انا الهكـــر و الهكـــر انا ..

تخريجات المواضيع .. بتدخل الحنك البيش مع الاطماع الاستراتيجية .. مع الوهمة ..
يعني الواحد فيهم يكون باكي ليهو في ( حاجة ) .. لم ريالتو سايلة .. و في اقرب سانحة .. يقول ليها .. حميده دا الهكر ..

شرح الموضوع صعب شوية ..
ركزوا معاي ..
زول ما بعرف كمبيوتر .. بتاتا بطاطا .. لكي يثبت للجمع الكريم انه بعرف كمبيوتر .. يقوم يهوزز راسه كدا .. مثبتا مقولة ( حميده الهكر ) .. بدون ان يدخل في تفاصيل ..
الحركة دي بتتعمل للايحاء للقارئ انه الموضوع اكبر من استيعابه عشان كدا ما في داعي للشرح .. و نظام الود عالم بخفايا الامور .. ثم تدور الاسطوانة حول امكانيات الزول دا ( الهوزز راسه ) في تهكير المواقع .. بس اخلاقه ما بتسمح ليهو ..
مثبتا للقوم مرة آخرى ان شهادته لا تخر المية ..

عالم الانترنت .. و معرفة الناس من خلال الانترنت .. فيها مشكلة كبيرة ..
الزول البتصاحبه بالطريقة دي .. اول حاجة ما بتكون عاشرته .. كل معرفتك بيهو بتكون من خلال الشخصية الكرتونية الطارحا في المنبر .. ( اطقك كدا هسع ) ..
و الحاجة التانية .. ما بتكون عارف الخلفية التاريخية بتاعته .. هل جاهد مع المهدي ام كان مع هكس باشا و لا جاي من فريق فوق او فريق تحت ..
مما يتيح لهذا الشخص انه ينسج ليك تاريخ عن بطولاته و جولاته مستفيدا من جهلك و غربتك .. و كل ما يطلع زول في التلفزيون يقول ليك دا جارنا ..

ما تستعجلوا .. راجعين تاني لموضوع الهكر .. بس دي لمحة تاريخية ..

يا حميدة الهكر دا أبعد منو نأنو شنو ..
ترشو باللبن أنا برضو برشك باللبن ..
تيك ات ايزى .

Quote: تيك ات ايزى

عفوا ..
قصدي تيك كير
وهذه لا علاقة لها بسلفاكير...
المهم :
أها قلت شنو يا حميدة في موضوعي الفوق دا ؟؟
لأنو سيد اللبن دا واقف في الباب عشان لو وافقت
امشيو ما في داعي ليهو .

الشخصية المنبرية هو ما يتمناه الشخص في عقله الباطن .. ( الفريد هوك ) ..

..
..

طيب ..
جبنا الكرتون و بنينا هذه الشخصية .. لازم تكون في شخصية منبرية كرتونية آخرى تدعم هذه الشخصية ..
و الدليل .. ترابط اعضاء المنبر و قيام صلات اجتماعية بينهم .. حميمة و شديدة .. لدعم هذا البناء الكرتوني ..
لانه ما ممكن تجيب ليك زول من الشارع تحكي ليهو انك ردمت تراجي .. او وقفت لهشام هباني في حلقه .. و كيف انك قلبت الهوبة في احد البوستات ..
الاستيعاب علي قدر المعرفة .. و كرتون يلاقي كرتون ..

Quote: ترشو باللبن أنا برضو برشك باللبن

يا طلوح .. لبن شنو ياخي .. دا هكر و لا جرتق ..
الايام دي في وهمة بتاعت ( كرفسة ) .. ما كرتون كدا ..
تطبق الكرتونة و تقوم بيها بنمرة تلاتة .. و تحكم الكربون بتاعك .. و تقع بيها الواطـــــة ..
ذي ابطال الديقتال ..

كونك تكون الهكر .. دا مثال ..
شخصيتك الكرتونية بتتأرجح ما بين انت زول عظيم .. لتدعم الشخصية الكرتونية الاخري ( الراوي في هذه الحالة ) ..
و ما بين تكون زول ( خرنق ) ساي .. لدعم اخلاقيات الشخصية الكرتونية الاخرى .. ( برضو بيكون الراوي في هذه اللحظة ) ..
و في الحالتين .. بعتمد علي انه الشخصية الكرتونية دي قابلة للتاليف .. و نزيد و ننقص .. حسب موقف الراوي منك ..
يعني الراوي لو داير يبعد الانظار من حتة انه فاقد تربوي .. يقوم يقول ليك ( حميده دا ما قرأ جامعة ) .. دا مثال يا جماعة طبعا اكيد ما في زول قال كدا .. و كلنا مثقفين ..

الشخصية الكرتونية شخصية ذات علاقات متعددة .. و شخصية معطاءة ..!! .. كيف الكلام دا ..
يعني عادي جدا يقول ليك .. ( الوظيفة بتاعت حميده دي كانت حقتي .. بس عشان ظروفه صعبة خليتا ليهو ) .. دا مثال يا جماعة ..
ولا يجي زول ماري في الشارع ناس النمرة بتاعت العربية بتكون ( اح م ق 222 ) .. يقول ليك و بحرفنة شديدة .. ياخي انا ما قلت ليهو يغير الطاسات دي .. ما سمع كلامي .. لا تمتلك الا ان تندهش دهشة كرتونية ..

حميدة مشى البحر عدييييييييل مش جاب سيرتو بس!!

Quote: حميدة مشى البحر عدييييييييل مش جاب سيرتو بس

و إستحمى بيها و شرب منها كمان

ما بين الشخصية الكرتونية و الشخصية الواقعية .. خيط رفيع من الكضب ..

..
..

طيب لم تتعامل بشخصيتك الواقعية .. مع شخصية كرتونية .. ما هي المضاعفات الناتجة عن هذه الاحتكاك ..
مثال ..
تجي تحكي ليهو عن حلتكم .. ( ارض واقعية و طوب و ناس و ###### ) .. تكتشف انه حلتهم ( اي الشخصية الكرتونية ) .. كلها ناس ابطال و مضحكين و مفتحين حتي ال###### ظريف .. مما اتاح لهذه الشخصية مقدار من التفتح ( و الله ألا ارسما ليكم ) ..
بتكون قريبة لـ ( شرط للارض ) .. !!
الخبرة الكرتونية المكتسبة من الحلة الافتراضية تضع الشخصية الكرتونية في مازق ( مفروض يكون عارف اي حاجة ) و تتخارج الشخصية الكرتونية من هذا المأزق .. باختصار نشاطها في الكلام ( النضمي ) ..
و العمل في مشروع ( تدقيس البشرية ) .. و بيكون شكل الشخصية هنا ذي الزول اللابس ليهو بدلة و كرفتة .. و نسى يلبس البنطلون .. و جعبـــاته في السهلة ..

الشخصية الكرتونية بتحب التفاصيل .. تفاصيل التفاصيل .. لازم تدخلك في جو مسرحي .. يهتم بجغرافيا المكان و الديكور و الشخصيات المساعدة ..
مثال ..
عنوان القصة .. ( لمن دفنا حاجة التومة الساعة 4 صباحا ) ..
سمعت ليك كواريك يا معلم .. كنت نايم عريان فوق و تحت لابس شورت بتاع صاعقة كان بنطلون قطعتو عشان اتمرن ليك في الدروة و خاتي ليك الطبنجة تحت الفراش اشتريتا من ( عوض تصبينة ) ..
لحدي ما تصل لحاجة التومة .. يتضح ليك و لا بلا ادنى شك .. انه حاجة التومة ماتت من المغسـة ..

واضح وبشكل لا يقبل التشكيك او المجادلة انو البوست ده ( قلب غطا ) ... ...

Quote: واضح وبشكل لا يقبل التشكيك او المجادلة انو البوست ده ( قلب غطا )

يا مامون اعصـــرني شديد .. ان شاء الله نموت زاتو ..

طيب نرجع لموضوع الهكر ..
الزول دا حيستفيد شنو لمن يقول ( حميده الهكر ) ..
واحد .. فتح خط حنك بيش مع هناية ..
اتنين .. التحدث مع هناية في مواضيع زات سقف جدية مرتفع ..
تلاتة .. احتمال عودة هناية ليهو بتلفون استفساري عن معلومة تهكير حميده .. ( و طبعا كان ضربت ليهو مرة حيردها ليها مليون مرة ) ..
اربعة .. استعراض نبل اخلاقه و رفضه التام بتاتا بطاطا لافعال ( حميده الهكر ) ..
خمسة .. قلبى على ولدى انفطر وقلب ولدى عليا حجر ..

تبري من الموت ياحميده

لاكن انت هكوري بس علي وزن حمودي

طبعا حسب شخصيتي الكرتونية المشارك بيها في هذا المحفل .. عجبني وسرا بالي .. ان اكون ( الهكر ) .. و ضميت الصفة دي لمواهبي التفتيحية الكرتونية ..
و بديت اقرأ عن تهكير المواقع .. و ساكي ليك الشفع السعوديين في الانترنت ( خبراء تهكير المواقع ) .. و لقيت ليك الشغلة دي صعبة عديل .. مما اختصر موهبتي في اضافة جو معرفي بعالم الهكر ..
و حفظت لي اسماء تلاتة برامج تهكيرية بقشر بيها كلما سنحت لي الفرصة ..

Quote: و حفظت لي اسماء تلاتة برامج تهكيرية بقشر بيها كلما سنحت لي الفرصة

يازول مالك عايزني أضطر اصاحبك ياخ ؟

بالمرة أشرح لينا برضــو حكاية الـ ( backup ) الراقد في الرابط ده يعني شنو ؟
هنـــا

Quote: بالمرة أشرح لينا برضــو حكاية الـ ( backup ) الراقد في الرابط ده يعني شنو ؟

طبعا يا عمران اهم مرتكزات الشخصية الكرتونية .. هي غياب المعلومة عن الطرف المتلقي للوهمة ..
الرابط بتاعك هو .. www.sudanvoice.com مش كدا .. ؟

..
..

عايزين موسيقى تصويرية
أفضِل الكمنجة فقط

طبعا يا جماعة البوست دا اجتماعي ثقافي رياضي ..
ما تهتموا كتير بتسلسل المواضيع او حتي عن منطقها الاعوج ..
خليها علي ربك يا مواطن .. او كما قيل .. بالنية ..

..
..

زمراوي فنان عجيب .. بقلد الجابري .. بقلده في اي حاجة .. اهداني ليهو صديقي الكرتوني الخير العوض .. ( ناس يجيب ليها لوتري و ناس يجيب ليها اغاني ) ..
من شدت ما اتكيفت من الزول دا ( زمراوي ) .. اضفت في المفضلة لشخصيتي الواقعية .. كنت داير انزله هنا لمشاركة الاخوان .. ( ما نحن طيبين ) ..
و تذكرت انه شخصيتي الكرتونية .. ما حتعاين لزمراوي .. و نبقى في شفتا الساكس مع الاسكربول بتلو لمن عمل تنق كدا و دخل ليك شيييييييطك بالكمان و دق سلف بالبنقز ..
و دو ري مي عفصا ما عفصا .. و تضيع البهجة شمار في مرقة ..
مما يستفاد من الحديث .. انه شخصيتي الواقعية بقت بتخاف من شخصيتي الكرتونية و تدسدس منها الحاجات ..

Quote: مما يستفاد من الحديث .. انه شخصيتي الواقعية بقت بتخاف من شخصيتي الكرتونية و تدسدس منها الحاجات

و من هذا المنطلق .. عادي ممكن اكون ( الهكر ) .. و يكشتف العالم انفصام شخصيتي ..
و اكتشف انا زاتي .. انه في ظل الغيبوبة الكرتونية دي اكون هكرت لي بنك .. و عندي قروش في سويسـرا ..

مكتسبات الشخصية الواقعية .. في حرب و غتاتة شديدة مع مكتسبات الشخصية الكرتونية ( ناس تموها خيال ) ..
المكتسب الواقعي بتنتج عنه خبرة .. و المكتسب الكرتوني بتنتج عنه وهمة ..
و الوهمة قد تطغى علي الخبرة اعلاميا .. و هو ما يثير حنق الشخصية الواقعية ..
خصوصا اذا لامست الوهمة بعض الواقع ..
مثال ..
شخصية كرتونية مكسرة الجكس ( حسب الوهمة ) .. يصادف انه يجكس .. الحركة دي بتكون داعمة لاتجاه الوهمة .. و الجكساية كان طلعت سمحة .. طيارتنا قامت ..
طوالي الشخصية الكرتونية بتصنف نفسها علي انها .. عامل جذب ..

Quote: المكتسب الواقعي بتنتج عنه خبرة .. و المكتسب الكرتوني بتنتج عنه وهمة .. و الوهمة قد تطغى علي الخبرة اعلاميا .. و هو ما يثير حنق الشخصية الواقعية .. خصوصا اذا لامست الوهمة بعض الواقع ..

أنا عارف إنك زول بتاع تجليات ..
لكن كمان ما تتجلى شديد كدة ..
بسحروك ..

من محاسـن الكرتون .. كمادة .. انه ما عندو لا اصل و لا فصل ..
بمجرد دخولك في الشخصية الكرتونية يمكنك انك تعمل ليك اصول و فصول و فروع .. ( اصلها ما في و فرعها تتمو موية ) ..
و جميع المعلومات الواردة في استمارة التحقق من الشخصية هي علي حسب ( زعم ) الراوي للجمهور ..
عادي جدا ممكن تقول حبوبتي كانت بت خالة ملك سمرقند و بلاد العتوت .. و شقيق جدي لابن اخت جدتي حبوبتي من حكماء بني صهيون ..
و انا زاتي لمن كنت صغير كنت أسد .. بس الجهاز الهضمي عندي اتطور و ذي ما شايفين أهو بقينا معاكم .. و ركبنا في سرج واحد ..

اسمع ياحميدة

بالله سيبنا من كلامك الكتير دا

ووريا علاقتك بالكلام التحت دا شنو؟

دي بيكون كتبتها في واحدة من انفصاماتي الهكرية ..
ما اصلو الشخصية التانية بتاعتي داخلة في ( كرتونة ) .. هكر كوز ..
ياخي مرة بعد ما صحيت من ( وهمتي ) دي .. تصدق لقيت روحي رابط لي شريط احمر .. و بغني بقول ..
اقبل على دربنا ان كنت حيرانا اقبل على نبعنا ان كنت ظمانا ..

Quote: اقبل على دربنا ان كنت حيرانا اقبل على نبعنا ان كنت ظمانا

كلام جميل ياحميدة بس حاجة واحدة حيرتنى
حيران دى من الحيرة ولا من السكرة؟

من الوهمة ..

..
..

و الله هيثم مصطفى زاتو ما بجدع باصات بالطريقة دي ..

المجتمع الكرتوني مبني علي تكامل وحدة الكرتون .. ( الكتلة X الارتفاع ) ..
بمعنى .. لو قديت لي كرتونتي .. بفرتك ليك كرتونتك .. او في رواية آخري ( بكرفسـك ) ..
و المبدأ دا خلق انسجام في المجتمع الكرتوني .. و اصبح في انسيابية في سريان الوهمة .. و كل كرتونة عارفة مقاسها .. و مرصوصين في الرف بالترتيب الذي ارتضته الكراتين لنفسها ..
لذلك .. اي ململة من ( كرتونة ) او فقدانها الاتزان الكراتيني .. بعمل خللة في جميع الكراتين .. مما يدعو المجتمع الكرتوني للتعاضد و التماسك حفاظا علي وحدة الكرتون ..

في موزبيـق في اتحاد عام للكراتين اسمه .. Mozambicain Fédération de kératine
بمثل نموذج لكرتنة الكرتنة زاتا .. و يعتبر من مؤسسات العمل المدني .. ( و لا شنو البتقولوها ديك ) ..
و لديهم دسـتور واضح للوضع الكرتوني داخل الكيان .. تربط وش كرتون ( شيوعي ) .. و تشيل ليك شوال كلمات متقاطعة .. و تجي تتكرتن ( بمعني تتفلسف في الواقع ) ..
شخصية المثقف الرافض للوضع الانتهازي من اهم المراحل في عملية الكرتنة .. و يجب عليك ان ( تنبثق ) .. اي و الله تنبثق عديل .. ( حركة اقرب للهوبة في الحياة الواقعية بس دي اثرها نفسي اكتر و تندرج تحت باب الاكروبات المعنوية ) ..
عملية الكرتنة دي بتعالج الرواسب للمتكرتن من عقد بسبب الفقر و المجاعات في افريقيا و دول حوض النيل .. و شح التعليم .. و انتشار الكوليرا و البلهارسيا و قلة النوم .. و القلق .. و في بعض الاحيان ( مضاعفات جانبية ) ممكن تفتح ليك لون البشرة و بسموها في الحالة دي juste et belle ..
بتدخل الوهمة كعامل مساعد في الكرتنة لزيادة الكثافة النوعية للمتكرتن .. و هو خيار اختياري .. و علي كل متكرتن اختيار وهمته بمزاجه ( حسب اللون و المقاس ) .. و احكامها .. و عرضها علي Council Alkratina Lent لاجازتها و تثبيت حقوق الملكية الفكرية للمتكرتن ..
و لا يحق لمتكرتن آخر استخدام نفس الوهمة .. و يجوز الجمع بين عدة وهمات حسب مقاس الكرتونة الخاشي فيها ..

.

حميدة أخوي

كدي شوف لي الشغلة دي هكر ولا شيتاً كتر


http://www.horafiles.com/52p4no4qta3t/sudhk.jpg.html

بالغت يا الاخ الهكــر ..
يعني هسع ما لقيت ألا عبير خيري عشان تجيب بيها اللنك دا .. شكلك ما متابع كويس ..

نواصل ما انقطع من حديث ..

مجتمع الكرتون .. يتكون من .. كرتون ( ذكر ) .. و كرتونة ( انثى ) .. كحال المجتمع الواقعي ( ضكر و انتاية ) .. و تحكم العلاقة بينهم ( اي الكرتون و الكرتونة ) .. الظرافة الزائدة و الاريحية و محاولات خلق مساحات من الود في اطار ( بيض جدا ) ..
العضـو في المجتمع الكرتوني كل همه جمع اكبر عدد من العلاقات و المعارف .. و التباهي باستقبال المكالمات من ( برتانيا ) .. و الدول المجاورة .. و ايهامك بعلاقاته الحميمة العابرة للأطلسـي من باب العالم اصبح كرتونة صغيرة ..
و السن الكرتوني ( العمر يعني ) .. يلعب دوراً اساسيا في تحديد كمية ( ظرافة ) الشخصية الكرتونية .. كل عشـرة سنين بقابلها ( طن ) من الظرافة .. يعني لو زول عمره 60 سنة .. يعني 6 طن ظرافة .. ربع طن تاني و يبقى ( ارقوز ) عديل ..
المرأة الكرتونية هي امرأة جندرية و صديقة الرجل الكرتون .. و تخلق لنفسها مساحة ( تفحط ) فيها بما يرضى طموحها الكرتوني .. اما الرجل الكرتوني فيعتبر نفسه .. انفتاحي قاشـر بالوضع .. و لا ينقصه سوى الثبات الانفعالي في مثل هذه المواقف ..

..
..

..
..

صديقي الباشمهندس محمد ابراهيم تناقش في موضوع ( هُكريتي ) مع الكرتون الكبير ود الصايم ..
ضحكت لبساطة الباشمهندس .. و قارنت بين ود الصايم ( قرنتية ما غواصة روسية ) .. و بين هناية ( حنانة كاتلانا ) ..
الحركة دي ذكرتني تعادل الهلال و النيل الحصاحصيا ..

..
..

طبعا بالطريقة دي حنفقد الدوري ..

الكرتونة بقرش .. و الكيس ببلاش .. ( من حكم الجيلاني ) ..

اثبت الكرتون في الفترة الاخيرة .. ( العصر الاسفيري ) .. بأنه الوهمة بتاعته بتشيل .. ( مثل اتحاد ميســو و حنة التاج في الواقع ) ..
الكرتنة اتاحت للكثيرين تقييد انفسهم كـ( صحفيين ) .. و متذوقين للفنون .. و كُروسطبلنجية .. و غيرها من الامنيات .. و بعضهم تجاوز ذلك و شطح ..
و تراجعت شعبية ( الكيس ) .. لخفة وزنه .. و قامت الهيئة بحصر استخدامه في ( اسفير البلك الثانوية بنات ) .. و الكيس البجي عكس الريح .. هو ملك لقلوب ..
فاصبح الكيس بضيق ماعونه ( الوهمي ) .. الذي لا يتسع الا لوهمة ( احي انا اموت ركن ) لا يفي بمتطلبات خريجي كورس ( اطلق العملاق الذي بداخلك ) ..
ايقن الجميع ان العملاق دا داير ليهو كرتونة .. و كرتونة تايد كمان ..


صورة حديثة للعملاق ..

أيامك يا البنضوره .... إتجدع ده الجو البنفع معاك.... بس شايف في نبرة تواضع كده ما بتشبه قندفتك و قوفاطك المعتاد, من شنو يا ربي؟

kenana

عصام جبرالله .. ياخي انت من زمن دا ود حلتنا ودا صاحبي .. و شيل وش القباحة ..
نوعك دا بقولوا عليهو اخو اخوان عوير .. لكن اصلي ..

..
..

نادر .. اتخيل لي كلمة واحدة ما بتعبر عن الجواك .. اشتري مايكرفون و اطلع السطوح وعبر ..
في السطوح الحرية حدها السما ..

عارف يا عصـام .. بالأول لمن قريت مداخلتك دي .. كنت قايلك داير تفكها ذيي كدا سـاي ..
بس اتذكرت انك صديق العملاق ..


صورة حديثة للمنفاخ ..

الكرتون موصل جيد للكهرباء .. ( علوية نيوتن ) ..

يحتوي الكرتون علي مادة ( المنميم ) .. و دي عبارة عن فلتر و جك في نفس الوكت .. و بتركب في الاضان ..
يقوم بفلترة عدة انواع من الكلام الجادي و الما جادي .. و استعارة لقطات من الاحاديث العابرة و تضمينها في مسرحيات بطولية و كوميدية ..
عبارة مثل عبارة .. عندنا صاحبنا في امريكا .. بعد الفلترة بتطلع .. جاني لوتري لكن تصدق ما مشيت ..
عبارة .. كندا بلاد جميلة و بها غنم و خرفان و مراعي خضراء .. بعد الفلترة و تغميسها في الجك بتطلع علي شكل .. عملوا لي اقامة في كندا و في اي وكت ممكن امشي .. ( ودعني عليك الله )
و هكذا ..
محمدية دا خطير = لا خطير و لا حاجة وتر البتلو عندو تعبان ..
محاسن طارت = ياخي دي وهم
تربتتتتا = تنقش تنقش ..

المشكلة التي حيرت العلماء .. ان الكرتون يقلب المعادلة عند توصيله للكهرباء .. يعني تديهو كهرباء ( موجب ) يوصلا للطرف التاني ( سالب ) و يديهو زيادة بقرش ..


صورة حديثة للكهرباء ..

Quote: المشكلة التي حيرت العلماء .. ان الكرتون يقلب المعادلة عند توصيله للكهرباء .. يعني تديهو كهرباء ( موجب ) يوصلا للطرف التاني ( سالب ) و يديهو زيادة بقرش ..

هل هذا يعني انه يمكن للمواطنين توليد الكهربا من الكرتون مباشرة ؟
وهل يمكن للتلاجه 19 قدم ان تعمل بطاقة الكرتون خصوصا وان رمضان علي البواب ؟؟
وهل طاقة الكرتون طاقه نظيفه ؟
وكم يكلف استهلاك عدد واحد تلفزيون + مروحه + تلاجه 8 قدم في اليوم ..وهل تشغيل الخلاط لعصر الليمون يمكن اذا استعملنا كرتونة بسكويت بركه واحده في اليوم؟
وما هي انواع الكرتون الجيد .؟
وهل الكرتون المستورد له نفس خصائص كرتون بابنوسه ؟

Quote: وهل طاقة الكرتون طاقه نظيفه ؟

لا .. و ما صديقة للبيئة ..
بسبب احتواء ( الكرتون ) علي مواد احفورية ( بال ) عليها الزمن .. و حسب احصائيات منظمة ( اصدقاء الشدرة ) ان استخدام ( الكرتون ) ينحصر في نطاق ( اسفيري ) ضيق ..
كما ان التشـريعات في بعض البلاد ( التي لا تقبل الوهمة ) .. حدت من انتشاره .. مع انتشـار الوعي بخطورة ( الكرتون ) كمادة ضاغطة و مثيرة للأعصاب .. Cardboard compressor

Quote: وهل تشغيل الخلاط لعصر الليمون يمكن اذا استعملنا كرتونة بسكويت بركه واحده في اليوم؟

عصر الليمون عملية معقدة و ليس كما تظنها في البساطة ..
و تستهلك كمية من مادة ( الكرتنة ) كون ( العصر ) يحتاج الي ( وهمة ) قوية لتهيئة ارضية خصبة للفعل ..
و يجب تهيئة ( المعصور ) لتقبل الكرتون كعاصر .. و التقاضي عن ملحقات الكرتون المضرة بالبيئة ..
في معامل جامعة كولومبيا استخدموا ( غاز الخردل ) لتخدير المعصـور كون الخردل لا يتفاعل مع العناصر ( مخرجات ) الكرتون المضرة بالبيئة .. و بخليك في حالة ( مشى حالك يا معلم ) ..