ودمدني (نص شعري)

ودمدنى
محمد الفاتح أبوعاقلة

سمحة زي عافيـة بدَّنا
ميسا تريـان بالمحنـة
بيـها بنصالح زمنَّـا
يا ما فيها الشادي غنا
والمولـه بيها جنــه
***
مره لو في الدهر فنَّـة
تلقى من أحزانه صنـة
وفي سواعد أحفاده بنا
يطلع الوجع المكنّــا
ويفتق الفرع المحنـى
***
قبة في مدنى بتحـدث
عن تواريخن تـورث
للبلد معـنى الحصافـة
وللمواويـل الرهافـة
***
المسيد مدنى ابتدابـا
والقصيد مشهاد شبابا
قدلة المساح مهابـة
للعشق روح الربابـة
وغنى للعفَّة ولهابـا
في جمال النيـل وغابة
***
زاره بدري السني طافا
وجابه للـذُّوق والثقافة
ديمة زينة كمان قيافـة
والبشوف الطيبة شافه
والبدور الضلـة خافه
***
مدنى مالك قاعدة قايمة
والبجوك يلقوك نايمـة
ومن عيالك ديما صايمة
والخلوق حواليك حايمة
***
ما غريب نلقاك صبورة
رغم إنك جد جسورة
البشوف وحشة طيورة
وبهدلة دوره وحضوره
يعرف إنو غشاها غاشي
والحـزن لفاهـا فاشي
والأخـد شباله واشي
شال نعيما وفرَّة ماشي
***
مدني من الفاقة صومي
ؤفي بحـور المهلة عومي
بكره مقـدورك تقومي
إنت حاشاك ما بتلومى
إلا للناسين جمايــلك
إنت أصلك ما بتدومي
***


ودمدني

Quote: مدنى مالك قاعدة قايمة والبجوك يلقوك نايمـة ومن عيالك ديما صايمة والخلوق حواليك حايمة *** ما غريب نلقاك صبورة رغم إنك جد جسورة البشوف وحشة طيورة وبهدلة دوره وحضوره يعرف إنو غشاها غاشي والحـزن لفاهـا فاشي والأخـد شباله واشي شال نعيما وفرَّة ماشي

شُكرا محمد

وستعود كما كانت وأفضل بإذن الله


مهما طال جور الزمن

ومهما طال عصر الهزيمة

سوف ترجع هي الأمينة وهي الحنينة



تحاياي