والي الخرطوم قال الماعندو قدرة العيشة في الخرطوم ما يقعد

Quote: قطع والي ولاية الخرطوم د.عبدالرحمن الخضر الطريق أمام منح قطعة أرض بالمجان لأي مواطن، لافتاً الى أن حكومته خفضت كل ما في وسعها في رسوم الأراضي. وقال الخضر (الما قادر على المعيشة في الخرطوم ما يقعد فيها) وهو أمر متبع في جميع العواصم. وهدد والي الخرطوم بنزع الأراضي الزراعية غير المستغلة من أصحابها، مشيراً الى أن مسألة النزع ليست خرافة وسيراها الناس. فيما دفعت ولاية الخرطوم بجملة من المقترحات العاجلة لجهات الاختصاص لجهة محاصرة الغلاء الذي اجتاح الولاية بشكل لافت للنظر. وأعلن والي ولاية الخرطوم د.عبدالرحمن الخضر في مؤتمر صحفي عقده عصر أمس عن المعالجات الفورية والتي سترفع غداً الخميس لمجلس الوزراء الاتحادي لإجازتها لتجد طريقها للتنفيذ على جناح السرعة والتي تشمل إعفاء (12) سلعة من الجمارك والقيمة المضافة، متمثلة في مركزات الأعلاف والبيض المخصب والكتاكيت، فول الصويا، الذرة الشامية، تقاوى البطاطس وزيوت الطعام، الفول المصري، العدس والدقيق، ألبان البدرة، والأدوية المنقذة للحياة. وقال الخضر إن الإجراءات العاجلة من شأنها فتح الباب لاستيراد كميات محدودة من الفراخ لمدة (3) أشهر بواقع 1500 طن في الشهر، فضلاً عن مطالبة الحكومة الاتحادية بعدم زيادة السلع المدعومة منها والتي تشمل الخبز والسكر والمحروقات، فضلاً عن تقدم الولاية بطلب الى بنك السودان لإنشاء محفظة لتمويل حاضنات الخريجين بجانب تكثيف الرقابة على الاسواق عبر الجهات الرسمية وغير الرسمية، وانشاء وزارة خاصة تحت مسمى وزارة الاقتصاد وشؤون المستهلك والتي سيتم تكوينها في التشكيل الحكومي الجديد بعيد اسبوعين. وأكد والي الخرطوم حرص حكومته على تنشيط التعاونيات، وذلك بتمويل المؤسسة التعاونية بنحو 10 ملايين من الجنيهات والتي ستبدأ عملها بتوفير زيوت الطعام التي وصلت للتو لميناء بورتسودان، متوقعاً مساهمتها في خفض اسعار زيوت الطعام ما بين 20%- 30%، كاشفاً النقاب عن اتجاه الولاية لإنشاء ادارة عامة للتحصيل الموحد في غضون شهر من الآن لمراجعة التحصيل والرسوم والازدواج الضريبي وإلغاء بعض الرسوم. ولفت د. عبدالرحمن الى حصول حكومته على موافقة بنسبة (75%) لتنفيذ المقترحات المذكورة والتي تبقت اجازتها من قبل مجلس الوزراء الاتحادي. عازياً أسباب ما اسماها الوالي بالازمة الى ارتفاع اسعار العملة الصعبة وصعوبة الحصول عليها، بجانب شح الحبوب الزيتية والآثار النفسية للانفصال ودخول مبالغ ضخمة من الجنوب لتغييرها بالشمال رغم حظرها من بنك السودان، مشيراً الى ان الاجهزة الامنية لها معلومات عن تلك المبالغ. وحول حملة مقاطعة اللحوم عبر جمعية حماية المستهلك، نوه الخضر الى ان الحكومة لم تدع الى تلك المقاطعة، مشيراً الى ان التقارير الواردة الى الولاية مفادها أن 60% من اصحاب المواشي اوقفوا شحنها من الولايات للخرطوم. وقال يتعين علينا ان نستبدل المقاطعة بالترشيد، لافتاً الى حرص الولاية على جعل الفراخ وجبة شعبية.

مع انو مثلي لا يسأل عن المصدر
لكن قلت امارس بعض الترف الفكري

المصدر جريدة الوان
http://arabic-media.com/newspapers/sudan/alwan.htm

الفوق ده كلام الوالي
وحأتكلم بغباء جدا جدا
دونما الدخول في تحليلات سياسية او اقتصادية اوي اي شكل من اشكال العلمية
انا من جدودي ما عرفنا بلد غير امدرمان والخرطوم وعايشيت فيها حامدين شاكرين ومثلنا كثر
حاليا بمجيء عصبة الانقاذ استحال لنا العيش في ارضنا
نطير وين ؟

الحمدلله انو خرطومنا استوعبت الوالي الجاي من القضارف وبقى قادر يعيش في الخرطوم محل الرئيس بنوم والطيارة بتقوم

وراجع

مع اني جيبت بمزاج قلت اضيف معلومات لاخونا د. ياسر ميرغني في البوست الذي فتحته معنانا باسمه
لانها معلومات واقعية ومؤلمة
اها لقيت الوالي بتكلم زي الناس
فقلت انا زاتي اتكلم زي الناس

...

د محمد حسن نحن برضو قاعدين فيها من زمن حى العرب سموه حى العرب وامشى الى تصل العد بتاع ود ابحريره العمده
وشدرات المحكمه الاهليه
والزمن داك على الحلف لا الوالى لا جده ما اتولدوا اها نمشى وين لاننا ماقادرين نوفق بين المعايش والتعليم
والصحه ونحن اهل الخرطوم العندو راى فى كلامى اللجى يتكلم من ناس الحكومه الكلهم جونا من سقط لقط ديل

السودان تحكمه مجموعة من الهمج
من أين أتى هؤلاء؟

Quote: السودان تحكمه مجموعة من الهمج من أين أتى هؤلاء؟

لقوا البلد هامله
الله يجازى الذى مكنهم منها
لكن لازم يعرفوا ان الخرطوم بكت منهم واشتكت
لا الخرطوم بتشبهمم ولا هم بشبهوها وكذلك ام درمان
وبحرى الفيها الهوى البحرى من اين اتو هولاء
سؤال كبير جدا لم يجد الاجابه

Quote: Imports Sudan’s trade suffers from several tariff and non-tariff barriers, despite persistent efforts by the government to liberalize trade. According to the Index of Economic Freedom, trade with Sudan was subject to a high weighted average tariff rate of 11.4 percent in 2008. Import restrictions, discriminatory taxes, delays in customs clearance and non-transparent regulations are some of the factors impeding Sudanese trade. Sudan’s trade suffers from several tariff and non-tariff barriers, despite persistent efforts by the government to liberalize trade. According to the Index of Economic Freedom, trade with Sudan was subject to a high weighted average tariff rate of 11.4 percent in 2008. Import restrictions, discriminatory taxes, delays in customs clearance and non-transparent regulations are some of the factors impeding Sudanese trade. Sudan has been deemed as one of the 10 most corrupt countries in the world, which makes Sudanese trade riddled with unfair practices, adding to its overall cost of trade.

???

هو مطرود من القضارف وعايز يطرد الناس من الخرطوم تبا له

Quote: الآثار النفسية للانفصال

كيف يعني؟ (الدبرسة) خلت الأسعار تزيد؟

بعدين ما قلتو الإنفصال فيهو رفاهية المواطن .... وعربية الفرملة الإتفكت من القطر ..... إلخ.

الوالي ده جاي من وين؟

قال مسئول في دبي كلاما مقاربا لهذا . .. وبعدها بدأ الانهيار الكبير.

Quote: قال مسئول في دبي كلاما مقاربا لهذا . .. وبعدها بدأ الانهيار الكبير.

Quote: Sudan has been deemed as one of the 10 most corrupt countries in the world

ماشاء الله دائما في العشرة الأوائل!!
د.محمد.
ليك سلامي ومحبتي.

Quote: ???

ديل حيروا ابليس ما يحيروك انت ؟

اخونا احمد عبدلله

التنقليزي ده انجليزي يا مرسي

والله دكاترة الانقاذ ديل يحيرو
واحد يقول الشعب شحادين
وواحد يقول
المهندسين الزراعيين السودانيين اي كلام
وده يقول الماقادر على الخرطوم يمرق منها
وواحد يقول للشعب السوداني الحس كوعك
حيظهر لينا واحد اليومين ديل
ويقول للشعب السوداني
ك.... امك
دكترة دي جابوها من ورا السينما ؟

Quote: من أين أتى هؤلاء؟

وماذا يريدون؟

Quote: وشدرات المحكمه الاهليه

شيخ العرب حبابك

طيب الخلا القعاد في الخرطوم صعب على الناس شنو ؟


ده السؤال

Quote: ...

الاخ الكريم احمد موسى
الف شكر وتقدير ليك

و الله دي وقاحة و سفاهة على هذا الشعب الكريم ما ليها حد.

ولاية الخرطوم لأبناء الخرطوم فقط ... أبناء الهامش ديل حاقدين ..!
قال والي قال ... عبدالرحمن منو وجدو منو !!! آرنست جبارة ولا جيفرس ياك!
ولا قلندر ولا مهدي مصطفى الهادي ...

ما قاله والى الخرطوم تجاوز كل الحدود
لكن فى نفس الوقت ارجو الا نتجاوز الرد عليه الى النيل من ابناء الاقاليم و اخذ مسالة ان تكون اصول الشخص من الخرطوم و كانها امتياز او ان الاصول الريفية منقصة

Quote: لكن فى نفس الوقت ارجو الا نتجاوز الرد عليه الى النيل من ابناء الاقاليم و اخذ مسالة ان تكون اصول الشخص من الخرطوم و كانها امتياز او ان الاصول الريفية منقصة

اخي اللكريم
استاذن الجميع في ان ارد عليك قبلهم

اولا حاشا لله ان ننال من ابناء الاقاليم
لانني مقتنع تماما ان اي شبر من ارض الوطن من حق اي مواطن ان يقيم فيه ويعمر
وكونو اني من امدرمان او الخرطوم ليست بامتياز
السؤال هو
لماذا هجر ابناء الاقاليم مناطقهم حيث ارتباطهم وانتماؤهم
السبب مثل هؤلاءء الولاة الذين يتدربون على الولاية في الاقاليم عشان يلعبوا في الكشافات في الخرطوم وبعد كدة يقول اشطبو باقي الشعب

ان تمنية السودان قاطبة مسئولية الحكومة وافرعها من الوالين والمواليت
ولكنهم استمرأو قعاد المكيفات الوهوا البارد المجاني

Quote: ما قاله والى الخرطوم تجاوز كل الحدود لكن فى نفس الوقت ارجو الا نتجاوز الرد عليه الى النيل من ابناء الاقاليم و اخذ مسالة ان تكون اصول الشخص من الخرطوم و كانها امتياز او ان الاصول الريفية منقصة

إيش معنى يا عوض تبقى الإساءة لأبناء الأقاليم في حينما لا تكون إساءة لأبناء الخرطوم العاصمة حين يتولى أمرها أحد أبناء الأقاليم مثل الوالي الحالي والذي أتى بكل هذه المصائب لها !!!

Quote: ما قاله والى الخرطوم تجاوز كل الحدود لكن فى نفس الوقت ارجو الا نتجاوز الرد عليه الى النيل من ابناء الاقاليم و اخذ مسالة ان تكون اصول الشخص من الخرطوم و كانها امتياز او ان الاصول الريفية منقصة

سلامات .. بالتأكيد الخرطوم عاصمه قوميه ومتاحه للجميع ولا فضل للسكان الاصليين علي الوافدين
لكن المعني الذي ذهب اليه الاخوه .. نحن ناس ما بنعرف غير ام درمان والخرطوم موطن وسكن
اها حسب كلام الوالي الهمام دا نقبل وين ونطير وين بعد ما طارت عيشتنا فيها ووصلت السماء ؟
تحياتي للجميع

تحياتي يادكتور وضيوفكم الأعزاء ...
يعني العيشة ساهلة ورغدة في الصعيد ولا في الغرب ولا الشرق ولا الجزيرة ؟ أها وين المواطن يعيش ؟ على ذلك منتظرين (قياس) رئيس الجمهورية أن يعلن للملأ بأنه - يا جماهير شعبنا المغلوب على أمره ... شوفوا ليكم بلدا عيشوا فيهو ...نحنا تعبنا معاكم وما عارفين تسوي شنو ؟
وبعدين السيد الوالي ده بشتري في البصات لمنو لمن يطرد الما قادرين وهم فوق ال 95% ؟ والمحليات والجيوش الجرارة من القوات النظامية واللا نظامية الشغالة مع الحكومة أو الشغالة كيري يعيشوا من وين ؟ الزول ده عاوز يجهجه مصادر دخل الولاية مالو؟
استغفر الله العظيم ...
الشفيع إبراهيم

تحياتي يا دكتور
رد الوالي رد عاجز، ويمكن أن أذهب بعيداً لأقول أن رد سفيه، فيه استهتار بالشعب السوداني، هناك مشكلة والمفترض الوالي ده يسهم في حلها بصورة مرضية للشعب البدفع ليهو راتب معيشو في الخرطوم، مش يقول كلام ينم عن خواءه الفكري، وعجزه السياسي.

حريقة في الوالي عبدالرحمن الجاهل ... فلنسقط الوالي الكاذب الجاهل ..!

يا جماعة مافي زول يفهم غلط او يخلط الموضوع بانو اولاد خرطوم ما اولاد خرطوم. القصة و مافيها انو الرجل السفيه دا بتطاول على السودانيين المقيمين فى الخرطوم كلهم بغض النظر عن منشائهم الاصلي. الزول دا بيقول الما قادر على العيشة فى الخرطوم ما يقعد، و الله لعمري انها سفاهة و قلة ادب ما ليها حد!. يمشوا الناس من الخرطوم ولا تمشي انتا ايها السارق اللئيم؟ سارقين و مزوري اٍنتخابات و مجرمي حرب يتطاولوا على شعب السودان و يقولوا ليهم كان غلبتك العيشة ارحل، عجبي. و الله المسألة دي موجعة بشكل قاسي. 

د. محمد حسن

تحياتي - إحتمال الوالي دا قاصد تشيلوا عفشكم وترجعوا الجزيرة العربية يعني . لطالما الصفوف إتمايزت خلاص دغمسة تاني مافي . بالله خليه يقرض على كدا . يمين الله الوالي دا في القضارف لو ليه محل محظوظ . غايتو البلد دي بقى فيها جنس كلام يوم ما دايرين رطانة ويوم ما دايرين ناس الخرطوم . أهـ يجوكم جنجويد يا الخضر . ؟؟

بحيراوي

Quote: يا جماعة مافي زول يفهم غلط او يخلط الموضوع بانو اولاد خرطوم ما اولاد خرطوم. القصة و مافيها انو الرجل السفيه دا بتطاول على السودانيين المقيمين فى الخرطوم كلهم بغض النظر عن منشائهم الاصلي. الزول دا بيقول الما قادر على العيشة فى الخرطوم ما يقعد، و الله لعمري انها سفاهة و قلة ادب ما ليها حد!. يمشوا الناس من الخرطوم ولا تمشي انتا ايها السارق اللئيم؟ سارقين و مزوري اٍنتخابات و مجرمي حرب يتطاولوا على شعب السودان و يقولوا ليهم كان غلبتك العيشة ارحل، عجبي. و الله المسألة دي موجعة بشكل قاسي.

على جميع الناس المغادرين للخرطوم انتبهو جيدا

العفش داخل البص ليس مسئولية الوالي

نحن أبناء السودان بشرقه وغربه وشماله وجنوبه لا فرق بيننا، هؤلاء الكيزان هم الذين أبتدروا نعرات الجهوية والقبيلة المقيتة في الوطن،
إساءة الوالي الخضر تعد إساءة لجميع السودانيين في مختلف مناطق السودان،
وهو أمر مرفوض يجب التصدي له بقوة.

هل بالأقاليم توجد ... صحة
تعليم
إعمار
مياه
كهرباء

...
الخ ...

ـــــــــــ
انا ما عارف صفة الدكتور دي فخرية واللا شنو ؟

طيب يا جماعة الوالى دة كان يورينا أى ولاية من ولايات السودان المعيشة فيها ساهلة
عشان الناس تمشى عليها

Quote: والي الخرطوم قال الماعندو قدرة العيشة في الخرطوم ما يقعد خ

هو قادر قاعد فيها لان واليها
يعنى عنده مرتب ومخصصات والي خليهم يتنازل عنها عشان يااامن ويتاااكد !
فى سفارتهم فى جدة قالوا للناس انتوا كان ما قادرين على الضرائب قاعدين هنا ليه!
تطير عيشتنا نحن نقع وين!
فعلا انهم يفوقون سوء الظن العريض!
جني

ود الخضر ده مش والي المسلمين في دولة المشروع ؟؟؟
مش من واجبو توفير سبل العيش الكريم لرعيته ؟؟؟
لو أن دابه تعثرت فى العراق لسئل عمر عنها لماذا لم تمهد لها الطريق

Quote: ، اذ أن الغالبية العظمى من الشعب لم تكن تملك شيئا، كما أن الغالبية العظمى من عضوية الحركة الإسلامية جاءت اما من أدنى الطبقة الوسطى، من شريحة الموظفين محدودى الدخل، واما من الشرائح الاجتماعية الفقيرة القادمة من قاع المجتمع ومن هوامشه الاقتصادية. يتذكر كاتب هذا المقال أنه فى أواسط السبعينيات من القرن الماضى كان تنظيمنا يعمل من تحت الأرض، وأردنا أن نجد "أماكن آمنة" فى مدينة الخرطوم نخفى فيها أعضاء اللجنة التنفيذية لإتحاد طلاب جامعة الخرطوم من أجهزة الأمن التى كانت تطاردهم، فكان عدد الذين يملكون منازلا خاصة بهم (تتسع لاستضافة ثلاثة أشخاص أو أكثر) يعدون على أصابع اليد. وأذكر أن أحد أخواننا الذى امتاز بالسخرية والدعابة كان لا يخفى تذمره من البقاء فى المنزل العائلى المتواضع الذى استضيف فيه، فاذا سألناه قال: كيف أبقى هنا وكلما أردت الحمام هرعت الى الشارع لأبحث عن سيارة للأجرة.

الكوت جزء من مقال للدكتور التيجاني عبدالقادر
الاسلاموي السابق منظر د. الخضر

Quote: هو قادر قاعد فيها لان واليها يعنى عنده مرتب ومخصصات والي خليهم يتنازل عنها عشان يااامن ويتاااكد ! فى سفارتهم فى جدة قالوا للناس انتوا كان ما قادرين على الضرائب قاعدين هنا ليه!

هو قاعد فى الخرطوم لا بضرعوا الاخدر و لا بالورث الاحمر. قاعد بما ينهبه و تقلعه عصابته من هؤلاء الشرفاء الذين يتطاول عليهم.
قاعد عالة على كدحهم و عرقهم المسكوب و يتفاصح عن العيشه و الما قادر يرحل، بالله شوف الراجل الما بختشي دا.

Quote: ولا قلندر ولا مهدي مصطفى الهادي ...

طرينا الشر لي بعده

شوف اللي جاء يكحلا وعماها دا كمان يا دكتور ...
دكتور تاااني من دكاترة المؤتمرجية بيؤكد على كلام الوالي ..

Quote: قال وزير الثقافة والإعلام والسياحة ولاية الخرطوم محمد عوض البارودي رداً على خبر (ألوان) من مؤتمر الوالي عبد الرحمن الخضر أمس الأول: (والي الخرطوم بحكم الدستور لا يستطيع إجبار أي مواطن سوداني على الرحيل من الخرطوم، وكل مواطني الخرطوم خاصة أصحاب الدخل المحدود هم من أولويات همومنا، نسأل عنهم أمام الله تعالى، وهذا أمر واقع ومعاش بعيداً عن مزايدات أصحاب الأجندة الخاصة). ووصف الوزير في رده المكتوب خبر (ألوان) بـ(أنه تشويه متعمد) قامت به الصحيفة في نقلها لوقائع المؤتمر. وقال الوزير: (إن محرر ألوان ودون غيره من محرري الصحف الصادرة صباح «اليوم» والتي يتجاوز عددها العشرين صحيفة يركل «أم» القضايا، ويجنح لإثارة الرأي العام باقتباس مخل «الخضر: الماعندو قدرة على العيشة في الخرطوم ما يقعد فيها»، في دعوة واضحة لإثارة الرأي العام في حين أن (العبارة جاءت) في سياق حديث عام تزامن مع موجة الغلاء بعد أن صارت الحياة في العاصمة باهظة التكاليف للذين ليست لديهم وسائل للكسب، أو يبحثون عن قطعة أرض بدون رسوم أو أي خدمات أخرى، في ظل الإقبال والهجرة من المناطق الأخرى، بحثاً عن خدمات السكن والتعليم والصحة وغيرها في الخرطوم). وأضاف الوزير أن الحديث جاء في «سياق الرد على بعض الآراء التي طرحت في اللقاء ومن ضمنها تعليق رئيس صحيفة ألوان الذي ثمنه الوالي واعتبره حديثاً قيماً». وكانت (ألوان) نقلت أمس في تغطيتها لوقائع المؤتمر الصحفي أن والي الخرطوم د. عبد الرحمن الخضر قطع الطريق أمام منح قطعة أرض بالمجان لأي مواطن، لافتاً إلى أن حكومته خفضت كل ما في وسعها من رسوم الأراضي، وأن الخضر قال: (الما قادر على المعيشة في الخرطوم ما يقعد فيها). الأخ الأستاذ حسين خوجلي السلام عليكم ورحمة الله تعالى وبركاته لقد ظللنا في ولاية الخرطوم نؤكد حرصنا الشديد على إشراك الاعلام والصحافة في كل البرامج والمشاريع والقضايا التي تهم المواطن ذلك لايمانناالعميق بأهمية رسالة الاعلام ودوره الفعال في تنوير الناس وبلورة الرأي العام حول الموضوعات المهمة. وتعد الصحافة هي رأس الرمح في التبشير بالسياسات لما تتيحه من مساحات واسعة للتحليل وعرض وجهات النظر المختلفة. ونظراً لخطورة الدور الذي تقوم به الكلمة المكتوبة خاصة في الأوساط التي تقود الرأي العام فأن من أقل الواجبات التحلي بالمسئولية ومرآعاة المصلحة العامة وتغليبها على الخواطر التي تأتي عرضاً دون أن يكون هناك قصداً لذاتها. ما قادنا لهذه المقدمة التشويه المتعمد الذي قام به محرر الصحيفة الذي حضر المؤتمر الصحفي لوالي الخرطوم أمس الثلاثاء والذي إستعرض فيه حزمة المعالجات التي اتخذتها الولاية لمعالجة أزمة ارتفاع السلع، ففي الوقت الذي ينتظر فيه الناس أن تحمل لهم الصحيفة أخباراً سارة عن المعالجات التي إتخذتها الدولة لمعالجة مشكلة الأسعار نجد أن محرر صحيفة (ألوان) دون غيره من محرري الصحف الصادرة صباح اليوم والتي يتجاوز عددها العشرين صحيفة يركل (أم) القضايا ويجنح للإثارة باقتباس مخل (الخضر: الما عندو قدرة العيشة في الخرطوم ما يقعد فيها) في دعوة واضحة لاثارة الرأي العام في حين أن العبارة جاءت في سياق حديث عام تزامن مع موجة الغلاء بعد أن صارت الحياة في العاصمة باهظة التكاليف للذين ليست لديهم وسائل للكسب أو يبحثون عن قطعة أرض بدون رسوم أو أي خدمات أخرى في ظل الاقبال والهجرة من المناطق الاخرى بحثاً عن خدمات السكن والتعليم والصحة وغيرها في الخرطوم كما زن الحديث جاء في سياق الرد على بعض الآراء التي طرحت في اللقاء ومن ضمنها تعليق رئيس صحيفة الوان والذي ثمنه الوالي واعتبره حديثاً قيماً ويرى إن استمرار ولاية الخرطوم في توفير الخدمات سيجعل منها منطقة جاذبة ومغربة لسكان الريف الذين درجوا في الفترة الاخيرة التخلي عن الانتاج في الريف والذهاب للخرطوم بحثاً عن هذه الخدمات.. ومع ذلك إن والي الخرطوم وبحكم الدستور لن يستطيع ان يجبر أي مواطن سوداني على الرحيل من الخرطوم وكل مواطني ولاية الخرطوم خاصة اصحاب الدخل المحدود هم من أولويات همومنا ونسأل عنهم أمام الله تعالى وهذا أمر واقع ومعاش بعيداً عن مزايدات أصحاب الاجندة الخاصة. إن مسئوليتنا تجاه مواطني الولاية ومساعينا التي نبذلها مع الحكومة الاتحادية وجهودنا الأخرى مع القطاع الخاص بالداخل وتحركاتنا خارج البلاد تأتي كلها في سبيل أن نوفر القدر المطلوب من احتياجاته في العيش الكريم، لكن ان تصطدم هذه الجهود مع اغراض من نفترض فيهم انهم يشاركوننا الهم ويساعدوونا في بسط الطمأنينة في نفوس المواطنين أمر يدعو للأسف والحزن ويخرج اللقاءات التفاكرية التي نعقدها مع أهل الصحافة والاعلام (باعتبارهم أقرب الناس واحرصهم على مصلحة المواطن). ومع ذلك تظل ثقتنا قائمة في ادارة صحيفة (ألوان) في تصحيح الصورة الشائهة التي خلفها هذا النشر الضار الذي ترتبت عليه ردود أفعال متباينة ستكون لها آثار سالبة على اهدافنا وخططنا وتقودنا الى قضايا خلافية تحقق غايات من يتربصون بالأمن والسلام الاجتماعي لمجتمع الخرطوم الذي ظل متماسكاً بكياناته المتعددة. د. محمد عوض البارودي وزير الثقافة والإعلام والسياحة- ولاية الخرطوم

Quote: في حين أن العبارة جاءت في سياق حديث عام تزامن مع موجة الغلاء بعد أن صارت الحياة في العاصمة باهظة التكاليف

أنا كنت مفتكر أنو العبارة لفقتها صحيفة ألوان في ما يعرف بتصفية الحسابات بين المؤتمرجية ...لكن د . الباردوي أكد أن العبارة قالها الوالي الهمام ..

up

تحياتي للجميع

كلام مرفوض من الوالي ...الناس كلها نزحت من الأقاليم لسبب واحد انهم ماقادرين يعيشوا هناك ...جو الخرطوم قايلين فيها عيشه أحسن واسهل ..لقو مافي علاج ولا تعليم ولا ولا ولا ولا ولا ....بس لقو الوالي وقال ليهم الماقادر يرحل !..أها زي ماتفضلوا الأخوان أعلاه...الناس تطير وين يعني ؟؟؟

Quote: في حين أن (العبارة جاءت) في سياق حديث عام تزامن مع موجة الغلاء بعد أن صارت الحياة في العاصمة باهظة التكاليف

عييييييييييب
جابوك تبرر للوالي
تقوم تدينو وتطلع دينو؟

Quote: الما قادر على المعيشة في الخرطوم ما يقعد فيها

نحنا تركنا قرانا فى اطراف السودان ولجأنا الى اطراف العاصمة اضطراريا...اما بسبب انعدام الخدمات او بسبب الحروب التى شنتها الحكومة على الهوامش
الحل يكمن فى ذهاب الوالى وحكومته الى الجحيم حتى تهدأ الاوضاع فى كل ارجاء السودان وينعم اهله اينما "عاشو"

بالله قال كده يا دكتور؟؟؟؟

يعني جدادة الخلا طردت جدادة البيت!!!!!

حسبنا الله ونعم الوكيل