Post: #1
Title: لِعبْ البِلي في الرملة
Author: حجة امنة
Date: 09-06-2011, 09:29 PM
أريدْ صُوت الحبيبْ إنّ غنا
حنينْ صُوت الحبيب إن غنا
برجاو مع خُوفْ الحكاوي
الكايسة للفرقة التسد جوع
الوِليدات للسؤال
ليه فاطنة قصّتْ شَعَرَتا ؟!
ود النمير لو كان سَرقْ شان المساكين
ما بِخُش الجنة ؟!
حنينْ صُوت الحبيبْ إن غنا
يرجاني في شفقة صُغار
في يوم طَهور
أو بي جاهـ عَروس
ختو ليهم حِنة
ضامين إيدياتم كدي
خمّْ الرماد جَلَطوها ليهم كُلهم
التقول ختاها بنا
برجاو مع أمل البيوت
الواطية تندهـ للمطر
تقعد تشرِّكـ بالدُعا
و تحاحي لامن تبقى سيل
تنقُضْ عُهودا مع السباليق
و المتاريس و الأرض
الأرض تابى الشراب
الأرض تابى الشراب !
قامتْ شجيرة الحِنة تندهـ للفزع
يا الله فيكـ عشمنا ما انسدالو باب
و الأرض مابية الشراب
هيا النيل الأرض مابية الشراب !!
يا النيل مدد
النيل ما طلع من طورو
بل واصل طريقو الصاح
و ما دفقلو موية على الرهاب
و الأرض مابية الشراب
و لسع شجيرة الحِنة تندهـ للفزع
يا الله فيكـ عشمنا ما انسدالو باب
أيا شجر التبلدي مدد
الأرض مابية الشراب !
شجر التبلدي اليوم طلع من طورو
ترانا واقفين للـ جايانا من الله
ما فتشنا غيرا و لا مرقنا نَكُوسا
و من يوما أصبح جوفنا افرغ
من فؤاد أم موسى
و يا شجيرة الحِنة نديكـ النجيضة
لو كان زمان الأرض لانتْ
كان الحراز حنّا
أريد صوت الحبيب إن غَنّا ..
يرجاني في ذات البيوت الواطية
نحلم بي ملكـ ما بخاف يخشها
ينحني أو تنزلق نجماتو
أو تيجانو أو صولجانو
وحينها يندهـ في المدينة منادي
يا أهل المدينة : العدل آنَ أوانو
البيوت ماااااااا تصدقو
الراجياو زمااااااااان شِربْ المُرّ
و قرَّبْ يِلحَسِنْ كيعانو
أيا أهل البيوت : العدل آنَ أوانو
طرف السوط لحق لي ناس فريق قدام
في التو و بي عجل بايعولهم إمام
لمّلمْ حاشيتو و حيرانو
و حالاً طَلَعَا فتوتو و فرمانو :
جيبو المُنادي و أحرقوه أو قيدوه
يمكن يكون جَنّا
حبيب صوت الحبيب إنّ غَنّا
برجاو في غُنوات بنات الحلة
لامِنْ يِنْقرِشَن دلــوكــــة
أو جردل حديد
الغريبة بقولن إسمو
في كل غُناهن
و كل صِفاتو
طويل قوامو
و ابتسامتو
و لون عيونو
و كل ما قالنّو إسمو
ياخ بستغرب شديد
الحاجة التغيظ :
هِنْ كُلَهِنْ سمحات
و صُوتِنْ ما كعب
مرات بذكرني الهديل
غايتو فيهن واحدة بتبالغ عديـــــــل
ياخ دي المفروض
يِعَشِّرو مِنها *
أو بالعدم تتعبا كبسولة في فتيل
أريد صوت الحبيب إن غنا ..
حنين صوت الحبيب إن غنا .
آمنة حسين
6 سبتمبر 2011 م
يِعَشِّرو مِنها * : مفردة في الدارجية السودانية كناية عن طيب المنبت
|
Post: #2
Title: Re: لِعبْ البِلي في الرملة
Author: حجة امنة
Date: 09-07-2011, 00:25 AM
Parent: #1
up
|
Post: #3
Title: Re: لِعبْ البِلي في الرملة
Author: د.محمد حسن
Date: 09-07-2011, 00:31 AM
Parent: #2
Quote: غايتو فيهن واحدة بتبالغ عديـــــــل
ياخ دي المفروض
يِعَشِّرو مِنها *
أو بالعدم تتعبا كبسولة في فتيل
أريد صوت الحبيب إن غنا ..
حنين صوت الحبيب إن غنا .
|
حجة امنة
يافرح كل البنيات
يا نغم دلوكة يا نايا بزغرد في اليالي المقمرة
|
Post: #6
Title: Re: لِعبْ البِلي في الرملة
Author: حجة امنة
Date: 09-07-2011, 09:18 PM
Parent: #3
Quote: حجة امنة
يافرح كل البنيات
يا نغم دلوكة يا نايا بزغرد في اليالي المقمرة |
د.محمد حسن شكراً جميلاً بقدر لطف حضورك
|
Post: #4
Title: Re: لِعبْ البِلي في الرملة
Author: Al-Shaygi
Date: 09-07-2011, 01:03 AM
Parent: #1
Quote:
يِعَشِّرو مِنها * : مفردة في الدارجية السودانية كناية عن طيب المنبت
|
يعني بي لغة أهلنا الترابلة يصفحوها....
والتصفيح لغير المحس والشوايقة هو قطع صفيحة فارغة (كان صفيحة زيت ولا بنزين) ويحوطو بيها خلفة التمرة ويملوها تراب ويسقوها من وقت لآخر حتى تخرج الخلفة الجذور ثم تفصل من أمها ويعاد شتلها)...
والهدف من هذه العملية الحصول على نخلة وليدة تحمل نفس صفات الأم المصفحة (إستنساخ يعني)...
"حصة زراعة بلا درس عصر"
زمان في بلدنا كان في راجلاً جنب وعلم في البلد ولاهو شيخها ولا عمدتها ولكنه كان الأعلى بين رجالها وأكثرهم حكمة ومكانة...
المهم
الزول كبر شديد وبدي الناس يشوفوا عثراتو بعد ما كان مثال للحكمة والكلمة....
درويش من بلدنا برضو متابع الحكاية وفي يوم ملمة ووسط الناس صاح:
يا جماعة فلان ده صفحوه..... يقصد عمنا الحكيم الذي بدأ في السير نحو النهاية...
وكلنا سائرون...........
الشايقي
http://www.youtube.com/watch?v=WjNosdjuv7s
[email protected]
http://alkatwah.com
.
|
Post: #5
Title: Re: لِعبْ البِلي في الرملة
Author: خالد المحرب
Date: 09-07-2011, 01:15 AM
Parent: #4
| Quote: يِعَشِّرو مِنها * : مفردة في الدارجية السودانية كناية عن طيب المنبت |
حاجه امنه السلام عليكم اختى الكريمه
المفرده فى لغتنا نحن كلمة عشار هى
عندما يكون لديك بعير حر اصهب او حمار
ايضا فارط ياتو اليك الناس لكى يحسنو النسل من
البعير والحمار الطيب وحتى هذا التكاثر يتم فى
النبات الطيب المسمى التلقيح وحتى بى لغتنا بى
طريقه اخرى بقولو الولد خال معناتو حسن المنبت الطيب من الجنس الاخر
.. لك احترامى وشكرا
|
Post: #7
Title: Re: لِعبْ البِلي في الرملة
Author: وليد محمد المبارك
Date: 09-08-2011, 07:13 AM
Parent: #5
يا بتنا
|
Post: #8
Title: Re: لِعبْ البِلي في الرملة
Author: حجة امنة
Date: 09-08-2011, 10:32 AM
Parent: #4
Quote: يعني بي لغة أهلنا الترابلة يصفحوها....
والتصفيح لغير المحس والشوايقة هو قطع صفيحة فارغة (كان صفيحة زيت ولا بنزين) ويحوطو بيها خلفة التمرة ويملوها تراب ويسقوها من وقت لآخر حتى تخرج الخلفة الجذور ثم تفصل من أمها ويعاد شتلها)...
والهدف من هذه العملية الحصول على نخلة وليدة تحمل نفس صفات الأم المصفحة (إستنساخ يعني)...
"حصة زراعة بلا درس عصر" |
أيوووه إستنساخ ,, دا المطلوب إثباتو
و مفردة التصفيح دي طقشت أضاني قبال دا , و المعني عجبني جداً , لكن ما لحقت دخلتها في جملة مفيدة
و حسع في النص دا كان حتكون أجمل من مفردة يعشرو منها , بي إعنبار إنو النخيل رمز للشموخ و العزة
شكراً جداً للحصة أعلاه .
|
|