حِـلـيّـلـك يـا الـبـشـيّـر... اشـعـآر ود الـمـديـر وشقشقـة الزرآزيـر.

حليلك يا البشيّر...

الشعبِ قام يسيّر
في الشارع ليهو هدير
الليلة وين تطير؟
حليلك يا البشير
عامل أسد شِريّر
في الفارغة ليهو هدير
وفي الرقص مالو نظيّر
عامل جعيص وخطير
لآمن وقع في البير
الشعب زي السيل
في الشارع ليهو هدير
ويطالب بالتغيير
الليلة وين تطير؟
حليلك يا البشير
الشعب صبر كتيّر
لا موية فوق الزير
جفت في المواسير
وقفتو البوابير
وشردتو المناصير
يا نافخين الكير
ليكم يوماً عسيّر
الليلة ويّن تطيّر؟
حليلك يا البشير
حال العِباد خطيّر
ما بيحمل التأخيّر
مِلآريا وبواسيّر
التايفُد والصِفِيّر
صِبح العِلآج عسيّر
حال المدارس شيّن
لا كنبة لا طبشيّر
وحال المواطن شيّن
لا حُوّت لا فول لا صِيّر
لا شوربة قرآقيّر
لا كِسرة لا فطيّر
يا ربنا المُجيّر
في جنبك نستجيّر
من حُكماً جد عسيّر
في راسو عُمر بشيّر
وبقيّة ناس الطير
ناس نافع الحقير
وشيخ علي الخبير
في سوق المواسير
وكرتي العامل وزير
للشحدة فرّ يطيّر
والعالم النِحريّر
عصام ود البشير
وأمين حسن الثقيل
نهبوا البلد والخير
الليلة وين تطيّر؟
يا عمر البشير
يا شعبنا الأمير
رجال الباسابير
الباوقة والجِويّر
الدآمر والعِشيّر
تنقاسي والقُرير
ما ترُقدُوا في السرير
الظُلم صِبِح كتير
ولا بُد من التغيير
حُكماً ما فيهو خيّر
عسرلنا اليسيّر
ضيّق علي الخُلُوّق
وسمك البحر والطير
والقُمري والحِميّر
والجِن والزرآزيّر
يا الله يا قديّر
بقُدرتك يطيّر
ما يفضل فيهو وزيّر
لا امن لا مُشيّر
مولانا يا قدير
يا عالي يا كبير
يا جابر الكسير
دبرنا يا بصير
بي أحسن.. التدبير
انصرنا يا نصير
يسر لنا العسير
وطيرلنا البشير
ــ
ــ
ــ
معاوية المدير...

الشعب صبر كتيّر
لا موية فوق الزير
جفت في المواسير
وقفتو البوابير
وشردتو المناصير
يا نافخين الكير
ليكم يوماً عسيّر...

Quote: يا الله يا قديّر بقُدرتك يطيّر ما يفضل فيهو وزيّر لا امن لا مُشيّر مولانا يا قدير يا عالي يا كبير يا جابر الكسير دبرنا يا بصير بي أحسن.. التدبير انصرنا يا نصير يسر لنا العسير وطيرلنا البشير

اللهم امين واحفظ لنا شاعرنا المدير .
شكرا اخ معاوية ابداع ..

Quote: حليلك يا البشير عامل أسد شِريّر في الفارغة ليهو هدير وفي الرقص مالو نظيّر عامل جعيص وخطير لآمن وقع في البير الشعب زي السيل في الشارع ليهو هدير

ودالمدير مليون تحية
مزيدا من التقدم

Quote: اللهم امين واحفظ لنا شاعرنا المدير . شكرا اخ معاوية ابداع ..

سلآمات يا علي.
يا اخي ربنا يحفظك إنت والوليدآت.


مشكور كتير علي المرور.
تحياتي...

وبِلْحيل كتير شكرن وَدّا المَدَير

Quote: مولانا يا قدير يا عالي يا كبير يا جابر الكسير دبرنا يا بصير بي أحسن.. التدبير انصرنا يا نصير يسر لنا العسير وطيرلنا البشير

آمييييييييييييييييييييين

شكرا ود المدير

تحياتى

نختمها ليك بالصلاة

صليت الوف تكرير

عدد الدواب والطير

والمروي والمطير

الطماطم والجرجير

اكفينا من دردير

ومن كلام تنظير

ومن ديون الغير

ومن رئيس ومدير

بيوت من التكسير

من عبدك المدير

ذو الذنب الكبير*

توصل نبي الخير

ـــــــــــــــ
* درج كبار المداح على ختم القصيدة بالصلاة على النبي وذم انفسهم

ذكرت طرفه عن احد حيران الشيخ الشريف الزاكي واسمه كدرو

جاء لابن الشيخ بمدحة واراد ان يختمها له

وكان كدرو هذا من عشاق المريسه

فقال له ابن الشيخ ختاما للمدحه

كدرو الخايس شراب المرايس

فزعل كدرو وقال ليه ( بتنبزني ابوي الشيخ؟)

فرد له الشيخ

( شفت ليك مادح شكر روحو؟)

Quote: ودالمدير مليون تحية مزيدا من التقدم

سلآمات يا ود ابنعوف
اخبارك يا زول؟؟؟

نسأل الله ان يزيل الكرب والهم النزل
فوق البلد بسبب هذا الحكم السرطان...

إبداع كثير
يا ود المدير
وبطير البشير

ود المدير شوف طريق دخل لى التثنية دى

ثنيت بالبشير النذير
شفيعنا يوم زرزير
وخلفاهو ومن كان نصير
من ابوبكر لا مصعب ود عمير
يحلونا من ناس البشير
وعبد الرحمن ود الخضير
الشهانا لحم البقر والطير
وخلانا نحلم بالكوارع وعضم القصير
وقطع صوت نقاع الزير
ونافع مانافع بل ضرير
امين حسن عمر الشرير
عبد الرحيم احمد العوير
سبدرات يلحق قوش وزيو يطير
كرتى وزير الخارجية والاسمنت والجير
والارزقية الزهاوى وجلال الدقير
ونهار وكل محتال حقير
وكمال عبد اللطيف قصرلو العمير
والطيب مصطفى اريتو بطيارة الزبير
والمنتفعين ناس تهليل تكبير
وكل الناسين ضمة الشبير
كأنهم خلصوا من سؤال نكير
ناس اسامه مهندس التهجير
الجدعو اهلنا فى الهجير
لا راعو صغير لا بعرفو كبير
لاخافو عليهم من شمس او زمهرير
مولاى يا رازق ياقدير
تطير ناس البشير
عشان سودانا يكون بخير
ونرجع نجيب ناس سلفاكير
وملوال يجاور محمد خير
ونعيش اخوان جعليين وفور ونوير
حسن يسكن ملكال وشول فى القرير
وسودانا يكون قائد التنوير
ياربى يا بصير
ود الموج وود المدير
واقعين ليك نستجير
نظمو الشعر تصوير
عشان شعبنا الفقير
تحلو من على والبشير

Quote: وبِلْحيل كتير شكرن وَدّا المَدَير

المطرطش يا اعزّ الناس.
يا راجل فقدناك كتير في ايام غيابك،
واسعدتنا جد طلّتك.

كتّر خيرك...

Quote: آمييييييييييييييييييييين شكرا ود المدير تحياتى

حباب مهيرة.
حتماً سنصل بمشيئة الله تعالى.
لك عظيم الشكر علي المرور.
تحياتي...

Quote: نختمها ليك بالصلاة صليت الوف تكرير عدد الدواب والطير والمروي والمطير الطماطم والجرجير اكفينا من دردير ومن كلام تنظير ومن ديون الغير ومن رئيس ومدير بيوت من التكسير من عبدك المدير ذو الذنب الكبير* توصل نبي الخير ( عليه أفضل الصلآة، واتمّ التسليم )... ـــــــــــــــ * درج كبار المداح على ختم القصيدة بالصلاة على النبي وذم انفسهم ذكرت طرفه عن احد حيران الشيخ الشريف الزاكي واسمه كدرو جاء لابن الشيخ بمدحة واراد ان يختمها له وكان كدرو هذا من عشاق المريسه فقال له ابن الشيخ ختاما للمدحه كدرو الخايس شراب المرايس فزعل كدرو وقال ليه ( بتنبزني ابوي الشيخ؟) فرد له الشيخ ( شفت ليك مادح شكر روحو؟)

شيخنا في ادب المديح،
ود الخليفة.
إزيّك يا زول.
يا أخوي الحمد لله الماشكرت نفسي. كان بقت علي البقت
علي اخونا كدرو.

تحياتي...

Quote: إبداع كثير يا ود المدير وبطير البشير

مصيرو يطير يا نصر ولو طال الزمن.
مشكور علي الطلة.
تحياتي يا عزيز...

Quote: مولاى يا رازق ياقدير تطير ناس البشير عشان سودانا يكون بخير ونرجع نجيب ناس سلفاكير وملوال يجاور محمد خير ونعيش اخوان جعليين وفور ونوير حسن يسكن ملكال وشول فى القرير وسودانا يكون قائد التنوير ياربى يا بصير ود الموج وود المدير واقعين ليك نستجير نظمو الشعر تصوير عشان شعبنا الفقير تحلو من على والبشير

عشان شعبنا الفقير
تحلو من على والبشير
ويربط سمانا سحاب
مطراً يعم بالخير
ضرع السعيّة يدُر
وزرعاً غزيّز ونضيّر
سنابل القمح في ام شيّر
نصوبر تمرنا كتيّر
للغاشي والماشي
حتي الوحوش والطيّر
في بابو ما في غفيّر
لا طبلة لا جِنزيّر
صديق اخوي وأنا
ندعوّك يا قديّر
الخائن البشيّر
يصبح في قيدو اسير
وللمجكمة يصيّر
نتفكة من نافع
والشيخ علي الشرير
نرجع بلدنا امآن
لا ظُلم لا تهجيّر...

آمين يا رب العالمين...



والله يا صديق الموج، اللتاريك
ماك هيّن...

Quote: والمنتفعين ناس تهليل تكبير وكل الناسين ضمة الشبير كأنهم خلصوا من سؤال نكير ناس اسامه مهندس التهجير الجدعو اهلنا فى الهجير لا راعو صغير لا بعرفو كبير لاخافو عليهم من شمس او زمهرير مولاى يا رازق ياقدير تطير ناس البشير