Post: #1
Title: من وحي الحادثة ، سوداني يبتكر حلول ناجعة لضمان نزول اطارات الطائرات
Author: محمد ابراهيم قرض
Date: 10-04-2011, 04:19 PM
Parent: #0
كل من يعرف ، أو كانت له صلة بعائلتنا-العائلة القرضية (Family Garadaiacea) ،
لابد وقد لمس بأم أعينه فضيلة التواضع المأهولة التي يتمتع بها أفراد هذه العائلة ،
حماها الله من الإنغراض ...
وشخصي الضعيف الذي ينتمي لهذه العائلة المباركة ، ليس بإستثناء في
تلكم الفضيلة الرفيعة التي يخص بها المولى من رحم من عباده الأتقياء
الأنقياء الصالحين ...
أقول ذلك ، ولاشك لي أن الكثير من أبناء جلدتي لم يعلموا بعد عن نبأ
إستدعاء وكالة ناسا مؤخرا لشخصنا الضعيف وعن مكوثنا معهم لمدة
خمسة أيام كاملة غير منقوصة (رجعت أمس بس من أمريكا).
وإذا عرف السبب ، بطل العجب .. ما العجب حبيبي ...
والسبب هو أن محسوبكم المتواضع لله (down to earth) قد تمكن
مؤخرا من إبتكار حلول ناجعة لضمان نزول إطارات الطائرات بصورة
مضمونة وميسرة ، فلا يتعرض الكباتن والركاب بعدها للمخاطر
والنزول على الرغوة الفاسدة (rotten foam) ...
ولقد نالت هذه الحلول العبقرية اعجاب الفرنجة و الأمريكان مما جعلني
أحصل منهم على براءة إختراع منهم (أنزل لكم صور الاحتفال لاحقا) ،
وطبعا ده بعد ما جربوها وتأكد لهم نجاعتها وإرتكازها على أساس
علمي متيييييين .....
الحل الأول كان على النحو التالي:
-مش الطيارة لامن تتهيأ للقيام بتكون في الأول واقفة على كل عجلاتها السليمة تماما ؟؟؟
-مش بعداك بتتحرك في الممر وتزيد تدريجيا من سرعتها لغاية ما تطير ؟؟؟؟
-مش لامن تطير بتكون لسع عجلاتها مارقات لي برا ؟؟؟؟
-مش الكباتن الغبيانين ديل هم البيتفلسفوا وبراهم يدخلوها في جحورها بعد استقرار الطائرة في الفضاء ؟؟؟؟
-أها ده الغلط ذاتوا .... ليه مدخلنها ؟؟؟ عشان بعدين يكوسوها ما يلقوها ؟؟؟؟؟
-ليه ما يخلوها نازلة زي ماهي طيلة مسافة الطيران وهكذا نتجنب مخاطر العجلات أبت تنزل ؟؟؟؟؟
وهكذا اعتمد الفرنجة والأمريكان هذا الحل العبقري الناجع الذي يقضي بأن
تظل عجلات الطيارة مارقة من لحظة قيامها ولحين لحظة وصولها
لمحطة الوصول ....
ما شفتوا تصفيق الفرنجة والأمريكان كان كيف ...
الصور تأتي لاحقا ومعها الحل الناجع رقم 2 !!!!!!!!!!!!!
|
Post: #2
Title: Re: من وحي الحادثة ، سوداني يبتكر حلول ناجعة لضمان نزول اطارات الطائرا
Author: Deng
Date: 10-04-2011, 04:24 PM
Parent: #1
سلامات يا قرض.
خيل لي المنظر ده انا شفتو في طيارات الرش الصغيرة.
ودي طيارات هبوطها مضمون وفي أي مكان وحتى لو كان في حقل القمح ذاتو.
|
Post: #5
Title: Re: من وحي الحادثة ، سوداني يبتكر حلول ناجعة لضمان نزول اطارات الطائرا
Author: محمد ابراهيم قرض
Date: 10-04-2011, 05:41 PM
Parent: #2
Quote: سلامات يا قرض.
خيل لي المنظر ده انا شفتو في طيارات الرش الصغيرة.
ودي طيارات هبوطها مضمون وفي أي مكان وحتى لو كان في حقل القمح ذاتو. |
سلام مربع يا دينق ..
ماهو طيارات الرش دي أنا كنت
جربت فيها اختراعي ده قبل ظهوره
للعلن ليحدث ما أحدث من ضجة !!!
حتى عندي جوز اطارات منها
في البت !!
|
Post: #3
Title: Re: من وحي الحادثة ، سوداني يبتكر حلول ناجعة لضمان نزول اطارات الطائرا
Author: فايزودالقاضي
Date: 10-04-2011, 04:28 PM
Parent: #1
الحل الانجع ياقرض انها ماتطير عشان ماتقع ...
حقوق عدم الطيران محفوظة لي براى ..
ـــــــــــــــــ
توجد صورة للطيارة قبل ان تطير واخرى قبل ان تقع ..
|
Post: #4
Title: Re: من وحي الحادثة ، سوداني يبتكر حلول ناجعة لضمان نزول اطارات الطائرا
Author: بشير أحمد
Date: 10-04-2011, 05:10 PM
Parent: #3
ياقرض
تحياتي؛؛؛
اظن دخول العجلات مازي خروجا؛
يتم ادخال العجلات اثناء الرحله اعتقد والله اعلم لتفادي الضغط الجوي
وعوامل الطقس الاخري
ايضا سرعة الطائرة ح تتاثر وكرعيها قاعدات في السهلة
غايتو...
ح انتظر اخونا ابراهيم عدلان
وينورنا بالاختراع بتاعك ده.
|
Post: #7
Title: Re: من وحي الحادثة ، سوداني يبتكر حلول ناجعة لضمان نزول اطارات الطائرا
Author: محمد ابراهيم قرض
Date: 10-04-2011, 05:48 PM
Parent: #4
Quote: اظن دخول العجلات مازي خروجا؛
يتم ادخال العجلات اثناء الرحله اعتقد والله اعلم لتفادي الضغط الجوي
وعوامل الطقس الاخري
ايضا سرعة الطائرة ح تتاثر وكرعيها قاعدات في السهلة |
جنس حسادة عليك يا بشير ود احمد ..
كان كلامك ده صحي ، الأمريكان ما كانوا
أدوني براية الإختراع
بطلي بري يا بشير
للكنه برضه سير سير !!!!
|
Post: #6
Title: Re: من وحي الحادثة ، سوداني يبتكر حلول ناجعة لضمان نزول اطارات الطائرا
Author: محمد ابراهيم قرض
Date: 10-04-2011, 05:43 PM
Parent: #3
| Quote: الحل الانجع ياقرض انها ماتطير عشان ماتقع ... |
التطير عيشتها ياود القاضي ..
هي طايرة ماشية وين ؟؟؟!!
بس حلك ده ما بينفع مع الأمريكان !!!
|
Post: #8
Title: Re: من وحي الحادثة ، سوداني يبتكر حلول ناجعة لضمان نزول اطارات الطائرا
Author: محمد ابراهيم قرض
Date: 10-12-2011, 02:06 PM
Parent: #6
والحل التاني والذي أيضا نال براية إختراع من الأمريكان
هو ما أطلقت عليه إسم الحربة الذكية (Smart Spear – SS) ، وهي
عبارة عن حربة رشيقة ، تحمل على طرفها العلوي المدبب
شريحة مبرمجة (Chip) لا يملك حل شفرتها سوى محسوبكم
الضعيف ...
وهذه الحربة الذكية "تصرف" للكابتن كعهدة شخصية عند
تخرجه على أن يلتزم بحملها معه عند ذهابه للعمل ، وحتى
في حالة تواجده خارج نطاق العمل كأن يكون قد ذهب لسماية
أو فراش عزاء أو حفلة زواج والذي منه ...
هذه الحربة الذكية ، ما أن تعصلج العجلات وترفض النزول
الى الأرض ، حتى يدخلها الكابتن عبر ممر سري يوجد بكابينة
القيادة ، وبدوسة واحدة على الذر المخصص تتفك جميع أشكال
العصلجات وتنزل العجلات اللعينة صاغرة حسيرة ....
|
Post: #9
Title: Re: من وحي الحادثة ، سوداني يبتكر حلول ناجعة لضمان نزول اطارات الطائرا
Author: محمد الكامل عبد الحليم
Date: 10-14-2011, 06:02 AM
تحية... طالما حضرتك منهمك في ايجاد مخرج من مثل هذه االمأزق الجوية بما تملك من خيال(علمي) تستطيع ايضا بما نتوسمه فيكم من اعجاز ايجاد تطعيم مشفر يوضع في المقصورة الامامية للطائرة يكون له خاصية التنبؤ والمعالجة في ان..
ونترك لك ايجاد وتركيب الخواص بما يكفل تحقيق الانجاز العلمي...(مين عارف.).او (عسي او لعل.).. بين الاقواس هي بعض الجزيئات اللازمة في التركيب المشفر تبرعا من الفقير الي الله لزوم شحذ الهمم...
|
Post: #10
Title: Re: من وحي الحادثة ، سوداني يبتكر حلول ناجعة لضمان نزول اطارات الطائرا
Author: MOHAMMED ELSHEIKH
Date: 10-14-2011, 06:26 AM
Parent: #9
هلا بالمخترع قرض حبيبنا السابق بمسقط ونأمل ان تكون بخير.
هل ممكن تشاركني/ اشاركك في براية الأقتراع؟ الواحد طبعا براي خالص(بتشديد الر).
طيب ...
حسنا...
يقومو يعملو في السطوح بتاع الطيارة مروحة بتاعت هلوكوبتر(طائرة حوامة أو سمتية)-ترجمة حلوة-.
اها...
أول ما العجلات يعصلجن(بكسر الجيم الشايقية) يقومو يبطلو المكنات ويشغلو المروحة السمتية .
طبعا الطيارة ممكن تقيف في الهوا وبراحة يشوفو ليهم موية ولا زراعة ولا مرتبة كبيرة (يحضروها ناس الدفاع المدني)
والطيارة تنزل براااحة.
اها شنو ليك؟؟؟
ود الشيخ
الغبرة-ابها- فتوار
|
Post: #11
Title: Re: من وحي الحادثة ، سوداني يبتكر حلول ناجعة لضمان نزول اطارات الطائرا
Author: صديق الموج
Date: 10-14-2011, 07:06 AM
Parent: #10
قرض ازيك ياخى
شايفكم ما قلتوا يركبوا اربعه لساتك كان فشلن الاتنين
يشغلو الاتنين الاسبير،واللا يركبوا عشرة لساتك تمانيه وراء
واتنين قدام مادام هى تلاته بنزلنها.
والشى دى بطنها طويله تشيل اكتر من عشرة لساتك..
يعنى كان استفادوا من حكمة خلقة شطور الكـ ـلبة الوالدة وركبوا
ليها لساتك بى جاى وبى جاى زى شطورهاالله بحاسبن؟؟
الناس ديل بدل يخلو الزول تحت رحمة الفوم الزى حق الحلاقه
فيها يزلقها وفيها لا بس يشوفو الكــ لبة الوالدة..
قرض براياتى ديل كان مشن قسم الحلال والبلال،،،،
|
Post: #12
Title: Re: من وحي الحادثة ، سوداني يبتكر حلول ناجعة لضمان نزول اطارات الطائرا
Author: jini
Date: 10-14-2011, 04:20 PM
Parent: #11
وبالعدم يضيفوا ليهم بنشرجي فى الطيارة ضمن الطاقم
جني
|
Post: #13
Title: Re: من وحي الحادثة ، سوداني يبتكر حلول ناجعة لضمان نزول اطارات الطائرا
Author: تبارك شيخ الدين جبريل
Date: 10-14-2011, 04:34 PM
Parent: #12
الصور ... أين صور الإحتفالات؟
... المهم ....
|
Post: #14
Title: Re: من وحي الحادثة ، سوداني يبتكر حلول ناجعة لضمان نزول اطارات الطائرا
Author: Nazik Eltayeb
Date: 10-14-2011, 09:20 PM
Parent: #13
التحية للمخترع قرض انت فعلا فخر للسودان
لكن انا شايفة فكرة ود الموج (اضافة مزيد من العجلات الجريواتية من جريو وهو ود.... البكري قال ما يتسماش ) والمعدلة بواسطة جني باضافة البنشرجي) عملية اكتر
لكن برضو ممكن جزء من العجلات تعصلج
اها هنا نمشي لاختراع اخونا محمد الشيخ
أول ما العجلات يعصلجن يقومو يبطلو المكنات ويشغلو المروحة السمتية .
طبعا الطيارة ممكن تقيف في الهوا وبراحة يشوفو ليهم موية ولا زراعة ولا مرتبة كبيرة (يحضروها ناس الدفاع المدني)
والطيارة تنزل براااحة.
دا ممكن يكون تمام
لكن نعدلة بضافة الحبال (السر كلو في في الحبال) ...يكون في كل طيارة ود خفيف و لفيف من بتاعين الاكروبات المدربين يربطوه بحبل ويطلع بالشباك و شايل معاه العدة في الابرول يمشي يطلعها بالغصب يطلع روحها المدسية ليها شنو ودا وقت اضراب.
الفكرة مستوحاة من السباحة في الفضاء (انا ما عارفة ناس ناسا الدعوك خمسة يوم ديل ما فكرو فيها ليه)
حقيقي يدي الحلق للماعندو اضان
|
Post: #15
Title: Re: من وحي الحادثة ، سوداني يبتكر حلول ناجعة لضمان نزول اطارات الطائرا
Author: Abdulrahman Gorashi
Date: 10-14-2011, 09:33 PM
Parent: #14
أنتو دحين الشغل دا بتاع ناس بونج واير بص ولا ناس ناسا؟
ناسا دي شغل فضاء ساكت وباين لي عزمو أخونا قرض دا كان ممكن يقرض ليهم المريخ ساكت.
|
Post: #16
Title: Re: من وحي الحادثة ، سوداني يبتكر حلول ناجعة لضمان نزول اطارات الطائرا
Author: تبارك شيخ الدين جبريل
Date: 10-14-2011, 09:48 PM
Parent: #15
دق بيها الواطا ... يمكن تفتح معاك ...
... المهم ....
|
|