Post: #1
Title: لماذا هذا وليس ذاك ؟
Author: طلحة عبدالله
Date: 08-21-2011, 12:40 PM
Parent: #0
الموضوع دا ليهو فترة واقف لي في حلقي ...
فهمونا حاجة ينوبكم ثواب ..
يتبع ..........
|
Post: #2
Title: Re: لماذا هذا وليس ذاك ؟
Author: محمد البشرى الخضر
Date: 08-21-2011, 12:50 PM
الواحد يصحى الصباح مت عندو موضع يخش البورد برضو ما عندو موضوع يتذكر انو ليه اكتر من اتنين وسبعين ساعة ما كتب بوست جديد
يضغط ايقونة موضوع جديد ويكب اقرب كلام فارع يتبادر لذهنه حينها و يختمه بـ"يتبع"
قوم لف
|
Post: #3
Title: Re: لماذا هذا وليس ذاك ؟
Author: طلحة عبدالله
Date: 08-21-2011, 01:04 PM
Parent: #2
طالعت قبل فترة في أكثر من منتدي سوداني هجوما كاسحا لا يبقي ولا يذر
ومن الجميع بلا إستثناء على (زول) دخل أحد المولات في إحدي دول الخليج
لأنه يرتدي عراقي وسروال (لم يتم الكشف عن الحذاء) لكن نفرض انو (سفنجة) ..
الهجوم بدأته بنت ما وتبعها الأولاد والبنات واتفق الجميع على أن المشهد
متخلف وفضحنا فضيحة وما متحضر وما عارف شنو وشنو شنو ..
المهم ما خلوا ليهو صفحة يرقد عليها، وكل واحد يدخل يشجب ويدين ويستنكر
بكل جدية يستصحب معه مشهد مماثل وهاك يا تقطيع وفلفلة ..
الموضوع على ما أذكر وصلت صفحاته إلى أكثر من أربع أو خمس ومداخلات
وردود بالكوم ودا كلو دق عيش في الزول أب عراقي دا ..
الناس ديل جادين واللا جادين لكن ما عارفين أنهم جادين ؟؟؟
يتبع ......
|
Post: #4
Title: Re: لماذا هذا وليس ذاك ؟
Author: طلحة عبدالله
Date: 08-21-2011, 01:13 PM
Parent: #3
وطالعت تاني وبرضو قبل فترة وفي منتدي تاني غير المنتدي الأولاني موضوع قريب
من الموضوع الفوق دا والمرة دي التقطيع في الراجل السوداني لانو ما قاعد يمش
جمب مرتو في الشارع ... 
الجماعة الدخلوا الموضوع وردوا بعضهم كان بقول:
ما عندو عواطف ومشاعر واحاسيس وبرضو متخلف وما متحضر
والبعض الآخر:
كان مصر على انو لازم يمسكا من يدها إذا ما عايز يمسكا من خصرها أو كتفها ويمش معاها
الهوينى يتقدل من شارع لى شارع وإلا فهو برضو متخلف وما متحضر وما عارف شنو ..
ونوع تالت :
كان يطالب بالإقتداء بالشوام والمصريين والخواجات ويتعلموا منهم الرومانسية والحاجات
الحلوة دي ..
وأنا مستغرب ليك وليهم جنس استغراب .
يتبع .....
|
Post: #5
Title: Re: لماذا هذا وليس ذاك ؟
Author: طلحة عبدالله
Date: 08-21-2011, 01:16 PM
Parent: #4
بالمناسبة الموضوعين الأولاني والتاني بتاع العراقي والمشي جمب المراة سمعت نفس
النقاش بشأنهما في مجالس وقعدات ومناسبات مختلفة وبذات الفهم وذات الجدية وهما
ليس قصرا على منتديات المراهقين بس ..
يتبع ..........
|
Post: #6
Title: Re: لماذا هذا وليس ذاك ؟
Author: طلحة عبدالله
Date: 08-21-2011, 01:23 PM
Parent: #5
أنا متأكد انو المستنكرين ومشمئزين من زول العراقي والسروال ديل وفي نفس المول دا
شافوا خواجات وغير خواجات ماشين من غير هدوم تقريبا (فنلة داخلية حمالات ورداء فوق الورك)
+ (السفنجة الواحدة دي) وما خدين راحتم ع الآخر في التجدع والتقدل وكمان معاهم لقطات وصور
جماعية مع بعض ..
أها لماذا هذا وليس ذاك طالما أصلا قياس التحضر والتخلف باللبس والحاجات الزي دي .. ؟
وبعدين المتحضر العراقي والسروال واللا الفنلة الداخلية الحمالات والرداء فوق الورك ؟
يتبع ........
|
Post: #7
Title: Re: لماذا هذا وليس ذاك ؟
Author: طلحة عبدالله
Date: 08-21-2011, 01:35 PM
Parent: #6
بالنسبة للمشي جمب المرأة في الشارع .. فشخصيا مع حركة أن يمسك الزوج زوجته
في الشارع كناية عن الود والتراحم وعشان الحاجات تبقي حلوة لكن في الوقت نفسه ....
وين المشكلة إذا الزول ما مشي جمبها في الشارع ؟؟؟
وهل كل واحد ما ماشي جمب مرتو في الشارع معناتا بكرها؟
وهل كل واحد ماشي وماسك مرتو معناتا بموت في دباديبا ؟
أعرف الكثيرون جدا يذوبون عشقا وهياما في نسوانم لكنهم لا يمشون
معهن في الشارع حتى ولو انشقت الواطة وعادت وانطبقت تاني ..
واعرف بعضهم بينهم وبين نسوانم مشاكل وصلت درجة استحال معها المضي
قدما في طريق الحياة الزوجية ولكنهم يمشون معهن في الشارع بل ويمسكونهن
من الأيادي وغير الأيادي خاصة في اماكن وحتات كدا بعينها.
الأهم من دا كلو هل دا موضوع مشكلة عويصة لدرجة أن تفرد له البوستات
وتحتشد في نقاشه الردود والمداخلات والمطاعنات والبكاء والنحيب ؟
يتبع ....
|
Post: #8
Title: Re: لماذا هذا وليس ذاك ؟
Author: طلحة عبدالله
Date: 08-21-2011, 01:40 PM
Parent: #7
جرجير
القال ليك منو انا من الواحدين القاعدين يصحوا من الصباح
كضبا كاضب لأنو أنا بصحي اقلاهو اتناشر ..
ثم والاهم :
فحط من هنا بلا عدل معاك بلا كبكبة فاضية ..
كرور .
|
Post: #9
Title: Re: لماذا هذا وليس ذاك ؟
Author: محمد البشرى الخضر
Date: 08-21-2011, 03:22 PM
Parent: #8
اها ويقوم الواحد دا يخلي البوست الفارغ زي ساعة ساعتين كدا يفكر فيهن يملاه كيف ولا يتم كلامو الفارغ القبيل دا باي شكل
طبعا بلقى ولا زول ما هببو ليه يقوم يكتب كلام اخرم وابرم من الخارم بارم الأول و يواصل
تنظير قلت ليك اخير تقوم تلف وسيبك من مول وعراقي وردا ومسك يدها و فك رجلها وسائر مل تملانا بيه فقر من ترهات و تنظير
|
|