الأبعاد النفسية والاجتماعية والسياسية في الاعتداءات البريرية !!

أقول ليكم حاجة مهمة في زمن فلسفة الحاجات والماجات
خاصة في السنوات الانقاذية
يعني اي نملة تتحرك في الحقبة الاسلاموية
تكون عندها ابعادها ودلالاتها المرئية وغير المرئية لهذه (الحركة )
وهل هي حركة ساي ام تقف ورائها اجندة خارجية
الهزيمة الهلالية الاخيرة فقط لا تحتاج الي اي فلسفة وتفكير
سيما اذا نظرنا اليها بموضوعية فنية :-
فريق منغمس في المحلية
وهو يقارب علي اكمال المئوية
لاعبون قاربوا الاربعينية
وتسجيلات ماسورية
نفخة اعلامية
بطولات توهمية
احلام وردية وحاجات كدا حامياني
كما تقول العبارة البونييه

بس يا جماعة االبونية دي دايرة قراية
واستخلاصات واقعية وشوف بالعين التالتة


نبدأ بالنفسية
في نظرية اسمها الفطرة
هي نظرية انا ما متأكد منها

النظرية بتقوم علي التعود
الشافع مما قام بلقي اهلو مسلمين
يعني هو مسلم
اسرتو يهودية
ديانتو تبقي شنو ؟
يهودية
بياكلو ويكة
هو ويكابي
بياكلو قراصة هو قراصابي
بياكلو كول هو كولابي

اها

الهلال في البطولة الافريقية
دي بالذات
اتعود
الشوط الاول جييت ضربة جزاء
بطريقة غير شرعية
سا سا سا دومبا شوت
قوون
الشوط الاول ما انتهي جييت
كرت احمر ضد احد لاعبي الخصم
اها دي تلاتة نقاط لحدي ما وصل المرحلة دي
طبعا الجماعة اتعودوا و انفطروا
جات مبارة الترجي
معقول شوط كامل
لا ضربة جزاء
لا قوون هدية
لا لاعب يطرد
كمان هدف جوة شبكة المعز
هذه المعطيات ربما تكون طرحت سؤالا في العقلية الهلالية
بل دخلت الي العقل الباطن للبرير
ولم يستطع اسستيعابها وتصديق ما يجري في المقبرة

جييت الشوط الاول فنش
وما حدث كانت ضد طبيعة الاشياء ومساراتها

تحرك البرير بطريقة فطرية نحو الحكم
وقام انفطر فيهو وعينك ما تشوف الا النور
اها بنجوكم بعد شوية وشوف تاني

قرينا واستخلصنا الابعاد النفسية في التصرفات البربرية
نشوف البعد الاجتماعي
طبعا الزول دا ملقب بالكيماوي
وكان جمهور الهلال بهتف ليه طوالي
بالكيماوي يا برير
بالكيماوي يا برير
شتت الطير يابرير
شتت الطير يا برير
موش الجمهور براو الاعلام ذاتو
وطبعا هو عندو اعلامو
انتو عارفين الكلام دا
اها اعلامو دا نفخوا نفخ شديد
هذا الاعلام لايتحدث كثيراً عن حاجاتو
ومؤهلاتو الفكرية
او رؤيتو الادارية
بس مركز ليك في حته واحدة
قوتو الشخصية
وهاك يا نفخ
اوف اووف اوووف اووووووف
وهاك يا نفخ
اوووووووووووووووووووف
امكن بقي شايف نفسو كبير
يضرب يمين شمال
مرة صحفي
مرة اداري
مرة شوت لفظي
ومرة في المقصورة
الاهم ما في اي رادع يخليهو المرة الجاية افكر الف مرة
بهذا المعطي الدلالي المجتمعي واسقاطاته يمكن استنباط وواستخلاص
الMotives بتاعتو في عملتو
وهي دوافع واسباب ادت به الي البحث عن قوة اثبات لما يقال عنه من قوة
فكانت تلك القوة هي القوة الجسمانية العضلية اللفتية
تجاه الصافرة الجزائرية
لكن لماذا لجا الي استخدام القوة هذا سيقودنا الي الانتقال توش للحديث عن الابعاد السياسية للاعتداء

فاصل ونواصل

الابعاد السياسية هي طبعا قرايتا واضحة
ومن زاوية واحدة
من تلاتين يونيو تسعة وتمانين
اي شئ بالقوة والرجالة
طبعا ما احترامنا للجندرية
حزب شال السلطة بالقوة
ورئيسو قال شيلناها بالقوة
الدايرا اجي يشيلا بالقوة
المعارضة ما كضبت
شالت سلاح ودايره ترجعا بالقوة
الحكومة بتفاوض الناس بالقوة
القلم في السودان يحاربو بالقوة
الجبايات بشيلوها قوة
المظاهرات السلمية
الحركات المطلبية
اي شئ بقي همبتة وقوة
الشعب تاثر علي الناس
طفل في الاساس باخد حقو من استاذو
قوة
طالب بقتل زميلو قوة
ناس دايرة تمارس جنس قوة
مالكم اتلفتو
ما بتعرفوا عدد حالات الاغتصاب في البلد دي وصل وين
القوة بقت ثقافة
والقوي بياكل الضعيف
واذا نظرنا بعمق الي مصادر القوة في السودان نجد
ان البونية عنصر مهم
ولها جملة من التجارب
واستطعنا نحن معاشر السودان تصديرها الي الخارج
حيث شهدت كندا البونية المشهورة في وجه عراب الانقاذ
الترابي
وصدرناها هذا العام الي لندن
بونيه في وجه نافع علي نافع
هذا غير الكثير من البونيات المحلية
طيب بعد دا كلو نخرج بخلاصة واضحة بتقول
ان الامين البرير جزء من هذه النسيج ويتأثر به كما يتاثر الجميع وليس هو استثناءً
صاح ام لا
الاهم في هذه النقطة ان الامين البرير علي ما اعتقد عمرو صغير
وقضي جله في هذه السنوات الانقاذية
حتي الحكم الجزائري عرف الحقيقة دي
قال شاب صغير
يعني ما حضر زمن التسامح
وهذا لا يعفية من الجرم
لكن بنقول بوضوح ان ثقافة العنف اللفظي والجسدي هي المتهم الاول
اها يا يا اخوان واخوات دا انا حدود شوفي للموضوع دا داير اشوف شوفن تاني وقرايات تانية