لا للظلم .. على سائقي الركشات رفع قضية في المحكمة الدستورية "ان وجدت"

قريت لي خبر في شريط قناة النيل الازرق عجيب

مفاده، ان على سائقي الركشات الالتزام بالالوان المحددة لكل محلية؟؟؟

انا ما عارف الحاصل شنو، وهل الامر طبق فعلا ام لا

لكن لو كان عندي ركشة كنت احتجيت

يعني لو عندي ركشة والسوق نايم في محلية امبدة وقررت امشي اكوس رزقي في محلية كرري (الخرطوم بها سبع محليات) او (معتمديات)

المهم .. يقوم بتاع محلية كرري وشرطي المرور في كرري يوقفني ويديني غرامة مثلا و للا النظام شنو بالضبط؟؟

دي دكتاتورية ما بعدها دكتاتورية

ان تفرض على مواطن حيز مكاني محدد للعمل وله كامل الحق بالتنقل والعمل والاقامة في اي مكان في السودان الفضل

لا لتضييق المعايش على اصحاب الدخول الضعيفة، لا للمساس بحقوق المواطنة الكاملة لسائقي الركشات وملاكها

الوالي دا جن وللا شنو

استاذ احمد
الايام دي مضايقات شديدة من قبل ناس المرور على عربات الامجاد و الركشات
إيصالات تقيلة و الخريجين الما لاقين شغل و بقو يسوقو ركشات هسة بقو مزانقين من ناس المرور
لكن موضوع اللون دا شكلو ذي قبل سنوات لمن قررو اي باب دكان لازم يضرب بوهية خضراء
تخيل كان لازم تشتري بوهية خضراء من حتة معينة عشان تضرب باب الدكان و إلا ناس المحلية بقطعوك ايصال برضو

رغم كرهي للانقاذ
اشيد بهذا القرار ..
الرقشات و الامجاد اصبحت وبالا في طرق المدينة

العزيز حسبو عكاشة

Quote: الايام دي مضايقات شديدة من قبل ناس المرور على عربات الامجاد و الركشات إيصالات تقيلة و الخريجين الما لاقين شغل و بقو يسوقو ركشات هسة بقو مزانقين من ناس المرور

الظاهر عليه داير يبدأ بناس الركشات ديل، موش قايل داير يفضي الخرطوم

Quote: لكن موضوع اللون دا شكلو ذي قبل سنوات لمن قررو اي باب دكان لازم يضرب بوهية خضراء تخيل كان لازم تشتري بوهية خضراء من حتة معينة عشان تضرب باب الدكان و إلا ناس المحلية بقطعوك ايصال برضو

اووو دي ايام سيء الذكر "مقدم طُلبه" معتمد الخرطوم يوسف عبدالفتاح

سالنا ايامها، الزول دا مالو، قالو اساسا هو شغلته في الكلية الحربية "مقدم طُلبه" يعني الضابط المسئول من ضرب البوهيات
والصيانه في الكلية الحربية، اها، طبعا ناس الديش اهم حاجة عندهم ال uniform ، ودي طبيعة الضبط والربط كسلوك مهم في العسكرية
لمن عملو ثورتهم التعيسة دي، انطلق الراجل فينا زي السعران وحاول يجيش الشعب ويضبطه ويربطه بتوحيد الالوان، يعني زول
مخه فاضي ما اكتر من كده، احنا شعب مدني ومن حقنا نلون حياتنا كما نشتهي وليس كما يشتهي العسكر ياخي رب العالمين قال "وشراب مختلف الوانه"

هسع دي محاولة من الوالي والبروفيسيرا ت العباقرة المعاهو انو يحولوا الخرطوم لكنتونات، وتقطيع العاصمة الى مربعات
وذلك لاسباب كتيرة اهمها سياسية، وفي مقدمتها امنية واحتمال كبير فرصة لكل محليه تمسك ليك الركشات ديل كل في منطقته وهاك يا سلخ

سؤال بالجنبة كده، بصات الوالي دي ما جايبا دخلها وللا شنو

الاخ احمد عبدالله
تحياتي

Quote: رغم كرهي للانقاذ اشيد بهذا القرار .. الرقشات و الامجاد اصبحت وبالا في طرق المدينة

نختلف ويبقى الود يا سيدي

طيب ايدك معانا نلقى للشباب ديل وظائف في المزارع والمصانع ومناجم التعدين ومشاريع البنى التحتية

قد تكون بالنسبة ليك زحمة في الشوارع ومنغصات في الطريق وهي كذلك، لكن لمن تتذكر انو في طالب صغير
محتاج لمصروف في مدرسة ودا اخوه الكبير بصرف عليه، او لديه في البيت شيخين كبيري السن وهو عائلهم الوحيد
او تتذكر انو شاب دارفوري وللا نوباوي والبشير شغال قرف فيهم بالطائرات وتقول ياخي احسن ليه الهرب من الجحيم
ولم يصبح وقودا للحرب المقرفة دي

طوالي يا عمك ببلع ليك الكلام وبلقى ليهم الف عذر يسوقو ركشاتهم دي في راسي