Post: #1
Title: نكات سودانية قوية
Author: محمد عمر الفكي
Date: 10-17-2011, 05:42 PM
Parent: #0
بعض الشباب من منطقتنا عندهم صفحة على الفيسبوك لقيت فيها النكت دا عجبتني وقلت اشارك بيها هنا عساها ترسمة ابتسامة
مسطول ظروفو تعبانة شديد مشي أبو حمد لقي ١٠ كيلو دهب٠
بعد شوية صاحبنا مسكتو حمي شديدة وقعد يعرق ويجف ويرجف بصورة غريبة وإتمدد في الأرض٠
الناس إتلمو عليهو قالوا الزول دا عايز يموت٠
قال ليهم : لا لا مافي حاجة دا الفقر داير يطلع مني٠
شافع مشي لبتاع دكان رباطابي
قال ليه: أبوي قال ليك أديني (جبنة) بي ٥٠ قرش
قال ليه: أمشي كلم أبوك يجي يلحس السكين
مسطول قالو ليه الجماعة ضربو النيل الازرق قال ليهم بس رشا وتسابيح ماتكون جاتهم حاجة
واحد ماشي في الخلا طلع ليهو واحد من المستقبل قال ليهو انا هسه جاي من سنه 3010 صاحبنا طوالي سألو بالله احوال السودان كيف في الزمن داك كيف؟
قال ليهو قبل يومين الرئيس طلع قرار بمنع اي دوله اوربيه من امتلاك اسلحه نوويه صاحبنا قال ليهو و امريكا ؟
رد عليه بعد ما هزمناهم في الحرب العالميه التاسعه ضميناهم لمشروع الجزيره صاحبنا قال لاحولا لكن اهم حاجه الهلال جاب بطوله خارجيه ؟
صاحبنا قال ليهو لا ياخ انت كمان ما تبالغ!!!!
عروس شفقانة شفقة شديدة سألوها : العقد متين؟
قالت ليهم : بعد صلاة الغداء
مسطول قالوا ليه ما هو الفرق بين الجراءةوالوقاحة قال الجراءة هي تمشي مطعم تأكل وماتدفع والوقاحة تمش بيتكم تأكل تاني
في واحد طرح سؤال على الشباب في صفحة الفيسبوك قال
ماهو الشئ الذي يأكل اللين واليابس
جاته اجابتين الاولي النار والتانية المحلية
رباطابي عندو مخبز وفلس ومكاعنده قرش يجيب بيهو دقيق ، جاهو واحد قال ليه: العيش في النار
قال ليه: لأ يا أخوي في الجنة
رباط لاقى زول في الشارع قال لي طلع قروشك الزول قال لي الحرامي ماتسالني انا مؤتمر وطني الرباط قال ليهو خلاص طلع قروشنا
شايقي سايق جرار كبير وشاحن نبق قبضو رباطين فتشو مالقوا عندو قروش رئيس الرباطين قاليهم فلقوا الشايقي بالنبق بتاعوا دا
الرباطين يفلقو في الشايقي بالنبق وهو يضحك
قاموا سألوه بتضحك مالك؟
قال ليهم: إتذكرت في جعلي وراي شاحن دوم
واحد سمين راكب جنبو واحد نحيف في المواصلات وصاحبنا النحيف ده مضايق من صاحبك السمين وما قادر يتكم
ولما الكمساري قعد يطقطق في الجماعه صاحبنا النحيف قالو والله حقو تخلصوها حسب الحجم بس
السمين قالو عليا الحرام كان بخلصوها بالحجم نوعك الضيعان ده حافله تقيف ليهو مافي
مسطول اصبعو انكسر مشي لي دكتور قالو اسع يا دكتور اصبعي ده بعد اعالجو بقدر ادق ربابه
الدكتور قالو ايوه بتقدر بإذن الله
صاحبنا قالو حاجه غريبه يا دكتور
تصدق قبل يتكسر ما كنتا بعرف
|
Post: #2
Title: Re: نكات سودانية قوية
Author: البحيراوي
Date: 10-17-2011, 05:53 PM
Parent: #1
شكراً محمد عمر
حيث لا زال في مقدروناأن نصنع النكته ونضحك .
واحد مسطول راكب بص كوستي - الخرطوم وسارح بمزاج في الخضار علي جانب الطريق !
واحد قاعد جنبه سأله - الأخ مندمج - فرد المسطول لا من كوستي!!
بحيراوي
|
Post: #3
Title: Re: نكات سودانية قوية
Author: محمد عمر الفكي
Date: 10-17-2011, 05:55 PM
Parent: #1
والله الرباطاب ديل مساكين
والله البت الفي صورة البروفايل دي قبل شوية جاتني قالت لي يا ابوي انا لي ساعة بكلم فيك انزل جيب لي محاية هداك غلطت في الهوم ورك امسحها بلساني ولا كيف؟
|
Post: #4
Title: Re: نكات سودانية قوية
Author: سيف النصر محي الدين
Date: 10-17-2011, 08:36 PM
Parent: #3
Quote: واحد ماشي في الخلا طلع ليهو واحد من المستقبل قال ليهو انا هسه جاي من سنه 3010 صاحبنا طوالي سألو بالله احوال السودان كيف في الزمن داك كيف؟
قال ليهو قبل يومين الرئيس طلع قرار بمنع اي دوله اوربيه من امتلاك اسلحه نوويه صاحبنا قال ليهو و امريكا ؟
رد عليه بعد ما هزمناهم في الحرب العالميه التاسعه ضميناهم لمشروع الجزيره صاحبنا قال لاحولا لكن اهم حاجه الهلال جاب بطوله خارجيه ؟
صاحبنا قال ليهو لا ياخ انت كمان ما تبالغ!!!! |
لعناية جمال السنوسي و ود الصايم.
_______________________________
ود الفكي..كيفنك.
|
Post: #5
Title: Re: نكات سودانية قوية
Author: محمد عبد الماجد الصايم
Date: 10-18-2011, 08:08 AM
Parent: #4
يا د. سيف .. عمكـ ود الفكي دا عمل البوست دا كلو عشان يزحلق النكتة دي!!
باااااااااااااااااااااااااااااااااااااااااااااايخة
|
Post: #6
Title: Re: نكات سودانية قوية
Author: محمد عمر الفكي
Date: 10-18-2011, 12:26 PM
الاخ بحيراوي
ربنا يجعل البسمة دائماً على شفاهنا جميعاً
دكتور سيف
وينك يا زول، رسلت ليك قبل اسبوعين تلاتة على المسنجر وما رديت على
ود الصائم
يا اخي والله ما جاءت على بالي وصاحب النكتة دي ود عمتي وهلالابي
ما دام بقت كدا كدي اسمع دي
واحدة قالت لخطيبها انت يا اخوي العرس حيكون متين ، قال ليها بعد فوز الهلال بكاس افريقيا طوالي، قالت ليهو ما تقول لى انا ما دايرك عديل
|
|