Post: #1
Title: إهداء للحبان فايز القاضى و جنى مع التقدير( شوفو جنس المعاملة )
Author: هجو الأقرع
Date: 07-23-2011, 08:45 PM
بداية مجرد سماعى لهذه القصة فقد خطر ببالى هؤلاء الاخوة الكرام ، ذلك لتعليقاتهم ، مرات تخليك ما تعرف تضحك ويلا تبكى.
حكى لى صديق اثق فيه ان اثنان من شباب الدعوة ، جماعة الخروج وهو يهمان بمغادرة بنغلاديش فى اخر لحظات المغادرة للمطار من ضمن مجموعة من مختلف الجنسيات ، طلب منهم دفع رسوم مغادرة ، دون باقى خلق الله ، لاحظوا الكل ملتحى جنسيات مختلفة ( الجماعة فى خروج) .
المهم اخواننا من بنى جلدتنا استغرباء و قالا ، ليه بس نحن دون الناس ، علما بان الجوازات سلمت للمطار بواسطة اميرهم و الجميع فى طابور ، فقال لهم الضابط يا سادة ياكرام نحن نعاملكم بالمثل فان ابناء جاليتنا ممن يعملون فى السودان يدفعون رسوم مغادرة الى حكومتكم ( الرشيدة ) ، فالجزاء من جنس العمل .
اهه رايكم شنو؟
|
Post: #2
Title: Re: إهداء للحبان فايز القاضى و جنى مع التقدير( شوفو جنس المعاملة )
Author: فايزودالقاضي
Date: 07-24-2011, 06:47 AM
Parent: #1
الحبيب هجو الاقرع ...سلام ...
| Quote: فقال لهم الضابط يا سادة ياكرام نحن نعاملكم بالمثل فان ابناء جاليتنا ممن يعملون فى السودان يدفعون رسوم مغادرة الى حكومتكم ( الرشيدة ) ، فالجزاء من جنس العمل . |
ياهجو انا اولادي وصلوا من السودان قبل شهر (زوجتي والاطفال) اصغرهم وئام (سنة وشهرين) ..تخيل ماخدين في المطار رسوم مغادرة 70 جنيه بالجديد من كل واحد من اطفالي حتى هذه الرضيع !!!...تقول لي بنغلاديش !!!..اطفال مابين العشرة الى سنة يدفعوا رسوم مغادرة !!! والمؤلم مافي زول اداهم ايصال تحصيل عن المبلغ ده ...بلد عجيبة !!! ياخي نحن هنا لا ندفع رسوم مغادرة ولا حتى رسوم استخراج اقامة لاولادنا التحت كفالتنا ...
قبل ايام تابعت برنامج في قناة الشروق عن إضراب بصات الشمالية ..تخيل اضربوا لانه الولاية فرضت عليهم رسوم مغادرة .. يعني المواطن يدفع رسوم مغادرة داخل بلده خلي مروق بره ....والغريبة ان هذا الرسم مقرر من مجلس تشريعي الولاية من 2003م بحسب كلام معتمد محلية مروى ..
|
Post: #3
Title: Re: إهداء للحبان فايز القاضى و جنى مع التقدير( شوفو جنس المعاملة )
Author: jini
Date: 07-24-2011, 11:16 AM
Parent: #2
يا هجو
مفروض كان يمرمطهم فى المطار ويغدوهم بى سندوتش طعمية وكباية كركدى ويرسلوا ليهم شنطهم بالرحلة التالية!
جنى
|
Post: #5
Title: Re: إهداء للحبان فايز القاضى و جنى مع التقدير( شوفو جنس المعاملة )
Author: هجو الأقرع
Date: 07-24-2011, 02:45 PM
Parent: #3
Quote: يا هجو
مفروض كان يمرمطهم فى المطار ويغدوهم بى سندوتش طعمية وكباية كركدى ويرسلوا ليهم شنطهم بالرحلة التالية!
جنى |
ليه بس كدى يا حيدر الناس ديل ما كيزان ياخ ، جماعة خروج ودعوة .
|
Post: #4
Title: Re: إهداء للحبان فايز القاضى و جنى مع التقدير( شوفو جنس المعاملة )
Author: هجو الأقرع
Date: 07-24-2011, 02:42 PM
Parent: #2
Quote: ياهجو انا اولادي وصلوا من السودان قبل شهر (زوجتي والاطفال) اصغرهم وئام (سنة وشهرين) ..تخيل ماخدين في المطار رسوم مغادرة 70 جنيه بالجديد من كل واحد من اطفالي حتى هذه الرضيع !!!...تقول لي بنغلاديش !!!..اطفال مابين العشرة الى سنة يدفعوا رسوم مغادرة !!! والمؤلم مافي زول اداهم ايصال تحصيل عن المبلغ ده ...بلد عجيبة !!! ياخي نحن هنا لا ندفع رسوم مغادرة ولا حتى رسوم استخراج اقامة لاولادنا التحت كفالتنا ...
|
تعرف يا فايز اخوى و الله رسوم المغادرة دى حارة خلاص لانو الزول بكون فى اللحظات الاخيرة ، ويا ريت المعاملة كويسة ، تعرف يا فايز اخوك لغاية العام الماضى عليهو خدمة الزاميه المهم مع الجلابية اصلو ما فى زول بقول لى وين كرت الاعفاء ، مرة مع اطفالى اصريت على اخذ الايصالات ووقفت ليهم الشغل حتى اخذت منهم الايصالات ، و الله تخليها يضربوها ذى السلام عليكم . غايتو البشير ده طلع اى كلام الزول ده من زمان وقف رسوم العبور ، و الله مره داخل شندى على بوكس رفضت ادفع قلت ليهم يا جماعة الكلام ده ملغى واحد قاعد بعيد قال و الله البشير لو مرة من هنا لازم يدفع. كان الله فى عون البلد ، غايتو الغربة سترتنا شويه الواحد لوكان هناك كان مات من المغسة .
|
Post: #6
Title: Re: إهداء للحبان فايز القاضى و جنى مع التقدير( شوفو جنس المعاملة )
Author: عماد حسين
Date: 07-24-2011, 03:11 PM
Parent: #4
الأخ هجو
والله القصة بتاعت الرسوم دي أصبحت كتيرة ومسيخة
بعد جهجهة الانفصال دي...
أنا متوقع تاني ما يدفنو الجنازة إلا تدفع رسوم (تملك شبير)
ربنا يدي العافية
|
Post: #7
Title: Re: إهداء للحبان فايز القاضى و جنى مع التقدير( شوفو جنس المعاملة )
Author: هجو الأقرع
Date: 07-24-2011, 03:49 PM
Parent: #6
Quote: والله القصة بتاعت الرسوم دي أصبحت كتيرة ومسيخة
بعد جهجهة الانفصال دي...
أنا متوقع تاني ما يدفنو الجنازة إلا تدفع رسوم (تملك شبير)
ربنا يدي العافية |
اخى عماد كيفك و عساك رايق
و الله ربنا يستر ، بس تــعرف
ما فى حاجة مستبعدة ربنــــا
يهون بس ، اسعدنى مرورك .
|
|