Post: #1
Title: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-08-2011, 09:48 AM
وهذه هي المرة الأولي في حياتي التى أدخل فيها محكمة..
لدرجة أنني تهت في الطريق اليها ثلاث أو أربع مرات حتى وصلت أخيرا وقد بلغ
مني التعب والعطش مبلغا لا يطاق خاصة وأن الشمس اللاهبة حد الفوران تكاد تنزل
لتجلس القرفصاء على النوافيخ .
يتبع .......
|
Post: #2
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-08-2011, 09:52 AM
Parent: #1
وعفوا أن وصفت مجرد زمالة أسافير وكيبورد بالصفة أعلاه ..
يتبع .....
|
Post: #3
Title: Re: الصداقة في ذمة الله .. ود البشرى يجرجرني إلى المحاكم ..
Author: haroon diyab
Date: 08-08-2011, 10:04 AM
Parent: #2
اها....
وجابك شاهد في شنو.....؟
اقساط عربية ولا تسجيلات موسمية....؟
سلام ياحبيب
|
Post: #13
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-08-2011, 12:07 PM
Parent: #3
الحبيب هارون
كل سنة واتا طيب واهلك أجمعين
شهدت ان لا اله الا الله يا حبيب
غايتو جنس تلتلة لا يعلم بيها الا الله
ومجاني ساي وحة الخوة .
|
Post: #4
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-08-2011, 10:07 AM
Parent: #2
كان ذلك صباح اليوم
وكنت قد بدأت اغرق في النوم لأني عادتي في رمضان هي النوم بعد صلاة الصبح
وفجأة رن التلفون الذي ولسوء حظي نسيت أن أضعه في الوضع الصامت ..
ولثوان وأنا بين اليقظة والاحلام خيل لي أن صوت التلفون عند الجيران، ثم
ما لبث أن تصاعدت حدة الرنين حتى أقتلعتني مع صداع نصفي حاد يكاد يقلم
الجزء الشمالي من رأسي ..
وجاءني صوت :
منتظرك في مجمع المحاكم ..
هكذا بدون أية مقدمات أو بهارات ..
يتبع ..
|
Post: #5
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-08-2011, 10:21 AM
Parent: #4
كان صوتا أجشا خيل لى أن نبراته تحمل شماتة وتشفي الدنيا كلها ..
ولأنه لم يسبق لى أن ذهبت جهة المحاكم والنيابات والذي منو فقد بهت ..
وتحاملت على نفسي واستعنت بصديق لمساعدتي في وصف الطريق إلى هذه المحاكم
وجاءني صوته ناقما ناهرا مفعما بالسخط والغيظ فعرفت أنني أقتلعته من النوم
كما أقتلعوني ، وحسدته على وضوحه ومباشرته في التعبير عن سخطه في هكذا مواقف
بيد أنني أكلتها في حناني وعملت فيها معن بن زايد في الحلم عندما أزعجوني
وقلقوني ..
وتحملت من الزجر والسب مالا يحتمل قبل أن أحظي من الصديق بوصف مقتضب لطريق
المحاكم وتكككككككككك (تقرأ طرررررررراخ) في حالة التلفون الأرضي ما يدل على
أن الطرف الآخر أغلق التلفون في أم أبو وشك ذاتو وإحتمال كبير يكون لعن خاش
أبو خاشك وسنسفيل أم أبو أهل أية حاجة (ماذا تعني كلمة سنسفيل ؟) ..
يتبع .....
|
Post: #6
Title: Re: الصداقة في ذمة الله .. ود البشرى يجرجرني إلى المحاكم ..
Author: abas
Date: 08-08-2011, 10:22 AM
Parent: #4
لا حولا
انت بتباري الزول ده لسه
خلاص المره الجايه ما تقولو لي تعال لينا في الحته دي يسوقك المحكمه
سجمك
وسجمك
وسجمك
|
Post: #7
Title: Re: الصداقة في ذمة الله .. ود البشرى يجرجرني إلى المحاكم ..
Author: فدياس نجم الدين
Date: 08-08-2011, 10:39 AM
Parent: #6
طلحه
رمضان كريم
بره البوست
صاحبك محمد عمر جبريل وين
شايفه ظختفى الايام دي
له التحيه
|
Post: #8
Title: Re: الصداقة في ذمة الله .. ود البشرى يجرجرني إلى المحاكم ..
Author: فايزودالقاضي
Date: 08-08-2011, 10:41 AM
Parent: #6
Quote: صداع نصفي حاد يكاد يقلم
الجزء الشمالي من رأسي .. |
ياها العرضة شمال ..
داير شاهد زور انا جاهز ..
|
Post: #9
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-08-2011, 11:08 AM
Parent: #8
وقطعت مسافة خمس دقائق في ساعة أو أقل قليلا بعد ان أستوقفت خمس أو ستة نفرات
مستفسرا ومتسائلا ومتحملا نظراتهم المغتاظة ( كضاب البقول ممكن يصبر حتى
على سلام الله والرسول في نهار رمضان دا ) ..
ووصلت أخيرا وواجهتني مشكلة إيجاد موطأ لستك لسيارتي فلفيت ودورت برضو قرابة
ربع ساعة والتلفون يجن من الرنين وهو يهز ويرز ويكاد يقفز من مكانه على المقعد
وأنا مصهين لأني مركز في إيجاد باركن فاضي .. حتى تكللت مغامرتي بالنجاح فأوقفت
العربية والتى سمع أضاني دي قالت (احححححححح) .
وهناك قابلته الذي لا يغباني وشه ال ..... واقف ككارثة لها يدين ورجلين بذات ضحكته
الغياظة ونظارته أبو خمس دراهم وموبايله الصيني ..
لا وعلى العليهو كمان وبدون ما يسلم داخل توووووووشك تعليقات وتظارف وخفة دم ..
قال دا قميص دا تلبسو في النهار ...
إتا مالك ومال قميصي يا وهم يا كرور ..
يتبع ......
|
Post: #10
Title: Re: الصداقة في ذمة الله .. ود البشرى يجرجرني إلى المحاكم ..
Author: abas
Date: 08-08-2011, 11:18 AM
Parent: #9
حقيقه قميصك كان مبالغه
لون حلاوي مولدي كده
يشيل في لسانك وخشمك وشلاليفك
|
Post: #11
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-08-2011, 11:24 AM
Parent: #9
- اختصر عايز شنو ؟
- عايزك تشهد لي عشان أجيب الوالد والوالدة
- طيب أشهد أنك عايز تجيب الوالد والوالدة يلا فكنا مع السلامة
- لا تشهد أنو أنا العائل الوحيد وإسمي كيت كيت كيت ..
- أنا ما بحلف قسم لكن ممكن أحلف ليك طلاق ينفع ..؟
وجاء عباس ومعه الأخ فداء والذي تشرفت بمعرفته وهي الفائدة الوحيدة التى خرجت بها
من قلقلة الزول الاسمو جرجير الملقب بمحمد البشرى ..الخ ..
وعرفت أن فداء ذاتو مقلقل أقصد مطلوب للشهادة ..
ووقفنا في الانتظار وجرجير يتظارف ويعمل فيها دمو خفيف ..
وجاء الدور وأدلينا أنا وفداء بدون حليفة بشهادتنا وهممت بالذهاب ففوجئت
بأنه مازالت هناك خطوة أخري في الشهادة علينا إكمالها وجرجير مازال يتظارف
ويخفف في دمو ويضحك بدون سبب التقول شياطينو قاعدين يكلكلوهو ..
وأنا أموت من الغيظ وعفاريتي تنطط وتقلب في الهوبة وتعمل أكروبات عجيبة ..
وعباس صاحب فداء الشاهد يعاين في الجائين والرائحين ولا هاميهو فهو مجرد
مرافق لا يهش ولا ينش ..
يتبع ...
|
Post: #12
Title: Re: الصداقة في ذمة الله .. ود البشرى يجرجرني إلى المحاكم ..
Author: وليد عكاشة
Date: 08-08-2011, 11:32 AM
Parent: #9
رشو يا طلحة رشاهو الجن ..
المدعو محمد البشرى الخضر دا دفعتى قرينا فى فصل واااااااحد فى الخرطوم القديمة .. راجل زلنطح زاتو شوية عليهو ..
رشو ..
|
Post: #14
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-08-2011, 12:14 PM
Parent: #6
Quote:
انت بتباري الزول ده لسه
|
هو المباريني يا عباس
أنا ما شغال بيهو الشغلة .
|
Post: #15
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-08-2011, 12:26 PM
Parent: #14
فدياس نجم الدين
مبارك عليك الشهر وعلى محمد عمر جبريل
تصوموا وتفطروا على خير
|
Post: #16
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-08-2011, 12:29 PM
Parent: #15
فايز ود القاضي
شايف مدني الحارث ماشي يزبط في الأمور شوية شوية ..
المهم السنة الجاية تتخلصوا من الفراعنة ديل ومعاهم وارغو ..
لا خير يرجى منهم صدقني .
|
Post: #17
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-08-2011, 12:40 PM
Parent: #16
وليد عكاشة سلامات ورمضان كريم
الجدير بالذكر أن المدعو جرجير الملقب بود البشرى الخدر لم ينقض
على وجوده في العين أكثر من الشهور الخمسة وطوالى جاري على التلتلة
والمقابضات ولا أعرف والله ماذا سيكون من امره لو طال به المقام ..
شخصيا شهادتي أنا في هذا الخصوص من الآن وصاعدا ستكون وفق التقديرات التالية:
أولا يجب ان تكون بدون قسم ولا بأس لو كانت الحليفة طلاق أو بواحد من الفقراء من
لدن الفقير أب فركة ومرورا بالفقير أب رأسين أكال الأضنين وهلمجرا..
اتقاضي على الشهادة أجرا حسب درجة القرابة..
والد ووالدة خمستلاف
اخ اخت من ستة لى سبعة الاف
خال عم من عشرة لى خمستاشر
صديق .. جار.. ود حلة وما يدخل في هذه القائمة من عشرين لى فوق
على ان يتم التنسيق معاي قبل الوقت المحدد للشهادة بى تلاتة أيام
شرط أن لا يكون الحضور للمحكمة قبل الساعة اتناشر ..
كفاية قلاقل مجانية ياخ .
|
Post: #18
Title: Re: الصداقة في ذمة الله .. ود البشرى يجرجرني إلى المحاكم ..
Author: عمر عبد الله فضل المولى
Date: 08-08-2011, 12:41 PM
Parent: #16
تمام
|
Post: #19
Title: Re: الصداقة في ذمة الله .. ود البشرى يجرجرني إلى المحاكم ..
Author: محمد البشرى الخضر
Date: 08-08-2011, 12:55 PM
Parent: #18
أيوااااا انت ما تقول زعلك تعليقي على القميص
هي نان لكن قميص زي دا يتلبس في ساعة زي دي في حر زي دا ودايرني ما اعلق عليه, ما بموت لكن
وليد عكاشة ...
اخوك ذاكرته خربة زي ذمة تنظير واسوأ و القديمة دي من تمانينات القرن الماضي فا شنو يا خوي تقوم تذكرني
لأنو انا متذكر وليد واحد في عبيدة ياكا انت ولا واحد تاني
كدي تعال في الفيس بووك facebook.com/mdbushra
دا شنو التعليق البائس دا 
|
Post: #20
Title: Re: الصداقة في ذمة الله .. ود البشرى يجرجرني إلى المحاكم ..
Author: محمد البشرى الخضر
Date: 08-08-2011, 01:13 PM
Parent: #19
| Quote: وعملت فيها معن بن زايد في الحلم |
بن زايد يا استاذ يا صحفي يا كبير !!!
اسمو بن زائدة يا تنظير الزائدة التقوم ليك (صم وير) كدا
|
Post: #21
Title: Re: الصداقة في ذمة الله .. ود البشرى يجرجرني إلى المحاكم ..
Author: MOHAMMED ELSHEIKH
Date: 08-08-2011, 01:14 PM
Parent: #19
هوووي يا طلحة
سكتنا ليك على المريخ عايز تضايقنا كمان في نسيبنا ود البشري
انت ما سمعت بي محمد المرتضى عملنا فيهو شنو لمان زازانا.
اسمع القميص كان تحرمني؟؟؟
|
Post: #22
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-08-2011, 01:25 PM
Parent: #21
يا محمد الشيخ
نسيبك دا قول ليهو بطل المقابضة والسغالة القاعد تعملا دي ..
القميص كان ومازال ما تحرمني
جرجير
أنا البعرفو إسمو معن بن زايد ودا ساكن جارنا وبرضو حليم .. أها شوف غير
دي يمكن تداري خجلتك .
|
Post: #23
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-08-2011, 01:27 PM
Parent: #22
يا أبو عمير تمم الله العافية .
|
Post: #24
Title: Re: الصداقة في ذمة الله .. ود البشرى يجرجرني إلى المحاكم ..
Author: محمد البشرى الخضر
Date: 08-08-2011, 01:34 PM
Parent: #22
يا ود الشيخ تحرمني شنو دا قميص فضيحة يمين تجيب اجدع مخبول في اجدعها صينية تحنسو وتديه قروش عشان يلبسو ما برضى
دا ذوق شنو دا يا تنظير المن سنة اسكت دا
ياخي المحكمة كلها تتفرج فينا بي سبب قميصك الفاقع لونه يغم الناظرين دا ياخ
جبت لينا الكلام
قلت لي معن بن زايد ههههههه
ياخ اخجل لك خجلة و امش شوف درب الويكبيديا وين بلا محرجنا كل مرة ومفشلنا قدام خلق الله
|
Post: #25
Title: Re: الصداقة في ذمة الله .. ود البشرى يجرجرني إلى المحاكم ..
Author: abas
Date: 08-08-2011, 02:25 PM
Parent: #21
اسمع القميص كان تحرمني؟؟؟
تحرمني شنو يا زول
ده اسمو حلاوي مولدي كده حمراء
النوع البتمسك ليك في حلقك ولسانك وشلوفتك
اتزكرتها يا محمد الشيخ اخوي رمضان كريم
|
Post: #26
Title: Re: الصداقة في ذمة الله .. ود البشرى يجرجرني إلى المحاكم ..
Author: عمر علي حسن
Date: 08-08-2011, 09:41 PM
Parent: #25
Quote: شخصيا شهادتي أنا في هذا الخصوص من الآن وصاعدا ستكون وفق التقديرات التالية:
أولا يجب ان تكون بدون قسم ولا بأس لو كانت الحليفة طلاق أو بواحد من الفقراء من
لدن الفقير أب فركة ومرورا بالفقير أب رأسين أكال الأضنين وهلمجرا..
اتقاضي على الشهادة أجرا حسب درجة القرابة..
والد ووالدة خمستلاف
اخ اخت من ستة لى سبعة الاف
خال عم من عشرة لى خمستاشر
صديق .. جار.. ود حلة وما يدخل في هذه القائمة من عشرين لى فوق
على ان يتم التنسيق معاي قبل الوقت المحدد للشهادة بى تلاتة أيام
شرط أن لا يكون الحضور للمحكمة قبل الساعة اتناشر .. |
أخي الكريم طلحة
بارك الله لك فيما قدمت لوالدي محمد البشري الخضر فالشهادة لله ان هذا العمل يحسب لراحتهما وراحة
قلبيهما برؤية ابن كتب عليهما فراقه دون ذنب او تقصير منهما ..
ثم انني اشكرك علي التسعيرة المجزية وأود ان تفكر معي في تاسيس شركة لانجاز معاملات الشهادة بكافة
انواعها .. واخوك جاهز بي مصحفه .. المهم يكون الدفع كاش ومقدما .. والترحيل علي الزبون اما بسيارة
وسواق او بقيمة نقدية تحدد وفق الاسعار السائدة
ومن دراسة جدوي (عابرة كده) الحكاية دي مطلوبة في السفارات والقنصليات والمحاكم ووزارة الخارجية
وجنس خم ما عادي الواحد يمكن يشغل اولاده وزوجته واصحابه ويمكن يغير مهنته في الجواز لي (شاهد)
وخلي ناس الضرائب والزكاه يتحيرو شوية
لك تحياتي وهنيئا لود البشري بمقدم والديه في هذ الشهر المبارك
عمر علي حسن
|
Post: #27
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-09-2011, 06:24 AM
Parent: #26
جرجير الكارثة
خلاص قضيت غرضك وبقيت تتفاصح ؟
في الأول ما كتا عامل فيها عمك جحا وأبو النكت الكرتونية ولو أدوك كف تقعد تضحك ؟؟
بجيء الخريف والمطر والضلام واللوري في الرملة الدقاقة أو كما قال الشاعر ..
وبعدين أعمل ليك شنو كان إتا زول سغيل في دمك وجلدك متلتل ليك زول نايم قبل تلات دقائق
لا بتحس ولا بتشعر وليس لك من الذوق التكتح .. طبيعي أقوم أندرع لي في أقرب حاجة قدامي
وأنا النعسان وطرفي ساهر وباقي عيوني مزغللة..
ثم ياخ أها يعني قول القميص ما عجبك وما عجب غيرك أقوم طوالي أمش أعلق رقبتي في مروحة
لافة واللا أعمل شنو يعني ؟؟؟
ع العموم كراع الفيل بتودي وتجيب أو كما قال حكيم .
|
Post: #28
Title: Re: الصداقة في ذمة الله .. ود البشرى يجرجرني إلى المحاكم ..
Author: دينا خالد
Date: 08-09-2011, 06:25 AM
Parent: #26
ود البشرى !!
وهل تقبل شهادة المريخابى فى المحاكم العربية ؟؟؟
غريبة !!!
هنا دى عادى اسمها شهادة مجروحة ..
ــــــــــــ
وكابة دم كمان احمااااااااااار !
|
Post: #29
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-09-2011, 07:08 AM
Parent: #28
الحبيب الريس عمر علي حسن
رمضان كريم وكل عام وانتم بخير
وإتا الصادق فما عملته كان لوجه الله تعال وليس فيه للمدعو جرجير الملقب بمحمد ..الخ
مثقال نية لأنو بيني وبينك عارفو شرارة في قنقراية (قندول ) والدليل راجع فصاحتو الفوق دي ..
من جهة أخري إتا جاد في موضوع الشركة بتاع الشهادة دي ؟
عشان بس الواحد بكرة يقدم استقالتو ويستف حاجاتو 
|
Post: #30
Title: Re: الصداقة في ذمة الله .. ود البشرى يجرجرني إلى المحاكم ..
Author: محمد عبدالرحمن
Date: 08-09-2011, 07:22 AM
Parent: #29
| Quote: مثقال نية لأنو بيني وبينك عارفو شرارة في قنقراية (قندول ) |
ساعدو بالشرح ياطلحه ..الود برضو ود امدرمان ..(شن عرفو) بزى امثلتك
دى ...(ترا) لاتنسى الفوارق الثقافية ..
**
بوست جميل ..رمضان كريم ياطلحه وودبشرى ...
|
Post: #31
Title: Re: الصداقة في ذمة الله .. ود البشرى يجرجرني إلى المحاكم ..
Author: محمد أبوالعزائم أبوالريش
Date: 08-09-2011, 07:47 AM
Parent: #30
Quote: على ان يتم التنسيق معاي قبل الوقت المحدد للشهادة بى تلاتة أيام
شرط أن لا يكون الحضور للمحكمة قبل الساعة اتناشر .. |
وفي رمضان كمان؟
بالغت يا ود البشرى.
|
Post: #32
Title: Re: الصداقة في ذمة الله .. ود البشرى يجرجرني إلى المحاكم ..
Author: MOHAMMED ELSHEIKH
Date: 08-09-2011, 08:04 AM
Parent: #31
| Quote: النوع البتمسك ليك في حلقك ولسانك وشلوفتك |
ايوااه
قميص بتاع صمغ مش كدي؟
يا ود البشرى ياخي في زول عزيز سأل منك
هل عمك عبد السلام الخضر؟
|
Post: #33
Title: Re: الصداقة في ذمة الله .. ود البشرى يجرجرني إلى المحاكم ..
Author: عبدالأله زمراوي
Date: 08-09-2011, 08:13 AM
Parent: #32
أ. طلحة رمضان كريم...
لك أسلوبٌ متفرد في الكتابة أقرب للسرد الروائي. كما أن لك مقدرة مهولة في الكتابة
السلسة الجميلة، وقد كونت رأيي المتواضع بعد قرأت لك الكثير من قبل. أتمنى أن نراك
قريبا وقد صرت روائيا قاصا بعد أن تطِّلق الرياضة طلاقا بائنا بينونة كبرى حتى لا تعود إليها مرة اخرى بحجج متفردة كتفرد كتابتك...
الشهادة لله من أجمل بوستات رمضان الكريم...
|
Post: #34
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-09-2011, 08:39 AM
Parent: #33
يا دينا
خليك عارفا أنو المريخ كوكب عصى تئن المركبات الفضائية والنجوم الأخري للحاق به
أو كما قال صناجته .
ثم ياخ رمضان كريم إتا مالك شريرة كدا ؟
|
Post: #35
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-09-2011, 08:45 AM
Parent: #34
يا محمد عبد الرحمن كل سنة وإتا والجميع بخير
ياخ إتا مغشوش ساي في جرجير دا ربما لأنو عامل ليك فيها ود ام درمان
وهو من نواحي أرياف البطانة حيث هز الروب وإستخلاص (الفرصة) وتنقية السمن..
وبعدين ياخ قنقراية دي شرحناها ليهو بين قوسين قندول ولو عايز كمان
يشرحوا ليهو الشرارة والقندول ذاتو دا يكون بعد كدا مسيديد ساي ما منو
رجاء .
|
Post: #36
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-09-2011, 08:50 AM
Parent: #35
سلامات يا أبو الريش وكل سنة واتا طيب
وقد قيل في المقام الجلد التخين تجر فيهو الشوك والقافة تسير
|
Post: #37
Title: Re: الصداقة في ذمة الله .. ود البشرى يجرجرني إلى المحاكم ..
Author: طلحة عبدالله
Date: 08-09-2011, 08:54 AM
Parent: #36
شاعرنا الفذ زمراوي ربنا يعيدو عليك وانت وجميع الأحباب طرفك بخير وصحة وعافية
وعاجز عن الشكر والله للإطراء الفخيم Quote: الشهادة لله من أجمل بوستات رمضان الكريم
|
ودي والله شهادة ما ساهلة من زول ما ساهل أبدا .
........
غايتو كلامك السمح لي دا كان سمعو بطل البوست دا إحتمال كبير
يرقد بى ضغط واللا عوجة زمان
|
Post: #38
Title: Re: الصداقة في ذمة الله .. ود البشرى يجرجرني إلى المحاكم ..
Author: وليد عكاشة
Date: 08-09-2011, 01:18 PM
Parent: #37
الله أكرم يا طلحة ياخى , بعدين ياخى ود الخدر دا ما تعصر عليهو شديد كدا بالله , الراجل ما ساهل الشهادة لله
يا ود البشرى لو تلفونك الفى البروفايل دا شغال إتوقع برى شديد جداً بعد الفطور هسى مافى حيل النفس يالله يالله
الفيس بوك دا ما عندى معاهو شغلة نهائى كدا , دا تطبيق بتاع قوالة و شيل حس ما بنقدر عليهو بعد العمر دا ياخ
|
|