تصفيات غانا 2008: السودان يقهر موريشص بثنائية عجب!

تألق المنتخب السوداني في مباراته اليوم أمام منتخب موريشص في إطار التصفيات المؤهلة لنهائيات الأمم الأفريقية بغانا 2008 واستطاع قهر الفريق الموريشيصي بهدفين مقابل هدف نالهما هداف السودان العالمي فيصل العجب على مدار الشوطين.
وبهذه النتيجة يقبع منتخبنا خلف المنتخب التونسي المتصدر للمجموعة والتي يتبقى لنا معها مباراة بأمدرمان قد تحدد المتأهل مباشرة للنهائيات التي غبنا عنها منذ 1976م

مبروووووووووووووك للسودان ياراكوبا والله اليوم سعيد وكأنه عيد.

واثبت الملك فيصل من جديد قدرته على العطاء والبذل سواء مع المريخ أو مع الفريق القومي، ويرد عملياً مع كل من يطالبه بالإعتزال!
مبروك للسودان ياسامي، وعقبال قهر نسور قرطاج في الردكاسل

ألف مبروك يا راكوبة
مبروك للسودان..
أول مرة ألقى نفسي بقول : الله عليك يا( العجب )
تحية لكل اللاعبين الفرسان
ويا رب تتواصل الانجازات ونصل للنهائيات

سلام يا حاتم
كان بإمكان صقور الجديان الفوز على هذا الفريق بنتيجة كبيرة، ولكن يبدو أن ارضية الملعب المبللة قد أثرت على أداء اللاعبين وخاصة في الهدف الذي ولج مرمى المعز محجوب.
المهم الثلاث نقاط، وإن شاء الله تكون تعزز جهود السودان للعودة إلى الاضواء الأفريقية من جديد
مع العلم ان تونس قد فازت على سيشل بثلاثية نظيفة أحرزها لاعب الترجي عصام جمعة

مبروك
تعرف الكورة دي ممكن تنسينا هموم كتير

حبة فرح لله يا أخوانا

والله يافضل ما أحوجنا للفرح
اولادنا ما قصروا الليلة
ومبروك تاني للسودان

مبروك يا راكوبة للسودان

مبروك العجب التألق و ليس غريب على (عجبكو)


الحاج حمد

الحبيب راكوبة...تحياتي

اولا مبروك للسودان....ولكل لاعبي المنتخب دون تمييز او انتماء لان المقام مقام وطنية....والعجب لاننتقص من حقه لكنه احد افراد التيم ولو لاهم لما احرز الاهداف...

ثانيا لا اخفي انتقادي للاخ مازدا....ومن الخطأ ان يكون مدرب المنتخب مدرب احد طرفي القمة...ففي النفس شيئ من حتي...حتي يستقيم الوضع..

[B
]د. ياسر
تعلم الظروف التي يعانيها الفريق القومي، خاصة بعد المباريات القوية التي أداها لاعبو القمة في الأيام الماضية، فضلاً عن التنقلات المكوكية بين تشاد إلى الخرطوم ثم لأديس ثم الخرطوم للاعبي المريخ ومن الخرطوم لأديس ثم للخرطوم ثم للقاهرة ثم للخرطوم ثم إلى موريشص في أقل من اسبوعين.
لعب الفريق باقتصاد شديد، معتمدين على خبرة لاعبينا في انهاء نتيجة هذه المباراة، خاصة مع تواضع الفريق الخصم، ومع تواتر الأنباء حول هطول الأمطار لفترة، تكون قد أثرت بعض الشيء في الأداء، ورأينا مازدا وهو يوجه طوال المباراة وبقوة للاعبين، فلا نبخس للرجل اجتهاداته.

الحاج
مبارك الانتصار، الملك فيصل اسطورة حية في الملاعب السودانية بعطائه الثر وأهدافه الرائعة

مبروك لشعب السودان
مبروك صقور الجديان

د. سعيد
مبروك لنا جميعا انتصار الوطن

مبروك لصقور الجديان
واجمل ما في هذا الانتصار
العجب عجبي عجبــــــــــــــــــــــــــــــــــــــــــــــنا
ومن غيرنا يعطي لهذا الشعب معنى
ان يعيش وينتصــــــــــــــــر

وانا اول مره اتفائل احس انه ممكن نتأهل
ودمت يا مريخابي يا اصيل

الحبيب راكوبة

شاهدت المباراة ودعني اقول لك بصريح العبارة اذا اردنا التقدم في البطولة الافريقية فليحضر الاتحاد مدرب صريح وخلينا من العواطف دي ... فمازدا مابينفع والواحد كان يده في قلبه لحدي اخر المباراة.. والنتيجة لا تعكس طبيعة المباراة.. فقط الهدف الاول للعجب نتيجة تمريرة من هيثم مصطفي لطمبل للعجب وسط خطأ للحارس الذي لايجيد الضربات الارضية .... اما الهدف التاني فهدية صريحة من الحارس عكس مجري المباراة تماما....الواضح انه لاتوجد خطة ... كل بيلعب علي كيفه...ونتيجة لذلك حدث سوء تنسيق في الدفاع...والاعتماد كان فقط علي امكانات اللاعبين الفردية...يعني بصراحة رجعنا للعك الكروي بتاع مدربينا الوطنيين بعد ما ابتدينا صاح مع المدربين الاجانب علي مستوي الاندية ...وخير دليل كلامك

Quote: لعب الفريق باقتصاد شديد، معتمدين على خبرة لاعبينا في انهاء نتيجة هذه المباراة، خاصة مع تواضع الفريق الخصم، ومع تواتر الأنباء حول هطول الأمطار لفترة، تكون قد أثرت بعض الشيء في الأداء، ورأينا مازدا وهو يوجه طوال المباراة وبقوة للاعبين، فلا نبخس للرجل اجتهاداته

دي نفس النغمة الكنا بنسمعها زمان لما نطلع من البطولات الارهاق والسفر والمطر وهلمجرا.. بس باقي الجملة الشهيرة كسبنا احتكاك ... وانت ذكرت انو المنتخب التاني ضعيف لكن والله قرب يغلبنا

احنا مقبلين علي جولة اصعب.. وتونس مازي ديل .. والمجاملة مابتنفع .. وقوف مازدا او جلوسه ما بيأكل عيش.. في خطة بتفوز .. في عك زي دا عليهو العوض وما يعشمونا كتير

د. ياسر
الاتحاد العام اعلنها صراحة بأنه لا يستطيع توفير مدير فني اجنبي للمنتخب،نسبة للتكاليف المادية الكبيرة، فماذا نفعل في هذه الحالة؟
مازدا افضل مدرب وطني مؤهل في السودان الآن، وكما ذكرت فالرجل يملك خبرات ميدانية جيدة، وموضوع الارهاق ليست فرية بل واقع حقيقي يعيشه لاعبو القمة خاصة الدوليون منهم

تبديلات (مازدا) الخاطئة .. كادت أن تفقد السودان نتيجة أهم مباراة !!!
الحكيم تاج السر قال

الف مبرووووووووووووووك لمنتخبنا
تقدم منتخبنا الوطنى بهدف فيصل العجب

.
راكوبة

Quote: الملك فيصل اسطورة حية في الملاعب السودانية

غايتو دي بالغت فيها عديل
إلا لو قاصدها ( نكتة ) اليوم

يا شباب شفتو المباراة وين ؟؟ أنا المسكين تابعتها عبر الإذاعة
.

اخونا وحبيبنا راكوبة :
بعيدا عن كل التعصب نقول مبروك للسودان ..
لكن خلينا نتفق إنو العجب تحديداً كان أسوأ لاعب في المباراة مع هيثم طمبل ونوعا ما ريتشارد ..
العجب بطئ جدا وتقيل جدا وحركته في الميدان اصبحت غير مؤثرة وحتى الهدف الثاني لا اتوقع ان العجب لعب فيه دور فعال فالمراوغة كانت ضعيفة وقديمة ولا تنطلي على مدافع مبتدئ
والحارس جا وتم لناقصة ..
هيثم طمبل تغيره جاء متأخراً جدا وهيثم طمبل بقا لاعب غير مزعج ويبدو انو الغرور بدا يدخل للاعب وبدا يحس إنو هو المهاجم الاوحد في السودان عشان كده لازم يجيبو ليهو منافس واقترح مهاجم الموردة صالح عبد الله ..
ريتشارد بالأمس تحس بيهو بيجلط كتير وبيسرح عن العمق وما بيلتزم بي مشايلة الجمب الايمن مع سفاري أو الايسر مع علاء الدين ..
الشي المهم إنو وبكل صراحة الفوز لا ينسب لمازدا لا من بعيد ولا من قريب فمازدا اثبت وبكل أسف إنو مدرب تعبااااااااااان بكل ما تحمل هذه الكلمة من معنى
والتوجيهات التي كنا نسمعها منه عبر المايكرفون كانت مخجلة وتزكرني بتدريب الروابط ...
أرجع ..أرجع .. أرجع والله لمن قلت الزول ده بيتكلم مع سواق راجع خلف..
العجب العجب خش عليهو خليك قدامو يا هيثم أجري وراهو شديد يا علاء الدين !!!!!!
معقولة يكون بيوري في اللاعبين ابجديات الكورة اثناء المباراة ؟؟؟؟
المدرب بيكورك وينبه اللاعبين لي خطة اللعب أو لو عايز يعدل في الخطة أو لو عايز يوصي لاعب على اسلوب جديد لكن ما يقوم به مازدا جعلني اتأكد بأنني يمكن أن أدرب هذا المنتخب!!!!!!!
منو القال ليك يا راكوبة مازدا افضل مدرب حالياً ؟؟؟؟
لو للتأهيل فا أمين زكي هو الأكثر تأهيلاً وهو المجاز كمحاضر من الاتحاد الدولي...
كشطارة فالفاتح النقر أشطر بكثير من مازدا !!!!
كتنظير فحسن المصري الاكثر تنظيراً ..
المجاملة يا راكوبة فقط هي المجاملة ومازدا محظووظ جدا لأنو وجد لاعبين يتم تجهيزهم بواسطة مدربين اكفاء (ريكاردو واتوفيستر) وإلا فالسودان كان اخد سبعة من موريشص..
المنتخب بشكله الحالي لا يحتاج لمدرب وفقط يمكن ان يتجمعوا وهيثم يقول ليهم يا شباب نلعب الكورة البنعرفا ..
مازدا من عيوبه اهتمامه بالمريخ اكثر من المنتخب فلا بدر الدين قلق مصاب تلك الاصابة ولا بهاء الدين في خطر ولا صالح عبد الله الذي البسه مازدا الجبص هو وطبيبه كان يحتاج !!!!!

ودالفاروق
تحياتي
لا أحد يختلف على موهبة الملك فيصل وخبرته الميدانية الكبيرة، والتي تمكنه من ترجيح كفة أي فريق يلعب له في أي وقت، وهو لاعب مهم لا يمكن أن يستغني عنه أي مدرب وطني أو أجنبي، فهو صانع ألعاب وهداف كبير يمكنه اللعب بالرأس والتسديد بالقدمين والمراوغة وتسديد الكرات الثابتة.
هيثم طمبل عابه التسرع في إنهاء الهجمة والشفقة، وهي خصلة موجودة فيه من أيام (الضلال) وأتمنى أن تعالج ، فإذا ركز قليلاً على المرمى سوف يكون له شأن آخر، خاصة وأن حساسيته تجاه الشباك عالية، وهي الموهبة الأساسية التي يحتاجها كل هداف، وبدونها يصبح أي مهاجم دون قيمة تذكر.
أما العم ريتشارد فهو معروف عنه أنه مدافع بطيء ودونك هدف عمرو زكي في الزمالك حين اتهم الإعلام الأزرق الحكم بتمرير تسلل وعند الإعادة ببطء شديد تبين أن ريتشارد هو البطيء وهو الذي سمح لعمرو زكي البطيء أيضا بالمرور والتسجيل، ولكن يبقى هو المدافع الأوحد حالياً خاصة مع استجلاب المريخ لمدافعين أجانب، وامتلاكه لمهارة التسديد من الخارج، مع إنني أرى أنه تسبب في الهدف الذي ولج مرمانا أيضاً بسوء تغطيته.
أما صيحات مازدا فهي اعتيادية ونسمعها مراراً وتكراراً من أكبر المدربين في العالم ولا تنقصه شيء، فإن كان يوجه اللاعبين بأداء شيء نسوه فهذا لا يعيبه في شيء إنما اللاعبين الذين تناسوا المهام الموكلة إليهم.
ومازدا من أكثر مدربي جيله الآن احتكاكاً بالمحافل الدولية، مقارنة بمن ذكرتهم من المدربين الوطنيين، ولا يمكن أن ننسى ما قدمه حتى الآن للفريق القومي من صعود لنهائيات العرب والفوز بسيكافا والأداء الجيد في التصفيات حتى الآن.
أما فريه اهتمامه بالمريخ فهي محاولات يائسة من (إعلام الضلال) لخلق رأي عام حول أداء الكابتن مازدا، ولكن هيهات، مازدا باق والسودان سوف يتأهل بإذن الله تعالى إلى نهائيات غانا 2008م .

ابو الرواكيب:
شكلك حسيت إني متحامل على المريخ ليس اكثر..
صدقني العجب من اكتر اللاعبين الانا بخاف منهم في المريخ خصوصا في مباريات الهلال..
العجب حريف وعندو لمسة سحرية ويسارية ممتعة ولمساتها راقية ..
لكن العجب في مباراة السودان فعلاً كان عبء على الفريق أو خلينا نقول لاعب في خانة غير التي يتعود عليها أو التي نتمناه فيها..
ريتشارد في هدف عمر زكي لا اتوقع انه كان موجود اصلاً لأنه كان قد تقدم وترك خانته التي غطاها داريو كان " هنا خطأ ريشتارد في عدم العودة" لو انا متزكر اللقطة كويس..
ريتشارد لاعب مزاجي ومرات فوق ومرات تحت ..
طمبل حساس تجاه المرمى نعم لكن هذه الايام بعيد عن الفورمة ..
بالنسبة للتعامل العشوائي لماذدا فدعني اطرح عليك سؤال:
ما هو سبب اختيار علاء الدين بابكر للفريق القومي؟؟؟؟؟
هل هي مباراة المريخ والقطن ؟؟؟؟؟؟؟

ماذدا يختار لاعبين من تمارين المريخ يا راكوبة ودونك سفاري بل وجوليت من الهلال..

Quote: الاتحاد العام اعلنها صراحة بأنه لا يستطيع توفير مدير فني اجنبي للمنتخب،نسبة للتكاليف المادية الكبيرة، فماذا نفعل في هذه الحالة؟

في هذه الحالة ننسي الموضوع ياراكوبة...من غير تفاؤل

ودالفاروق
تحية مجددة
علاء الدين بابكر لاعب حريف وسريع وخطير ويشهد بموهبته الجميع، إلا أنه كان يمر بظروف نفسيه ايام (الضلال) ولكنه تعافى منذ أو وطئت قدمه ديار الزعيم، فمكانه الصحيح هو الفريق القومي، فهو لاعب سريع يجيد الاختراقات وخلخلة الدفاعات، والعكس وبإمكانه اللعب في وظيفة المهاجم الصريح، فليس مستغرب أن يختاره مازدا، خاصة مع إصابة الشاب نتالي وصالح عبد الله، إضافة إلى ان مقدمة نادي الهلال كلها من النيجيريين.
وقد يخيل لك ان الخيارات واسعة امام مدرب الفريق القومي، ولكن في الحقيقة هي محدودة للغاية، فالمدرب في مباريات مهمة يحتاج إلى لاعبين لهم دراية باللعب الدولي وقد عركوا المباريات الأفريقية من قبل، وجاءت طامة المحترفين الذين باتوا يتوزعون في كل مراكز اللعب لتضيق الخيارات أكثر فأكثر.
ومدرب الفريق القومي يتاح له مباراة ودية مع أثيوبيا كل ستة أشهر! فماذا عساه أن يفعل ، أو من أي يأتي بلاعبين؟!

الف مبرووووووك
الصورة دي عشان اولاد كوبر

ولكن في الحقيقة هي محدودة للغاية، فالمدرب في مباريات مهمة يحتاج إلى لاعبين لهم دراية باللعب الدولي وقد عركوا المباريات الأفريقية من قبل،

ممتاز جداً وجميل شديد ..
يلا بس وريني علاء الدين بابكر ده جاب الدراية بي المباريات الافريقية دي من وين ؟؟؟
وخصوصاً تلك التي تقام خارج السودان !!!!!!

بالمناسبة يا راكوبة كلامك ده ما صاح وما عشان اللاعب حريف والمدرب عارفولعاب يقوم يشيلو في المنتخب..
في كل بلاد العالم اللاعب البيكون ما بيلعب مع فريقو بي صورة مستمرة ما بيختاروهو اصلاً في المنتخب ولو كان منققققققطا يعني لو زي رونالدينهو وزيدان خليك من ناس علاء الدين ..
نحن عندنا اللاعب لو ابدع في مباراة واحدة بس بكرة بتلقاهو في القومي!!!
كدي جاوبني اسة وريني علاء ده جاب الخبرة الافريقية دي من وين وبعد داك نشوف..

عمر
علاء الدين لعب من الهلال مباريات أفريقية عديدة في ملعب الهلال، ويحق لأي مدير فني لمنتخب إضافة من يراه مناسباً للفريق، خاصة وانه يحتاج إلى لاعب سريع في خط المقدمة مثل جيمي ناتالي، الذي تمت إضافته للمنتخب في منافسات سيكافا وكان سبباً رئيسياً في فوز المنتخب بتلك الدورة.
فاللاعب كان متوقفاً من النشاط والآن عاد بكل حيوية إلى (الدنيا) بعد (الضلال)، وكله آمال لتمثيل بلاده والمريخ العظيم أفضل تمثيل.
ويكفي أنه أعلن من داخل المطار أنه مستعد للسفر مع الفريق إلى أي منطقة في العالم، على الرغم من أن والدته طريحة الفراش شفاها الله.
وعلاء الدين (شطارة) لم يبدع في مباراة واحدة، بل ما ظهر به حتى الآن امتداد طبيعي لمهاراته الكبيرة التي حاول البعض تحجيمها والحكم عليها بالإعدام بالإيقاف الإداري وغيره.

العزيز راكوبه
هاك دي من مزمل ابو القاسم لأعلام الضلال

Quote: * عجبكو تعتق وثبت.. عجبكو ريح البلد وأسعدها. * إنه (الملك) الذي بلغ به (العجب) مداه.. وأصبح في الفن مبتداه ومنتهاه. * يرميه إعلام الحقد بالحجر.. فيرميهم بأطيب الثمر. * العجب يقود حملة الوصول للنهائيات الإفريقية.. وإعلام رد الفعل يحاربه بطريقة قذرة. * الملك فيصل يردد (نحن جند الله.. جند الوطن).. وإعلام اللؤم يشتم (جند الوطن)! * الأمم كلها تعظم نجومها.. وإعلام الترصد يحاربهم.. ويسعى لتحطيمهم. * كل صاحب نعمة محسود.. والعجب محسود. * اللؤم والحقد داءان قديمان دفعا إخوة يوسف لرميه في البئر. * إعلام (رد الفعل).. إعلام (رجع الصدى) لا يقدم ولا يؤخر. * ما كتب عن الملك فيصل لم يكن نقداً.. بل حقد تحركه عصبية القبيلة! * العجب تنطبق عليه مقولة: (إن الأولي قد كنت أرمي دونهم غلوا يدي وحطموا أقواسي)!

يا راكوبة مالك يا اخوي داير تبقا لي زي ناس كيجا يجوك بي جاي تمشي بي جاي ما كنت كويس

يا راكوبة ياخ انت زول بتفهم كورة فخلينا من كلام العاطفة ده ..
مازدا يجامل دي مافيها كلام ولو افترضنا انو لا يجامل فطريقة الاختيار في المنتخب فاشلة ..
ياخ ممكن اسألك سؤال ؟ وين ابو حشيش؟؟؟؟؟
يعني عشان مشى جزيرة الفيل ؟؟؟
طيب علاء الدين ده لو افترضنا فريق(الضلال) ما كان بيسافر معاهو طيب ما يسافر مع المنتخب !!!!
طيب يا راكوبة اوزن لي المعادلة دي :
لاعب لا يشارك مع فريقه المحلي(جيمي ناتالي) ويجي يكون اساسي مع المنتخب القومي مع العلم أن نفس المدرب يدرب الفريقين (القومي والمريخ) ونفس اللاعب موجود ؟

الاختيار ليس على اساس اللاعب في نادي قمة أو المريخ تحديداً، والدليل اختيار مجاهد منذ كان في جزيرة الفيل ذاتها، وزهير زكريا والعوض حارس المرمى وغيرهم!
أما حكاية علاء الدين فالكل يعرف أن اللاعب كان يعاني من رهاب ركوب الطائرات، وقد بدأ العلاج النفسي منذ أيام (الضلال) ولكن يبدو أن نفسيته كانت متأثرة بأكثر من ركوب الطائرات.
والحمد لله (الآن) بدأ في التعافي وظهر بصحة نفسية رائعة، وروح مقبلة على الحياة مليئة بالتفاؤل!
أما وزنة المعادلة فهي كالتالي:-
(تألق ناتالي مع المريخ في نهاية الموسم الماضي) = ضرورة ضمه للفريق القومي الذي شارك في سيكافا بدون طمبل
أما
(استبعاده حاليا من المريخ والفريق القومي بسبب الإصابة التي لحقت به)
النتيجة
(اللاعب بدأ في التعافي ورجع لتمارين الكرة مؤخراً) يعني عودته مجدداً للفريق القومي ليست مستغربة!

لا يا راكوبة كلامك ما صاح ...
جيمي ناتالي متوقف عن اللعب مع المريخ حتى من قبل الاصابة ..
وجيمي نالتالي لعب مباراة الهلال والمريخ وكان كنبة الاحتياطي..
جيمي ناتالي يا راكوبة صرح اتوفيستر انه لاعب مستقبلي ولكن عليه ان يصبر ..
فعلاً حالياً اللاعب مصاب لكنه لم يكن مصاباً في الفترة الماضية ..
يا راكوبة ياخ ما تكابر ساي الله يرضى عليك الاختيار للفريق القومي عشوائي ويحدده الجمهور من مباراة واحدة..
طيب وين زهير زكريا ؟؟؟؟ مش قلت في المنتخب؟
بس اوعا تقول لي زهير زكريا حاليا بعيد عن اللعب التنافسي وووووو
ياخ بعدين مسئول من الخير هو جيمي ناتالي ده تم اختيارو من اساسو كيف وعلى اي اساس؟؟؟
الابداع وحده لا يكفي للاختيار للفريق القومي والدوري الممتاز فيهو من المبدعين كتااااااااااار يعني بس تجي على ناتالي؟
بعدين ياخ في مبدع اكتر من عبد الحميد السعودي؟؟؟؟ الود لعاب وقمة في الابداع ولكن مازدا يتجاهله !!!!
طيب معتز كبير البيقولوا كعب ده مش هداف الدوري اربعة مرات ولسة بيلعب بي روح قتالية واخر مباريات الهلال كان في قمة مستواه ؟؟؟؟
يا راكوبة اسأل مجرب مازدا وفوزي المرضي عنده اعتقاد في بعض اللاعبين بيجيبوهم لو شنو وشنو ..
فوزي زمان لمن يكون لاعب ضد المريخ بيجيب ود الجنيد لو عايز يموت وزاهر مركز لو كراعو مكسورة وفلان وعلان ..
وكذلك مازدا الذي اختار جوليت وهو بعييييييييييييييييييييييد عن الكورة تمااااااااااااااااااااااما وفلان وعلان ..
يكيني لمن كان في المريخ كان جوة المنتخب ولمن مشى الخرطوم 3 تاني الا يلقاها في الشاشة الغشاشة ..
حمد كمال كان كابتن الفريق القومي ولمن مشى لعب في الصبابي تاني ما جابوهو في جريدة خليك من الفريق القومي..
تعرف يا راكوبة انا زمان كنت متكييف من لاعبين اتنين بس هم الحطوا حكاية هلال مريخ دي وعمّروا في الفريق القومي ..
لاعب كان اسمو حسون بيلعب في الاهلي والتاني حمد النيل بيلعب في النيل على ما اظن والإتنين ديل حافظوا على موقعهم كمهاجمين اساسيين في وجود عمالقة الهجوم في هلال مريخ ولسنوات..
غير كده كل اللاعبين موسميين ويتم اختيارهم من مباراة واحدة فقط ..

عمر
جيمي لعب مباراة (قون بي جاي وقون بي جاي) وهي آخر مباراة في الموسم، فكيف تزعم أنه كان متوقف من اللعب مع المريخ؟!
وقبلها شارك مع المريخ في عدد من مباريات الممتاز والمباريات الودية ومباريات كأس السودان، فاللاعب صغير السن وقادم من الدرجة الثالثة مباشرة إلى الممتاز.
وبعدها مباشرة شارك مع الفريق القومي في سيكافا، وبعدها تعرض للإصابة التي ابعدته هو ودامر وآخرين.
أما السعودي فقد كان مشاركاً مع الفريق القومي حتى وقت قريب.
الفريق القومي يمتلك (كلية) لاعبين يتم استدعاء من هم في الجاهزية قبل أي استحقاق يواجه الفريق القومي.
بل يحسب لمازدا عدم اعتماده على اسماء بعينها بحيث يمكنه إضافة وحذف من يبرز ويؤكد أحقيته لحمل شعار صقور الجديان.
أما عن الأسماء التي ذكرتها (يكيني - حمد كمال) فإن ابتعادهم عن الأضواء ليس السبب الرئيس كما حصل مع مجاهد وآخرين، ولكن هبوط مستواهم الفني الذي لا يؤهلهم للعب في الفريق القومي الذي ينازل فرق لها وزنها وطموحها في المنافسات التي تتنافس عليها.
إضافة إلى أن عملية الاختيار ليست مسنودة لمازدا وحده، فهناك الخبير أحمد بابكر ، الذي له دور كبير في اعداد وتأهيل الفريق القومي السوداني.

في حوارة المطول مع الصدى قال اللاعب الفنان هيثم مصطفى التالي.

Quote: العجب احرز الهدفين وتوج المجهود بالنصر ...كيف تراه؟؟؟ كلنا نعرف ونعى تماماً ان فيصل العجب لاعب فنان وقناص ماهر وهداف من طراز فريد صاحب مهارات فنية عالية واستثنائية للحد البعيد وفنان بكل هذه الخصائص من الطبيعي ان يقدم الانتصار لمنتخبه على طبق من ذهب ويتوج مجهودات زملائه بهاذين الهدفين الرائعين في مرمى موريشص وهو لاعب المهام الصعبة التى لايمكن ان ينفذها سواه..لذلك فيصل العجب هو كلمة السر في المنتخب وانا من هنا احييه مجددا على اهداء هذا الانتصار للشعب السوداني واتمنى له المزيد من التقدم والازدهار في مسيرته الكروية.

ونحن ايضاً نحييك يا برنس.

هل من راي اخر يعتمد!!

العجب كواي القلوب ومنتزع الاهات وبلسم الجراح وكلمة السر ووووو.....

لن اتكلم فشهادتي فيك مجروحة.

يا ربي في طريقة نستنسخ العجب ونهدي نسخة للاحباب هناك.!!

أمووووووووووووووووووت وأعرف "الشرّاب" الأصفر ده علاقتو شنو بي علم السودان !!!!
ومن بتين السودان بيلعب بي شرابات صفر ؟؟؟
ولّا يا ربي يكون لمسة من العلم القديم وتكريم للأزهري !!! يا ربي؟

عمر
أقرأ

Quote: سر >الجوارب الصفراء< في زي المنتخب اضطر صقور الجديان لارتداء الجوارب الصفراء بدلا عن البيضاء في اللحظات الاخيرة قبل انطلاقة المباراة· ورغم الاتفاق الذي تم في الاجتماع التقليدي قبل المباراة علي الوان الجوارب تراجع اتحاد موريشوص الي الاصفر وتنازل السودان عن الابيض وحمل مندوبهم الجوارب الصفراء لمدرب المنتخب داخل غرفة الملابس ورفض مازدا في بداية الامر واتصل برئيس البعثة طارق عطا الا انه رضخ للامر حتي لا يشوش علي اللاعبين ليظهر الفريق مرتديا الجوارب الصفراء علي غيرالعادة·

صياغة قوون ركيكة كالعادة، والأمر أن فريق موريشص أصر على لبس الجوارب البيضاء مما أضطر الفريق القومي للبس جوارب باللون الأصفر، وتارة يقولوا انهم اشتروها وتارة يقولوا انها قدمت إليهم كحل لبدء المباراة.

يا راكوبة العزيز

الشرابات الصفراء دي شنو

ودالريح
الغريبة قالوا كان في شراب ناقص قام علاء الدين خرمجة (مرق) ليهو شراب أصفر ، وهتف قائلا " خلاص تمينا" ، معذور مع الضائقة المالية بالهلال ماضامن تكون في شرابات قال يشيل من المريخ ويصبغ إذا لزم!

Quote: أمووووووووووووووووووت وأعرف "الشرّاب" الأصفر ده علاقتو شنو بي علم السودان

ده منتخب الحركة الشعبية يا عمر...



إنتو العنصرية دي حا تسيبوها متين؟

Quote: وحمل مندوبهم الجوارب الصفراء لمدرب المنتخب داخل غرفة الملابس ورفض مازدا في بداية الامر

مازدا معذور يا راكوبة

أي مباراة برة السودان بي شرابات صفراء بيتـغلب فيها!

_____________________________________

مبروك للمنتخب والتحية لفيصل العجب.

ياجماعة الخير الفاز علي موريشوص دا منتخب السودااااااان ما فريق المريخ

ولو احرز الهدفين العجب نحن بنحييهو لكن ناس المريخ واعلام الضلال بتاعهم دا ما ينسبوا الفوز للعجب وللمريخ بس...

ولو المسألة كدا فالمنتخب من حارس المرمي والدفاع والوسط من نادي الهلال فضل بس الاتنين بتاعين خط المقدمة ...ليه ماناس الهلال يقولوا انو المنتخب حقنا...

يعني كل يوم يثبت اهل المريخ واعلام الضلال بتاعهم انو اغلبهم من السذج
م

د. ياسر
لم ينسب أحد الفوز للمريخ أو لاعبيه، بل ما حصل أن الصحافي الهلالي "خالد عزالدين" الذي كان مرافقاً للبعثة قد هاجم الكابتن فيصل العجب أكثر من مرة خلال الشوط الأول ورد عليه الملك فيصل بتسجيل الهدف الأول وخلال الشوطين أصر خالد على رأيه وانتقد العجب بصورة كبيرة، ورد عليه الملك مجدداً بهدف ألقمه حجراً!
والجميع يعرف منطلقات خالد عزالدين صاحب الثغالات الصحافية، وهو المتعصب جداً للون الأزرق، ومع ذلك لم نحسب هذا الانتصار أبدا لنادي، لأنه لا يصح ولا يمكن أن يكون.
لعب أبناء السودان تحت لواء الوطن، وعادوا إلينا منتصرين رافعين الراية التي حملوها وكفى.
ولا داعي من تقليل إمكانيات العجب ورفاقه من قبل إعلام الضلال (الأصلي) فقط لانهم ينتمون للأحمر الوهاج.

مبروك لشعب السودان
مبروك صقور الجديان

ياراقي احساسك