Post: #1
Title: عِـندي حـبيبة ...
Author: محمد الجيلى
Date: 07-25-2011, 08:34 PM
Parent: #0
عندي حبيبة زي النيل!
بتتسارق وتتمازج معاي حنين
بتسكُن فِيّ
وتمطّر فِيّ
وتتخلل مسامي رزاز وجُرعة مي ...
عندي حبيبة زي الصي!
تولّع فِيّ نيران شوق
تخليني أساسق بين عيونا حريق
تشحتّف فِيّ!
تدلل وتمنعني من عسل بشفي البّي ...
عندي حبيبة زي الليل!
وكت أتعب وأكون ضايق
تشيل همي
وتهدهدني زي طفلاً رضيع وصغير
تزيل غمي
وأنام في حِجرها الدافئ
وتسبح فيني في دمي ...
|
Post: #2
Title: Re: عِـندي حـبيبة ...
Author: محمد الجيلى
Date: 07-25-2011, 08:42 PM
Parent: #1
عندي حبيبة زي الورد 
تعطّر ديمة وجداني
تزيد الود
لطيفة رقيقة بسماتا
طرية القد
ما بتبخل علي أبداً
حبيبة أنيقة من دون حد ...
عندي حبيبة زي وطني!
كريمة الأصل
شامخة عنيدة ما بتعرف
معاني الذُل
فيها النيل وفيها بعانخي ترهاقا
وفيها ملامح السودان
وفيها الكُل
حبيبة تلملم الخطوات
وتدي الضُل ...
|
Post: #3
Title: Re: عِـندي حـبيبة ...
Author: محمد الجيلى
Date: 07-26-2011, 08:11 AM
Parent: #2
عندي حبيبة زي الفُل!
بتتمايل مع النسمات
تغازل الطّل
بتوهب للفراش الحُب
تداعب الضوء ...
عندي حبيبة راكزة دوام!
تسند الحيل
ترافق ديمة خطواتي
تعدل الميل
بتوهب لي روحا فِداء
وتزيد الكيل ...
عندي حبيبة زي أطفال!
عيونا برئية ما بتعرف
خِداع وضلال
تبسُم للحياة دايماً
وتلعب في مرح ودلال
حبيبة جميلة تجيب الفال
بتفرح في حُضن حبوبة
وتسمع للحُجى البِتقال
تنوم من دون أسى وهموم
نضيفة بال ...
|
Post: #4
Title: Re: عِـندي حـبيبة ...
Author: بله محمد الفاضل
Date: 07-26-2011, 08:45 AM
Parent: #3
صباحك حبيبة
ووطن ممسوك من تلابيبو
ويلاوي...
صباحك خير
لو كان فضل منو
وما بعاني...
صباحك ضل
وهبهان
وقرفة
وحبة بن
صباحك شعر
|
Post: #5
Title: Re: عِـندي حـبيبة ...
Author: محمد الجيلى
Date: 07-26-2011, 12:04 PM
Quote: صباحك حبيبة
ووطن ممسوك من تلابيبو
ويلاوي...
صباحك خير
لو كان فضل منو
وما بعاني...
صباحك ضل
وهبهان
وقرفة
وحبة بن
صباحك شعر |
صباحكـ بُن
وفنجان شوق
وضحكة شافعة من أعماقا
تضوي العتمة والوجدان
صباحكـ زين
ولمة أهلنا الحلوين
ورعشة شوقنا للغايبين
تقديري
|
|