Post: #1
Title: كرامة لعيد ميلادي ويا فرحة ما تمت
Author: عبدالله ود البوش
Date: 10-13-2011, 10:56 AM
Parent: #0
في الثانوي العام كنت مصاحب ود المفتش
توطدت الصلات الطيبة حتى دخلت بطن البيت
واول مرة اشوف البلاط لكن ما عجبني للجدادة لمن تجي تبيض
طق البيضة بتنفقش وشلت هم لركضانا
ولما اوصلت لهم مخافي هذه عرفت انهم ما عندهم جدادة ولا كديسة ذاتو
شيل ودق شيل ودق الليام تمر واليوم داك عزمني لعيد ميلادو
شبعت شبعة لمن دايرة تبقى علي حكاية العنز البتاكل على حلاة اللسان لمن اشرطا العيش
ولما لم اجد سلوى كسرت ابريقى ودفقت على الثرى كأسي
وقلت كدي شلت معاي حاجات وحاجات كتيرة كدا عشان احندك بيها البحاحي ليهن رب العالمين
امي الله اديها العافية واطول عمرها جنها وجن حاجة غريبة تجي داخلة طوالي تخضعنا تحت التحقيق
دا شنو دا ... وجيبتو من وين .... ورروك وورك وفلتعوا وتركتو حتى يطمئن قلبها
وتعرف انه غسيل نضيف ومتفوف تف ... التف تف ... التف تف فوق ضهر ترعة نضيفة
بعد تعب شديد شرحت ليها حكاية عيد الميلاد وكيف الناس بتفرح بعيد ميلاد اولادا الا اتو يا يمة
اها اتيمنت وحلفت باسم ابوها بس ما كومت توبا فوق نص راسا
وحات ابوي ووحاتك ات اسوي ليك كرامة عيد ميلاد ناس الحلة والباجور اتكلوا بيها باقي نحن
في دندنة اللقيط ( يعني في عز موسم لقيط القطن ) ونص ناس الحلة في الباجور
عن طلق القطن اسوي ليك كرامة عيد الميلاد
هي يا يمة هوي عيد الميلاد مو كدي عيد الميلاد عندو يوم
انا ولدوني متين يا يمة
|
Post: #2
Title: Re: كرامة لعيد ميلادي ويا فرحة ما تمت
Author: ادريس خليفة علم الهدي
Date: 10-13-2011, 11:09 AM
Parent: #1
(*)
|
Post: #3
Title: Re: كرامة لعيد ميلادي ويا فرحة ما تمت
Author: عبدالله ود البوش
Date: 10-13-2011, 11:13 AM
Parent: #2
الدعوة لهذه الكرامة موجهة لكل الناس العيد ميلادهم في يوم واحد
وهو الموافق واحد واحد
واول المدعوين ادريس خليفة علم الهدى
واعملو حسابكم من حصحاص البليلة اهو انا حذرتكم
|
Post: #4
Title: Re: كرامة لعيد ميلادي ويا فرحة ما تمت
Author: عبدالله ود البوش
Date: 10-13-2011, 11:35 AM
Parent: #3
باقي طولت من الحلة دي كنت في اللنداية
في اليوم سولو ليكن كم عبار بس الله كم مشاركة
عشان الواحد ما انترح ساهي
واسع دي ذاتا تخفس ولا تكس ارجع ما عارف ؟
|
Post: #5
Title: Re: كرامة لعيد ميلادي ويا فرحة ما تمت
Author: عبدالله ود البوش
Date: 10-13-2011, 12:06 PM
Parent: #4
نواصل العيد اللذيذ دا
|
Post: #6
Title: Re: كرامة لعيد ميلادي ويا فرحة ما تمت
Author: عبدالله ود البوش
Date: 10-13-2011, 12:59 PM
Parent: #5
فرفرت الوالدة ذاكرتا سريع وقالت لي ات مولود سنة التخديرة
وكان الوالد له الرحمة والمغفرة يدق ليهو في وتد في الوطا باقي حمارتنا الزرقا
كل يوم بتقلع الوتد ما ها عاقر وسمينة وفنطاطة جنس فنططة وعليها جنس دغالة
وجنها وجن الشفع الصغار طوالي تعصر الواحد علي الحيطا ويا ويلك لو كانت الحيطة
لياس جديد والزبالة خشنا الكرو لا اكل لا شرب لكن الجديد في الكرو سمح
ابوي ادق في الوتد دخل في الخط سنة تخديرة شنو يا فالحة سنة التخديرة انا كنت مع بت الصالح
وكان ما اخاف الكضب اقول ليك كنت مصافح بت خالي علي ود العيس
ات يا ود الفكي وكت ما متوكدالغلات ليك شنو والمرة دي كومت توبا في نص راسا ما جات سيرة البحر
الغريق عاد
.
.
هي يا يمة هي ديل بتغلاتو في السنة
اكان كدي انسوي لي يوم وشهر براي اصلو السنة ما مستفيد منها حاجة
|
Post: #7
Title: Re: كرامة لعيد ميلادي ويا فرحة ما تمت
Author: السيد المسلمي
Date: 10-13-2011, 01:29 PM
حكي جميل بلحيل والله
ماتتأخر ياحبيب .
|
Post: #8
Title: Re: كرامة لعيد ميلادي ويا فرحة ما تمت
Author: عبدالله ود البوش
Date: 10-13-2011, 01:49 PM
Parent: #7
وشهادتك احلى اخوي السيد المسلمي
تحياتي وتقديري
ونواصل
|
Post: #9
Title: Re: كرامة لعيد ميلادي ويا فرحة ما تمت
Author: عبدالله ود البوش
Date: 10-13-2011, 02:14 PM
Parent: #8
سوي الجبنة يا المبروكة انربط المسنوحة دي ما تعير واطريك يوم ولادتو ويوم سمايتو
سمح يا ود الفكي وهدي كمان جاتنا عمتي عشة بت مصطفى وبت ود الضريص بودعا
حبابكن والله حبابكن ادخلن لا جوة ... ودنقري يا بت مصطفى من العود المايل ما اشيل عينك
البخيتة بالله ......
اها اقعلي تاني آ المسنوحة ملتفتا الى حمارته الزرقاء ينظر اليها شظرا وترنما
.
.
وكت العيش بقى بالملوات يا اب آمنة حوبتك جاتك
لي لي لي .... ابوي وينو البعصر جناي ... ابوي وينو الليدو عطايا
ابوي وينو الجاتو العرايا ... هكذا جمل الجلسة راديو ام امدرمان
مغنيا خلف الله حمد ......
الرادي حجارو تسوي كحا بو ... من النوع ابو كديس
|
Post: #10
Title: Re: كرامة لعيد ميلادي ويا فرحة ما تمت
Author: عبدالله ود البوش
Date: 10-13-2011, 03:02 PM
Parent: #9
كدي يا بتول اختي ارمي ودعك وحمدينا
اها اذكرت عبدالله ولدي دا ولديهو قبل التخديرة بشوية في شان يوم ولادتو الرزقالة ( المشاية )
حقت الكنار كان يا دوب ختو حجارا وشفع الكنبو كل واحد ماسك ليهو حجرين اطقهن لمن اولعن شرارة
بالليل لمن حميرنا جفلن من الشرارة البتقوم في الضلما دي .... اها كلامي دا مو كلام توكيد
.
.
يا با ... عيد الميلاد مو كدي يا ابوي عيد الميلاد بدور اليوم والشهر
قسمت باسم ابوي يا ود الفكي ما قبل التخديرة بتذكري يا بت البوشني سنة البرجم الحارة ديك
المات فيها جدي عبدالمولى بعد شكلة ناس جبارة وود بترو في اللرض
القالوا فيها
ود بترو جبارة شترو
وكت شاف اللمة جاتو نسى عمتو ونعلاتو
بتذكرن اليوم داك آ حريم ؟
اها انا حامل بيهو في الشهر السابع ودخلت في التامن
وحبوبتي عشة بت مصطفى في عالم تاني تتر في كيفة خيطا وتترنم بترانيم تحتاج لترجمان
يمة هوي خليتو يوم عيد ميلادي بعزل لي يوم لكن الكرامة شنو ؟
الكرامة جدادة سمينة تغدي فكينا والفضلة تجينا
هوي يا فالحة ات ما عندك شغلة تقضيها الجنا دا قاليك العيد دا كل سنة وعندك تسعة جنيات
واسع ما شايف غير جدادتك الحمرا والتانية المبيضة في حور القصب والديك المزعمط دا
.
.
كان كدي يا جنا حرمان عليك بيت المفتش وكل البيوت البتعرف عيد الميلاد الله اقدرنا على جلابية
عيد رمضان المشختة ..... قوم ودي الدقيق دا الطاحونة ادوك الرواعية
|
Post: #11
Title: Re: كرامة لعيد ميلادي ويا فرحة ما تمت
Author: عبدالله ود البوش
Date: 10-13-2011, 07:50 PM
Parent: #10
هذا هو حال معظم جيلنا جيلي انا جيل التضحيات مجهول الميلاد
وشهادة الوفاة لا حاجة لنا بها فهنيئا لكم ابنائنا فقد سجلنا لكم على ظهر شهادة الميلاد بالدقيقة والثانية
بس ابقوا عشرة على المبادئ
|
Post: #12
Title: Re: كرامة لعيد ميلادي ويا فرحة ما تمت
Author: حمد محمد احمد
Date: 10-14-2011, 09:49 AM
Parent: #11
عبدالله ود البوش
كيفنك
نعمل ليك كرامة لما تجي السودان
..
هسع انت تميت كم سنة ؟؟ ( سؤال برئ )
|
Post: #13
Title: Re: كرامة لعيد ميلادي ويا فرحة ما تمت
Author: عبدالله ود البوش
Date: 10-15-2011, 06:20 AM
Parent: #12
الباشمهندس القدير حمد محمد احمد
والله مشتاقين عديل كدا
| Quote: هسع انت تميت كم سنة ؟؟ ( سؤال برئ ) |
لسع سنة ما تميتا انت بتنسى يا مهندس ولا شنو ؟
لكن بجي قريب قبل اتم السنتين هههههههه ونس
.
.
.
هو الوالدني الحضرو ولادتي ما عارفين انا اعرف كيف ؟
انا بذكر ليك يوم ولادتي ؟
لكن للضمان كدي اصغر منك بسنة واحدة
اها في داعي للشهادة عدم القيد... واحد واحد
.
.
مرور جميل يا هندسة شكرا جزيلا ... ما شفت لي الحيطة ؟
|
Post: #14
Title: Re: كرامة لعيد ميلادي ويا فرحة ما تمت
Author: عبدالله ود البوش
Date: 10-15-2011, 10:04 AM
Parent: #13
الكرامة يا ناس لاتنسوا الكرامة
قريب دا عندي كرامة بليلة كان مرقت من التنح الفيها دي
.
.
بليلة فك تخلي الزول اقيف تيوة
|
|