اذا ولغ الكلـــــــــــــــــــــــــــــــــــــــب في اناء أحدكم ..

قال رسول الله صلى الله عليه و سلم ..
إذا ولغ الكلــــــــــــــــــــــــــب في إناء أحدكم .. فليغسله سبع مرات أولاهن ( او إحداهن ) بالتراب ..
رواه أحمد و مسلم في كتاب الطهارة ..

..
..

البلد ..
و الهلال ..
و بعض معارفي ..
اعتقد جازما .. بأني احتاج الي غسلهم سبع مرات بالتراب .. و فتح خرطوش مطافي فيهم ..

و الكلــــــــــــــــــــــــــب رغم وفائه لعبد الجليل صاحبه .. ( و الراعي الرسمي بتاعه ) ..
و رغم انه الصفة دي كويسة ( صفة الوفاء يعني ) .. ألا انه مصنف انه ( نجس ) .. مما يستوجب و حسب الشرع غسل ما ولغ فيه سبع مرات احداهن بالتراب ..

..
..

ولغ الكيزان في البلد ..
وولغ البرير في الهلال ..
وولغ صديقي في نفسه ..

كنت دايما في موقف محايد مما يفعله الكيزان في البلد ..
و مؤمناً بحركة اصلاح بطيئة .. و ان يجرنا العالم في تطوره السريع .. وفرحاً بعمارات السوق العربي .. و شكل شارع النيل الجديد .. و عربات المتعافي حقت النضافة ..
من باب .. افرحوا و فرحونا ..
كنت سعيدا علي مستوى الفرد و ليس علي مستوى الدولة .. لم ادقق كثيرا كون صديقي اشترى عربيته بمال حرام ..
اعجبني انه ارتاح من تلتلة المواصلات .. و اغفلت الجانب السئ في القضية ..

..
..

سررت جدا انه حبوبتي لقت ليها في مرضها سرير نضيف ( في واحدة من المستشفيات الاستثمارية ) .. يسر الزائرين و يبيض وشنا و يظهر بمظهر البارين بأهلنا ..
و اغفلت تمام كمية الديون الدخلنا فيها لدفع ما عدده تلاتة ايام سرير .. و كيس دوا ..
حاليا لا نستطيع تكرير هذه التجربة مرة آخرى .. نسبة لانهيار الناس الكانوا بدينونا ..

..
..

سررت جدا بتخرج شقيقي الصغير .. طبيباً .. و اغفلت تماما طلبه مني بالسماح له بالعمل في محل موبايلات .. كونه ينتظر وزارة الصحة منذ سنة و نص لتوزيعه طبيب امتياز ..

..
..

افرح بشدة ( مبالغ فيها ) .. كل ستة أشهر .. عندما استطيع و بمعجزة إلهية دفع قيمة الايجار لشقة في بلاد الغربة .. كوني لم اجرب و لا استطيع معرفة شعور انه الزول يكون عنده بيت ملك او بلد ..

حميده

ازيك ياااخ .. يبدو انك في الطريق الصحيح
عارف ليه لأنني أحسست الصدق في كل حرف كتبته
بس يا حميده ما لازم طرف الصوت يلحقنا حتى نشعر
شعورنا بمعاناة الاخرين قد ينير لنا الطريق احياناً
ومنها نتخذ مواقفنا ... بما يناسب تلك الحالات
عموماً كلامك جميل يا حميده

اللهم ارنا الحق حقاً وأرزقنا اتباعه

تحياتي

حميدة ازيك ....
لا تعليق
I am Just waiting
زي ما بقولوا النشوف اخرتا

صورة البروفايل الجديدة تمام التمام

سلامات يامان
الله في

هوي متنوضل هوي قوم اتشطف او كما كنت بتقول زمان


سلامة الحبوبة وان شاء الله ما تشوف شر

البشــاري ..
الحق دا زاتو ما وجهة نظر .. و لك في قصة العبد الصالح و سيدنا موسى مثال ..
البلد موقفها معقد اكثر من تعقيد الكيزان لحياتنا ..
وطرف الصـوت هابشني من زمان .. نحن جيل الانقاذ .. يعني بدو معانا من قولة تيت ..
لا كباية شب في البركس .. و لا يا حليل زمان ..
حكاياتنا كلها ( المفرح منها ) .. لا تخرج من دفع رشوة لاستخراج شهادات او زوغة من إلزامية او فولة كاربة ..
و بعد دا .. فايتين المناضلين بالصبر .. و كن جميلا ترى الوجود جميلا .. و غدا افضل .. و اشتريت قميص ..

نازك ..

Quote: صورة البروفايل الجديدة تمام التمام

يجب ان تبعث رسالة للآخرين ( العدو الخفي للنفسية السودانية ) ..
بأنك مرطب و لديك جضوم .. من باب الصيت و لا الغنى ..

يا باشمهندس ..

Quote: سلامة الحبوبة وان شاء الله ما تشوف شر

بدون شـك .. ما في مجال تشـوف شر تاني ..
ذيث اوبشــن نوت افيلبول ان يور كنتري ..
ذكرني الموقف دا .. نكتة الزول الثقيل البسأل العيان دا مودينو وين .. العيان رفع رأسه قال ليهو موديني الطاحونة ..

قلت لصديقي و نحن بنحضر في برنامج ( رحيق الامكنة ) .. و متأثرين بكمية الناس الحُنان الذين امتلأت بهم الشاشة ..
ياخي انا راجع السودان ..
قال لي .. شايف المركوب السمح دا .. بـ 600 الف .. !!

..
..

اعلان ..
لسكان العاصمة السعودية من السودانيين .. القرعاوي في البطحا عامل تخفيضات ..
و الله يخلي لينا حكومتنا الرشيدة و يخلينا ليهم .. و يجعلها امطار خير و بركة ..

..
..

حكمة اليوم ..
بلدا ما تقدر تلبس فيها مركوب .. ما بلدك ..

Quote: فليغسله سبع مرات أولاهن ( او إحداهن ) بالتراب ..

كويس انها ما الاخيرة !!
اذنـــــــــــــــــــــــــ لاذدادت الصورة ضرسا ,,

والله الصورة لا تمام لا شافت التمام
شكلو كان عندك نفسى او التهاب فى العصبة السابعه ..
وانا ما اشتريت فستان ..













ــــــــــــــ
خلاص الحركة دى خليتها وهذا بمثابة اعلان
فى كل مداخله .. لانها سرقت بليل
ساكشحها و اغسل مكانها بالتراب !!!

Quote: كنت دايما في موقف محايد مما يفعله الكيزان في البلد .. و مؤمناً بحركة اصلاح بطيئة .. و ان يجرنا العالم في تطوره السريع .. وفرحاً بعمارات السوق العربي .. و شكل شارع النيل الجديد .. و عربات المتعافي حقت النضافة .. من باب .. افرحوا و فرحونا .. كنت سعيدا علي مستوى الفرد و ليس علي مستوى الدولة .. لم ادقق كثيرا كون صديقي اشترى عربيته بمال حرام .. اعجبني انه ارتاح من تلتلة المواصلات .. و اغفلت الجانب السئ في القضية .. .. .. سررت جدا انه حبوبتي لقت ليها في مرضها سرير نضيف ( في واحدة من المستشفيات الاستثمارية ) .. يسر الزائرين و يبيض وشنا و يظهر بمظهر البارين بأهلنا .. و اغفلت تمام كمية الديون الدخلنا فيها لدفع ما عدده تلاتة ايام سرير .. و كيس دوا .. حاليا لا نستطيع تكرير هذه التجربة مرة آخرى .. نسبة لانهيار الناس الكانوا بدينونا .. .. .. سررت جدا بتخرج شقيقي الصغير .. طبيباً .. و اغفلت تماما طلبه مني بالسماح له بالعمل في محل موبايلات .. كونه ينتظر وزارة الصحة منذ سنة و نص لتوزيعه طبيب امتياز .. .. .. افرح بشدة ( مبالغ فيها ) .. كل ستة أشهر .. عندما استطيع و بمعجزة إلهية دفع قيمة الايجار لشقة في بلاد الغربة .. كوني لم اجرب و لا استطيع معرفة شعور انه الزول يكون عنده بيت ملك او بلد ..

اهلا بكم في السودان
عودا حميدا مستطاب يا فنان

Quote: سررت جدا بتخرج شقيقي الصغير .. طبيباً .. و اغفلت تماما طلبه مني بالسماح له بالعمل في محل موبايلات .. كونه ينتظر وزارة الصحة منذ سنة و نص لتوزيعه طبيب امتياز ..

الاستاذ حميدة
تحياتي
شقيقي صلاح العبيد تخرج من كلية البترول من دولة عربية
وتخصص نادر مرغوب في مجال صناعة البترول :
قياس وسيطرة
تخرج منذ عشرة اعوام
حتى اللحظة يعمل في محل حدادة
او في مجال البناء لو السوق بقى كويس
لانو ما كوز ولا عندو واسطة كوز

يا خدر يا صديق ..
كما ولغت الحكومة في أم البلد ..
و لغت المعارضة في ايمان أم النضال ..
و نحن قاعدين في النص .. نكاوي في ديل شوية .. و نكاوي في ديل شوية ..
الحكومة قالت شريعة اسلامية .. تبنى الشعب خط دعارة واضح معزز بكمية من الاغاني الهابطة ..
المعارضة قالت لا للحكومة .. خرجت جماهير النيل الابيض عن بكرة ابيها في الحملة الانتخابية لعمر البشير .. ( ناس غير مدفوعي الاجر ) ..

..
..

الاختراع الجديد ..
بعد ما استهلكنا موضوع الحروب الاقليمية .. و انفصال الكفار الجنوبيين .. و بقينا بحمد الله و نعمته و بفضل دعوات خال الرئيس .. دولة مسلمة
اشتعلت الفتنة حاليا .. بين انصار السنة و الصوفية ..
اكتب في اليوتيوب .. مناظرة بين السمانية و انصار السنة .. و اقرأ ملامح الفترة القادمة ..
و لايغيب عن ذهنك تحويل توقيت برنامج اغاني و اغاني في رمضان .. لانه يمنع الناس من اداء صلاة التراويح

خالد العبيد ..
قياس و سيطرة دي .. ألا يشتغل بيها بوليس حركة ..

أصبئت يا رجل ...
ولا طارة السكرة وجاءت الفكرة ..

يا زول حبابك مليون وبركة بالطلة
شايف المناضلين وبعض اشياعهم يترصدون الشاب حميده

Quote: كما ولغت الحكومة في أم البلد .. و لغت المعارضة في ايمان أم النضال .. و نحن قاعدين في النص .. نكاوي في ديل شوية .. و نكاوي في ديل شوية ..

كضباً كاضب كنتو بتترصدو الحمام الميت في المعارضة واحيانا الحكومة وبتحاولو تصورو إنو الطرفين بنفس السؤ في حين إنو سؤ المعارضه ما بمنعكم تعارضو بالطريقة السليمة البتشوفوها








ملحوظة: حسب الفهمتو انو نحن الفوق دي بتشمل كل المعنين ببوست (###### السرة) لذا كان الرد على الجماعة

مرحباً بعودة كاتبي المفضل ..

لا بد من (أم در) وإن طال السفر..

ما تربط المسألة دي بالمركوب ياخي..

شوف ليك حاجة على أنضف شوية

Quote: كضباً كاضب كنتو بتترصدو الحمام الميت في المعارضة واحيانا الحكومة وبتحاولو تصورو إنو الطرفين بنفس السؤ

مرتضى كندا .. انت في قبضتنا الآن .. اي فرفرة بنجيب ليك ناس الهيئة ..

..
..

الحكاية ما ترصد .. كل الوهمة انه نظام داير تعمل حاجة .. حركة في شكل وردة ..
الناس هايجة تهيج .. و تنفعل .. و تسرد تاريخك البيزنطي .. و تجادل بيهو ( ما بني علي باطل ) ..
بعدين تمشي تنوم .. !!

Quote: أصبئت يا رجل ...

صبئت دي عندنا بالدارجي اسمها ( الغنماية جنت ) ..
مرات بيكون عندك قدرة علي الانفعال مع الوضع .. بس الوضع لمن يبقى عبيط و ممل و ما عندو حل بستهلك لياقتك .. و بتكون داير تنوم بس .. و تنسى البرنامج ..
حاليا .. الوضع متأزم جدا .. لا عودة طوعية .. و لا ديل دايرين يفكونا .. و نمشـي ( بندة *) كل اول شهر نجيب ( مقاضي البيت ) .. لبن و رز و صابون .. نأكل و نغسل في هدومنا ..
و حالنا احسن من غيرنا .. و الذي لا يحمد علي مكروه سواه ..




* بندة : دكان كبير بتقدر تشتري منه حاجات ليس من ضمنها قطعة ارض في بلدك ..

محمود ..
زيدان مات .. و حوتة في الطريق .. ووردي ما زال يتلقى تكريم رئاسة الجمهورية ..
البلد دي شموليتها حتي في الفن ..