خلاص (تكأكأتم) على الأمة القومي؟!!

لماذا الحملة على قيادات الأمة القومي بصدد قضية فاطمة الغزالي وسجنها؟الحزب وقياداته تابعوا القضية ووقفوا مع الصامدة الأبية بل أن وفداً عالي المستوى رافقها للسجن ومكث معها..الهجوم على قيادة الحزب بدون مبرر غير مقبول وموضة الهجوم على الأمة القومي وقيادته بدون مبرر موضوعي أضحت كموضة الشارلستون في السبعينيات!!!باااااايخة وممجوجة

وكلاكيت تاني مرة:
إلى من يهمه الأمر في مشارق الأرض و مغاربها:
كوادر حزب الأمة القومي بلا استثناء في هذا المنبر و في منابر موازية تمتاز بالنقد الذاتي لحزبها
(ما بنغتغت)
كل ما لنا نؤكده و كل ما علينا نبسطه أمام القراء
ننتقد قياداتنا و نبدي رؤانا في كل ما يهم الحزب
نتقبل نقد الآخرين بصدر رحب، وحتى لو ضاق صدرنا وسعناه عندما نتذكر أنه حق الشعب و أننا لسنا ملائكة كما أن الحزب مؤسسة بشرية مبنية على ابن آدم الخطّاء..
نعلم أن هناك العديد من (الحارقاهم الجمرة) من يكتبون تحت لسعاتها
من لم يقووا على رؤية الوطن يضيع و همة الأحزاب تتقاصر عن متطلبات و آمال الشعب
الآملون في غد أفضل يقوده أو لا يقوده حزب الأمة لا يهم؛ المهم أنهم مؤملون في سودان الغد النضر
الذين يلقون بالنصيحة لوجه الله يرومون بها إصلاح الحال..
يقولون النصيحة للكل و في كل وقت..
ولكن...
ولكن!!!!
هناك أيضاً من ينتقد من منطلق منافسة لحزب الأمة
أن خفوت هذا سيلمّع بالتالي ذاك
وهنّات الحزب تعني ازدهار الآخر
ونحن –بالمناسبة- لسنا غر سذج؛ فنحن في معترك قوامه السياسة
والأحزاب متنافسة
وهناك من يعتقد أن بيده فتيل منير ولكن بالتالي إنارة أكثر لجهة سياسية أخرى ستخفت إنارة فتيله!!
ومن يعتقد أنه في ظلام دامس و من الخير أن (نظلِم)كلنا!!!!
ف(موت الجماعة عرس)!!
ومن لا يقوى على نقد نفسه و لا يقوى على العبور الجريء في مطبات تنظيمه و ينشط في نقد الحزب الأكبر في الساحة السياسية السودانية
وهو أمر غريب و باعث على السخرية!!
لكل هؤلاء نقول:
قولوا إننا متنافسون
لا تلبسوا النصيحة ثياب المصلحة العليا بل هي المصلحة الدنيا بنفسها!!
شطارة الكوادر الحقيقية في الانتباه لمواطن ضعف حزبها و محاولة النهوض به قبل أن تنظر في مواطن ضعف الآخرين (الحقيقية و المتخيلة)!!!
من لا يريد الاعتراف بأننا حزب كبير
(متأسفين) يسرنا (تذكيركم) بأننا الحزب الأكبر في الساحة و أي انتخابات نزيهة ستبين ذلك التفوق المطرد!
من لا يريد التفكير إلا بأننا حزب وهمي
(متأسفين) نحن حزب حقيقي و موجود و مشاكس و نحاول ما استطعنا إقالة عثراتنا و إصلاح تنظيمنا و نعرف بدقة عللنا و معوقات انطلاقنا!!
هذا وعدنا نحنا شباب الحزب و كلمة شرفنا أمام أنفسنا قبل أن تكون أمام الآخرين...وسنفعلها..
من لا يريد القول إلا بأننا حزب ديناصورات
(متأسفين) يسرنا تبصيركم أن الشباب أغلبية في مؤسسات الحزب و في تكوين الحزب و مفاصله المختلفة!!
من لا يريد التفكير إلا بأن المرأة لدينا (متبلمة و مقنّعة) فكرياً و سياسياً
(متأسفين) نحن لسنا بالمهمشات بداخل حزبنا؛ صوتنا عالي و نبرتنا عالية و رأينا كالسيف يقطع و صليله يسمع!!!
ثم ماذا بعد؟؟!!
حاولوا ...(أتكو) حزب الأمة ثم (اضبحوهو)
ولكن قبل كل ذلك
جهزوا قرابينكم
فما تخيلتموه (ذبيحة) هو عنقاء لو كنتم لا تعلمون!!!
والسلام
لنا

يالنا ديل رايح ليهم الدرب
ديل خساره انو الواحد يرد عليهم ولوبكلمه لانهم ناقصى عقل
اين كانو هم وقت الحاره ضاربين مكيفات ارتريا وشريط فاطمة احمد ابراهيم
ولا التانية بقت مريضه الهامش ومالهامش وهى ناسيه انو فاطمة غزالى انصارية وحزب امة وماشغال بيها كتير

Quote: يالنا ديل رايح ليهم الدرب ديل خساره انو الواحد يرد عليهم ولوبكلمه لانهم ناقصى عقل اين كانو هم وقت الحاره ضاربين مكيفات ارتريا وشريط فاطمة احمد ابراهيم ولا التانية بقت مريضه الهامش ومالهامش وهى ناسيه انو فاطمة غزالى انصارية وحزب امة وماشغال بيها كتير

الحبيب أبوحميد
أنت صاحب رسالة وواجبك توصلها كل زول بي فهمو
السودان تحت ظل الانقاذ كله أصبح هامش فالهامش والمركز لم يعودوا جغرافيين ودة البنحاول نوصلوا لحبايبنا ديل

يا استاذة لنا بعد السلام: انتم مناسيب حزب الامة هنا في المنبر بقيتو زي البوليس في الفيلم الهندي تأتون اخر الناس/ بعد الكعة تحصل/ وبعد الميت يندفن/ يعني الناس راجعة من الحج/ انتم ماشين تحجوا لبيت الله/ كدا ما بمشي الحال/ لابد ان يكون لديكم ناس متفرقين في سودانيز اونلاين مهمتهم اي زول يقول سيييك ميييك في حزب الامة تردو عليهو طوالي/ للاسف الشديد الاخ عمر فضل المولي لوحده مصنقر ديدبان في المنبر 24/7 يا اخت لنا مهدي قوموا بتمليك خلق الله مواقفكم في لمح البصر اول باول مش تجوو في الاخر تلعنو الضلام!! احترامي العالي الذي تعرفين.

الكركبة شنو ياناس

لنا يا صاحبتي..كيفك..؟

اها انا رشا دي دايرة اتكأكأ مع الجماعة شوية..

وعادة ما قاعدة اتكأكأ على حزب تاني ..يعني قليل لما انتقد

حزب غير حزب الامة..ليه؟ لانو حزب الامةBY DEFINITION

اها حزب الامة القومي دا عندوا شعبية وعندو تاريخ وشرعية دستورية

اغتصبتها العصابة البتنقز في راسنا ليها 22 سنة دي

وحزب الامة ما عايز يتكأكأ عليهم ولا بيفكر في قيادةتغيير جاد

بل على العكس ..قاعدين معاهم في المناسبات ماكلين وشاربين

ويتبسموا في وشوش بعض وكأن ما حصل ويحصل في السودان

امر خاص بالشعب السوداني ولا يخص قيادات الامة..

ياخي الامام الصادق المهدي دا لو واحدة من بناتو اغتصبوها

كان بيمد يدو ويسلم عليهم تاني؟ وتيب؟ بنات دارفور ديل

ما بنات السودان الانتخب الصادق وائتمنوا على الديمقراطية

قام سواها لينا كلها هلماجرا وهلم تكأكؤ لغاية ما نطوا فيها

بليل ومن ديك ما اصبح علينا صباح!

قبل فترة كان في بوست بعنوان حماسي بمعنى انو الانصار جاهزين

ومنتظرين اشارة من الامام وانهم قادرين على التغيير(انا برضو

مقتنعة بالكلام دا) اها الكان محيرني ولغاية هسه محيرني انو

الامام دا الماسك يدو من الاشارة شنو؟ في اتفاقيات تحت تحت بين

الناس الكبار ولا القصة شنو؟ غايتو لو ما جيتي فكيتي لي الحيرة

دي حتلقيني طوالي متكأكأة في الحيطة دي..ما لقصرها بل للعكس.

طال تكأكؤنا ولم تأتي لنا لتقول لنا افرنقعوا :)

Quote: الكان محيرني ولغاية هسه محيرني انو الامام دا الماسك يدو من الاشارة شنو؟ في اتفاقيات تحت تحت بين الناس الكبار ولا القصة شنو؟ غايتو لو ما جيتي فكيتي لي الحيرة دي حتلقيني طوالي متكأكأة في الحيطة دي..ما لقصرها بل للعكس.

تحياتي لنا مهدي ، تحياتي رشا سالم


المسألة أبسط مما يتخيل الطرفان (متهمو الإمام والمدافعون عنه)


الإشارة - طالما أننا نتحدث عن حزب سياسي حي وفاعل - هي مهمة وصلاحية وواجب مؤسسات الحزب

وعودا على بدء إذن
1- هل في حزب الأمة مؤسسات تستطيع أن تتخذ قرارا أو (إشارة) بمعزل عن المزاج الشخصي والرغبة الشخصية للإمام؟ لقد وقع الاف الكوادر الوسيطة حسب علمي على بيان قالوا فيه أنهم مع خيار الشعب في الثورة والانتفاض ايا كان موقف الإمام ولم تترجم رغبة الالاف هذه التي يعرف الجميع أنها هي الرغبة الغالبة داخل صفوف الحزب بشيبه وشبابه ورجاله ونسائه لا لشيء إلا لأنها تتطابق مع مصالحهم المحضة ومع حقهم الطبيعي في الوجود والحياة والعيش الكريم ذلك الذي تفتئت عليه كل لحظة يعيشها هذا النظام المجرم
2- هل يجوز منطقيا وموضوعيا الربط بين موقف الإمام شديد الخذلان في هذه (الحتة) وبين حقيقة استلامه لأموال عظام بانتظام من النظام أيا كانت تسميتها تعويضات او خلافها؟
3- هل يوجد سقف للتفكير والانتقاد داخل الحزب ؟ يظن البعض أن هناك أشخاص بعينهم لا يجوز على الإطلاق النظر إليهم باعتبار أنهم آدميين عاديين قابلين للوقوع في مختلف أنواع الأخطاء لدرجة سماها البعض بوثنية داخل حزب الأمة .. كيف يستقيم هذا الجو (إن وجد) مع مهمة بناء حزب قوي غير قابل (للانحراف) عن مساره الافتراضي وان يصبح أداة تعمل بالضبط ضد أهدافه المعلنة وضد المصالح المباشرة لجماهيره ومنتسبيه؟
4- بجي راجع كان الله هون يالنا .. طولي بالك علينا .... ما في حل غير طولة البال .. إجلالي المقيم

رشا تحيةطبة اهو اناحزب الامة حتى النخاع لكننى لا أوافق حزب الامةفى الوصول الى السلطة بأقصر طريق بل اريده ان يصل عن طريق الخيار الديمقراطى

يا صديق تحية اطيب من حقتك..

Quote: لا أوافق حزب الامةفى الوصول الى السلطة بأقصر طريق بل اريده ان يصل عن طريق الخيار الديمقراطى

لو انتوا في حزب الامة متخيلين انو النظام دا ممكن يسمح بتحول ديمقراطي

وانتخابات نزيهة,يبقا منو العوض وعليهو العوض وواطاتنا صبحت!

الحاصل في السودان دا ما سياسة..دا نهب مسلح ومنظم..الناس ديل بينهبوا في

اموال السودان تحت شعار انهم حكومة..لكن هم اقرب للمافيا..عشان كدا انا

بستغرب للعالم البيقوموا نفسهم في محاولات مستميتة لفهم الاوضاع وتحليلات سياسية

وكلام لا بيجيب ولا بيودي..بس بيضيع في زمننا وبيديهم زمن اضافي عشان يواصلوا

الجريمة المنظمة الشغالة دي..والرسول عليه الصلاة والسلام قال:المؤمن كيس ,فطن

وقال المؤمن لا يلدغ من جحر مرتين ..وانا اعتقد خجة الانتخابات الفاتت ما بتغيب

عن فطنتنا..وجحرهم دا الا تتلدغو منو انتو براكم ..باقي الشعب السوداني دا

ما اظنو بيتغشى ليهم تاني.