Post: #1
Title: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-14-2011, 00:26 AM
Parent: #0
اسرتي حزمت حقائبها لقضاء الاجازة في السودان بين الاهل و الاصدقاء
و فعلا تم ذلك بيسر عندما اتصل شقيقي "الذي سافر هو واسرته معهم" بوكالة للسفر و السياحة لاحد السودانيين بفورت وورث دالاس
فعلا بعد ساعة من اخذ البيانا تلفونيا تم الحجز و قطع التذاكر و كل ذلك تلفونيا
يوم السفر ذهبنا الي مطار DFW و استقبلنا موظفي شركة KLM بابتسامة عريضة و لقد تمت الاجراءات بالكاونتر بسرعة شديدة لم تتعدي ال 15 دقيقة لاسرة مكونة من خمسة اشخاص و لهم من الشنط عشرة شنط و خمسة محمولة جرا كرفقة و اللاب توب, و الابتسامات تطاردنا و الشكر لنا لان اسرتي حجزت علي الطيران الهولندي, و تم استخراج البوردنق باس, لقد ودعتهم و تمنيت لهم رحلة سعيدة. دخلوا الي داخل المطار للسفر و الطيارة بدون ايتها ازعاج و نرفزة من ناس الامن او من طاقم الطائرة او ما شابه ذلك و كل الاجراء كان واحد هو استخراج البوردنق باس.
لقد وصلوا لمطار الخرطوم وكان في استقبالهم الاهل هنالك و لقد قضوا اجازة ممتعة جدا جدا, في الخرطوم سافروا منها بعد عشرة ايام للقضارف لان زوجتي اهلها من القضارف قضوا قرابة الاسبوعين وحضروا للخرطوم لمناسبة زواج و منها ذهبوا مع شقيقتي نفيسة لزيارة اهل زوجها علي الزبير بعطبرة و زاروا بعض الاثار التاريخية ببجراوية و اتوا صادين للخرطوم و منها لللقضارف بجوها الجميل وامطارها الغزيرة و باعوضتها الكثيرة ثم اتوا للخرطوم للسفر لامريكا, طبعا مافي شئ بتم بالتلفون, قبل 3 ايام ذهبوا لشركة الطيران لتأكيد الحجز, طبعا لايوجد اماكن كافية لوقوف السيارات بعد جولة قاربت النصف ساعة وجد مكانا لبركنة العربية بعد جدال مع احد تماسيح الحركة بثوبه الابيض, تم تأكيد الحجز بيسر شديد.
عند يوم السفر ذهبوا للمطار اي قبل ساعتين من اقلاع الطائرة, تم وزن العفش الذي اخد ساعة كاملة, ثم ذهبوا لاتمام بقية الاجراءت, ابتداءا بشرطة الهجرة فقال لها احد فراد الشرطة بان تملا اورنيك المغادرة فعلا تم ملئ الاورنيك للاجانب لانها تحمل الجنسية الامريكية, فقال لها لانك من اصل سوداني تملي اورنيك مغادرة للسودانيين, شرطت الاورنيك و ملت الاورنيك الاخر بالعربي, رفض قبول ذلك الاورنيك لانهم يحملون الجنسية الامريكية لذلك يجب ملئ البيانات بالانجليزي, اخذوا اورنيك جديد و اعطاهم الموظف اورنيك دخول, قالت ليهو ده اورنيك دخول, قال ليها مافي مشكلة ممكن تمليهو و مثل هذا يحصل كثيرا و فعلا تم ذلك, تم الرفض بان هذا الاورنيك غلط و لابد من ان تملوا اورنيك مغادرة, في النهاية تم كل مايريدون, اورنيك مغادرة للاجانب و مكتوب باللغة الانجليزية.
بعد كل هذه التلتلة و امشي و تعال و املا وشرط رفض لها رجل الشرطة ان يعطيها حق الخروج معللا ذلك ان اقامتها لمدة 3 شهور و هذه ال 3 شهور تنتهي بتاريح 20 اغسطس و اليوم هو يوم 12 اغسطس, فقالت له زوجتي و ما المانع في ذلك, انني سوف اغادر قبل انتهاء مدة الاقامة, ولقد كان مصرا ذلك الفاقد التربوي بانه لا يحق لها المغادرة قبل ذلك التاريخ, في الاخر اتي شخص اخر و سأله فقال له يكمنها ان تذهب و لكن الطيارة قفلت ابوابها وانكم اتيتم متاخرين, في النهاية و افق بعد ان اتي مندوب شركة الطيران شخصيا و اخذهم للطيارة و كانوا اخر الراكبين في الطيارة, و اقلعت الطيارة وحمدو الله علي ذلك بانهم تخارجو من تلك الشبكة, حيث لا اخلاق و لا قانون, فمن اين اتوا هؤلاء؟؟؟؟؟؟
القصة طويلة و ان اختصرتها لانو الدنيا رمضان
لطفي
|
Post: #2
Title: Re: مثل هذا لايحصل الا في مطار الخرطوم!!! فقارن
Author: Hisham Amin
Date: 08-14-2011, 00:36 AM
Parent: #1
اخ لطفى سلامات وكل سنة وانت طيب ياخ
حاجة عادية جدا جدا وبتحصل عادى جدا جدا
فى امريكا انت بتتعامل مع ناس بتعرف قيمة الراكب واهميتهة
وفى السودان انت بتتعامل مع ناس ما هاميها لا الراكب ولا الطيارة
فما توجع بطنك ساى واعمل بالنصيحة دى .
لامن تكون ماشى السودان اجازة البس جلابية السودان واتوقع اى شى
ولامن تجى راجع امريكا البس جلابية الفرنجة وجهز نفسك للتعامل الراقى بس .
|
Post: #3
Title: Re: مثل هذا لايحصل الا في مطار الخرطوم!!! فقارن
Author: فضل الصادق
Date: 08-14-2011, 09:55 AM
Parent: #2
هذا يتم بصورة عادية تقف مصطفا حتي تتخشب رجليك وتعامل بفظاظة تقتل الأمل لديك وتدفع حتي تلمع يديك وتهان ان احتجيت !
رمضان كريم عليك .
|
Post: #4
Title: Re: مثل هذا لايحصل الا في مطار الخرطوم!!! فقارن
Author: صلاح حمد
Date: 08-14-2011, 11:39 AM
Parent: #1
Quote: فعلا بعد ساعة من اخذ البيانا تلفونيا تم الحجز و قطع التذاكر و كل ذلك تلفونيا
|
| Quote: ثم اتوا للخرطوم للسفر لامريكا, طبعا مافي شئ بتم بالتلفون, قبل 3 ايام ذهبوا لشركة الطيران لتأكيد الحجز, |
| Quote: بعد كل هذه التلتلة و امشي و تعال و املا وشرط رفض لها رجل الشرطة ان يعطيها حق الخروج |
| Quote: و لكن الطيارة قفلت ابوابها وانكم اتيتم متاخرين, في النهاية و افق بعد ان اتي مندوب شركة الطيران شخصيا و اخذهم للطيارة و كانوا اخر الراكبين في الطيارة |
الأخ / لطفي - رمضان كريم
الحمدلله على السلامة
شكرا لمندوب الطيران الأجنبي .
الفرق بيننا وبينهم كبير،
اللهم غير حالنا الى أحسن حال ،
مع تقديري
صلاح حمد
|
Post: #5
Title: Re: مثل هذا لايحصل الا في مطار الخرطوم!!! فقارن
Author: جعفر محي الدين
Date: 08-14-2011, 01:01 PM
Parent: #4
الأخ لطفي
الحمد لله الذي لطف على أسرتك الكريمة
وعادت سالمة من بلاد السودان
لن ينصلح حالنا حتى نعرف للإنسان قيمته
ياخي الخطوط السودانية ما زالت تصر وتكابر وفي زمن العولمة هذا
أن تذهب إلى مكاتبهم شخصيا وقبل يومين من سفرك لتأكيد الحجز
مع العلم بأنك دفعت ثمن التذكرة كاملا وحددت تاريخ سفرك مسبقا
|
Post: #6
Title: Re: مثل هذا لايحصل الا في مطار الخرطوم!!! فقارن
Author: MOHAMMED ELSHEIKH
Date: 08-14-2011, 01:30 PM
Parent: #5
والله يالطفي بتبالغ
ياخ اول حاجة رمضان كريم لك والأسرة ومرور هذا البوست
عايز تقارن بين دول العالم المتحضر
وأحدى جمهوريات لحس الكوع؟؟؟؟ بالغت عديييييل كدى
|
Post: #7
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-14-2011, 09:54 PM
Parent: #6
Quote: فما توجع بطنك ساى واعمل بالنصيحة دى .
لامن تكون ماشى السودان اجازة البس جلابية السودان واتوقع اى شى
ولامن تجى راجع امريكا البس جلابية الفرنجة وجهز نفسك للتعامل الراقى بس . |
الاخ هشام امين
ياخ رمضان كريم و شكرا علي المرور
الموضوع اظنه عادي في السودان
يازول ماعندك مشكلة كنا نسكن في بانت شرق و كان في ترزي اسمه ابارو الواحد عديييييييييييييل يمشي عليه و يشوف المقص الذهبي بتاعه عشان يفصل ليهو جلابتين واحده بلديه و الاخري افرنجية بلياقة و كرفته كمان
و بعد داك يتعامل مع المشروع الحضاري الاسلامي و فاقده التربوي من جهة و من جهة اخري و مع النصاري الكفار ديل او كما قالوا
تسلم
لطفي
|
Post: #8
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-14-2011, 09:59 PM
Parent: #7
Quote: هذا يتم بصورة عادية تقف مصطفا حتي تتخشب رجليك وتعامل بفظاظة تقتل الأمل لديك وتدفع حتي تلمع يديك وتهان ان احتجيت !
رمضان كريم عليك . |
سلام يا فضل الصادق
لقد افحمتني بهذه المعلومة للقساوة التي اصبحت من العاديات ضبحا
و ليس لي الا ان اقول لك برضو رمضان كريم و ما في اليد حيلة حين اصبح المواطن يهان في بلده قبل و بعد الانفصال
لك الود
لطفي
|
Post: #9
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-14-2011, 10:04 PM
Parent: #8
Quote: الأخ / لطفي - رمضان كريم
الحمدلله على السلامة
شكرا لمندوب الطيران الأجنبي .
الفرق بيننا وبينهم كبير،
اللهم غير حالنا الى أحسن حال ،
مع تقديري
صلاح حمد |
الاخ صلاح حمد
تشكر علي المرور و رمضان كريم
الفرق دائما هو فرق مقدار و ليس فرق نوع لكن اظن فرق المقدار برضو كبير و يحتاج لملايين من السنيين الضوئية للمقارنه, وسف ادعو معك اللهم غير حالنا الى أحسن حال ، و ان الله لا غير ما بقوم حتي يغيروا ما بانفسهم, ولكن السألة ماشه لي وراء و عايزه ليها تدخل الهي مباشر
لك الود
لطفي
|
Post: #10
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-14-2011, 10:07 PM
Parent: #9
Quote: الأخ لطفي
الحمد لله الذي لطف على أسرتك الكريمة
وعادت سالمة من بلاد السودان
لن ينصلح حالنا حتى نعرف للإنسان قيمته
ياخي الخطوط السودانية ما زالت تصر وتكابر وفي زمن العولمة هذا
أن تذهب إلى مكاتبهم شخصيا وقبل يومين من سفرك لتأكيد الحجز
مع العلم بأنك دفعت ثمن التذكرة كاملا وحددت تاريخ سفرك مسبقا |
الاخ جعفر محي الدين
تصوم و تفطر علي خير
لتقليل المعاناة اختا سودانير و شوف ليك ناقل اخر كما نفعل نحن
لك الود و التقدير
لطفي
|
Post: #11
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-14-2011, 10:11 PM
Parent: #10
Quote: والله يالطفي بتبالغ
ياخ اول حاجة رمضان كريم لك والأسرة ومرور هذا البوست
عايز تقارن بين دول العالم المتحضر
وأحدى جمهوريات لحس الكوع؟؟؟؟ بالغت عديييييل كدى |
الاخ محمد الشيخ
رمضان عليك كريم و لاسرتك و المارين
طفح القاش و اغرف مدينة كسلا بعد ان فاجأءهم الخريف من كل عام فكانت العبارة بالغ القاش
فلنلحس كوعنا و بوعنا كمان
لك الود و الاحترام
لطفي
|
Post: #12
Title: Re: مثل هذا لايحصل الا في مطار الخرطوم!!! فقارن
Author: محمد البشرى الخضر
Date: 08-14-2011, 10:17 PM
Parent: #11
| Quote: رفض لها رجل الشرطة ان يعطيها حق الخروج معللا ذلك ان اقامتها لمدة 3 شهور و هذه ال 3 شهور تنتهي بتاريح 20 اغسطس و اليوم هو يوم 12 اغسطس, فقالت له زوجتي و ما المانع في ذلك, انني سوف اغادر قبل انتهاء مدة الاقامة, ولقد كان مصرا ذلك الفاقد التربوي بانه لا يحق لها المغادرة قبل ذلك التاريخ, |
لا حولا!!
لا يمكن يكون جادي الزول دا , ابدا لا يمكن
|
Post: #13
Title: Re: مثل هذا لايحصل الا في مطار الخرطوم!!! فقارن
Author: سفيان بشير نابرى
Date: 08-14-2011, 11:02 PM
Parent: #12
سلام يا لطفي ورمضان كريم
والف حمدلاك بسلامة اولادك وامهم .
والله يا لطفي يا أخوي أنا عندي قصة كان حكيته ليك
ما تعرف تبكي ولا تضحك علي ناس مطار الخرطوم ديل.
|
Post: #14
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-14-2011, 11:25 PM
Parent: #13
Quote: لا حولا!!
لا يمكن يكون جادي الزول دا , ابدا لا يمكن |
الاخ محمد البشري
رمضان كريم
الفاقد التربوي يعمل اكثر من ذلك
فلقد تمت تربيتهم من اجل اذلال الشعب
لك الود
لطفي
|
Post: #15
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-14-2011, 11:27 PM
Parent: #13
Quote: سلام يا لطفي ورمضان كريم
والف حمدلاك بسلامة اولادك وامهم .
والله يا لطفي يا أخوي أنا عندي قصة كان حكيته ليك
ما تعرف تبكي ولا تضحك علي ناس مطار الخرطوم ديل. |
سلام يا سفيان
و رمضان كريم
وتسلم
احكي يا اخوي احكي اكان داير نضحك فالاسنان جاهزة و اكان داير نبكي نبكي فالدموع جاهزة
لك التقدير
لطفي
|
Post: #16
Title: Re: مثل هذا لايحصل الا في مطار الخرطوم!!! فقارن
Author: محمد البشرى الخضر
Date: 08-14-2011, 11:35 PM
Parent: #15
الله اكرم يا لطفي معليش مع الخلعة ما سلمت ولا باركت الشهر
بصراحة دي حكاية غريبة و محيرة جدا
الزول دا غالبا يكون جابوه الجوازات منتدب من السجون وما فهموه الفرق
|
Post: #17
Title: Re: مثل هذا لايحصل الا في مطار الخرطوم!!! فقارن
Author: سفيان بشير نابرى
Date: 08-14-2011, 11:59 PM
Parent: #16
Quote:
احكي يا اخوي احكي اكان داير نضحك فالاسنان جاهزة و اكان داير نبكي نبكي فالدموع جاهزة
|
طيب اسمع :-
قبل زمن جاي من القاهرة وفي يدي فقط شنطة غيار لا غير نزلته من الطيارة في ارض مطار الخرطوم
وبسرعة جداً ركبته البص من الطيارة للصالة عشان اخلص الأجراءات وادخل البلد قدام باب الصالة
نزلته او مخلوق من البص وجري طوالي علي شباك تخليص الأجراءات و بالفعل كنت اول واحد من ناس
الطيارة واقف في الصف وكل الناس وراي مديت جوازي للعسكري وكان عسكري شاب بس عندو تلاته شرائط
و وقفت منتظر و العسكري يقلب في الجواز جاي وجاي وبعد مسافة قال لي:- جوازك دا مزور (الجواز
كان قديم وشكلو تعبان) ... لم ارد عليه ولم انظر له حتى .
قال بعنف :- يازول انا مش بتكلم معاك!!!؟
قلت :- نعم في شنو ؟
قال:- بقول ليك جوازك دا مزور
قلت ببرود:- طيب كويس
قال و هو محموق:- تقول لي انا طيب وكويس !!! يازول هووووي
قلت :- يازول هووووي مزور مزور عايزني اعمل ليك شنو يعني!!؟
قال :- كيف كيف !!!؟
قلت :- يازول عايزني اقول ليك شغلك !!!؟ مش بتقول مزور انا مالي ومالك شوف الأجراءات
بتاعتك واعمله !!!
العسكري اندهش وقال :- خلاص خليك واقف هنااوعه تتحرك!!
ضحكت وانا اقول :- اتحرك بدون جواز امشي و ين ؟؟ قائلهم بيخلوني امرق!!!؟ امشي شوف شغلك
وتعال .
وانا بعاين للعسكري بقزاز غرفهم (مكاتبهم كلها قزاز و ممكن تشوف كل حاجة بداخلها) دخل العسكري
لمكتب به جهاز كشف علي الجواز وطلع دخل مكتب تاني كشف علي الجهاز بالمختصر كدا كشف علي الجواز في
تلاته مكاتب اخر الامر شفتو مشي لضابط عندو دبابير كدا واتكلم مع الضابط الضابط شال الجواز عااااين
فيهو ورجعو للعسكري واشر ليهو بيدو (رجعو لسيدو خلاص) العسكري جاء من هناك يضحك ضحكة انهزام وقال:-
تصدق طلع ما مزور !!!! هنا انا انفعلته ومديت يدي بفتحة النافذه اخدته الجواز من العسكري وختيتو
في المسطبة امام العسكري بسرعه وقلته ليهو :- عليك الله اختم الجواز دا خلينا نمشي ورانا اشغال !.
العسكري طوالي ختم الجواز ومداهو لي :- اتفضل حمدلله علي السلامة .
اخدت الجواز بسرعة وانا مغادر من امام العسكري العسكري قال لي :- طيب ياخ ما تقول زميل في الآمن
الخارجي !!!؟
هاهاهاهاهاهاهاهاهاهاها
اها رايك شنو بالله !!!؟
و الله هذا ما حصل.
|
Post: #19
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-15-2011, 00:19 AM
Parent: #17
Quote: طيب ياخ ما تقول زميل في الآمن
الخارجي !!!؟
هاهاهاهاهاهاهاهاهاهاها
اها رايك شنو بالله !!!؟
و الله هذا ما حصل. |
دي دايره من النوع ده
هاهاهاهاهاهاهاهاهاهاها
|
Post: #18
Title: Re: مثل هذا لايحصل الا في مطار الخرطوم!!! فقارن
Author: معاوية الأرباب
Date: 08-15-2011, 00:12 AM
Parent: #16
| Quote: رفض لها رجل الشرطة ان يعطيها حق الخروج معللا ذلك ان اقامتها لمدة 3 شهور و هذه ال 3 شهور تنتهي بتاريح 20 اغسطس و اليوم هو يوم 12 اغسطس, فقالت له زوجتي و ما المانع في ذلك, انني سوف اغادر قبل انتهاء مدة الاقامة, ولقد كان مصرا ذلك الفاقد التربوي بانه لا يحق لها المغادرة قبل ذلك التاريخ |
هذا الشرطي متسق تماما مع فهمه أن هذه الشهور الثلاثة انما هي عقوبة واجبة النفاذ كاملة لمن تسول له نفسه
التفكير في قضاء الاجازة بالسودان وربما تصاحبها أعمال شاقة تتمثل في ظعمطة جهاز المغتربين وشرطة المرور والجوازات .
|
Post: #20
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-15-2011, 00:25 AM
Parent: #18
Quote: هذا الشرطي متسق تماما مع فهمه أن هذه الشهور الثلاثة انما هي عقوبة واجبة النفاذ كاملة لمن تسول له نفسه
التفكير في قضاء الاجازة بالسودان وربما تصاحبها أعمال شاقة تتمثل في ظعمطة جهاز المغتربين وشرطة المرور والجوازات . |
رمضان كريم يا ودالارباب
و الله لو سمعت القصة من زوجتي تتمحن زي ما قال اخونا سفيان تضحك و لا تبكي, لكن الموقف موقف بكاء تماما و مغسة, هذا الفاقد التربوي, مصر اصرار لا يدخله الشك بانها لم تتم فترة اقامتها في السودان, لذلك ليس لها حق الخروج, محن زي ما بتقول حبوبتي بت رضينه الله يرحمها
المهم يا قول تبارك سوف نمر بهذه التجربة كل سنتين حسب الخطة لكن المرة الجايه سوف نطالب من ناس السفارة باننا سوف نغادر السودان بتاريخ معين لذلك يجب كتابة الاقامة بتاريخ المغادرة حتي لا يحرجون الفاقد التربوي
لك التقدير
لطفي
|
Post: #21
Title: Re: مثل هذا لايحصل الا في مطار الخرطوم!!! فقارن
Author: Hatim Elmaki
Date: 08-15-2011, 01:51 AM
Parent: #1
الاخ لطفي والاخوان جميعارمضان كريم
حكايتي مع موظفي مطار الخرطوم كثيرة واغربـ حكايه اتسرق جواز سفري الاروبي اثناء اجازتي ودخت مليون دوخه وعزاب من مركز شرطه الي جوازات ومباحث وشرطة اجانب والعجيب في الامر تمت سرقة جوازى السوداني والاروبي من سيارتي وهي واقفة في شارع عبيدختم امام مشتل به سبعه رجال شداد مددجين بسلاح وهم رجال المرور والغريب في الامر هل يمكن يكون هنالك حرامي يمتلك الشجاعه الكفية لسرقة سيارتي وهية وسط رجال المرور عجيبه يابلد ولا احد من رجال المرور شاهد الحرامي والله والله لم يسرق سيارتي الا واحد من رجال المرور انشاءالله قروشي وجوازاتي تدخل عليكم بالساحق والماحق يارجال المرور المهم في الامرحصلت علي وثيقة سفر موقته خاصه لمواطني الاتحاد الاوربي في المطار الورقه مافي واحد فهم الفيها لم سالني الشرطي جواز سفري قدمت ليه الورقة قال دي شنو قلت ليه دي جواز سفري قال لي انت بتستهبل قلت ليه اناصاحبك عشان استهبل عليك قام زعل زعل شديد وقال لي انا بوريك بعد شويه قام شال الورق من زميل الي زميل ومن مكتب الي مكتب بعدذلك حضر ومعاه واحد ملازم قال لي انت الورقه طلعتها من وين قل ليه من سوق سته في الحاج يوسف انت ياحضرة الملازم ماعرف الورقة تستخدم لشنو والله لو ماخفت الطائرة تفوني ومشاكلي تزيد كنت قلت ليه دى كرت صرف السكر وبعد نقاش حضر مقدم جنوبي طوالي عرف الوثيقة واخبر مساعدية اللوري بان الورقه تسخدم كاوثيقة سفر في الحالات المستعجله لمواطني الاتحاد الاوربي في حالة فقدان جواز السفر والله لو ما اخونا المقدم اخوك يكون حتي الان في مطار الخرطوم
والغريب الشرطي قال لي اختم ليك ختم الخروج وين قلت ليه في ????????????????
|
Post: #22
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-15-2011, 05:32 PM
Parent: #21
| Quote: وبعد نقاش حضر مقدم جنوبي طوالي عرف الوثيقة واخبر مساعدية اللوري بان الورقه تسخدم كاوثيقة سفر في الحالات المستعجله لمواطني الاتحاد الاوربي في حالة فقدان جواز السفر والله لو ما اخونا المقدم اخوك يكون حتي الان في مطار الخرطوم |
الاخ حاتم المكي
رمضان كريم
اها البركة في اخونا الجنوبي و لكن لقدام ح تعمل شنو بعد الانفصال البحل قضيتك شنو ابقي عشرة علي الجوازات حتي و لو في مكتب وزير الداخلية
|
Post: #23
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-15-2011, 05:46 PM
Parent: #22
| Quote: والعجيب في الامر تمت سرقة جوازى السوداني والاروبي من سيارتي وهي واقفة في شارع عبيدختم امام مشتل به سبعه رجال شداد مددجين بسلاح وهم رجال المرور |
حاميها حراميها
قالوا ناس الوطني عقدوا اجتماع عندما بدأ كل واحد يطمع في الاخر, فاتوا بفقه الضرورة, كل و لكن كل مما يليك و لا تمد يدك لما يلي اخوك في الاسلام, بعد انتهاء الاجتماع, خرجوا للصلاة احدهم بعد الصلاة لم يجد حذاءه فقال انه فقد حذاءه رد عليه اخر بانها تكون اتسرقت, قال ليهو ياخ ده دار الوطني قال ليهو هي دي ما محل السرقة ذاتا
لطفي
|
Post: #24
Title: Re: مثل هذا لايحصل الا في مطار الخرطوم!!! فقارن
Author: قلقو
Date: 08-15-2011, 08:59 PM
Parent: #23
Quote: والغريب الشرطي قال لي اختم ليك ختم الخروج وين قلت ليه في ????????????????[/QUOTE]
Good shot ياحاتم
وازيدك فى القصيد بيتا يالطفى :
ايه رأيك بقى انو صباح امس فوجئ المسافرون لخارج السودان بأن صالة المغادرة مغلقة....ولم يجد المسافرون من يوضح لهم الأمر او حتى يعتذر . وعاد المسافرين الى منازلهم وهم يضربون اخماس فى اسداس , واخيرا اتضح ان هناك اصلاحات تجرى فى صالة المغادرة ولم يتم اخطار المسافرين بالأمر......ارأيت كيف ( يحترم) المواطن فى بلادى ؟
|
Post: #25
Title: Re: مثل هذا لايحصل الا في مطار الخرطوم!!! فقارن
Author: احمد التجانى احمد
Date: 08-15-2011, 09:18 PM
Parent: #23
السلام عليكم ورمضان كريم للاخ لطفى والزملاء
وحمد لله بسلامة وصول الاسرة
لكن بتبالغ يا استاذ لطفى , من اين لهم ان ياتوا باصحاب الفهم والذوق والاخلاق
هذه المهن اصبح العائد منها شحيح لا يسد الرمق ويلجا اليها فقط الفاقد التربوى كما اسلفت
واصحاب الضمائر المخروبة وحتى المتعلمين منهم فان تعليمهم لا يسمن ولا يغنى من جوع فكرى
وحضارى بعد انهيار التعليم العام والعالى وسائر المؤسسات التدريبية والتاهيلية والجقيقة المؤلمة
التى يتجاوزها الكثيرون منكم ان كل الناس المتعلمين والمؤهلين الذين يمكنهم ان يحدثوا طفرة
فى واقع بىئة الخدمة العامة تركوا البلد وهاجروا وتجنسوا بجنسيات اخرى ويطلبون من البلد
الام ان يحاكى اوطانهم البديلة فى التطور والتقدم كانه التطور بيتنزل من السماء
تحياتى للجميع
|
Post: #26
Title: Re: مثل هذا لايحصل الا في مطار الخرطوم!!! فقارن
Author: أيمن دياب
Date: 08-15-2011, 09:53 PM
Parent: #25
موقف حصل لي في مطار الخرطوم
صباح يوم17 يونيو الماضي.. كنت عائداً إلى الرياض..
عند الوصول إلى ساحة صالة المغادرة الخارجية..
فوجئت بأن ركاب الطائرة السودانية إلى القاهرة والطائرة السعودية إلى الرياض
وطائرة فلاي دبي المتجهة إلى الامارات.. جميعهم يقفون في الساحة الخارجية تحت هجير الشمس..
وتعلل المسؤولون الواقفون في باب الصالة..
بأنه لن يتم فتح الباب إلا بعد (فتح الميزان) للرحلات الثلاث..
علماً بأن الرحلات الثلاث فيها أطفال وكبار في السن ولا توجد مقاعد أو حتى مظلات تقيهم من أشعة الشمس..
عموماً انتظرنا نحو الساعة أو يزيد، حتى بدء فتح الباب الخارجي للصالة ودخول المسافرين..
وأغرب ما في الأمر حينما توجهت إلى (كشك المرطبات) القابع خارج الصالة..
طلبت قارورة ماء.. فرفضوا (البيع) بحجة أنهم (الآن) في حالة (جرد)..
انتهت الوردية للبائعين وفي انتظار بدء الوردية الثانية.
وعليه (تم إيقاف البيع)..
ياجماعة الخير.. ادوني قارورة واحدة ودخلوها في ورديتكم البتحسبوا فيها دي.. أو أكتبوا في ورقة خارجية للوردية الثانية..
ماذا نطلق على هذه الحالة.. وعلى هذا الوضع..
لا أعتقد أن كلمة (تخلف) تكفي لوصف الحاصل بدقة..
والأغرب والأعجب عند الصالة النهائية.. بعد اكمال اجراءات المغادرة.. والاستعداد لركوب البص..
كان باب الصالة أيضاً مقفولاً..والمفتاح ما عارفنو عند منو..
وباقي على موعد الطائرة أقل من أربعين دقيقة..
البصات واقفة.. والركاب محبوسين.. وموظف الخطوط واقف قدام البص يستعجل الركاب..
أقسم بالله هذا ما حدث صباح الجمعة 17 يونيو الماضي.. الساعة العاشرة صباحاً..
|
Post: #27
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-15-2011, 09:54 PM
Parent: #25
Quote: وازيدك فى القصيد بيتا يالطفى :
ايه رأيك بقى انو صباح امس فوجئ المسافرون لخارج السودان بأن صالة المغادرة مغلقة....ولم يجد المسافرون من يوضح لهم الأمر او حتى يعتذر . وعاد المسافرين الى منازلهم وهم يضربون اخماس فى اسداس , واخيرا اتضح ان هناك اصلاحات تجرى فى صالة المغادرة ولم يتم اخطار المسافرين بالأمر......ارأيت كيف ( يحترم) المواطن فى بلادى ؟ |
سلام يا قلقو
ورمضان كريم
غايتو الناس ديل خلوا الشعب في حالة من قلق ما طبيعية
تعرف لم اكون داير احجز اون لاين بسألوا عن كل سبل الاتصال التلفون الثابت و المتحرك و الايميل و س م س اذا بغلة مرضت في العراق يكلموك بيها و بكل سبل المواصلات, من اعتذار و شكر حتي يخجلوك
تسلم علي المرور
لطفي
|
Post: #28
Title: Re: مثل هذا لايحصل الا في مطار الخرطوم!!! فقارن
Author: أيمن دياب
Date: 08-16-2011, 10:43 AM
Parent: #27
.
|
Post: #29
Title: Re: مثل هذا لايحصل الا في مطار الخرطوم!!! فقارن
Author: عثمان جلال الدين
Date: 08-16-2011, 07:48 PM
Parent: #28
رمضان كريم وكل عام وأنتم بخير
أكتر شئ غريب هو الاستمارة المطلوب ملئها عند المغادرة قبل ختم الجواز
وأكثر غرابة منه ما يعرف باستمارة وصول مواطن البوزعوها في الطيارة لتعبئتها .. هل هناك إجراء مشابه بدولة أخرى؟؟
كسرة: شئ غريب أخير ولي أخر وهو الزمن الكبير نسبياً الذي يستغرقه عسكري الجوازات لوضع ختم الوصول أو المغادرة..
احتراماتي
|
Post: #30
Title: Re: مثل هذا لايحصل الا في مطار الخرطوم!!! فقارن
Author: مامون أحمد إبراهيم
Date: 08-16-2011, 08:36 PM
Parent: #29
أبواللطف سلامات ، ورمضان كريم
وحمدلله على سلامة الأولاد .. ياخي
مشتاقين والله ..
يعني نشوف لينا سكة تانية غير المطار ده واللالا شنو ؟!!
|
Post: #31
Title: Re: مثل هذا لايحصل الا في مطار الخرطوم!!! فقارن
Author: سفيان بشير نابرى
Date: 08-16-2011, 09:22 PM
Parent: #30
Quote:
يعني نشوف لينا سكة تانية غير المطار ده واللالا شنو ؟!! |
يا مامون يا اخوي في حته اسمه جمارك سوبا اجارك الله
عفشك يتلف و يتكسر و احتمال يروح ذاتو !!!
|
Post: #32
Title: Re: مثل هذا لايحصل الا في مطار الخرطوم!!! فقارن
Author: Mohamed Foto7li
Date: 08-16-2011, 11:46 PM
Parent: #31
سلام
نديكم واحده سريعه
مره جيت داخل بي وثيقه سفر امريكيه قام الصول قال لي دا الماني
?????
اها يقولو ليهو شنو في الحاله دي ....
|
Post: #33
Title: Re: مثل هذا لايحصل الا في مطار الخرطوم!!! فقارن
Author: مدثر صديق
Date: 08-17-2011, 08:11 AM
Parent: #32
الاخ لطفي حمد لله على سلامة الاسرة
| Quote: طبعا لايوجد اماكن كافية لوقوف السيارات بعد جولة قاربت النصف ساعة وجد مكانا لبركنة العربية |
بالعكس انا شائف انو مواقف السيارات اتوسعت شديد في المطار بصورة جد كبيرة.....
و اتفق معاك في
في بقية المعاملات ....
|
Post: #34
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-17-2011, 07:58 PM
Parent: #33
معذرة للذين لم ارد عليهم بعد و لكن سوف اجيكم صادي ان شاءالله
و سوف اقفز للاخ مدثر صديق لتصحيح معلومة
| Quote: بالعكس انا شائف انو مواقف السيارات اتوسعت شديد في المطار بصورة جد كبيرة..... |
رمضان كريم و قصدي هو ليس موقف مطار الخرطوم انما مكاتب ال K L M وسط الخرطوم و اظنها تقع بين شارع الجامعة او قل البرلمان و شارع الجمهورية علي شارع الطيار مراد
ولك مني فائق الشكر
لطفي
|
Post: #35
Title: Re: مثل هذا لايحصل الا في مطار الخرطوم!!! فقارن
Author: Abureesh
Date: 08-17-2011, 09:12 PM
Parent: #34
لطفى سلامات، والحمد لله على السلامـة وعلى هـذا الظهـور لأهل الوفاء..
تحياتى للجميع.ز
أعتقد الخطأ الأساسى الذى ترتبت عليه هـذه السلسلـة هو قيام أم الطيب بعمل لم تكن مقتنعـة به، وهو
ملئ اورنيك سـودانى بواسطـة شخص يحمل جوازا أجنبيا.. كان المفروض تحتج وتطالب بلقاء مدير المطار
أو مسؤول جوازات المطار.. والرهيفـة التتقـد.. صدقنى كان العسكرى داك إتراجع من المسخرة العملها.
اللوم مقسـم على الجانبين.
.
|
Post: #36
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-18-2011, 08:24 PM
Parent: #35
Quote: ياجماعة الخير.. ادوني قارورة واحدة ودخلوها في ورديتكم البتحسبوا فيها دي.. أو أكتبوا في ورقة خارجية للوردية الثانية..
ماذا نطلق على هذه الحالة.. وعلى هذا الوضع.. |
سلام يا ايمن
رمضان كريم لكن الناس دخلوا فيك جنس عطشة اظنها بكرت برمضان غايتو الله يكون في عونك
| Quote: لا أعتقد أن كلمة (تخلف) تكفي لوصف الحاصل بدقة.. |
كلامك صاح
| Quote: أقسم بالله هذا ما حدث صباح الجمعة 17 يونيو الماضي.. الساعة العاشرة صباحاً.. |
ياخونا الشغلانه ما بحتاج لحليفة لانو لو حلفت ما حنصدقك
في الختام لك من الود وان شاءالله العطشة راحت
لطفي
|
Post: #37
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-18-2011, 08:29 PM
Parent: #36
Quote: السلام عليكم ورمضان كريم للاخ لطفى والزملاء
وحمد لله بسلامة وصول الاسرة
لكن بتبالغ يا استاذ لطفى , من اين لهم ان ياتوا باصحاب الفهم والذوق والاخلاق
هذه المهن اصبح العائد منها شحيح لا يسد الرمق ويلجا اليها فقط الفاقد التربوى كما اسلفت
واصحاب الضمائر المخروبة وحتى المتعلمين منهم فان تعليمهم لا يسمن ولا يغنى من جوع فكرى
وحضارى بعد انهيار التعليم العام والعالى وسائر المؤسسات التدريبية والتاهيلية والجقيقة المؤلمة
التى يتجاوزها الكثيرون منكم ان كل الناس المتعلمين والمؤهلين الذين يمكنهم ان يحدثوا طفرة
فى واقع بىئة الخدمة العامة تركوا البلد وهاجروا وتجنسوا بجنسيات اخرى ويطلبون من البلد
الام ان يحاكى اوطانهم البديلة فى التطور والتقدم كانه التطور بيتنزل من السماء
تحياتى للجميع |
الاخ احمد التيجاني
رمضان كريم
و الله الناس اجبرت علي الهجرة اجبارا و ما باليد حيلة.
زمان كان في حصه اسمها حصة التربية الوطنية و اخري اسمها المدونة الطبيعية, فكل هذا صار شمار في مرقة
تسلم علي المرور
لطفي
|
Post: #38
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-18-2011, 08:38 PM
Parent: #37
Quote: رمضان كريم وكل عام وأنتم بخير
أكتر شئ غريب هو الاستمارة المطلوب ملئها عند المغادرة قبل ختم الجواز
وأكثر غرابة منه ما يعرف باستمارة وصول مواطن البوزعوها في الطيارة لتعبئتها .. هل هناك إجراء مشابه بدولة أخرى؟؟
كسرة: شئ غريب أخير ولي أخر وهو الزمن الكبير نسبياً الذي يستغرقه عسكري الجوازات لوضع ختم الوصول أو المغادرة..
احتراماتي |
سلام يا عثمان يا جلال الدين
رمضان كريم
القادمين لامريكا من غير حاملي الجنسية او الاقامة و في الطائرة يستلمون اورنيك I-9 و تعبئته لا تحتاج لاكثر من دقيقتين (فيري سمبل) وذلك لمتابعة الداخلين و الخارجين ومدة الاقامة التي تمنح للقادمين, الشئ الغريب في الامر زوجتي قالت لي الارنيك زاتو ما بتعرف الورقة الاصلية من الورقة الكاربونية, فالمسألة جايطة من فوق, فلم اجد براحا غير ان اقول عجبي و في مؤخرتها مليون علامة استفهام!!!!!!!!!!!!!!!!!
تسلم مرورا كريما
لطفي
|
Post: #39
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-18-2011, 08:50 PM
Quote: أبواللطف سلامات ، ورمضان كريم
وحمدلله على سلامة الأولاد .. ياخي
مشتاقين والله ..
يعني نشوف لينا سكة تانية غير المطار ده واللالا شنو ؟!! |
سلام يا مامون يا حبيب
و الله احسن تحجز باسمرا مرورا بكسلا و فيها تزور السيد الحسن و القضار اسرة زوجتي وفاء همت, والقبة الصادقاب محييا جدنا ودعبدالصادق اداب الفيلة, ناس الانقاذ ديل دايرين ليهم زول زي اداب الفيلة, و منها ابوحراز لمشايخة العركيين (ابوشرا) ومنها الي مدني للقمرين النيرين سعيد شايب و جلال وودمدني السني ومنها الي رفاعة لزيارة شيخ لطفي و الشيخ طه و منها عن طريق الشرق لزريارة الشيخ ادريس ودالارباب المحسي الماكضاب, ويوم السبت من كل اول شهر تمشي لزيارة سيدي علي
بي كده تكون قضيت ليك اجازة كاربه دنيا ودين.
تخريمة طبعا بعدما "واطاتك اصبحت" و الله ما بستغرب اي عمل شين في السودان ان شاءالله موضوع رسالتك الي الله شاكي فيها وزير العدل تحققت ورد اليك دارك
ودمت
لطفي
|
Post: #40
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-18-2011, 09:01 PM
Parent: #39
Quote: سلام
نديكم واحده سريعه
مره جيت داخل بي وثيقه سفر امريكيه قام الصول قال لي دا الماني
?????
اها يقولو ليهو شنو في الحاله دي .... |
سلام يا
Mohamed Foto7li
و رمضان كريم
تقول ليهو لا ده لاوندي و ناس الجمارك من رئيسهم سابقا بتكلموا لاوندي
لكن اظن انت اسمك زاتو كاتبو بالالماني و الله اسمك التاني انا ماقدر اقراه يا محمد فوتو....(فوتحلي) تم الباقي و بالعربي لانو جنس الاصطلاحات دي بضهبني
تسلم يا كريم
لطفي
|
Post: #41
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-18-2011, 09:07 PM
Parent: #40
Quote: لطفى سلامات، والحمد لله على السلامـة وعلى هـذا الظهـور لأهل الوفاء..
تحياتى للجميع.ز
أعتقد الخطأ الأساسى الذى ترتبت عليه هـذه السلسلـة هو قيام أم الطيب بعمل لم تكن مقتنعـة به، وهو
ملئ اورنيك سـودانى بواسطـة شخص يحمل جوازا أجنبيا.. كان المفروض تحتج وتطالب بلقاء مدير المطار
أو مسؤول جوازات المطار.. والرهيفـة التتقـد.. صدقنى كان العسكرى داك إتراجع من المسخرة العملها.
اللوم مقسـم على الجانبين. |
سلام يا محمد عثمان
رمضان كريم اين اراضيك الصين ام قطر, و الله يا محمد تمشي السودان يحصل ليك (هارد اتاك) يا خوي انت طولت شدييييييييييييييد هو مدير المطار و لا مدير الوردية بكونوا في؟؟؟ و الدنيا كمان رمضان ياخوي الله يكون في العون لهذا الشعب الطيب العملاق مع اقزامه الذين يتقدمونه
لطفي
|
Post: #42
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-19-2011, 09:35 PM
Parent: #41
زمااااااااااااااااااان ونحن صغار كان في منلوج
باريس اقرب من شندي لندن جنب الخرطوم
هذا للمقارنة و استراق السمع
لطفي
|
Post: #43
Title: Re: مثل هذا لايحصل الا في مطار الخرطوم!!! فقارن
Author: منتصرمحمد زكى
Date: 08-19-2011, 10:11 PM
Parent: #42
سلامات لطفي والضيوف
مؤسف أن يظل حال المطار كما هو
وبنفس الأشخاص الغير مريحين ...
قبل سنوات وذات سفرة تم تعطيلي قرابة
الساعة بعد إكمال كافة إجراءات المغادرة
ودار الحوار التالي بيني وإثنين من رجالات
المطار لا أدري وظيفتهما على وجه الدقة...
بعد تمعنه في الجواز
الأول: ماشي تسوي شنو؟
أنا : زيارة .
الأول : القروش دي ما بتكفيك .
أنا : حا أنزل مع أخوي .
الأول : أخوك شغال شنو ؟
أنا : موظف.
الأول : ما ينفع ؟
أنا : كيف يعني !
الأول : ترجع بس
أنا : أرجع كيف يا زول إنت جادي ؟
الثاني : عاين شعرو عامل كيف ( كان شعري كثيف وقتها) .
حاولت خطف الجواز من يده عندها إحتد النقاش بيننا
وتم أخذي إلى مكتب جانبي
وبعد س وج قال لي الموجود بالمكتب : أقعد هنا
بعد قرابة الساعة حضر الشخص الكريه الأول وسأل الثاني : أها الزول ده نعمل ليهو شنو ؟
الثاني : خليهو يمشي .. عاين لا بس كيف .
وكنت آخر راكب يلحق بالطائرة ....
|
Post: #44
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-19-2011, 10:32 PM
Parent: #43
سلام يا معتصم
و الله محن زي ما بتقول حبوبتي الله يرحمها
لطفي
|
Post: #45
Title: Re: مثل هذا لايحصل الا في مطار الخرطوم!!! فقارن
Author: لطفي علي لطفي
Date: 08-20-2011, 07:05 PM
Parent: #44
| Quote: الثاني : عاين شعرو عامل كيف ( كان شعري كثيف وقتها) . |
سلام يا منتصر
الجماعة ديل ظاهر عليهم مصلعين زي كده
تسلم علي المرور و ربنا يخرج السودان من هذه الورطة
لطفي
|
|
|