غـايـتـو يـا نـاس سـودانـيـز اون لآيـن الـخـتـيـتـوهـا رقـدت ...

يا قول حبوبتي الختيتوها رقدت.
وفي روآية برضو بتقول:
السويتوها، الـكـلـب في الخُمارة ما سوآها...

أسد علي وفي الحروب نعامة…… ربداء تجفل من صفير الصافر,

هلا برزت إلى غزالة في الوغى….. ام كان قلبك في جناحي طائر...

عندنا في البلد وكت زول يغرق في البحر، الحِلّة كلللللها
بتمشي تقعد فوق حجرة البحر، وكان ما الجنازة مرقت
ودفنوها ما في زول بيمشي أهلو.
وهذا حالهم مع كل جميل في الحي، ومع الشينة لو صعبة.

بالله العظيم قشّة عينهم من النوم، الراجل يلفح عِمتو نصها فوق
راسو، ونصها التاني جاري بالوآطة، وعُكازو المضبب المو
خمج في إيدو وهاااك يا عووووة.
اما المرا، كف تلفح توبا نصو فوق راسها والنُص التاني جآري
بالوآطة، وسالآ لسانها زي الحربوية وهآك يا عكنيبة.

شي يحيّر الما بيحتار.
والله صحي.






طبعاً ديل ما ناس الحِلة...

الشي الوحيد الكان بيعكر صفو حِلتنا الحرامية البيتلبو
في البيوت. يا ويل الحرامي كان ناس الحِلة لمو فيهو.
يدقوهو دق العيش. بالله تاني كان زول جاب جنبو
سيرة الحِلة ساكت يتركض من راسو لكرعيهو.

هيييييييييييييييع...

في فترة من الفترات في حرامي عذّب ناس حِلتنا عذاب شديد،
ومحنُن مِحنة لا يعلمها إلا الله، بالرغم من كده ما شفنالنا زول
لملم وِليداتو وربّط حِويجاتو في بُقجة جدعها فوق كتفو وقال:
هادي طرفي من الحِلة. الحرامي شبكوهو دوريات وكم كمين
كده قبضوهو، وفجخوهو فجيخ الطماطم...

أها يا ناس سودانيز اون لآين، النسعلكم.
الناس الكانو عاملين فيها طرزانات وبينططو بي هنا
مالُم اوآت ما البيت إنضرب كل وآحد ركبلو حبل
وطشو في الغابة؟؟؟

دي اكتر فترة البورد محتاجلكم فيها. تفوتو تخلوهو!!!؟؟؟
افوووووووووووووووووووووووووو... عاد الكلآم
دا بيبقى؟؟؟

كلام سمح بالحيل يا معاوية

بالله الوآحد زمان البوست بتاعو قدُر ما يرفعوا يلقاهو
ناصل لي تحت، زي الشافع اللآبس سروال ابوهو.
اليوم البوستات أصبحت زي المفرزة في الصفحة
الأًولي!!!
جفلتو مالكم؟؟؟ ما شغالين هنا نفخ ليل نهار. لمان
المنبر بقى عليكم تتملصوا!!! خايفين من منو؟؟؟

بالله الوآحد لمان يجي يلقى العكنيبة قايمة، والعجاج رآبط في السماء:
رئيسي ورئيسك، سيدي وسيدك، حزبي وحزبك، الوطنية و ما ادرآك
ما الوطنية، يقول الناس ديل والله الوطن يبنوهو طوبة طوبة، ويقول
ديل شِعب وأوتاد توقف المنبر إلي يوم يبعثون. تاريها شِعب نخِرة!!!؟؟؟
المنبر دا بوابة الوطن الوحيدة الفاتحة تفوتو تخلوها!!!
خايفين ينبذوكم لابسي الأقنعة البهناك ديل؟. أصلهم الدايرين ينالوا منو
نالوا منو وإنتهو. بس والله كنت قايلكم المصايب لا تزيدكم غير ثبات
علي مواقفكم، لكن يا خسارة. جسارتكم علي بعضكم طلعت فسوة
عجوز سآكت...

وين ناس النخجي والليل؟؟؟
وين ناس الونسة والفرفشة؟؟؟
ارجعوا إلي قواعدكم لا يضركم من ضلّ
إذا اهتديتم.
لازم كلّ الناس ترجع حتي نعيد للمنبر سيرته
الأولى. سيبكم من الناس اللبسو الأقنعة ورضو
بالتمرغ في المستنقع الآسن البهناك، فليذهبوا
غير مأسوفاً عليهم.

الاخ معاوية اقدر لك اهتمامك بهذا الموضوع واناكان يجول بخاطري هذا السؤال ولكن اعلم جيدا ان معظم الاعضاء لا يعرفون الامتداد الجديد او الرابط الجديد وهذا تقصير الادارة والتي ايضا يمكن ايجاد العذر لها لان حساب الريس زاتو مسحوب منه ولو لاحظت تم انزال عدد من البوستات باسمه ولكن اكتشفنا اخيرا انها مضروبة ...

البورد وعنوانو لسه ما اتعرفن ده الوصلت ليهو

الأخ معاوية المدير
شعورك وإحساسك تجاه البورد ليس غريبا وتشكر عليه
وأعتقد أنه موجود لدى الغالبية العظمى من كتاب وقراء سودانيز
ووجود هذا العدد القليل من الناس هنا يؤكد أن هناك اهتمام ومتابعة
لما يحدث في المنبر ... وكل الناس الذين تمكنوا من المواصلة في الكتابة
كان ذلك بالصدفة أو عبر مواقع أخرى مثل الراكوبة أو بجهد شخصي خالص
وأظن أن الغالبية من كتاب وقراء سودانيز يقفون الآن على البوابة الرئيسية
للمنبر يحاولون الدخول كل يوم ...
لقد ظللت أنا شخصيا أبحث في قوقل لمدة ثلاثة أيام من تاريخ التهكير
ولم استطع الدخول إلا عبر رابط وضعه أحد الأخوة الأماجد في الراكوبة
وأظن أن الكثيرين حالهم من حالي
كما أن إدارة المنبر تتحمل جزء من هذا
وذلك بإصرار الأخ الكريم / بكري أبو بكر بمعافرة الهكر بطريقته الخاصة
وهذا من حقه لأنه مالك لهذا الموقع ونحن لا نملك سوى الدعم المعنوي
وسوف نظل ننافح عن هذا النفاج للحرية إن لم يكن بالكتابة فبأضعف الإيمان
ألا وهو القراءة لما يكتبه الأماجد الشرفاء من أبناء شعبي هنا

Quote: كلام سمح بالحيل يا معاوية

سلآمات، ياسر مصطفى.
يسمحن ايامك يا ياسر.
يا أخي والله شئ غريب فعلاً!!! بعض الناس كأنما بيكتبو هنا رغم أنفهم
ومنتظرين اليوم اليتخارجو فيهو بعد الضربة، وإلا لماذا العزوف وعدم الظهور
حتي الآن؟؟؟
المنبر في اشدّ الحوجة لتواجد الأعضاء في هذا الوقت العصيب.



شكراً...

Quote: الاخ معاوية اقدر لك اهتمامك بهذا الموضوع واناكان يجول بخاطري هذا السؤال ولكن اعلم جيدا ان معظم الاعضاء لا يعرفون الامتداد الجديد او الرابط الجديد وهذا تقصير الادارة والتي ايضا يمكن ايجاد العذر لها لان حساب الريس زاتو مسحوب منه ولو لاحظت تم انزال عدد من البوستات باسمه ولكن اكتشفنا اخيرا انها مضروبة ... البورد وعنوانو لسه ما اتعرفن ده الوصلت ليهو

سلآمت أخي عثمان.
حتي اليوم مضى تقريباً حوالي إسبوعين علي عملية التهكير
وما زال الإقبال ضعيف مقارنة بحال المنبر قبل التهكير.
أوافقك فيما ذهبت إليه. بس يا عثمان الملآحظ إنو ناس
سودانيز بشكلو شبكة تواصل علي جميع انحاء العالم، فالمتوقع
ان يكون الرآبط وصل لما لا يقل عن 85% من الأعضاء علي
اسواء الفروض.
إعتقد في ترقب وحذر وخوف، وكلّ هذه الثلاث تسقط تحت
حسابات موقع الأعضاء من الموقع، و موقع الموقع من الأعضاء.


تحياتي...

Quote: الأخ معاوية المدير شعورك وإحساسك تجاه البورد ليس غريبا وتشكر عليه وأعتقد أنه موجود لدى الغالبية العظمى من كتاب وقراء سودانيز ووجود هذا العدد القليل من الناس هنا يؤكد أن هناك اهتمام ومتابعة لما يحدث في المنبر ... وكل الناس الذين تمكنوا من المواصلة في الكتابة كان ذلك بالصدفة أو عبر مواقع أخرى مثل الراكوبة أو بجهد شخصي خالص وأظن أن الغالبية من كتاب وقراء سودانيز يقفون الآن على البوابة الرئيسية للمنبر يحاولون الدخول كل يوم ... لقد ظللت أنا شخصيا أبحث في قوقل لمدة ثلاثة أيام من تاريخ التهكير ولم استطع الدخول إلا عبر رابط وضعه أحد الأخوة الأماجد في الراكوبة وأظن أن الكثيرين حالهم من حالي كما أن إدارة المنبر تتحمل جزء من هذا وذلك بإصرار الأخ الكريم / بكري أبو بكر بمعافرة الهكر بطريقته الخاصة وهذا من حقه لأنه مالك لهذا الموقع ونحن لا نملك سوى الدعم المعنوي وسوف نظل ننافح عن هذا النفاج للحرية إن لم يكن بالكتابة فبأضعف الإيمان ألا وهو القراءة لما يكتبه الأماجد الشرفاء من أبناء شعبي هنا

استاذ حعفر،
ســـلآم.
ما ذكرته صحيح واوافقك عليه، وسيظل العتاب موصول للذين
تراجعوا خوفاً من هجمات الهكر.

لك خالص شكري،
وكامل مودتي...

سلامات عوافي

اخي معاوية ..


وممن يخافوا هل من الهكر ام من هو خلف الهكر ؟

فعلاً شئ يحير ..

قبل انضمامي للمنبر حين كنت اتابع احد البوستات واغيب عنه ليوم او اثنين اجده في صفحة بعيدة وهذا ما نحتاجه الان لتعكير صفو من ارادو ان يكمموا الافواه هكر ام غيرهم ..

واتمني ان يتم تعميم الرابط بالفيس بوك والتراسل الشخصي لكل من نعرفه وانقطع عن المنبر ليتمكن الجميع من الدخول في حال عدم العلم ..


ولك ودي
واحترامي

يا ودالخال في زول بخلي اهلو وجماعتو
ونقبل على وييييين؟
خسوسا وانو وليداتنا في البلد
نحن والله حايمين في المنابر التانية وشغالين تبليغ بروابط المنبر