ابعدوا يا ناس حزب الامة .. مرة تانية .. التعايشي والبشير والمجاعة

قالوا اللحمة غالية، وقالوا السبب جشع التجار!!

لا هو جشع تجار لا يحزنون، ولن تنفع دعاوي المقاطعة

هذه اول علامات المجاعة المتوقعة في السودان، التي بدأت محاولة مناقشتها في هذا البوست
كل مائة عام امة من يجدد لها احزانها التعايشي ثم البشير .. المجاعة

لكن الانصار الله يديهم العافية قلبوا الموضوع مقارنة بين البشير والتعايشي

البوست كان لمناقشة سؤ الادارة والسياسات الخاطئة الممكن تقود شعب في ارض زي ارض السودان الى حافة المجاعة


نواصل

كدي النجيب مدخلي البديت بيهو

Quote: تحياتي تحذير من مجاعة مرتقبة في السودان جراء سياسة البشير في محاربة السودانيين وتحويلهم الى نازحين بالجملة كما حولهم التعايشي من قبل الى راحلين الى امدرمان غصبا عنهم حقائق 4 مليون دارفوري لم يزرعوا شيئا ولم يرعوا ماشية طيلة 8 سنوات 1 مليون او يزيد في جنوب كردفان لن يزرعوا شيئا في هذا الخريف 1 مليون او ينقص قليلا لن يستثمروا في هذا الخريف ايضا، ناهيك عن حجم الابقار التي تهيم على وجهها من غير راعي 4 مليون في مشروع الجزيرة واقفين محلك سر، تزرع تدخل السجن، ما تزرع ينزعوا الواطه لم تتبقى اراضي وناس مستعدين للزراعة الى في ولايات، الشمالية، القضارف، وسنار والنيل الابيض وشمال كردفان النازيحن من النيل الازرق و الضارباهم مجاعة في ولايات الشرق ح ياكلوا كل ما تزرع القضارف وسنار (ساكت كده) النيل الابيض وكله لصناعة السكر، شمال كردفان لا ح يعرفوا ياكلوا هم وللا يتركوا الارض لبهائمهم تبقت الشمالية، ولو افترضنا ان سد مروي يمكنه ان يزيد من مساحة الاراضي الصالحة للزراعة، ولكن منتوجه مباع مقدما للشركات والاستثمارات العربية، يعني ما حقنالانه معد للتصدير وليس للاستهلاك المحلي وتيب

القصة ما محتاجة انك تكون قريت كتاب آدم سميث ابو الاقتصاد وقانون العرض والطلب

قانون العرض والطلب بشتغل رغم انف اي زول

اللحمة غالية وبكره الدقيق وبعده الخدار والزيت والفحم زاتو

هسع يجيك زول يقول ليك آآي، الفحم شوية غالي الايام دي لانه زمن الخريف واللواري بتقيف

ابدا، ليس هذه المره، ناس الحارة البقيفو يحرقوا الحطب دا من ناس بني زرقة، البشير شغال فيهم قرف بالطيارات
وبقية مجاهدين في سبيل الله ضد الشيطان الاسمه الحركة الشعبية

ما فاضين ليكم عشان يوفروا ليكم فحم، وما فاضين عشان يزرعوا ليكم ويدقوا ليكم العيش ولا فاضين يرعوا بهائمهم

فهم في امرا صعيب

نواصل

احمد ابنعوف ازيك كدى خلينا من ونسة الحبوبات نريد منك ان تأتى بكلام موثق عن الخليفة عبدالله لانه حكم 13 سنة بالشرع ووحد البلد

كدى جيب لينا كلام موثق من كتابات الاعداء و الحلفاء عشان نقدر ننصف الرجل لانك انت رجل مسلم و المسلم من سلم الناس من لسانه و يده.

يلا يا ود ابنعوف خليك شجاع وأبدأ بالهرب سلاطين باشا منو و الجا مع كتشنر منو و الضرب القبة منو يلا يا فالح?

شوف جنس دا

ازيك يا صديق

ياخي طلبنا منكم تتجاهلوا البوست دا

Quote: احمد ابنعوف ازيك كدى خلينا من ونسة الحبوبات نريد منك ان تأتى بكلام موثق عن الخليفة عبدالله لانه حكم 13 سنة بالشرع ووحد البلد كدى جيب لينا كلام موثق من كتابات الاعداء و الحلفاء عشان نقدر ننصف الرجل لانك انت رجل مسلم و المسلم من سلم الناس من لسانه و يده. يلا يا ود ابنعوف خليك شجاع وأبدأ بالهرب سلاطين باشا منو و الجا مع كتشنر منو و الضرب القبة منو يلا يا فالح?

انا يتكلم اقتصاد وسياسة، كلامي الفوق دا ما فيهو ونسة حبوبات، ونسة الحبوبات ياهو كلامك الفوق دا

الوضع السياسي الآن




يجيبوا ليكم لحمة من وين يعني

Quote: وفى ذات السياق عدد ابراهيم المساعد رئيس اتحاد الرعاه بالنيل الابيض مشاكل الثروة الحيوانية فى نقص الحفائر والسدود وتعدى الزراعة على المراعى والازدواج الضريبى وقلة المسارات والمراحيل .

وقد يسأل سائل، ما لاهل النيل الابيض بمشاكل دارفور في مسارات الرعي التي كانت سببا في حروب قبلية كثيرة؟؟

ولولا لطف الله، لكنا راينا دما في النيل الابيض بسبب تصرف الرعاة الذين دخلوا الاراضي الزراعية بالنيل الابيض

أحمد بن عوف

ياخى انت بتفهم اكتر من صديق؟

قال ليك ونسة حبوبات يعنى ونسة حبوبات

ازيك يا دكتور بلة و عيد سعيد الحكاية مش فهم نحن نريد ان نعرف تاريخ السودان الحديث عشان نحدد مشكل السودان وين

و لا مش كدى ا فيلسوف الانقاذ و مايو?

والله يا بله

Quote: أحمد بن عوف ياخى انت بتفهم اكتر من صديق؟ قال ليك ونسة حبوبات يعنى ونسة حبوبات

اشك انو الحبوبات ممكن يفهموا كلامي والانصاري دا ما يدلي من رقبتي الا اهتف بخليفة المهدي

طبعا انت عندك عقدة من الانصار و الخليفة لانه راجل قاتل فى سبيل الله وانت لم تنتصر حتى على................

Quote: لكن الانصار الله يديهم العافية قلبوا الموضوع مقارنة بين البشير والتعايشي

Quote: يلا يا ود ابنعوف خليك شجاع وأبدأ بالهرب سلاطين باشا منو و الجا مع كتشنر منو و الضرب القبة منو

الأخ أحـمـد بن عــوف
أراك تحـمـل حقـدا دفـينا تجـاه خلـيفة المـهـدى وتجـاه أجـدادنا
الـذين حـابوا معــه.
عـمـوما نحـن نتشـرف بتاريخهم وبطولاتهم وتضـحياتهم.

ياصديق (سعيد حجازى)

أنا قصدى أنك حبوبة
والحبوبة اكتر من تفهم كلام الحبوبات!!

شكرا يا دكتور و الله اتشرف بان اكون حبوبة لاننى سوف اصلح ما كسره الكيزان واشباههم

الاخ عبدالله عبدالله
تحياتي
والله ما بزعل منكم، بس شاركونا في نقاش المصيبة الجاية دي

والامام المهدي قدره عندي كبير

بس انا موضوعي االلحمة، ومافي غيرها

يا أحمد

المهدية والإنقاذ بتشابهو فى:

1/ قيادة تكذب على شعبها.
2/ حاكم يغتصب جيشه شعبه.
3/ الخلاف الداخلى الحاد الى درجة التصفية الجسدية.
4/ الطمع فى السلطة والثروة.
5/ يستعين شعبه عليه بالتدخل الأجنبى.

استاذ احمد, بالله شوف لينا معاك موضوع الطماطم برضو
اللحمه دي قنعنا منها و بقينا معتمدين علي سلطة الطماطم بالدكوة
حاليا الطماطم ذاته بقت في خبر كان
قبل اسبوعين مشيت السوق الشعبي "الملجة" لقيت كيلو الطماطم وصل 20 جنية
تخيل يا استاذ من 2 جنية لــ 20 جنية
خبرنا الايام دي الفول بس , و شايفو بدأ يفرفر برضو
تقول لي لحمة !!
:)

حسبو
تحياتي

Quote: حاليا الطماطم ذاته بقت في خبر كان

الطماطم فاكهة موسمية، زوغوا منها في الصيف، ارجوها في الشتاء
لكن الحقيقة انو الطماطم بقى يتزرع في البيوت المحمية وهي استثمارات اجنبية
بستغلوها في صناعة الصلصله، دايرين طماطم للسلطه ياهو دا سعرها