Post: #1
Title: ميدان محطة السكة حديد و الشعب يريد....
Author: عمار محمد ادم
Date: 10-02-2011, 08:00 PM
Parent: #0
بعد ان ازالوا بيوت السكة الحديد بمحطة الخرطوم الرئيسة اصبحت هناك مساحة واسعة تنتشر فيها اشجار النيم والشعب يريد السكة حدييد ( ولادمع فى هذا المكان ولا انين ولا جراح ** لكنما نار واصرار وعزم واجتياح)
السكة لرجال السكة حدييد ومنهم ابى منهم تشربنا معانى الثورة والنضال ومنهم تعلمنا كراهية الظلم والقهر والاضطهاد وعلى ايدهم تربينا وعلى الدرب نسير لن ترهبنا ألة القمع نخن ابناء الشهداء ورفقائهم وندرك ان هذا الشعب اقوى واكبر مما كان العقل يتصور والمجد للشهداء والمجد للثوار والمجد للايمان قاد الشعب فى اليوم الر ههيييييييييييييييب.
|
Post: #2
Title: Re: ميدان محطة السكة حديد و الشعب يريد....
Author: عمار محمد ادم
Date: 10-02-2011, 08:12 PM
Parent: #1
المحطات
والمسافات
والقطر
والمبادى البين ضلوعى
النقابات والنضالات والسفر
دا البحدد ليا نوعى
دا البحقق لياذاتى
ودا البيروى ليل ظماى
ودا البيشبع ليا جوعى
قالوا ثورى
قلت ايوا كمان شيوعى
يانضالات ردى روحى
وبى حقيقة امرى بوحى
ابقى بلسم لى جروحى
ولى الشفيع المات معلق
دام حزنى وطال نوحى
يبقى ملهم فى الجنوب
ويبقى معلم فى الشمال
وفاطنة فاقت كم رجال
فاطنة يا ام النضال
السترة والعيشة الحلال
والمشاوير الطوال
واروى ياقطر الشرق
زول يناضل وينشنق
الشفيع جوزيف قرنق
يحيا فينا وما انشنق
انت مامشنوق وحيد
انت يا اروع شهيد
انت يا جبل الحديد
والله ماهزتك ريح
انت يا انبل مسيح
ابقى ارقد واستريح
وابقى فى الشوق والحنين
لى الرجال قاسم امين
يوسف حسين
انتو يااشجع رجال
تملوها عزا الف عين
صوتها صفارة القطر
صنٌُ اضنى صن
انا دمعى جارى
وقلبى حن
للمبادى وللوطن
وابقى غارق فى الحزن
فى متاهات الزمن
قاصدوا كهفك ياحراء
ليها قاصد عطبرة
اقوى كلمة معبرة
ولى ابوى المعذرة
الجسد فى المقبرة
والروح تحلق فى الذرى
والمناضل مابيموت
يحيا فى كل القلوب
ويبقى فى كل البيوت
وسط الورش مليان زيوت
ونحنا النضال فيناانغرس
صوت النضال فينا انحبس
حب النضال داسنو دس
داير النضال راجلا كلس
عمار مخمد ادم
ــــــــــــــــــــــ
|
Post: #3
Title: Re: ميدان محطة السكة حديد و الشعب يريد....
Author: عمار محمد ادم
Date: 10-02-2011, 08:55 PM
Parent: #2
عاش نضال الطبقة العاملة...
وعاش كفاح السكة حديد..
.وصوت القطر الصفَر ودوَر..
.والكمسارى بيرفع بيرق مرات اخضر ومرات احمر.
.ومرَ قطرنا ادوه التابليت...بالشباك اتجلى المنظر...
وجه مزارع جارى مغبَر..
.والواسوق جاريهو تركتر.
..مصنع غزل ومصنع سكر..
.ونهتف من اعماقنا بدمع تحدر.
..عاش كفاح الطبقة العاملة
وعاش نضال افريقيا الحرة.
..لن تحكمنا الراسمالية والافات الجات من بره .
..وصوت الديزل الهادر وماشى ومابيتوقف ..
.واصل الفكر الثورى مبادى وما بتتحرف..
.والحرية طريق الثورة العمالية..
.والمنفستو اشتراكية..
.ودم الشهداء بيكتب ويروى..
.ثورة قوية وصوتها بيدوى..
.ولن يحكمنا البنك الدولى...
وعاش كفاح المحرومين
وعاش نضال الفلاحين..
.والابرول لون الاصطبة..
.فى المصفاة وكل طرمبة..
.فيها الطبقة العاملة قوية..
.ليها هوية وليها قضية..
.طريق الزحف والحرية..
.مدارس تمحو للامية...فيها المنهج دايلكتيك..
.فيها الثورة الفينى وفيك...
!
نحن الثورة الدايمة طريقنا.
.ومابنتغير.
.والتاريخ لابد يعيدنا .
.شان نتحرر..
.ما بنتراجع عن مبدئنا من الطفل ولى الحبوبة.
..والثورية بتلبس توبها...
عاش جيفارا وعاشت كوبا..
.وست الشاى الفى الراكوبة.
.تهتف عاش كفاح الطبقة العامله ..
.اشتراكية تنمية شامله.
..وكلنا نهتف ضد الجهل والرجعية..
.اكتب دوَن نحن طلائع للشيوعية..
.حزب الطبقة العاملة والثورية..
.ثورة قوية وعمالية..
.فيها المصنع يدوى هتافو..
.ينال الحق القط ما شافو ..
.شافو وشافو شاف شافييز..
.وفى القضبان عجلاتنا تدور..
.والسواق نفخ البابور..
.والافكار النابضة تحرر...
.والتاريخ يكتب ويسطر..
عاش نضال السكة حديد .
..والتاريخ لى نفسو يعيد..
.ماضى الثورة والعمال..
.العمال اعظم ابطال..
.قاسم امين وراهو رجال..
.كل العالم فينا احتار ..
.يبقى يمينا الرجعى يسار.
..نهتف عالى يسقط يسقط الاستعمار.
عمار محمد ادم
|
Post: #4
Title: Re: ميدان محطة السكة حديد و الشعب يريد....
Author: عمار محمد ادم
Date: 10-02-2011, 08:59 PM
Parent: #3
(كنت اصحبه فى عربة الفرمله بالقطارحيث كان يعمل)
انا لسه راكب فى القطر قاعد هناك فى الفرمله
من كسلا والسكة الحديد ابدا الحديث بالبسمله
واسقيهو من شوق القرير يروى البلد بى اكملها
دى رساله من عمق الفؤاد تبلغ ابوى مستعجله
انا من ابوى وابوى انا.. يبقى الوجود زى الفناء
والعزه فينا مؤصله
وابويا فى الفردوس ملك ثلة ملوك متسلسله
التاكا والبركل سوا..العزة والسكة الحديد
انا من ابوى وابوى انا ..يبقى الوجود زى الفناء
وابوى مش انسان وبس..دا ابوى مد مليون سنه
كل النفوس مطمنه كونك هناك انك هنا..فرق الزمان والامكنه
وانا لسه راكب فى القطر قاعد هناك فى الفرمله
يا كسلا يا امى الحرم
ضجت مدن والقاش هدم
خالط فرحنا مع الالم
جفت صحف رفع القلم
وابويا واقف كالهرم
ما هز يوم عصف الرياح
ما فت عضدو وما انهزم
والقاش علا..غرق ملا
ادروب يعزى كاسلا
شيخا يرتل فى الفجر
يسعى ويفتش فى الاجر
يقرا ويقدم للدروس
للخير يكوس..فى كل ناحية او شبر
ابكيك انا تبكيك جبال تبكيك بحور
يازول قوى ويا زول صبور
يا شيخ وقور..فى وجهو نور
تبكى التراويح والسحور
تهفو الجنان مليانه حور..وتستقبلك
تبكيك طيبات الوشوش..يا زول بشوش
تبكى المأذن والسحب
تبكى المنابر والكتب
تبكى الميامين النجب
تبكى القلوب مليانه حب
ياسر مخبأ جوه جب
يبكى القطر..يبكى الصيام والدنيا حر
يبكى السجود وكت السحر
يبكى الدعاء يوم السماء جاد بالمطر
وتبكى هداليا وتندلاى..وتبكى المصاحف آى وآى
وابكيك انا واحزن عليك واحس فراغ من غير حدود
وارتد لى اصل الجدود
يرجاك ابوك ادم هناك..يلقاك عمر ولدا اغر
وانعم جوار وادى البشير واخوك حسن
ويبكى الوطن
وينزل مبادئك فى جناك..فى يومنا داك..فى عطبره
وانا لسه راكب فى القطر قاعد هناك فى الفرمله
لاكون ابوى ود البلد
لى زول ضعيف كم كان سند
دا الامرو جد..لآمن توسد فى اللحد
يا ربى اشملو بى رضاك اجعل جنانك مرقدو
بى خيرك الوافر الكتير يا ربى زيدو واسعدو
عمار محمدادم2003
|
Post: #5
Title: Re: ميدان محطة السكة حديد و الشعب يريد....
Author: عمار محمد ادم
Date: 10-02-2011, 09:02 PM
Parent: #4
الكشة
------
الديك بيرسل فى صياحو
محمَد يكابس من صباحو
كايس القريشات لى ملاحو
محمدمسيكين ياحليلو
شقيان نهار مهموم فى ليلو
السوق بعيد كيف الوصول
عربات تمر مابقفلو زول
كيفن يقيف ود الأصول
لى زول ضعيف
كيفن يقيف
ولدا نضيف
لى زول خشن لابس قديم
كيفن يقيف ولدا نعيم
محمًد مسيكين ياحليلو
بى بص قديم محمد وصل
فرش الخدار كوَم بصل
العقل راح رًوَح سريع
راح البويت..
كيف ألبنات ام البنات
كيف الرضيع
محمد يبيع
فجاءة انتبه..الكشة جات
جدعوه فى كومر كبير
ساقوه لى سجنا حقير
محمد رقد محزون حسير
محمد بكى موت الضمير
بلدا يجوع فيها الفقير
عدمان فرش حتى الحصير
ناسا تنوم فوق الحرير
عرباتها لنج موديل جديد
مافيش حسد ياربى زيد
لكن كمان شوفو التحت ماتشوفو فوق
شوفوا التعب ضوقوه ضوق
الناس يمين اكلت صبر
الناس يمين شربت صبر
وبعض الخلوق راحو القبر
ما نادية ست الشاى ..اذاى
تعتر تموت ويطول بكاى
(
نادية كتلك ما جريمة
ونادية تل قصة موت اليمة
كان تداعب فى حليمه
كبت الشاى لى زبونها
ايدها فى المنقد تهبهب
وراسها يحسب فى ديونها
قد تكونا ولا نكونا
نادية مستورة وحنونة
بادى حزنا فى عيونها
وفى عباراتها وشجونها
خاتها بتها فى قليبها
والكليمات الحبيبه
روحها زاخرة وخالى جيبها
ما بتدردرها ما بتجيبها
والسخانه بقت رهيبة
نادية شالت للكبابى
وبين طياتها المصيبة
شافت السوق يغلى فار
اجروا اجرو ياالصغيربن والكبار
كشة ماكنة وسوقها حار
نادية تجرى
دموعها تجرى
شايلى بنبر فى يمينها
ماسكى قفتها فى شمالها
يا حليلها وياحليها
قاعدى ساعاتا طويلة
شوف ادياتها البترجف
والقعاد هاديلها حيلها
الهموم فى القلب راقدى
والايدين مابيها حيلها
ياحليلها وياحليلها
الناس تعاين فى حويلها
فيها اتقزت حديدة
الحديد فجر وريدها
مابى يسغفها بالكريسيدى الجديدة
كيف يخلوها تموت وحيدة
الشمس حارى وشديدة
ماتشيلوها وخفيفى
مابتأثر فى اللساتك والبلالى
مقعدا واحد يشيلها واصلو خالى
نادية تنزف بنبرها الخائن يخونها
كاشة قاتله يزيد جنونها
الحرارة تزيد سخونة
ماتت المسكينة تنزف
الصقور الحايمى تخطف
لابتعين لابتوظف
بس بتكتل
تمام سيادتك
عال عال فل فى الفل
عمار محمد ادم 2009(
|
Post: #6
Title: Re: ميدان محطة السكة حديد و الشعب يريد....
Author: عمار محمد ادم
Date: 10-02-2011, 09:05 PM
Parent: #5
سيرة ذاتية
_____________
مانى الغول يا فاطنة السمحة محمد اخوك
طمنى امك وبرضو ابوك
مانى الغول يا فاطنة السمحة محمد اخوك
واسمعى سيرتى..وهاكى حقبقتى
كان ميلادى هناك فى ارضا زى الجنة وجنب النيل
كلها خضرة وظل ظليل
طيور بتغنى فوق لى نخيل
نلعب فيها السك وشليل
نوح القمرى وشدو الطير
ومن الجدول جاييى خرير
فوقى المنقة وتحتى حفير
بلدنا قرير تفيض بالخير
وفيها اتشرب قلبى معانى
والطمبوركون وجدانى
بقلبى الحانى هاك الحانى
واحلى اغانى..تحرك فينى الشى الجوانى
×××
ومما كبرت شويه شويه
جيت محمول يابت فى الايد
كانت كسلا محط رحالى
سكنا هناك فى السكة حديد
بحب ياناس السكة حديد
ومما قمت وكنت وليد
عامل فيها ولد صنديد
طبعا هين وبرضو عنيد
كنت نحيَف مانى غليد
مرة اهبش فى النافورة
ومرات العب فى الماسورة
اشخبط اسمى فى السبورة
وارسم وطنى بالطبشورة
قليلا جدا العب كورة
بحب الورشة وصوت وابورها
(
!
وجينا سكنا بحى عمال
وعشنا معاهم احسن حال
كا البينا العشرة الطيبة
ما بيناتنا مصالح ومال
وضم الحى الوان واشكال
شرقى وغربى جنوب وشمال
همنا واحد تجمع بينا السكة حديد
وفى سنه تالتة رحلنا كمان لى حى جديد
بيوت من طين فيها المويه مكانها بعيد
اشيل فى كتفى الناحل جوز اقصر حبلا باقى مديد
وفى سنه رابعه بقيت انصارى
اناقش مرة فى التوحيد
واقول فى الدين برأى جديد
قضية المرأة والتقليد
عامل فاهم ورايى سديد
عامل فيها ابو عرام
هذا حلال هذا حرام
جنى فصاحة وجنى كلام
حتى وصلت الثانوى العام
ديمة مشاكل وديمة صدام
وفى حلتنا مع ادروب
اكلت العجوة شربت الروب
حلبت البقرة ركبت حمار
وشلت الصارم سيف بتار
وكيف الناس بتجيب التار
ترد الظالم والحقار
ولى ادروب فى نفسى وقار
لى ادروب فى نفسى مكانة
مكانة رفيعة معظم شانها
وزى ما خطفوا اطفال فى فشلا
كنت طفل مخطوف من كسلا
ما فى داعى الليلة ابوح
هذا حديث يحتاج لى مهلة
وجيت الجامعة وشفت تجارب
مرة سجبنا ومرة محارب
طفت الدنيا وشفت عجايب
خبرت الناس بى كل مشارب
وجانا ###### عيونو حمر
سنونو صفر..رمونى جماعة جوة البير
كان الوضع جد خطير
كان الخلق فى التدبير
وكان الخالق فى التقدير
وجيت الجامعة احاول تانى
جيت فى زمانا ماهو زمانى
لقيتك جالسه تحت الشجره
زى ما تقولى خايفه وحذره
زى ما تقولى غزاله ونافره
شى من دنيا وشى من اخره
وقلتى الحكمة المابنساها
عمار محمد ادم جامعة الخرطوم 1995 AM
|
Post: #7
Title: Re: ميدان محطة السكة حديد و الشعب يريد....
Author: عمار محمد ادم
Date: 10-02-2011, 09:29 PM
الحريق
______________
احترقت كل بيوت الحب المبنية من قش
وطيور الزينة صارت كعصافير النار
النار دخان يتصاعد.. النار لهيب يتصاهد
وصراخ المحروقين يشق سكون الليل
وانا اقهقه كالمجنون..
كالمارد يخرج من جوف الظلمة والعتمة والحقد الاسود
النار تحاصر اسماعيل
والمك يقهقه كالجبار
الوجه يلوح خلف النار
الوجه دخان وغبار
والعين تقدح بالثأر
اشرار...اشرار
لايخمد نفث الشر الا النار
عمار محمد ادم...ارتجلت ببيوت الاشباح 1993
|
Post: #8
Title: Re: ميدان محطة السكة حديد و الشعب يريد....
Author: عمار محمد ادم
Date: 10-02-2011, 09:48 PM
Parent: #7
مقطع
__________
قد كنت ضليعا فى الحقد
ةالان ضليع فى الحقد
لن ينفع فى ولن يجدى
ان تملأ جيبى بالندربىقد
او تفرش دربى بالورد
فالحقد تمكن من قلبى
والحقد تأصل فى كبدى
_____________
مقطع أخر
حرك فينا الحقد الطبقى
انفث فيا دخان العادم
غبر وجهى وهدومى
بل ابصق فى وجهى ان شئت
حرك فينا الحقد الطبقى
وسيأتى يوما اتفجر
يا ويلك منى والناس
ويكون الحقد طريق المجد
_________________
مقطع اخير
__________
بجى اليوم البنفث فيهو احقادى
وتدق موسييقى فى الرادى
ويكون يوم داكا ميلادى
|
|