Post: #1
Title: ما بنطير برانـا .. بنطير معاكم ..
Author: tmbis
Date: 08-17-2011, 11:40 AM
المتابع للشان الصفوي اليومين ديل .. حقو ما يتعقد دي مسالة عادية ..
يكتب سلك .. او مزمل ابو القاسم ، يظهر لينا واحد جديد اسمو مين كدا المكابرابي .. ينظر هيثم كابوو ، هذا بالاضافة إلى ما يتحفنا به علماء التنظير في منبر وطن من لا وطـن له .. وهم كثر ..
اضف إلى ذلك .. ان يراهن فايز ود القاضي بفردة من شنبه .. كما راهن في العام الماضي .. اساسي بفردة حاجبه اليسرى على ما اذكر ..
|
Post: #2
Title: Re: ما بنطير برانـا .. بنطير معاكم ..
Author: حاتم الياس
Date: 08-17-2011, 11:54 AM
Parent: #1
يومتا مشيت استاد جمال الوالى وتابعت مباراة المريخ ومريخ حلفا..والله ياتمبس مباريات الدورة المدرسية بالنسبة لهذه المباراة دورى أنجليزى ولولا قفشات مشجعى مريخ حلفا من أهلنا الحلفاويين الزول كان مرارتو أتفقعت..مريخ حلفا بسببو وحارس مرماهو مرتبك ومخلوع من الكشافات تقول أتعلمه بالرتاين....ومع ان فريق الصفوة غالب تسعة صفر لكن لعبهم تعبان جداً ويتجاروا على المرمى بتاع مريخ حلفا ويطفشوا وكأنهم مصابون بحالة حرمان مزمنة من الأهداف ووجدوا ضالتهم فى هذا المريخ الحلفاوى المسكين...أها الوقت داك أقتنعت بأنو الأنتماء للهلال ده نعمة كبيرة ثم فكرت فى كيف يكون الزول بتاع صفوة..وجدت انو من الطبيعى انو يكون الزول هلالابى لكن مريخابى دى..بكون الزول فى بداية تكون أنتماءه الرياضى اسرتو ماأنتبهت ليهو
--
ماتنسى مجذوب حميده وأستثنى عبدالمجيد عبدالرازق
|
Post: #3
Title: Re: ما بنطير برانـا .. بنطير معاكم ..
Author: طلحة عبدالله
Date: 08-17-2011, 12:02 PM
Parent: #2
يا تامبا ياخ كابو دا زول كويس ما تحمل عليهو
وكان غايظاك قعدتو بالجمبة دي فالزول دا معذور ياخ لأنو
السمعتو قالوا عندو بواسير ... 
حاشية :
أعمل حساب جرجير نأنو شنو ..
لو دخل في البوست دا ف بى موية وكملت .
|
Post: #4
Title: Re: ما بنطير برانـا .. بنطير معاكم ..
Author: فايزودالقاضي
Date: 08-17-2011, 12:02 PM
Parent: #2
| Quote: ان يراهن فايز ود القاضي بفردة من شنبه |
الشنب كااااااااامل (فردتين) 
فريق زي فريقكم ده الواحد يرهن اولاده ووالدينه وهو مطمئن ...فعلاً فريق من لا كاس له ..
|
Post: #9
Title: Re: ما بنطير برانـا .. بنطير معاكم ..
Author: tmbis
Date: 08-17-2011, 01:29 PM
Parent: #4
Quote: يا تامبا ياخ كابو دا زول كويس ما تحمل عليهو
وكان غايظاك قعدتو بالجمبة دي فالزول دا معذور ياخ لأنو
السمعتو قالوا عندو بواسير ... |
.. والله يا طلحة كابووو دا .. فجاة لقيتو كاتب ليهو حاجة كدا في الهلال .. نظام شنو ..؟ نظام انا صحفي كبير وكدا .. ونجم اعلامي لامع
أول حاجة قعدت ابحث في الارشيف الكروي والمعرفي بتاعي .. الزول دا منو ياربي ..؟
من أولاد ووين ؟؟
وكان بلعب ووين .. علشان يجي يكتب في اللاهل ..؟
كل بحثي اعلاه طلع فشوش ساااكت .. يقومو يجيبوهو ليك مع ترباس ..  عندها فعلا عرفت حجمو الحقيقي ..
المهم .. انا باقي الفلم دا بخليهو يتمو ليك العربجي .. شايفو الايامات دي متالق شديد جدا وخمسة وخميسة في عين العدو ..
....
| Quote: الشنب كااااااااامل (فردتين) |
. يا ود القاضي ..
والله مجحرد التفكير في الحلاقـة دي انا بعتبرك حلقتـه ..
صاحبك اب شنب بتاع السنة الفاتت .. شايفو كاتب ليهو بوست السنة دي .. بحذر من مقبة الرهان بي الشنبات .. لانو قال السنة الفاتت .. الله ستر لكن السنة دي حالقين حالقين ..
بعدين في حفلة الحلاقـة دي .. اللقيمـات علي أنا .. اتفقنا ..؟ علشان ما تجي تقول تمبس ما جاب اللقيمات انا ما ح احلق ..
|
Post: #8
Title: Re: ما بنطير برانـا .. بنطير معاكم ..
Author: tmbis
Date: 08-17-2011, 01:15 PM
Parent: #2
| Quote: والله ياتمبس مباريات الدورة المدرسية بالنسبة لهذه المباراة دورى أنجليزى ولولا قفشات مشجعى مريخ حلفا من أهلنا الحلفاويين الزول كان مرارتو أتفقعت |
.. | Quote: لكن لعبهم تعبان جداً ويتجاروا على المرمى بتاع مريخ حلفا ويطفشوا وكأنهم مصابون بحالة حرمان مزمنة من الأهداف ووجدوا ضالتهم فى هذا المريخ الحلفاوى المسكين |
. لكن يا حاتم بالغته عديل كدا ..
يا بالغته .. يا أما إنك متقد الذهن شديد ..
لانو حركتك دي بالماسبة ما بيعمله زول عاقل كدا وعندو راس بيستعملو لي حاجات كتيرة ..
ياخ ان عشية مباراة الهلال والقطـن قاعد اتابع في الاخبار والشمارات .. اقوم يتعارض لي خبر مباراة المريخين .. والله تتخيل انا خجلته .. خجلته لي مزمل .. ولي سلك . وللاخـوان في دائرة الكرة بالمريخ .. وخجلته شديد جدا لأخوانا الزملان هنا دا ناس فايز اب شنب .. وطلحة طنظير في نسخته المعدلة هذه الايام ..
ياخ انت تمشي تدخل ليهم الاستاد راسك عديل ..؟ والله دي مياتة قلب منك بس .. يا كمان رفعان روح معنوية للعجـب وأخوانو ..
|
Post: #5
Title: Re: ما بنطير برانـا .. بنطير معاكم ..
Author: صبري طه
Date: 08-17-2011, 12:06 PM
Parent: #1
عليك الله يا تمبس أديهم بالجنبة الفيها الحديدة ...
ــــــــــ
ويا ريت يدخلوا ويبطّلوا المتاوقة
|
Post: #6
Title: Re: ما بنطير برانـا .. بنطير معاكم ..
Author: omer osman
Date: 08-17-2011, 12:19 PM
Parent: #5
| Quote: ويا ريت يدخلوا ويبطّلوا المتاوقة |
تلاتة مرات اتاوق وامرق .........
يازول تمبس ده بنكلم ليهو القدرو
والله ياتامبا قبل كم يوم بحكي لي زول صاحبي عن قصة صاحبك عمر مع باكمبا
تعرف انا بحكي للزول القصة دي اظن في ساعة كل ما اتذكر كلامك اقعد اضحك
ويغلبني اتكلم ........ اللذيذة صاحبي هو زاتو مات بالضحك بدون ما يعرف باقي القصة ...
|
Post: #10
Title: Re: ما بنطير برانـا .. بنطير معاكم ..
Author: tmbis
Date: 08-17-2011, 01:31 PM
Parent: #6
| Quote: عليك الله يا تمبس أديهم بالجنبة الفيها الحديدة ... |
والله يا صبري الجماعة ديل الايامات دي شايلين حديدتم وحايمين .. كلما اوتو (بنقو) يستلم الكورة .. يلوحو بالحديدة في الاتجاه العكسي ..
الناس ديل واعيين يا صبري الواحد بيجيب معاهو حديدتو .. وببقى داخل
|
Post: #11
Title: Re: ما بنطير برانـا .. بنطير معاكم ..
Author: tmbis
Date: 08-17-2011, 01:34 PM
Parent: #6
| Quote: والله ياتامبا قبل كم يوم بحكي لي زول صاحبي عن قصة صاحبك عمر مع باكمبا |
..
والله يا جنابو السترة والفضيحة متباريات في رمضان دا .. لكن النصيحة لي الله .. عمر فقري جدا ويستاهل الكان بعمل فيهو باكمبا دا ..
|
Post: #7
Title: Re: ما بنطير برانـا .. بنطير معاكم ..
Author: tmbis
Date: 08-17-2011, 12:36 PM
Parent: #5
أحد أعمامي .. الذين أورثوني حب الهلال جينياً .. وذلك مرورا بوالدي .. وعماتي وخيلاني ثم والدتي ثم اخواني بالاضافة إلى راس بيتنا الذي دائما ما يتزين بالاعلام الزرقـاء .. حتى وأنا في وسط الموردة اكثر الاحياء الامدرمانية تعصبا للانتماء .. يصل إلى حد الضرب .. المبرح حال أن تنازعتك أي من العقائد الرياضية الأخرى ..
عمي هذا .. كان من عشقه للهلال .. يأتي من بلدتنا صوب الاستاذ مباشرة .. هذا بعد أن يتزود بما شاء من الصاعود .. ويحرص ان تكون عمته من التوتل الخالص .. ليقوم بحرقها .. والعجيب هذا يحدث في تمارين الهلال .. فما بالك بالمباريات .. الدورية ..
في مباراة الهلال والأهلي القاهري في نهائي الأبطال .. والشهيرة بمباراة لآراش المغربي .. كل محاولات كبح جماح العم تكللت بالفشل .. حيث كانت كل هجمة للهلال تتبعها هرولة من عمنا يتم اللحاق به عند باب الشارع متحسسا عمته .. وجلبابه في وضعية القلع استعدادا للحرق .. عمنا دا قروشو كلها مكملة جلاليب وعمم محروقـه ..
آخر ما توصل له بقية أعمامي المتابعين للمباراة وهم في حالة توتر عالية جدا .. في هلاليتهم .. ان تم ربط هذا العم على رجل عنقريب المخرطة الضخمة .. وبعد ان حدث الحدث .. تم نسيان العم مربوطـا وترك وهو (يئن) من كون عدم حضوره للمبارة وليخلص حقه الهلالي بأن يعمل سكين ضراعه في رقبة هذا المغربي المرتشي ويقدمه قربانا للهلال العظيم ..
اعتقد أن ما يقدمه جمهور الصفوة هذه الايامات من رجفه .. هو ما يشابه تماما حال عمي وهو مربوطـا قبل وبعد المباراة .. فإذا ربطنا مزمـلا في الطابق التاني بتاعم دا .. احتجنا أن نذهب بي سلكـــا إلى كدباس .. أو إلى خلاوي الغبش بهمشكوريب ..
ما يربكني في هذا الأمـر .. امر الربط دا .. إنو .. ناس المريخ ديل .. بشجعو في الهلال شديد كدا ، واللا كمـان .. عندهم فريق محدد بشجعو فوقو علشان يشيل البطولة ويطلع خسم الهلال ملح ملح ..؟
لكن الظاهر لي الناس دي بتشجع من طـرف .. ومن طرف دي ختو لي تحته خطين ..
|
Post: #12
Title: Re: ما بنطير برانـا .. بنطير معاكم ..
Author: abas
Date: 08-17-2011, 01:47 PM
Parent: #7
ختو لي تحته خطين ..
ختيين يا معلم
طيرهم يطيرو ما يركو
|
Post: #13
Title: Re: ما بنطير برانـا .. بنطير معاكم ..
Author: Ahmed Alrayah
Date: 08-17-2011, 01:48 PM
Parent: #7
غايتو يا هلالاب إنتو ما منطقيين أبداً.
هسي يا تمبس -بأمانة كده- قونكم التاني ده ما كرة طائشة
في السماء وسقطت على رأس أوتوبونغ ؟!
|
Post: #14
Title: Re: ما بنطير برانـا .. بنطير معاكم ..
Author: الصادق صديق سلمان
Date: 08-17-2011, 01:59 PM
Parent: #13
انت يا تامبا اكتب وخلينا نحن نستمتع
الصادق
|
Post: #15
Title: Re: ما بنطير برانـا .. بنطير معاكم ..
Author: جلال عثمان
Date: 08-17-2011, 02:05 PM
Parent: #13
Quote: كرة طائشة
في السماء وسقطت على رأس أوتوبونغ ؟! |
والمكابرة على اصولها .... ياخ معقول !!!! والزول بي كل قلب ميت ممكن يصل لي مرحلة زي دي
صدق تمبس والله "انتو ناس الجرايد ديل بلملموا لينا الناس ديل من وين"
ما ناس ياولدنا : كرور عفوا قصدي مكابرابي
تحيات استاذنا احمد الريح
|
Post: #16
Title: Re: ما بنطير برانـا .. بنطير معاكم ..
Author: فدياس نجم الدين
Date: 08-17-2011, 03:07 PM
Parent: #15
تامبا
رمضان كريم
لازم يا ابو الشباب كمان نراعي حال الفقراء والمساكين في الشهر ده وزي ما قال حبيبنا ضفاري
ليس منا من فرح ووصيفه زعلان
اتخيل نفسك بتحضر في مباراه للهلال ضد هلال ام صفقا عراض في بطوله شرق ووسط السودان والمريخ يلتقي الزمالك المصري في دوري الابطال في دور الاربعه
ياخي دي حاله اخير منها العرس
|
Post: #17
Title: Re: ما بنطير برانـا .. بنطير معاكم ..
Author: حمد عبد الغفار عمر
Date: 08-17-2011, 05:08 PM
Parent: #16
ياخي والله الناس ديل عجيبين خلاص
يخلوا فريقهم الماشي إلى زوال دا
ومجلس الإدارة والمدرب واللاعبين والمشجعين الفاشلين كلهم ديل
ويقعدوا يناجضوا في الهلال البحقق في الانتصار تلو الانتصار دا ؟
غايتو بالانجليزي كدا
poverty on their faces
|
Post: #18
Title: Re: ما بنطير برانـا .. بنطير معاكم ..
Author: haroon diyab
Date: 08-17-2011, 05:17 PM
Parent: #17
اها....
يمين برااااااااكم قبلتو عليهو....!!!!!
اكان مالحقتو امات طه انا ماود ابوي
-----
زماااااااااااااان قلنا ليكم خلوهو في حالو
مسير امورو براهو....شي حكام...شي بلنتات....
شي علي همشري ....اها لقيتوهو قرررررررررررب
من انو يصل ربع النهائي قبلتو عليهو....
-----
وياتامبا مادام صبري معاك يمين شنب ود القاضي
ماتجيهو الحبة
|
|