Post: #1 Title: كنت شاهدة عيان علي انفجار مظاهرات ميدان جاكسون التي سيندلع منها اللهيب Author: عفاف ابوكشوه Date: 10-12-2011, 01:10 AM
كنت شاهدت عيان.. بقلب موقف جاكسون.. النابض
بمظاهرات الجياع ..المتعبين الهادرة ..التي
هزت وسط الخرطوم.. واربكت اجهزت النظام
وامتدت من ميدان جاكسون.. وتفرعت في كافة الاتجاهات
علي مد البصر .. ومواقف المواصلاتزز تغلي كالمرجل
لايوجد موطئ قدم .. خالي,و الجموع المتدافعة نحو
جاكسون.
يتسآل الناس .. عن اين ذهبت الحافلات والهايسات ؟؟؟؟
ومن الذي تسببفي أزمة المواصلات ؟؟؟
وبدأت اصوات السخط والتزمر تعلوا هنا وهناك
والناس ملوا الانتظار لاكثر من اربعة ساعات
وبعد خروج طلاب الجامعات ازداد الزحام والزحف
وتكسوا وجوه الطلاب آثار الارهاق والتعب بعد يوم
دراسي طويل .. وزادت ازمة المواصلات -الطين بله-
وفجأة انفجر بركان الغضب.. وتحركت الجموع الهادرة
سيرا علي الاقدام .. وعلت الهتافات ,, الشعب يريد المواصلات
يا خرطوم ثوري.. ثوري ..والشعب يريد أسقاط النظام
وأغلق المتظاهرون الكبري الطائر الذي يتجة من جاكسون
الي امدرمان ..واحرقوا اللساتك واللافتات المعلقة بشارع الغابة
ونواصل
وعاش نضال الشعب السواني
وثورة حتي النصر
Post: #2 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: ibrahim alnimma Date: 10-12-2011, 01:16 AM Parent: #1
والبزدريك ياويلو من غضبك عليهو ومن مشيك .......... شكراً يا استاذة عفاف
Post: #5 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: محمد النيل Date: 10-12-2011, 01:19 AM Parent: #2
أهن يا معتصم محمد صالح
عندك كلام بعد دا؟؟؟؟
عندك فرصة تبرر وتعتذر
تحياتى
Post: #3 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: Frankly Date: 10-12-2011, 01:18 AM Parent: #1
النصر لنا
ويا خرطوم ثوري ثوري ضد الحكم الدكتاتوري
ثورة ثورة حتى النصر
وعاش كفاح القوى العاملة
Post: #4 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: شهاب الفاتح عثمان Date: 10-12-2011, 01:19 AM Parent: #1
شكرا يا غالية على مدنا بالمواكبة
Post: #6 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: أسامة عبد الجليل Date: 10-12-2011, 01:38 AM Parent: #4
إسقاط النظام واللحاق بربيع ثورات الشعوب العربية هو الحل الناجع للتخلص من سلطة الفساد والقهر الوقوف ضد جبروت النظام الفاسد أضحى فرض عين على كل مواطن ومواطنة يتطلع إلى الحياة الحرة الكريمة
إلى جماهير الشعب السوداني الأبية: نحييكم تحية النضال ونهنئكم بنسائم أكتوبر المجيد وبشريات التغيير التى أطاحت بالدكتاتورية العسكرية قبل ما يقارب الخمسة عقود ونتمنى أن يكون إحتفالنا بثورة أكتوبر هذا العام هو نفخ الروح في التاريخ لتنهض الثورة من صبر شعبنا ومعاناته إلى شوارعنا وحاراتنا لتنتظم صفا واحدا يعصف بجبروت سلطة المؤتمر الوطني الفاشية. إن جماهير شعبنا التي قاست ويلات الحرب ومرارة الفقر وتردي الخدمات الضرورية من مياه وكهرباء وعلاج وتعليم وغيرها لقادرة على فهم معادلات الفساد البسيطة وهي ترى قيادات الدولة ومحاسيبهم من فئات الطفيليين يتطاولون في البنيان ويستعصمون بأموالهم التي إكتنزوها على حساب قوت الشعب وثرواته المنهوبة ومشروعاته الوطنية المستباحة.
لقد رأى ملتقى أيوا في مؤتمره الأخير المنعقد في ولاية نيوجيرسي أن إسقاط النظام واللحاق بربيع ثورات الشعوب العربية هو الحل الناجع للتخلص من سلطة الفساد والظلم. ونحن إذ نشدّ على أيدي بنات وأبناء شعبنا الذين بادروا بالخروج إلى الشارع منددين بسوء الأحوال المعيشية و متحدّين لسلطة القهر والفساد فإننا نهيب بكل القوى الوطنية لتتنادى من أجل التنسيق والتخطيط والدفع بأمواج الثورة الهادرة لتقتلع هذا النظام البغيض من جذوره وتؤسس لدولة تحترم خيارات الشعب وتعدده وتنوعه وحقه في الحياة الحرة الكريمة، وعلينا جميعا ألا نكتفى بالدعم والتضامن بل يجب أن نساهم فعليا فى قدح شرارة الثورة والوصول بها إلى نهاياتها الحاسمة.
يا جماهير شعبنا الصامدة: إن الثورة لن تأتي إلى بيوتنا ما لم نخرج نحن لها ونوقد جذوتها، فالوقوف ضد جبروت النظام الفاسد أضحى فرض عين على كل مواطن ومواطنة يتطلع إلى الحياة الحرة الكريمة وما من قبضة أمنية مهما عظمت بقادرة على قمع إرادة الشعوب إذ تنتفض عزلاء إلا من إيمانها بالتغيير .فلنجعل الهدف واضحا وجليا ومحددا وهو إسقاط هذا النظام ولنسهر على حماية بعضنا ولنتخذ مواقعنا في مقدمة قوى التغيير فالذي نحن بصدده ليس ثورة الجوع والفاقة بل هى ثورة الكرامة لهذا الشعب الصابر العظيم.
يا جماهير شعبنا البطلة: إن ملتقى أيوا حين يطلق نداء الثورة يهيب بالوطنيين من أبناء وبنات الشعب منتسبي القوات النظامية وبالأخص منتسبي أجهزة الشرطة أن ينضموا إلى صفوف أهلهم الكادحين وأن ينحازوا إلى همومهم ومعاناتهم وأن يكفوا أيديهم عن البطش بالشباب الثائر وأن يحموا ثورة الشعب بإعتبارهم فصيل مهم من فصائل الثورة وأصحاب مصلحة حقيقية في التغيير.
المجد لشباب الثورة وطلائعها الفتية.. الخزي والعار للنظام الذي قسّم الوطن وسرق ثرواته.. عاش نضال الشعب السوداني..
ملتقى أيوا للتحول الديمقراطي الولايات المتحدة الامريكية أكتوبر 2011
Post: #7 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عفاف ابوكشوه Date: 10-12-2011, 01:56 AM Parent: #4
ولاحظت من اعلي ..الكبري الطائر
جموع هادرة.. قادمة من جامعة السودان
المبني الغربي.. واكتظت الشوارع الفرعية
بالجماهير الغاضبة .. وحاصر المتظاهرون
الحافلات التي تحمل الركاب ..ومنعوها من الوصول
مداخل الكباري - الفتيحاب - وامدرمان القديم
وظلت المتاريس البشرية قرابة الساعة صامدة
وعطلت سير الحركة تماما ..مما أربك شرطة النجدة ومنعها
من الدخول الي الموقف ..وبعد ولادة متعثرة حضرت عربات
النجدة.. خجولة لتفض المظاهرات .. وتنظم حركة المرور
واستمر الحراك الجماهيري ..هادرا سيرا علي الاقدام حتي
وصلنا بالقرب من كبري الفتيحاب .. وبدأت حافلات بري وبصات
الوالي الخضراء.. تأتي لتساعد.. في نقل المواطنين الي كل
ارجاء العاصمة.
ونحن ركبناامجاد وتم توجيه السائقين.. من قبل الشرطة
الي الذهاب بالكبري القديم .
وغيروا مساره لاتجاه واحد نحو امدرمان فقط ..وقفلوا كبري
الفتيحاب.
ونواصل
Post: #8 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: خالد العبيد Date: 10-12-2011, 02:09 AM Parent: #7
سلام يا عفاف واصلي وشكرا لقلمك الصادق الجرئ
Post: #9 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عمر ادريس محمد Date: 10-12-2011, 02:43 AM Parent: #8
بعلم الشعب وحكمته وخبرته الطويلة فى هزيمة الانظمة الدكتاتورية ..تقوم المظاهرة لسبب محدد عدم مواصلات , انقطاع المياه , الغلاء الفاحش والطاحن , من أجل يافطة فى طريق الستين وفى الغالب تسعى المظاهرة للتعبير عن هذا الهدف المحدد ولكنها فى النهاية تصب فى جملة اهداف اخرى وتلهم الناس وترفع وعيهم بضرورة وحدتهم وتحديد العدو بدقة لذلك يخاف الجلاد الإنقاذى الفاشى من كلمة مظاهرة لأنه يعى أن حاصل جمع المظاهرات يعنى الثورة لذلك أتى بعض العمايا هنا ينكرون نهارا جهارا وجود مظاهرة فى ميدان جاكسون بسبب عدم وجود مواصلات ولسؤ حظهم القول الفصل دائما ياتى قبل أن يجف حبرهم الكاذب. ولصارم القمسات يا حى الشعور ... المجد لك , البزل لك , الخلد لك ومليون تحية
Post: #52 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: هشام هباني Date: 10-13-2011, 06:29 AM Parent: #9
عاش كفاح الشعب السوداني
Post: #10 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عفاف ابوكشوه Date: 10-12-2011, 02:56 AM Parent: #7
وللاسف الشديد كنت احمل كيسا ثقيلا ملئ
بالاسود والبطاطس .. اشتريته من ( الفراشة )
علي استايل( قدر ظروفك ) الذي نعيشه هذه الايام
وكنت احمل في كتفي شنطة تحمل اثقالا اخري ولم استطع
مع هذه الحمولة الدخول في قلب المظاهرات .. لكن هيأت
نفسي للرصد والمتابعة .. سيرا علي الاقدام وعلي جنبات
الشارع مع بعض الناس الراجلين..وظللت اراغب ردود الافعال
من الحوارات مع المواطنين التي امتدت علي طول الطريق
الي ان وصلنا الي مفترق الطرق بالقرب من كبري الفتيحاب
والوجوه المتعبه مليئة بالتحدي والاقدام للتغيير
وسعدت كثيرا بشعبي البطل .. الذي أثبت ان لامستحيل
تحت سمائه القاتمة والملبدة بالقيوم والسموموالجوع
والفقر والمرض والعوز.. ولم اشعر بالتعب مطلقا.. وتأكدت
تماماان الشوارع لاتخون .. وان ما شهدتهبميدان جاكسون هو
الشرارة التي سيندلع منها اللهيب .. والذي لاتنطقئ ناره الا
باسقاط النظام.. انها لحظات ثورية ملهمة للتغيير ..والثورة
ترتب عليهااكتملت واستحكمت حلقات الازمة .. وحان قطاف الثورة
وجني ثمارها ..وهتف الشعب من اعماقه.. التغيير واجب وطني
وكما قال الشاعر التونسي الراحل المقيم ابو القاسم الشابي
اذا الشعب يوما اراد الحياة فلابد ان يستجيب القدر
والثورة انطلقت شعارات تردد الحناجر
لا لحكم الفرد .. لا
والشعب يريد.. اسقاط النظام
ودمتم
Post: #11 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: doma Date: 10-12-2011, 03:04 AM Parent: #10
للصبر حدود فلتتوحد الصفوف هامش ومركز لاقتلاع نظام الانقاذ الفاشي
Post: #12 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: Amani Al Ajab Date: 10-12-2011, 03:13 AM Parent: #11
Quote: للصبر حدود فلتتوحد الصفوف هامش ومركز لاقتلاع نظام الانقاذ الفاشي
شكراً الحبيبة دومة لقد عبرت عني .. شكراً الحبيبة عفاف كشوة على البشارة .. دمتن بالف خير ..
Post: #13 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عفاف ابوكشوه Date: 10-12-2011, 03:16 AM Parent: #11
شعبنا العظيم كسر حاجز الخوف والصمت معا
يا صارم القسمات يا حي الشعوب
المجد لك والخلد لك
ودمتم
Post: #14 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عفاف ابوكشوه Date: 10-12-2011, 03:22 AM Parent: #13
فليبقي عاليا للمتابعة
Post: #15 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عفاف ابوكشوه Date: 10-12-2011, 03:24 AM Parent: #13
فليبقي عاليا للمتابعة
Post: #16 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: Amani Al Ajab Date: 10-12-2011, 03:32 AM Parent: #15
Post: #17 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: abdelrahim abayazid Date: 10-12-2011, 05:39 AM Parent: #16
فوق حتي يتم الانتصار
Post: #18 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: الطيب شيقوق Date: 10-12-2011, 05:46 AM Parent: #17
فليبقي عاليا للمتابعة
شكرا استاذة عفاف
Post: #19 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عبدالكريم الامين احمد Date: 10-12-2011, 05:48 AM Parent: #18
فوووق كمان وكمان الشعب الاسطي في الميداان
Post: #20 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: معاوية المدير Date: 10-12-2011, 05:51 AM Parent: #17
Post: #21 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: EBTIHAL OSMAN Date: 10-12-2011, 06:05 AM Parent: #20
UP
Post: #22 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: حمزاوي Date: 10-12-2011, 06:06 AM Parent: #20
الثورة انطلقت عندما تلتقي ثورة الهامش مع ثورة المركز
Post: #48 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: Nasr Date: 10-12-2011, 09:42 PM Parent: #17
عاش كفاح الشعب السوداني الثورة قادمة وإلي مزبلة التاريخ (كان لقيتي مكان) أيتها الديكتاتورية
Post: #23 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: Frankly Date: 10-12-2011, 06:23 AM Parent: #11
Quote: هامش ومركز
سلامات يا دومة
إنتي برضو وقعتي في حبال العبارت المنبرية الجهوية دي
يا دومة في ناس في المركز دا مهمّشين أكتر من الهامش
فخلونا نكون مواطنين سودانيين وحدة واحدة غض النظر عن الجهوية والعرقية والقبلية
حكاية هامش ومركز بالإضافة علبارة جلابة دي لنقض النسيج الإجتماعي الوطني فلا تقي في فخاخ ينصبها العنصريون والجهوييون
تحياتي وتقديري
كمال
Post: #41 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: محمد فرح Date: 10-12-2011, 12:03 PM Parent: #10
Quote: الشارع مع بعض الناس الراجلين..وظللت اراغب ردود الافعال
تحت سمائه القاتمة والملبدة بالقيوم والسموموالجوع
الله يصبرنا بس
Post: #56 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عفاف ابوكشوه Date: 10-13-2011, 10:49 PM Parent: #4
فليبقي عاليا حتي اسقاط النظام
Post: #24 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: المكاشفي الخضر الطاهر Date: 10-12-2011, 06:23 AM Parent: #1
استاذة عفاف اسي المظاهرة ويني ؟؟
Post: #25 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عبد الناصر حسن أحمد Date: 10-12-2011, 07:18 AM Parent: #24
Quote: استاذة عفاف اسي المظاهرة ويني ؟؟
مشت للجيران !!!!!
ـــــ الهتافات التندد بي عوارضو والتأكد لي رجوعو والتبدد خوفو .. جوعو والتجدد بخّة الدم في عروقو .. وبين ضلوعو تطرد الهم من جموعو .. ( حميد )
Post: #26 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عبدالكريم الامين احمد Date: 10-12-2011, 07:46 AM Parent: #25
Quote: استاذة عفاف اسي المظاهرة ويني ؟؟
تبكي بس يا المكاشفي..!! ماعندك اي حلول جذرية فالثورة انطلقت وهي مستمرة والسادن يطلع بررررررره
Post: #27 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عبد الناصر حسن أحمد Date: 10-12-2011, 08:01 AM Parent: #26
Quote: تبكي بس يا المكاشفي..!! ماعندك اي حلول جذرية فالثورة انطلقت وهي مستمرة والسادن يطلع بررررررره
هههههه فوفوزيلا من النوع أبو إستك يا كيكي
تحياتي
Post: #28 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عبدالكريم الامين احمد Date: 10-12-2011, 08:20 AM Parent: #27
Quote: هههههه فوفوزيلا من النوع أبو إستك يا كيكي
لوووووووول وتحياتي يا ناصر واليومين دي برج المراقبة فيهو متعةشديدة خلااص ففي لحظات زي لحظة انطلاق الكركبات التاريخية القدامنا دي في ناس زي صحبي المكاشفي ده تحن علي حالهم واحوالهم فالحتمية التاريخية سايقهم وسايقة السلطة التي يدعمونها الي (عدم وزوال) ولكن برضو بتلقاهم لسسسع مفرفرين
Post: #29 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: Mustafa Mahmoud Date: 10-12-2011, 08:36 AM Parent: #28
تحالف قوس قزح يدعو كل جماهير الشباب للثورة الان و جعل اكتوبر 2011 شهر الخلاص من
حكم الكيزان
الخروج للشوارع في كل حي و في كل قرية في كل مدينه وفي كل مكان
و ثوره ثوره حتي النصر
نحن سوف ندعو لثورة اكتوبر التانية لكنس مافيا الكيزان ولن نقف حتي يتم اسقاط النظام
عايد عايد يا اكتوبر
Post: #30 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: salah almaleeh Date: 10-12-2011, 09:01 AM Parent: #29
التحية لك أستاذة عفاف أبو كشوة على هذا البوست الثوري
والتحية والتقدير لجماهير شعبنا الأوفياء الذين غبروا أرجلهم أمس
في سبيل الحرية والعدالة والعيش الكريم
وأهدي جماهير شعبنا وكل الزملاء الأوفياء في المنبر قصيدة الشاعر
البطل هاشم صديق - صالح عام -
صالح عام
هديمك يا وليد مقدود و صابحنا الفقر و الجوع صبح باب التكل مسدود كمل حتي الملح في البيت وشن همّ الملح في البيت وكت ملح الدموع موجود؟! دحين يا وليد هو ديل موُ قالوا ناس إنجاز ؟!! وشن سّولنا مما جونا غير حرقو الفضل بالجاز ؟ كّل شيتا صعب في السوق من الكبريتة للطايوق و كان جانا البخت تموين رطيل سكر و صابونتين نجيب من وين ؟ و اخوك مرفود و عدمان الشهر ملين ؟ أمس زازيت اكوس الدين مشيت لسمية بت مامون لقيت جابولها تلفزيون سمح بالحيل تشوف الصورة بى كم لون وكت في نشرة ألأخبار ظهر مك البلد يضحك جضومو كبار مزرر الكرش بزرار لا مهموم لا مغموم لا زعلان و شيهو يراري بالألوان.. وقّد في حشايا تباق نار طريت رفد الوليد و الجوع و سال دمع الغبينة الحار اريتك يا ملك فد يوم يخلى الجوع عينيك ما تنوم أريتك يا ملك فد يوم تحس بي غصة المظلوم دحين يا وليد هو ديل ما لهم و مال الدين وكت قولهم كلام الله و فعالهم ما فعال صالحين كتير فيهم عديل حقار و بالقرآن كمان تجار و كضابين أكان بنزين عدم .. أو جاز وتعبوُ الناس و ضاقو خلاص صفوف واقفين يقولولك إرادة الله وكان عدم الرخيص و الغالى في التموين يقولولك ده . غضب الله و كان الموية صبحت طين يقولولك ده من امريكا والعملا حمونا الشب ولاد الكـــــــــــلب
عشان الشعب يحرن تب يقبّل من صراط الدين دحين يا وليد هو ديل ما لهم و مال الدين أكان كنزو الدهب و المال بلايينهم تسوى جبال وعرباتهم تخطف العين و بناياتم قصور في قصور وحاة الله و كتاب الله أكان ادونا طوب فد سور كان سوينا الف أويضة لي مسكين فترنا من الخطب يا وليد و من طيش العقيد و عميد و من قل القرش في الايد و من تعب الوقوف في الصف ومن غبن الرصع بالكف و من حفر الدروب و اللف و من خت الحلم في الرف كل يوماَ نقيحنا يزيد دحين يا وليد هو كم دغشاَ عشان نلقاهو دافرنا و تعبنا شديد؟ و كم حولا صيامنا صبر عشان يشرق هلال العيد ؟! اح ح يا وليد لا حتى الخبيز إنضاق و لا هدما كسانا جديد و شوف المغسة يا وليد سموُ شقانا صالح عام و كل دمعاَ نزل من عين و كل جوعاَ سكت بالدين و كل زيناَ محاهو الشين ختو وقيعتو في الإسلام حرامهم يا وليدي حلال وا نحنا حلالنا كلو حرام يقلبو الدين نصّل سكين و ناسين الحساب قدام اخر زمن يا وليد نشوف كل البشاتن لون يفوت هولاكو دوب نرتاح ينط في الكرسي نابليون اريتك يا أمير حالي جعيص في الكرسي في الخرتوم و ساويلك الف والي نبايعك للظلم و الجوع نبايعك وكل ضيم مشروع نبايعك و جيتنا جيش و دروع نبايعك و الحكم مقلوع نبايعك و القسم مخدوع نبايعك من سجن عالى أخر زمن يا وليد حصيف العين يلاقى و يشوف زمان ظلم السلف بالسيف و حسه السيف كلاشينكوف غير زمن الهوان و الجوع كمان طالع زمان الخوف ديل ما برتو لى إنسان كم ولداَ وقع نشفان وكم زهراَ كِتل و اتحت في رمضان لا شهراَ حرام إتصان لا كفنا ستر صبيان لا شاهد قبر معروف لا اماَ برد نارها سكت و إرتاح نزيف الجوف دحين يا وليد أ كان حسع ده ديش مصعب و أكان بيرق علي الكرار منو الكفار ؟!!! منو القاصدينو بالتكبير و بالتهليل و ضرب النار؟ اخاف نحنا و أكان نحنا أخير نضحك كتير سبب الضحك بخته شوف المغسة يا وليدي ديل ما حسه ناس حُقار؟ ده ذى دق الطبول للموت وذي وقد البلد بالنار * * إلا نشوف أ كان ساهرين معاك يا جوع و أ كان ضيقنا إتحفر في ضلوع و أكان صابرين علي الفجار وحاة الله و كتاب الله وكت نغلي و نكوس التار لا سوراَ بقيف في وش و لا لهب الغبن بترش و لا صفاَ يميل بالقش كل ظالماَ يقع و يندش و سيل دمع البلد ينقش لا بحبس حلقنا الخوف و لا بترجع اكان لعلع كلاشينكوف هديمك يا وليد مقدود و صابحنا الفقر و الجوع صبح جلد البطن مشدود شن بتسو و أخيك من شهر مرفود قالو صالح عام عشان قال العوج في العود * * نان ما يقول أريت يقول عديل يا زول هديك البغلة في الابريق ما هامينا -صالح عام- وديش مصعب و لا الحجاج و لا بكتل قلبنا الجوع و موت منقذنا ولا الضاج خلي الضيق يزيد يا وليد بكرة الضيق يخلى الناس تبقى عُصّار علي الحقار و تبقي حريق * * قريب يا وليد صيامنا يتم و يهل و يشرق هلال العيد نحس طعم الخبيز و يتبدل هدمنا جديد
Post: #31 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: ibrahim alnimma Date: 10-12-2011, 09:19 AM Parent: #30
Quote: سلامات يا دومة
إنتي برضو وقعتي في حبال العبارت المنبرية الجهوية دي
يا دومة في ناس في المركز دا مهمّشين أكتر من الهامش
فخلونا نكون مواطنين سودانيين وحدة واحدة غض النظر عن الجهوية والعرقية والقبلية
حكاية هامش ومركز بالإضافة علبارة جلابة دي لنقض النسيج الإجتماعي الوطني فلا تقي في فخاخ ينصبها العنصريون والجهوييون
تحياتي وتقديري
كمال
كمال ، زي شايف لغتك اتغيرت وكدة ، خير انشاء الله..........وانا اتأمل كلماتك فخلونا نكون مواطنين سودانين وحدة واحدة غض النظر عن الجهوية والقبلية ........هل تعني انه لو قامت الانتفاضة بدون هامش ومركز ، ماعندك مانع ؟
Post: #33 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: طارق ميرغني Date: 10-12-2011, 09:41 AM Parent: #31
استاذه عفاف
بالفعل الشوارع لا تخون
والثورة انطلقت شعارات ترددها القلوب
Post: #32 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عمر عبد الله فضل المولى Date: 10-12-2011, 09:38 AM Parent: #1
...
Post: #34 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عفاف ابوكشوه Date: 10-12-2011, 10:07 AM Parent: #32
الشكر اجزله لكل الذين
ساهموا باضاءات افادت
المتابعة ووضحت الكثير من
الحقائق التي حاول البعض طمسها
وبالتأكيدالمظاهرات التي انتظمت
في احياء عديدة بالعاصمة والمواقف والشوارع
هي امتداد للغضب الشعبي العارم والغلاء الطاحن
والفقر المدقع والجوع والموض والظلم والقهر
وهي الشرارة التي ستستشري في جسد البلاد من حلقا الي
حنوب كردفان وابيي والنيل الازرق ومن حلايب وبورتسودان
الي الجنينه تتمدد لاسقاط النظام
ونواصل
Post: #36 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عفاف ابوكشوه Date: 10-12-2011, 10:23 AM Parent: #34
والنر تأتي من مستصغر الشرر
لكن اتسعت الكوة من شرارة الي لهيب كاسح
والشعب السوداني لم يكمى########ا كما يدي البعض
بل هو شعب معلم وله تاريخ حافل بالثورات
كما ان الشباب الان يمثل رأس الرمح في الثورة
التي انطلقت وستطيح ىبالنظام وفلوله المرتزقة
ونواصل
Post: #35 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: فتحي البحيري Date: 10-12-2011, 10:20 AM Parent: #32
دي المناظر يا استاذة
ولسا الجايي احلى
Post: #37 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عفاف ابوكشوه Date: 10-12-2011, 10:33 AM Parent: #35
ثورة الشباب الكاسحة قادمة
وعبر أليات ثورية لايمكن التراجع ىعنها
والمحصلة النهائية احلي واجمل وانضر
مودتي
Post: #38 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: ناصر المحسى Date: 10-12-2011, 10:51 AM Parent: #37
Quote: الخرطوم (رويترز) - قال شهود ان مئات السودانيين خرجوا الى شوارع العاصمة الخرطوم يوم الثلاثاء للتظاهر ضد ارتفاع اسعار الغذاء والمطالبة بتحسين وسائل النقل العام.
والاحتجاجات شيء نادر الحدوث في السودان لكن الغضب يتزايد بسبب ازمة اقتصادية وغلاء المعيشة بعد ان فقدت البلاد معظم احتياطياتها النفطية التي الت لدولة جنوب السودان المستقلة حديثا.
وقال شهود ان نحو 300 شخص شاركوا في احتجاج في المحطة الرئيسية لحافلات النقل وسيارات الاجرة بالخرطوم للمطالبة بتحسين وسائل النقل العام. وانضم طلاب جامعيون الى المتظاهرين للاحتجاج على تضخم اسعار الغذاء.
وقال شاهد رفض ان ينشر اسمه "ردد الطلاب شعارات (لا لارتفاع الاسعار والخبز الخبز للفقراء"). واضاف ان الشرطة وصلت الى موقع الاحتجاج لكنها لم تتدخل.
وقال شاهد اخر ان مئات الاشخاص نظموا ايضا احتجاجا في محطة للحافلات في ام درمان. واضاف ان المحتجين عبروا بعد ذلك جسرا على نهر النيل يربط ام درمان بالخرطوم وبدأوا في رشق السيارات الخاصة ومركبات الشرطة بالحجارة.
وقالت الشرطة في بيان ان مجموعة من المواطنين رشقت سيارات تعبر الجسر بالحجارة مضيفة انها منعت وقوع "اعمال تخريب".
ويوجد في السودان شبكة هزيلة للنقل العام ويعتمد الركاب في الاغلب على سيارات الاجرة والحافلات الصغيرة التي تلبي الطلب بالكاد وعادة ما تتهم بتحميل اعداد أكبر من سعتها.
وتضرر كثير من السودانيين بصورة كبيرة بسبب التضخم الذي بلغ 20.7 بالمئة في سبتمبر ايلول نتيجة ارتفاع اسعار الغذاء بينما هبط سعر صرف الجنيه السوداني في السوق السوداء في الاسابيع الماضية.
وردت الحكومة بحزمة من الاجراءات تشمل اعفاء واردات السلع الغذائية الاساسية من الرسوم الجمركية بصورة مؤقتة.
لكن خبراء اقتصاديين يشكون في ان التضخم سيتراجع كثيرا مع فقد السودان معظم احتياطياتها النفطية بعد استقلال جنوب السودان وهو ما أدى الى انخفاض تدفق العملات الاجنبية اللازمة لسداد قيمة الواردات.
المجد للشعب السودانى
Post: #57 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عفاف ابوكشوه Date: 10-14-2011, 09:30 PM Parent: #35
فليبقي عاليا
الي نهاية المطاف
Post: #39 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: أبو ساندرا Date: 10-12-2011, 11:16 AM Parent: #32
يا شعبآ تسامى ياهذا الهمام تفج الدنيا ياما وتطلع من زحاما زي بدر التمام تدي النخلة طولا والايام فصولا والبذرة الغمام
Post: #40 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عبد الحي علي موسى Date: 10-12-2011, 11:47 AM Parent: #39
Quote: النصر لنا
ويا خرطوم ثوري ثوري ضد الحكم الدكتاتوري
ثورة ثورة حتى النصر
وعاش كفاح القوى العاملة
معقول! دا فرانكلي ولًا كاميرا خفية. شكرا عفاف وشكرا للموج الهادر قاهر جلاديه. يا شعبا تسامى يا هذا الهمام.
Post: #42 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: abdelrahim abayazid Date: 10-12-2011, 12:28 PM Parent: #40
حكومتي.. كلام شعبك اسمعي كلامي كان تابي بكرة تدوري ما تلقي أى حكومتي.. كلام شعبك اسمعي وجيشك ده من أبيى أمرقي وجرائدك المهوهوة دا لبيتك بخربي ورياك مشار ده لخاطرو طيبي وتاني ضيف كان جاك جنب النافورة ما توقفي للمكتب الكبير دخلي وفى الكرسي الكبير قعدي وكباية ام قعر قدامو ختي إنت مالك الواجب ما بتعرفي ومجلس الأمن كان جا تاني اوعى ما تقابلي طيارة أم ضنب كان ظهر الكلام دا بتابي ومشكلة دارفور ده اسرعي حلي عشان اوكامبو ما تصاقري وعبد الواحد ده امشي شوفي خليل ده حاولي ترضي وبأى طريقة جيبي وكان داير نائب رئيس سوي وتحالف المعارضة ما تهرشي والصادق المهدي ما تجهجهي ومالك عقار ما تزعلي باكر تكوسي ما تلقي وياسر عرمان بلا سبب الكلاب فوقو ما تشعشعي وجيش شعبي ده هسع أنسي والمشورة الشعبية سوي والإنتخابات الجاية ما تزوري وكلامي ده أكان تسوي شوفي كان تنقدري أحسن يا حكومتي ركوب راس ده خلي وكلام بجيب توما هوك ما تقولي والسكر ساعة ساعة ما تزيدي وأجراس حرية من المطبعة ما تصادري وايدك المسمة دا قصري والبطلع الشارع ما تضربي والمسكين حقو ما تشيلي وبى قروش شوية تشتري دعوة المظلوم ما بتقدري من السماء تحوشي والله كان غضب عنك لى راسك تكسري ومن الدنيا تنمحي وقروش لميتى دا ما بتلقي طريقة تاكلي أى حكومتي.. كلام شعبك اسمعي وكلامي أكان تابي بكرة تدوري ولا تلقي
ابداع ثوري سوداني لا اعرف كاتبه
Post: #43 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: جمال خضر Date: 10-12-2011, 01:09 PM Parent: #42
لما لليل الظالم طول****وفجر النور من عينا اتحول قلنا نعيد الماضي الأول ماضي جدودنا الهزموا الباغي**** وهدوا قلاع الظلم الطاغي وفي ليلة وكنا حشود بتصارع*****عهد الظلم الشب حواجز... شب موانع جانا هتاف من عند الشارع قسما قسما لن ننهار**** طريق الثورة هدي الأحرار والشارع ثـــار وغضب الأمة إتمدد نار***** والكل ياوطني حشود ثوار وهزمنا الليل..... وهزمنا الليل والنور في الأخر طل الدار **** والعزة اخضرت للأحرار وطني نحن سيوف أمجادك**** ونحن مواكب تفدي ترابك
ولسه الشارع بيشهد لينا **** في يوم الغضبة حصاد ماضينا مشينا نعطر حقل الثورة **** بدم نفديه بلادنا الحرة وكان (اكتوبر) فجر الغضبة**** كسرنا قيود الماضي الصعبة
لما مشينا موالكب صامدة**** تهدر..وتغلي..تهتف راعدة الرصاص لن يفنينا **** الرصاص لن يفنينا وسال الدم في أرض الوادي**** فدينا النور بالروح يا بلادي وكانت صفحة حكاها العالم**** وفجر (أكتوبر) طل وسالم
كان في الجامعة موكب هادر**** صمم يجلو الليل السادر وكان الليل السادر غادر**** وكان الليل السادر غادر فجر غدره سموم دخان ***** ورصاص من صوته صحي السودان والشعب الثائر صمم هادر**** يصرع لنا الداجي الطول وكان القرشي شهيدنا الأول وما تراجعنا .. نذرنا الروح**** مسكنا دربنا ..وما تراجعنا للشمس النايرة قطعنا بحور **** حلفنا نموت او نلقي النور
Post: #44 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: Ahmed Elyas Date: 10-12-2011, 01:20 PM Parent: #43
حتما حنتصر
Post: #45 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: محمد علي البصير Date: 10-12-2011, 01:50 PM Parent: #44
Quote: تظاهر العشرات بالعاصمة السودانية الخرطوم الثلاثاء ضد ارتفاع أسعار الغذاء وللمطالبة بتحسين وسائل النقل العام بحسب ما نقلته وكالة رويترز نقلا عن شهود عيان.وقال الشهود إن الاحتجاجات جرت في المحطة الرئيسية لحافلات النقل وسيارات الأجرة بالخرطوم للمطالبة بتحسين وسائل النقل العام، وانضم إليهم طلاب جامعيون للاحتجاج على تضخم أسعار الغذاء.
وبحسب أحد الشهود فقد ردد الطلاب هتافات من بينها "لا لارتفاع الأسعار والخبز، الخبز للفقراء"، مضيفا أن الشرطة وصلت إلى موقع الاحتجاج لكنها لم تتدخل.
وذكر شاهد آخر أن مظاهرة أخرى جرت في محطة للحافلات في أم درمان، مشيرا إلى أن المحتجين عبروا بعد ذلك جسرا على نهر النيل يربط أم درمان بالخرطوم وبدؤوا في رشق السيارات الخاصة ومركبات الشرطة بالحجارة.
بيان للشرطة
وقالت الشرطة في بيان إن مجموعة من المواطنين رشقوا سيارات تعبر الجسر بالحجارة مضيفة أنها منعت وقوع "أعمال تخريب".
وتضرر كثير من السودانيين بصورة كبيرة بسبب التضخم الذي بلغ 20.7% في سبتمبر/أيلول نتيجة ارتفاع أسعار الغذاء بينما هبط سعر صرف الجنيه السوداني في السوق السوداء في الأسابيع الماضية.
وردت الحكومة بحزمة من الإجراءات تشمل إعفاء واردات السلع الغذائية الأساسية من الرسوم الجمركية بصورة مؤقتة لكن خبراء اقتصاديين يشكون في أن التضخم سيتراجع كثيرا مع فقد السودان معظم احتياطياتها النفطية بعد استقلال جنوب السودان وهو ما أدى إلى انخفاض تدفق العملات الأجنبية اللازمة لسداد قيمة الواردات.
ويعتمد الاقتصاد السوداني على صادرات النفط وعلى الذهب في نطاق محدود وتسعى الحكومة لتنويع مصادر الاقتصاد لكن التقدم يسير ببطء وهو ما يلقي خبراء باللوم فيه على عقوبات تجارية تفرضها الولايات المتحدة وسوء التخطيط.
نقلاً عن موقع ياهو الإلكتروني المعرب
Post: #46 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: Amani Al Ajab Date: 10-12-2011, 04:23 PM Parent: #45
Post: #47 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: شادية عبد المنعم Date: 10-12-2011, 08:49 PM Parent: #46
فوق يا عفاف لأنو كل يوم حيتكرر الموقف ده ونحنا وراهم حتى السقوط الأخير
Post: #49 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عمر ادريس محمد Date: 10-12-2011, 11:56 PM Parent: #47
Post: #50 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: Elbagir Osman Date: 10-13-2011, 03:31 AM Parent: #49
حتما ستتلاقي هذه الخيران
وحينها..
ستكون سيلا جارفا
الباقر موسى
Post: #51 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عفاف ابوكشوه Date: 10-13-2011, 06:05 AM Parent: #50
فليبقي عاليا للمتابعة
Post: #53 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: المكاشفي الخضر الطاهر Date: 10-13-2011, 06:30 AM Parent: #51
Quote: تبكي بس يا المكاشفي..!! ماعندك اي حلول جذرية فالثورة انطلقت وهي مستمرة والسادن يطلع بررررررره
دحكتنييييييي
Post: #54 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: Mustafa Mahmoud Date: 10-13-2011, 08:49 AM Parent: #53
تحالف قوس قزح يدعو كل جماهير الشباب للثورة الان و جعل اكتوبر 2011 شهر الخلاص من
حكم الكيزان
الخروج للشوارع في كل حي و في كل قرية في كل مدينه وفي كل مكان
و ثوره ثوره حتي النصر
نحن سوف ندعو لثورة اكتوبر التانية لكنس مافاي الكيزان ولن نقف حتي يتم اسقاط النظام
عايد عايد يا اكتوبر
Post: #55 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عائشة موسي السعيد Date: 10-13-2011, 11:25 AM Parent: #54
*****
Post: #58 Title: Re: كنت شاهدة عيان علي انفجار مظاهرات ميدان جاكسون التي سيندلع منها ال Author: عفاف ابوكشوه Date: 10-16-2011, 00:20 AM Parent: #55
