أنا قول ليک بحبِک من أمس!

يا بنية هووووي:
أنا قول ليک بحبِک من أمس!
وأول أمس!
أنا مابحبِک من زمــآن
ومِن يوم زمـــآن
ظنيتو:
قُبّال أعترف

أنا مابحبِک زي شمس
ويمكن قمر
ويمكن سماء
ويمكن
نجم!
مدارو لِسّة ما أتعرف

أنا مابحبِک من دُغش
ومِن زمن طور التكوّن
ومِن زمن بحبا وبهابش
ولِسّة ما بعرف أمش

أنا مابحبِک ومُعترف!

أنا مابحبِک من زمن
كُنت بلعب في شليل
ومِن زمن كُنت بسرح
في حجى حبوبة لي
وفي الحكاوي والقِصص
ما كُنت رااااايق ومُختلف!

وكِبرت ياخ!
وكِبرت همومي معاي كمان
وبقيت أخاف فقد الوِلف

بقيت أخاف أسرح كمان
وكِبرت ظنوني للألف

راحت عليّ
كُل البراءة الفي الصِبا
وفقدت لي طعم الحنان
ووصلت ظنوني
حد السقف!

ويدوب إنتي بتسألي:
من متين بتحبني!
ومن متين قلبكـ عِرف!

ما فيها شيء لو قلتي لي
أرحل أمش
مـآ فيها شيء لو قلتي لي
حُبک طفش
وحاتک إنتي بشيل قليبي
وأغور أطش
مامن يومي ياخ!
مامن يومي ياخ
ضايق الألم وحاتيني قش
وديمة في جواي مفتّق
وديمة في جواي متاور
وفي الوتر شغال هبش
وياني عصفور
لا ليو جناح لا ليهو عُش
ولو قلتي أرحل خلاص
وحات عيونک أستقيل
قايلاني بتراجع وأكش
خليک صريحة وقولي ياخ!
عارفاني ما بعرف أغش