الى ود الصائم وهارون دياب مع التحية بخصوص اللوتري

اول حاجة السلام عليكم
تاني حاجة
كدى الليلة داير منكم طلب بسيط

وبالمناسبة الطلب ما ليكم براكم، الطلب لكل من سيقرأ التالي ويجد ان المكتوب ينطبق عليه

اطلب منكم بعد ان ينتهي هذا اليوم ولما تلزموا السرير للنوم كل واحد فيكم يعد اصابعه ويتأكد انهن عشرة (اصابع الكرعين ما معانا لانكم ما حتاحتجوهن) ويقعد يعد في الناس البعرفهم شخصياً او سمع من زول ساهي عنهم حتى لو كان(الحديث ضعيف او موضوع) انه الدكتور الفلاني او المهندس الفلاني او الزول المبسوط داك او زول راكببرادو او زول شغال في شغلة محترمة(مع دعائي لكما بحفظ النعمة ودوامها) ياتو واحد من ديل قبل كدا فاز في لوتري؟
فتحين عليكم الله زي ما تبقوا لينا زي الشاعر داك الكره باندويث بكري العيشة لمن كره فيهو بخاري وتبقوا زيو وتجهجوا لينا باكات كمبيوتر الفرز بتاع الامريكان.
اللوترى دا للناس المساكين المالاقين شغلة في بلدهم او الشغالين في شغلات متوسطة او منخفضة الدخل، وللناس الكابسوا الاغتراب لمن زهجوا وعروقهم اتشحطت ونشفوا وعدموا اللحمة والعضم وكثير جداً من المختارين حسب ما اسمع ناس كانو يبحثوا عن عمل ولم يوفقوا في العمل فوفقهم الله في اللوتري ووالله من ما سمعت باللوتري ما سمعت لي زول فاز في التقديم التاني او التالت او الرابع ودونكم صاحبي الشغال مع امير ومبسوط 100% وهو متقدم للسنة الثالثة عشر على التوالي (قرب يلحق الانقاذ) .
تحين يا جماعة الكلام ليكم كلكم، وكمان ياريت اخوانا القاديننا بامريكا وامريكا واسرائيل ديل برضوا ما يقدكوا، هم ناس كارهينها ماشين يسوو فيها شنو؟
السنة دي التقديم ممنوع للبنغالة وديل براهم اكتر من 70 مليون يعني فرصة كبيرة.
اما نصيحتي لكما وارجو الا تعملوا بها وهي الانضمام الى احدى الفئات المذكورة اعلاه من المحاظيظ والا فابشر بطول سلامة يا لوتري.
انا شخصياً قاعد افكر هسي، معقول من وسط القيامة دي كلها انا البشيل العشرة تتو؟ قريشات الصور ديل لو صرفت بيهم الشفع ابرك لي من اللوتري.
موفقين ان شاء الله وان شاء التلاتة نقوم في طيارة واحدة على اف جون كنيدي قولوا امين ولا غيرتوا رايكم؟