وجبات سودانية عادت الى الطاولة الرمضانية بسبب الغلاء

حتى امس ا بالليل فى اغلبية الاسواق كيلو الضأن ب 30 جنيه للناس القيافه حيث اللحمة مدسوسة داخل الياف زجاجية ترقبها بعض الحشرات الطائرة على استحياء لعدم وجود امل فى الدخول للزجاج وبمبان الجزار المشتق من بخار التيمان بينما يصل سعر كيلو الضان على مستوى اسواق صابرين والشعبى وليبيا وسوق الرحمه وسوق استغفر الله الدنيا رمضان الى 25 جنيها مع مراعاة عدم دخول سكين الجزار تحت التربيزة وفى نفس الحظة احمى عينيك من الحوليك برا وجوا واللبيب بالاشارة يفهم وندخل الى موضوع البوست
فطور رمضان فى السودان اشنهر باللقمة او العصيده وملاح الشرموط و النعيمية فى كل مائدة سودانية بجانب الطيبات الاخرى من كبده وكلاوى وشوربة , هذا العام ارتفعت اسعار اللحوم والمواد التمونية دون ان تصل الى سقف الى درجة وصول سعر كيلو لحمة الفرم الى 25 جنيه على سمتوى سوق صابرين والاسواق الشعبية الاخرى بينما وصل سعر الكيلو الى 30 جنيها فى جزارات القزاز المنتشرة فى احياء الخرطوم .
هذا الارتفاع جعل العديد من الاسر السودانية تبحث عن بدائل وعملت بالمثل الذى يقول
الماعندو قديم ما عنده جديد
العصيدة احتفظت بوضعها الطبيعى ولكن تغير الملاح وظهرت ملاحات تانية وهى
ام شعيفه (موية وبصل وزيت وبامية منشفة ومرقة ماجى ) يتم تناولها عن طريق الايادى مستحيل غزوها بالمعالق الحديدية لزوجتها وخيوطها المنتاثرة
ام تكشوا (و موية وبصل وزيت خضرة منشفة ومرقة ماجى ) تاكل ايضا بالايادى ومتى تعدت عليها معلقة تحولت الى برك من المياه الخضراء والبركة فى الاصابع التى تجملها
السخينة ( موية وبصل وزيت وفول مدمس ) تؤكل بالاعتماد على خج المرقة قبل الدفق فى اللقمة حتى لا تركن شرائح البصل فى اخر الحلة
ام جداد (موية وبصل وزيت ودبل مرقة جداد) بديل للشوربة تؤكل مع العصيدة وايضا يمكن جقمها وهى ساخنة
ولا ننسى دور البقوليات فى تعويض الفاقد من اللحوم حيث اصبح الفول والكبكبى سيدا الموقف فى الصنية الرمضانية ونسبة لارتفاع الاسعار تفننت ربات البيوت فى تقسيم الفول الى عدة اطوار بس اجمل مافيها كل طور يعتبر جاهزا للهبر
فول مطبوخ( يحمر البصل على الزيت ويضاف اليه حبة ملعقة صلصة وبعدها يضاف الفول الجابينه من قدرة الدكان ونعطى للمفراكة وقتا كافيا للقضاء على حبات الفول المسترجلة وبذلك يكون جاهزا للبلع
فول ساده (من قدرة الدكان وعليه ملح وشمار وزيت وهو مريح للبطن لا يحتوى على الكرستول
فول البيت ( وهو معروف للجميع بحباته الغليظة ومويته الحمراء واذا لم يشاهد كذلك اكيد ما دخلته اديد راجل وخاصة العذابة
شوربة العدس بديل مضمون اكثر من شوربة الضأن نسبة لاختلاطه بلحوم التيوس فى بعض الاحيان والدليل كم جزارة فى امدرمان
نواصل

بلدي رمضان كريم
يا أخي انت ما سمعت بي الشعار(نأكل مما نزرع) !!

الله يستر بعد شوية ما نحفر بيت النمل بحثا عن الطعام ..

الاخ/ BAKTASH

Quote: الله يستر بعد شوية ما نحفر بيت النمل بحثا عن الطعام ..

الظاهر نحن يا دووب فى اول السكة ولسه ما دخلنا لى بيت الكلاوى
رمضان كريم

نرجع شوية الى مائدة رمضان للمشروبات والجميع يعرفها بوجود جك الحلومر الاحمر الوهاج والحلومر الاسود الفواح ولو زول سأل الفرق شنو بقول ليه الحلو مر الاحمر يكون شحيح التوابل اما الاسود فحلة كوراع عديل من كثرة التوابل اثناء عمله و وعن الفائدة اكيد فى بورداب بفهموها كويس خاصة اصحاب المصران .
فرمضان هذا العام اختفى الحلومر من الموائد كاختفاء الحلو فى جبال جنوب كردفان بسبب الغلاء لمكوناته وحتى ان وجد ينتفى فيه ما يعرف بالبوار الكان زمان ياذن الاذن وهاك يا شراب بس اليومين ده حقك كباية ولو داير تتدبل تمشى سريع تلحق جردل بل الحلومر وتحول المطبخ الى غرفة تقطير فحينها تكون قد خرجت بكباية حلومر اضافية وظهور الحلومر يعنى رفاهية واختفائة يعد الغالب الاعظم بس الحمد الله ربنا كتر لينا الليمون وهو الجك الثانى ولا يظهر جك البرتقان الا فى حالة غياب الليمون او ظهور جك المنقة وطبعا الدستة ب 36 جنيه اقدر اقول لمن تلقاها فى صينية رمضان تحلف تقول غباشة من كترة الموية وقلة المنقة المخلوطة مع ملاحظة اختفاء مهاجم خطير فى ميدان رمضان (النشا) وللحناكيش هى عبارة عن دقيق ذرة يبل مع الماء ويسخن حتى يبدأ فى التماسك وان غفلت ست البيت عليها فى هذه الحالة تحويلها جنينا الى حلة لقمة . طبعا زمان يمكن الاستغاء عنها فالسوق غول فاحمى نفسك من البلع .
اقدر اقول مائدة رمضان للعصائر الله يساعد ناس البرير فى مشروباتهم الكيمائية التى اصبحت تحل مشكلة متى حضر الضيوف فالكرستال منقذ ساعة الذروة كما انه خفيف على الجيوب . بالنسبة للمشروبات السودانية فاختفى القنقليس (التبلدى ولو سألت زول بيقول ليك انت يا زول ما سمعته بالحرب فى جنوب كردفان محل القنقليس وحينها تأكد انه من اهل الانقاذ وكذلك الكركدى طبعا لدارفور القح المعلى فى زراعته واكيد جماعة الانقاذ برضو بقولى انتو كمان دايرين نبيع ليكم رطل الكركدى ب جنيه والله شنو ماكفاية نحن بنقلعه ليكم من الحركات الدارفورية
نواصل

Quote: و موية وبصل وزيت خضرة منشفة ومرقة ماجى

سلامات عوافي
بلدي يا حبوب ..

شوال البصل بي 95 جنية ..

والزيت رطلو بي 5 جنية ..

وربطة الخضره انت قايلها هينة حرم 3 ربط حتي تعمل ليك ملاح ودا مقاس الجزيرة ما البقعة .

اما المرقة دي لمن استطاع اليها سبيلاً ..



وربنا يستر من الجاي ..



مع ودي
واحترامي

الزميل / محمد عوض

Quote: وربنا يستر من الجاي ..

والله بعد كده مطلوب من الشعب الخروج رافعا شعار اغنية الفنان الكبير محمد ميرغنى البقول....
الجانى منك من تباريح الهوى
اصلو بصعب يا جميل
ورمضان كريم
تحياتى

Quote: ام جداد (موية وبصل وزيت ودبل مرقة جداد)

دي اوعى تكتر منها بعدين يقوم ليك ريش لووووول

اللهم فرج عن اهل بلادنا وابدلهم بدل العسر يسرا
وبدل الماجي دجاجا يلقط الحبا

الاخ/ محمد ابراهيم

Quote: دي اوعى تكتر منها بعدين يقوم ليك ريش لووووول

والله ضحكتنى الله يديك العافيه
وجدادى يلقط الحبا ويجرى وهو فرحان يازول ده زمن تانى مابجى لو جى الا فى حالة ذهاب حكومة الكيزان
تصوم وتفطر على خير
تحياتى

يا حليل ايام المكسرات الرمضانية لا تخلو صينية من احدى الاصناف وهى المشمش والخوخ والقمردين والزبيب والتين وعين الجمل تصورا الحاجات ده كانت معروضة فى بقالات الاسواق والناس يتمشى مخصوص لسوق امدرمان بتشتريها من شركة اللحوم الافريقية وناس امدرمان بذكروها كويس لكن تعال شوف سخرية الزمن الشركة تحولت من المأكولات الى المشمعات الارضية والفلكونت بعد ان كان كل شىء يباع بقرش واليومن ده المكسرات بقت البركاوى والقندولة والزبيب والتين للناس الفوق اما عامة الشعب السودانى فمكسراته البليلة والجاوه وللدور الذى تعلبه البليلة فى حياة الناس الزول الدخل الانقاذ وزير وحسه وزير وقالوا اتحادى شالوه ناس حزبه وبصراحة حتى الان لا يوجد سبب مقبول ولكن انا اقترح على مكتب حزبه يطلع بيان حول شيلته لانه بقى انقاذى طبعا يمتلك محلات بليلة هاوس وكمان نلس البترول تكريما للبليلة علقوا يافطة فى مصفاة للبترول بجنوب كردفان سموها بليلة وبينى وبينكم تستاهل البليلة وللعلم تحتوى البليلة على نسبة عالية من الفايتمينات وشوف عينى عندنا زول دمه وصل 30 وشرب موية البليلة ولهطها دمه رجع ذى الاول . عليه اوصى نفسى واوصيكم بتوفير البليلة واخص العدسية وانتو عارفين لحم ب 30 جنيه كمونية ب30 جنيه جدادا ب 15 جنيه الكيلو سجك لولى ب28 جنيه الكيلو بس المحيرنى فى سوق صايرين كيلو الجداد ب 7 جنيه والناس لامه وعمك يقطع فى الجداده التقول محكوم عليها خلف خلاف جداد صابرين متكامل فيه المصرايين والكوارع وحبه ريش لزوم تهب بيه الضبان وانت واقف وكلما اشتريت كمية اكبر منه تجدد العديد من القوانص وكمان تجيان ديكة ومنقارات لزوم تحلية الشروبة بصراحة ماهو جداد كامل الدسم لا غبار عليه من البيات خارج التلاجات اصلو مصصم على تقبل اعلى درجات الحرارة وطبعا ده للعوام اما الناس القيافة فيمكنهم شراء المطايب من الجداد (كرعين خلفية - كرعين امامية -صدور -) جداد صابرين ما معروف مزبوح وين ولا يتعامل مع اكياس النايلو البيضاء ويحب الخلود الى الراحة والظلام الدامس الذى توفره الاكياس السوداء .
مشينا بعيد عن موضوعنا عن المكسرات ونواصل بقية الكلام ما تنسو انا صايم بيكون فى حبة لخبطة والدخول الى بعض الامور .
نواصل
تحياتى

امبارح وعلى قناة الجزيرة الرياضية الناقلة لمبارة الهلال والقطن الكاميرونى تحدث الملق الرياضى اثناء سير المباراة عن اصالة وتواضع واحترام لاعبى المنتخب الكاميرونى للافطار رمضان فبعد انتهاء التمرين الختامى والبص السياحى ينتظر ركوب اهل القطن للحاق بالفندق وتناول الافطار الرمضانى للمسلمين منه رفض افراد البعثة الكمرونية لاعبين(8) وادريين التحرك ولبوا دعوة العاملين بالاستاد للفطرو الرمضانى على النجيل فى وجبة سودانية ضمت كل الوجبات السودانية التى عادت الى الطاولة الرمضانية نتيجة ارتفاع الاسعار ونالت رضاء بعثة فريق القطن
تحياتى

انا عارف اللخبطة فى البوست امكن تدخل فى مواضيع بعيده كل البعد ولكن عزرا ده فرصة الواحد يجعل البوست كوكتيل وعلى فكرة انتو زمان بنسمع ونشوف ونأكل الكوكتيل فى المناسبات وخاصة الافراح وللمسطحين الكوكتيل كان مدخل لاكتشاف البوفيه المجننه بيه الخواجات ولكم فى اهل الشتات خير من يفصل الموضوع.
قبال العشرة سنوات العجاف فى الاعراس خيمة الجمعية للناس القدام وخيم كزام للسكن جديد فى الحى هى ام المناسبات مش حسه العزومة مراكبية لا مواصلات ولا رممة بعد الحفلات الان ولا عزاء لمن فاتهم العشاء فيمكنهم بعد الساعة الحادية عشرة تكملة عشاهم فى بيتوهم حليل العز الكان .
الكوكتيل عبارة عن صحن صينى مليان لحمه بارده وفطيرة وسلطة اسود وسلطة طحينة وشبش وقطعة محشى يا اسود او فلفلية وباسطة تكون مزنوقه بين السلطات وفى بعض الاحيان لزوم الفنجرة قطعة جداد متل اللصقة البعملوها الاولاد لاخفاء حب الشباب اما عن المشروبات كانت قزارة حرية ويا حليل زمن الحرية او بزجانوس الحسه دلعوها وبقت بزيانوس اما موية الشراب الترامس للنسوان والجرادل للرجال السودان ياهو ده السودان الكان . وكفاية كده على الاقل اوجزنا عن مائدة الاعراس السودانية ايام زمان وكله داخل تحت عنوان البوست فى العضه
نواصل