Post: #1
Title: هيئة علماء السودان تجوّز تقسيط وشراكة الأضحية
Author: Hadeer Alzain
Date: 10-09-2011, 01:55 PM
هيئة العلماء: الأضحية واجبة على القادرين حتى ولو ارتفعت أسعارها
الأحد, 09 أكتوبر 2011
أجازت هيئة علماء السودان، شراء الأضحية بالأقساط أو باشتراك مجموعة، لكنها رفضت إصدار فتوى شرعية تلزم رئيس الجمهورية، عمر أحمد البشير للتضحية نيابة عن الفقراء، واتهمت جهات لم تسمها بالتآمر على المواطن برفعها أسعار السلع الاستهلاكية.
وقال الأمين العام للهيئة، بروفيسور محمد عثمان صالح، في المنتدى الدوري لجمعية حماية المستهلك، السبت،
تحت عنوان: "الأضحية ما بين العادة والعبادة"،
إن الأضحية تجب على المسلمين القادرين عليها حتى لو ارتفعت أسعارها، موضحاً أن الأضحية تشجع المنتجين وتنشط الإنتاج.
ودعا حسب جريدة "الإنتباهة" السودانية الصادرة الأحد، الحكومة إلى توفير العرض وخفض السعر وتفعيل عمل الجمعيات التعاونية.
وأكد الأمين العام للهيئة إلى جواز الأضحية بالأقساط أو اشتراك مجموعة من الأسر في ثمن الأضحية أو استدانة ثمنها شريطة أن لا يدخل المستدين في عجز طويل يخل بقوت أهله.
وطالبت مجموعة مشاركة في الندوة إلى استصدار فتوى تجعل الرئيس يضحي عن جميع الفقراء،
لكن الأمين العام للهئية، أكد أن فتوى كهذه قد تضر بالمنتجين، لأن هناك بعض القادرين على تدبير أمر الأضحية.
واتهم جهات لم يسمها بالتآمر ضد المواطن برفع أسعار الأضاحي بصورة خرافية، كاشفاً أن الهيئة قامت برفع مذكرة للرئيس لدى اجتماعها به، طالبت فيها بضرورة رفع الرسوم والجبايات للحد من ارتفاع أسعار الأضاحي.
http://www.ashorooq.net/net/index.php?option=...07-03-25&Itemid=1163
|
Post: #2
Title: Re: هيئة علماء السودان تجوّز تقسيط وشراكة الأضحية
Author: nazar hussien
Date: 10-09-2011, 02:07 PM
Parent: #1
الفتوة دي ذكرتني بي فتوي قديمة لخالنا الله يرحمو
كان مفلس والضحية علي الابواب وكعادة اهل القري
الما بضحي بكون منبوذ...فراح اتفاوض مع تاجر
مواشي...قال ليه...العيد الباقي ليه يومين وانا
ما عندي قروش...يا تديني خروف...وارجعو ليك خروف
او تديني حقو واشتريه منك وارجعن ليك قروش..
وضميني فلان.
التاجر اتحيّر وقال ليه لكن الضحية كده ما بتجوز
ولابد تشتريها من حر مالك...
قال ليه انت مالك ومال جوازها...اول قبيل سيدنا
ابراهيم عليه السلام...جسّاها في سوق...والله اخدلها
علوق...داير تديني اديني...ماك داير ما تعمل لي
فيها الشعراوي.
|
Post: #4
Title: Re: هيئة علماء السودان تجوّز تقسيط وشراكة الأضحية
Author: Hadeer Alzain
Date: 10-09-2011, 03:01 PM
Parent: #2
| Quote: قال ليه انت مالك ومال جوازها... |
نزار صاحب القفشات الجميلة
الفتوة دي بالطبع بتشملكم إنتو المغتربين
مع هدوم العيد للشفع و... وو .. إلخ. الله ريحكم السنة دي
خروف واااحد تتشاركوه إنت وأصحابك وتضحوا بيهو ، وكان الله يحب المحسنين
والله فكرة جميلة .. ومباحة!
|
Post: #3
Title: Re: هيئة علماء السودان تجوّز تقسيط وشراكة الأضحية
Author: Hadeer Alzain
Date: 10-09-2011, 02:20 PM
Parent: #1
يا فقراء السودان
هيئة علماء السلطان دي كلامها وااااضح
قالت ليكم إن كنتم فقراء يغنيكم الله ، الرئيس دا ما فاضي يضحي لي فقير!!!
إتدينوا لأجل مسمى وإتشاركوا اللقمة ، هيي أقصد الضحية
و يا حبذا لو كل جارين تلاتة إنشاءالله أربعة ، يضحوا مع بعض
لمتين نحنا نقعد نعلم فيكم الحرفنة والتدبير والتوفير ..؟!
شكرآ هيئة علماء السلطان!
|
Post: #5
Title: Re: هيئة علماء السودان تجوّز تقسيط وشراكة الأضحية
Author: nazar hussien
Date: 10-09-2011, 03:14 PM
Parent: #3
Quote: نزار صاحب القفشات الجميلة
الفتوة دي بالطبع بتشملكم إنتو المغتربين
مع هدوم العيد للشفع و... وو .. إلخ. الله ريحكم السنة دي
خروف واااحد تتشاركوه إنت وأصحابك وتضحوا بيهو ، وكان الله يحب المحسنين
|
هيئة علماء السلطان ديل ...ما فاضل ليهم
الا يقولوا ليكم...كل ناس حي او حلة يتشاركوا
ويطلعوا رحلة...عيد الضحية...
ولو عصرتوا عليهم اكتر بتبرعوا ليكم بي ساوند
اها قصروا معاكم...يا شعبا تسامي..
أما نحن يا هدير...فمن زمااان فتوتنا دي مدورة..
واجرنا ثابت ...ولا احتجنا لي فتوة زي دي...
هسي يعني اضبح خروف في شقة في الطابق العشرين
واطلع شايل مصارين...وانزل شايل رأس...
بلقي العيد زاتو كمل.
|
Post: #6
Title: Re: هيئة علماء السودان تجوّز تقسيط وشراكة الأضحية
Author: اسماء الجنيد
Date: 10-09-2011, 03:16 PM
Parent: #5
كل سنة وإنتي طيبة يا حبيبة
لما لقيت رسالتك لقيت البوست نزل
قلت يا ربي النت عند هدير مالو الليلة .؟؟ اظنو بقى تابع للفتوة
ويجوز البوست والرابط برضو ينزل بالتقسيط .... والله صحى
|
Post: #16
Title: Re: هيئة علماء السودان تجوّز تقسيط وشراكة الأضحية
Author: Hadeer Alzain
Date: 10-09-2011, 05:43 PM
Parent: #6
سومتنا الحبيبة كلمي ناس بيتكم بسلامتهم بدل يضبحوا في بيت واحد
خمسة خرفان للعيد، خروف واحد (شيرنغ) كفاية .. والله صحي
ويا حبذا لو كمان مرقوا بيهو رحلة. والله صحي
Quote: اظنو بقى تابع للفتوة
ويجوز البوست والرابط برضو ينزل بالتقسيط .... |
ههه
النت مخستك عندي!! أرسل المداخلة ما تمشي، أو تمشي دبل
صفحة المنبر ذات نفسها مرات تضيع!!!
شكرآ ياغالية .. ما عدمناك يا ست الذوق
والسنة دي معيدة في مكة قولي آمين
كل سنة وإنتو والأسرة الكريمة طيبين
|
Post: #12
Title: Re: هيئة علماء السودان تجوّز تقسيط وشراكة الأضحية
Author: Hadeer Alzain
Date: 10-09-2011, 04:07 PM
Parent: #5
Quote: هيئة علماء السلطان ديل ...ما فاضل ليهم
الا يقولوا ليكم...كل ناس حي او حلة يتشاركوا
ويطلعوا رحلة...عيد الضحية...
|
تصدق وتآمن يا نزار أول ما قريت الفتوة دي ، طوالي
خطرت في بالي حكاية الرحلات دي. والله صحي. لووول
Why not
?
Quote: ولو عصرتوا عليهم كتر بتبرعوا ليكم بي ساوند
اها قصروا معاكم... يا شعبا تسامي..
|
...
يعني فتوة علماء السلطان (العاملنها من أجل السلطان دي)
بالنسبة ليكم ما فيها جديد يذكر!.
كل سنة وإنتو طيبين
|
Post: #13
Title: Re: هيئة علماء السودان تجوّز تقسيط وشراكة الأضحية
Author: Hadeer Alzain
Date: 10-09-2011, 04:07 PM
Parent: #5
مكرر
______________________________________________-
|
Post: #7
Title: Re: هيئة علماء السودان تجوّز تقسيط وشراكة الأضحية
Author: عمار عبدالله عبدالرحمن
Date: 10-09-2011, 03:18 PM
Parent: #3
سؤال
كيف نتقاسم الرأس ,,
افتونا مأجرين (ورين)
|
Post: #14
Title: Re: هيئة علماء السودان تجوّز تقسيط وشراكة الأضحية
Author: Hadeer Alzain
Date: 10-09-2011, 04:18 PM
Parent: #7
Quote: سؤال
كيف نتقاسم الرأس ,,
|
عمار زي ما إقترح نزار العيد يكون رحلات
وكل عشرة أسر في خروف .. وما يرجعوا لا بي راس
لا كوارع لا غيرو. يكملو الخروف قبلو حتى يرجعوا ..
|
Post: #15
Title: Re: هيئة علماء السودان تجوّز تقسيط وشراكة الأضحية
Author: Hadeer Alzain
Date: 10-09-2011, 04:18 PM
Parent: #7
مكرر
___________________________________
|
Post: #8
Title: Re: هيئة علماء السودان تجوّز تقسيط وشراكة الأضحية
Author: خضر الطيب
Date: 10-09-2011, 03:37 PM
Parent: #3
سلام ياهدير
ينوبك ثواب وانتى واصله مع العلماء ديل
خليهم يحللو لينا لحم الخنزير
رخيص وسمييييين
ديل حللو الربا بقت على الخنزير
انا لله , ديل جادين؟
|
Post: #9
Title: Re: هيئة علماء السودان تجوّز تقسيط وشراكة الأضحية
Author: Adam Omer
Date: 10-09-2011, 03:46 PM
Parent: #8
ديل علماء الحيض و نفاس ما عندم ســــــــــــــــــــــــــــــالفة
|
Post: #11
Title: Re: هيئة علماء السودان تجوّز تقسيط وشراكة الأضحية
Author: nazar hussien
Date: 10-09-2011, 03:52 PM
Parent: #9
Quote: سؤال
كيف نتقاسم الرأس ,,
افتونا مأجرين (ورين) |
انت من زمن الضحية فيها رأس...اتاريك قديم خلاص...
...والله صحي...
يا عمار الجلد والرأس ديل من سنة 1989 تاني مافي سوداني شافن..
|
Post: #10
Title: Re: هيئة علماء السودان تجوّز تقسيط وشراكة الأضحية
Author: محمد هشام
Date: 10-09-2011, 03:48 PM
Parent: #8
استاذ حيدر
الجماعة ديل ما بقدروا يقولوا انو النبي صلى الله عليه وسلم ضحى عن جميع المسلمين
طبعا عشان سوق الخرفان ما يقيف .. يعني مصلحتم في انو الناس تضبح اكبر عدد عشان تجيهم المرتبات كاملة
http://www.alfikra.org/book_view_a.php?book_id=164
الضحية غير واجبة!!
لا علي الفقراء!! ولا علي الأغنياء!!
الإخوان الجمهوريون
الطبعة الرابعة سبتمبر 1982 ذو القعدة 1402 هـ
|
Post: #17
Title: Re: هيئة علماء السودان تجوّز تقسيط وشراكة الأضحية
Author: Hadeer Alzain
Date: 10-09-2011, 05:55 PM
Parent: #10
الاخوة الأعزاء
خضر الطيب
Adam Omer
و محمد هشام
حتى أعود ليكم فردآ فردآ ،
أشكر لكم حضوركم ومشاركاتكم
تسلموا ..
|
Post: #18
Title: Re: هيئة علماء السودان تجوّز تقسيط وشراكة الأضحية
Author: Hadeer Alzain
Date: 10-09-2011, 09:39 PM
Parent: #17
هيئة شئون الأنصار تصدر بيانا بخصوص شراء الاضاحي في العيد
9 اكتوبر 2011م
بيان بخصوص:
شـــــــــراء الأضحــــــــــــــية
في صحيفة الصحافة الصادرة صباح اليوم بتاريخ 9 أكتوبر 2011م جاء فيها (علماء السودان) جوّزت الاستدانة والأقصاد لشراء الأضحية، وحتى يستبين الأمر تقول هيئة شئون الأنصار:
إن دين الله الإسلام تؤدى شعائره إلى الاستطاعة والدلائل في هذا الجانب تفوق حد التواتر: (فَاتَّقُوا اللَّهَ مَا اسْتَطَعْتُمْ)[1] و(وَمَا جَعَلَ عَلَيْكُمْ فِي الدِّينِ مِنْ حَرَجٍ)[2]، وجاء في الأثر:
" يَا مَعْشَرَ الشَّبَابِ مَنِ اسْتَطَاعَ مِنْكُمُ البَاءَةَ فَلْيَتَزَوَّجْ»[3]. وحتى الحج الذي هو الركن الخامس في الإسلام لا يؤدى إلاعند الاستطاعة، والأضحية هي سنة مؤكدة لكنها تؤدى عند الاستطاعة،
والذين لم يستطيعوا أداؤها فقد أداها عنهم الحبيب المصطفى صىلى الله عليه وسلم، حيث ضحى بكبشين أقرنين أملحين فقال عند ذبح الأول:
"اللهم إن هذا منك واليك اللهم إن هذا عن محمد وآل محمد بسم الله و الله اكبر،
وذبح الثاني وقال اللهم إن هذا منك واليك اللهم إن هذا عن من لم يستطع الأضحية من أمة محمد بسم الله والله اكبر"[4]،
والفقير كما عرفه الفقهاء هو الذي لا يملك قوت يومه وما أكثرهم اليوم، فلا تحزنوا ايها الفقراء فقد ضحى عنكم سيد الوجود صلى الله عليه وسلم،
أما ما اعتدنا أن نسمعه من فتاوي علماء السودان فهو لا يخرج عن دائرة العمل السياسي الذي يسند النظام، ونقول أن الظروف الاقتصادية الطاحنة التي تعيشها بلادنا تحتم على الكثيرين من أهل السودان عدم المقدرة على شراء الأضحية .. وأية عملية شراء عن طريق الأقصاد أو الاستدانة لربما ترهق المشتري وتلقي به في دائرة الغارمين وكل هذا لا يجّوزه الدين الحنيف الذي يقوم على الرحمة والسعة والاستطاعة في أداء الشعائر.
[1] سورة التغابن الآية (16)
[2] سورة إبراهيم الآية (78)
[3] رواه البخاري ومسلم
[4] رواه أبو داود
http://www.sudaneseonline.com/arabic/index.ph...%B9%D9%8A%D8%AF.html
|
Post: #19
Title: Re: هيئة علماء السودان تجوّز تقسيط وشراكة الأضحية
Author: nazar hussien
Date: 10-10-2011, 03:41 AM
Parent: #18
هسي نحن خمستاشر نفر عايزين نشتري خروف مقسط علي خمستاشر قسط
وماشين رحلة الكدرو...وما لاقين بتاع هايس او كريز يقسط لينا
حق مشوار الضحية دي...
فهل ممكن يا هيئة علماء السودان...نقسط المشوار دا كداري..
بي خروفنا...وكان الخروف مات في الدرب...هل بنعتبر نحن الخمستاشر
في زمرة المسلمين الذين ادوا سنتهم؟
في واحد في الخمستاشر ديل قال لي عليك الله اسال لي معاك ناس الهيئة
ديل...البضبح الخروف مننا لمان يتكيه يقول بسم الله...بعدها يقول
شنو؟؟ مش نحن خمستاشر؟؟؟ وهل ممكن نترامي العود لمعرفة من يضبح الخروف؟؟؟
والخروف زاتو بعد ما نقسطوا...كان في واحد مننا بعد ما ضبحناه
مشي معانا الرحلة...وضرب الشية ولعب
الكشتينة وحرق...وشتت الكشتينة وشتت ...ولما جاء مواعيد
القسط...قال لينا ...مش قلتو لي الراجل ما تديه الا دو...تريس...وابي يدينا القسط
فهل دا نعتبرو مضحي والله زميل حريق خرخار؟؟؟
|
Post: #20
Title: Re: هيئة علماء السودان تجوّز تقسيط وشراكة الأضحية
Author: ALZOLZATOO
Date: 10-10-2011, 06:22 AM
Parent: #19
ده كلو من ندى القلعة
تحياتي
زاتوووو
|
Post: #21
Title: Re: هيئة علماء السودان تجوّز تقسيط وشراكة الأضحية
Author: عادل نجيلة
Date: 10-10-2011, 06:32 AM
Parent: #20
هيئة علماء الصودان الحالية غير موثوق بها لأسباب كثيرة أهمها مولات السلطان .. والسبب الثاني أن فتاويهم لا تغدو أن تكون سوى حماية للنظام الحالي على حساب الشعب .. ولنا سوابق رمضانية و حالية .. الأحسن ألا نأخذ بأية فتوى تصدر عن هذه الهيئة..!
|
|