شكيتك على الله يا الورر: حكاية (عشماني) والورر

شكيتك على الله يا الورر: حكاية (عشماني) والورر


08-01-2011, 00:26 AM


  » http://sudaneseonline.com/cgi-bin/sdb/2bb.cgi?seq=msg&board=340&msg=1312154773&rn=7


Post: #1
Title: شكيتك على الله يا الورر: حكاية (عشماني) والورر
Author: maman
Date: 08-01-2011, 00:26 AM
Parent: #0

كاتب هذه الحكاية هو الأخ حسن عثمان شمهران من أبناء جزيرة مساوي
الحكاية أعجبتني لأن الكاتب استطاع أن يعبر باللهجة العامية بمنطقة الشايقية تعبيرا ابداعيا واستخدم مصطلحات تكاد تكون اندثرت
ملحوظة : سنأتي بالترجمة لاحقا
------------

أبرك وخير ،،، النِهار حر وبرد وعشماني مو من عوايدة إتأخرت من مواعِيد جيته (للمجركاب )، والسهوة تحرِس وترجه ،، وقِليبه أكلا وشِفقت وقالت : يا سابل السُتر أستُر الليلي بت عبدالكريم ماها براها .
ودخل شويفع وقف ومسك في اللميني وإنتكي علي الكاسق ومهجوم وبي بشيش إتكلم مرسلاني ليك حبوبتي عشماني وقالتلك الحُمارة راماني فِسراع تعالي شوفيني)
السهوة لفحت طِرقتها وقامت مفتاحة في أباطة ودخلت علي صاحبته ولِقت الخِلُوق مِتلملمي ، مالِك آ معترة إنتي الحمارة دي راكباها حِدك سوق الباسا وحدِك سوق عيقولة وسوق العمدة وسوق تنقاسي ، ومشاويرك كُلهن مقضاهِن فوقا، الليلي الوقع عليك شنو آ بخِيت الحال؟
عشماني رأبطي إيده وكُراعة لكن لِسانة يحُش الطرفي.
أصبحنا بالله قُمت مع الفجاج وفوق نار الشاي رميت لي حِريف بُرادي وعندي مُلاحاً بايت دفيتُو وتكتكتو وشقيت لي بصلة شلت لي لُقمة .. ربابِيطي ومناجلي مطرقات في القُفة .
عندي حوضين لوبي تابرات في الطرِح التالا جزيرة الشرق ، قُت أخدِر لي نعيجتي المتاومي ، وبالبرُوديي أرجع ، وطلقت حُمارتي وختيت لِبدتي وخلفت 0
سويت لي بطيحة وحشيت لي رأسين برسيم وعندي حيضان مُلوخيي في الجرِف متكِناهِن بالسبروق ولِسان الطير لقطت من الرُخُس مليت قُفتي وكسرت لي من عيش الريف كم قناديل ختيتن فوق مُلاحي 0
ولاد نِعمي قراعين ماسكِين الموية في الضهاري وما قصروا رفعولي البطيحة وعُودلولي البرسيم وركِب وإتعدل ، وختولي قُفة المُلاح قِدامي0
ودعيت لُهن من قليبي إنشاء الله ما يجي يوم شُكرُن ورجيت الله عليهُن يعمرو عمار الحنضل في وادي أبقيع 0
ونهر حُمارتي والجبنة رأماني رأسي يسوي في التح ترح و بالضهاري شاققت طلعت بي دريب ود عدلان وكِت جيت عِن سهلة سيدي طِريت مستورة قاعدي وسُط نُقاقيرة وصوته يتبوبح وتسير، حال السرور يا يمة :
أحمد شيخنا سار أبشروا يا حيرانُ
أحمد شيخنا سار الحفلة في ديوانُ

قادر الله وزايلي الدِنيي وخرباني وأشري يا يمة،، ويا حليلنا منها 0
السهوة مِستعجلي إنتي يأ خرابة أنا رأجاك تكملي حديثك.. الحُمارة رمتِك كيفن؟ قُمتي قلبتيهُ في التيلان 0
أصُبري أنا ماشي عليك ، جيت عِند الحفير والجدول مليان والواطة شرباني والموية مدفقي في درب الساقي حُمارتي إتعدت وبي وسط العيش ماشي وأنده في الشرايف0
أشوفلِك الورل المرق من الجدول الضكر وطار زي العُصار وإتقلب في حوض العيش والحمارة قالت بي كدي ورمتني علي صفحتي 0
البرسيم واللوبي كلو فوقي وقفيفتي بي مُلاحة إنكبت في المُوية.. كُراعي إتلوت مِن تِحت وساعةً طويلي وأنا في محلي وفي حالاً كُتُر وغالبني القومة 0
والورل سمع أضاني يسوي في البط بط مرقة في الدسامعة 0
وأنا راقدي في بِكيني نعلتو تكيتو صفحة صفحة قتلو شكيتك علي الله ، وإن كان فيك فايدي ما سموك ورل يالعاطل ، حايم في الجروف وتمرُق من الحلفي تدخُل في الطرفي لا عندك شغلة ولا مشغلة ، العوم مِتل أخوانك ما قعد تعرفو تغطس زي الحجر وتبنقر في نُص البحر من خوفك 0
رفاقتك قاعدين وساكنين في الدالات والشلالات هِناك وسط الحجار والكير القاطِع في الحامداب.. الصغير فيهُن يشيل العروس بي عريسة فوق ضهرو ويعديهُن البحر في عِز الدميري.. أقعُد إنت هني أحبس الدروب والراكِب كُلو أهجمو وأرمو 0 رجيت الله يرميك في إيد الكراقنا والا التكارنة ينجضوك وياكلوك 0
www.forevermaman.com

Post: #2
Title: Re: شكيتك على الله يا الورر: حكاية (عشماني) والورر
Author: Al-Shaygi
Date: 08-01-2011, 08:15 AM
Parent: #1


Quote:
أقعُد إنت هني أحبس الدروب والراكِب كُلو أهجمو وأرمو 0 رجيت الله يرميك في إيد الكراقنا والا التكارنة ينجضوك وياكلوك

هههههههه
رهيبة يا مامان
يلا بالله جيب الترجمة عشان العجم يفهموا... (ومنهم أنا زاتي)


الشايقي

http://www.youtube.com/watch?v=WjNosdjuv7s

فاوضني بلا زعل

[email protected]
http://alkatwah.com

.

Post: #3
Title: Re: شكيتك على الله يا الورر: حكاية (عشماني) والورر
Author: sumah
Date: 08-01-2011, 10:04 AM
Parent: #2

***
**
*

مامان سلام يغشاك انت والاصدقاء والاهل
طبعا العنوان قادنى لربط الحكاية
باخوتنا فى جنوب الوطن الجريح
بعد عملية فصل التوأم ونحن هذه الايام
نمضغ الضيم والاسى..
وكنت قد كتبت قبل ايام حكاية
ود خالتى فاطنه مجوك
وقلت اه ..هاهى حكاية اخرى
حكاية (عشماني) والورر
وقد تداعى الى ذهنى كيف ان الورر
يمكن ان يشبه مجوك
فهو يخلق من الشبة اربعين
ولربما تغسل قليلا من احزاننا
عرفت كيف هى الحوجة الى ترجمان
فوجدت انه ورل كبير يشبه ورل
الكيزان الجاثم على الصدور
فكم عندنا من ورل يجر ازيال الخيبة
وبلدا مافيها ..... يقدل فيها الورل
وقد لخصة سارد الحكاية على لسان عشمانة
هذا ما كان من حكاية العنوان..
وبخصوص الحكاية حكاية (عشماني) والورر
سوف نجيكم مرة تانية.

*
**
***

Post: #4
Title: Re: شكيتك على الله يا الورر: حكاية (عشماني) والورر
Author: maman
Date: 08-01-2011, 10:20 AM
Parent: #2

Quote: يلا بالله جيب الترجمة عشان العجم يفهموا... (ومنهم أنا زاتي)

شكرا حسن

الترجمة في الطريق

Post: #5
Title: Re: شكيتك على الله يا الورر: حكاية (عشماني) والورر
Author: maman
Date: 08-01-2011, 11:13 PM
Parent: #4


SUMA

كيف حالك.
تحليلك أعطى الحكاية بعدا آخر. طبعا الورر عندنا كما تقول الحكاية القديمة (رغم عدم صحتها علميا) أنه يفقس من بيض الصفيرا (أنثى التمساح) التي تبيض 100 بيضة تخرج لنا تمساحا واحدا و99 وررا... وتضيف الحكاية أن التفريق بين هذه الزواحف، بعد أن تخرج من البيض فإن التمساح باستطاعته العوم عكس العرق ( عكس التيار) بينما يفشل الورر في السباحة وهذا ما دعا (عشماني) لذكر بعض هذه الصفات المهينة التي يتصف بها (الورر الذي تسبب في إطاحتها عن ظهر حمارتها )... ما أكثر الوراري في هذا الزمن!!

www.forevermaman.com

Post: #6
Title: Re: شكيتك على الله يا الورر: حكاية (عشماني) والورر
Author: معاوية المدير
Date: 08-02-2011, 09:42 AM
Parent: #5

ســـلآمات يا مامان.
التحية لك ولكاتب الحكاية.
كلآم سمح وزين في زمن المحن الشين الخلآ الورر
يقدل في وسط البلد بعد كان يِزررق بالخُشش، ويِضاير
في الحلفا. الله غالب.
عندنا في البلد بيقولوا: الورر بيضة التمساح الخايسة،
والزول المابيعرف يعوم بنسميهو الورر وكذلك الخوآف.
مشكور يا مامان علي إيراد القصة خفيفة الظل.


في إنتظار الترجمة.
تحياتي، ورمضان كــــريم...

Post: #7
Title: Re: شكيتك على الله يا الورر: حكاية (عشماني) والورر
Author: maman
Date: 08-02-2011, 02:49 PM
Parent: #6

Quote: أبرك وخير ،،، النِهار حر وبرد وعشماني مو من عوايدة إتأخرت من مواعِيد جيته (للمجركاب )، والسهوة تحرِس وترجه ،، وقِليبه أكلا وشِفقت وقالت : يا سابل السُتر أستُر الليلي بت عبدالكريم ماها براها .
ودخل شويفع وقف ومسك في اللميني وإنتكي علي الكاسق ومهجوم وبي بشيش إتكلم مرسلاني ليك حبوبتي عشماني وقالتلك الحُمارة راماني فِسراع تعالي شوفيني)
السهوة لفحت طِرقتها وقامت مفتاحة في أباطة ودخلت علي صاحبته ولِقت الخِلُوق مِتلملمي


الأخ معاوية المدير

شكرا على مرورك ... لتقريب الصورة للبعض أقدم شرحا (أو ترجمة لحكاية عشماني والورر)
(أبرك وأخير) جملة استهلالية تقولها النساء عندما يبدأن في سرد حكاية فيها طابع المأساة
(المجركاب )هي اسم حلة عشماني .. (السهوة) هي صديقة (عشماني)
(قليبا أكلا وشفقت) بدأت تتوجس خيفة من تأخر عشماني في المجيء وافترضت أن شيئا غير متوقع ربما يكون حدث لها
(دخل شويفع وقف ومسك في اللميني... وانتكى على الكاسق) : الشويفع تصغير شافع وهو الطفل، اللميني (الأمينة) هي ساق خشبي ضخم يكون في منتصف الغرفة أو الراكوبة يثبت عموديا لتثبيت السقف ويكون له شكل شعبة أعلاه توضع تحت (المرق) والمرق هو ساق ضخم يعارض فوق الغرفة قبل أن يتم سقفها
(السهوة لفحت طرقتا وقامت ، مفتاحا في أباطة) الطرقة توب رخيص الثمن تلبسه النساء في غير المناسبات والأحوال العادية وأثناء عملهن في الزراعة .... أما المفتاح الموضوع تحت الإبط فهو مفتاح خشبي كبيريسمى الكشر يستخدم بادخاله في آلة خشبية تقوم مقام الكالون لفتح الأبواب التي عادة ما تكون من خشب السنط

Post: #8
Title: Re: شكيتك على الله يا الورر: حكاية (عشماني) والورر
Author: Al-Shaygi
Date: 08-02-2011, 03:00 PM


Quote:
الشويفع جمع شافع وهو الطفل،

يا زول ترجم صاح ولا بنجيب لينا مترجم أجنبي...!!!!


الشايقي

http://www.youtube.com/watch?v=WjNosdjuv7s

فاوضني بلا زعل

[email protected]
http://alkatwah.com

.

Post: #9
Title: Re: شكيتك على الله يا الورر: حكاية (عشماني) والورر
Author: maman
Date: 08-02-2011, 05:10 PM
Parent: #8

Quote: يا زول ترجم صاح ولا بنجيب لينا مترجم أجنبي...!!!!


الشايقي
تم التعديل واظن الترجمة في نهار رمضان تخلي عقل الزول في حالة غير الطبيعية

Post: #10
Title: Re: شكيتك على الله يا الورر: حكاية (عشماني) والورر
Author: maman
Date: 08-03-2011, 03:00 PM
Parent: #9

تمت الطنقحة بنجاح

Post: #11
Title: Re: شكيتك على الله يا الورر: حكاية (عشماني) والورر
Author: Tarig Sidahmed
Date: 08-03-2011, 04:32 PM
Parent: #10

مبدع لكن جمع أشياء وكلمات غميصة في حته واحده

الترجمة تفقد المضمون محتواه فلا تجهد نفسك مامان
وأصلا الراح يقدر يقراها راح يفهمه

إبداااااااااااااع

Post: #12
Title: Re: شكيتك على الله يا الورر: حكاية (عشماني) والورر
Author: أنور عبد الرحمن الشيخ
Date: 08-03-2011, 04:59 PM
Parent: #11

الإقتباس أدناه منقول من منتدى الكرو للمهندس خالد عبد الله الحاج
Quote:
للمجركاب هى اكيد اسم لى حل او منطقه اسره معينه
الطرفي الطرفى نبات غزير دايما مايتواجد فى اطراف البحري
ربابِيطي هى جمع رباط وهو الحبل الذى يربط به القش
تأبرات يعنى غزار او ناجحات فى الزراعه
الطرِح يعنى المكان المستوى الذى يمكن الانسان من الرؤيه لابعد ماكان
المتاومي يعنى التى تلد توام
وخلفت وهذه تعنى الركوب على الحماره وهى نوعين اما الشلوخ وهو الركوب العادى او بالخلاف وتكون ارجلك فى اتجاه واحد
بطيحة يعنى حزمه من القش وهى نوع من انواع مقاسات كمية القش وهنالك الراس والتمساحيه
يتبوبح يعنى يصدح
التيلان يعنى الاقاويل والتنطيط من موضوع الى اخر
كُتُر يعنى زمن طويل حتى انها لاتعرف عداده
الدسامعة اسم لى ساقيه
الدالات الداله هى عباره عن منحيات او مدرجات داخل النيل


المصدر
http://www.alkuro.net/vb/showthread.php?t=8343

Post: #13
Title: Re: شكيتك على الله يا الورر: حكاية (عشماني) والورر
Author: maman
Date: 08-04-2011, 00:47 AM
Parent: #12

الأخ طارق سيد أحمد

لك التحية ورمضان كريم

ما زلت اعتقد أن بعض الكلام المكتوب محتاج لتوضيح (مش ترجمة كما قال الشايقي) ... مثلا عندما تمنت عشماني أن يقع في أيدي (الكراقنة) فقد كانت تقصد عائلة (كرنقيل) وهم صيادو سمك وتماسيح طبقت شهرتهم الآفاق في كل المنطقة خاصة محمد سعيد كرنقيل الذي اصطاد 150 تمساحا خلال حياته العملية... أرجو الاطلاع على الرابط

http://www.tawtheegonline.com/vb/showthread.php?t=1069

Post: #14
Title: Re: شكيتك على الله يا الورر: حكاية (عشماني) والورر
Author: maman
Date: 08-05-2011, 08:42 PM
Parent: #13

طنقح