فايز ودالقاضي: اللهم لاشماتة مرة تانية

رمضان كريم على الجميع
مع إنه خلاص الناس بدأت في مرحلة تجهيز
ملابس العيد والخبيز والذي منو


يتبع

تعرض الأخ الحبشي المذكور أعلاه لمحنة كبيرة في مجال عمله
حيث قامت إدارة (الآي تي) بحجب الكثير من المواقع خاصة (الفيس بوك)عنه
وحيث أنه كان منداح ومتجدع شديد في (الفيك بوس) وفي رواية أخرى (التيس بوك)
فقد شق ذلك عليه وآلمه كثيراً كما حاق ببعض أصدقائه حزن على فراقه
أما نحن من قبيلة الشمات تظاهرنا الكثير من (الظاظات) فقد سررنا لذلك كثيراً
وقد أشرعنا لذلك بوست منفصل وفي ذات الوقت سودنا حائط الحبشي المذكور على الفيس بوك
بالكثير من المراثي وشتى أنواع الشمارات والشماتات.....









يتبع

والحالة تلك وفي وسط الشماتة
إذا بي أفاجأ بعدم مقدرتي الوصول للفيس بوك واليوتيوب
والكثير من المواقع التي قامت إدارة(الآي تي) طرفنا بحجبها
وخوفاً من شماتة الأحباش والظاظات فقد قمت بجلب - زين كونكت -
وصرت ألتف على أحابيل (الآي تي) لمدة تقارب الشهر حتى اهتديت
إلى برنامج - كاسر للبروكسي - تمكنت بفضل الله ثم هذا البرنامج
من الولوج لأي موقع كان محجوباً عني بل حتى عن السودان - فقد تمكنت
من تنزيل (القوقل كروم)

يتبع

الحاجة العرفتها يا ابوعبيــدة انه ( الآي تي ) لم يحظروا المواقع عن الحبشي بسبب الفيسبوك

الحبشي هداهو الله واصلح باله وجنبه الفتن .. كان بيتصفح مواقع اخري غيــر حسنة السمعة *

الله يهديهو بس ويتوب عليهو بعد السن دا ..
ـــــــــــ
* المواقع المقصودة بالطبع هي مواقع الملحدين العرب والكفار ومواقع الارهابيين من اتباع بن لان
والشيعة الحوثيين والنصري ومن يلبسون على اهل القبلة دينهم من المشركين
الشرح للضرورة حتي لا يفهمنا احدهم غلط ويظن بود القاضي ظن السوء .. خاصة وانه تعدي النصف قرن
عمراً وقد ابيّض منه الشارب واللحية

والله من وراء القصد

الطريفي
عمرة مقبولة ياخ

ياخي مابصدق - بكلامك ده الحبشي مفروض يكون مش في (بريمان)
لا بل يكون في بتاع (الرويس)

المهم وعشان ما أطش بيكم كتير
حا أواصل....

هههههههههههههههه
ياااااخ كامل التضامن مع قريبي فايز ود القاضي
امبارح بالله جاني ليك منو تلفون مولول
ولسوء حظه كنت سايق وفي دوار (صينية) زحمة
فلم اتمكن من الرد عليه .. وضربت ليهو بعد ذلك
فقال لي عايزك في استشارة فنية كمبيوترية
وتاني ما ضرب لي لغاية اسي
ولا يهمك يا قريبي جاهزين لتقديم العون التقني

فلتسقط إدارة الاي تي وعاش كفاح التبقة الآمله (العامله)

يابشاري ياهندسة
رمضان كريم والعيد مبارك عليكم مقدماً

Quote: فقال لي عايزك في استشارة فنية كمبيوترية وتاني ما ضرب لي لغاية اسي

ههههههه ياخي والله ضحكتني شديد
بس مايكون شالوا منو التلفون ظاطو هههههه
هسي يعني يكون بقى شنو بدون تلفون؟؟؟؟؟
لأنه كان لأجيئ إسفيري بحسب تسمية ظاظا حواء

فبدون تلفون رجع اللاجيئ الإسفيري
إلى حياة الهضاب والجبال وشراب القهوة وربما أشياء
أخرى بيد أنها لا تتعارض مع رمضان
هههههههه

بعدين يابشاري ياخ ماتحرض الزول ده ضد ناس (الآي تي)
ديل والله يقوموا يخرجوا ليهم في العشر الأواخر دي

أبوعبيدة سلامات
العاقبة إن شاء الله لأساسي ؛)
___
من أخذ الأجر حاسبه الله بالعمل..

يبدو كراعي كانت حاره عليه ... فقد قمت بإضافته ضمن قائمتي علي الفيس بوك منذ ثلاث ايام

أشعر بالحرج منه أسي :(

الأخ/طارق عمر مكاوي
كل عام وأنتم بخير

ليس عليك شيئ ، بل هذا الحبشي يجب
أن يشعر بالحرج من نفسه
ياخي ماجاء حتى يقول لي شكراً أن تضامنت معه في محنته وعملت على حلحلة مشاكله

الأخ الحبيب/ياسر بن طيفور
العيد مبارك عليكم


صاحبك اساسي الأيامات دي منقطع للعبادة من خلال النوم الثقيل -
ذلك باعتبار أن نوم الظالم عبادة

أستاذة حواء

فايز ده أي حاجة بقدر عليها إلا شماتة أبلة ظاظا

أعود لأواصل القصة
وسأعود للأخوة الكرام فرداً فرداً وظاظا ظاظا

طبعاً بعد ما تمكنت من كسر البروكسي بتاع جماعتنا
وتلازم ذلك مع شماتة مستمرة على الحبشي إذا بي أفاجأ بعدم مقدرتي
على التواصل عبر سودانيز أون لاين: قدر ما أفتح يديني ليك كلام شيئ
عربي وشيئ انجليزي وانك محظور وماعارف شنو وقرب يقول لي إني الهكر
المهم ياقول تبارك: إحترت شدييييييييييد وبعد داك أتوكلت علي الله وراسلت
سيد الحوش ونسخت ليهو الرسالة التي تظهر إلي : والله ماهببو لي وأداني الطرشاء عديل كده
لحدي ما أكلت في خاطري في رمضان ده

يوم الخميس الماضي رن هاتفي فإذا بي أطالع رقم قادم من السعودية:
أنا: الو - السلام عليكم
المتصل: ياعربي يامقطع رمضان كريم، ليه ماضربت لي بمناسبة رمضان
اووووووووووو اخونا الحبشي اللاجيئ الإسفيري فايز سلامات ياخ
ورمضان كريم وواحشنا وماعارف شنو كده كلام كتييييير والله ضربت ليك
لكن ياخي انت تلفونك دائماً مقفول؟؟؟؟
أها السنة دي ماجايينا عمرة؟
لا والله يافايز عندي عرس أخوي في العيد والوالدة أقسمت علي ألا اسافر
لأنه سودانير مامضمونة أمشي وأجي في مواعيد مناسبة هههههه
اها وانت ماجائي السودان في العيد؟
عيد شنو يازول ههههههه لسه والله حبة كده

مبروك ياخي شايفك منور الفيس بوك يعني خلاص الغامدي رفع الحظر؟؟؟
لا والله ياخي تخيل مشيت دخلت من (نت كافي)
يافايز أنا فعلاً زول عربسات لكن ياخي أنا من جيل الديجتال
وإنت حبشي ماعندك سالفة وماناقش أبو النوم في التكنولوجي
ياخي انا محبة فيك ووبفضل هذه الأيام المباركات بديك الحل

فايز نط لي فوووووووق: بالله في حل للموضوع ده؟؟؟
أيوه يافايز: في برنامج إسمو ....... تقوم تنزلو وحاتشوف كل النجوم
فايز: برنامج شنو؟؟؟؟
أنا: مستغل الوضع طبعاً ياحبشي ياخي انت قريت وين؟؟؟؟ ههه إسمو ......
فايز: اسمو شنو؟؟؟ الشبكة بتقطع والصوت ما واضح
ماواضح ولا مابتعرف إنجليزي ياحبشي؟؟؟؟
المهم مليتو ليكم الإسم حرف حرف وزنقة زنقة
ياخي سل روحي عديل كده لحدي مافهم الموضوع
غايتو الحبش ديل مخهم ما بمسك إلا بالـــ........

أبوعبيدة محمد الأمين

رمضان كريييييم

فايز ودالقاضي مع انو زول مافهو خير لكن نساعدو في فتح فيس بوك

بس ماتقولو مهكراتي

فايز اتمني اضافة s بعد http

بحيث تصبح https://www.facebook.com




مودتي

أخونا الهاكر طيار/محمد طه الحبر
كل عام وأنتم بخير


ياخي فايز ده سيبك منو؟ انا مش سألتك عن فك التشفير بتاع الكونكت بتاع الجماعة ديلاك؟
أها عملت لي فيهو شنو؟

أما إنك مهكراتي صحيح

.....
وعلى ذكر الحظر والغامدي يافايز والله عندي مشكلة في سودانيز أونلاين
ههههه مشكلتك شنو ياعربي
ياخي رغم إني كسرت البروكسي بتاع الشركة بتاعتنا لكن مابقدر ادخل سودانيز أونلاين
كيف الكلام ده؟؟؟
شفت بفتح المنبر العام بقرا العناوين بس لكن أول ما أفتح البوست يقوم يوديني الصفحة الرئيسية
ومرات كده يافايز بكتب لي كلام إنك محظور وشنو كده ماعارف أيه
فايز بشماتة ظااااااااهرة: ياخي يكون بكري وضعك في اللستة بتاعة الهكر وإنك واحد منهم
ياخي حرام عليك يافايز ده أنا عربسات ياخ

فايز بشماتة ظااااااااهرة: ياخي يكون بكري وضعك في اللستة بتاعة الهكر وإنك واحد منهم
ياخي حرام عليك يافايز ده أنا عربسات ياخ

باعك في اللفه مش

أخونا عباس
كل عام وأنتم بخير

Quote: باعك في اللفه مش

ياخي ياريت لو باعني في اللفة
ده ياخي باعني قبل مايتحرك من محلو ، تقول لي اللفة
لكن في رب إسمو الكريم

........
وما إن إنتهت المحادثة حتى هرع الحبشي لتنزيل البرنامج
وطاح إندياحاً في الفيس بوك فبتنا نجد أثره - حيث أن للفيس بوك إفتضاح -
يقول ليك علق فايز ودالقاضي على حائط مين كده ماعارف قبل ثانيتين
أو قبل أربعة يوم ومرات الساعة كم كده بالليل - ذلك أن الحبشي يسكن في مقر
العمل - لكن المشكلة إنو قدر ماتعاين عشان تلقاهو - أونلاين- عشان على الأقل
يشكرنا على جليل ما أسدينا له من خدمة إلا أنه مدينا الطرشاء وأكل حقنا عديل كده
في هذه الخدمة .
بس فات عليهو إنو بتعامل مع عربي من جيل الديجيتال فما زالت الشفرة في جيبي
ولعلكم تلاحظون إختفاء الحبشي عن الأنظار في المنبر العام ، هذا ليس إلا غيض
من فيض كراماتنا والشفرات التي بحوزتنا والتي أقلها تلفون للغامدي الهمام بالذات في رمضان الحار ده.
والحشاش يملأ شبكتو

ابوعبيده ياحبيب ده كلللللللو سأهل. لكن بالله إيه حكاية شنب فايز ود القاضي الحايمه في المنبر الايام دي. لأني قريت واح يحلف بذاك الشنب وفي بوست اخر يقسم بحلاقته.
بالجد القصة شنو لان (ع. ق) عايز تقرير سريع عن الامر

عيدكم مبارك مسبقا

حبيبنا الأستاذ/كمال
كل سنة وأنت بخير وربنا يحقق الأمنيات


التقرير السريع: أن الأخ/أساسي المنقطع للعبادة هذه الأيام قد أقسم العام الفائت بحلق نصف شنبه إن حقق الهلال كأس أفريقيا
وقد كان أن أفلت شنب أساسي بكامله من الحلاقة.
صاحبنا الحبشي الشليق أقسم هذه المرة بحلاقة كامل شنبه وجواب القسم هو ما أقسم عليه أساسي
وحيث أن الهلال حاله لايسر رغم الورم الذي يحسبه البعض شحماً
فإني أتطوع بحلاقة كامل شنبي تضامناً مع هذا الحبشي في محنته

ياخي لولا محبتنا لك لما سمحنا لك بأن تنحرف بالبوست عن مسار شماتته الظااااااااااهرة
وقبل ذلك أن نوليكم أولوية الرد

اللانسر كيف؟؟؟؟؟

كاسر البروستد

ده كمان من متين ؟!!!!!



الظاظين والظاظات الشحرتايين منهم والشحرتايات تباً لكم بذات تسلسل حضوركم في هذا البوست ...

انا بشرح للكابتن الطيار كيفية الصعود بزاوية حادة والهبوط بزاوية منفرجة وبعد داك نتفرق ليكم برواقة...

انتهيتوا نهاية القذافي ولا حد سمى عليكم ..

كامل التضامن
مع الوجية
فايز ود القاضي العادل
وكامل التجاهل للحاقد الحاسد
ابو عبيدة ولا نامت اعين الفاطرين
البشوفوا حاجات كعبة في نهار رمضان
واحد داخل غلط وعايز اطنبجه

يا أبوالسهر وردي
مبارك عليكم العيد والمولود
وإن شاء الله كل حول بي زول
قول آمييييييييييييييييين

لكن يا استاذ عصرت علينا
وميلت ليك علي حيطة مائلة

والجبنة حبشية ترم ترم ترم
والسني طنبجا طبنجا طبنجا

شكراً لمرورك الباهي

صبري ياحبيب

ناس تكسر في البيك الحراق
وناس كسرت البروكسي
وناس كسرت قلم ماكمايكل