والله ليبيا دي بعد فيها حلاة أغترابة

لا بحر لا كفيل

شقة ساي كداري بس

طبعا ح تتحول لنظام ديمقراطي رأسمالي مفتوح

مرتبط بصورة وثيقة بالغرب وأمريكا

وهاك يا شركات أوربية وأمريكية

ويا تعمير ما بعد الحرب ومشاريع جديدة


وآخر بشكة وبهجة أيامنا وحلاتها

Quote: وآخر بشكة وبهجة أيامنا وحلاتها

و نحن متين يا ربي دورنا يجي و يغترب الناس في بلدنا

-----------
تحياتي

هلا يا نازك

Quote: و نحن متين يا ربي دورنا يجي و يغترب الناس في بلدنا

قريب يا رب

بس لازم يكون بلد بترولو كثير الناس دي بيجيبها البترول

وبرضو خايف يجوا وما يلقونا

الأخ حمد عبد الغفار.

بعد تصريحات الخارجية السودانية الرعناء. قد تكون ليبيا جحيم للسودانين.

مرحب يا دينق

Quote: بعد تصريحات الخارجية السودانية الرعناء. قد تكون ليبيا جحيم للسودانين

قال شنو وزير الخارجيةكمان؟

بس يا دينق مسار الأحداث في ليبيا والاتهام الدائر من أنو السودان

بقدم دعم للثوار وفرحة نظام الخرطوم بسقوط القذافي مش كلها إشارات إلى ما يمكن

أن تكون عليه قوةالعلاقات بين البلدين؟


غايتو نحن آل سعود ديل ما فايتنهم شبر
.

Quote: شقة ساي كداري بس

دي قديمة لناس كردفان و دارفور لا بيعرفوا جوازات و لا مطارات.
بيركبوا لواري ليبية او جمال. صدقني لو حاولوا السفر عبر الخرطوم عمرهم ما يصلوا هناك.

البشير يتودد الى الثوار وهم يعلمون مدى استفادة البشير من القذافي

الآن الثوار يتعاملون مع الجنائية فهل سيذهب اليهم الطفل المعجزة لاقناعهم
بعدم التعامل معها كما حاول ان يقنع الحريري؟؟؟؟

هلا زول واحد

Quote: دي قديمة لناس كردفان و دارفور لا بيعرفوا جوازات و لا مطارات.

فعلا ناس كردفان ودارفور هبشة من ليبيا

لكن في السنوات الأخيرة عادي الناس كانوا من سوق ليبيا بقطعوا تذاكر وسفر لليبيا لكن العواقب كانت كارثية شيء موت وشيء جنون الخ عشان كدا لا بد من هجرة مقننة تحفظ للمواطن كرامته وتحفظ ليه حقوقه في بلاد المهجر

بس مسالة الجنائية دي ما اعتقد ليها أثر كبير في التداخل بين الشعوب المتجاورة ما لم تكن هنالك حرب معلنةبين الدولتين لأنو علاقة الشعوب المتجاورة دي بتحكمها عوامل كتيرة منها التاريخي والإقتصادي والإجتماعي وهكذا

وعلى طاري المحكمة الجنائية أنا بعتبرها محكمة غير مثالية لمحاكمة نظام قاعد في الحكم 40 سنة لأنها بتختزل كل مساوئ النظام في جرائم الحرب وبتغفل عن أسس البلاء ال قادت لمثل هذه الجرائم مثل الفساد واحتكار الحكم عشان كدا محكمة الشعوب لمثل هذه الأنظمة أكثر فعالية لأن الشعوب تدرك من وين جاها الأذى.

يا حمد انت متفائل يا اخوي
ليبيا لن تكون ابدا للسودانين مجددا.

هؤلاء الثوار عنصرين ولا يحبون السودانين!

وحتشوف براك.





رغم انه هنالك اطباء سودانين لا زالوا موجودين هنالك.

Quote: يا حمد انت متفائل يا اخوي ليبيا لن تكون ابدا للسودانين مجددا. هؤلاء الثوار عنصرين ولا يحبون السودانين! وحتشوف براك.

كيفنك يا تراجي

كلامك صاح. الليبيون من فترة كرهوا اللون الاخضر و البشرة السوداء.

هلا يا تراجي

Quote: يا حمد انت متفائل يا اخوي ليبيا لن تكون ابدا للسودانين مجددا. هؤلاء الثوار عنصرين ولا يحبون السودانين! وحتشوف براك.

والله يا تراجي ما متفائل ولا حاجة ولا عمري تفاءلت بالغربة
وفاقد توازني من يوم ما طلعت من السودان

وعلى قناعة تامة أنو مهما أحقق في الغربة لا يساوي يوم واحد أقضيهو
في السودان بين الأهل والأحباب لكن نعمل شنو اضطررنا عليها


تاني كراهية الثوار للسودانيين دي يا تراجي (وحسب ما أُشيع)
سببها عيالكم ناس العدل والمساواة ديل

مشوا عملوا ليهم مناصرة للقذافي في خطوة تنقصها المبدئية في منازلة الديكتاتوريات

لكن برغم ذلك بقول ليك لا الثوار ولا غيرهم ممكن يوقفوا حركة الشعوب

والحاجة للتطوير بتقتضي الاستفادة من خبرات كل الشعوب

كلها الشهور الثورية الأولى دي وتحصل المراجعة والأمور ترجع زي ما كانت

إحتراز الليبيين من (السودانيين ) واجب في هذه المرحلة ..لأن كلمة المرتزقة الأفارقة في معظمها مقصود بهم السودانيين ولايمكن تبرئة كل السودانيين من الاشتراك في جريمة قتل الليبيين بالتعاون مع كتائب القذافي .. وأعرف سودانيين في ليبيا قضوا بها وقتا وصاروا يتحدثون مثلهم تماما حتي لو كان يحادث سوداني مثله ومنضوون نشطاء في اللجان الثورية...لاينبغي علي السودانيين أن يجازفوا بالذهاب لليبيبا في الفترة القادمة وعلي الذين تقطعت بهم السبل فيها عليهم الأحتراز لأن خطة الثوار وبعد التخلص من الكتائب التي تلفظ أنفاسها سينقلبون علي الوافديين الأفارقة وقعت أحداث مؤسفة كهذه بالفعل في مصراته بعد تحريرها وأعرف سودانيا ذبح ذبحا ربما لمجرد الشك أو فض غبينه ....

Quote: إحتراز الليبيين من (السودانيين ) واجب في هذه المرحلة ..لأن كلمة المرتزقة الأفارقة في معظمها مقصود بهم السودانيين ولايمكن تبرئة كل السودانيين من الاشتراك في جريمة قتل الليبيين بالتعاون مع كتائب القذافي .. وأعرف سودانيين في ليبيا قضوا بها وقتا وصاروا يتحدثون مثلهم تماما حتي لو كان يحادث سوداني مثله ومنضوون نشطاء في اللجان الثورية...لاينبغي علي السودانيين أن يجازفوا بالذهاب لليبيبا في الفترة القادمة وعلي الذين تقطعت بهم السبل فيها عليهم الأحتراز لأن خطة الثوار وبعد التخلص من الكتائب التي تلفظ أنفاسها سينقلبون علي الوافديين الأفارقة وقعت أحداث مؤسفة كهذه بالفعل في مصراته بعد تحريرها وأعرف سودانيا ذبح ذبحا ربما لمجرد الشك أو فض غبينه ....

رمضان كريم
ما أشار اليه الأخ/ شعبان هو عين الصو اب ولقد عبر عن ما كان يجول بخاطري وتسطيرما كنت سأكتبه ... بانيا ذلك بحكم تجربة اقامتي في تلكم الديار زهاء الست سنوات عجزنا في أوقات سلم عادية أن نعيش فيها لعنف وعنصرية ذلك الشعب وإختزانه للكثيرمن الغل تجاه الشعوب التي أقامت مثابات ثورية بإسم بلدانها داخل ليبيا ولها ممارسات غير مقبولة تصب في مصلحة النظام السائد "اللجان الثورية" حينها مثل مثابات اللجان الثورية السودانية والفلسطينية فقط لا غير .... الله يستر لبني وطني وغض الطرف عن قضايا ليبيا أفضل في هذه الحالة ...
الله لطيف بعباده ...

الوضع في ليبيا غامض ... وستحتاج البلد إلى سنين لتستقر ...


المستغرب ما لاحظته في الإسكندرية: حركة عودة للسودانيين العاملين في بنغازي إلى بنغازي .... هل هنالك عمل في بنغاري حالياً ؟

هيييييييييع

يا حمد الحكاية ما سايبة !!!

عليك ان تعبر الى ليبيا عبر الحوض النوبي العظيم وصحيح لا يوجد بحر لكن عندنا صحراء لا يختلف عن البحر فى شئ

المهم خلو ليبيا تروق ونشوف ليكم الموضوع

-------------------------------
يا كافي البلا نحن دورنا ما حيجي ؟

ونحن الذين كنا نحسب أن الشعب الليبي نايم فى العسل ؟

هلا هاني عربي

Quote: الوضع في ليبيا غامض ... وستحتاج البلد إلى سنين لتستقر ... المستغرب ما لاحظته في الإسكندرية: حركة عودة للسودانيين العاملين في بنغازي إلى بنغازي .... هل هنالك عمل في بنغاري حالياً ؟

وحيظل غامض تعرف المشكلة نهايتها ما قريبة في ظل الوضع القبلي الموجود في ليبيا دا


والسودانيين الراجعين أكيد ما عارفين يروحوا وين الواحد يكون أباطوا والنجم يعمل شنو؟ بنغازي اقرب حتة ليهو

طبعا حبايبنا المصريين هسة بيكونوا رافعين قوقو ومجهزين الشنط والجوازات وواقفين في الحدود آخر طلقة تطلع هم بكونوا بالملايين في ليبيا

هلا عثمان محمدين

Quote: لعنف وعنصرية ذلك الشعب وإختزانه للكثيرمن الغل تجاه الشعوب التي أقامت مثابات ثورية بإسم بلدانها داخل ليبيا ولها ممارسات غير مقبولة تصب في مصلحة النظام السائد "اللجان الثورية" حينها مثل مثابات اللجان الثورية السودانية والفلسطينية فقط لا غير

طبعا من مثالب الغربة هي أنك بتلقى نفسك في أوضاع تفرض عليك تمارس أعمال خلاف تلك التي من أجلها قررت الغربة مثل الإنخراط في العمل السياسي في الدولة المضيفة ومواجهة كل ما ينتج عنه من مواجهات مع بعض شرائح المجتمع والتي ستكون نظرتها أليك بأنك غريب وليس من حقك الدخول في سياسة البلد لكن دائما الشخص الحصيف لازم يقرر في اللحظات الحاسمة الابتعاد والإنزواء عن مناطق النزاع حتى لا يكون هدف عاري للقوى المضادة واللجان الثورية هي صميم عمل النظام وعضويتها كفيلة بتعريض الشخص إلى كل ما يتعرض له المواطن الليبي في نفس اللجان لذلك بالتأكيد ستكون هذه العنصرية لكن في النهاية بعد هدوء الأحوال الكيمان بتنفرز

بس لو تنورونا على كيفية علاقات العمل في القطاع الخاص والحكومي عشان الناس تكون فكرة جيدة قبل الإبحار في هذا البحر الهادر

أهلا شعبان شريف

Quote: إحتراز الليبيين من (السودانيين ) واجب في هذه المرحلة

طبعا يا شعبان المرحلة دي مرحلة حرب وتحرير والقانون بيد الثوار

فالمسألة خطيرة لكل ما هو غير ليبي سواء كان سوداني أو غيرو

لكن بعد تنتهي مرحلة الحرب دي أفتكر الوضع ببقى كويس وبتكون هنالك دولة وقانون

بحمي الجميع بعدين في أي دولة لولا وجود القانون مافي حد بقدر يقعد ما لم يكون مواطن تلك الدولة


هسة الخليج دا يبدو أماكن آمنة لكن لولا القانون القوي والله أجنبي واحد ما يقدر يقعد فيه يوم

Quote: لا بحر لا كفيل شقة ساي كداري بس

يا حمد

لو ما جات افرازات سلبية من تدفق سلاح وغيره.. أعتقد حـ يكون
فيها فايدة اقتصادية مقدرة، خاصة لأقاليم دارفور.

ربنا يهون القواسي

مرحبا عماد حسين

حظكم غايتو قالوا ليبيا دي بقت حقتكم لزم وبوضع اليد كمان

خلاص أمشو لموا القروش وتعالو عرسو مثنى وثلاث ورباع

أصلو أنتو المولانات ديل بتحبو العرس زي عيونكم

Quote: لو ما جات افرازات سلبية من تدفق سلاح وغيره.. أعتقد حـ يكون فيها فايدة اقتصادية مقدرة، خاصة لأقاليم دارفور.

شوف يا حبيب السيناريو في ليبيا حيكون كالتالي حسب ظني

= القذافي حيكون قاعد وسيلجأ جنوبا ويحتمي بقبيلته ويكون مقاومة
= حيكون الشمال بيد الثوار وستأتي الشركات الغربية للتعمير
= الدول الغربية حتدعم القذافي بطريقة ما ليزداد خطره على الموارد البترولية
= حتدخل الدول الغربية جيوشها البرية بدعوى حماية الشركات وحقول النفط
= حيقعدوا لحد ما يخلصو القروش الصرفوها في الحرب دي مع أرباحها وبعدها بيطلعوا ويخلوا ليبيا زي العراق

الناس ديل ما اغبياء ومابحكمهم عقل القطيع كل شيء محسوب

دخلوا الحرب بالجو رغم التكلفة العالية لكن ما عايزين يفقدوا جندي واحد

لأنهم عارفين بيكسبوها وبيرجعوا خسارتهم أضعاف

ولحد ما الأمور تستقر ممكن بعد داك ممكن يكون لينا فيها نصيب

مرحبا الفاتح شلبي

Quote: هيييييييييع يا حمد الحكاية ما سايبة !!! عليك ان تعبر الى ليبيا عبر الحوض النوبي العظيم وصحيح لا يوجد بحر لكن عندنا صحراء لا يختلف عن البحر فى شئ

ياخوي الحوض النوبي دا بلو وأشرب مويتو الزدوايات والكيوايات ديل معاهن حوض نوبي وصحراء كمان ؟

Quote: المهم خلو ليبيا تروق ونشوف ليكم الموضوع

حنا ياخوي قاعدين مع أخوان نورة عيال الملك سعود نمشي وين نخليهم

وليبيا دي مبروكة على الكيزان

Quote: ياخوي الحوض النوبي دا بلو وأشرب مويتو الزدوايات والكيوايات ديل معاهن حوض نوبي وصحراء كمان ؟

يا حمد, إنت فاكر الحوض النوبي العظيم, قاعد فوق الواطة ؟ لا

دهـ حوض قاعد فى قعر الأرض (تغطي غرب المنطقة النوبية حتى ليبيا غرباً ودارفور جنوباً وشمالاً حتى حدود مصر) عبارة عن خزان للمياهـ فى باطن الأرض, يعني زدواياتكم لو غطسن فى الأرض بيستحمن من موية الحوض.