلاص نرجع البيت لانو المكاتب قفلت ولانو انا تاني ما عندي قروش عشان ادفعها لناس الضرائب

قال لي خلينا النشوف المكاتب قفلت ولا لسع مشينا لقيناها مقفلة قام قال لي خلاص ندخل الصالة ونطلع بالباب التاني

مشيت معاها وانا اكاد اغلي من الزعل فجأة انفتح باب مكتب وطلع منو ضابط برتبة كبيرة ونادي عمار

يا عمار يا عمار سلم عليهو وقال ليهو مالك بي هنا

عمار قال ليهو عاوز اعمل تأشيرة لود خالتي دا لكن ما عندو قروش والمكاتب قفلت

قال ليهو وينو جوازو عمار اداهو الجواز الضابط رجع بعد اقل من دقيقتين والجواز مؤشر

سألت عمار من الضابط قال لي والله ما بعرفو !!!!!

يا حامد الصاوي تعال شوف قصتي مع قريبك
عمر عبد السلآم.
قرّب يودينا الآخرة.
والله صحي...


...شتاء العام 2006 قررنا أنا وصديقي عمر عبد السلآم مغادرة مدينة يلونايف متوجهين إلي مدينة إدمنتون.
كان ذلك في ليلة عيد الكرسماس. يلونايف مدينة تقع في الشمال الغربي من كندا تسكنها قبائل متعددة من هنود
حمر وغيرهم، وإدمنتون مدينة تقع في غرب كندا. المسافة بين المدينتين تستغرق قُرآبة الـ20 ساعة.
في شهر 12 الشمس تغرب من الساعة خمسة في تلك المناطق. تحركنا حوالي الساعة 4 وكان بيننا وبين نهر
المكنزي مسافة 4 ساعات اخطر ما فيها وجود كميات كبيرة من حيوانات البفلو (جواميس الخلاء الضخمة)،
يعني في الضلآم الدامس لو طصينا وآحد، معناتا نحن والعربية لحقنا أُمات طه.
نهر المكنزي يُستعمل كطريق مرور سريع عندما يتجمد في الشتاء، ويمكن ان تمر عبره شاحنة حمولة 60 طن.
توكلنا علي الله وركبنا الظلط. ظلآم دامس، والجليد نازل من السماء مغطي الطريق. بحمد الله وصلنا النهر،
وكانت المنطقة كلها ثلج. ما قدرنا نعرف المدخل للشارع، وفي اثناء حيرتنا إقترب مننا طرك بيك اب فيه رجل من
احد قبائل الأسكيمو معه إبنته. الراجل سألنا عن وجهتنا وقال تعالوا ورايا. قطعنا النهر، وقلت ليهو نحن حانقيف في
طرمبة البنزين القدآم، وبعد دآك حانواصل لإدمنتون. الراجل وبنتو فتحو قدامنا. طركهم سنين طبعاً، ونحن فضلنا
داعكين لحدما وصلنا الطرمبة. لقينا الطرمبة قافلة والراجل وبنتو في إنتظارنا. قال لينا: في ليلة الكرسماس ما أظن
تلقوا طرمبة فاتحة، لكن في مدينة صغيرة تبعد حوالي 25 كيلو من هنا، امشوا شوفوها، يمكن تكون فيها طرمبة فاتحة.
شكرناهم، ودورنا علي المدينة. وصلناها فإذا بها تغِطُ في ثبات عميق. حتي نقطة البوليس ما لقينا فيها بشر. توجهنا
لأقرب طرمبة بنزين، خزنا جنبها، وكانت الساعة تزحف نحو الرآبعة صباحاً. طلعنا البطاطين بتاعتنا وبقينا ندوّر
العربية لحد ما تدفأ، ثمّ نوقفا ونتغطى بالبطاطين في محاولة للمحافظة علي ما تبقى من بنزين. أنا أصلوا ما جاني نوّم،
لآبد جوّه البطانية فجأة سمعت طرق خفيييف علي زجاج العربية. فتحت عيوني، وكشفّت لقيت وآحدة من بنات الأصفر
وآقفة قبال العربية. نزلت القزاز، طوالي قالت لي: دايرين بنزين؟؟؟
قلت ليها: نعم.
قالت لي: تعالوا، انا دآيرا أفتح الطرمبة.
لكزت عمر، ومشينا علي الطرمبة عبينا التنك لخشمو، ودخلنا جوّة
إستعملنا الحمآم، وإشترينا عصير وشبس، ورويحتنا إتردت وعويناتنا فتحن.
مشيت علي بنت الأصفر قلت أدردش معاها شوّية.
سألتها: إنتو دائماً بتفتحوا الطرمبة في المواعيد دي حتي يوم الكرسماس؟؟؟
قالت لي: نحن اصلاً في الكرسماس ما بنفتح خالص.
قلت ليها: البلد صاااانة، وما أظن يجي زول حايم لبنزين!!!
قالت لي: تعرف، أنا أصلاً كنت قاعدة بتفرج في التلفزيون، وحكاية أفتح الطرمبة دي ما كانت في بالي.
فجاءة جاني إحساس إنو في ناس في الطرمبة دايرين بنزين، وبدون ما أفكر دورت عربيتي وجيت لقيتكم!!!
الدهشة عقدت لساني، وما عرفت اقول حاجة. بعد مساااافة قلت ليها شكراً، ودورنا عربيتنا وكسحنا...

Quote: البوست مالو (بيت عزّابة) يا كافي البلا، الكرامات دي مابتحوم جهة الجكس ولا شنو... بجيكم بي واحدة مبالغة...

اميرة الأميرة،
مرحبتين حبابك. كان ما عرفة جات كان
كلمنا ود الموج يختليك طوبة.
والله صحي.



مودتي، ومنتظرين الكرآمة...

Quote: عند وصولنا لسوق باب شريف .. ونحن لافين على المكان المقصود .. لمحت المظروف الأبيض من بعيد. ... صِحت فى حسن ياهوداااك . لم يصدقنى .. قلت ليهو بس أقيف جنبو .. وقف ومددت يدى دون أن أنزل من العربه وتحسسته وعليه آثار الأحذيه التى مرَت فوقه . .. يلا ياحسن خلاس لقيناهو أصر حسن باشاب أن أفتح المظروف وأتأكد من المبلغ .. فتحته ووجدت المبلغ كما هو. وضع حسن باشاب يديه على رأسه وهو يردد الشهاده. ........... بالله شفتو كيف ؟؟ أنا مش ود شيوخ

سلآمات ومرحبا يا أُسامة الكرور.
مال الحلآل ربنا بحفظوا وينزل فيهو البركة، فهنيئاً لك
جمعة بمراعاة وحرص شديدين.

لكن يا أسامة لقيتك وآصل بالحيل. يا زول إنت
بعد ده يزورو فوقك.
والله صحي.

مودتي...

الأخ معاوية المدير وضيوفه الكرام

لكم التحية
أرجوأن تتيحو لي فرصة أخرى لأحكي لكم حكاية (جواز بشير ) كإضافة لغرائب القصص التي سمعناها في هذا البوست

حكيت (حكاية طيبة ) التي أوردتها سابقا في أول هذا البوست، لصديقي الدكتور توفيق الطيب البشير فحكى لي قصة مشابهة أوردها لكم وهي من غرائب الصدف أيضا :قال د. توفيق أن بطل القصة هو أخاه أبو مدين الطيب (القاضي حاليا ) وكان ذلك في سبعينات القرن المنصرم حيث كان أبومدين طالبا بكلية القانون بجامعة الخرطوم. نزل أبومدين من البص القادم من أم درمان في ميدان الأمم المتحدة في طريقه لداخليات البركس بجامعة الخرطوم، فلمح جواز سفر ملقى على الأرض فأخذه وتفحصه فوجده يخص شخصا اسمه (بشير) ويسكن الصحافة مربع 17 حسب العنوان المكتوب وعلى الجواز تأشيرة سفر الى ليبيا. احتار صاحبنا فيما يفعل بالجواز وكيف يوصله الى صاحبه. فقرر أن يذهب الى بيت عمه بالصحافة مربع 16 في نهاية الاسبوع ليتغدى معهم ولعل عمه يكون على معرفة بالرجل صاحب الجواز المفقود.

وفي يوم الجمعة التالية، وضع أبو مدين الجواز في جيب القميص ووضع بطاقته الجامعية في الجيب نفسه ، فانحشرت البطاقة بين أوراق الجواز. وعندما وصل ميدان الأمم المتحدة بالخرطوم لركوب البص للصحافة وفي الزحمة (والدفسيبة) وقع الجواز من جيبه على الأرض ولم يدر صاحبنا بما حدث للجواز. وبعد نصف ساعة كان والد أبومدين آتيا من أم بدة بأم درمان حيث يسكن ، وهو في طريقه للصحافة لمنزل أخيه (والذي هو عم أبو مدين) فلمح جواز سفر ملقى على الأرض فأخذه وتصفحه ، ولم يعرف الاسم ولكنه فوجىء ببطاقة ابنه (أبومدين) وسط أوراق الجواز. فاحتار في الأمر أيما حيرة وأخذ الجواز معه. وعند وصوله لحي الصحافة وجد ابنه فسأله إن كان لديه شىء مفقود ولكن أبومدين قال بأن كل أغراضه موجودة لديه. فقام والده بابراز بطاقته الجامعية ، فتذكر أبو مدين جواز (بشير)، فأخرجه والده من جيبه. وللمفاجأة كان عمهم يعرف (بشير صاحب الجواز المفقود) وسمع بقصة فقدان الجواز فدلهم على منزل الرجل. فذهب أبومدين يرافقه ابن عمه قبل الغداء بقليل على أن يعودا ليتغديا بالبيت. ولكن بشير صاحب الجواز الذي تم العثور عليه، والذي طار من الفرح ، حلف بالطلاق (ما يطلعوا من البيت إلا يحضروا الغداء.) وذبح خروفا بتلك المناسبة السعيدة

Quote: سبحان الله يا معاوية زي ما قال أستاذ محمد المرتضى هي ليست صدف بل هي من تدبير من قال (إنا كل شيء خلقناه بقدر) سبحانه. حصلت لي بعض القصص سأعود لروايتها إن شاء الله.

اعوض أخوي، كيفِنّك يا زول؟؟؟
لا شك في أنها من تدبير عليم خبير. لكن يا العوض محمد المرتضى
جعلني في حيرة من أمري بخوص مفردة صدفة!!! الكلمة جات من
وين؟؟؟.
قبل فترة زرت الأخ عصام العوض، وسألتو منّك بعد علمت بوجودك
في كالقري من الأخ التجاني. عصام قال لي العوض ده هسّع مرق من
هنا، وده باقي الكيك الأكلوهو. تصدق. أها شوف كمان لمان ربنا يكون
كاتب لينا ما نتقابل في بيت عصام، وإحتمال كبير يكون كاتب لينا نتقابل
علي جبل عرفات. أسأل الله ذلك يكون.

في إنتظار عودتك علي احرّ من الجمر.
تحياتي.

Quote: الاخ معاوية والمتداخلين تحياتي البوست شيّق جداً

سلآمات يا عرفة، والعيد يتبارك عليكم
مقدماً.
مشكورة علي المرور، والإضافة.
تحياتي...

Quote: محمد المرتضي : يا العزيز ، ليس هناك ما يسمى (صدفة) في هذا الكون المنظم بدقة تبعث على الدهشة، إن تُرِكت خلجة نفس للصدفة لانتهى الكون والزمكان ولما كان كل شئ بهذا النسق العجيب الدقيق التقدير.

شكراً صاحب البوست / معاوية المدير والاخوة المرور ..

وأنا أحكي ليكم قصة أيضاً أقرب الي الخيال حصلت معي فعلاً في عرفــــات في موسم حج احدى سنوات النصف الثاني من تسعينات القرن الماضي !!!
ويشهد الله اني لم احكي هذه القصة لاحد قبل هذا اليوم !!
في تلك الفترة كنت مقيماً في المملكة وذهبت مع مجموعة من الاصدقاء الي الحج وأتي احد اقربائي الي الحج في تلك العام وفي يوم عرفة وبعد اداء صلاتي الظهر والعصر قصراً في مسجد
نمرة توجهنا الي عرفات للاذكار والدعاء وكان معنا كتاب كنت اقرأ انا منه واصدقائي يؤمّنون .. وقريبي لم نلتقي به بعد والاتصالات في ذلك الزمان كانت صعبة .. وقريبي هذا عقـب
الصلاة كان من ضمن الحجاج الذين صعدوا جبل عرفة وحسب اقواله يقول : بأنه سمع صوتي ونزل من الجبل وهو يسترق السمع ونحن كناويشهد الله بعيدين جداً من الجبل وأثناء عبوره من أمامنا
وهو يسترق السمع وقع بصرى عليه وأوقفته وكان هناك اللقاء ...كيف استطاع ان يفرز صوتي من بين ملايين الاصوات ؟؟؟
لولا ان العناية جمعتني به لاجهدت نفسي شديداً في سبيل الالتقاء به ..
شكراً ود المرتضي وفعلاً الكون منظم ومقدر تنظيم وتقدير عجيب ودقيق ..

تحياتي
عصام كبدو, صديق احمد بشير

Quote: في سيناريو قريب للحصل معاك دا .. الو معاي عبد الله!؟ ياخ انت "عبد الله " دا .. اللخ اللخ دي كان ردو

الظاهر زولك ده ضرب في تلفون الراجل،
وسأل من عبد الله زي دشليون مرّة كده.

قيقراوي إزيّك...

Quote: بالله؟ انا افتكرتك خايف من سيد التلفون الجاك بالغلط يقرا البوست ويجي يدفعك الخمسميات ـــــــــــــــــــــــــــــــــ دائما ما اراهن على نقاء اصدقائي عندما تختلف وجهات النظر لكما كل الود اصدقائي سامي وود المدير

ود الخليفة يا صاحب.
تصدق، يوم قلت أعمل حريف وإتصل علي نفس الرقم يمكن تلفق ويطلع بدر الدين.
إتصلت برضو طلع حسن خليفة، ويا زول دقيناها ونسة مع بعض والراجل وعد
يلمني في تلفون بدر الدين في الإتصال القادم.

ليس من الغريب ان يكون سامي صديقك.
لكما مودتي...

Quote: شوف دى يا معاوية .. وحصلت لى مع بوردابى معانا هنا وكلكم بتعرفو .. كنت أتحدث مع إبن خالتى بالهاتف وكان يوصف لى منزل نسابته الذى كنا مدعويين عندهم (سماية).. وأثناء وصف المنزل أدخل بى جاى وأمرق بى جاى بعد الإستوب طوالى .. أها وصلت وين ؟ أنا فى الحتة الفلانية .. حسيت تغير فى الصوت وتداخل فى المكالمة وجانى صوت جمال السنوسى الما بغبانى .. وقال بس بس بس وصلت تلقانى اللفة الجاية شمالك تلقانى واقف ليك بره !! جمال السنوسى ؟ آى يا أبودية أنا جمال وأنا جادى والله المحل الإنت فيهو ده بيتنا ! طيب الدخلك فى المكالمة دى شنو ؟ بطريقته المعروفة : كيف أنا ماود شيوخ لفيت بالمكان القالو لى ووجدت جمال السنوسى بشحمو ولحمو .. عيدنا عليهو وأدانا عيديه وأنا ومع معى مزهولين حتى اليوم مما حدث !! وكان مكان السماية بنفس وصف بيت ناس جمال بس عكس الشارع !!! فسبحان الله !

ابو دية

يا زول دي حاجة خفيفة

والله احكي ليكم هنا تقومو جارين او تعملو لي مسيد وقبة

أفلام ولا ممكن تتخيلا

واحدة على الماشي :

الساعة كانت قريب منتصف الليل

عام 1997

شهر يوليو
وكان زواجي تاني يوم ( حفل الحنة )

ولي صديق اسمه عزالدين

ساكن الحاج يوسف
ولا اعلم اين يسكن
تحركت بالسيارة
من الصحافة للحاج يوسف
لا اعرف المنزل
وصلت الحاج يوسف
اخترت احد الشوارع
في نص الحاج يوسف
دخلت شمال ثم اول لفة يمين
لقيت زول ماشي

قلت ليهو داير بيت ناس عزالدين
قال لي يا هو داك

ووصلت البيت

وعزمته للعرس

شفت انا شيخ كيف :

تسلل :
عندي زي ده كثير والله بس بحكي ليك لمن نتقابل

إتصل علي الأخ حسن كمال من الولايات المتحدة الأمريكية مبدياً
إعجابه بالبوست، حيث اثنى علي جميع المتداخلين شاكراً لكم علي
ما خطت أقلآمكم من احسن القصص.
الف شكر لك أخي حسن كمال، وخليك متابع.

ايضاً من نيو جرسي إتصل علي اخ، وحكى لي قصته التي هي
أغرب من الخيال، وسألني ان انزلها في البوست. سأقوم بإضافة
القصة، واتركها لك أخي محمد المرتضى للتعليق راجياً ان تكون
ما زلت متابع معنا...

Quote: احمد ربك يا معاوية انك ما وقعت في تلفون صاحبنا طارق كرفس كان قطع ليك ناااشف

والله يا قيقراوي زولك ده من إسمو الظاهر عليهو
بتاع مصايب. قطع ناشف بس!!! علي اليمين كرفس
ده من إسمو كان كرفسني عديييل كده.
والله صحي.



تحياتي...

Quote: العزيز/ ود المدير والمتداخلون بوست رائع وقصص ممتعة لك التحية

حياك الغمام أخي عبد العزيز عيسى،
ونشكرك عظيم الشكر علي المرور
والثناء.
تحياتي وشكري...

Quote: قبل فترة زرت الأخ عصام العوض، وسألتو منّك بعد علمت بوجودك في كالقري من الأخ التجاني. عصام قال لي العوض ده هسّع مرق من هنا، وده باقي الكيك الأكلوهو. تصدق. أها شوف كمان لمان ربنا يكون كاتب لينا ما نتقابل في بيت عصام، وإحتمال كبير يكون كاتب لينا نتقابل علي جبل عرفات. أسأل الله ذلك يكون.

سبحان الله و أرجو أن يجمعنا الله في ساعة خير.
أحكي ليكم القصة الأولى يا معاوية. السنة الفاتت ونحن ماشين على السودان وقفنا كم ساعة في مطار هيثرو. و براكم عارفين الزحمة في مطار هيثرو لدرجة ممكن الزول المعاك يروح منك. الأولاد قالوا دايرين يمشوا الحمام قامت أمهم مشت معاهم و خلوني مع الشنط بعد شوية يجوني راجعين و معاهم واحد أخونا سوداني من ناس مدينتنا الساكنين فيها (ريجاينا). قالوا طالعين من الحمام و فجأة زول بناديهم بأسمائهم فلقوا أخونا دا و هو ما كان عنده فكرة إننا ماشين السودان و هو كان راجع و إحنا ما عندنا فكرة إنه راجع في اليوم دا. و ألذ حاجة في الموضوع إنه صديقنا دا عنده اسمه مطابق لزول خطير فمتعود في الرحلات الزي دي بوقفوه ساعات و فعلا في مطار هيثرو وقفوه لغاية ما الطيارة الحاجز عليها لكندا فاتته و لما اتأكدوا من شخصيته عملوا ليه إجراءات الحجز و أدوه كبونات لوجبات لغاية مواعيد طيارته الجاية و لمن شاف زوجتي و أولادي كان يادوبه طالع من غرفة التحقيق بعد عدد من الساعات قضاها فيها. قال لي والله لمن شفتهم قلت يا ربي الناس ديل شالوني و نزلوني في ريجاينا ولا شنو؟

Quote: حسيت تغير فى الصوت وتداخل فى المكالمة وجانى صوت جمال السنوسى الما بغبانى .. وقال بس بس بس وصلت تلقانى اللفة الجاية شمالك تلقانى واقف ليك بره !! جمال السنوسى ؟ آى يا أبودية أنا جمال وأنا جادى والله المحل الإنت فيهو ده بيتنا ! طيب الدخلك فى المكالمة دى شنو ؟ بطريقته المعروفة : كيف أنا ماود شيوخ لفيت بالمكان القالو لى ووجدت جمال السنوسى بشحمو ولحمو .. عيدنا عليهو وأدانا عيديه وأنا ومع معى مزهولين حتى اليوم مما حدث !! وكان مكان السماية بنفس وصف بيت ناس جمال بس عكس الشارع !!! فسبحان الله !

سلآمات يا صلآح.
يا زول صلّح علآقاتك مع ناس الهلآل ديل.
الناس ديل واصلين.
والله صحي.

شايفو كمان جاب ليك وآحدة لا تقل غرآبة
عن العشتها.
فعلاً عالمنا ده بتحصل فيهو حاجات
تشطب الراس.

تحياتي يا صلآح ابو ديه ليك، وعبرك
لجميع أهلنا ناس الشعبيّة...

يا ود المدير اها مدام ضياء ما جاء حكي بحكيها انا باختصار شديد

انا وضياء بنتعارف من سنين بعيده خلاص اها اخر مرة اتلاقينا جوة السودان دا كانت
نهاية 92 ومنها تاني اتشتتنا و ضياء بعديها بي فترة هاجر و بقيت ما عارف ليهو درب
المهم السنين تمشي وتجي تمشي وتجي قام اتوفي الراحل المقيم مصطفي سيد احمد بعد الوفاة
بي 8 شهور كدا كان عندي في رأسي فكرة تخص أسرة الراحل مصطفي سيد أحمد فبقيت افتش لزول
من الأسرة أو زول يكون بعرفه المهم بعض الاصدقاء دلوني علي كبتن طيران اسمه و داعة محمد
شغال في العمارة الكويتية في خطوط اسمه تقريباً سالبة المهم اتصلته على و داعه دا و اتكلمته
معاهو و اهتم جداً بالموضوع و حدد لى انو اجيهو بكرة الساعه 12 ظهراً بالضيط في العمارة الكويتيه
انا بكرة بالضبط الشاعه 12 الا خمسة دقائق كنت اقف بالقرب من باب العمارة الكويتية و 12 شوكة بالضبط كنت بخبت في باب مكتب الكابتن وداعة قبل الباب يفتح جاني صوت الكابتن :- سفيان نابري صح؟
قلت :- ايوة نعم ... فتح الباب مباشرة واخدنى بسلام سوداني يشبه فعلاً سلام زول بيكون صاحب وصديق لمصطفي سيد احمد المقبول و خشيت المكتب معاهو لقيت في زولة قاعده معاهو يا معاوية زولة سمحة سماح مبالغه لونه زي الكاكاو و حاة الله ما في زول بقدر يعاين ليها مرتين و لو ربنا قدرك عاينته اها محل عينك وقعت دا تاني الله اعلم تحولوا لحته تانيه ماشاء الله غايتو طبعا خشيت و لا سلمته عليها ببساطة سببي انى كنت فاكره ما سودانية و لا انها بتعرف عربي و الخلاني افكر كدا هو انو وداعة كابتن طيران و قصص الطيران والمضيفين والحاجات دي حسب بساطتى وعدم معرفتي انو بكونو اغلبه اجانب المهم طنشتها و قعدته كابتن وداعة قالى :- انت جيت تمام في مواعيدك بس انا ح اعتذر منك و امشي مشوار 20 دقيقة واجيك ماشي هنا دا شارع القصر عشان احصل البنك الفرنسي اسلمهم ورق واجي سريع جدا و ح اخليك مع أيشا دي تتونس معاها و سريع اجيكم !!! انا طبعا اتهجمته هجمة عدوك و في سري قلته المصيبة دي انا اتونس معاها اقول ليها شنو !!!!؟ وبي ياتو لغة ذاتو!!! اها هو بعد قال لي كلامو دا طوالي اتلفت على أيشا و بلغة سودانييييية قال ليها سفيان دا زول من محبي مصطفي و عندو فكرة مشروع تستفيد منو اسرة مصطفي فياخ اتونسو بجيكم راجع أنا طوالى نطيت قلته ليهو هي بتعرف سوداني!!! قعدو يضحكو الاتنين و كابتن وداعه طلع مشي .
انا اعتذرته لي ايشا اني ما سلمته في البداية و حكيت ليها السبب و هي قبلت الاعتذار و قالت لي :-
كلامك برضو صاح ما غلط انا اصلا من 4 سنوات عايشه برا مع اسرتي في فرنسا قلته ليها بس انتى بتعرفي عربي و بتعرفي سوداني كويس قالت لي صح بسبب ناس البيت و بعدين كونت صداقات ومعارف كتيرة مع السودانيين و ما انقطعته منهم و حكت لي انها درست في المغرب و انها اول مرة تعرف مصطفي سيد احمد عرفتو من زول مغربي كان ساكن في الشقه التحتهم طوالى و انو كل مرة بتسمع صوت مصطفي بالعود طالع من شقة المغربي دا و المغربي اول ما عرف انها سودانية بقي يومي يقول ليها :- ما شاء الله عندكم فنان فنان لحدي ما يوم طلبت منو الكاسيت و سمعة مصطفي و بعديها بقت تفتش كل اغانيه لحدي ما جمعت حصيلة كبيرة جدا و لحدي ما قدرت اتعرفت عليه و علي كابتن وداعة بس مصطفي رحل بعد فترة بسيطة .
المهم دي كانت الونسة بتاعة التعارف و خلصت قمته قلته ليها يعني انتى حالياً عايشه في فرنسا قالت لي نعم قلته ليها تعرفي و الله فرنسا دي عندي فيها صاحب رايح منى من زمن طويل (كنت في الوكت داك عرفته انو ضياء استقراء في فرنسا) و صاحبي دا زول خربان ما زول غربة و زول حنين و بحب البلد دي قلته ليها كدا وسكته هي ضحكت و قالت لي غالبية السودانين لما يعيشو برا لو اتذكروا السودان بيبكو و واصلت قالت لى انا لي فترة بنزل السودان وبرجع فرنسا بحكم عملى و لما ارجع فرنسا عندي زول صاحبي سوداني بكون عارف انا راجعه متين و الله لحظة وصولى بلقاهو حارسنى في خشم الباب عايز يعرف اي حاجة عن السودان بيسالني حت من شوارع الزلط والغبار و بسالني من الصقور لسه بتطير في السماء بيسألني سؤال منكر ونكير وهسي انا جيت لي تلاته يوم و راجعه بكرة و جيت و اصلي لا اتلفته لا حمته و لاعرفته الحاصل شنو في السودان الايام دي وهسي شايله هم لما ضياء دا يلاقيني اقول ليهو شنو ذاتو؟!
لحظة انا سمعته اسم ضياء يا معاوية ما عارف اقول ليك شنو او اوصف ليك الحصل شنو بس قلته ليها :- ضياء الدين ميرغني الطاهر !!!؟ البت دي نطت وقفت علي حيله :- انت بتعرف ضياء الدين ميرغني!!!؟
انا بصراحة دموعي جرت :- قلته ليها ضياء دا ياهو صاحبي الرايح مني ... البت ذاته بكت و بقت تصرخ جوة المكتب :- لاحول ولاقوة الا بالله لا اله إلا الله و جابت ورقتين من مكنة الطباعة بتاعة مكتب كابتن وداعة و ادتني قلم قالت هسي تكتب رسالة لي صاحبك و بتكون انقذتى من الاسئلة الكتير و طوالى قعدته اكتب في الرسالة .
كابتن وداعة لما جاء لقاني و اقع كتابة سااااااااااااي
وعرف القصة و اتعجب .

رسالتي و صلت لضياء و بعديها تااااني انقطعنا بس الصدف تقوم تجمعنا هنا في سودانيز وبعديها اتواصلنا عبر الوسائط الاكترونية لكن من 92 ما الاقينا وجه لوجه الا في 2010 بالقاهرة ودي قصة عندها حكاية تانية و برضو ممتعه و انا حكيتها في سودانيز هنا .


عندي قصة تانية عجيبة عندها علاقة بالذاكرة عايز فيها فتوى من محمد المرتضى لاني مرة لاقيت لي شاب مش لاقيتو بمعنى لاقيتو بس شفته و شو زي 6 ثواني فقط بعد 11 سنة جيت لقيتو في بيت صاحبي قاعد طوالى اتذكرتو و اتذكرته تفاصيل السته ثواني ديك وحتى اتذكرته هو لابس شنو و في نفس اليوم داك صاحبي سيد البيت دا ذاتو كان معاي طوالى اخدتو برا و كلمتو وقلته ليهو الزول دا انا وانت لاقيناهو قبل 11 سنة في اليوم الفلاني و الحته الفلانية وكان لابس كدا كدا كدا و كان ماشات معاهو بتين لابسات كدا كدا كدا صاحبي قال لي ابدا اصلو ما ممكن تكون بتتكلم جد قلته ليهو ارح نسألو و خشينا وسالناهو :- يا سامر انت قبل 11 سنة حضرته حفله في الفندق الكبير كان بغني فيها زيدان ابراهيم و حيدر بورتسودان ؟ قال :- ايوة نعم !!! قلته ليهو :- اليوم داك انت كنت لابس لبسة ادروبية و معاك بتين لابسات كدا كدا ؟ قال ايوة و الله !!! قلته ليهو اليوم داك جيت قاطع قدامي وانا شفتك وهسي اتذكرتك واتذكرته اليوم دا بتفاصيلو كلها ... نزار صاحبنا المشترك قرب يغمى عليهو لووووووووول .


شكرا يا مدير
شكرا للرحابة و المتعه
وشكرا خليت الزول يفرق و يتذكر .

معاوية الجميل والمتداخلين ...سلام

Quote: منتظرين التانية...

التانية ياحبيب حصلت عام 1992م ..
بيتنا في كسلا فيهو انا وحبوبتي - الله يرحمها - وخالي واخوى وشغالة ..البيت نمرة مفصولة على اتنين ..نص ساكنين فيهو ونص قلنا نأجره ..كلمت سمسار في الحلة يشوف لينا اسرة محترمة تأجره ..بعد اسبوع جاني وقال لي في واحد واسرته من السوكي عايزين يشوفوا البيت اذا ناسبهم يأجروه قلت ليهو يتفضلوا اى وقت ..بعدها بيومين جانا راجل كبير وقور ومحترم سلم على وشاف البيت وعجبه فعلاً واتفقنا على الايجار ودفع العربون وقال يمشي يجيب اسرته ويجي ..بعد اسبوع جانا باسرته وعفشه ونزلوا عفشهم ورتبوه وسكنوا ...صباح اليوم التاني جوهم ناس بيتنا يسلموا عليهم.. خالي واخوى واخيراً جات حبوبتي وانا متقدمهم ..وكانت المفأجأة الغريبة ..حبوبتي سلمت على الراجل وحمدلت ليهم على السلامة وشوية قال ليها ياخي انا مشبهك بواحدة قريبتي.. انت رايت همد ولا شبه ساى ؟!! قالت ليهو انا اى رايت همد فعلاً بس انت منو ماعرفتك ؟!! قال ليها انا ادم اسناي آدم..يازول حبوبتي قامت وسلمت عليهو من جديد وبحرارة والله قعدوا يبكوا ونحن نتفرج ومافاهمين حاجة ..بعدين عرفت انه آدم ده ابن خالها لزم وهي بت عمته الوحيدة فرقت بيهم سبل الحياة قبل اكثر من تلاتين سنة حيث اتزوج واستقر في ارتريا وانقطعت اخباره عنها بسبب حرب التحرير الارترية ..

عاد بعد اكثر من تلاتين عاماً وبحث عن سكن في طول كسلا وعرضها ومن دون الاحياء اختار حي المربعات وفي المربعات مربع 18 وفي بيت ابنة عمته لزم



تحياتي ،،

والله بوست ظريف , في بداية التزعينات انا راجع من الخرطوم القديمة لمنزلنا في امتداد ناصر كنت ومعاي واحد زميلي راكبين ملح نزلنا في شارع المطار اها مشينا بي رجولنا شوية كدا كان في بتين ماشات طبعا صحبي زول ما مهذب قمنا شاغلنا البنات ^_^ واستمرينا نشاغل فيهم مسافة لحدي ما وصلنا محطة خمسة وانحنا متلحنهم " قلت ليكم صحبي ما مهذب " اها في محطة خمسة قام جا بص الاهالي بتاع بري قمنا ركبنا البص عشان نصل محطة ثمانية بيتنا هناك , اها مشيت البيت ونسيت الموضوع بعد عشرة دقايق كدا الباب دقا مشيت فتحت الباب اشوف ليك البتين زاتهم واقفات في الباب بصراحة حصلت خلعة جماعية وفغر فاه وتدلي حنك واشياء من هذا القبيل في لحظات , اول ما خطر في ذهني انه البنات ديل عرفوا بيتنا وين وجاين يشتكوا من قلة تهذيب "صحبي" ^_^ في النهاية اتضح انهم زميلات اختي في الجامعة وجايين يزوروها , بصراحة منظر صحبي بقي بايييخ ^_^

التانية حصلت في كوستي كنت مع ود خالتي واحد من اولاد حلتهم في زواج , اها مع الونسة مع ود حلتهم دا والجكس والحنك العاضي كان في بت في الحفلة نجاضة بس ^_^ قمت سالتو ليك من البت اللابسة طرحة بنفسجية ديك في اللحظة ديك ود خالتي اداني شلوت كرباوي كدا دا ما فهمته في لحظته الا بعد شفت ليك ود حلتهم قام علي حيله وصر لي وشه وشتت ود خالتي قال لي ما لقيت الا تسأله من اخته ^_^

التالتة بصراحة ما بحكيها لانه اطقطقت فيها عااادي واكلتها في حناني ^_^

لعناية الأخ محمد المرتضى حامد...

إتصل علي الأخ .... من نيو جرسي مبدياً إعجابه بالبوست وحكى لي حكاية حصلت له يريد
ان يضيفها للبوست، وبيسأل يا ريت لو يلقى ليها تفسير!!!.

حكى لي ...
في العام 1988 حيث كان ممتحن للشهادة في هذا العام، كان قاعد يزاكر في الحوش، واليوم
كان يوم إثنين، وذلك في كرري شمال أُمدرمان. في حوالي الساعة الثامنة مساءً سمع وآحد
ينادي عليهو بإسمو، وتكرر النداء لأكثر من مرّة وبصوت عالي حتي سمع جميع أهل البيت
صوت المُنادي. حرصاً منه علي عدم قطع المزاكرة من مكانه ردّ علي المُنادي بأن إتفضل،
إتفضل الباب مفتوح. مرّت حوالي دقيقة ولم يظهر أحد!!!. ناس البيت قالوا ليهو قوم أطلع
شوّف البيناديك ده منو؟؟؟. قال، طلع برّة نظر علي طوّل الشارع، وفي كلّ الإتجاهات ما شآف
ايّ زوّل!!!. كلّم ناس البيت إنو مافي زول!!!. ناس البيت إستغربوا لأنهم كلهم سمعوا النداء.
قال: اليوم التاني جاء راجل في الصباح أخبره بوفاة والده في حِلة الفكي، بحري شرق النيل
عليه رحمة الله. قال عندما وصل وسأل من الوقت الذي حصلت فيه الوفاة أخبروه أنها حصلت
في تمام الساعة الثامنة مساءً، نفس الوقت الذي سمع فيه النداء!!!

لك عظيم الشكر أخي علي الإتصال والمشاركة...

Quote: التالتة بصراحة ما بحكيها لانه اطقطقت فيها عااادي واكلتها في حناني ^_^

ياخ أحكيها وسرك فى بير .. ما بنكلم زول

غايتو إنت شليق شلاقه .. أقصد صاحبك

Quote: والله بوست ظريف , في بداية التزعينات انا راجع من الخرطوم القديمة لمنزلنا في امتداد ناصر كنت ومعاي واحد زميلي راكبين ملح نزلنا في شارع المطار اها مشينا بي رجولنا شوية كدا كان في بتين ماشات طبعا صحبي زول ما مهذب قمنا شاغلنا البنات ^_^ واستمرينا نشاغل فيهم مسافة لحدي ما وصلنا محطة خمسة وانحنا متلحنهم " قلت ليكم صحبي ما مهذب " اها في محطة خمسة قام جا بص الاهالي بتاع بري قمنا ركبنا البص عشان نصل محطة ثمانية بيتنا هناك , اها مشيت البيت ونسيت الموضوع بعد عشرة دقايق كدا الباب دقا مشيت فتحت الباب اشوف ليك البتين زاتهم واقفات في الباب بصراحة حصلت خلعة جماعية وفغر فاه وتدلي حنك واشياء من هذا القبيل في لحظات , اول ما خطر في ذهني انه البنات ديل عرفوا بيتنا وين وجاين يشتكوا من قلة تهذيب "صحبي" ^_^ في النهاية اتضح انهم زميلات اختي في الجامعة وجايين يزوروها , بصراحة منظر صحبي بقي بايييخ ^_^ التانية حصلت في كوستي كنت مع ود خالتي واحد من اولاد حلتهم في زواج , اها مع الونسة مع ود حلتهم دا والجكس والحنك العاضي كان في بت في الحفلة نجاضة بس ^_^ قمت سالتو ليك من البت اللابسة طرحة بنفسجية ديك في اللحظة ديك ود خالتي اداني شلوت كرباوي كدا دا ما فهمته في لحظته الا بعد شفت ليك ود حلتهم قام علي حيله وصر لي وشه وشتت ود خالتي قال لي ما لقيت الا تسأله من اخته ^_^

البوست عن الاحداث الغريبة ..ماعارف الاخ ده جاب القصتين بفهم شنو ؟!!!!
سبحان الله !!!!

Quote: البوست عن الاحداث الغريبة ..ماعارف الاخ ده جاب القصتين بفهم شنو ؟!!!! سبحان الله !!!!

يا ود القاضي ياخ بكون عشان هو كدباب غريبة جداً (صاحبو) يشغال البنات .

Quote: مشيت معاها وانا اكاد اغلي من الزعل فجأة انفتح باب مكتب وطلع منو ضابط برتبة كبيرة ونادي عمار يا عمار يا عمار سلم عليهو وقال ليهو مالك بي هنا عمار قال ليهو عاوز اعمل تأشيرة لود خالتي دا لكن ما عندو قروش والمكاتب قفلت قال ليهو وينو جوازو عمار اداهو الجواز الضابط رجع بعد اقل من دقيقتين والجواز مؤشر سألت عمار من الضابط قال لي والله ما بعرفو !!!!!

ههههههههههه، لكن والله ضحكتني يا عبد الله ابو شوارب.
يأخي عليك الله تسلم لي سلآم خاص علي الأخ عمار،
الزول ده بالمناسبة زول شهم واخو اخوان، وتحياتي وسلآمي
يغشاك مع جزيل شكري علي المشاركة.

مودتي...

Quote: ابو المقداد اريتك طيب والولاد شغال قراية فى الصدفة دى . كل ما يوم ...ومركز شديد يالراكز.....ياخ اكتب عندك الكتير الجميل سلامة عايدة يا زول وتحياتى

تطيب لك العافية يا ابو النسب، وتسلم من كل شر وبلاء.
الأهل كلهم بخير، وعايدة تمام التمام.

مشكور علي المرور.
تحياتي للوليدات...

Quote: ما حدث في حالتنا تكرر في بوست لي مرتين في بضع دقائق وعلى التوالي وتفصل بيننا في مسقط والموج في الرياض آلاف الكيلومترات ولا داع للتفاصيل.. تجد أدناه رابط البوست:

يديك العافية يا محمد المرتضى،
خليتني مشيت اهبش بهناك لآمن عويناتي بحلقن
مِتِل كشافات القطر.
أها مسعلتكم دي هسّع نقول عليها شنو؟؟؟
توارد خوآطر، واللآ القلوب لبعضيها.
مباااالغة لكن.
والله صحي...

القصة التانية يا معاوية حصلت لي أيضا قبل فترة طويلة. بعد سنوات من تخرجي من الجامعة فجأة كدا بدون مقدمات تذكرت أحد الزملاء الذي لم أقابله منذ تخرجنا و بقيت أنحت في مخي حتى تذكرت اسمه و استغربت الذكرني ليه شنو. فجأة كدا بعد كم يوم في ميدان أبو جنزير أنا نازل من الحافلة وهو داير يركب فيها و بدون تفكير سلمت عليه يا فلان لما صاحبك ذاته اتخلع لأنه هو ذاته احتاج ليه زمن عشان يتذكر اسمي.

Quote: ود المدير وضيوفه استمتعت جداً بقراءة هذا البوست الدسم والله صحي وصحي والله جني

سلآمات يا جني،
يأخي نحن زاتنا إستمتعنا لمتعتك.
والله صحي.

ربنا يمتعك بالصحة والعافية،
ومشكور علي المرور...

Quote: وبعد نصف ساعة كان والد أبومدين آتيا من أم بدة بأم درمان حيث يسكن ، وهو في طريقه للصحافة لمنزل أخيه (والذي هو عم أبو مدين) فلمح جواز سفر ملقى على الأرض فأخذه وتصفحه ، ولم يعرف الاسم ولكنه فوجىء ببطاقة ابنه (أبومدين) وسط أوراق الجواز. فاحتار في الأمر أيما حيرة وأخذ الجواز معه.

الحكاية كلها علي بعضها تدعو للحيرة يا مامآن. صدقني أمهر
كاتب قصص في الدنيا لا يستطيع ان يسبك مثل هذا السبك.
سبحان الله.

لك عظيم شكري يا مامآن علي رفد
البوست بهذه القصص الغريبة.
فعلاً شيئ يحيّر!!!

مودتي...

Quote: الصلاة كان من ضمن الحجاج الذين صعدوا جبل عرفة وحسب اقواله يقول : بأنه سمع صوتي ونزل من الجبل وهو يسترق السمع ونحن كناويشهد الله بعيدين جداً من الجبل وأثناء عبوره من أمامنا وهو يسترق السمع وقع بصرى عليه وأوقفته وكان هناك اللقاء ...كيف استطاع ان يفرز صوتي من بين ملايين الاصوات ؟؟؟

سلآمات أخي أحمد محمد بشير.
سبحان الله. عندما يريد الله للأمر أن يكون يقيّض له سبب
بعيد عن تصور العبد!!!
القصة شبيهة بما حدث لسيدنا عمر بن الخطاب مع سآرية
عندما صاح في الصلآة، يا سارية الجبل، فسمع سآرية
وتدارك الموقف.


مشكور أخي أحمد علي المرور.
التحية لك وللجميع.
مودتي...

Quote: جمال السنوسي

جمال السنوسي يا أزرق،
مشكور كتيّر علي المرور والمشاركة.

لك مني عاطر التحايا، وتقبل مودتي...

Quote: الأولاد قالوا دايرين يمشوا الحمام قامت أمهم مشت معاهم و خلوني مع الشنط بعد شوية يجوني راجعين و معاهم واحد أخونا سوداني من ناس مدينتنا الساكنين فيها (ريجاينا). قالوا طالعين من الحمام و فجأة زول بناديهم بأسمائهم فلقوا أخونا دا و هو ما كان عنده فكرة إننا ماشين السودان و هو كان راجع و إحنا ما عندنا فكرة إنه راجع في اليوم دا.

سبحان الله.
يا العوض احياناً الناس يتواعدوا عشان يتقابلوا
والمواعيد تطرشق، وأحياناً من غير موعد تقابل
إنسان في مكان من الصعب جداً يخطر علي بالك
تقابل فيهو زول بتعرفو.
مفارقات عجيبة!!!

تحياتي أخي العوض...

Quote: المهم دي كانت الونسة بتاعة التعارف و خلصت قمته قلته ليها يعني انتى حالياً عايشه في فرنسا قالت لي نعم قلته ليها تعرفي و الله فرنسا دي عندي فيها صاحب رايح منى من زمن طويل (كنت في الوكت داك عرفته انو ضياء استقراء في فرنسا) و صاحبي دا زول خربان ما زول غربة و زول حنين و بحب البلد دي قلته ليها كدا وسكته هي ضحكت و قالت لي غالبية السودانين لما يعيشو برا لو اتذكروا السودان بيبكو و واصلت قالت لى انا لي فترة بنزل السودان وبرجع فرنسا بحكم عملى و لما ارجع فرنسا عندي زول صاحبي سوداني بكون عارف انا راجعه متين و الله لحظة وصولى بلقاهو حارسنى في خشم الباب عايز يعرف اي حاجة عن السودان بيسالني حت من شوارع الزلط والغبار و بسالني من الصقور لسه بتطير في السماء بيسألني سؤال منكر ونكير وهسي انا جيت لي تلاته يوم و راجعه بكرة و جيت و اصلي لا اتلفته لا حمته و لاعرفته الحاصل شنو في السودان الايام دي وهسي شايله هم لما ضياء دا يلاقيني اقول ليهو شنو ذاتو؟! لحظة انا سمعته اسم ضياء يا معاوية ما عارف اقول ليك شنو او اوصف ليك الحصل شنو بس قلته ليها :- ضياء الدين ميرغني الطاهر !!!؟ البت دي نطت وقفت علي حيله :- انت بتعرف ضياء الدين ميرغني!!!؟ انا بصراحة دموعي جرت :- قلته ليها ضياء دا ياهو صاحبي الرايح مني ... البت ذاته بكت و بقت تصرخ جوة المكتب :- لاحول ولاقوة الا بالله لا اله إلا الله و جابت ورقتين من مكنة الطباعة بتاعة مكتب كابتن وداعة و ادتني قلم قالت هسي تكتب رسالة لي صاحبك و بتكون انقذتى من الاسئلة الكتير و طوالى قعدته اكتب في الرسالة . كابتن وداعة لما جاء لقاني و اقع كتابة سااااااااااااي وعرف القصة و اتعجب .

يا سلآلآلآلآلآلآلآلآم يا سفيان يا شفيف.
يأخي دي قمّة الدراما. والله انا عشت مع الحدث بكل أحاسيسي، وتفاعلت حتي إنفلتت دموعي.
أكيد الأخ ضياء الدين عينو ما وقعت في البوست، وأكيد لو شاف البوست حا يسجل زيارة،
التحيّة له، ولكابتن وداعة، وللجميلة بطلة الفلم، ولك أخي الحبيب سفيان بشير نابري، ونسأل
الله الرحمة والمغفرة للمبدع الذي رحل عن دنيانا مصطفى سيد أحمد.
عظم شكري وكامل مودتي للجميع...

Quote: عندي قصة تانية عجيبة عندها علاقة بالذاكرة عايز فيها فتوى من محمد المرتضى لاني مرة لاقيت لي شاب مش لاقيتو بمعنى لاقيتو بس شفته و شو زي 6 ثواني فقط بعد 11 سنة جيت لقيتو في بيت صاحبي قاعد طوالى اتذكرتو و اتذكرته تفاصيل السته ثواني ديك وحتى اتذكرته هو لابس شنو و في نفس اليوم داك صاحبي سيد البيت دا ذاتو كان معاي طوالى اخدتو برا و كلمتو وقلته ليهو الزول دا انا وانت لاقيناهو قبل 11 سنة في اليوم الفلاني و الحته الفلانية وكان لابس كدا كدا كدا و كان ماشات معاهو بتين لابسات كدا كدا كدا صاحبي قال لي ابدا اصلو ما ممكن تكون بتتكلم جد قلته ليهو ارح نسألو و خشينا وسالناهو :- يا سامر انت قبل 11 سنة حضرته حفله في الفندق الكبير كان بغني فيها زيدان ابراهيم و حيدر بورتسودان ؟ قال :- ايوة نعم !!! قلته ليهو :- اليوم داك انت كنت لابس لبسة ادروبية و معاك بتين لابسات كدا كدا ؟ قال ايوة و الله !!! قلته ليهو اليوم داك جيت قاطع قدامي وانا شفتك وهسي اتذكرتك واتذكرته اليوم دا بتفاصيلو كلها ... نزار صاحبنا المشترك قرب يغمى عليهو لووووووووول .

ما زلنا في إنتظار حضور أُستاذنا العزيز
محمد المرتضى حامد...

Quote: اخيراً جات حبوبتي وانا متقدمهم ..وكانت المفأجأة الغريبة ..حبوبتي سلمت على الراجل وحمدلت ليهم على السلامة وشوية قال ليها ياخي انا مشبهك بواحدة قريبتي.. انت رايت همد ولا شبه ساى ؟!! قالت ليهو انا اى رايت همد فعلاً بس انت منو ماعرفتك ؟!! قال ليها انا ادم اسناي آدم.. يازول حبوبتي قامت وسلمت عليهو من جديد وبحرارة والله قعدوا يبكوا ونحن نتفرج ومافاهمين حاجة .. بعدين عرفت انه آدم ده ابن خالها لزم وهي بت عمته الوحيدة فرقت بيهم سبل الحياة قبل اكثر من تلاتين سنة حيث اتزوج واستقر في ارتريا وانقطعت اخباره عنها بسبب حرب التحرير الارترية .. عاد بعد اكثر من تلاتين عاماً وبحث عن سكن في طول كسلا وعرضها ومن دون الاحياء اختار حي المربعات وفي المربعات مربع 18 وفي بيت ابنة عمته لزم

ود القاضي يا حبيب.
راجع سورة يوسف وشوف ربنا عندما يقول نحن نقص عليك أحسن القصص، شوف السبك والحبك
والتقدير الإلهي. عندما تكون هنالك محبة ومودة في القلوب تتواصل الأرواح حتي تلتحم الأجساد،
فسبحان الله الذي يجمع الشتيتين بعدما يظنان كل الظن ان لا تلآقيا.

لكن يا فردة بالطريقة دي حق الإيجار
ما رآح عليك شمار في مرقة من
قولة تيييت.
الجاتك في مالك سامحتك.
والله صحي.

مودتي...

Quote: التالتة بصراحة ما بحكيها لانه اطقطقت فيها عااادي واكلتها في حناني ^_^

في إنتظار التالتة يا اساسي.
مع كل التحايا العطرة لشخصك العزيز،
ولصديقك اللذيذ.
لك كامل مودتي والعيد يتبارك عليك،
وعلي صاحبك...

Quote: القصة التانية يا معاوية حصلت لي أيضا قبل فترة طويلة. بعد سنوات من تخرجي من الجامعة فجأة كدا بدون مقدمات تذكرت أحد الزملاء الذي لم أقابله منذ تخرجنا و بقيت أنحت في مخي حتى تذكرت اسمه و استغربت الذكرني ليه شنو. فجأة كدا بعد كم يوم في ميدان أبو جنزير أنا نازل من الحافلة وهو داير يركب فيها و بدون تفكير سلمت عليه يا فلان لما صاحبك ذاته اتخلع لأنه هو ذاته احتاج ليه زمن عشان يتذكر اسمي.

سبحان الله يالعوض، الخواطر الزي دي دائماً بتحصل. يعني يصدف الزول يكون
ماشي في الشارع فجأة يتراءي له إنسان بيعرفو في مكان مُعيّن لابس لبس مُعين
شايل جريدة في يدو، وفجأة في نفس المكان يلآقي الشخصية بنفس المواصفات
التي تخيلها!!!



تحياتي...