حلمك مدمدم ومتكى
والليل شرب باقى الدوايه
عطشك متاوقة البيوت
جيهة البحر
ريقك نشاف الأمنيات
همك ملافات البدايه
نوح الحروف
جمر السفر
ساعة مواعيد الحكايه
طارت بعيد
ركت على وش القمر
وتلت التلوت
الأصلو واحد وانقسم
بلدا كبير
مرق المودة الإنكسر
حلما يكابد ما فتر
لون الكحل
روح الحليب
روح الكحل
لون الحليب
ممزوجة فى دم البلد
والريد حداهن منسجم
خت الحلم
سواهو ضل
لفحة هجيرك همبريب
لون الكحل
روح الحليب
ولامن نشيدك ينصلب
يزعل يفوت يختا الدرب
يحرد يلون ليل صفاك
تبقى الريشه نغمة غنيتك
واللوحة تتحدى السكوت
ترقص تصفق بى قفاك
والمعنى شهقات الوتر
فرح الوجيع البشتكى
وحلمك مدمدم ومتكى
حلم البشر ملدوغ رقد
هوى يا بشر
خلو النضم
نادو الفكى
قصو الأتر
الداهية وين ؟
دخلت جحر حيطة الكلام
ولا اللسان اصبح حجر ؟
حلمك مدمدم ومتكى
دفق محايتك يا الفكى
البسمة ترياق الوجع
الريده مخلاية الوئام
الضحكة مقلاع الفزع
بلدا مبحلق فى الشمس
شايل نهارات السؤال
حسا مصنقع من أمس
ينده تساويف المحال
حلما هناك لابس الضيا
بهرج حقيقتك
وإنكسف حد الخيال
ويا طالع الأكوان
جيب لى معاك وصال
يربط يكفينا
يا حارس الأحزان
خلى الحزن ينشال
من همنا الفينا
أملا المخالى أمان
بلدك بشاره وفال
عرج على الحبان
خلى المحبة تهل
تدى البلد شبال
يا طالع الأكوان