Post: #1
Title: والله في بوردابي بقيت اكرهه عديل
Author: بخاري عثمان الامين
Date: 10-02-2011, 01:25 PM
وعارف اني بكون مكروه جدا أنا برضو ..
لكن ياخي ذبحتنا والله وبسكين ميتة
كلما القي لي زوغة خمسة دقائق
عشان اشوف البورد القاك منزل لك
بوست وكاتب فيهو سطر واحد
وغير ما بتضر في المعارضة ما بتعمل في
حاجة ... مالنا ومال البشير متابع سكناته وهناته
قديتنا ياخ ... أنت عارف انك بالطريقة دي
بترجع البوستات المفيدة لي الصفحات المتأخرة
وانت بتحتل الصفحة الاولي بدون فائدة لينا
وتفيد الجبهة الاسلامية بس لانك مثلهم تغيب
الحقيقة عن المتصفحين
|
Post: #2
Title: Re: والله في بوردابي بقيت اكرهه عديل
Author: فدياس نجم الدين
Date: 10-02-2011, 01:32 PM
Parent: #1
لا لقتل المواهب الناشئه
كامل تضامننا مع صديق في محنته
كسره
بركه الجات منك يا جامع
|
Post: #3
Title: Re: والله في بوردابي بقيت اكرهه عديل
Author: بشير أحمد
Date: 10-02-2011, 01:37 PM
Parent: #2
كامل تضامني اخي بخاري
________
الفساد الفساد
الكلمة دي فتحت بلاغ زمان وحيثيات البلاغ (سوء الاستخدام)
في قِسم الكرنتينة شمال
الكائن بمدينة جدة.
|
Post: #4
Title: Re: والله في بوردابي بقيت اكرهه عديل
Author: عبدالكريم أحمد الامين
Date: 10-02-2011, 01:40 PM
Parent: #2
** الأخ بُخارى..
** سلام ومساءك خير..
## هُم أكثر من واحد ,, جليهم عشان مايرفعو ليك ضغطك ..
## هل هنالك إى إحتمال بأن يكونو غواصات؟؟؟
(ودام الود بين الجميع)
|
Post: #5
Title: Re: والله في بوردابي بقيت اكرهه عديل
Author: بخاري عثمان الامين
Date: 10-02-2011, 01:43 PM
Parent: #4
Quote: ## هُم أكثر من واحد ,, جليهم عشان مايرفعو ليك ضغطك ..
## هل هنالك إى إحتمال بأن يكونو غواصات؟؟؟
|
الاخ عبد الكريم
سلامات
العبرة بالنتائج فمحصلة مجهودهم
تصب في خدمة الجبهة الاسلامية وتخصم
من رصيد العمل المعارض
|
Post: #6
Title: Re: والله في بوردابي بقيت اكرهه عديل
Author: حيدر حسن ميرغني
Date: 10-02-2011, 01:46 PM
Parent: #4
| Quote: بوست وكاتب فيهو سطر واحد |
ضيق عبارة وطشاش رؤية
_
دي فرصة يابخاري عشان الناس تعرف الفرق بين سطر ملاسي وسطر العتَالى
|
Post: #7
Title: Re: والله في بوردابي بقيت اكرهه عديل
Author: بخاري عثمان الامين
Date: 10-02-2011, 01:52 PM
Parent: #6
| Quote: دي فرصة يابخاري عشان الناس تعرف الفرق بين سطر ملاسي وسطر العتَالى |
شكرا يا حيدر اديتني موضوع
جديد وعضدت من وجهة نظري
|
Post: #8
Title: Re: والله في بوردابي بقيت اكرهه عديل
Author: فدياس نجم الدين
Date: 10-02-2011, 02:04 PM
Parent: #7
والله وطلعت غواصه يا صديق
وانا اقول الزول ده شفته وين قبل كده؟
لمزيد من الشفافيه نطالب بفضح بقيه الغواصات
|
Post: #9
Title: Re: والله في بوردابي بقيت اكرهه عديل
Author: وليد عبد اللطيف
Date: 10-02-2011, 02:05 PM
Parent: #7
Quote: قديتنا ياخ ... أنت عارف انك بالطريقة دي
بترجع البوستات المفيدة لي الصفحات المتأخرة
وانت بتحتل الصفحة الاولي بدون فائدة لينا
|
كان كدي اوقف البوست بتاعتي
ياخي عليك الله وصل تحياتنا للاخت المنضاله التي تشرف منطقة بحري نجلا سيد احمد
قول ليها من وليد عبد اللطيف وعماد عثمان احمد
لالالالا يابخاري الناس السمحة مابتكره
|
Post: #10
Title: Re: والله في بوردابي بقيت اكرهه عديل
Author: دينا خالد
Date: 10-02-2011, 02:05 PM
Parent: #7
اخ خ خ فشيتنى فشه !!
ينصر دينك ياخ !!
|
Post: #11
Title: Re: والله في بوردابي بقيت اكرهه عديل
Author: قيقراوي
Date: 10-02-2011, 02:11 PM
Parent: #10
ابشر بالالقاب يا باخ!
|
Post: #12
Title: Re: والله في بوردابي بقيت اكرهه عديل
Author: بخاري عثمان الامين
Date: 10-02-2011, 02:12 PM
Parent: #11
| Quote: قول ليها من وليد عبد اللطيف وعماد عثمان احمد |
يصل يا وليد وسلم لي علي عماد و ( الوالدة )
|
Post: #13
Title: Re: والله في بوردابي بقيت اكرهه عديل
Author: بخاري عثمان الامين
Date: 10-02-2011, 02:16 PM
Parent: #12
Quote: اخ خ خ فشيتنى فشه !!
ينصر دينك ياخ !! |
تسلمي أختنا دينا
|
Post: #15
Title: Re: والله في بوردابي بقيت اكرهه عديل
Author: بخاري عثمان الامين
Date: 10-02-2011, 02:32 PM
Parent: #13
| Quote: ابشر بالالقاب يا باخ! |
فتح الرحمن صديقي الذي اشتاقه
عاين يا فردة أنا معارض لهذه الحكومة
دي الحاجة الاولي واعمل كل ما بوسعي لاسقاطها
أعتقد في الاتي :-
ذهاب الحكومة يحتاج لجهد وعمل مضني وصبور
في جبهات محاصرتها بالفعل الجماهيري المباشر ( التظاهرات مثال )
وفضح كل سياساتها الرعناء التي تكلف المواطن
ما لا طاقة له به .. يلا فضح السياسة دي عشان تنجح
بتعمد علي الاعلان وطبعاً الصحف عليها رقابة قبلية صارمة
لذا تصبح النيومديا ومنها موقعنا دا ذات أهمية قصوي
خصوصا للناس البرة البلد ... طيب لمن يجئ زول/ة عايز
يشوف الاخبار وما عنده زمن يقعد يفتش اول ما يلقي فلان/ة
قاشط/ة الصفحة الاولي كلها بي بوستات ما فيها اي حاجة
بحصل شنو ؟ ح يطلع ويقفل الجهاز أو يمشي موقع تاني
دا من جهة ومن جهة تانية كلما تكتب في بوست بطلع في الصفحة
الاولي وقصاده في بوست بمشي للصفحات السابقة .. وانا عايز
املك من يجد زمن للنت معلومة اها مع زولك دا موش نحن بنخسر بس..
والمسألة دي بنحسها تحديدا عند حوجتنا لنشر حملة مناصرة
والله الا نقعد نحرس البوست مع امثال صاحبنا دا
مرحب بأي لقب يا فتحي وسنحمي هبتنا وعملنا المعارض بدمنا
|
Post: #14
Title: Re: والله في بوردابي بقيت اكرهه عديل
Author: ناصر يوسف
Date: 10-02-2011, 02:19 PM
Parent: #11
| Quote: ابشر بالالقاب يا باخ! |
باخ ترااااااااخ وين يا عمك .. ثم إني لك ملتاع الشوق وحاجات أخري حامياني
أعتذر لصاحب البوست بهذه الإنتكاية السلاميه بخرمجتها البائنة لصديق أشتاقه هذه القيقا وكم كيلو بايت القوي قيقراوي ده ...
ومن ثمَّ ....
عسي أن تكرهو شيئاً ياخ
نعم قد يفلح أو يحاول بعضهم إغراق المنبر بالغث من الكلام ...
وهذا عليكم به بالكي والكي للني ولا مو كدي ؟؟
أعتذر مرة أخري لو أنني قد جئت بمفترع للحديث الذي أتي عاليه في حق صديق أشتاقه للطيش
|
Post: #16
Title: Re: والله في بوردابي بقيت اكرهه عديل
Author: طارق جبريل
Date: 10-02-2011, 02:36 PM
Parent: #14
ما بتصل الكره يا حبيب
بس بفقع المرارة
|
Post: #17
Title: Re: والله في بوردابي بقيت اكرهه عديل
Author: قيقراوي
Date: 10-02-2011, 02:36 PM
Parent: #14
Quote:
نعم قد يفلح أو يحاول بعضهم إغراق المنبر بالغث من الكلام ...
|
يا فتلة .. و قيل فلتة
وينك ياخ ..
و الله الشوق من حاصف لي قاصف .. و لّ هم بقولوا شنو!؟
المهم ( ما بتاعة طبارك الذي ليس بيده شئ، دا واحد مهم تاني)
و انت السادق .. البورد اتملا كلو غثاء ساااي!!
فمرحباً بك في وسط هذا الغثاء الكبير ياخي
-----
اتعاقبنا ..
انا مشيت ليك في دارك و قيل (خيطك) في رواية عنكبوتية اسفيرية..
و كانت اللهفة سابقة السلام ..و انت مأترني بي جاي!
فا شنو؟
ارسم لنا صراطاً مستقيماً نحو افقك ..
كي نجيئك .. انا و الشوق .. و وعد اللقاء
المافي شنو!؟
|
Post: #18
Title: Re: والله في بوردابي بقيت اكرهه عديل
Author: بخاري عثمان الامين
Date: 10-02-2011, 02:40 PM
Parent: #17
Quote: باخ ترااااااااخ وين يا عمك .. ثم إني لك ملتاع الشوق وحاجات أخري حامياني
|
يا ناصر ازيك ياخ
في اختراع كده أسمه التلفون
تقوم تضرب طوالي تسمع
ونبل الشوق
ونسكن عمارات فوق
|
Post: #19
Title: Re: والله في بوردابي بقيت اكرهه عديل
Author: بخاري عثمان الامين
Date: 10-02-2011, 03:15 PM
Parent: #18
Quote: ما بتصل الكره يا حبيب
بس بفقع المرارة |
والله يا قريبي وبامانة كده
تفوت الكره بي هناك كمان ..
|
Post: #20
Title: Re: والله في بوردابي بقيت اكرهه عديل
Author: قيقراوي
Date: 10-02-2011, 03:16 PM
Parent: #18
يا باخ .. كلام صاح كلو ..
و البقول الصاح الزمن دا ياهو البحصل على الالقاب!! البروف نموذجن
مادام اصلو لو قلتها .. تمت، او لم تقلها برضو تمت
اذن قلها و مت!!
المافي شنو!؟
Quote:
في اختراع كده أسمه التلفون
تقوم تضرب طوالي تسمع
ونبل الشوق
ونسكن عمارات فوق
|
بس مرات مرات (الرغم ) بجلي في نففففس الاختراع دا
فضلاً تاكد من الرغم الصحيح .. و شكراً
------
مرة طارق كرفس دق ليو واحد .. و كابسوا ليك : عبد الله!؟
اتقاطم ليك معاو : ياخ انت عبد الله بتاعك دا اصلو هو الشيخ البرعي!؟ ..
بس تدق اي رقم يطلع ليك هو!؟
التقول الشيخ البرعي بقدر عليها التكنولوجيا دي!!؟
|
Post: #21
Title: Re: والله في بوردابي بقيت اكرهه عديل
Author: مزمل خيرى
Date: 10-02-2011, 03:27 PM
Parent: #20
يابخارى شيل الصبر زينا عليك الله
عشان مايطق ليك عرق وانت لسع فى عز شبابك !
الراجل دة مؤلم جداً بالمناسبة !
|
Post: #22
Title: Re: والله في بوردابي بقيت اكرهه عديل
Author: Nasruddin Al Basheer
Date: 10-02-2011, 04:11 PM
Parent: #21
أسجل كامل تضامني معاك يا بخاري
بس صاحبك ده ما بلحق المريخابي العبيط الذي يكتب بوست عن الهلال
كل خمس دقائق.. يشهد الله كرهنا المنبر عديل كده..
معليش يا بخاري أنا انتهزت هذا البوست للتعبير عن حالة مشابهة
وربنا ما يجيب الكراهية بين الأعضاء..
|
Post: #23
Title: Re: والله في بوردابي بقيت اكرهه عديل
Author: ابراهيم قناوي
Date: 10-02-2011, 04:50 PM
Parent: #22
الأخ بخاري سلامات وعوافي
ما نراه من سلوك البعض هنا
أصبح يجعلنا نستحي من فتح المنبر أمام الأسرة
والله صحي...
ولكن للإنصاف هناك من يعارض بشرف
ويضطرك لإحترامه ولو إختلفت معه
وأنت ممن أكن لهم كل الإحترام
وتصدق إنت واحد من الكثيرين هنا
الذين أتمنى ملاقاتهم لأنني أحس
أنني ممكن أتونس معاك ونسة حلوة جداً
وما عارف الإحساس دة جاييني من وين؟
عشان كدة ح أكرر ليك جزء من مداخلة فوق
وأقول ليك:
| Quote: لالالالا يابخاري الناس السمحة مابتكره |
دمت بعافية يا أخي الكريم
والتحية لك ولأسرتك الكريمة
وللمرور بهذا البوست
والسلام
|
Post: #24
Title: Re: والله في بوردابي بقيت اكرهه عديل
Author: سناء عبد السيد
Date: 10-02-2011, 04:59 PM
Parent: #23
| Quote: هل هنالك إى إحتمال بأن يكونو غواصات؟؟؟ |
هو في شنو طول من عمر النظام بلا الغواصات البكونوا مزروعين ليك في اي حتة.. و ما اكثرهم في هذا المنبر.. لكن اكثر الناس لا يعلمون
|
Post: #25
Title: Re: والله في بوردابي بقيت اكرهه عديل
Author: بخاري عثمان الامين
Date: 10-02-2011, 05:04 PM
Parent: #24
Quote: يابخارى شيل الصبر زينا عليك الله
عشان مايطق ليك عرق وانت لسع فى عز شبابك !
الراجل دة مؤلم جداً بالمناسبة ! |
يا مزمل تسلم يا صديقي
لكن عز الشباب وين ياخ ؟ هرمنا وهذا الشخص
يزيدنا هم وهرم ...
مؤلم جدا والله
|
Post: #26
Title: Re: والله في بوردابي بقيت اكرهه عديل
Author: بخاري عثمان الامين
Date: 10-02-2011, 05:08 PM
Parent: #25
Quote: أسجل كامل تضامني معاك يا بخاري
بس صاحبك ده ما بلحق المريخابي العبيط الذي يكتب بوست عن الهلال
كل خمس دقائق.. يشهد الله كرهنا المنبر عديل كده..
معليش يا بخاري أنا انتهزت هذا البوست للتعبير عن حالة مشابهة
وربنا ما يجيب الكراهية بين الأعضاء.. |
شكراً للتضامن يا نصر الدين
بس المريخاب ما أظن فيهم زول عبـيط ( لوووووووووووول)
ربنا والله يبعد الكراهية بس الضرورة كمان
انهم يدمرون مجهوداتنا يا حبيب
|
Post: #27
Title: Re: والله في بوردابي بقيت اكرهه عديل
Author: بخاري عثمان الامين
Date: 10-02-2011, 05:12 PM
Parent: #26
Quote: وأنت ممن أكن لهم كل الإحترام
وتصدق إنت واحد من الكثيرين هنا
الذين أتمنى ملاقاتهم لأنني أحس
أنني ممكن أتونس معاك ونسة حلوة جداً
وما عارف الإحساس دة جاييني من وين؟ |
تسلم والله يا قناوي ..
ما عارف استخدام العنف اللفظي ولا البذاءة بتخدم
قضية الزول كيف ؟
|
Post: #28
Title: Re: والله في بوردابي بقيت اكرهه عديل
Author: بله محمد الفاضل
Date: 10-02-2011, 05:23 PM
Parent: #27
طوالي يا عمك تبدأ البورد بالشقلوب
وتعمل رائح من الصفحة الأولانية
مش طريقة برضك...
مرات مرات بسويها والله
بلا سبب ظاهر أو باطن
ببدأ مباشرة من الصفحة التالتة
سلام يا باخ وغاية الأشواق
|
Post: #29
Title: Re: والله في بوردابي بقيت اكرهه عديل
Author: ABUHUSSEIN
Date: 10-02-2011, 05:35 PM
Parent: #28
اخونا بخاري سلام
زماااااااااااااااااااااان طالبنا بي بورد خاص بالأطفال لكن مافي زول إشتغل بينا
بعدين الفلم دا شغال هنا ليه سنتين إنت يادوبك دخلتو و لا شنو .......؟؟؟؟
تحياتي و إحترامي مع دعواتي ليك بأن يحفظك الله من الضغط و السكري
|
Post: #30
Title: Re: والله في بوردابي بقيت اكرهه عديل
Author: Hassan Makkawi
Date: 10-02-2011, 05:52 PM
Parent: #29
Quote: زماااااااااااااااااااااان طالبنا بي بورد خاص بالأطفال لكن مافي زول إشتغل بينا
|
دة شنو يا ABUHUSSEIN !!!
داير الخبل ينتقل للأطفال كمان؟؟
____________________
بخارى سلام
الله مايجيب كراهية ياخ
|
Post: #31
Title: Re: والله في بوردابي بقيت اكرهه عديل
Author: Bashasha
Date: 10-02-2011, 08:57 PM
Parent: #30
الطريف في الخيط ده، انو الكيزان والشيوعين والامننجية شايتين كلهم في اتجاه واحد!
ابوحسين بخاطب بخاري بي صيغة "اخونا" بخاري، عديل كده، بل متفق معاهو حد المطالبة بفتح منبر خاص بالناس البكجنم الرفيق بخاري!
قرقرقرقرقر!
|
Post: #32
Title: Re: والله في بوردابي بقيت اكرهه عديل
Author: محمد البشرى الخضر
Date: 10-02-2011, 09:37 PM
Parent: #31
مجدي ابصلعة
انا ما بكرهو لكن حركاتو البعملها قبل كور الهلال دي فقّعت لينا حاجاتنا
دا غير الكج الكاجينا ليه
لو خليت البورد دا ح يكون بسببو
|
Post: #33
Title: Re: والله في بوردابي بقيت اكرهه عديل
Author: ABUHUSSEIN
Date: 10-02-2011, 09:54 PM
Parent: #32
Quote: ابوحسين بخاطب بخاري بي صيغة "اخونا" بخاري، عديل كده،
بل متفق معاهو حد المطالبة بفتح منبر خاص بالناس البكجنم الرفيق بخاري! |
|
Post: #34
Title: Re: والله في بوردابي بقيت اكرهه عديل
Author: زياد جعفر عبدالله
Date: 10-03-2011, 04:34 AM
Parent: #33
الاخ بخاري
أمثال من ذكرت من المعارضين في هذا المنبر يساهمون بتكريس الوضع الراهن بوعي أو بدون وعي منهم..
اللا موضوعية و الشتائم و اللغة السوقية ليس مكانها منابر الحوار ال(محترمة)...بالذات إذا أصبحت سلوك مستمر و متواصل من الكاتب.
التغيير ..كما تفضلت.. يأتي بالعمل الدؤوب و نشر التوعية و تمليك المعلومة للقاريء, هذا لا يتأتى بالزعيق أو الشتم أو الالفاظ النابية لأنه ببساطة لن تجد من يدخل ما تكتبه (هذا بافتراض حسن نية الكاتب و رغبته الحقيقية في التغيير)..
نقول له الطريق الذي تسلكه يا سيدي الكاتب خااااطيء برغم تصفيق البعض لك بدافع المجاملة أو خلافه!!
...في نوع تاني يا بخاري البيجي يتكلم ليك بغلواء و عنصرية عن ثورة (قبلية) (عنصرية) في السودان...هؤلاء ليسو بأفضل من الانقاذ إن لم يكونو أسوأ!! بل بطرحهم يخدمون تماماً في خط المؤتمر الوطني بجعل الصراع في السودان صراع جهوي قبلي و أثني.. وليس صراع شعب من أجل نيل حقوقه من حرية و عدالة و مساواة
|
Post: #35
Title: Re: والله في بوردابي بقيت اكرهه عديل
Author: عثمان رضوان
Date: 10-03-2011, 05:57 AM
Parent: #34
الأخ بخاري
تحياتي..
| Quote: والله في بوردابي بقيت اكرهه عديل |
دة منو دة ؟
|
Post: #36
Title: Re: والله في بوردابي بقيت اكرهه عديل
Author: بخاري عثمان الامين
Date: 10-03-2011, 07:14 AM
Parent: #35
| Quote: هو في شنو طول من عمر النظام بلا الغواصات البكونوا مزروعين ليك في اي حتة.. و ما اكثرهم في هذا المنبر.. لكن اكثر الناس لا يعلمون |
يا سناء ..
والناس البتخدم الجبهة الاسلامية بدون وعي
بالتعمل فيهو
|
Post: #37
Title: Re: والله في بوردابي بقيت اكرهه عديل
Author: بخاري عثمان الامين
Date: 10-03-2011, 07:17 AM
Parent: #36
| Quote: طوالي يا عمك تبدأ البورد بالشقلوب |
فكرة والله يا بلة
وازيد عليها اعلان لغير البورداب :
ان كنت تريد المفيد
فلتكن بدايتك بالشقلوب ..
الشقلوب دي ذكرتني الشلهوب وياحليل زمان
|
Post: #38
Title: Re: والله في بوردابي بقيت اكرهه عديل
Author: بخاري عثمان الامين
Date: 10-03-2011, 07:20 AM
Parent: #37
الزميل بخاري لو سمحت
متين سمعت شيوعي قالوا ليهو رفيق
الطريف في البوست دا انت بس والله
|
Post: #39
Title: Re: والله في بوردابي بقيت اكرهه عديل
Author: بخاري عثمان الامين
Date: 10-03-2011, 07:38 AM
Parent: #38
| Quote: تحياتي و إحترامي مع دعواتي ليك بأن يحفظك الله من الضغط و السكري |
تسلم يا ابو حسين والله
الضغط الحمد لله الحكومة جابتو لينا وخلاص
هسه زولنا دا ح يجيب لينا السكري ..
|
Post: #40
Title: Re: والله في بوردابي بقيت اكرهه عديل
Author: بخاري عثمان الامين
Date: 10-03-2011, 07:41 AM
Parent: #39
Quote: الاخ بخاري
أمثال من ذكرت من المعارضين في هذا المنبر يساهمون بتكريس الوضع الراهن بوعي أو بدون وعي منهم..
اللا موضوعية و الشتائم و اللغة السوقية ليس مكانها منابر الحوار ال(محترمة)...بالذات إذا أصبحت سلوك مستمر و متواصل من الكاتب.
التغيير ..كما تفضلت.. يأتي بالعمل الدؤوب و نشر التوعية و تمليك المعلومة للقاريء, هذا لا يتأتى بالزعيق أو الشتم أو الالفاظ النابية لأنه ببساطة لن تجد من يدخل ما تكتبه (هذا بافتراض حسن نية الكاتب و رغبته الحقيقية في التغيير)..
نقول له الطريق الذي تسلكه يا سيدي الكاتب خااااطيء برغم تصفيق البعض لك بدافع المجاملة أو خلافه!!
...في نوع تاني يا بخاري البيجي يتكلم ليك بغلواء و عنصرية عن ثورة (قبلية) (عنصرية) في السودان...هؤلاء ليسو بأفضل من الانقاذ إن لم يكونو أسوأ!! بل بطرحهم يخدمون تماماً في خط المؤتمر الوطني بجعل الصراع في السودان صراع جهوي قبلي و أثني.. وليس صراع شعب من أجل نيل حقوقه من حرية و عدالة و مساواة |
زياد والله ما قصرت ..
مفروض كلامك دا يعملهو ديباجة وتتعلق في كل دور المعارضين
|
Post: #41
Title: Re: والله في بوردابي بقيت اكرهه عديل
Author: بخاري عثمان الامين
Date: 10-03-2011, 07:47 AM
Parent: #40
Quote: بخارى سلام
الله مايجيب كراهية ياخ |
آمين
|
Post: #42
Title: Re: والله في بوردابي بقيت اكرهه عديل
Author: بخاري عثمان الامين
Date: 10-03-2011, 07:54 AM
Parent: #41
Quote: الأخ بخاري
تحياتي..
Quote: والله في بوردابي بقيت اكرهه عديل
دة منو دة ؟ |
الاخ عثمان
سلامات
ما مهم منو لان القصة ما شخصية
أنا اكره تصرفه الذي يخصم من
رصيد المعارضة وعملها
|
Post: #43
Title: Re: والله في بوردابي بقيت اكرهه عديل
Author: محمد أبوالعزائم أبوالريش
Date: 10-03-2011, 10:38 AM
Parent: #42
Quote: ما مهم منو لان القصة ما شخصية
أنا اكره تصرفه الذي يخصم من
رصيد المعارضة وعملها |
الظريف إنو كل واحد جاء هنا، شايل معاهو فقعة مرارة من زول.
بخاري سلام ....
الموضوع وافق ناس كتيرين .... لكن العنوان ما بيشبهك.
دُم بخير
|
Post: #44
Title: Re: والله في بوردابي بقيت اكرهه عديل
Author: عثمان رضوان
Date: 10-03-2011, 11:09 AM
Parent: #43
Quote: الاخ عثمان
سلامات
ما مهم منو لان القصة ما شخصية
أنا اكره تصرفه الذي يخصم من
رصيد المعارضة وعملها |
الأخ بخاري،
تحياتي مرة أخرى.
أنا ذكرت ذلك على سبيل المزاح، وأدرك أنك لن تذكر اسمه.
ولكن ليته يدري، وليته يدري أنه لا يدري. ويرعوي.
في تقديري أيضاً الذين يفترضون عدم إمكانية حيادية الآخرين
يكونون خصماً على المعسكر الذي يقفون معه، سواء كان حكومة
أو معارضة. وفي الوقت الحالي المعارضة هي الخاسر الأكبر.
(التعديل لحذف حرف زائد)
|
Post: #45
Title: Re: والله في بوردابي بقيت اكرهه عديل
Author: ادم شحوتاي
Date: 10-03-2011, 11:53 AM
Parent: #43
Quote: لكن العنوان ما بيشبهك.
|
ابو لارا الجميل
لا لا انت ما تعرف تكره كداب ساي
|
Post: #46
Title: Re: والله في بوردابي بقيت اكرهه عديل
Author: محمد زكريا
Date: 10-03-2011, 12:12 PM
Parent: #45
والى صاحب هذا البوست بكل محبه وبدون اى كراهيه
Quote:
قديتنا ياخ ... أنت عارف انك بالطريقة دي
بترجع البوستات المفيدة لي الصفحات المتأخرة
وانت بتحتل الصفحة الاولي بدون فائدة لينا
وتفيد الجبهة الاسلامية بس لانك مثلهم تغيب
الحقيقة عن المتصفحين |
ولان هذه البوست المفيد حتماً سيحتل الصفحه الاولى
============
معليش اديتك ليها فى الانكل مش كده
|
Post: #47
Title: Re: والله في بوردابي بقيت اكرهه عديل
Author: جعفر محي الدين
Date: 10-03-2011, 12:55 PM
Parent: #46
ونأمل من بكري أبو بكر
زي ما حدد كوتة للمداخلات
أن يحدد كوتة للبوستات
سلام بخاري
|
Post: #48
Title: Re: والله في بوردابي بقيت اكرهه عديل
Author: بخاري عثمان الامين
Date: 10-03-2011, 04:53 PM
Parent: #47
Quote: الظريف إنو كل واحد جاء هنا، شايل معاهو فقعة مرارة من زول.
بخاري سلام ....
الموضوع وافق ناس كتيرين .... لكن العنوان ما بيشبهك.
دُم بخير |
والمكان براح ليهم يا ابو الريش يا صديق ...
معليش للعنوان الصادم لكن حقيقة لمن كتبت الكلام
كان دا احساسي
|
Post: #49
Title: Re: والله في بوردابي بقيت اكرهه عديل
Author: بخاري عثمان الامين
Date: 10-03-2011, 04:58 PM
Parent: #48
| Quote: معليش اديتك ليها فى الانكل مش كده |
أنت ما اصلا فنان يا محمد زكريا
|
Post: #50
Title: Re: والله في بوردابي بقيت اكرهه عديل
Author: بخاري عثمان الامين
Date: 10-03-2011, 05:04 PM
Parent: #49
Quote: ونأمل من بكري أبو بكر
زي ما حدد كوتة للمداخلات
أن يحدد كوتة للبوستات
سلام بخاري |
أجمل أقتراح
|
Post: #51
Title: Re: والله في بوردابي بقيت اكرهه عديل
Author: بشير أحمد
Date: 10-03-2011, 05:10 PM
Parent: #48
|
Post: #52
Title: Re: والله في بوردابي بقيت اكرهه عديل
Author: بخاري عثمان الامين
Date: 10-03-2011, 05:29 PM
Parent: #51
Quote: ابو لارا الجميل
لا لا انت ما تعرف تكره كداب ساي |
تسلم يا خال ( لارا ) يا أجمل
تعبنا من حسن النوايا( الذي نفترضه )
والذي يضيع جزء من مجهودنا هباء وغبـاء
|
Post: #54
Title: Re: والله في بوردابي بقيت اكرهه عديل
Author: ABUHUSSEIN
Date: 10-20-2011, 02:13 PM
Parent: #53
كدي شوف قلة الأدب هنا :-
| Quote: اناهيد اسمك جميل و حروف اسمك اجمل و لو الصورة دى حقت ما بطالةيعنى نديها 10 فى المية و ممكن نخت الواحد قدام الصفر عشان . |
لاحظ لي قلة الأدب الحقيقية لأنها عايزه ليها تمحيص و تركيز شوية يا بخاري....
|
|