Yaslaaaaaaaaam YakhI....

*

فرحنا معاك يا محمد ان شاء الله خير!

دخلتى زي ختّـة نفس
ومرقتى في لمحة بصرْ
مرقتي لا حِس لا خَبـَرْ
لا لوّحـَـت إيديك تلويحة وداع ..
لا سبتي جنب الباب أتر
هشّيتي أسراب الحمام
و أفشيتي في الأرض السلام
و كأّنِك إنتي المنتظر ..
و كأنك إنتي المُنتهى ..
وأول تصاريف القدر ..
ونحن إدخرناك ... لليالي الحالكات
للزمان المُـرْ
وساعات الخطرْ
أديتي فرضِك والنوافل
والباقيات الصالحات .. يا طيبة ..
وانتي على سَفر ..

يا الله .. مِن هذا السفر
يا الله ... مِن هذا اللهيب ..
مِن ... وجهها الطلق الخصيب
مِن ... كفها دعاش المطر
مِن ضحكتها و رِقة صباحاتا الحليب ..

من وشّها المليان بطر
أنا خُفتها تفتح شبابيك النحيب ..
و تشُر على روحي الفَّـترْ ..

وانا شفتها في لحظة الحلم الغريب
تتوالي في الخاطر صُوّر
كانت حكايات كلّها
و أضحت مواجع كُلّها
أدمنّا وجع الاجترار
و إحتجنا لي لحظة مقيل .. في ضُلها
إحتجنا نكتبلِك قصيد
ونغنى ( بنحبِّك بحر) ..
واحتجنا لى لحظة زمانّا المترعة
زمن الأمانى الطيبة .. و الريد .. والدِّعة
والقلب فاتح والخلايا أبوابا كلها مشرعة ..
العاديات .. عدّت على تعب الجسد
و ركضت خيولك مسرعة
ليه راقدة في ضِيق اللّحد
و الدنيا بي هذى السِّـعة ..!

الغيم في متناول إيديك
والقلب بور
والمطر زى ما تشتهِى
أرميني في أرضك بذور
لميني من وجع الغياب
تلقيني في دمّك حضور
و أديني مفتاح السحاب
نرسم مسارات الطيور ..
يا مُترعة ..
مفتوحة شارات المرور
ما بين غيابك و ( مشرع الحلم الفسيح)
ضاعت محطات الوصول
من حيلة الخطو الكسيح
قدرِك...
تباريك المناحات
و تعيش سنين العمر في قفص التباريح
والذكريات في كل ليل
تفتح حنينك بيت بكا
و تعصف رياح الفرقة
بي حلم المراجيح
قدرك ...
تلاقي الدنيا في باب الخروج
و تفتح حنين القلب للراحلين ..... ضريح
قدرك ..
تداري الحزن في القلب الذبيح
لا انت آخر الأنبياء
لا إنت في حلم المسيح

ويا صالحة .. وينو ضلك ..
في الطريق .. وين خطوتك ..فى الرملة
صُرِّيها في منديل علق ..
و مديها بحق السنين ..
والعُشرة .. والدم .. و العرق ..

أيدك في إيدى سوا سوا ..
من الصباح حتى الشفق
من الشفق حتى الزوال
و القمر إذا اتسق
و كما اتفق ..
نجلس على ضل المزاج
نتعاطى ضحكات الحبيبة
و نحتسي كاسين من الحب الرحيم
نقراها باسم الذى خلق
ونقراها حرِف حرِف
نسكب صهيل الجرح
في صمت الورق
و نلقاها في الريح العصف
خُضرة سنينا اليانعة
و اتحتحتت صفق
ونلقاها في ضهر الخيول
البتفزع من حوافرها في السبق ..
و تهرع كلّما اشتدّ الرهان
وبانت ملامح اللّفة في آخر النفق ..
نلقاها ..
في جيّة الضيوف
والفرحة كلما الباب طَرَقْ
نلقاها في ختّة الراس والحلم
في الهجعة وإن طال الأرق
نلقاها في ضُل الصباح
والونسة .. ضحكات الصغار ..
و طقطقة الاصابع .. طَقْ ، طرق ..
نلقاها بآخر رمق
وقفت على حد الكفاف
رمَت السناسن في الطبقْ
فجّت ضلامات السنين ..
قامت على ذات النسق ..
مدّت ايديها على الحنين
و رشّت المشاغبين بالنبق ..

ياصالحة
لِميني على ثراك
واعفينى من هذا الرهق
وسلميلى على المعاك
السابقين .. الطيبين ..الصادقين
الجمّلوا العالم هناك
طفلة وملامحها من رؤاك
موءودة انتي على التراب
موءودة كانت فى حشاك
انا شفتها بتضمدي أحزانك براك
و أنا شفتها ..
في البعث في هيئة ملاك ..
في جيدها باقات النجوم
و في إيدها أغصان الأراك

أنا شُفتها ..
في ذلك اليوم العظيم
في نشوة بتردّد غُناك
بى حِسّـها الرطب الرخيم
فتحت عليك في الكَتمَة
شباك النسيم ..
حضروها كل الأولياء الصالحين
في الطور مع موسى الكليم
مرقت بواطن الأرض من رحم الأديم
و فتحت مصابيح الخلاص
في عَتمة الليل البهيم
وأنا شَفتها
عبرت معاك .. حبل الصراط المستقيم
و مرقتي أجمل ما يكون
إنسان على كف النَّعَشْ
مرقن معاكي بنات كتار
وغابن وراك بنات نعش ..
ركّن على دم الغروب
فرّن مع وش الدّغَش
ردحّن على حِس الهبوب
و انا حِسِّـي
يبقالِن طرَشْ
غشّني بي موية الرهاب
و شنقّنِّـي بى حبل العطش
واعدتهِن ..
ما تواعدن
واعدتهن ...
ماتواعدن ..
ضحكاتن اللبن الحليب
والقمرة مرّة مرّة بتشبهِن ..
ما شُفتهِن .. شافنّي هِـنْ
مابين طشاش السّكة والشوف البصيص
.. شبّهتَهِنْ ..
غسلنِّى من خوفي الرخيص
شبّهتهِن ..
حِزنن علّيْ
و حِزِنْتِ أكتر مَنّهِن ..
وبكينا كلّنا من دواعي الخيبة
و الحظ التعيس ..

سرقن صهيل الجرح من خلف الكواليس
و كتبن تراجيديا الصراع الجب
و امرأة العزيز
النسوة والدم .. والقميص ..
مديتي أيدك للحريق
بَـقّـن أصابعينك شموع
والقلب كان حِنّة عريس
و بكيتي والوش منطرح
و ضحكنا والايد في الجرح ..
لمعَت دياجى الأرض في ضو الفوانيس
ما تلبسى تياب العطش
اتلفحى النيل قرمصيص ..
و ادخُلينى على عجل
يا صالحة من باب السلام
مفتوحة أبواب الفراديس
اتفضلي

صـالـحة
للشاعر : ازهرى محمد على

Quote: دخلتى زي ختّـة نفس ومرقتى في لمحة بصرْ مرقتي لا حِس لا خَبـَرْ لا لوّحـَـت إيديك تلويحة وداع .. لا سبتي جنب الباب أتر هشّيتي أسراب الحمام و أفشيتي في الأرض السلام و كأّنِك إنتي المنتظر .. و كأنك إنتي المُنتهى .. وأول تصاريف القدر .. ونحن إدخرناك ... لليالي الحالكات للزمان المُـرْ وساعات الخطرْ أديتي فرضِك والنوافل والباقيات الصالحات .. يا طيبة .. وانتي على سَفر ..

يا الله يا أمحمد اخوى

صالح أزهري في صالحة
صالح لمن مدفق



تشكرات يا محمد
ينعش نهارك
لا بل أيامك كلها

ظننت ان معين ازهرى قد نضب لانى لم ارى له جديد مميز
فى الفترة الماضية ..
لكن هذه القصيدة تتوج الازهرى مجددا على قمة الشعر
ليت ود المقبول كان حيا

أنا شُفتها ..
في ذلك اليوم العظيم
في نشوة بتردّد غُناك
بى حِسّـها الرطب الرخيم
فتحت عليك في الكَتمَة
شباك النسيم ..
حضروها كل الأولياء الصالحين
في الطور مع موسى الكليم
مرقت بواطن الأرض من رحم الأديم
و فتحت مصابيح الخلاص
في عَتمة الليل البهيم
وأنا شَفتها
عبرت معاك .. حبل الصراط المستقيم
و مرقتي أجمل ما يكون
إنسان على كف النَّعَشْ
مرقن معاكي بنات كتار
وغابن وراك بنات نعش ..
ركّن على دم الغروب
فرّن مع وش الدّغَش
ردحّن على حِس الهبوب
و انا حِسِّـي
يبقالِن طرَشْ
غشّني بي موية الرهاب
و شنقّنِّـي بى حبل العطش

مديتي أيدك للحريق
بَـقّـن أصابعينك شموع





You made my day, Thanks Mohammed

الاعزاء ...

هشام هبانى ..
الطيب شيقوق ..
عمار محمد ادريس
بله محمد الفاضل
هشام عباس
ايزابيلا ..

مرحبا بكم فى عوالم أزهرى محمد على التريانة بالمحبة والشجن والعرفان
والذكرى ...والمليئة بكل ماهو جميل من معانى وصور واخيلة ...

مرحبا ...فهذا الشاعر يستحق الوقوف عنده طويلا ...

من قال اعذب الشعر اكذبه ؟! ...مااعتقده ان اعذب الشعر السودانى
احزنه ...فالاحتفاء بالموتى والوقوف على اثارهم واخلاقهم وافعالهم
ضرب قديم فى الشعر ..لكن للوقوف السودانى طعم آخر ..كنت اظن
قبل ان اقر هذا النص الملىء بالشجن ... كنت اظن ان صلاح احمد ابراهيم
فى مرثيته لعلى المك وصل بالرثاء لحده ..وجاء هذا النص ليذكرنى
ان هذه العوالم لاحد لها ..تذكرت قريبنا الذى رحلت زوجته وظل عام
كامل يتسلل لغرفتها ويتغطى بثوبها ويبكى وينتحب ..لو ملك هذا الرجل
ادوات أزهرى فى التعبير لصعد بنا ايضا الى عوالم لاتقل عن هذه ...

التحية لازهرى والرحمه والمغفرة للصالحة الراحلة ...

Quote: و كأّنِك إنتي المنتظر .. و كأنك إنتي المُنتهى .. وأول تصاريف القدر .. ونحن إدخرناك ... لليالي الحالكات للزمان المُـرْ وساعات الخطرْ

يا سلام على أزهري
و يا سلام عليك انت ذاتك يا ابوحميد

تحياتي الطيبة


قصيدة رائعة

وعندو واحدة اسمها القتامة

يا سلام عليها

اتمني ان كمال سالم له ان ينزلها طلبتها من ازهري اليوم
لانزالها

قصيدة قمة في جمال الكلمة والصورة والمعني

شكرا محمد عبد الرحمن

حباب صاحبنا حسبو عكاشه ..

ومرحب بيك ...

سمعتها اليوم مرة اخرى من قناة امدرمان وكأننى اسمعها أول مرة ..
ياسلام ياخ ....

مرثية ازهري في فقده لزوجته ..
لوحة كاملة المعاني ....

ياابوحميد ....تدخل ا لدوحة بالكرباوى ماقلنا حاجة ..مع
انو راداراتنا كانت راصدة الحركة ..لكن تدخل بوستاتنا
بالدس دس هذا مالايجوز ...مع اعترافنا الكامل بمشاركة
المكنية للحصاحيصا هذا الابداع ...

تحياتى ياشاب ...

Quote: مع اعترافنا الكامل بمشاركة المكنية للحصاحيصا هذا الابداع

يابوحميد ياخ انت مش عجبتك المرثية وبس ....
ياخ انت طلعت منقباتي ومتتبع اثر كل ماهو جميل ..
واشهد انك على خلق عظيم .....
احمد .. المكنية
__________________
التوقف بالدوحة كان قصير
ومنينا النفس برؤياك ..ولكن ..