Post: #1
Title: أحلام مراهن
Author: Al Sunda
Date: 10-04-2011, 09:52 AM
أحلام مراهن
من قصائد المرحوم برير حمزة خلف الله ( الجيلي الثانوية الثلاثاء 15/2/1972 ) :
أحلام كتبها المرحوم برير حمزة خلف الله (*) وجدتها ضمن اوراق قديمة
الكلمات كتبها ابان دراسته بمدرسة الجيلي الثانوية في سبعينيات القرن الماضي
وايامها كان التوت والرهان على التوت ( والمقصود " توتو كورة ") املا لتحقيق احلام الشيب والشباب وكان البرير واحد من هؤلاء المؤملين في ضربة التوت
ولعل جيل ذلك الزمان يتذكر ليلة الخميس وتثبيت فريق وتعويم فريق آخر والاتصالات بين الاقاليم والخرطوم وخبراء التوت والترشيحات ................. الخ وأكشاك توتو كوره بأنوارها الساطعه وزحمة الخميس
فقد كانت ليلة الخميس في الخرطوم في تلك الايام اشبه بليلة خم الرماد قبل رمضان في ذلك الزمان ايضاً فالخميس كان اليوم الاخير لتسليم كبونات التوت للدخول في سباق الرهان .
(*) الشهيد البرير حمزة خلف الله ( إستشهد غرقاً في في حلة أبوحليمة- منطقة الجيلي في أكتوبر 1973 ) وتزاملنا مع الشهيد بكلية الاقتصاد بجامعة الخرطوم وعشنا في داخلية القرشي ضمن صحبة فارقنا فيها البرير من السنة الثانية.) جاء إلى الجامعة بموهبة شعرية طاغية فقد كان يقرض الشعر وهو في الثانوي وجاء إلى الجامعة شاعر ، محبا للشعر وللادب ولصوت وشاعرية ليلى المغربي (نجمة تلك الايام في الإذاعة والتلفزين – يرحمها الله) ولم يمهله القدر للتبحر فقد اختطفه البحر في يوم رمضاني في اكتوبر عام 1973 . الف رحمه ونور تنزل عليه
-------------
أحلام مراهن
والله يا أحلى البنوت
أنا لوكسبت التوت
كان طرت عانقت الشفق
وغزلت ليك عنقود مبهرج من نبق
ونسجت ليك الثوب
ياشدرة اللالوب
ورسمتك فوق الجروف
فوق الصفق
آه لوكسبت التوت
كنت عمرت ليك بيوت
قبال أموت
فوق القمر
ويغار القمر
وتحتار فيك الشمس
وتذكري يا شدرة اللالوب
الكان أمس
بيملأ في ورقة التوت
آه لوكسبت التوت
كنت نزلت الشعاع
غزلت لي فساتينك خيوط
ياشدرة التوت
كنت وسدتك الآلاف
وكنت عانقتك حقيقة
لا وهم ولا أطياف
آه لوكسبت التوت يا أحلى البنات
يا قصيبة السكر يا حلم الليلات
وهتفنا للمشروع والناس ورانا جموع
يلوحوا بالتذاكر
عشان زينا يشجعوا المشروع
ونمشي يا حلوة لي دار الإذاعة
ونعلن تبرعنا لي كل الجماعة
ألف جنيه للسلم التعليمي
وتدفعي يا ست البنات
لي أسر الشهداء تلات ميات
وخمسة لمحاربة العطش
ولمان نعود تقعدي تملي في التذاكر
من المغيب إلى الدغش
وندفع عشرة جنيه
لود أبو الحسن
كان من سنين مسكين
يصارع في الزمن
لكنه لا شاف لا لقا
غير الدموع غير الشقا
كان يتمنى لو يشارك
لكنه عدمان الريال واليوم أصبح بعيد
ودتو الوزارة لي السيال
عشان يعلم الأطفال
كلمناه يشتري عشرة تذاكر
لو حظوا يضرب ويكسب الآلاف
ويحرق ملايين السجاير
ويشيد قصور في قرية السيال
ويتهنى بي بت الحلال
آه يا أحلى البنوت
آه لو كسبت التوت
كنت أهديت ليك النجوم
وفرشت تحت قدميك الغيوم
تستاهلى
يا عرق اللوبه التبر
تستاهلي يا ضو النجوم
يا وجه القمر
تستاهلي أهدي ليك خمستاشر عمود
مليانة مفرهدة بالوعود
تستاهلي يا وجه القمر
لو أزف ليك أجمل خبر
لكن آه لو كسبت التوت
يا أحلى البنوت يا طعم الحلا
ياقش الخلا
يابرش الصلاة
آه لو كسبت التوت
|
Post: #2
Title: Re: أحلام مراهن
Author: Al Sunda
Date: 10-04-2011, 10:40 AM
Parent: #1
وفي سنة البرلمة وبعد النتائج
كتب شعرا حلمنتيشيا فقال
عشان خاطر ملحقين حلوين
جابونا عز الصيف وقبل الناس
شايلين شقاوة الدنيا في العينين
وبقينا موضوع ونسه عند الناس
وكلام يسوي وجع الرأس
أسمع ، ناس الملاحق وين ساكنين
في بركة
في جبل مرة في الطابق الرابع
يطير الماس ويغطس في السما السابع
ولمان جونا
سألونا كيف عاملين
ونحن شايلين شقاوة الدنيا في العينين
وقالوا لينا بالغتوا
يا أخوانا كيف ملحقتوا
والله يعني ربتوا
|
Post: #3
Title: Re: أحلام مراهن
Author: معاوية عبيد الصائم
Date: 10-26-2011, 05:40 PM
Parent: #1
Quote: ونعلن تبرعنا لي كل الجماعة
ألف جنيه للسلم التعليمي
وتدفعي يا ست البنات
لي أسر الشهداء تلات ميات
وخمسة لمحاربة العطش
|
مساء الخيرات يا مواطن
|
Post: #4
Title: Re: أحلام مراهن
Author: طارق الكوتش
Date: 10-26-2011, 05:45 PM
Parent: #3
Quote: والله يا أحلى البنوت
أنا لوكسبت التوت
كان طرت عانقت الشفق
وغزلت ليك عنقود مبهرج من نبق
ونسجت ليك الثوب
ياشدرة اللالوب
ورسمتك فوق الجروف
فوق الصفق |
ياالله ... كلام سمح
سمح شديد .......
سلامات يا سندا
|
|