هل نمثل فى سودانيزاونلاين جزءا من السلطه ؟. أو تداعيات المنبر المهمبت

سلام ..
مررت سريعا على المنبر المهمبت ..
وللهمبته مدلولاتها المباغته يا أصدقاء ..
تجاوزت العنف البادىء فى الاسماء الحركيه وكذلك العنف اللغوى لمحاولة الرؤيه بطريقه أكثر وضوحا ..
أكثر ما لفت انتباهى الغضب العظيم فى صدور هؤلاء تجاه السلطه ..
السلطه بمعناها الواسع ..
السلطه السياسيه ..
السلطه الاقتصاديه ..
السلطه الثقافيه ..
وهلمجرا ..
ولغاية سلطة تنميق الاكاذيب .. الكلام .. الاعلام .. الاسفير .. سودانيزاونلاين ..الكلمه البترقش ناديه فوق صدر المنابر وهكذا ..
وقفز لذهنى التساؤل ..
هل نمثل نحن كاعضاء فى سودانيزاونلاين جزءا من السلطه/الازمه ؟!!

سؤال مربك يا محمد

كل صاحب حرف يقرأ
شريكاً في خلل ما
شريكاً في إصلاح ما

نتمنى أن نكون شركاء في الإصلاح لا الخلل
وقبل ذلك
نتمنى على من يقرأ أن يعقل

تحياتي واحترامي

بله محمد الفاضل ..
سلامات وكيف الاحوال ..

نعم ..

Quote: كل صاحب حرف يقرأ شريكاً في خلل ما شريكاً في إصلاح ما

بالتأكيد يا محمد, والفكره دى بتقع للواحد لوعندو قدرة القرايه من الخارج ونحو الداخل ..
مع اننا اغلب قراياتنا من الداخل والحيز الذاتى ومن ثم نفرضها عنوة كده على العالم ..

تحياتى وكل الود ..

يا محمد حيدر ..

مع احترامي لوجهة نظرك وما تود أن تقول..

لو سمحت لي بالتداخل حول نقطة محددة قبل أن تواصل..

من تتحدث عنهم أظن أنهم فريقين..

1) أمنجية وأذيال مؤتمر وطني .. وهؤلاء لا حديث لنا عنهم

2) ومن وصفتهم بالغاضبين..

وهؤلاء بما يكتبون الآن يؤكدون صحة وجهة نظر الأخ بكري أبوبكر في عدم ترك باب التسجيل مفتوحاً.. وليس العكس

لأنهم ما كانوا ليضيفوا أي جديد للمنبر "إذا كان هذا هو أسلوبهم في الاحتجاج" هذا إن لم يساهموا في الانحدار بمستوى النقاش فيه والمواضيع التي تطرح ويسطحوها أكثر فأكثر، ويصبحوا عبئاً ثقيلاً على المنبر وعلى القراء وعلى الناس أجمعين، أنا طبعاً أعني هنا الفئة التي ظهر جزء منها هناك وليس كل الناس بإطلاق وتعميم..

وهذا لا يعني أن كل من يكتبون في سودانيز أونلاين أو حصلوا على التسجيل بطريقة أو أخرى مميزون أو إلى ما هنالك من وهمات، لكن مستوى النقاش والتفاعل في سودانيز مع ما يطرح من قضايا في أحيان كثيرة في رأي هو للحد البعيد أفضل من غيره من المواقع والمنتديات السودانية "التي رأيتها حتى الآن"

حقيقة وليس مجاملة أو نفاق.. أشعر أن الأخ بكري كان محقاً بعض الشيء في هذا الأمر..

الهادى تحياتى وكيف الحال !!

قبل الدخول فى تفاصيل كلامك المنطقى ده ..
عاوز اوضح نقطه اعتقد ان بها لبسا ..

الهكر ومن نالوا عضوية المنبر المهمبت لا يمكن ان نتعامل معهم كجهه واحده ..
فباب العضويه مفتوح للجميع بما فيهم انا وانت ..
وكان بديهيا ان يسارع من يتابعون المنبر من غير أعضاءه للتسجيل ومن ثم الاندفاع نحو تسجيل انطباعاتهم حول المنبر وحولنا كأعضاء ..
لذلك وكمدخل لمداخلتك أقول ..
لهؤلاء نكتب نحن أعضاء المنبر .. ولغيرهم بالتأكيد ولكن ومن مرورى السريع فهمت ارتباطهم الوثيق بالمنبر ..
وفى تقديري أن جل ما كتب هناك يمثل انعكاس لما كتب هنا ..
وقد ذكرت اننى حاولت اقصاء العنف والبذاءه كى اتابع ما يجرى ..
وحتى اختلاف اللغه بين هنا وهناك .. أعتبره اختلاف ظاهرى
وان شئت الدقه .. فالاختلاف ليس اختلاف كيف .. فالبذاءه هى البذاءه وان امعنوا هم فى تواصيفها الجنسيه ..

وأما خيارات بكرى فهى صحيحه فى حدود المتاح ..
فبكرى ليس وزارة سياديه كى يوفر للجميع منبرا للحديث ..
ولا هذا هو المعنى وراء البوست يا عزيزي ..

المعنى يدور حول الاثر الذى خلفناه نحن عند هؤلاء كنموذج او عينه قدر الله لنا أن نرى ردود أفعالها !!
او معنى قريب من ذلك ..

كل الود والتقدير ..

Quote: الهكر ومن نالوا عضوية المنبر المهمبت لا يمكن ان نتعامل معهم كجهه واحده .. فباب العضويه مفتوح للجميع بما فيهم انا وانت .. وكان بديهيا ان يسارع من يتابعون المنبر من غير أعضاءه للتسجيل ومن ثم الاندفاع نحو تسجيل انطباعاتهم حول المنبر وحولنا كأعضاء

بتفق معاك وأعتقد أنو دي نقطة كان من المهم توضيحها كما تفضلت..

وأعتقد أنه الهدف منها واضح وهو "تتطشيش" المسألة برمتها والتغطية عليها عشان الناس تبعد عن اتهام جهاز الأمن

نعم يا عزيزي الهادى ..
وما يغيب عن الجميع هناك .. أنهم بذلك يشاركون فى المشهد وبذات الفعل القديم ..
وأعنى السلطه لا الحريه ..
ياخى مراقبة السلوك البشرى مدهشه بشكل لا يصدق !!!


قال مريد البرغوثى ..

" وكل من زاد عن عمرنا سنه ..
خوف الجميع بابت آوى والضبع
واصفر خداه من قطة عابره ..

Quote: وأعتقد أنه الهدف منها واضح وهو "تتطشيش" المسألة برمتها والتغطية عليها عشان الناس تبعد عن اتهام جهاز الأمن

تحياتى الهادى والمشرف

Quote: هل نمثل نحن كاعضاء فى سودانيزاونلاين جزءا من السلطه/الازمه ؟!!

definitely








__________________________

إزيك يا مُشّرف...

انا غايتو بطالب "معاوية العبيد الصايم" بالإستقالة الطوعية عن هذا المنبر ...

ليس إقصاءاً لرأيه ... ولكن ...

ياخي فضحتنا مع الأجانب ... بطّل العباطة الشيوعية الرسمية البتمارس فيها دي ...

ما توصلنا لي مرحلة تكفيرك - ونحن ما عندنا دين أصلاً - والصلاة بحمد الدولة الأمنية من فرط الغيظ ...

دي ما الفرع (الله يرحم) ولا الحركة الطلابية (الله يرحم برضو)

اخدا من قاصرا واستقيل ... عشان نقدر نحفظ ليك الود والذكريات الجميلة ...

زهّجتنا ياخي ...






... المهم ...

سبحان الله !!
مشاهدتكم و انتم تكررون ممارسة نفس الإستعلائية مدهشة للغاية و جال بخاطري رواية دون كيشوت و محاربة طواحين الهواء !

الحكومة عندما تتعرض لمطبات حتى ولو كانت إهتراء شبكة المياه القديمة تقول أن هذا من فعل المعارضة
و المعارضة عندما يتهكر لها منتدى تقول أن هذا هو جهاز الأمن ..!

كأنما هذين الفريقين هما الوحيدان الذان يعيشان في السودن....

أولم يخطر ببالكم أن الشعب يكره المعارضة بنفس درجة كراهيته للحكومة ؟؟

أولم يخطر ببالكم ولو للحظة أنهم قد يكونوا محقين ؟؟ لماذا دائما تتعاملون مع الآخرين وكأنكم أوصياء عليهم !

هل جربتم الحوار مع من تتقولون عليهم بأنهم غوغاء ؟؟

كل من حاول معهم أجد ان لغتهم تتبدل و يحاورونه بالأخذ و العطاء

اللهم أفرغ علينا صبرا ..

Quote: أولم يخطر ببالكم ولو للحظة أنهم قد يكونوا محقين ؟؟ لماذا دائما تتعاملون مع الآخرين وكأنكم أوصياء عليهم !

يا زول انت حبر قوقل الشهير ولا حبر تانى

اله يهديك من حق الناس ؟؟؟

بعدين كان تكون امين وتنقل باقى الكلام من المنبر المسروق
يعنى ما لقيت غير تراجى ودينق ومعاوية عبيد ولا اجيبو ليك
انا ..هنا ..او فى بوست منفصل..


سورى يا د مشرف يا دغرى..للتخريمة الاجبارية

والله لو جبتو في بوست منفصل يكون أحسن عشان نتناقش بإستفاضة و ما نفتل بوست الراجل دة


و حبذا لو ناديت معاك تراجي و دينق ... :]

توما مشتاقين ..
تعرفى ..
لو كنت بى هناك .. وما عندى اشتراك فى سودانيزاونلاين .. كنت ركزت فى مسأله انو رديت عليك قبل اخوى وفردتى معاويه ..
ولكنت وفى كامل الاعتزاز بالاكتشاف الشخصى هتفت : ما قلت ليكم, الناس ديل جنهم جكس !!
وكلو كوم وجكس "الدردقانيه" كوم
وقيل أين
قال بامدرمان ..

ازيك و !!

معاويه يا زميل فرده ..
ويا صديقى ..

الهكر ده امنجى أمنجى .. دى ولا فى زول بغالطنى فوقها ..
وتعرف !! اخوك غالااااط .. النوع البحرق الروح داك .. تربية دار الرياضه أمدرمان
ولكن .. وبمعنى قريب
هل كنا نحن التمثيل الامثل للانسان فى السودان !!

امكن ده اقرب لمعنى ما أريد ..
تحياتى يا زميل ....

ما تشتغل بتبارك .. وهو اقرب اليك من حبل الوريد

الحبر يا عزيزى ..
انت زعلت منى ولا شنو !!

محمد طه ياخى اى زول فى الدنيا دى محترم فى حدود تجربتو الانسانيه الخاصه بيهو ..
ولا يمكن باى حال من الاحوال انو اكون محترم بتجربة فلان الفلان ..
ولو أعجب الناس جميعا ,.
ف ..
خليك طبيعى !!

ها ها ها
والله ما زعلان منك يا دكتور ولا حاجة ..

لكن الناس في المنبر هنا ماسكة ليها لبانة واحدة و قاعدين كلهم يلوكو فيها صباح مساء زي ما ناس الحكومة بيلوكو في لبانة تانية ...

ياخ اللبانة ذات نفسيها السكر بتاعة كمل و أصبحت ناقلة للجراثيم و الشعب يكره لوك اللبان ...


بس نفسي مرة كدة واحد يجي يقول لينا كلام جديد غير الحكومة و المعارضة !!!

ألذ حاجه يا الهادى انو فى أعضاء معانا لقوا المولد ده وسرحو فيهو ..
بهناك فى واحد اسمو ذو الغتاته بن دغيل ..
ما كان فى داعى يستعمل اسم حركى نهائي

يا الحبر ياخى المنبر ده ما قاعد افصلو من تفاصيلى الشخصيه ..
وانت اخ أصغر وفى مراحل التكوين الاجمل ..
ولو عصرت عليك فهو يدخل فى باب العشم ليس الا ..
وياهو كلامك ياهو كلامى فى البوست ده
مع التسليم المطلق بعدم استواء الذين يعلمون والذين لا يعلمون يا صديق ..

إليكم تناول "بشاشا البرطوش" لهذا البوست:

Quote: يبتدر كاهن بابيلون الحريف المشرف السؤال المركزي في قضية البنبر في الأراضي المهكرة --- طبعاً (ما قضية البنبر المهكر ) كما يسميها ذوي الحظوة الأسياد بمجرد الميلاد السايبري بتسلم باسورد بكري المخلوع عشوائي التوزيع الذي لا يسلم من محسوبية مشرعنة بنظام التزكية العرقي البغيض في العهد البائد الذي لم يتجرء أن يساءله حتى أفرس دهاقنة قانونيين دويلة بكري الجلولب في ظل حكم عبادة الفرد من دون أمون و العياذ بأمون أو الحقيقة ينجح الجلابي الحريف المشرف في ما فشل فيه السوقة و متوسطي الذكاء أو العاهات الأدنى من ذلك من سكان دويلة بكري و يقرر على استحياء اختراق قمقم وعيه المخزون في غياهب ذاكرتو الجينية كواحد من سلالة المخلوع بكري ليتواصل أو يحاول الفهم أو يستخرج من الحدث ظاهرة للدراسة قد تعينو في إسقاطات سياسية قد أو قد لا تصح موضوعا فيسأل محمد حيدر المشرف أهم سؤال "هل نمثل نحن كاعضاء فى سودانيزاونلاين جزءا من السلطه/الازمه ؟!!"

البشاشا الأصلي انضرب يا رقّالة .... بالانقليزي ...

(عشان تعرف موقعك من السلطة يا مشرّف)






... المهم ....

تعرف يا تبارك ..

Quote: يبتدر كاهن بابيلون

و ..

Quote: عشان تعرف موقعك من السلطة يا مشرّف

بقينا حراس للكهنوت آ تبارك ..


مشيت ليك عرس واحد قريبنا الاجازه الفاتت .. وكان فى البال انو الواحد بسهوله ممكن يستعيد أمجاد الرقص الفديم وكم حركه كده و اعجاب البنات وزى زمان ..
تعرف .. لقيت ليك روحى فارق زمن طويل جدا وفارق تفاصيل كتيره ...
وتفاجأت قليلا اذ خاطبتنى احدى قريباتنى ..
عمو محمد .. شكلك زمااان كنت رقاص


هسع عمك محمد شكلو زماان كان طليعى !!!..

سلام محمد حيدر والمتداخلين
من خلال متابعتى للمنبر المهكور ومتابعة كتابه وكتاباتهم وردودهم على بعض
بتحس انو فى اندماج وتفاهم مبالغة بين اعضاء ذاك المنبر ودة كلو كان فى فترة وجيزة
ودة الخلانى اشك انو الناس ديل اغلبهم بعرفو بعض على الطبيعة.
والله اعلم

دكتور المشرف وضيوفك الكرام .. سلام،

Quote: لهؤلاء نكتب نحن أعضاء المنبر .. ولغيرهم بالتأكيد ولكن ومن مرورى السريع فهمت ارتباطهم الوثيق بالمنبر .. وفى تقديري أن جل ما كتب هناك يمثل انعكاس لما كتب هنا ..

دي ملاحظـــة لافتة بحق ..
فمعظم الذين يكتبون هناك لديهم إلمام واسع بما كتب في هذا المنبر .. فضلاً عن معرفتهم الدقيقة بأسلوب كتابة (فلان) و(علان) ..

Quote: أو الحقيقة ينجح الجلابي الحريف المشرف في ما فشل فيه السوقة و متوسطي الذكاء أو العاهات الأدنى من ذلك من سكان دويلة بكري و يقرر على استحياء اختراق قمقم وعيه المخزون في غياهب ذاكرتو الجينية كواحد من سلالة المخلوع بكري ليتواصل أو يحاول الفهم أو يستخرج من الحدث ظاهرة للدراسة قد تعينو في إسقاطات سياسية قد أو قد لا تصح موضوعا فيسأل محمد حيدر المشرف أهم سؤال "هل نمثل نحن كاعضاء فى سودانيزاونلاين جزءا من السلطه/الازمه ؟!!"

(في مجالو) لكن يا عمو محمد

وإمعاناً في الشمار وبعيداً عن أي دراسة أو موضوعية و ذات شمار عابر

تصفحت العناوين هناك

ياخي عندهم بوست إسمو (قال ثم من) عديل كده

أمجد الزين ..
تحياتى وكيفك وكيف كيفك ..

Quote: بتحس انو فى اندماج وتفاهم مبالغة بين اعضاء ذاك المنبر ودة كلو كان فى فترة وجيزة ودة الخلانى اشك انو الناس ديل اغلبهم بعرفو بعض على الطبيعة. والله اعلم

ياهو حال السودانيين يا امجد ..
مزاج وااااحد التقول أولاد حله واااحده فى رمضان و..

شليل وين راح !؟
اكلو التمساح آ أمجد !!

شكرًا دكتور المشرف، حمدالله علي عودة المنبر وان كنا تمنينا علي بكري ان يصدر بيانا يوضح ملابسات القرصنة، وشكرا لك دكتور المشرف علي تناول القضية التي يتناولها البوست الا وهي السلطة، من وجهة نظري ان موقع سودانيز اونلاين يشكل نبض الشارع والمزاج السوداني في أدق تفاصيله، فهنا تجد المحامي التاجر والمحامي الشريف وال######## والعنصري والمثقف المهموم بقضية وطنه وتجد مولانا المنافق، والامني الذي يحصي انفاس زملاه والعنصري الذي يكره الاخر الخ، في راي هذه هي نفسيات السودان الفضل، هذا الامر مقلق لان سودانيزاونلاين في السنوات القليلة الماضية، برز بشكل قوي في تشكيل الراي العام لكن للأسف الشديد فقد بعضا من بريقه حيث سادت العنصرية والعصبية والكراهية، وذلك خصما علي الحقيقة، تطبيق اللوائح بصرامة سيعيد للمنبر والمنبرين سلطتهم الحقيقة، وعلي صاحب المنبر اعادة النظر جزريا في منح عضوية المنبر، حيث كتب احد الشباب معلقا علي عودة المنبر في حريات انه وسط وتوسل وكتب لبكري في انه يريد الانتساب لكن بكري تجاهله، ومثل هذا الشاب كثيرون، السلطة الحقيقة للمنبروالمنبريين في تطبيق اللوائح بشدة واحترامنا لبعضنا مع عاصف الشكر.

نصرالدين عثمان ..
تحياتى ..

فعلا وبعضهم حافظ تأريخ الاعضاء واسلوبهم فى الكتابه ..
وهذا بحد ذاته يقوم دليلا على التأثير الكبير للمنبر ..
وبالتأكيد يحتمل هذا التأثير قراءات كثيره ومنها ما نحن بصدده الآن ..

مودتى آ عثمان

فى مجالو وأصلى ومرطب يا توما ..

Quote: ياخي عندهم بوست إسمو (قال ثم من) عديل كده

شفتو وابتهجت ..
شفتى الكلام ده كيف !!

عمك أمحمد شكلو كده استغرق تماما فى دورة حياة الكائن الاسفيري .. ودونما بوصلات

تعرفى !!
اى دورة حياة بتكون دايما دونما بوصلات .. ودونما اتجاهات مباغته .. وفى منتهى الرتابه..
فالنهايات متواطأ عليها .. وتلك اسميتها - لو تذكرين - ثقافة الدوران
ويجب أن نتمتع بقدر هائل من السخريه لاكتشاف ذلك ..

مشتاقين

* ليست هى دورة حياة الكائن الاسفيري .. أو بالاحرى هى دورة حياة الكائن السودانى بصورة عامه
وهذا هو التعديل, ان كان له معنى !.

دكتور المشرف .. تحياتي مجدداً وشكراً على التعقيب

Quote: وهذا بحد ذاته يقوم دليلا على التأثير الكبير للمنبر .. وبالتأكيد يحتمل هذا التأثير قراءات كثيره ومنها ما نحن بصدده الآن ..

تأثير سودانيزأونلاين – وجميع منابر الرأي الحر الأخرى حتى نكون منصفين - بالقطع كبير إلى درجة قد تفوق تصور تلك المنابر نفسها ..
وأجزم بأنها ظلت وتظل بعبعاً مخيفاً لجهات اصطنعت لنفسها شأناً كبيراً دون وجه حق.. ولذا فإنها ستظل مستهدفة دائماً .. ومعرضة للتخريب والتدمير .. ولكن عبثاً يحاولون – يا لبؤسهم - فإن تلك النوافذ المشرعة سوف تخرج من رمادها أقوى كما العنقاء من جديد .. وللخاسرين الرماد ..
ولنصطحب في هذا المقام أثر ذات (الفأس) الآثم هنا:

هل تعرض موقع سودانيات للتهكير؟؟؟
هل نمثل فى سودانيزاونلاين جزءا من السلطه ؟
لذا فإنني أجيب – بثقة - بأن الإجابة نعم ..
ولكن هل السلطة قادرة على مجابهة سودانيزأونلاين وغيره بتلك الوسائل!!؟

Quote: هل نمثل فى سودانيزاونلاين جزءا من السلطه ؟

حكومة المؤتمر الوطنى المتضرر الاكبر من تهكير سودانيزاونلاين

ومصطفى محمود بهناك داقّي جرس ....

والله السلطة دي ... مرات مرات احلى من الرويحة زاتا ...












... المهم ....

المؤيدون VS المعارضون

المعارضة البائسة اليتمة بعد انفصال الجنوب هي وراء تهكير سودانيزاونلاين
إنهم (الهنود) الذين إستقدمتهم (شُعبة الجهاد الأليكتروني) لهذا الغرض !

حكومة المؤتمر الوطنى المتضرر الاكبر من تهكير سودانيزاونلاين
السلوك والالفاظ التى صدرت من الهكر يوضح حقيقة الدرك الذى وصلنا اليه

نصرالدين ..
راجع ليك بالكتابه يا عزيزي ..
والموضوع عندى فيهو كلاما كتير برسم الكتابه ..

يتفق جميع رواد المنبر الجديد في حبهم لمنبر بكري وإن أبدوا خلاف ذلك
ما يثير حفيظتهم هو عدم منحهم عضوية بكري وهي حالة حب قصوى للمنبر
ما يحدث هناك – قطعاً - هو انعكاس لما يحدث هنا
لي وجهة نظر مختلفة عن تناولهم للأعضاء هنا حيث أعتقد أنهم استفتاء حقيقي لرأي القراء في كتاب سودانيز اونلاين
فمثلاً تجدهم يتفقون بإجماع على تقديس ماما دومة وحبيب نورة وحقيقة لم أكن أعلم أن لحبيب نورا هذه الكاريزما من قبل .. أعرفه كاتباً متمكناً ولا أفوت بوستاته ولكن لم أعتقد بأنه يتربع على عرش السايبر بهذه الكيفية
تجدهم يتطلعون إلى كتابات حمور زيادة ويبجلون شوقي بدري
بالتأكيد هنالك الكثيرون ممن نالهم أسوأ التبشيع ربما بسبب فهم خاطئ لهم ولكن فلنواجه الحقيقة
هم قراء مدمنون للمنبر ووجدوا الفرصة ليعبروا عن رأيهم فيكم فتجاوزوا عن فاحش لفظهم وانظروا لذواتكم بمرآتهم فلا أحسب أن لديهم مشاكل شخصية مع أحد ويعبرون عن وجهة نظرهم بتلقائية أقرب للتهريج
ومن البديهي ألا أنبه إلى أنني لا أقصد أنهم يحددون صوابكم من خطأكم بل يشكلون رأي قارئ ما إن كنت تكتب لتُقرَأ

أحمد محمد ..
100 %
وباقى التفاصيل وشياطينها .. واصل

اتفق مع 100% الاداك ليها المشرف يا محمد عمر ودا لأنك كنت دقيق و اضفت الإستثناء اللازم دا

Quote: ما إن كنت تكتب لتُقرَأ

وأحمد ليك إنك طلّعتني - و أظن كثيرين معي - من دائرة من يكتبون لغيرهم
مشكور ابوحميد

Quote: يتفق جميع رواد المنبر الجديد في حبهم لمنبر بكري وإن أبدوا خلاف ذلك ما يثير حفيظتهم هو عدم منحهم عضوية بكري وهي حالة حب قصوى للمنبر ما يحدث هناك – قطعاً - هو انعكاس لما يحدث هنا لي وجهة نظر مختلفة عن تناولهم للأعضاء هنا حيث أعتقد أنهم استفتاء حقيقي لرأي القراء في كتاب سودانيز اونلاين فمثلاً تجدهم يتفقون بإجماع على تقديس ماما دومة وحبيب نورة وحقيقة لم أكن أعلم أن لحبيب نورا هذه الكاريزما من قبل .. أعرفه كاتباً متمكناً ولا أفوت بوستاته ولكن لم أعتقد بأنه يتربع على عرش السايبر بهذه الكيفية تجدهم يتطلعون إلى كتابات حمور زيادة ويبجلون شوقي بدري بالتأكيد هنالك الكثيرون ممن نالهم أسوأ التبشيع ربما بسبب فهم خاطئ لهم ولكن فلنواجه الحقيقة هم قراء مدمنون للمنبر ووجدوا الفرصة ليعبروا عن رأيهم فيكم فتجاوزوا عن فاحش لفظهم وانظروا لذواتكم بمرآتهم فلا أحسب أن لديهم مشاكل شخصية مع أحد ويعبرون عن وجهة نظرهم بتلقائية أقرب للتهريج ومن البديهي ألا أنبه إلى أنني لا أقصد أنهم يحددون صوابكم من خطأكم بل يشكلون رأي قارئ ما إن كنت تكتب لتُقرَأ

دا كلام زي الدهب يا محمد عمر
الموجودين هنا ليس كلهم صفوة ولكنهم ايضا عينة عشوائية
للمجتمع السوداني ، تمثله بافكاره واعراقه ودياناته وتنوعه
معيار منح العضوية ليس التميز فقط ولا شك هناك الكثيرين
الذين يستحقون الانضمام لهذا المكان ...
على بكري اختيارهم واصطيادهم ليضيفوا لهذا المكان
ديل متابعين المنبر أكتر من الاعضاء زاتو

تحياتي يا محمد حيدر المشرف

وفى المسأله !!..

إختلافى القديم مع مفردة "ادمان" التى استخدمها منصور خالد لتوصيف العلاقه بين النخبه السودانيه والفشل ..
وكنت أري أن "إستمراء الفشل" أكثر مصداقيه من ادمانه .. وفى البال ولعنا القديم بجلد الذات ..
واستمراء الفشل هو سلوك بشرى تعويضى وبديهى فى مقابل العجز عن تحقيق النجاح ..
و"استمراء" أكثر واقعيه من "ادمان" فى وصف هذا السلوك السودانوى ..

وأجزم أن ممارسة السلطه هى غاية الانسان السودانى ..
وذلك ما استطاع اليها سبيلا !!

ودالبشري ..
ياخى بالغت معاى ..
فكرة البوست الاساسيه هى اننا نكتب ليقرأنا الناس !!
ومحمد ما طلعنا من الدائره دى ..
بس ختاها قدامنا ..
هذا والله أعلم يا صديقى

ما يا ود المشرف فكرة البوست الاساسية دي فيها افتراض و تعميم
وواقفة لي القصة دي في حلقي من بداية البوست وحمدت الله اللقيت مدخل من استثناء محمد عمر الختاه
عشان اوصل ليك الفكرة دي
يعني انا مثلا تسعين في المية من كتابتي هنا عبارة عن مكاكاة وشمشرة و الباقي مناقرة لي تنظير
تفتكر بكون بكتب ليقرأني الناس
واظن يوجد غيري ايضا بنفس الحال

وفى المداخله أعلاه - ان كان الترتيب صحيحا - مدخلا لمداخلة الاخ العزيز "الدقم" ..

ود البشرى ..
عليك الله ما تزعل منى لكن ..
الكتابه للمتعه الذاتيه مكانها ما منبر عام ..

مع ملاحظة أن " المكاواة " أسلوب لايصال الفكره للناس !!

ما في زعل يا ود المشرف لاسمح الله
وكان قعدنا نفنط ما يصلح للمنابر العامة صدقني كتابات كتيرة ح تقعد في السهلة - دا اذا قدرنا نتفق على معيار واحد اصلا
و بعدين بقول ليك بناقر في تنظير يعني ح اناقره وين ما ياهو محل لقيتو كاتب

المشرف والبشاري .. شكري وتحياتي

عزيزي ود البشرى

Quote: وأحمد ليك إنك طلّعتني - و أظن كثيرين معي - من دائرة من يكتبون لغيرهم

أن تكتب يعني أن تُقرَأ رضيت أم أبيت
أنت لا تكتب في دفتر مذكرات شخصية محبوس بدرج مكتبتك
أنت تكتب في سودانيز اونلاين الموقع الأكثر قراءة في السودان
عدم اهتمامك برأي القارئ لن يعصمك من رأيه .. سيواجهك رأيه يوماً ما وربما سيسوءك ذلك وتعتبره جبناً
ولكن حتى اعتبار الجبن هو رأي في وجهة نظر القارئ وتكون بذلك وقعت دونما قصد في دائرة الاهتمام برأي القارئ

ما مشكلة يا محمد ليكن للقارئ رأي دا شانه
مشيك في الشارع دا قد يكون للمارة و النظارة رأي فيه
لكن لو طلعت مسرح و دعيت النظارة لمشاهدتك و انت بتقدم في شو حينها عليك ان تحفل برأيهم
اها الكتابة الطلع للسيد عزيزي القارئ راي فيها دي انا ما دعيته لقراءتها وبالطبع ما فرضتها عليه
فرأيه - كان سلبي ولا إيجابي - لا يهمني ولا يعنيني في شيئ
اما حتة الجبن دي فهي لمن يتخفى وراء اسم مستعار ليوصل رأيه - أو للدقة ليسيء و يشتم - في شيئ لا يعنيه ولمن لا يعنيه

سلام يا مشرف

والله البوست دا جميل وفيه طرح كويس

اتمنى أنو تواصلوا في فكرته بخصوص الكتابة لمن؟

بدون الاستناد على فكرة أنو منبر الهكر هو الموجه ليهو أو هو المعيار لما هو موجود هنا

لأنو ببساطة انتوا هسة بنيتو كلامكم دا على عدد الناس البكتبوا هناك

بس هل العدد الهناك دي حقيقي؟

بمعنى أنو هل كل نيك نيم بمثل شخص منفصل

انا اعتقد انو الحملة على ناس المنبر دا الناس القايمين بيها قد لا يتجاوزوا الـ 20-25 شخص حقيقي

وممكن 60 % من ديل يكونو أعضاء هنا ، يعني ممكن زول يسوق ليهو بوست لوحدو بـ 100 مداخلة

لانو لو عايز في اليوم تسجل بـ 20 اسم ممكن ما عليك إلا تغير الايميل بتاعك

حسب ما يبدو واضحا

شكرا يا حمد ..

وفى مداخلات محمود الدقم ونصرالدين بالاضافه للبشارى وودالبشرى وأحمد القليل المفيد وبرسم الافاضه..
والكلام ياهو فى الاتجاه الصاح ..

وودالبشري يدفع عنه وعنا فكره "السلطويه" وذلك باعتبارها محتومه بالتمدد فى الاخرين ..
وبمعنى آخر ..
بدون من تمارس عليهم السلطه تنتفى هذه السلطه ..

نواصل يا عزيزي ..
كيفك وكيفك آ زول !!

كتب الأخ أمجد الزين
(من خلال متابعتى للمنبر المهكور ومتابعة كتابه وكتاباتهم وردودهم على بعض بتحس انو فى اندماج وتفاهم مبالغة بين اعضاء ذاك المنبر
ودة كلو كان فى فترة وجيزة ودة الخلانى اشك انو الناس ديل اغلبهم بعرفو بعض على الطبيعة. والله اعلم)

فرد صديقي محمد المشرّف
(ياهو حال السودانيين يا امجد .. مزاج وااااحد التقول أولاد حله واااحده فى رمضان)

وكتب الأخ نصر الدين عثمان
(معظم الذين يكتبون هناك لديهم إلمام واسع بما كتب في هذا المنبر .. فضلاً عن معرفتهم الدقيقة بأسلوب كتابة (فلان) و(علان) ..)

فرد المشرّف
(فعلا وبعضهم حافظ تأريخ الاعضاء واسلوبهم فى الكتابه .. وهذا بحد ذاته يقوم دليلا على التأثير الكبير للمنبر ..
وبالتأكيد يحتمل هذا التأثير قراءات كثيره ومنها ما نحن بصدده الآن ..)

ثم كتب نصر الدين إضافة (أو توضيحا) لمداخلته الأولى وسأتجاهلها هنا قصدا

وتداخل الأخ أحمد محمد عمر فقال
(يتفق جميع رواد المنبر الجديد في حبهم لمنبر بكري وإن أبدوا خلاف ذلك ما يثير حفيظتهم هو عدم منحهم عضوية بكري وهي حالة حب قصوى للمنبر..)
إلى آخر المداخلة

وهنا وافقه ود المشرّف بالقول: 100%

سؤالي بعد الكلام دا كلو
هل عرفنا ماهية هؤلاء المهكرين؟ لأن ذلك أساسي في مناقشة سؤال البوست، بل أساسي في منطقية طرح السؤال أصلا.
هناك تلميحات في مداخلات أمجد ونصر الدين يجب الانتباه إليها. وهناك حكم (برئ) من الأخ أحمد يندرج تحت "من الحب ما يقتل"
من هم هؤلاء الناس يا مشرّف؟
ما هو حجم تأثير سودانيز على أرض الواقع في السودان (الأحداث والناس) حتى يثير كل هذا القدر من الغل والغضب والضغائن ووو... الخ ؟
بالجد يا مشرف من يقرأ سودانيز اونلاين في السودان غير (بعض) الأعضاء، والذين يصدف وجودهم جنبهم؟
أظن أن ما جاء في المنبر المهكر لا علاقة له بحجم التأثير (إذا وجد، وهو باهت في كل الأحوال حسب تجربتي الشخصية)
ولا بعدد القراء (الذي في رأيي لا يتجاوز العشرات)، وبالتأكيد لا علاقة له بحب المنبر.
أخشى يا صديقي المشرّف أننا نبني نقاشنا هنا على افتراضات خاطئة كما قال الأخ حمد

معاوبه الزبير يا صديقى ..
كيفك وكيف كيفك آ زول ..

مالك قمت علينا بنمره خمسه طوالى كده !!
اولا المسأله الاساسيه تتمحور فى النظر لحالنا كجزء من تفاصيل الفشل الوطنى ..
وذكرت تعبير استمراء الفشل بديلا عن ادمانه!
وذلك - والبوست - يدخل - نوعا ما - فى باب الذم .. او هو النقد لشخصية المثقف السودانى
فالتأثير المعنى هنا هو فى محصلاته النهائيه .. تأثير سالب
وله ايجابياته الديالكتيكيه فى اطار الحركه داخل الحذاء ليس الا

المهم يا صديقى ..
تهمة توهم الخطوره الثقافيه والاعلاميه تظل قائمه !!

تحياتى ومشتاقين آ معاويه

بالله أنا قايم بي نمرة خمسة يا مشرّف، معليش ما مقصودة

يمكن دا من التوتر الحاصل اليومين دي:
الانفصال بتداعياته والتهكير وما خلّفه من جروح
وأخيرا (رمضان الجاي دا).

فعلا النقطة (وليس التهمة) يا صديقي هي الاعتقاد بأن
سودانيز أونلاين مُتابع في السودان لدرجة إنو يخلق غلا وغضبا وثورة قدر دا
تنتج حملة دفتردارية كهذه لم تبق ولم تذر

ياخ صديقنا بكري عباس ليهو أسبوعين بفتش لي بورداب الخرطوم (زيمسيلفز) عبر المنبر
أظنو لاقى اتنين ولّا تلاتة بس (خليهو يرجع ونسألوا)
أو نحتكم إلى الأخت نجلاء سيد أحمد لإبانة تأثير البورد في السودان خلال 10 سنوات
أعتقد أنها الأقدر على الإجابة (كونها حلقة وصل بين الواقع والظن الحسن)

يا صديقي ود المشرّف ما يكتب في المنبر المهكور لا علاقة له بما نناقشه في هذا البوست

أما من هم فلا أدعي أي معرفة بذلك حتى الآن

أعتقد مفتاح المعرفة في يد بكري
-------------------------------

ورغم مداخلاتي هذه وردا على سؤالك:
(هل نمثل نحن كأعضاء فى سودانيزاونلاين جزءا من السلطه/الازمه ؟!!)

أقول نعم، ولكن هؤلاء ليسوا الشعب

فـ.. خلينا نبحث أزمتنا كسلطة في مبحث آخر.

مشكلتي يا مشرف كل الاتهامات التي كيلت لهؤلاء ما أقنعتني 100%

ودايما يجئ في بالي قصة ثوار ليبيا وسوريا.

بَس.

إن شاء الله أكون هدنت شوية

Quote: هم قراء مدمنون للمنبر ووجدوا الفرصة ليعبروا عن رأيهم فيكم فتجاوزوا عن فاحش لفظهم وانظروا لذواتكم بمرآتهم فلا أحسب أن لديهم مشاكل شخصية مع أحد ويعبرون عن وجهة نظرهم بتلقائية أقرب للتهريج ومن البديهي ألا أنبه إلى أنني لا أقصد أنهم يحددون صوابكم من خطأكم بل يشكلون رأي قارئ ما إن كنت تكتب لتُقرَأ

أجدني اتفق أيضاً مع ما ذهب إليه الأخ أحمد محمد عمر في مداخلته بعاليه ..
ولكن هل هناك محل للتشكيك في أن الأمر برمته قد يكون مفتعلاً!!؟
وأن كل هؤلاء الذي كتبوا في المنبر المهمبت ليسوا كثرة وإنما قلة!!؟
(فإذا صح عزم الهكر فإن الواحد يكون بمائة ...)
ليس هناك ثمة شيء مؤكد!! فالأسماء التي يحملونها معظمها كرتونية.. بل وموغلة في حركيتها حد التهريج أيضاً..
فميلاد المنتدى لم يكن شرعياً ابتداء .. فقد جاء من صلب التهكير..
هل من الممكن أن تكون شخصيات مثل (الحلاق) و(اللغم) و(رحيتني في كنكوجي) و.. و.. كلها أرجوزات تتحرك يمسك بخيوطها شخص واحد!؟
وأن المسألة كلها مسرحية مطبوخة سلفاً .. تنحصر حبكتها حول صعوبة عضوية المنبر الأصلي وعدم الرضا من تناول بعض الموضوعات فيه .. والإعجاب بفلان والامتعاض من علان ............

ومن ثم فإن ما طرحه الأخ (معاوية الزبير) في ختام تلخيصه الموجز .. يظل هو السؤال الأهم

Quote: سؤالي بعد الكلام دا كلو هل عرفنا ماهية هؤلاء المهكرين؟ لأن ذلك أساسي في مناقشة سؤال البوست، بل أساسي في منطقية طرح السؤال أصلا.

نصرالدين عثمان سلامات ..

إقتبست عن أحمد

Quote: وانظروا لذواتكم بمرآتهم

وكنت قد اتفقت انا مع ذلك تماما ..
ولكن دعنى أختلف قليلا معك وصديقى معاويه فى مدى أهمية معرفة طبيعة المرآة التى ننظر من خلالها لذواتنا ...
فهؤلاء ليسوا هم من قاموا بتهكير الموقع ..
نعم, هم باركوا هذه الخطوه واحتفوا بها ايما احتفاء ..
واستغلوا الفسحه التى أتاحها لهم "الهكر"
ويبقى السؤال عمن هم بالتحديد .. له اجابه واضحه جدا من خلال كتاباتهم التى تمثلهم تماما ..
هم ما كتبوه وكلا فى حدود ما كتبه ..
تمثيل صادق لشرائح اجتماعيه كأى عينه عشوائيه تتخذ لاى دراسه ..
فى الواقع ال ALLOCATION بتاعهم تشتهيه اى دراسه علميه ..
لذلك لا اتطلع - ولن أنصرف نحو - اى تصنيف معلب لهم لا يخدم عملية النقد الذاتى الذى نحاول جميعا القيام به هنا ..

ما الذى فشلنا فيه تحديدا نحن تجاه الوطن وتجاه هؤلاء من خلال المنبر وفى حدود تأثيره محدودا كان او عظيم ..
وحتى ما النجاحات التى حققناها كمجموع او مؤسسه اعلاميه تخاطب الرأى العام السودانى ..
ما الوعى الذى ملكناه للناس ..
ما مدى التجهيل الذى مارسناه تجاه قضايانا الوطنيه ..

وفى البال يا عزيزي ..
الاستقطاب الجهوى والاثنى وتكييف القضايا الوطنيه انطلاقا من مفاهيم قبليه ورجعيه ضيقة الرؤي وكارثية المآلات
الامر الذى حاز اهتمامات هؤلاء اكثر من غيره ..
انظر تناولهم المتطرف والمرفوض لبشاشا, تراجى وعلاء الدين
بالاضافه لعدد من النقاط الاقل أهميه

تحياتى للجميع ..
وسأبدأ فى تناول مداخلة محمود الدقم ..
ومتابعة كل ما تناوله الاصدقاء هنا ..

اخى وعزيزى محمود الدقم ..
سلامات وكيفك وكيف كيفك .. انشاء الله تمام آ محمود

Quote: حمدالله علي عودة المنبر وان كنا تمنينا علي بكري ان يصدر بيانا يوضح ملابسات القرصنة، وشكرا لك دكتور المشرف علي تناول القضية التي يتناولها البوست الا وهي السلطة، من وجهة نظري ان موقع سودانيز اونلاين يشكل نبض الشارع والمزاج السوداني في أدق تفاصيله، فهنا تجد المحامي التاجر والمحامي الشريف وال######## والعنصري والمثقف المهموم بقضية وطنه وتجد مولانا المنافق، والامني الذي يحصي انفاس زملاه والعنصري الذي يكره الاخر الخ، في راي هذه هي نفسيات السودان الفضل، هذا الامر مقلق لان سودانيزاونلاين في السنوات القليلة الماضية، برز بشكل قوي في تشكيل الراي العام لكن للأسف الشديد فقد بعضا من بريقه حيث سادت العنصرية والعصبية والكراهية، وذلك خصما علي الحقيقة، تطبيق اللوائح بصرامة سيعيد للمنبر والمنبرين سلطتهم الحقيقة، وعلي صاحب المنبر اعادة النظر جزريا في منح عضوية المنبر، حيث كتب احد الشباب معلقا علي عودة المنبر في حريات انه وسط وتوسل وكتب لبكري في انه يريد الانتساب لكن بكري تجاهله، ومثل هذا الشاب كثيرون، السلطة الحقيقة للمنبروالمنبريين في تطبيق اللوائح بشدة واحترامنا لبعضنا مع عاصف الشكر.

النقطه الاولى اننا جميعا كنا ننتظر من ادارة المنبر مخاطبتنا بصوره رسميه وتوضيح الملابسات والمآلات ..
وكان ذلك سيدخل فى باب احترام الاعضاء وايلائهم الاهتمام الذى يليق

النقطه الثانيه تدور حول معنى البريق المفقود ..
وأخشى يا عزيزى أن المنبر أصبح أكثر لمعانا وبريقا كاذبا بسبب ذاك الاسفاف العنصرى والرجعى القبلى الممارس ..
وهذا أكثر ازعاجا .. أن تبقى مشعا بالمسالب
وأن تمتد فى الناس وعيا ناقصا وأن تسوقهم نحو القبليه والعنصريه الخبيثه ..

النقطه الثالثه أعتقد أن اعادة النظر فى اللوائح - لا تطبيقها- وفلسفتها هى اوجب واجبات المرحله ..
للخواء الشديد الذى يعترى جوهر هذه اللوائح
وهى فى نهاية الامر اجتهاد شخصى لمالك المنبر من ناحيه..
ومن ناحيه أخرى هذه اللوائح لا ولن ترتقى ابدا كتعبير اخلاقى او لمستوى منظومه اخلاقيه جاده ومحكمه تنظم وتحكم مؤسسه اعلاميه تعنى بالوطن والادب والفكر والمزاج العام السودانى ..

تحياتى وياريت تواصل

دكتور محمد حيدر وضيوفك .. سلام،
كتبت:

Quote: فهؤلاء ليسوا هم من قاموا بتهكير الموقع .. نعم, هم باركوا هذه الخطوه واحتفوا بها ايما احتفاء .. واستغلوا الفسحه التى أتاحها لهم "الهكر"

أوافقك جزئياً .. فليس من هكروا هم الذين يكتبون هناك الآن.. ربما هناك إمكانية لاستخدام (إلا) .. خاصة أن تهكير هذه المرة كان غريباً! ..هل يمكن أن نطلق عليه (الهكر الظريف) على نسق (اللص الظريف) أرسين لوبين .. هل هو (زاهد) مثله!؟ هل هو الذي قام بتصميم المنتدى الآخر وعند اكتمال تجهيزه قام بربطه بـالدومين (المسروق) ثم سلم المفاتيح ومضى في طريقه!؟ بالتأكيد هناك مجموعة استغلت الفرصة ولكن هناك احتمال آخر بأن هناك مجموعة أخرى هي التي صنعت الفرصة نفسها!

Quote: ويبقى السؤال عمن هم بالتحديد .. له اجابه واضحه جدا من خلال كتاباتهم التى تمثلهم تماما .. هم ما كتبوه وكلا فى حدود ما كتبه .. تمثيل صادق لشرائح اجتماعيه كأى عينه عشوائيه تتخذ لاى دراسه .. فى الواقع ال ALLOCATION بتاعهم تشتهيه اى دراسه علميه ..

يبقى ثمة احتمال آخر .. أشرت إليه في مداخلتي السابقة بأنه لا يمكن الاطمئنان إلى توافر شروط تلك العينة من الكتابات لاستخلاص نتائج معينة .. وأن تلك الشخصيات قد تكون مختلقة من أشخاص أقل .. ثم أنها تحلق في عالم اسفيري (مسلوب) .. صحيح أن هناك آخرين يعبرون عن نفسهم ولكن كم نسبتهم!؟ هل جاءت تلك الآراء بعفوية أم أن هناك شبهة في التوجيه بقصد إيصال رسائل معينة!؟

تمام يا نصرالدين ..

وواضح جدا انى ما كان ينبغى لاكتب بالقطعيه أعلاه وحتى أخلص لنتيجه أكثر علميه مما توصلت إليه حول جدوى وصلاحية العينه ..
"الجمله أعلاه غير مرتبه"
ولكن الفكره الاساسيه أنه وبغض النظر عن صلاحية العينه العشواء تلك ..
هى فرصه للتطلع صوب ذواتنا ..
انا واحد من الناس مستغرق تماما فى سودانيزاونلاين كبديل عن عجزى الفاخر فى الاستغراق الفاعل فى تفاصيل الوطن ..
وتصالحت نوعا ما مع هذا العجز بوسيله تعويضيه تتمثل فى مشاركاتى فى هذا المنبر ..
وهكذا توطأت مع الهزيمه وتعايشت معها
وكأن الوطن شهوة يمكن اشباعها بالتدليس والمراوغه ..
وأجزم ان حالى أكثر اتساقا ممن يفترضون فى سقوطهم بطولات زائفه..
وفى تدليسهم وعيا معيبا ..
لا يعمل الا كوقود للازمه الوطنيه
فطفقوا فى هزيمتهم الذاتيه يبنون مجدا للخراب الوطنى
والسقوط الوطنى
والعهر الوطنى ..
وها انت تفتح علينا طاقة لا قبل لنا بها ..
ولن ننتهى منها
وها هى .. سيره وانفتحت !!
وأوجاع مضافه للرصيد الوطنى ..
شكرا نصرالدين ..
وشكرا -مرة أخرى- اذ نستقيم وراء الفكره المحوريه للبوست, وعبرك ومن خلال المداخلات الذكيه

إذن ..
وفى مسألة الوعى ..
ما الدور المناط بمنبر إعلامى فى محيط الواقع السودانى الراهن !؟
ادارة منلوجات ذاتيه لتكريس الازمه ..
ام تقديم قراءات أكثر ابداعا نحو مستقبل يحتمل الوضاءه ؟!

Quote: هى فرصه للتطلع صوب ذواتنا .. انا واحد من الناس مستغرق تماما فى سودانيزاونلاين كبديل عن عجزى الفاخر فى الاستغراق الفاعل فى تفاصيل الوطن .. وتصالحت نوعا ما مع هذا العجز بوسيله تعويضيه تتمثل فى مشاركاتى فى هذا المنبر .. وهكذا توطأت مع الهزيمه وتعايشت معها وكأن الوطن شهوة يمكن اشباعها بالتدليس والمراوغه ..

كشف هائل حد التصوف ..عيني عليك دكتور ..

Quote: إذن .. وفى مسألة الوعى .. ما الدور المناط بمنبر إعلامى فى محيط الواقع السودانى الراهن !؟ ادارة منلوجات ذاتيه لتكريس الازمه .. ام تقديم قراءات أكثر ابداعا نحو مستقبل يحتمل الوضاءه ؟!

دكتور المشرف .. الكلام الجميل ده خلاني اتذكر أنني مرة - في غمرة حماس البدايات وأنا غر - قد تقدمت بالاقتراح التالي:

Quote: واعتقد أن منبر سودانيزأونلاين بتنوعاته المختلفة يمثل صورة مصغرة من (السودان) .. ومن الطبيعي أن تتباين الأفكار والنزعات والاهتمامات والقدرات و .. وهي في رأي نقاط القوة التي يستمد منها المنبر حيويته وحراكه ... وادعي أيضاً بأن هذا المنبر يصلح – بحق – لأن يقدم للباحثين والمفكرين والسياسيين .. عينة ممتازة لإجراء أية استبيانات لمعرفة اتجاهات الرأي في السودان .. والتي تفيد كثيراً في وضع الحلول لمشكلاتنا الكثيرة التعقيد .. وهي سانحة لتقديم اقتراح للأخ بكري لوضع خاصية إجراء الاستبيانات في المنبر.. وهي دعوة لإثراء هذا الأمر بالنقاش

إلا أن هذا الاقتراح لم يلقَ قبولاً أو حماس كافيين .. ورغم ذلك ما زلت أرى بأن هذه الخاصية يمكن أن تعطي ثمار عظيمة تدفعنا خطوات كبيرة في سبيل تحقيق هذا المطلب الهام
تجد رابط الموضوع هنا: (سودانيزأونلاين .. كل الصيد في جوف الفرا)
http://sudanvoice.com/cgi-bin/sdb/2bb.cgi?seq...12&func=threadedview
.......
بالمناسبة عانيت من صعوبات كبيرة في سبيل الحصول على هذا الرابط

Quote: كشف هائل حد التصوف ..

لا والله يا نصرالدين ..
كل الحاصل انو امبارح كانت الجمعه وسمعت مدحه مدحتين لشيخنا السمانى أحمد عالم !!..


المهم يا عزيزى أعلاه هو ما وددت قوله بالتحديد فى هذا البوست ..
ولنواصل ..

ود المشرف شايفك ياخي احسنت الظن بسودانيزاونلاين ودورها وتاثيرهاومش عارف ايه
كما اسرفت في احسان ظنك بكتاب البورد المهكر وقرأت سفالتهم على انها نقد
اديك اقتراح ولسائر من يكتب ليُقرأ
كان في حركة بعملها اخونا حيدر حسن ميرغني - حياه الغمام - كل كم ربع كدا بفتح بوست لقراء البورد يدلو بآرائهم في البورد و كتاباته وكتابه
اهو الحركة دي كانت بتتيح للقراء - و الأعضاء أيضا بالمناسبة - نقد البورد وكتابه وقول ارائهم بحرية
على الاقل ليست في بورد مسروق اسم دومينه واكيد صاحب الإيميل ح يسنسر السفاهة المزعجة وينقل الزبدة المفيدة للذي يكتب ليُقرأ

الاخ المشرف

تحايا

Quote: انا واحد من الناس مستغرق تماما فى سودانيزاونلاين كبديل عن عجزى الفاخر فى الاستغراق الفاعل فى تفاصيل الوطن .. وتصالحت نوعا ما مع هذا العجز بوسيله تعويضيه تتمثل فى مشاركاتى فى هذا المنبر .. وهكذا توطأت مع الهزيمه وتعايشت معها وكأن الوطن شهوة يمكن اشباعها بالتدليس والمراوغه .. وأجزم ان حالى أكثر اتساقا ممن يفترضون فى سقوطهم بطولات زائفه.. وفى تدليسهم وعيا معيبا .. لا يعمل الا كوقود للازمه الوطنيه فطفقوا فى هزيمتهم الذاتيه يبنون مجدا للخراب الوطنى والسقوط الوطنى والعهر الوطنى ..

انت هنا لامست الوجع

وأنا بفترض إنو نقطة البداية للتصحيح هي رفض الظلم بصورة مطلقة

الظلم أي كانت وجهته ومصدره ومسبباته وأشكاله

ليس بالضرورة أن يقع على من نحب أو من نتفق معه حتى نرفضه

لو تشبعنا بقيمة رفض الظلم على أي من كان بدون تصنيف سوف تذوب كافة خلافاتنا

وسوف نلتفت لبناء وطن يسوده العدل ونشعر فيه بقيمتنا

حمد عبدالغفار سلامات ..

وأشد أنواع الظلم فى تقديري هو المنهج الآحادى والإقصائي ..
وبالتأكيد نرفض الظلم بكل أشكاله ..
ولكن لا يمكن أن نساوى بين الخطأ الانسانى البسيط والخطأ الممنهج الممارس على مستويات الدوله مثلا ..

هذا المدخل مهم جدا فى فهم الحركه داخل هذا المجال "سودانيزاونلاين" .. وفى تقييمها ونقدها نقدا ذاتيا او موضوعيا
وخذ مثلا مدخلى نحو فهم مكنيزمات الاصطفاف العرقى ..
فالمنهج الثقافى والسياسي والفكرى والدينى والاقتصادى والعسكرى والامنى للدوله السودانيه هو المحرك الاساسي للحدث ..
وهو ما حرك الادوات -وأعنى أدواته- لصناعة المأساة الدارفوريه مثلا ..
ولذلك لا يمكن وضع "ردالفعل الدارفورى المتطرف والقوى" من قبل "أبناء دارفور ومثقفيها"
فى كفة ميزان معادله لمنهج الدوله الممارس ..
والقياس يمكن اتباعه فى تقدير أخطاء المعارضه السودانيه ووضعها ازاء ممارسات الدوله فى السودان..
والكلام هنا للرماديين ناس ودالصائم ومن لف لفهم ..
لينسحب ذات المنهج وأخيرا فى تقدير الخطأ الشخصى/الفردى والظلم الناتج عنه لعضو واحد فى المنبر ..

ما أود أن أقوله ..
نتفق جميعا على رفض الظلم ..
ولكن لنتفق كذلك فى تقديره وتقدير آثاره وبصوره عقلانيه ودونما مزايدات ..


تحياتى وشكرا يا حمد ..

ودالبشرى تحياتى ..

ونعم يا عزيزى ..
فكرتى الاساسيه قائمه على الاعتقاد -لا حسن الظن فقط - بالمنبر وجدوى الكتابه فيه على المستوى الشخصى والعام
وبدون هذا الاعتقاد "لن أجر حرفا فى هذا المنبر"
هذا من ناحيه ..
ومن ناحيه أخرى ..
أفهم اعتراضك البديهى على السرقه والتهكير ..
وعلى التعامل مع منبر مسروق ..
وعلى تلك اللغه و المعانى السافله ..

ولكنى أختلف معك فى جدوى وأهمية فهم تلك اللغه, تلك السفاله, وذلك التهكير
وهل يمكن أن نتعامل معها وكأنها لم تكن !!
او ننصرف عنها وبمنتهى الامتعاض ونحن نتمتم " ياااا للسفاله"
ثم ومن باب الاطمئنان على نزاهتنا نفتح صندوقا عند باب المنبر لتلقى الاقتراحات والتعليقات والشكاوى على ما نكتب ..
وحتى يتم ذلك بصوره تحافظ على الذوق العام والمزاج والاخلاق التى ندعيها!!

لا ..
لا أعتقد ذلك يا عزيزي ..
ولا أعتقد اننا سنلتقى فى النقاش لاختلاف المبدأ الاساسي هنا ..
وهو أهمية وجدوى الكتابه فى المنبر العام لسودانيزاونلاين ..
اللهم الا ان نلتقى فيس تو فيس ..
عشان تعرف اخوك "غالاط" كيف

ود المشرف حباب الغلاط معاك ابوي مهما كان اكيد الواحد ح يطلع بحاجة مفيدة
مسألة جدوى الكتابة في سوداني ليست هي موضوع الخلاف هنا
فهي في النهاية نسبية و تخضع لتقديرات شخصية تتباين من واحد للتاني ودا شي طبيعي
لكن الاختلاف حول ما يدور في المنبر المسروق - تيكنيكالي هو ليس مسروقا الآن فدومين الدوت كوم ما بودي ليه -
تعرف يا دكتور من الجزء دا من مداخلتك

Quote: ولكنى أختلف معك فى جدوى وأهمية فهم تلك اللغه, تلك السفاله, وذلك التهكير وهل يمكن أن نتعامل معها وكأنها لم تكن !! او ننصرف عنها وبمنتهى الامتعاض ونحن نتمتم " ياااا للسفاله" ثم ومن باب الاطمئنان على نزاهتنا نفتح صندوقا عند باب المنبر لتلقى الاقتراحات والتعليقات والشكاوى على ما نكتب .. وحتى يتم ذلك بصوره تحافظ على الذوق العام والمزاج والاخلاق التى ندعيها!!

انا شكيت انك ما خشيت هناك او قريت الشي الانكتب او الشي الانكتب واتمسح
وفعلا اتذكرت انك في بداية البوست كتبت انك مررت سريعا
اها مرورك السريع دا شكلو ما اداك فكرة عن الحاصل
القصة يا ود المشرف ما فقط مجرد لغة بذيئة بقليل من الصبر وطولة بال يمكن الغوص داخلها و الخروج بشيئ مفيد
ما عايز انقل الحاصل هنا لكن - وكلي اسف - بقول ليك امشي اقرا هناك الحاصل شنو
فرق بين النقد و النبز لمجرد النبز و تصفية حسابات جبن اصحابها عن تصفيتها باسمائهم الحقيقية او على الاقل المعروفة للآخرين
غايتو اقول ليك شنو يا دكتور غير امشي واقرا غالبا ح تغير رايك

اها يا دكتور.. يوّد*
الهكر واستعماله لاسمي للاساءه
دا الحال هناك كلو زي دا
ماها قصة "اخلاق مدعاة" بقدر ما هي فطرة سليمة تنفر من العوج الخبيث المغتغت و تميل للطيب الواضح العديل
____________________

* يوّد دي امسك بلهجة الكفيل

ود البشري ..

تعرف !!
فى نقطه مهمه فى كلامك .. وكأنك تشير إلى أن أصحاب تلك الحسابات فى أغلبهم أعضاء فى المنبر هنا, وقد إنتهزوا السانحه التى توفرت لتصفية حسابات قديمه و آنيه مع بعض الزملاء هنا تحت جنح التهكير !..

حسنا !!
لم يخطر ذلك ببالى يا صديقى ..
لم يخطر ذلك ببالى !!


الخوف انو الواحد يكون بقى "فاره داقس" فى آخر عمرو
الامر الاقرب للحقيقه ..

انا أنتمى لهذا المنبر ..
ولن أتعالى يوما عليه .. أو أتناسي أن المنبر كان معبري للعديدين ولأشياء جميله ..
فأنا لست كاتبا أومفكرا أو اديبا أو سياسيا محترفا ..
مجرد مواطن سودانى مغترب فى الخليج ..
لا مال ولا سطوه ثقافيه ولا عز سياسي ..
والسياسه كما تعلمون عز وسطوه ووراثه .. وتماما كما المال والثقافه المبهرجه
مجرد زول من أمدرمان ..
أتاح لى هذا المنبر العبور نحو آخرين ما كنت أحلم بلقائهم ..
أدباء ومهنيون وناس عاديون جدا وناس ساى وسكرجيه وكورنجيه وصعاليك بى فهم وصعاليك دونما فهم وعيييك ..
ولكل تجربه حياتيه جديره بالاحتفاء ..
وحتى اؤلئك الواقعون فى غيبوبة الدين وغيرهم عدا اللصوص والقتله ..
هم جديرون بالاحتفاء ..

وقالو الكلام جاب الكلام ..

الفكره الاساسيه انو فى ناس قاعدين يفترضو وساى كده ..
انهم أكبر من المنبر ده ..
وانو ده فى النهايه منبر ساى ..

ودى مسأله مغريه جدا أن أقول أنا أكبر من سودانيزاونلاين !!..
وذلك يتم بطريقتين ..
تضخيم الذات أو تقليل واستصغار المنبر ..

تضخيم الذات هو الطريق الاسهل لمن يملك مقومات تسمح بتضخيم ذاته ..
واستصغار شأن المنبر هو الطريق الاسهل لمن لا يملك حتى المقومات اللازمه لتضخم الذات .. وذلك فى اطار من يعرفون قدر أنفسهم
المجانين ما معانا !!..

سودانيزاونلاين بساوى كقيمه مجموع أعضاءه ..
نقطه سطر جديد ..

د محمد ندعوك انت وكل الشرفاء للانضمام لمنبر الشرفاء بالفيس بوك لاسقاط مافيا الكيزن


http://www.facebook.com/groups/185316181531384/

الفكرة ليها يومين والعدد فاق ال 260

و شكرا