Post: #1
Title: وزير أجنبي بحكومة الجزيرة ما زال يحتفظ بموقعه كمستشار للسلام
Author: إيهاب الأمين
Date: 09-06-2011, 10:50 AM
مدني:سليمان سلمان
أفاد«الوطن» مصدر مسؤول- فضل حجب اسمه - أن العديد من القيادات النافذة في الجهازين التشريعي والتنفيذي شجبت احتفاظ «الفريد ميثانق» المستشار الجنوبي في حكومة ولاية الجزيرة بمنصبه الدستوري «كمستشار للسلام» وحضوره اجتماعات مجلس وزراء الجزيرة ورغم الأحداث السياسية والخلافات المتوالية فإنه ظل يوالي مشاركته الفعلية في مجلس الوزراء حتى الاجتماع الأخير قبل عطلة عيد الفطر.. كما ظل يتمتع بكل امتيازاته ومخصصاته الدستورية.
وأفاد المصدر أن البروفيسور الزبير بشير طه - والي الجزيرة - لم يستجب لنداء القيادات بإعفاء المستشار الجنوبي بل تخطى سلطات رئيس الجمهورية ومنح نفسه سلطات أعلى، ودافع البروف الزبير بشدة في لقائه بإحدى الصحف بأنه أبقى المستشار الفريد ميثانق مستشار للسلام للتواصل.
علماً بأن رئيس الجمهورية نفسه قد قام مؤخراً وفي ديوان الحكم الاتحادي بوداع مجموعة كبيرة من الجنوبيين من عدة مواقع هامة بالحكومة الاتحادية وبعضهم كانوا قيادات في الحركة الاسلامية مثل علي تميم فرتاك والشيخ بيش ودوك داك بيشوب، والتي أكدت صدق والتزام الرئيس بالعهود والمواثيق واحترام خيار شعب الجنوب بالانفصال وقيادم دولته من جديد.
نقلاً عن جريدة الوطن
|
Post: #2
Title: Re: وزير أجنبي بحكومة الجزيرة ما زال يحتفظ بموقعه كمستشار للسلام
Author: فايزودالقاضي
Date: 09-06-2011, 11:28 AM
Parent: #1
ايهاب ...سلامات وكل سنة وانت طيب ...
يعني الراجل مامن دينكا انقوك ؟!!!
|
Post: #3
Title: Re: وزير أجنبي بحكومة الجزيرة ما زال يحتفظ بموقعه كمستشار للسلام
Author: إيهاب الأمين
Date: 09-06-2011, 11:33 AM
Parent: #2
إزيك يا فايز يا رائع
وكل سنة وانت طيب
ما عارفه من دينكا وين..
عجبني العلم السمح البرفرف دة
في صورتك الرمزية
|
Post: #4
Title: Re: وزير أجنبي بحكومة الجزيرة ما زال يحتفظ بموقعه كمستشار للسلام
Author: فايزودالقاضي
Date: 09-06-2011, 11:46 AM
Parent: #3
حبيبنا ايهاب ليك وحشة وافتقدناك هناك ...
Quote: عجبني العلم السمح البرفرف دة
في صورتك الرمزية |
ده علم سيد البلد وزعيمها الاوحد بتاع الكاسات بره وجوه ..
|
Post: #5
Title: Re: وزير أجنبي بحكومة الجزيرة ما زال يحتفظ بموقعه كمستشار للسلام
Author: Alshafea Ibrahim
Date: 09-06-2011, 12:02 PM
Parent: #4
الأخ إيهاب
مدني وما أدراك ما مدني ... شوف مسمى الوظيفة (مستشار للسلام) وبعدين شوف المخصصات ... نحن لا تحدنا مناطق ملتهبة ولا منطقة حدودية مع الحركة وحكومتهاحتى نحتاج لهذه ا########فة ... لكن لا تحزن أنت في مدني ...
وبعدين يا أخ مش هذا الوزير ولا معقدة الحكومي هم سبب آفة ومصائب مدني .... مدني حبلى بالفساد والمفسدين المستقويين بالعلاقات المشبوهة منذ آمد بعيد ضارب في القدم مثل قدم الإنقاذ ... بالله أمشى المحكمة أو الأراضي أوالمساحة أو أي مرفق حكومي وحاول استخراج مستند رسمي ... شوف المعاناة كيف ؟ بعد ما تقدر تتخطى كل العراقيل والعقبات وتدفع الفيها النصيب لغاية ست الشاي والفراش وتصل مرحلة الختم لازم تدفع حق الختم ...
تحياتي
الشفيع إبراهيم
|
Post: #6
Title: Re: وزير أجنبي بحكومة الجزيرة ما زال يحتفظ بموقعه كمستشار للسلام
Author: إيهاب الأمين
Date: 09-06-2011, 06:12 PM
Parent: #5
العزيز الشفيع لك مني ألف تحية ، ولاية الجزيرة تعاني من الكثير وكل مشكلة تحتاج لبوست منفصل أنا كنت أتمنى أن يناقش الناس مسألة وجود وزير من السودان الجنوبي وهل حدث مثل هذا في أي دولة بخلاف السودان (الشمالي)؟؟
|
Post: #7
Title: Re: وزير أجنبي بحكومة الجزيرة ما زال يحتفظ بموقعه كمستشار للسلام
Author: Nasr
Date: 09-06-2011, 06:33 PM
Parent: #6
وزير أجنبي مسألة ما حلوة
بس إتأكد ما يكون من دينكا أبيي
ديل جوا السودان
الثانية
شوف لينا خبر وزير الداخلية (وزارة سيادية رئيسية)
الذي يقال عنه أنه أجنبي من الدولة الجارة أرتيريا
|
Post: #8
Title: Re: وزير أجنبي بحكومة الجزيرة ما زال يحتفظ بموقعه كمستشار للسلام
Author: فايزودالقاضي
Date: 09-07-2011, 10:18 AM
Parent: #7
Quote: شوف لينا خبر وزير الداخلية (وزارة سيادية رئيسية)
الذي يقال عنه أنه أجنبي من الدولة الجارة أرتيريا |
ياناصر سيبك من قوله انت قولك شنو ؟!!!!
|
Post: #9
Title: Re: وزير أجنبي بحكومة الجزيرة ما زال يحتفظ بموقعه كمستشار للسلام
Author: Nasr
Date: 09-07-2011, 01:45 PM
Parent: #8
اقول ليك قولي يا فايز
مساكني في الشقة لأربعة سنين قيادي سابق في جبهة تحرير أرتريا
إسمه عبد الله سليمان (كان حاجة كدا زي وزير خارجية)
سألته عن هذا الموضوع
فأكد لي أن وزير الداخلية من قبيل له فروع في أرتريا وفي السودان
واهل الوزير شخصيا في الجانب الآخر من الحدود
|
Post: #10
Title: Re: وزير أجنبي بحكومة الجزيرة ما زال يحتفظ بموقعه كمستشار للسلام
Author: فايزودالقاضي
Date: 09-07-2011, 02:15 PM
Parent: #9
ناصر ..سلامات ..
Quote: سألته عن هذا الموضوع
فأكد لي أن وزير الداخلية من قبيلة لها فروع في أرتريا وفي السودان
واهل الوزير شخصيا في الجانب الآخر من الحدود |
النص الاول من كلامه صحيح فكل قبائل الشرق البيجاوية وحتى اهلنا الشكرية واشراف الختمية(طريقة دينية) لها فروع في ارتريا او ان صح التعبير هي قبايل ومجموعات منتشرة بين حدود الدولتين وتمتد جغرافيتها مابينهما ....اما الشق الثاني من كلامه فماصحيح فوزيرالداخلية كغيره من ابناء الشرق تمتد قبيلته مابين السودان وارتريا ولكنه سوداني ولايحتاج لشهادة فجده هو عمدة كسلا - يعني الراجل لو قال عمر البشير ماسوداني يبقى عمر البشير ماسوداني - . واذا كان من الجانب الاخر فده يعني ان الشرق كلوا من الجانب الآخر ...
ارترية رغم حداثة استقلالها لكنها متقدمة عننا في حتة الهوية والجنسية ..حتة التداخل دي ماعاملة ليها قلق نهائي فارتريا فيها قبايل من اصول جعليه وكذلك فيها الشكرية والهوسا والفلاته والرباطاب والرشايدة وعمرك ماتسمع واحد يقول ديل من خارج الحدود وشروط الجنسية واضحة ولا يزايد احد على الآخر ومافي حاجة اسمها ده وافد وده اصلي ولا ده عربي وده افريقي...
بالمناسبة اسحق الحلنقي من شكرية ارتريا ومن مواليد اغردات الارترية ومافي زول يقدر يقول ليهو انت ماسوداني ولا في زول يمنعه حقه في ان يكون ارتري ...
تحياتي ،،
|
Post: #11
Title: Re: وزير أجنبي بحكومة الجزيرة ما زال يحتفظ بموقعه كمستشار للسلام
Author: Nasr
Date: 09-07-2011, 02:50 PM
Parent: #10
شكرا للتوضيح يا فايز
وبجمع مزيد من المعلومات وبرجع ليك
|
Post: #12
Title: Re: وزير أجنبي بحكومة الجزيرة ما زال يحتفظ بموقعه كمستشار للسلام
Author: إيهاب الأمين
Date: 09-07-2011, 06:13 PM
Parent: #7
عمنا مستشار السلام من مدينة توريت
يعني ما من أبيي
ولا أعرف تفاصيل وزير الداخلية
لك مني التحية والتجلة
|
|