Post: #1
Title: عبدالله الظريف وخادم الله الحريفه - خطاب حسن أحمد
Author: أميمة أحمد العبيد
Date: 07-22-2011, 12:41 PM
للأسف تأثرالأستاذ خطاب بالتهكير ولا يستطيع الدخول الي حسابه الخاص
ولحرصة الشديد علي التواصل
انشر لكم و نيابة عنه وعن عبدالله وخادم الله ...
تجدوني فخورة وسعيدة بان اكون حلقة الوصل بينكم وبينه
حتى يعود اليه الباسورد سالماً
عبدالله الظريف وخادم الله الحريفه
يحكى عبدالله فيما يحكى لها .. ان كذا وكذا وينبهِل في حكايات ظرفِهِ المحبوكه بعناية , من لا يخشى التورط
فى سراديب ما غاص من مواقف وما كابدَ مِن وِرَط , فتضحك هى متيحةً ضحكتها المِضيافة , لإذنهِ السارده
فى ظرفها المُعتاد ولجميع الاسفير المهُيأ لالتقاطها , هذا طبعاً دون ان تنسى خدوم اثناء اطلاق الضحكة , المن القلب
سَّن ادوات حرفناتها فى موقف الرد عليه بطُرُق اكثر عمليه .. وايضاً إن تنسى لا تنسى .. مهرِها بتوقيعها الخاص ..
ياعُبَد ..
.. التى تقابل بها خدوم , التى يناديها بها .. فى زكيبة انسجامهما الممتَد .
تعرفى يا خدوم .. هكذا يستَهِل حكاويه مرات :
.. مرَه كنت شغَال مَلِكْ .. بعدين ..
ملِك عديل يا عُبَد !
تناوشَهُ هى احياناً فيعتبر ان هذا من كرامات استهلالاته للحكايا , فيدندِن بينه وبينه فى طرَب .. ب :
.. الله الله
او
.. أُمَكْ
.. الشَرَك قبض .. ويواصًل فى انبهاله المعلوم :
: ايوه ملِك عديل .. بس لدوله مجاوره ..
: آآاا مجاورَه .. طيِب ما تقول .. انا قايلاها هِنا ..أهاا .. تفتح شهيته
خدوم كما اعتادت فى وجباتها التى تعدها باخلاص له فى مثل هذه الاحوال ,
ومثل الصقر ينقض عبدالله ,
بس وانا واقِف قدام النُقُلتى .. جانى ليك واحِد رعيه ..
: واحِد شنو ؟
: رعيه يا بنى آدمه .. يعنى من عامة الشعب
تواصِل دردقتهُ خدوم
: آآا من العامه !
بس قال لي :
بيي صوت مُهذب وهامس ..
نظام .. يعنى زيما تقولى .. تأء صاد
وكِده ..
شنو دي ياظريف ! غلبتنى .. ؟
نظام تأمين حريص عشان ما يكشِف ورقى ياالتومه ياخدوم ياخ
آآا وقَع لي ..
قال لي : الحقنى يا مَلِك
: قلت ليهو جارى وين يا رعيه .. سغاله منى ساكِت
اجرى كيف يا ملك
مالك ما بتجِر يارعيه ! بغلتَك اتعسرت لا سمح الله وللا حاجه !
: أجرى كيف
قال ليَّ ..
:.. وانا بدون نعلات !!
كلامو صاح ياخدوم .. عاينتَ كُرعيهو ! لقيتهن دون
وين نعالَك يارعيه ؟
قال لييّ
: إنسهَك يا ملِك
وكك كرَك
أُسقِط فى قدمى عديل هذه المره ,
فاء .. اديتو ليك نِعلي ..
وكدارى ,
بَس كُنت متكيِف .. كملِك ليي دوله مجاوره
: كُر كُر كُر .. يا عبدالله ورب العِزه بالغت
يعنى دايرانى اسوى شنو , الراجل يا خادم الله
الرعيه نعالو انسهكت .. يعنى فِكرِك شنو !! انبرى ليهو وأقعُد أتنَبّر
محكمه ..
: وضح الاسباب التى دعتك الى فقد جزمتِك ؟
: فى حالة الانسهاك المزعومه ,
,, بيِن الاسباب الداعيه الى السَهك وشكل المشاوير الممشيه وماهى تلك المشاوير ؟
,,واا .. كم هى الماهيه , ان وِجِدت
,,, لقد حكمت عليك المحكمه بمواصلة السير هكذا الى آخر المشوار
فاء .. الكلام قُصرو قلتَ للنُقلتى
: لو سمحت بعد تخلص انقل حيازة نعلاتى للاخ الرعيه
وكدارى عديل قُلتَ لي .. شَتَت تا .. بتبالغ يا ملك
كَدي شوف السخينه دي وادينى راَيَك !!
لاكين ياحريفه هي براها مُسخِنه , تعدي لي مائده زي دي !!
.
.
: أهااا .. ما قلت لي رايك فى السين خَاء .. شنو .. !
: السين شنو ! يعنى حتكون السي اي إين ؟
: لا رهيبه .. رهيبه شنو !!
دي مُفزِعه بي خشم الحوش , تعرفى ياخدوم
دا اختراعِك انتى ديي ..
ومن حقِك تسجليهو فى الملكيه الفكريه كمان ..
ياخ انتى حليتي ليك معادله اقتصاديه صعبه جداً بي كُمشه واحده !! معقوله ,,,
والقال ليك ما سجلتو منو !! حِكَم !
عارفِك حريفه وزايده فى البنات حرافه ورهافه وقيافه , طيبه وماك نقناقه
فاء .. تنبرى خدوم موشِكه على استلال مُذَنَب , لسلاح ابيض خفى .. من تحت مخدَة العِباره
عُ بَ دْ
: ضاحكا صوته من رقراق اللُقمه فوق السخينيه
.. لا هو بالجد .. ال مافي إلْ السخينه دي شنو؟؟
.. صحى وللا حاجه !!
لاكين كمان كُل حاجه , ونِعمَ بالله
انعِم بها من سخينه .. وكمان فى غمرَة حماسنا المُكلل بالرضى .. ان ننسى لا ننسى , صديقنا وحبيبنا
زميلنا وود كارنا
وكي بوردنا
البووش .. ياسلام عليهو راجل برَكَه
ماهو شوفى .. سخينه وبوش ديل ..
مسلطين واولاد مشاغبين للذهنيه الخلاقه .. فى شئون ادارة الاذمه الاقتصاديه
عالميه , او ثالِث عالميه كما فى حالاتنا , ذكرينى بعدين احكى ليك حاجه لذيذه ,
فى الحالتين هى الاصوب والاجدر بالتفوق
.. سخينه وبووش .. ياسلام ,,
.. الغريبه نفس فكرة الملاح والفول , لاحظتى !!
لاكين كمان ,
فيها الخُبز والكِسرَه
فلقد مرّ قومٌ وموجات كثيرات فوق جسورالتراكيب اللغويه .. فانفقشَت الجُمله
كِسرَة الخُبزِ ..
واحِده للصاج .. رعاه المولى , وأخرى للمخابِزِ ,
بكل استحداثاتها .. شرقيه كانت او غربيه وحفظها من المواد المُريبه,
شوفتى كيف !
يا حلِيلك يا صنع الله ابراهيم
: فاء ..
: انا كدي اتأكدتَ من سخينتى .. النقوم اشوف لي شغله
: خدوم
: جاهِز .. ياراجِل روق , جاييك داك يا الشاي ..
الما خَمَج
..
شوفو البِت خدوم .. تاررا تتتيراا ..
ينفلِت عُبد مغنياً وهو فى طريقه للحنفيه
صوتها ضاحِك يأتيه مِن التُكُل
: يجازى مِحَنَك ياعبدالله ..
كمان دايِر تقطع فينى غنوات !!
.
.
(((تقديري لكم وله )))
|
Post: #2
Title: Re: عبدالله الظريف وخادم الله الحريفه - خطاب حسن أحمد
Author: معاوية عبيد الصائم
Date: 07-22-2011, 12:59 PM
Parent: #1
Quote:
تجدوني فخورة وسعيدة بان اكون حلقة الوصل بينكم وبينه
حتى يعود اليه الباسورد سالماً
|
اميمة سلامات ومرحب هنا تانى
بخصوص خطاب ياخ الزول جنو يضيع
حاجتو ...مرة ضيع شنطة فى موقف بحرى
وهسى الباسورد..
المهم ربنا يسهل امرو ..ويفك اسرو ومن هنا بتاشد
بكرى يحل القصة دى....وقصة الدومين
وبسلم ع محمد مدنى صاحب خطاب
وبسلم ع خطاب ذاتو
تحياتى اميمة
|
Post: #3
Title: Re: عبدالله الظريف وخادم الله الحريفه - خطاب حسن أحمد
Author: خدر
Date: 07-22-2011, 01:36 PM
Parent: #2
| Quote: شوفو البِت خدوم .. تاررا تتتيراا .. |
جهجهتني يا كجونكا !!
دي ايقاعها كيف ؟؟
جربتها علي مليون اغنية و ايقاع ابت تلفق
فا.. إتصلح مع عزيزك القارئ ياخي 
______
عبدالله ظريف فعلا يا خطاب .. واصل عليك خدوم ياخ
|
Post: #5
Title: Re: عبدالله الظريف وخادم الله الحريفه - خطاب حسن أحمد
Author: أميمة أحمد العبيد
Date: 07-22-2011, 02:44 PM
Parent: #3
الاستاذ خدر
مرحب بيك يا فنان يا رائع
ونورته البوست
Quote:
جهجهتني يا كجونكا !!
دي ايقاعها كيف ؟؟
|
وكويس انك اتجهجته عشان خادم الله ما تلحق
شوق وشقوق وتشيل اللحن معاها كمان
(البمبي ده لون مسروق .. ابدعته فيها )
|
Post: #11
Title: Re: عبدالله الظريف وخادم الله الحريفه - خطاب حسن أحمد
Author: أميمة أحمد العبيد
Date: 07-24-2011, 10:29 PM
Parent: #3
Quote:
عبدالله ظريف فعلا يا خطاب .. واصل عليك خدوم ياخ |
|
Post: #12
Title: Re: عبدالله الظريف وخادم الله الحريفه - خطاب حسن أحمد
Author: أميمة أحمد العبيد
Date: 07-24-2011, 10:33 PM
Parent: #3
Quote:
عبدالله ظريف فعلا يا خطاب .. واصل عليك خدوم ياخ |
قال خطاب :
لكن اواصل كيف !!؟؟ وارد كيف !!؟؟ الباسورد يا باشمهندس !؟!؟
|
Post: #4
Title: Re: عبدالله الظريف وخادم الله الحريفه - خطاب حسن أحمد
Author: أميمة أحمد العبيد
Date: 07-22-2011, 02:14 PM
Parent: #2
Quote:
وبسلم ع محمد مدنى صاحب خطاب
وبسلم ع خطاب ذاتو
|
والسلام بوصولوا ليك ... لي مدني والخرطوم وامدرمان .....وأعز مكان وطني السودان
وكمان بسلم عليك...... وشكراً علي الترحيب
|
Post: #6
Title: Re: عبدالله الظريف وخادم الله الحريفه - خطاب حسن أحمد
Author: محمد مدني
Date: 07-22-2011, 04:51 PM
Parent: #4
ياكتاب
من يراك تأكل الطعام وتمشي في الأسواق
لن يخطر بباله أنك حكّاء هكذا
أهي الواحة؟ أم الراحة من اليونيمس/ يونيميد؟
شكراً أميمة..ويا سيد الحوش ألحق لينا كتّاب حسن أحمد
خدر
(تَرا لال لال لا) لقيتني كيف؟
|
Post: #7
Title: Re: عبدالله الظريف وخادم الله الحريفه - خطاب حسن أحمد
Author: أميمة أحمد العبيد
Date: 07-23-2011, 07:15 AM
Parent: #6
Quote:
..ويا سيد الحوش ألحق لينا كتّاب حسن أحمد
|
اخونا الغالي /مدني
سلامــــــــات
| Quote: (تَرا لال لال لا) لقيتني كيف؟ |
وانا لقيتك كده (لي فوق) .... زي ما حدثني صاحبك
|
Post: #8
Title: Re: عبدالله الظريف وخادم الله الحريفه - خطاب حسن أحمد
Author: nazar hussien
Date: 07-23-2011, 07:50 AM
Parent: #7
دي الموسيقي البيقولوها بالاورغ بعد النكات الفي الشرايط يا خدر...
ويجيبو بعدا ضحك ناس في سوق...
وجابوها من المصريين...
ما سمعت الشرايط الفيها...
واحد بلدياتنا قال هسي مع الفلس دا...اعمل مس كول والله مس كين...
تاررا تتتيراا
|
Post: #9
Title: Re: عبدالله الظريف وخادم الله الحريفه - خطاب حسن أحمد
Author: محمد مدني
Date: 07-24-2011, 06:03 AM
Parent: #8
هي لكن يا خادم الله
يعني عشان المطرة دقتك
ومعاك عبدالله وأبرِوَيِّس
تقومي تجهجهي لينا الحكاية؟
ويا كافي البلا !!!! لا انت ولا
عبد الله ما ترمو فيها ولا طوبة
عييب السواد.
|
Post: #10
Title: Re: عبدالله الظريف وخادم الله الحريفه - خطاب حسن أحمد
Author: أميمة أحمد العبيد
Date: 07-24-2011, 11:28 AM
Parent: #9
الاستاذ /نزار
شكراً للاطلاع والمداخلة
العزيز /مدني
Quote:
يعني عشان المطرة دقتك
ومعاك عبدالله وأبرِوَيِّس
|
معرض تشكيلي في كورنيش النيل
ومطرة تشبه الأحلام
واحد قال .... سعادة الكُبر
والتاني قال..... غنوات
والتالتة .... تفادت مُفاجات الحُفر
|
Post: #13
Title: Re: عبدالله الظريف وخادم الله الحريفه - خطاب حسن أحمد
Author: أميمة أحمد العبيد
Date: 07-26-2011, 07:36 AM
Parent: #10
ويستمر عبدالله يحكي وتستمع خادم الله بحرفنتها المعتادة
الينا بالباسورد يا باشمهندس بكري حتى يستطيع الاستاذ خطاب المتابعة
أميمة
|
Post: #14
Title: Re: عبدالله الظريف وخادم الله الحريفه - خطاب حسن أحمد
Author: محمد مدني
Date: 07-27-2011, 07:01 AM
Parent: #13
خَلِّي بالك يا أميمة خطاب لامن
كان في (الدنيا الجديدة) أكّان
عنده قصة مع سيد الحوش..لو ماكده
معقولة يا بكري كبسة زر ترسل بيها
الباسوورد تغلبك؟
إيدك معانا يا باشمهندس
ولا لازم نستعين بـ (الأصدقاء)
|
Post: #15
Title: Re: عبدالله الظريف وخادم الله الحريفه - خطاب حسن أحمد
Author: أميمة أحمد العبيد
Date: 07-29-2011, 11:31 PM
Parent: #14
Quote:
معقولة يا بكري كبسة زر ترسل بيها
الباسوورد تغلبك؟
|
عاد يا مدني انا كلام زي ده ماااااااابقدراقولو
انا جدييييييدة....والباشمهندس ما قصر معاي
|
Post: #16
Title: Re: عبدالله الظريف وخادم الله الحريفه - خطاب حسن أحمد
Author: khatab
Date: 08-07-2011, 03:43 PM
Parent: #15
اخيراً
نحن هنا .. غايتو كان المداخله دي مشت
اكون ده انا
كان كمان ما...
اقول امكن انا الماجيت
بسم الله .. يا واحد
.
.
|
|