Post: #1
Title: نحن شعب أدمن التنظير والفشل
Author: عادل الباهي عبدالرازق
Date: 10-07-2011, 11:19 AM
كلما سرحت مع نفسي وسالتها وانا في رحله سفر وعملت مقارنة
بيننا كشعب سوداني وبقية من التقيتهم من
شعوب العالم أصل الي نتيجة واحدة نحن شعب أدمن التنظير والفشل .
تأتي الي منزل عزاء تجد
أحدهما خالف رجل فوق رجل ويتحدث بنهم عن التشكيلة المفترض
يلعب بها ريال مدريد تفتح خشمك وتستمع
لعمو عبقرينوا وبعد الانتهاء تنتكي علي أقرب شحط
وتسألوا عمك دا مدرب ولا لاعب كورة كان ؟ يضحك
ويقول ليك عمو حسنين دا لو شات ليهوا كانون ( منقد) بيجليهوا .
|
Post: #2
Title: Re: نحن شعب أدمن التنظير والفشل
Author: عادل الباهي عبدالرازق
Date: 10-07-2011, 11:20 AM
Parent: #1
تأخذك قدماك للمشاركة في مناسبة زواج وبمجرد أن
تأطا قدماك صالة المناسبة تقع عينك علي كهل مالي
جضوموا بالاكل وهاك يا تنظير في السياسة والاقتصاد
ديون الصين علي السودان والاستثمارات الماليزية
في جذر القمر والتشكيل الوزاري في مصر بعد مبارك
تقعد تستمع ليهوا تنسي نفسك بين أيديهوا وتنسي تقول
للعريس الجاتك في مالك سامحتك أول ما الفنان يقول
تصبحوا علي خير تتنهد وتقول للذي بجوارك يا الله
عمك دا موسوعة يأخي دا محاضر في أي جامعة
يصدمك طوالي بالرد عمك محجوب دا شغال ترزي
( مع أحترامي للذين يعملون في هذة المهنة الشريفة )
|
Post: #3
Title: Re: نحن شعب أدمن التنظير والفشل
Author: عادل الباهي عبدالرازق
Date: 10-07-2011, 11:22 AM
Parent: #2
تأتيك أخبار غير سارة عن مرض أحد الاصدقاء
تذهب لزيارتة بالمنزل وبعد الاطمئنان علي صحتة
تسأل ذوية الراجل دا مالو يقولوا ليك والله نفسوا
أتضايق مشي أشتري ليهوا بخاخ أزمة وأستعملوا
نسي أو تناسي أن أزمتة الحقيقية يادوب بدأت. يأخي
في مليون نوع بخاخ لو أي زول بيشخص
مرضوا وتوش بيمشي يشتري الدواء من الصيدلية
طيب فائدة كليه الطب شنو ما أحسن الاطباء
يشوفوا ليهم شغلانية تانية .
|
Post: #4
Title: Re: نحن شعب أدمن التنظير والفشل
Author: عادل الباهي عبدالرازق
Date: 10-07-2011, 11:26 AM
Parent: #3
عند مدخل أي حي تجد الشباب قاعدين تحت عمدان الكهرباء
وضل الشجر كل واحد متوهط فوق حذائيه
زي الجراد يتشمشروا في الماشي والجاي تسألهم
مالكم حارسين ليكم جثمان غريق يقولوا ليك نحن الخريجين
منتظرين الدوله توفر فرص العمل طيب ما الدنيا كلها
عارفا سوق العمل عاضي بدل قعاد الضلله دا ما تمشي
تشتغل أنشاءالله طلبه في أي مبني الي حين يأتي الفرج
هو العمل الشريف عيب يقول ليك البرستيج بتاعي
مابيسمح . والغريبة يكمل قعادوا يزح من ضل الي
ضل ويرجع بدون خجلة يكورك يا امي الفطور جاهز؟
يأخي تأكل السم وكمان عندك نفس فاتحه عشان تلهط؟
|
Post: #5
Title: Re: نحن شعب أدمن التنظير والفشل
Author: عادل الباهي عبدالرازق
Date: 10-07-2011, 11:29 AM
Parent: #4
أي أنسان راحتوا في بيتوا. كل العالم دا مافي زول بيقتحم
عليك خصوصيتك دي الا بموعد مسبق وفي زمن
معلوم لديك الا نحنا . تكون قاعد في آمان الله
عاوز تنوم ولاعاوز تقلب الهوبه تسمع كوكوكو في الباب
تقوم
مخلوع تفتح تشوف ليك شبح قدامك يبوظ عليك برنامج اليوم
كلو وفي نوعية كده بترفع ضغط الدم تجيك مكالمة
هاتفية تخلص منها طوالي يشبكك كنت بتتكلم مع منو ؟
تجهز الغداء بعد صلاة العصر مباشرة عشان يديك عرض
أكتافوا ويوريك جمال خطواتوا يقوم من صفره الغداء
تقول الحمدلله حيتخارج يتمغي ويترع ويكورك ياولد أمليء لي
الابريق موية عشان أتجهز للمغرب ويكون المغرب لسع
عليهوا ثلاثة ساعات أها النوعية دي بتصيبك باحباط
ويجيك شلل أطفال وترجع ليك الم الشاكوش اليهوا سنتين .
نواصل
|
Post: #6
Title: Re: نحن شعب أدمن التنظير والفشل
Author: عبداللطيف محجوب
Date: 10-07-2011, 11:32 AM
Parent: #1
التنظير نعّم، الفشل لأ .. الشعب السوداني عمره ما أدمن الفشل!
|
Post: #7
Title: Re: نحن شعب أدمن التنظير والفشل
Author: عادل الباهي عبدالرازق
Date: 10-07-2011, 12:08 PM
Parent: #6
| Quote: التنظير نعّم، الفشل لأ .. الشعب السوداني عمره ما أدمن الفشل! |
العزيز عبداللطيف
حياك الله وجمعة مباركة
ياحبيب الفشل دا كيف؟ سياسياالفشل ملازمنا منذ الاستقلال
رياضيا براك شائف ، أقتصاديا حدث ولا حرج مافي مجال واحد
نحن ولجنا فيهوا وحققنا شيء دائما لكل فشل عندنا شماعة.
شكري وتقديري لمرورك
|
Post: #8
Title: Re: نحن شعب أدمن التنظير والفشل
Author: Abdulrahman Gorashi
Date: 10-07-2011, 12:36 PM
Parent: #7
Quote: التنظير نعّم، الفشل لأ .. الشعب السوداني عمره ما أدمن الفشل
|
يازول كيف الكلام دا، والسودان غير الفشل فيهو شنو، من كثرة الفشل في السودان الناس ذاتهم بقي عندهم فشل كلوي.
إدمان الفشل، ومنو غيركم ادمن الفشل؟ ياخي لو الفشل عندو اسم تاني في اللغة أكيد حيكون اسمو السودان.
|
|