Post: #1
Title: الشرطة تسرق الشعب
Author: Mohammed Elhaj
Date: 08-03-2011, 10:01 PM
لا أحد يستحي في الخرطوم
الشرطة في نهار رمضان تمارس السرقة جهاراً نهاراً
ذهبت لكي تمنحني الشرطة الإذن بالخروج من البلاد وهذه في حد ذاتها مسخرة وأي مسخرة
فيقوم أحدهم بتعبئة ورقة بالمعلومات التي في الباسبورت ويضع فيها دمغة ويطلب عشرة جنيهات دون ايصال (يمكن الدمغة هي السند ما مشكلة)
أذهب للتصديق وبعدها لرسوم "الاستيفاء!! هكذا يسمونها" يطلب 128 جنيها ويعطيني "ايصال 15" بمبلغ 47 جنيهاً عن كل باسبورت = 94 جنيه
سألته كم قيمة التأشيرة قال 64 حنية
قلت له لكن الايصال "ايصال التوريد لوزارة المالية 15" بمبلغ 47 جنيه فقط؟؟
قال بنفاذ صبر: في ايصال تاني تحت الايصال دا
رفعت الايصال فوجدت ورقة مثل تذكر السينما مكتوب فيها العلاقات البينية (مكتب الجوازات هو مكتب جوازات القضائية بالمناسبة وليس العلاقات البينية) هذه الورقة بقيمة 4.5 جنية * 2 = 9 جنيهات يعني 94+9=103 جنيه
قلت له طيب دي 9 جنيه وين بقية ال 25 جنيه؟
قال يا زول انت عايز تأشيرة ولا عايز تعمل غلبة؟ في ناس وراك عايزين يتخارجو امشي للضابط المضى ليك داك أسألو
ذهبت الى الصالة لكي اسلم جوازي وأتى الذي كان خلفي في الصف وهو يقلب ايصالاته مستغرب في ال 25 جنيه المهمبتة!!!
|
Post: #2
Title: Re: الشرطة تسرق الشعب
Author: Mohammed Elhaj
Date: 08-03-2011, 10:44 PM
Parent: #1
المؤلم في الوضوع أنني مثل بقية الشعب المغلوب على كرامته وأمره آثرت أن امضي في درب السلامة و"احتسب" ما همبتته الشرطة مني وافرح بالورقة التي دبستها اشرطة في جواز سفري منحة منها وسماحاً وأخرج مطأطئا رأسي ومنهوباً عادي
|
Post: #3
Title: Re: الشرطة تسرق الشعب
Author: Dr. Ahmed Amin
Date: 08-03-2011, 11:23 PM
Parent: #2
| Quote: المؤلم في الوضوع أنني مثل بقية الشعب المغلوب على كرامته وأمره آثرت أن امضي في درب السلامة و"احتسب" ما همبتته الشرطة مني وافرح بالورقة التي دبستها اشرطة في جواز سفري منحة منها وسماحاً وأخرج مطأطئا رأسي ومنهوباً عادي |
أخي محمد الحــاج ..
فعلا مؤلم جدا أن تترك حقك بهذه الطريقة .. كان يجب أن توصل بهذا الموضوع لأعلى سلطة في وزارة الداخلية
وكان يمكن أن يحدث شيئ من إثنين .. أن تقتنع بأن هذا الإجراء صحيح ولا غبار عليه .. وبالتالي تكون بهت الشرطة
بهذا الوصف ..
أو تنتبه الجهات الإدارية بأن هنالك خلل ويجب معالجته فورا وتكون كسبت ثواب في الناس التي تأتي من بعدك
فاذل لم يحدث أي من الحلين يمكن لنا بعداك أن نطلق اتهامنا لشرطة الجوازات بالتلاعب الواضح في المستندات
ومحل الرهيفة التنقد ...
رمضان كريم ياخ .. وحمدا لله على سلامة التأشيرة 
|
Post: #4
Title: Re: الشرطة تسرق الشعب
Author: باسط المكي
Date: 08-03-2011, 11:26 PM
Parent: #3
الشكية لابيد قوية
|
Post: #6
Title: Re: الشرطة تسرق الشعب
Author: Mohammed Elhaj
Date: 08-03-2011, 11:37 PM
Parent: #4
رمضان كريم يا أحمد وباسط
كيف أقتنع انو الاجراء دا سليم؟
1- اي رسوم تتاخد بواسطة جهة حكومية يجب أن تكون باورنيك 15 دا ما كلامي دا كلام وزارة المالية اتسيلف
2- الشرطة ادتني اورنيك 15 بمبلغ اقل من المبلغ الدفعتو (انا دفعتا 64 والايصال بي 47)
3- ال 4.5 جنية بي تذكرة زي بتاعة السينما ودي مخالفة لي الكلام القلناهو في نمرة 1
4- ال 12.5 الباقية دي همبتة ولا ورقة كلينيكس ما ادوني قصادا
اها البهتان بيجي من وين؟
الناس القاعدة منتظرة تأشيرات وفي الصفوف فيها الكبار في السن والطلاب والنساء وكلهم مهمبتين نفس الهمبتة دي
ولا الهمبتة دي غيروها يا دكتور؟
|
Post: #5
Title: Re: الشرطة تسرق الشعب
Author: عماد حسين
Date: 08-03-2011, 11:34 PM
Parent: #3
سلامات يا محمد الحاج
سبحان الله.. يبدوة أن هذا الأسلوب اصبح ممارس بكثرة...
في البوست ده أنا ذكرت حاجة تكاد تطابق نفس الوقائع التي ذكرتها:
عودة الضرائب مرة اخرة ... على المغتربين تبني موقف واضح .
بس في مكان تاني... وشوف الاقتباس
Quote: قال ليك في سواكن.. يقول ليك مثلاً جيب 11 ألف (بالقديم) ويديك ايصال بي 10 ألف
واحد دفع 11 وأدوهو ايصال بي 10 قام زعل..
وطوالي قال ليهم: ده شنو
قالوا ليهو: مالك؟ الحاصل شنو؟
قال ليهم: كيف أديك 11 وتديني ابصال بي 10 ؟
قالوا ليهو: يا زول خلي اللماضة، انتا ما داير تتخارج من هنا وللا شنو
أوكما قال
ههههههههههههههههههههه |
رمضان كريم يا محمد
وربنا يتقبل الصيام والقيام
|
Post: #7
Title: Re: الشرطة تسرق الشعب
Author: Mohammed Elhaj
Date: 08-04-2011, 08:23 AM
Parent: #5
رمضان كريم يا عماد حسين
المؤسف انو دي الشرطة شخصياً البتمارس السرقة والهمبتة من المواطن
|
Post: #8
Title: Re: الشرطة تسرق الشعب
Author: Hussein Mallasi
Date: 08-04-2011, 08:42 AM
Parent: #7
| Quote: (مكتب الجوازات هو مكتب جوازات القضائية بالمناسبة وليس العلاقات البينية) |
مكتب القضائية هو مكتب للعلاقات البنية.
|
Post: #9
Title: Re: الشرطة تسرق الشعب
Author: Mohammed Elhaj
Date: 08-04-2011, 09:09 AM
Parent: #8
شكراً يا حسين على المعلومة،
|
Post: #11
Title: Re: الشرطة تسرق الشعب
Author: سفيان بشير نابرى
Date: 08-04-2011, 09:47 AM
Parent: #10
محمد الحاج يعني جيت واتخارجته ولا سالته مننا ذاتو !!!
ما غلطانين فيك كان كدا.
ورمضان كريم
هاك شوف قصتي القديمة دي اخوك زمااان دخل الفلم دا أنت
يادوب ؟
Quote:
و الله يا محمد اورنيك 15 دا ما بعرفو بس زماااان كدا بطلته اسأل من إي إيصال مالي لانو حصلت لي قصة عجيبة جدا لما دفعته
لي قروش وطالبته بيصال الدفع هاهاها هاهاها والي محاور ومضابط القصة لوووووووول
قبل سنين عديده وانا طالب في الجامعه لسه في سنة أولى جامعه جنسيتي راحت وقررته استخرج بدل فاقد ولانى ما بعرف الأجراءات
طوالي بديت من جوازات أمدرمان ناس الجوازات وجهونى امشي افتح بلاغ فقدان واجيهم بكرة للاستخراج مشيت القسم الجنوبي (جوار
جوازات أم درمان) ودفعت رسوم البلاغ 4 جنيه تقريبا الغريبه ادوني إيصال وقررته انى ما أتاخر لبكرة طالما بلاغ الفقدان طلع
سريع طوالى رجعته الجوازات و شرعته املى فورم للجنسية الجديدة بعد أن سلمتهم بلاغ فقدان الجنسيه القديمة لقيت سوال في
الفورم عن رقم الجنسية المفقوده وانا ما كنت متذكر الرقم سالته الضابط :- يا جنابو أنا ما متذكر رقم الجنسية القديمة
الحل شنو ؟ كان رده:- الحل أنك تمشي مكتب السجل المدني في وزارة الداخلية ( كنت لا اعرف مقر الداخلية السودانية)
سالته وين الداخلية دى ؟ ردا بسرعه واقتضاب:- في الخرطوم ، قررته ان لا اساله اين بالضبط في الخرطوم وخرجت وعند باب الخروج
لجوازات ام درمان وجدت عسكري فسالته :- لو سمحته أنا عايز اصل وزارة الداخلية وصف لي ياخ ؟ بهت العسكري واصبح يتلفت ونده
لزميل له واخبره بما قلته وطلب منه ان يوصف لي (كتر خيرو) العسكري الجديد سالني :- بتعرف الجامع الكبير بتاع الخرطوم ؟
اجبته :- نعم .. قال لي :- تصل الجامع وتقيف بالضبط قصاد الباب الشمالي وتتجه اتجاه النيل دغرررررري المبني العلي شمالك هو
وزارة الداخلية وواصل انت ماشي لشنو تحديداً ؟ قلت له السجل المدني قال لي هي في البدرون تحت .
اتوكلته ووصلت وزارة الداخلية ووصلت للبدرون ونزلت لمكتب السجل المدني وجدت تلاته عساكر يتسامرو ويتونسو ولابسين سفنجات وقفت
وطرقت الباب فقال لي اقربهم للباب :- يازول انت ما شايفنا بنتكلم !!!؟ خليك واقف لحدي ما نخلص ! رضخت للأمر وبعد 20 دقيقة (طول
هذه المدة لم ياتي احد ولم يخرج من المكتب احد) قال لي ذات الرجل الذي انتهرني (دققت النظر فيه وجدت انه له تلاته شرايط) نعم اتفضل
مالك؟ دخلت المكتب ورميت بالسلام عليهم ولم اسمع رد من احد وقلت:- أنا عايز اطلع جنسية بدل فاقد وما متذكر الرقم بتاع المفقوده
وجيت من الجوازات لانو ادوني الورقه دى وقالو اجيكم ، اخذ الرجل مني الورقه (وهي ورقه مكتوب عليها الي السجل المدني ومختومه)
وقال لي انتظر في الخارج .. وبالفعل خرجت وكان الباب فاتح و انا انظر للرجل وهو لم ينهض من مكانه ولم يفتح اي دفتر من الدوسيهات والدفاتر التي تملي المكتب (ليس بمكتب انما هنكر كبيييير جداً ملئ بدفاتر مهولة) بل رمى ورقتي و واصل ونسته مع اصحابه وبعد ما يقارب 15 دقيقه اخذ ورقه وكتب عليها كتابة وختم عليها بختم السجل المدني ومضي عليها ولم ينادينى هذه المرة بل نهض واتاني خارج المكتب و قال لي :- هات 15 جنيه ، دفعت ال15 جنيه بسرعه ومد لي الورقه وقفل راجع للمكتب وواصل في ونسته انا فتحت الورقه وجدت فيها:- لا
يوجد رقم ملف وختم وامضاء بتاريخ اليوم .
بالطبع وبسذاجه لم اتحرك وفضلت و اقف بعد مساااافه العسكري انتبه اني واقف قال لي وهو يتحرك نحوي:- يازول انت واقف ليه مش اديناك
الورقه خلاص ؟ قلت له:- نعم بس ما أديتني اصال مالي بتاع التسديد !!؟ وصلني بسرعه ومد يده وقال :- بالله !!! كدي الورقه دي .. وانا
ببساطه مديت ليهو الورقه هاهاهاها علي طول كرفسه وشرطه وقال لي:- انت الظاهر ما عايز تخلص شغلك !!!
حينها فهمت كل شئ واصبحت اترجى واعتذر ولم يرضى الرجل إلا أن دفعت له 25 جنيه كاملة إي والله 25 جنيه .
اها تسألني أنا من اورنيك 15!!!!؟ |
ـــــــــــــــــــــــــــــــــــ
نادر كيف ياخ ورمضانك كريم
عساك بخير .
|
Post: #14
Title: Re: الشرطة تسرق الشعب
Author: حامد محمد حامد
Date: 08-04-2011, 10:01 AM
Parent: #11
المهم التاشيرة ...حاجة غريبة ياخى ليه الواحد بتجيه فرحة كدة لما ياخد تاشيرة الخروج من السودان... ؟
سلام يا محمد الحاج وتحياتى
|
Post: #12
Title: Re: الشرطة تسرق الشعب
Author: نادر
Date: 08-04-2011, 09:51 AM
Parent: #10
| Quote: فعلا مؤلم جدا أن تترك حقك بهذه الطريقة .. كان يجب أن توصل بهذا الموضوع لأعلى سلطة في وزارة الداخلية |
يا دكتور أحمد الحصل مع محمد الحاج ده قطرة في محيط الفساد الحاصل في البلد.
كلو بيسرق كلو ... فمافيش فايدة من تصعيد الأمر وفق ما ذكرت، إذا كان وزير الداخلية نفسو يوماً ما كان مورطاً في عمليات فساد.
|
Post: #13
Title: Re: الشرطة تسرق الشعب
Author: نادر
Date: 08-04-2011, 09:54 AM
Parent: #12
Quote: نادر كيف ياخ ورمضانك كريم
عساك بخير . |
سلامات يا سفيان ورمضان كريم
متابعك بي هناك بشغف في بوست أغاني وأغاني
|
Post: #15
Title: Re: الشرطة تسرق الشعب
Author: بله محمد الفاضل
Date: 08-04-2011, 10:10 AM
Parent: #13
إن العوج فوق
البعدل التحت شنو
|
Post: #16
Title: Re: الشرطة تسرق الشعب
Author: Mohammed Elhaj
Date: 08-04-2011, 10:33 AM
Parent: #15
سلامات سفيان ونادر،
اضافة للفوق دا الناس ديل بيشيلو الايصال 15 زاتو ويلموهو عندهم وسط ورق المعاملة، يعني يشيلوا القروش ومعاها الايصال كمان!! الناس دي محتاجة لي Process Reengineering جادي دا طبعاً اذا ما اخدنا سوء النية في الموضوع!!
|
|