Post: #1 Title: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-22-2011, 06:05 PM
بروباغندا
Post: #2 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-22-2011, 07:40 PM Parent: #1
من رسخ هذا المفهوم؟
Post: #3 Title: Re: اسطورة ان اولاد الوسط تفاتيح( امدرمان.مدنى.كوستى) Author: محمد البشرى الخضر Date: 05-22-2011, 08:24 PM Parent: #2
ناس امدرمان و كوستي معاك بروباغندا وتامنها موية واعلام ساي لكن ناس مدني بجلّوا المخاواة ياخ
Post: #4 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-22-2011, 09:49 PM Parent: #3
مدنى ايضا رسخت لهذا المفهوم بطق الحنك
والا لماذا مدنى
سؤال لود البشري
Post: #5 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-23-2011, 11:26 AM Parent: #4
هناك مفاهيم اصبحت سائده وصدقها متداوليها عن بعض صفات شعوب وسكان مدن السودان المختلفه وقد تكون غير حقيقيه مثل ادعاء التميز(تفاتيح) او وصف قوميه باللؤم او عدم التدين او البخل او التهور.
لازمات من كثرة تداولها صدقها الكثرين
لكن يبقى السؤال هل هى حقيقه ام من اساطير الاولين
Post: #6 Title: Re: اسطورة ان اولاد الوسط تفاتيح( امدرمان.مدنى.كوستى) Author: عمر الفاروق Date: 05-23-2011, 12:21 PM Parent: #5
والله كوستي دي حشـــــرتـــها معانا ساااااي .. أمــــدرمان ومـــدني تفاتيحا وماسكين مفاتيحا.. فــــن وكــــورة وثقافــــة .. هنــــــــــــــــــــــــــــا أمدرمــــــــــــــــــــــــان ..
Post: #7 Title: Re: اسطورة ان اولاد الوسط تفاتيح( امدرمان.مدنى.كوستى) Author: محمد المرتضى حامد Date: 05-23-2011, 01:05 PM Parent: #6
اوافقك الرأي يا ناظم، تنميط غير مؤسس، زمان كان ناس أمدرمان بيقولوا ليك نحن أولاد أمدرمان بنركب الترماج عكس وبننزل عكس، هسه ال (تفتيحه) هم من قال عنهم الطيب صالح قولته الشهيرة. مودتي.
Post: #8 Title: Re: اسطورة ان اولاد الوسط تفاتيح( امدرمان.مدنى.كوستى) Author: سيف اليزل الماحي Date: 05-23-2011, 02:54 PM Parent: #7
.
قال ليها: ادينا .. كلمة .. واحدة .. ومهرجانك قالت له: إنت من وين؟ قال: من الخرطوم. قالت: ... لكن أولاد الخرطوم صعبين! قال: .. أخوك أسهل من جدول واحد.
------ نقف مع أولاد الوسط ونشد أذرهم .. وامنياتنا لهم بالتوفيق والسداد قف .. لا تنسوا أولاد المدن الأخرى التفاتيح ودمتم تفاتيح الخرطوم .
Post: #9 Title: Re: اسطورة ان اولاد الوسط تفاتيح( امدرمان.مدنى.كوستى) Author: سيف النصر محي الدين Date: 05-23-2011, 03:25 PM Parent: #8
يا ناظم اولاد امدرمان فعلا تفاتيح . كوستي و مدني ديل ارياف زيهم و زي باقي السودان و لو قالوا غير كده بتكون دي بروباغندا منهم ساكت.
Post: #10 Title: Re: اسطورة ان اولاد الوسط تفاتيح( امدرمان.مدنى.كوستى) Author: موسي الراجل Date: 05-23-2011, 05:16 PM Parent: #9
سلام للجميع
د سيف الا اول الله قال الناس تعيش
Post: #18 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-23-2011, 10:46 PM Parent: #10
موسى الراجل سلامى لك
ما وريتنا رايك
Post: #14 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-23-2011, 05:35 PM Parent: #9
سيف النصر ازيك
كوستى ومدنى اقاليم
(تهمة لا ينفونها وشرف لا يدعونه )
Post: #13 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-23-2011, 05:31 PM Parent: #8
سيف اليزل سلامات
(وانتو الضربتوا السماء جير)
ائتنا بالدليل
Post: #12 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-23-2011, 05:25 PM Parent: #7
مولانا محمد المرتضى سلامى
كامدرمانى عريق كانك تقول ان الصفه قد نزعت من الامدرمانيين وصارت لهؤلاء
Post: #11 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-23-2011, 05:20 PM Parent: #6
عمر الفاروق ازيك
شايفك طلعت كوستى من اللسته
رغم انهم شطار فى التجاره وهى عايزه ناس تفاتيح ودى من دفاعات اولاد كوستى
Post: #15 Title: Re: اسطورة ان اولاد الوسط تفاتيح( امدرمان.مدنى.كوستى) Author: محمد الفاتح خالد حسون Date: 05-23-2011, 05:52 PM Parent: #11
مع بلدنا دي ... مافي أي خيارات تانية غير مدنى الجمال وكوستي الاندلس
المقارنة تقطع انياط القلب
الحل في رائي خليهم يكونوا تفاتيح
ونحنا بنقبل بي تعبير ( شفوت ) خلاص
على الاقل ادربوا عندنا ... وما عدا ذلك - فهم ضحايا الاسطورة - على أرض الواقع وحيثما امتدت ( أم صفقاَ عراض )
محمد الفاتح خالد
Post: #16 Title: Re: اسطورة ان اولاد الوسط تفاتيح( امدرمان.مدنى.كوستى) Author: د.محمد حسن Date: 05-23-2011, 06:02 PM Parent: #15
شوف يا ناظم السودان ده كلو تفاتيح ما عندنا معاكم اي شغلة هسة شوف الحكومة دي فيها 100 وزير ما فيهم ولا واحد من امدرمان شوف مفتحين كيف يمرقوا من حفرة ويقعوا في حفرة
ياخ والي امدرمان ما من امدرمان ( راجع قول الفقيه محمد المرتضى ) التفتيح نحن خليناه ليكم لكن الشفتنة ما بتقدروا عليها
Post: #17 Title: Re: اسطورة ان اولاد الوسط تفاتيح( امدرمان.مدنى.كوستى) Author: mustafa bashar Date: 05-23-2011, 07:13 PM Parent: #16
لكن الشفتنة ما بتقدروا عليها
أيوه ....كوستي
Post: #21 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-23-2011, 11:05 PM Parent: #17
مصفى سلامات
يمكن يكون رايك مظبوط
الفرق ان الامدرمانيين يتفوقون بطق الحنك
Post: #20 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-23-2011, 11:01 PM Parent: #16
Post: #19 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-23-2011, 10:54 PM Parent: #15
محمد الفاتح ازيك
تعرف ياعزيزي اولاد امدرمان ديل بذكرونى ناس (نيويورك )زي ما ناس امدرمان لازم يوريك انو ود امدمان برضو ناس نيويورك عاملين فيها شفوت
وزي ما قال اوباما ولد شيكاغو لى هيلاري كلينتون الشفت ما بقول انا شفت
يعنى شيكاغو( مدنى )بتاعت امريكا
Post: #22 Title: Re: اسطورة ان اولاد الوسط تفاتيح( امدرمان.مدنى.كوستى) Author: SAMIR IBRAHIM Date: 05-23-2011, 11:09 PM Parent: #19
يا ناظم يا خوي ... امدرمان معروفة ... والسودان كلو بيقش عينو من النوم ويفتح الراديو واول ما يسمع ( هنا امدرمان ) ...
لكن ناس نيويورك ناس غلابه وساكين لقمة العيش وانت سيد العارفين في نييويورك الوقت كالسيف ان لم تقطعه بيلحقك آمات طه .
Post: #23 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-23-2011, 11:33 PM Parent: #22
سمير ابراهيم ازيك
انا قاصد اولاد نيو يورك الاصليين الاتولدوا واتربوا فى نيويورك
لكن بينى وبينك نيو يورك دى ما بقدر يعيش فيها الا زول تفتيحه عامله زي يوم القيامه
Post: #24 Title: Re: اسطورة ان اولاد الوسط تفاتيح( امدرمان.مدنى.كوستى) Author: اشرف السر Date: 05-24-2011, 01:12 AM Parent: #23
أحب عندما يقرر شخص ما رأيا... أن يسنده بالدليل الذي لا يرقى اليه شك... أما القاء الكلام على عواهنه فهو بلا شك أمر لا يستقيم مع المنطق السليم.
أولا: التبس في ذهني المقصود بكلمة (تفاتيح)!!!! فلها عدة استعمالات عامية و (رندوقية)..
والى أن استبين ذلك.. أقول أن ودمدني تمثل عاصمة الجزيرة، قلب السودان وعمود اقتصاده رغم أنف البترول. وأبناء عاصمة الجزيرة عامة ممثلين ودمدني،، لهم بصماتهم الجلية في كافة أوجه الحياة في السودان
في الأدب ،وفي الغناء والتمثيل،والرسم والرياضة والسياسة، وهم أشهر من أن احصرهم جميعا... هي عاصمة الجزيرة التي أهدت للسودان أحمد محمد صالح ، والحردلو ، والمساح ، والقدال، كباشي حسونة ، جمال عبدالرحيم ، هي عاصمة الجزيرة التي أهدت للسودان إبراهيم الكاشف ، وأحمد الطيب ، وعماد إبنه ، الخير عثمان ومحجوب عثمان ورمضان حسن ورمضان زايد ومحمد الأمين وأبوعركي البخيت ومحمد مسكين وأحمد الطيب ومصطفي سيد أحمد ، وثنائي الجزيرة ، وبادي محمد الطيب ، وعبد الله محمد ،وبادي محمد الطيب وصلاح درويش وعلي إبراهيم علي ومحمد سلام وعبدالعزيز المبارك وعبد المنعم الخالدي ، عمر أحمد صاحب أغنية ( كان بدري عليك ... تودعني وأنا مشتاق ليك) وعلي السعيد وإسماعيل يحي والحبر سليم وعبدالله حبه ومحمد باكوبة والتهامي خوجلي وحسين عبدالله وبدر أنجلو وأبناء مليجي بإيقاعاتهم الصاخبة .. وغيرهم كثيرون ،، وكلهم يغردون للوطن منذ أمد بعيد من خلال المذياع .. عاصمة الجزيرة التي أهدت السودان حمد دفع الله ،محي الدين الديبة ، سنطة ، حموري ، قلة ، سانتو ، الطاهر هواري ، عصام غانا ، صلاح الأمين ، والي الدين، زيكو وحربي وحداثة وأبو الليل و والي الدين والصيني والريشة.. ومن المدربين الأفذاذ الذين خرجتهم مدني لفرق العاصمة المدرب سيد سليم. وغير ذلك كثير ،، عاصمة الجزيرة التي أهدت للسودان ود حبوبة ، ومأمون بحيري ، وعبيد حاج علي ، وإبراهيم حسن عبد الجليل ، وفاروق أبوعيسى ، ومأمون سنادة ، وعلي أبوسن ، والأمين محمد الأمين ، ومحمد الأمين البصير ، وعدلان الحردلو ، والخاتم عدلان ، ومبارك مجذوب ، وقرشي محمد علي ، ومدثر التنقاري ، وغيرهم كثير ،، عاصمة الجزيرة التي قدمت للعالم المفكر الإسلامي الفذ الأستاذ محمود محمد طه ،، عاصمة الجزيرة التي قدمت للسودان حكيمه الذي سارت بحكمته الركبان ، الشيخ فرح ود تكتوك ،، عاصمة الجزيرة التي قدمت علوم القرآن والفقه والسنة والسيرة عبر الشيخ يوسف أبوشرا ، والشيخ القرشي ود الزين ، الشيخ وديونس ، المصوبن ، المكاشفي ، عبدالباقي راجل طيبة ، عبد المحمود راجل طابت ، عوض الجيد راجل عفينة ، اليعقوباب . وغيرهم كثير ،، ودمدني بعراقة عوائلها الكريمة – على سبيل المثال لا الحصر – آل الكارب وآل بانقا،وآل بحيري وآل الحضري وآل الليثي وآل البوشي وآل شدو وآل كنين وآل الخواض وآل عبدالرازق وآل أبوعيسى وآل كشك وآل الكنزي وغيرهم.. وغيرهم. عاصمة الجزيرة التي انتمت إليها حنتوب ، والتي قادت التعليم العام في السودان لما يقارب نصف قرن من الزمان ، وقدمت للسودان أرتالا من القيادات السياسية والإدارية والعلمية
-------------------------------
حسب فهمي فإن من ذكرت اسماءهم اعلاه هم اعلام، كل في مجاله، وهم تفاتيح بخبرتهم وثقافتهم ...
فهل ما زالت مقولة أن أبناء ودمدني تفاتيح مجرد أسطورة؟
Post: #25 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-24-2011, 01:55 AM Parent: #24
اشرف سلامى
لا احد ينكر ما قدمت مدنى من مبدعين وساسه مثل قدمت كثير من مدن السودان الاخري
ليس بالضروره ان كل من يحمل شهادات عليا يعنى انه تفتيحه يعنى ممكن الواحد يكون عالم فى الفيزياء النوويه او علوم الفضاء و(يغرق فى شبر ميه) زي ما بقولوا اولاد بمبه . او (القلم ما بزيل بلم) زي ما بقولوا كبارنا
التفتيحه هو زول صاحب حضور وذكاء اجتماعى وفاهم الدنيا والبشر ويستطيع الحياه فى اصعب الظروف وفى الغالب يملك كاريزما وشخصيه قياديه او بالمصري بيلعب بالبيضه والحجر
يعنى ليس كل مغنى او سياسي اولاعب كوره( تفتيحه)
Post: #26 Title: Re: اسطورة ان اولاد الوسط تفاتيح( امدرمان.مدنى.كوستى) Author: انس التوم احمد Date: 05-24-2011, 02:25 AM Parent: #25
الاخ ناظم سلامات
اعتقد أنوا الاخ اشرف السر ما قصر
ومدني ما محتاجه ندافع عنها
لكن نصيحتي ليك لو عايز
تعرف اولاد مدني تفاتيح ولا ما تفاتيح لاحظ الحاجه دي (تفتيحة ولا فارة) من خلال معاشرتك لاولاد مدني الاصلين او اي شخص تربى في مدني بتعرف الحاجات دي يا ولدنا مع فائق الشكر والتقدير
Post: #27 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-24-2011, 02:42 AM Parent: #26
انس تحياتى
تعرف عجبنى فى مناظره اوباما مع هيلاري كلينتون لما قالت هى tough اوباما قال ليها انا من جنوب شيكاغو والزول الشفت ما بقول شفت
ده فرق اولاد مدنى وامدرمان من باقى المدن الاحساس بالتفرد
Post: #28 Title: Re: اسطورة ان اولاد الوسط تفاتيح( امدرمان.مدنى.كوستى) Author: ايمان بدر الدين Date: 05-24-2011, 04:03 AM Parent: #27
Quote: ودمدني بعراقة عوائلها الكريمة – على سبيل المثال لا الحصر – آل الكارب وآل بانقا،وآل بحيري وآل الحضري وآل الليثي وآل البوشي وآل شدو وآل كنين وآل الخواض وآل عبدالرازق وآل أبوعيسى وآل كشك وآل الكنزي وغيرهم.. وغيرهم. عاصمة الجزيرة التي انتمت إليها حنتوب ، والتي قادت التعليم العام في السودان لما يقارب نصف قرن من الزمان ، وقدمت للسودان أرتالا من القيادات السياسية والإدارية والعلمية
تنسى آل عامر الجدهم ودمدنى السنى واولادة
المكى وهم مدنيين مكياب
دشين قاضى العدالة وهم ذرية الدشيناب
السنى وهم السنياب دفع الله وهم الدفعلاب
هؤلاء سميوا المدنيين نسبة لسيد البلد والقبة ودمدنى السنى
جدودى اهل مدنى فخر السودان وكمان مولودة فى امدرمان يعنى المفاتيح كبيرة
تفتيحة وشايلة مفاتيحها
اه قصرت ؟
Post: #29 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-24-2011, 11:23 AM Parent: #28
الاخت ايمان تحياتى
اعلامكم قوي فى الترويج لمدينتكم التى تحبونها
ولكم الحق
Post: #30 Title: Re: اسطورة ان اولاد الوسط تفاتيح( امدرمان.مدنى.كوستى) Author: اشرف السر Date: 05-24-2011, 11:34 AM Parent: #28
الاخت ايمان بدر الدين
لك العتبى حتى ترضين
Quote: تنسى آل عامر الجدهم ودمدنى السنى واولادة
المكى وهم مدنيين مكياب
دشين قاضى العدالة وهم ذرية الدشيناب
السنى وهم السنياب دفع الله وهم الدفعلاب
هؤلاء سميوا المدنيين نسبة لسيد البلد والقبة ودمدنى السنى
فقد خامرني احساس بأن ضرب الأمثلة عن عوائل مدني سيجلب لي التقصير لذا وضعت جملتي الاعتراضية
Quote: ودمدني بعراقة عوائلها الكريمة – على سبيل المثال لا الحصر –
ولا غرض شخصي لي في ذكر البعض واغفال البعض الآخر... فالمدنيين أهلي، وممن ذكرتين اعلاه اهل ونسابة كآل دشين وغيرهم.. فانا و بفخر من المدنيين أهل البلد!!! شفتي كيف!!! لكن هذا الفخر لا يجعلني أغمط ناس جزيرة الفيل او ود أزرق او بانت او فريق الصقور او غيرها من سكان أحياء ودمدني القديمة حقهم ونصيبهم في مدني..
انما ان اردت الحصر، فاحتاج لسنوات من التدقيق والدراسة لأخرج بسفر متكامل عن ودمدني وعوائلها الكريمة...
ايمان التفتيحة دا حيكون اسمك هنا
++ الأخ أو الاخت الذي ارسل لي في الماسنجر.. الماسنجر بسودانيزاونلاين معطل له فترة ولا يفتح...
Post: #31 Title: Re: اسطورة ان اولاد الوسط تفاتيح( امدرمان.مدنى.كوستى) Author: tmbis Date: 05-24-2011, 11:46 AM Parent: #30
Quote: الشفت ما بقول انا شفت
.. لكن أولاد أمدرمان أول ما الواحد يشوف ليهو زول من أي حتة كانت .. في العالم .. بيعرفو ليك من مشيتو جاي من وووين .. وماشي ووين وعشان شنـو ..؟ ضف لذلك مرات كدا .. بقوليهو قبيلك فطرته بي كدا .. يا اتغديت قبل اسبوع بي ملاح كدا .. صاح ..؟ أمــا بالنسبة للبجو قلبه .. وعايزين يعملو ليك فيها مفتحين واولاد قلبه .. بحكم انهم دخلو أمدرمان، بقوم اقرب واحد من اولاد قلبه بناديهو ليك .. ويسالو السؤال التقليدي .. هوووي هــا .. إنت من أولاد ووين .. من مدني مش كدا ..؟
لاحظ إنت من أولاد ووين دي عامله كيف ..؟
Post: #32 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-24-2011, 01:53 PM Parent: #31
تمبس ازيك هل يعنى ان اى امدرمانى الميلاد تفتيحه ؟
يا تمبس دفعنى لكتابة هذا البوست واحد قريبى اى ناس ما من امدرمان والاحياء العريقه كمان يقول ليك(ديل ناس دباس ساكت)
Post: #33 Title: Re: اسطورة ان اولاد الوسط تفاتيح( امدرمان.مدنى.كوستى) Author: محمد البشرى الخضر Date: 05-24-2011, 02:50 PM Parent: #32
اهو يا ناظم انت جاوبت براك
Quote: التفتيحه هو زول صاحب حضور وذكاء اجتماعى وفاهم الدنيا والبشر ويستطيع الحياه فى اصعب الظروف وفى الغالب يملك كاريزما وشخصيه قياديه او بالمصري بيلعب بالبيضه والحجر
اولاد مدني اي واحد تمسكو من طرف ح تلقاه شايل في جيب بيضة في الجيب التاني حجر أولاد امدرمان و كوستي بشيلو حجار بس
Post: #34 Title: Re: اسطورة ان اولاد الوسط تفاتيح( امدرمان.مدنى.كوستى) Author: Kostawi Date: 05-24-2011, 03:19 PM Parent: #33
أم در سياسة أم در وتر أم در كفر أم در كلو في كلو
الباقي كلو هباب ساكت نحن ناس الخرطوم ما بنعترف بيهم
Post: #42 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-24-2011, 05:49 PM Parent: #34
كوستاوي ازيك
اتخيل الوقت ده كلو قايلك كوستاوي طلعت امدرمانى
Post: #97 Title: Re: اسطورة ان اولاد الوسط تفاتيح( امدرمان.مدنى.كوستى) Author: عبدالله كع Date: 05-30-2011, 02:11 PM Parent: #34
سلام يا شفوت ...!! زي ماقال القائل ................... الشفت ما بقول انا شفت !
Quote: نحن ناس الخرطوم ما بنعترف بيهم
شوف يا منقا : ا ولاد الخرطوم بعرفو كلام بكره !!
Post: #98 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-30-2011, 02:23 PM Parent: #97
عبد الله كع مرحب بيك
المغنى غنى
( يا جمال النيل والخرطوم بالليل)
Post: #35 Title: Re: اسطورة ان اولاد الوسط تفاتيح( امدرمان.مدنى.كوستى) Author: ود الخليفه Date: 05-24-2011, 03:23 PM Parent: #33
السلام عليكم
دار حديث بيني وبين احد الاصدقاء عن حب الامدرمانيين لبلدهم
فاحببت ان اختصر له دونما ارهاق
اي شخص يحب مدينته
ولكن اهل امدرمان يعرفون اكثر من غيرهم التعبير عن هذا الحب
قرات اهداء كتبه شوقي بدري بخط يده في كتاب اهداه للمرحوم كمال سينا
الي كمال سينا
احد القلائل اللذين يحبون امدرمان اكثر مني
ــــــــــــــــــــ مع احترامي لكل اللذين اوردهم اشرف السر يبدو ان حدود مدني قد بدات بتفتيش سوبا مرورا بالحوش انتهاءا بسنار !
Post: #39 Title: Re: اسطورة ان اولاد الوسط تفاتيح( امدرمان.مدنى.كوستى) Author: اشرف السر Date: 05-24-2011, 05:31 PM Parent: #35
Quote: مع احترامي لكل اللذين اوردهم اشرف السر يبدو ان حدود مدني قد بدات بتفتيش سوبا مرورا بالحوش انتهاءا بسنار !
اها دا كلام تفاتيح اسه؟
ودمدني عبرت حدود السودان المعروفة ..
من من اهل امدرمان انتشر فنه خارج السودان وتغنى له أي شخص خارج حدود السودان؟
أهل مدني يباهون بالكاشف الذي عبر فنه من السودان وعبر مصر وتغنى بأغانيه أهل الشام! فهل هناك تفتيحة اكتر من كدا؟
Post: #43 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-24-2011, 05:57 PM Parent: #35
ود الخليفه سلام
الترويج لتميز المدن غير موجود عند اولاد كثير من المدن السودانيه العريقه اديك امثله
الابيض عروس الرمال
عطبره عاصمه الحديد والنار
بورسودان عروس البحر الاحمر وميناء السودان الفاتح على الدنيا
Post: #36 Title: Re: اسطورة ان اولاد الوسط تفاتيح( امدرمان.مدنى.كوستى) Author: ismeil abbas Date: 05-24-2011, 03:26 PM Parent: #33
Quote: من رسخ هذا المفهوم؟
نحن
غيرنا لايعرفنا بقدر ما نعرف أنفسنا..أنا لاأعرف أولاد كوستى ولا أظن أنهم غير الذى تقصد..أولاد مدنى تفتيحة..وأم درمان لايختلف عليها إثنين.
ألأسطورة لم توجد من فراغ إنها تراكمات أجيال من أقوال حول هذه ألأماكن خلدت هذه المقولة.
نحن الذين نصنع للأماكن الجمال ونجعلها تفوح عبيرآ بسيرتها العطرة.
أم درمان كم هائل من الشعراء تغنوا فيها وتغزلوا...وأنا أم درمان.
تحياتى اخى كاظم..
Post: #37 Title: Re: اسطورة ان اولاد الوسط تفاتيح( امدرمان.مدنى.كوستى) Author: وليد محمد المبارك Date: 05-24-2011, 04:26 PM Parent: #36
يلا قول انت من ياتو محطة قطر
وجيب لستتك وانا بجيب لستتي
وبنعرف بعد داك من التفتيحة ومنو الاتاح ليه منبر بكري ده فرصة ما بحلم بيها
Post: #38 Title: Re: اسطورة ان اولاد الوسط تفاتيح( امدرمان.مدنى.كوستى) Author: ود الخليفه Date: 05-24-2011, 04:48 PM Parent: #37
Quote: يلا قول انت من ياتو محطة قطر
الشفت اخوي ما تضايق الولد ولدنا بينا وبينو كبري شمبات وقيل الكبري الجديد
Quote: مكان الميلاد فى السودان: الخرطوم بحري
Post: #40 Title: Re: اسطورة ان اولاد الوسط تفاتيح( امدرمان.مدنى.كوستى) Author: ود الخليفه Date: 05-24-2011, 05:43 PM Parent: #38
Quote: أهل مدني يباهون بالكاشف الذي عبر فنه من السودان وعبر مصر وتغنى بأغانيه أهل الشام!
اخونا اشرف
تحياتي
هو الكاشف دا كان ما طار بي غرب السوق كان في زول بعرفو؟
Post: #46 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-24-2011, 06:10 PM Parent: #37
وليد ازيك
قريبى قال لى واحد اتشاكل معاهو
(انتو زمان بتجوا جارين ورا القطر بنفك ليكم الرغيفه سيافى الواحد يجى مبروش على قدومو )
ود الخليفه جاوب عليك ولستى ما بتفدر عليها
Post: #44 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-24-2011, 06:02 PM Parent: #36
المحترم اسماعيل عباس تحياتى
يبدو انك محب لامدرمان ولكن من غير تعصب
Post: #41 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-24-2011, 05:46 PM Parent: #33
ود البشري ازيك
انتم مصنفين اقاليم وضهاري على ما يبدو من الامدرمانيين
Post: #45 Title: Re: اسطورة ان اولاد الوسط تفاتيح( امدرمان.مدنى.كوستى) Author: Khalid Kodi Date: 05-24-2011, 06:09 PM Parent: #41
ناضم ابراهيم،
تحياتى:
هذا المنبر حقيقة عجيب.. فكلو خليناهو كما دايرين تقارنوننا بى ناس امدرمان وكوستى؟ (:
.
Post: #51 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-24-2011, 09:48 PM Parent: #45
خالد كودى ازيك
كان لسانك حالك يقول (ياهو الفضل)
Post: #47 Title: Re: اسطورة ان اولاد الوسط تفاتيح( امدرمان.مدنى.كوستى) Author: waleed dawash Date: 05-24-2011, 06:12 PM Parent: #41
Quote: الشفت اخوي ما تضايق الولد ولدنا بينا وبينو كبري شمبات وقيل الكبري الجديد
قويه قويه
Post: #50 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-24-2011, 09:43 PM Parent: #47
وليد ازيك
فى مقوله ما عارف منو القالها وماعارف هى صاح والا غلط
(السكن فى بحري والشغل فى الخرطوم والفارغه والمقدوده فى امدرمان)
Post: #48 Title: Re: اسطورة ان اولاد الوسط تفاتيح( امدرمان.مدنى.كوستى) Author: Safia Mohamed Date: 05-24-2011, 06:18 PM Parent: #41
سلام اها وبنات امدرمان/ كوستي/ مدني كما حددت انت بيقولو علي روحهن شنو؟؟؟؟؟؟؟؟؟؟؟؟؟؟؟؟؟؟؟؟؟
Post: #49 Title: Re: اسطورة ان اولاد الوسط تفاتيح( امدرمان.مدنى.كوستى) Author: أحمد ابن عوف Date: 05-24-2011, 06:41 PM Parent: #48
سلام يا ناظم
التفاتيح اولاد الخرطوم (الخرطوم المقصودة هنا غير خرطوم عموم اهل السودان)
امدرمان بالنسبة لدينا سفر شاق، وناسها حلوين، وبنحن عليهم في امور الشفتنة وشغل التفاتيح ______________ تخريمة مرة اخوي كان مستعجل شديد، وهو واقف قدام نادي التنس، وقال يملح مع اول عربية، الزول وقف اخوي قال ليهو، ماشي الخرطوم، بتاع العربية بصوت لا يخلو من عصبية واستغراب "اومال هنا كسلا" لوووووووووووول
Post: #53 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-24-2011, 09:58 PM Parent: #49
احمد ابن عوف ازيك
انت من وين فى الخرطوم اصلها خشم بيوت غايتو اولاد (الخرطوم تلاته ) عاملين تفاتيح
Post: #52 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-24-2011, 09:51 PM Parent: #48
اختى صفيه تحياتى
انتى من ياتو مدينه ورايك شنو؟
Post: #54 Title: Re: اسطورة ان اولاد الوسط تفاتيح( امدرمان.مدنى.كوستى) Author: ايمان بدر الدين Date: 05-24-2011, 11:37 PM Parent: #52
Quote: لسكن فى بحري والشغل فى الخرطوم والفارغه والمقدوده فى امدرمان)
ياتو شغل يا ربى يكون فى سوق امدرمان قدام الجامع الكبيرولا حى الشهداء ولا اظن فى شارع الدكاترة الشاقى سوق امدرمان
والله اظنوا فى الاذاعة ولا فى التلفزيون يكون !!!! امكن يا ربى يكون الزول القال الكلام دا ما عندوا زولا قريب لية فى البرلمان من زمان كدى ولا شنو؟؟؟ البرلمان دا فى امدرمان قريب كوبرى امدرمان الخرطوم
اها كان جاء المطار الجديد الا كان ناس الخرطوم يرحلوا امدرمان باقى بيكون بعيد خلاص والمعايش جبارة
المهم لاعبين الكورة المحترفين والمدربين لازم يسكنوا امدرمان عشان قريبة من شغلهم فى الاندية ليل نهار
قصر الصداقة والشباب برضو للترفية وفية ناس شغالة بتجى من الخرطوم للمليانة الما فارغة خليكم من دور الاحزاب والموسيقى والمسرح ديل حقهم براة
وبجيكم راجعة لمدنى والمدنيين اهلى دى بس امدرمان المولودة فيها
Post: #55 Title: Re: اسطورة ان اولاد الوسط تفاتيح( امدرمان.مدنى.كوستى) Author: البحيراوي Date: 05-25-2011, 08:46 AM Parent: #54
الأخ ناظم إبراهيم
تحياتي - يا زول أهلنا قالوا العود كان ما فيه شق ما بقول طق. المعنى يعني حكاية أولاد الوسط كلهم تفاتيح دي لا تخلو من الحقيقة برغم وجود ما هو عكس أحيانأً وبنسبة ما كبيرة . ولست الأمر تنميط كما ذكر أحد الإخوة لكن واقع الحال يدل علي ذلك والدليل أن الكل يتمنى أو يسعى ويكابد لأن يكون له وجود في هذه المدن برغم حصر الأماني في حيز المركز الصغير في الخرطوم وأم درمان وبحري وحتى بقية المدن الأخري الأكثر قرباً للخرطوم تجد فيهم من يسعى للحاق بالمركز مع سهولة ذلك وقرب المسافة الثقافية بين تلك المدن ومدن كوستي ومدني. ومع وجود فوارق تمشي بيننا وميزات إضافية تميل الكفة لصالح أولاد المركز من ثقافة وماديات لا حصر لها تجعل المركز صاحب باع أطول وحضور أكثر في وجدان هؤلاء مقارنةً بالهوامش. ونسبية هذه الهوامش. مثلاً في داخل حيز المركز الكبير تجد في حي مثل أم بدة بأم درمان واحده رحلت من أحياء ود نوباوي وبيت المال والملازمين وأب روف تميز نفسها عند التعارف بأنها بت أم درمان . حتى أن الجميع اصبح لا يناديها إلا بت أم درمان !
بحيراوي
Post: #56 Title: Re: اسطورة ان اولاد الوسط تفاتيح( امدرمان.مدنى.كوستى) Author: keiga2000 Date: 05-25-2011, 09:17 AM Parent: #55
اخي ناظم
مدني الحضاره مدني النضاره مدني العلم مدني الفن مدني الكوره
مدني الجساره
وحبيت عشانك مدنـــــــــــــي
مع تحياتي
أبومصطفى
Post: #57 Title: Re: اسطورة ان اولاد الوسط تفاتيح( امدرمان.مدنى.كوستى) Author: وليد محمد المبارك Date: 05-25-2011, 09:42 AM Parent: #56
يا ناظم
Quote: ود الخليفه جاوب عليك ولستى ما بتفدر عليها
صدقني بتتعقد
خليك من امدرمان كلها انا بديك الناس الحوليني ساكت شوف بتصل معاهم لي شنو من عندك في مدينتك كلها
جدي لامي لعب في الهلال سنة 33 وكان من مؤسسينو (الخليفة فضل المولى ) جدي لابوي اول زول ساق بص في الخرطوم ( ابوشيبة )
اتنين من خيلاني درجة تانية لعبوا في المريخ وكت المريخ كان مريخ ( عبد الله وصلاح عباس ) عمي من الدرجة التانية حكم البلد دي 16 سنة ( نميري ) زوجتي ابوها وعمها من شعرا الحقيبة ( فلاح)
شارع بيتناسكنو فيه الكاشف ومحمود فلاح والرشيد المهدية حوليني ساكنين لسته من البشر ابسطهم محجوب شريف وابوالروس وعتيق والجابري
ده في الثورة وانا لسع ما اتحدثت ليك عن امدرمان القديمة
لست شنو يا اب لست
انت ناسي انو امدرمان دي مرقت منها الكور ( هلال مريخ مورده) والغنا ( الحقيبة كلها ) والسياسة ( لستة طويلة )
ياخ على الاقل المهدي وكت جا يختار مدينة اختارها هي
Post: #74 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-25-2011, 05:06 PM Parent: #57
وليد ازيك
عارف فى اتنين فى بحري كانوا ممكن يبستفوا شفوت امدرمان كلهم
الاخوين ايوب فارس وسليمان فارس(السد العالى)
سليمان فارس لما كان بلعب فى الهلال واحد من اولاد امدرمان اسمو التقر قال العب يا سليمان قام رد ليهو بلهجته المصريه (حتعمل بيها ايه يا تقر)
خد يا شفت
عبده الشيخ احرف جناح شمال فى تاريخ السودان وياما قاس وبيضها لباكات امدرمان
شيخ ادريس كباشى بدون تعليق
المفك احسن لاعب نص للبفهمو كوره
حتى الفتونه فى امدرمان عضلات وفى بحري (مخمخه)
عندك (الكضمى) احرف جزار ما يطلع منو ربع كيلو ولكن فاق (ال كابونى)
ود الشعبيه(الواثق صباح الخير) كان زي روبين هود يشيل من الاغنياء ليساعد الفقراء
يا عزيزي ليس دائما(الكثره تغلب الشجاعه)
Post: #76 Title: Re: اسطورة ان اولاد الوسط تفاتيح( امدرمان.مدنى.كوستى) Author: وليد محمد المبارك Date: 05-25-2011, 05:25 PM Parent: #74
حبابك يا ناظم قلت كده
هاك طيب
نجيك للكورة
برعي القانون بشرى وهبة
جكسا قاقرين الرشيد المهدية
وممكن امسك ليك لسته تخجل من الجبتهم ديل
ياخ كفاك جكسا وبرعي القانون وجاد الله والدحيش وقاقرين
قلت لي عبدو الشيخ ما بتعرف عادل امين
كان جيت للفتونة
امشي اقراء لي شوقي بدري بديك تاريخ الفتونة على اصولو
وخلي تمبس ده يحكي ليك عن اولاد الحنان
وناس الجابا ( المعلم ضلف ) واخرين
الواثق صباح الخير قلت ليك
شوف الزول ده وتاريخو العاملي خليك من المحلي لو حكيت ليك عن قصصو المحلية حا تتعقد
ده هاشم بدر الدين ود العباسية ممكن احكي لي عن فردو ناس ود الصبي ومجتبى واخرين
Post: #81 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-25-2011, 09:39 PM Parent: #76
وليد ازيك
انا ما بميز بحري لكن كل مدن السودان زاخره بالمواهب و اعطت البلد رجال افذاذ وليست امدرمان وحدها
عندى كم سؤال
ما هو تعريف الامدرمانى الاصلى هل يشمل ساكنى الامبدات وما جاورها والثورات التى وصلت لحدى الابيض
هل تتفق معى ان امدرمان (لحم راس)
ايهما اهم الكم ام الكيف
Post: #58 Title: Re: اسطورة ان اولاد الوسط تفاتيح( امدرمان.مدنى.كوستى) Author: عبدالكريم الامين احمد Date: 05-25-2011, 09:48 AM Parent: #56
هلا يا ناظم وبوست نوعي ومميز بروحه الجميلة.. وعلي سيرة كوستي عندي 2 اصحابي مع ابناء كوستي (المهندس شلبي و المهندس سامي حجازي) وديل عندهم قناعة تامة بان كوستي ناسها اكثر ناس تفاتيح ليس في السودان بل في كل العالم والكلام ده بقولو ليك بقناعة تامة وحكاوي حقيقية من عوالم كوستي الغميسة,,,!! وطبعا هما احسن اثنين في العالم ممكن يونسوك عن مدينتهم... مدني لا يعلي عليها وجخانينها واحيائها ملانة بنبض التفاتيح من كل صنف ونوع وقادرين دوما علي ادهاشك...!! وبصراحة ما تشكر لي عيال الخراطيم كان (ام درمان - وكان بحري وكان الخرطوم شخصيا) والبلد من ما تجيها زائر وتخرط اولادها في البلي بالنهار وبالعصرية تحاور ميدان كورتهم كلوووو وفي المساء تخرطهم في الجكسوس حيث الحفلات (ادفرها طواالي لوراء في بورصة التفاتيح) وفرتق منها تاني يووم باول لوري الي حيثما اتيت لوووووول الابيض بالمناسبة مدينة ملانة وشحمانة بالتفاتيح طبعا في مدن الاضواء عليها ما كثيرة (فحي الملكية جوبا) وحي كتور احياء فيها تفاتيح علي مستويات رهيبة وحلق اولادها الي مدارات بعيدة بوعي وعمق وشفتنة كبيرة في كل مطبات الحياة... نيالا برضها مووهينة
Post: #59 Title: Re: اسطورة ان اولاد الوسط تفاتيح( امدرمان.مدنى.كوستى) Author: وليد محمد المبارك Date: 05-25-2011, 10:02 AM Parent: #58
Quote: والفارغه والمقدوده فى امدرمان
يا الله الفارغة والمقدودة دي بعملها وين
في استاد الهلال ولا المريخ ولا المورده ؟
ولا يار بي في الازاعة؟ يمكن في التلفزيون او قناة النيل الازرق
ولا احتمال في المجلس الوطني
ياخ نحن (عوضية اسمالك) ساكت لو فكينها ليك بتعادل جميع مشاهيرك
Post: #60 Title: Re: اسطورة ان اولاد الوسط تفاتيح( امدرمان.مدنى.كوستى) Author: shammashi Date: 05-25-2011, 10:19 AM Parent: #59
السادن سبدرات مرة في التلفزيون قال الخرطوم دي من القصر الجمهوري وحدها نمرة 2 الواحد تلقاهو ساكن الدروشاب ويقول ليك أنا من الخرطوم م وكذلك أم درمان الواحد تلقاهو مولود تحت جبال المرخيات ويقول ليك أنا من أمدرمان (دي لم يقلها سبدرات)
لكن غايتو أنا عشت في كوستي فترة وأولادا كلهم شرامة. أما ناس مدني ديك فشرامة بفن وذوق ورقي ووعي. لكن لا أدري سبب العداوة المتأصلة بين ناس مدني وناس الخرطوم. قالوا المطرة صبت في مدني والجماعة طلعوا كراسيهم العصرية وقعدوا للونسة. واحد قال ليهم والله أسي تلقى ناس الخرطوم ضارباهم جنس كتاحة. ياخي مدني جابت ود اللمين وعركي تاني عايزة شنو؟ مع إنو أنا لا من مدني ولا من "الخرتوم".
Post: #66 Title: Re: اسطورة ان اولاد الوسط تفاتيح( امدرمان.مدنى.كوستى) Author: ايهاب Date: 05-25-2011, 10:47 AM Parent: #60
ناظم والحضور سلامات البوست دا ممكن يسبب حرب اهليه مدني ما محتاجين ندافع عنها العارف عزو قالو مستريح لكن عموما سوالك ما منطقي لانو الوضع اختلف حاليا لا سكان مدني هم اهل مدني ولا سكان امدرمان هم اهل امدرمان السودان عموما مافيهو زول مفتح هسه غير الكيزان ممكن نقول خلينا نتكلم باعتبار ما قد كان وقول للزمان ارجع يا زمان كل التحايا
Post: #80 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-25-2011, 09:29 PM Parent: #66
ايهاب ازيك
والله بتفق معاك لحد كبير نحن فى زمن الفهم فيهو لمعنى التفاتيح مختلف
Post: #77 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-25-2011, 06:12 PM Parent: #60
شماسى ازيك
سبدرات بتاع (انت كلك زينه وعايمه كالوزينه) ده طلع دقس
شفت ال (هؤلاء) عملوا فيهو شنو
Post: #61 Title: Re: اسطورة ان اولاد الوسط تفاتيح( امدرمان.مدنى.كوستى) Author: tmbis Date: 05-25-2011, 10:19 AM Parent: #59
Quote: والبلد من ما تجيها زائروتخرط اولادها في البلي بالنهار وبالعصرية تحاور ميدان كورتهم كلوووو وفي المساء تخرطهم في الجكسوس حيث الحفلات (ادفرها طواالي لوراء في بورصة التفاتيح) وفرتق منها تاني يووم باول لوري الي حيثما اتيت لوووووول
دقيقة يا اقليمي إنت .. دقيقه بس .. دي ياتو امدرمان دي ..؟ البتخرت اولاده في البلي وفي الجكسي .. والله دي إلا تكون امدرمان فلاتـه بتاعت الصعيد ديك .. يا كيكي ياخ نحن كنا بي صدد إنو نعمل ليك اقامة دائمة في امدرمان لما لمسناه منك من شوية رقشاية كدا بتاعت فتحنه .. تجي تخرتنا اولان لين في العام الفين وحداشر ..؟ اقوليك حاجة..؟! بالنسبة للبلي .. كان عندنا (مووورلي) مورلي دا .. وحيات خوتك .. برسلمه ليك زي بتاعين البلياردو العالميين .. بقوليك انا ح اعمل كدا وكدا .. وقبال ما تلعب الجله حقتك .. بقوليك كلمة واحدة .. (إنت إنتهيت) واخد بالك ..؟ إنت انتهيت دي بقوله ليك قبال ما تلعب .. بعداك ما عندو اي علاقة بالبلي القاعد علاقتو مع الجلل والضراريب .. من الشخيت بلم فيك طقطقه بي نفس خطوط الكنتور الرسمه ليك .. ولو كان في رسم بياني .. يوضح ذلك .. كان عرفته حاجة .. وإنت كزول بتاع رفع مساحي بتكون فاهم حاجة .. اما الكورة .. والله يا كيكي .. بتتعب جنس تعب .. يوم في نفس الزقاق البنلعب فوقو البلي دا .. انا طالع من أول الشارع لقيت ليك .. (بكووور) .. لامي ليك في (صجـــة) غسيل في الدافوري .. شابكو ليك طراخ طاخ طراخ طاخ .. وصجه بينطط ما لاحق الكورة .. زي بتاعت الحضري بالضبط بعدين كلما يقوم لي فوق بكوور بيزلقه ليهو بي تحت .. ولما يقوم لي فوق زيادة برفعه ليهو .. المهم انا لما وصلته لحدت عندهم كنت ميت من الضحك .. قمت نطيت شلت الكورة ووقفته العرض دا .. ضجه اخد ليهو قعده في الضل .. لقيت عيونو بقت بيضاااا .. ونفسو قايم .. تعرف إلا رشيتو ليك بي موية حتين صحى .. من الدوخه دي .. قمت ارهبتهم ليك قلت ليهم والله تاني اللقاكم لاعبين هنا بتعرفو حاجة .. دا علي نطاق الشفع طبعا .. اها كان جيت للناس الكبار .. يعني عايز تغلب لي ناس .. كمال عبد الوهاب واللا ناس قاسم أحمد عثمان .. واللا خليك من ديل .. ياخ والله يا كيكي لو كان حظك سمح وعرفناك بدري .. كان نجيبك تلعب مع عمر طبيز .. والله دا يغسلك ويحاورك .. ولا بجيب فيك قوون .. بس يلم فيك قلبان .. قلت ليك قبل كدا عمر طبيز دا حاور ليك عاطف فرنب .. بالجناح .. عاطف بدل ما يشوت الكورة من طبيز .. ما عرف مكانه بي ووين .. الجدادة جات طالعه من بيت ناس احمد الطيب .. قوم يا عاطف توووفك .. عكس لي الجداده .. وانا واقف ليهو قوون .. وحيات خوتك جاني الريش طاير .... .. .. جكس يا كيكي ..؟ إنت جادي ..؟ ياتو جكس البتجي تخرتو في أمدرمان دا ..؟ الكلام دا ووين في الحياة ..؟ ياخ اقل جكساية .. كان عايز تحنك معاها بتقوليك .. هووي ها .. إنت من زمن يا تتي ..؟ يا كمان قالت ليك إنت من وين في الحياة دي ..؟
كيكي عليك الله ارخي ياخ الدنيا احتفالات ثورة ..
Post: #62 Title: Re: اسطورة ان اولاد الوسط تفاتيح( امدرمان.مدنى.كوستى) Author: tmbis Date: 05-25-2011, 10:25 AM Parent: #61
يا كيكي .. إنتو كان عندكم شطرنج ..؟ بصورة أوضح .. كنتو بتلعبو شطرنج في الجخانين حقتكم ديكك ..؟ دقيقه خليني اجي احكي ليك بي ود الحنان .. وانيس .. تقولي نخرتكم في البلي ..؟
Post: #63 Title: Re: اسطورة ان اولاد الوسط تفاتيح( امدرمان.مدنى.كوستى) Author: tmbis Date: 05-25-2011, 10:39 AM Parent: #62
معليش يا ناظم .. لكن كيكي هيج اشجاني شديد ..
Post: #64 Title: Re: اسطورة ان اولاد الوسط تفاتيح( امدرمان.مدنى.كوستى) Author: وليد محمد المبارك Date: 05-25-2011, 10:40 AM Parent: #62
Quote: دقيقه خليني اجي احكي ليك بي ود الحنان
اوعك يا تامبا
دي اسرار حربية ما تفشيها ..
Post: #65 Title: Re: اسطورة ان اولاد الوسط تفاتيح( امدرمان.مدنى.كوستى) Author: عبدالكريم الامين احمد Date: 05-25-2011, 10:42 AM Parent: #61
Quote: والله دي إلا تكون امدرمان فلاتـه بتاعت الصعيد ديك
هلا يا تمبس ويااخ خراطيم اشاعة انتو حتي الاقاشي بتاعنا بتاع(علي برنجي) سرقتو من الكراكير دي وضربتو(بوهية) و كترتو ليهو المحلبية وقلتو (ميد ان امدرمان) بالله فكنا ياااخ وتصدق يا تمبس (اعزل ليك)2 نشالين من الخجانين ديل وافكهم ليك في سوق امدرمان ده في ساعة ونص بس ينشلو ليك سوق ام امدرمان ده كلو ولو شدو حيلهم ممكن يباصروا السوق العربي بدون ما يحس بيهم زول واخر اليوم تلقاهم اخر قرقر ومرايس في اطراف مايو....(وطبعا دي شفتنة نوعية مرفوضة ولكنها برضو ممكن توريك حاجة عششان تاااامن -- الكورة دي زولنا زول الاقاليم بجي دايش اول ايام وصاح بنخلع من الفلاشات وكواريك جماهيركم دي ولكن لو لحق ثبت ليهو كورة بالكعب وجر نفس طويل تاني مستعد يرقص استادات الخراطيم دي هلال ومريخ وموردة واستاد التحرير زاااتو ولو لحقتو جبتو دار رياضة امدرمان تاني يوم جلاكين المساطب العجيبة ديك كلهم تلقاهم في السوق بشتروا عمم جديدة لانو ولدنا بكون خلاهم يحرقو العمم
يازول السودان ده لورا كده فيهو مصايب ومحن بس خراطيم اعلام قووووي ورادي فصيح نسوي معاكم ششنوو عاد لووول
وسنتابع
Post: #67 Title: Re: اسطورة ان اولاد الوسط تفاتيح( امدرمان.مدنى.كوستى) Author: tmbis Date: 05-25-2011, 12:12 PM Parent: #65
Quote: اوعك يا تامبا دي اسرار حربية ما تفشيها ..
.. والله يا شفت كان اديتني الفاتحة وخليتني امنطق ليك كيكي دا بي خطة جندين وطابية بتاعت ود الحنان يكون كويس .. لكن يا زول ماف عوجه .. لكن اوعدك كلما كيكي يفرفر .. بجدع ليك ليهو قنبلة دخان ..
Quote: وتصدق يا تمبس (اعزل ليك)2 نشالين من الخجانين ديل وافكهم ليك في سوق امدرمان ده في ساعة ونص بس ينشلو ليك سوق ام امدرمان ده كلو ولو شدو حيلهم ممكن يباصروا السوق العربي بدون ما يحس بيهم زول واخر اليوم تلقاهم اخر قرقر ومرايس في اطراف مايو
.. والله يا كيكي دي بس بالغته فيها .. غايتو دي إلا تحصل في ميدان الأمم المتحدة .. يا كمان جماعتك ديل ينمشو ينشلو ليهم اقليميين زيهم في سوق امدرمان .. اصلو نحن البجيب لينا الهوا الاقليميين البجو يشبكوك نحن من امدرمان ديل .. ياخ اقوليك حاجة .. والله ووحيات خوتك يا كيكي .. نحن لما كنا في الثانوي .. كنا في وادي سيدنا امدرمان .. مرات بكون عندنا شغل في * الشهداء امدرمان .. لما مثلا .. الحصص تكون ما شغاله معانا .. تعرف .. عادي جدا الحصة التانية والتالتة دي بنكون شغالين .. مادة (سلوكية) في الشهداء .. عندنا يعقوب موسى من اولاد حلتنا .. كان اخطر زول ممكن يعرف ليك النشال كان طارة في المركزية ايام المركزية مركزية .. وطبعا بالمقابل علمنا الحركة دي .. من تصرفات محددة للنشال .. يللا بنمشي الشهداء .. بتلقى يعقوب دا قاعد ليهو في كرسي مهتوك من النص .. كرسي بلاستيك .. بقوم بنادي ليك النشالين ديل بالواحد تعال يا وهم إنت .. هووي يا فارة تعال اقعد هنا .. تعرف بعد ساعة كدا .. بتلقى الزول دا لامي ليك زي كم وخمسين نشال مقعدم في الواااطة .. في وضعية ارنب نط .. اللحظة ديك ماف زول بكون اتنشل في الشهداء .. يللا نحن لما يعقوب يكون مافيش .. بنجي السوق دا نلقط الفارات بدلو .. ونكون لابسين لبس الثانوي العالي .. اقوليك حاجة .. في واحدين عديل كدا كانو بيدفعو مرتبات شهرية عشان يشتغلو في المنطقة دي كنشالين .. لو كنا نحن في واللا مافيشين .. مرة ياكيكي (الجلدة) حقتي وقعت في الخرطوم وقفته اشتري لي تمباك .. وبيني وبينك كنت خرمان شديد .. سفيت وقامت بي .. شكلي جيت ادخل الجزلان في الجيب قمته دخلتو في الهوا .. المهم وصلته البيت واخدته نومتي .. اسمع ليك الباب بيدق .. طلعته لقيتو ليك .. واحد من المكداكية بتاعين الخرطوم .. جاب لي الجزلان لحدت البيت في امدرمان .. لانو لقى البطاقات .. وعرف شكلي .. حسع دا يا كيكي .. كان لما في اي واحد فارة اقليمي .. والله كان نفضو ليك نفييض .. تقولي يمشي يضرب بيها مرسي في مايووو ..؟
Post: #68 Title: Re: اسطورة ان اولاد الوسط تفاتيح( امدرمان.مدنى.كوستى) Author: ismeil abbas Date: 05-25-2011, 03:10 PM Parent: #67
شماسى لك التحية...
Quote: السادن سبدرات مرة في التلفزيون قال الخرطوم دي من القصر الجمهوري وحدها نمرة 2 الواحد تلقاهو ساكن الدروشاب ويقول ليك أنا من الخرطوم م وكذلك أم درمان الواحد تلقاهو مولود تحت جبال المرخيات ويقول ليك أنا من أمدرمان (دي لم يقلها سبدرات)
سبدرات أعتقد كلامه صحيح حيث أن من القصر الجمهورى وأنت متجه جنوبآ معظمها ليست أماكن سكنية إما مصالح أو وزارات أو مؤسسات
أما عن أم درمان فجبال المرخيات ضمن أم درمان وإيه الغضاضة فى ذلك.
كل الأمتدادات السكنية أتت توسعة لتفرج عن الكثافة السكانية للعواصم.
أمبدات والثورات لو تلاحظ كانت إمتداد لكل سكان أم درمان فشمالآ رحلو ا ناس ودنوباوى وودرو وأبوروف وحى السوق للثورات..
وناس العباسية والعرضة جنوب وأبوكدوك والموردة وابوعنجة رحلوا إلى أمبدة جنوب..وناس حى العرب والعرضة شمال وما جاورها إتجهوا إلى أم بدة شمال,
نحن كل من ينتمى إلينا نعتز به ليس لنا حدود لا المرخيات ولا المشدودات...
تقديرى للجميع...
Post: #69 Title: Re: اسطورة ان اولاد الوسط تفاتيح( امدرمان.مدنى.كوستى) Author: البحيراوي Date: 05-25-2011, 03:25 PM Parent: #68
Quote: والبلد من ما تجيها زائر وتخرط اولادها في البلي بالنهار وبالعصرية تحاور ميدان كورتهم كلوووو وفي المساء تخرطهم في الجكسوس حيث الحفلات (ادفرها طواالي لوراء في بورصة التفاتيح) وفرتق منها تاني يووم باول لوري الي حيثما اتيت لوووووول الابيض بالمناسبة مدينة ملانة وشحمانة بالتفاتيح
العزيز عبد الكريم
تحياتي - يا أخي مالك علي عيال أم درمان بدور تزعلهم ليه . يا زول دا جكسيهم ما بتخرط ولا حاجة يعني بمجرد ما تجي في الجكس والبلي تقوم تقول بنخرطوا . استاذنا الأمين مجاور بخور طقت الثانوية الله يرحمه ويغفر ليه يقول ليك أنتو قايلين الكلام دا كدا لا لا لا . عشان كدا يا عبد الكريم كلام الخرط في البلي والجكس دا لا لا لا . ونحن لا زلنا بنتعلم من عيال أم درمان ديل . ديل يا أخي ناس أب روف سمع وشوف. والحق يقال .
بحيراوي
Post: #70 Title: Re: اسطورة ان اولاد الوسط تفاتيح( امدرمان.مدنى.كوستى) Author: أحمد ابن عوف Date: 05-25-2011, 04:28 PM Parent: #69
سلام يا ناظم
Quote: احمد ابن عوف ازيك
انت من وين فى الخرطوم اصلها خشم بيوت غايتو اولاد (الخرطوم تلاته ) عاملين تفاتيح
اولاد تلاتة على العين والراس
انا من الخرطوم ذاتها، او بطريقة اوضح، لمن ابهاتنا كانوا لسه يافعين بنصحوهم ما يعدوا سكة الحديد جنوبا بعد المغرب، اي ما يمشوا ديم سلك وديم التعايشة وديم سلمان، التي هي نمرة واحد واتنين وتلاتة اليوم
Post: #83 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-25-2011, 10:03 PM Parent: #70
احمد ابن عوف ازبك
كخرطومى اصلى ورينا اولاد الخرطوم تفاتيح كيف
Post: #75 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-25-2011, 05:11 PM Parent: #58
كيكى مرحب بيك ومنور البوست
شايف وليد الشفت بيتكلم عن السمك
عليك الله احكى ليهم هو وتمبس عن( سمك كوستى)
Post: #73 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-25-2011, 04:44 PM Parent: #56
كيقه ازيك
كعاشق لمدنى اهديك الحكايه دى عن الساحر الاسطورة الفاضل سانتو
جئت لتمارين المريخ وقد وجدت في تلك الفترة بشارة وسليمان وكاوندا وكمال عبد الوهاب والجيلي عبد الخير والحارس عبد العزيز وجاد الله وسانتو الخرطوم (عبيد كبار) بلغة الكورة. وكانوا يلعبوا لي الباص في ضهري مرة وفي رقبتي مرات عشان يفشلوني ودي بعملوها لأي لاعب جديد عشان يتحرج مع الجمهور ويغادر المريخ.. وفي احدى المرات لعبوا لي الباص في ضهري فأخذته بالكعب للامام وسددت في المرمى وسط ذهول اللاعبين والجماهير والحارس عبد العزيز الذي فشل في صد الكرة او ابعادها عن مرماه. ومن اليوم داك عبد العزيز حراس المرمى طارت ليهو!!. فصفق لي منصور رمضان الذي كان يدرب المريخ وهنأني على المستوى وبعد ذلك اصبحنا اصحاب مع ناس بشارة وكاوندا وفتحوا لي دارهم واذكر ان زميلي الشايقي كان مهددا بالشطب من كشوفات المريخ وهو يلعب مدافعا وكان لصيقا بي فقلت له انا ما حأخليهم يشطبوك فكنت اراوغ جميع المدافعين وعندما اواجه الشايقي أخلي يشيل مني الكرة فيقوم الجمهور يصفق له ويشيد به فبقي الشايقي لموسم آخر في المريخ ولم يشطب وظل يحمد لي هذا الموقف حتى بعد شطبه من المريخ.
Post: #72 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-25-2011, 04:33 PM Parent: #55
عزيزي البحيراوي تحياتى
وشكرا لمداخلتك القيمه
Post: #71 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-25-2011, 04:29 PM Parent: #54
الاخت ايمان
كملى الحكى وبعدين بنرد
Post: #78 Title: Re: اسطورة ان اولاد الوسط تفاتيح( امدرمان.مدنى.كوستى) Author: محمد البشرى الخضر Date: 05-25-2011, 06:19 PM Parent: #71
انا ما من مدني يا ناظم لكن الحق يقال في اي مجتمع من زمن الجامعة وفي الشغل وحتى في الغربة هنا اولاد مدني مميزين و تفتيح خلي اولاد مدني الناس القروا جامعة الجزيرة بالقعاد في مدني ومعاشرة ناسها تحس بيهم بقوا تفاتيح حتى لو كانوا جايين من كوستي او امدرمان
Post: #79 Title: Re: اسطورة ان اولاد الوسط تفاتيح( امدرمان.مدنى.كوستى) Author: waleed dawash Date: 05-25-2011, 07:50 PM Parent: #78
Quote: جئت لتمارين المريخ وقد وجدت في تلك الفترة بشارة وسليمان وكاوندا وكمال عبد الوهاب والجيلي عبد الخير والحارس عبد العزيز وجاد الله وسانتو الخرطوم (عبيد كبار) بلغة الكورة. وكانوا يلعبوا لي الباص في ضهري مرة وفي رقبتي مرات عشان يفشلوني ودي بعملوها لأي لاعب جديد عشان يتحرج مع الجمهور ويغادر المريخ.. وفي احدى المرات لعبوا لي الباص في ضهري فأخذته بالكعب للامام وسددت في المرمى وسط ذهول اللاعبين والجماهير والحارس عبد العزيز الذي فشل في صد الكرة او ابعادها عن مرماه. ومن اليوم داك عبد العزيز حراس المرمى طارت ليهو!!. فصفق لي منصور رمضان الذي كان يدرب المريخ وهنأني على المستوى وبعد ذلك اصبحنا اصحاب مع ناس بشارة وكاوندا وفتحوا لي دارهم واذكر ان زميلي الشايقي كان مهددا بالشطب من كشوفات المريخ وهو يلعب مدافعا وكان لصيقا بي فقلت له انا ما حأخليهم يشطبوك فكنت اراوغ جميع المدافعين وعندما اواجه الشايقي أخلي يشيل مني الكرة فيقوم الجمهور يصفق له ويشيد به فبقي الشايقي لموسم آخر في المريخ ولم يشطب وظل يحمد لي هذا الموقف حتى بعد شطبه من المريخ.
انت متاكد انو ده الفاضل سانتو؟
ما اميتاب باتشان ولا دهر مندرا ولا زينات امان حتى؟
Post: #82 Title: Re: اسطورة ان اولاد الوسط تفاتيح( امدرمان.مدنى.كوستى) Author: سيف الدولة كامل Date: 05-25-2011, 10:00 PM Parent: #79
العزيز \ناظم ,,,, سلامات
والله نحن ناس الخرطوم قلبه تفتيحة ,, البجبي من كوستى ولا مدني
لازم يمر بينا ,كان في السكة حديد ولا موقف باصات الخرطوم تلاتة
وحاتك يا ناظم بنعرف الغريب من لبسه ومشيته وكلامه,, الخرطوم
أهلها يعرفون بعض حتي اواخر الستينيات وبعد ثورة مايو جاطت.
الاخ الفاضل اشرف السر ,,, تحياتي
بعد الخرطوم أجمل مدينة حبيتها مدني اهلها طيبين ودودين وعشريين
ولي فيها عشرات الاصدقاء وزملاء الجامعة,,,
بس الاستاذ احمد محمد صالح جدي وهو أمدرماني اصيل ولا علاقة له
بالجزيرة من حيث النشأة والنسب, فقط عمل استاذا للغة الانجليزية بمدرسة
Post: #93 Title: Re: اسطورة ان اولاد الوسط تفاتيح( امدرمان.مدنى.كوستى) Author: سيف الدولة كامل Date: 05-28-2011, 03:01 AM Parent: #92
سلامات يا أحمد,,, والله نيويورك كان ماتفتيحة تروح شمار في مرقة.
ذكرتنى أيام كلوزيوم وشلة الكضمي بعد الساعة 9 ما بتحاوموا الا
الشفوت أولاد قلبها..
مودتي
Post: #94 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-28-2011, 02:20 PM Parent: #93
سيف الدوله تحياتى
سينما كولوزيوم لايدخلها فى الدور التانى الا مجازف عرفت هذه الحقيقه عندما كنت اعمل مع الاطفال الشماسه
والخرطوم بالليل عالم تانى
Post: #95 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-29-2011, 04:15 PM Parent: #94
( بوث ديو) البرلمانى و السياسي القادم من اقصى الجنوب كان سياسى ضليع وزول تفتيحه وكثيرا ما دقس كبار ساسة واقطاب الاحزاب من اولاد الوسط
وهناك بعض اغانى البنات فى ذلك الزمان تغنت به
Post: #96 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-30-2011, 01:16 PM Parent: #95
واحد صاحبى كان حكم لكوره دافوري بين اولاد الحله وباع الكوره مقابل قزازه بيبسي (كان الفريق الفائز بيشرب بيبسي) وانهى المباراه وجري دخل بيتهم الفريق المغلوب رسلوا ليهو اخوهو الصغير عشان يتفاهموا معاهو قام قال ليهو امشى قول ليهم( لو فى حفلة بى عبد الرحمن عبدالله) ما مارق
Post: #99 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-31-2011, 01:41 AM Parent: #96
ود بحري الشفت محمود عبد العزيز
Post: #100 Title: Re: اسطورة ان اولاد الوسط تفاتيح( امدرمان.مدنى.كوستى) Author: عبدالله كع Date: 05-31-2011, 06:51 AM Parent: #88
يا ناظم يا خي سمعنا ناس مدني لقينا كمية الفرح فيهم ايييييييييييييييييييك اسكت ساااااااااااااااكت !! وسمعنا ناس امردمان لقينا فيهم الفرح مضاعف اضعاف وسمعنا ناس كوستي والابيض لقينا فيهم الفرح اصييييييييييييييييييييييييييييييييييل وربنا يديم عليهم الافراح
Quote: مرحب باولاد الخرطوم رغم ان صوتهم ليس عاليا مثل الامدرمانيين والمدنيين
ما قولنا ليك يا ناظم .. المفتح ماااااااااااا بقول انا مفتح .. والشفت كذلك !
ناس مدني وامدرمان .. فرحااااااااااااااااااااااااااااانين شديد يامان -
و ناس بورسودان زي الورد
Post: #101 Title: Re: اسطورة ان اولاد الوسط تفاتيح( امدرمان.مدنى.كوستى) Author: وليد عبد اللطيف Date: 05-31-2011, 09:55 AM Parent: #100
Quote: التفتيحه هو زول صاحب حضور وذكاء اجتماعى وفاهم الدنيا والبشر ويستطيع الحياه فى اصعب الظروف وفى الغالب يملك كاريزما وشخصيه قياديه او بالمصري بيلعب بالبيضه والحجر
ياناظم اكيد هنا قاصد اولاد امدرمان
احكي ليك قصة حقيقية في الايام الفاتت دي مشينا مع اخونا تعارف عشان نخطب ليهو من امدرمان دخلنا قابلناهم ومعانا ود عمتنا من اولاد امدرمان اول مادخلنا كان بيتكلم بالنيابة عنا طلع بعرفهم قال : خلاص انا بصفتي من اولاد امدرمان اديناكم البت ومبروك عليكم شفت كيف سقنا ود عمتنا يتكلم بالنيابة عنا رد وتكلم نيابة عن اهل العروس وخطب لينا البت ( ياخي زمان قلنا امدرمان عالم جميل ) وطبيعة المنطقة هي التي خلقة هذا العالم الجميل ونحن كبحراوية نشهد لهم بذلك . . لكن ياناظم كيفتني في حناني لما جبت لينا سيرة السد العالي (سليمان فارس وشقيقة ايوب فارس وماعايز اجيب ليك سيرة اول كابتن فريق قومي ( الجاك عجب ) قربت ادخل و احت ليك كل الاتو الفي بحري لكن على قول اهلنا القدام السواي ماحداث
الصورة دي هدية للكابتن وليد المبارك ( الشفت ) فيها واحد من شفوت اولاد امدرمان وصلتني من الكابتن جعفر عبد الرازق لاعب الهلال السابق
Post: #102 Title: Re: اسطورة ان اولاد الوسط تفاتيح( امدرمان.مدنى.كوستى) Author: وليد محمد المبارك Date: 05-31-2011, 10:11 AM Parent: #101
تشكر يا ولي
كيقن يا معلم
وجاهة ورجالة وكورة واي حاجة
Post: #103 Title: Re: اسطورة ان اولاد الوسط تفاتيح( امدرمان.مدنى.كوستى) Author: وليد محمد المبارك Date: 05-31-2011, 10:16 AM Parent: #102
Post: #104 Title: Re: اسطورة ان اولاد الوسط تفاتيح( امدرمان.مدنى.كوستى) Author: وليد محمد المبارك Date: 05-31-2011, 10:23 AM Parent: #102
Quote: من من اهل امدرمان انتشر فنه خارج السودان وتغنى له أي شخص خارج حدود السودان؟
قول عدس
قبل سنة 1926 ما كان في غنى في السودان بالطريقة المعروفة كان في طمبرة
سنة 1926 كما حكى دمتري الحاج محمد احمد سرور نجر الغناء من راسو ونافوخوا وما سبقوا زول قبليه وجا عرضو على الطبارة باعتبار انو ده شي جديد عجب الناس ومن ديك وعيك
تصادف انو سرور من امدرمان سااااااااااااااااااي كده
يعني اي زول عامل فيها بغني في البلد دي مفروض يدفع نص القروش الشالها لي سرور ده
Post: #105 Title: Re: اسطورة ان اولاد الوسط تفاتيح( امدرمان.مدنى.كوستى) Author: ahmed saeed Date: 05-31-2011, 11:44 AM Parent: #104
برضو مدني في التوب
Post: #106 Title: Re: اسطورة ان اولاد الوسط تفاتيح( امدرمان.مدنى.كوستى) Author: وليد محمد المبارك Date: 05-31-2011, 11:56 AM Parent: #105
حنك ساي
Post: #110 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-31-2011, 11:53 PM Parent: #105
احمد سلامات لماذا؟
Post: #117 Title: Re: اسطورة ان اولاد الوسط تفاتيح( امدرمان.مدنى.كوستى) Author: حافظ عبدالعاطى احمد Date: 06-02-2011, 08:41 AM Parent: #104
يا اخواننا سلام انا داير اورى الاخ وليد محمد المبارك انو الحقيبة جات امدرمان من كبوشية حتى سرور بعد داك غناها يعنى امدرمان ما بدتها كدى شوف الكلام دة فن كبوشية..يغزو العاصمة القومية!!! الأربعاء, 18 آب/أغسطس 2010 15:04 دكتور هشام محمد عباس .عند السفر من عطبرة إلى الخرطوم لاشك أن المسافر في هذه الرحلة سوف يعبر التاريخ لأنه سيمر باهرامات البجراوية ومنطقة كبوشية العريقة العاصمة الوطنية الأولي للسودان.. وأثار البجراوية يسميها أهل المنطقة المحليين (الطربيل) وهي تقع في منتصف المسافة بين قرية أم علي وقرية كبوشية (تقريباً)وهي محاذية لقرية قدو شرقاً، وغرب النيل أمام كبوشية توجد قرية (قوز بدر) وقد ارتبطت كل القرى حول كبوشية بها سواء كان هذا الارتباط ثقافي أو اجتماعي أو اقتصادي أو تعليمي فانعكس تأثيرها علي قري الكناوين وقلعة الشايقيه والكبوشاب وديم القراي وقوز الحاج وتميد حاج الطاهر والمسيكتاب حتى قرى غرب النيل مثل كلي وقوز الحاج وبقروسي وجوير سلمان والمغاوير حتى المتمة ويعتبر سوق الأربعاء بكبوشية هو الجامع لسكان هذه المناطق.. وذكر المؤرخ السوداني المرحوم حسن نجيلة في كتابه الرائد ملامح من المجتمع السوداني عنواناً أثار انتباهي حيث كتب تحت عنوان كبير(فن كبوشية يغزوا العاصمة القومية) والمعروف أن هذا الكتاب يؤرخ لأهم الاحداث في فترة العشرينات والثلاثنيات في السودان في القرن الماضي وقد وصل( نجيلة) إلى أن أغنية الحقيبة انتقلت إلى أم درمان من كبوشية.. فامدرمان في تلكم الفترة كانت تعرف اشعار(الطمبارة) وهى نغمات الطمبور المنبعثة في حناجر فنانين تخصصوا في هذا النوع من الأداء وليس لها علاقة بالة الطمبور، وماكانت أم درمان تعرف سوى الدوبيت ، وبأسلوبه الادبى الجذاب في سرد التاريخ يكتب... في حوالي عام 1900م جاء إلى الخرطوم من كبوشية فتى أنيق وسيم ، وسامته تلفت الأنظار، اسمر اللون ، على خديه وشمان صغيران( درب طير ) تضاعفان من وسامته على مفهوم الوسامة آنذاك ، مربوع القامة ليس باليدين ولا الهزيل ، يلبس قميصاً يتدلى إلى مابعد الركبتين قليلاً ويتلفح بتوب أنيق ، ملابسه دائماً نظيفة بيضاء ، مهذب حلو الحديث ، رقيق الطبع ، شديد الحياء في غير تصنع ولاغرو فوالده من رجال الدين والعلم المعروفين في كبوشية ومن حملة القرآن الكريم ، يفد اليه الطلاب من اماكن بعيدة ليحفظوا عليه القرآن الكريم ، وقد تلقى هذا الفتى الوسيم الأنيق القرآن من خلوة والده ثم عشق الغناء إذ كان يتمتع بصوت يأخذ بمجامع القلوب .. واسم هذا الفتى ( محمد ود الفكي) . جاء إلى أم درمان يحمل فناً جديداً وصوتاً أخاذاً متحملاً في سبيل ذلك نقمة والده الذى كبر عليه أن يسمع أن ابنه صار مغنياً رغم انه يزاول بيع الخضار في سوق الخرطوم ، و لم يكن الغناء في تلكم الفترة وسيلة للرزق.. وقد ابتدع ودالفكى الرميات التى تسبق غناء الحقيبة وذلك دون اللجوء إلى أسلوب ( الطمبارة) ، واستطاع ودالفكي من خلال الحفلات التى أقامها بأم درمان أن يؤثر على شعراء الأغنية فتغيرت الاتجاهات الشعرية لإبراهيم العبادى ويوسف حسب الله الذى كان يسمى بسلطان العاشقين وابوعثمان جقود ومحمد ود الرضي ومحمد على بدري وعمر محمد على وغيرهم ممن صاروا أساطين فن الحقيبة وقد كان ابن كبوشية ودالفكى مدرستهم الأولى التى جددت مفاهيمهم لشعر الأغنية لقد وجد الفنان محمد احمد سرور الشهرة لأنه صار يغنى بأسلوب ودالفكي واشتهر العبادى شاعراً في أم درمان لأن ودالفكي غنى له..رغم أن كثيراً من الباحثين يؤرخون لميلاد أغنية الحقيبة في العام 1920م في حفل زواج التاجر المعروف في تلكم الفترة في أم درمان ( بشير الشيخ) عندما غنى سرور بدون (طنابرة) ، لكن كما هو واضح من هذا السرد فان ودالفكي هو الذى أعطى هذا النوع الجديد من الغناء لفنانى أم درمان ، ولايمكن أن نذكره دون ان نذكر صديقه الشاعر حسن سالم وهو من اشعر شعراء كبوشية مع انه كان أمياً لايقرأ ولايكتب وكان يعمل في صناعة سروج السروج الجمال وكان ودالفكى في بداياته الفنية في أم درمان يردد اشعاره.. وجاء بعدهما ومن كبوشية أيضاً الفنان عبدالله الماحي حيث ذكر أنه قدم الى أم درمان عام 1918م ولم يجد فيها من الفنانين غير(ودالفكى) الذى يعتبر أستاذاً له وبالتالي يعتبر ودالفكي أستاذ كل من جاء بعد ذلك من الفنانين مثل سرور وكرومه والأمين برهان ومن جاء بعدهم .. تشاء الأقدار أن يعتزل (ودالفكى) الغناء وهو في قمة شهرته عام 1920م بعد أن وضع تاريخ البداية لأغنية الحقيبة في السودان التى استمرت حتى العام 1940 حيث بدأت بعد ذلك مرحلة الغناء الوترى برواده المعروفين منذ عبدالحميد يوسف والكاشف وحسن عطية واحمد المصطفي وحتى اليوم ..
Post: #123 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 06-02-2011, 06:08 PM Parent: #117
حافظ مرحب بيك
شكرا على هذا التوثيق الجميل وهى حقيقه ان امدرمان سكانها اتوا من اماكن وشعوب مختلفه هاجروا من اماكن فى السودان او من دول اخري
Post: #112 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 06-01-2011, 00:05 AM Parent: #102
وليد الشفت سلام
يحكى والعهده على الراوي
كمال عبد الوهاب (الدكتور) بعد ما اعتزل بسنوات مره جا لتمرين المريخ لابس بنطلون وقميص وكان عادل امين وجمال ابو عنجه فى المبدان قام شال الكوره وقال ليهم اها تعالوااقلعوها وفعل بهم مافعل
Post: #109 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-31-2011, 11:47 PM Parent: #101
وليد عبد اللطيف مرحب بيك
اولاد امدرمان فيهم فعلا من (يستنطق الصخر العصى) زي ما كتب الشاعر الامدرمانى صديق مدثر ... بس ما كلهم
تعرف عندنا اخونا لو انت ما من حلة حمد او خوجلى سلام الله ما بديك
يا ريت يا وليد(تحت اتو بحري)
Post: #107 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-31-2011, 10:40 PM Parent: #100
عبدالله ازبك
زي المصريين( جخاخين )المصري يشبكك
احنا اللى دهنا السما دوكو
و احنا اللى خرمنا التعريفه
وبس يمشى يلعب ليك كوره فى نيجيريا والا غانا تلقى المذيع يكورك
يا خبر اسود العالم دى باين عليهم سحره
Post: #108 Title: Re: اسطورة ان اولاد الوسط تفاتيح( امدرمان.مدنى.كوستى) Author: حبيب نورة Date: 05-31-2011, 11:38 PM Parent: #107
مدني يا ناظم
Post: #111 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 05-31-2011, 11:56 PM Parent: #108
ازيك يا حبيب
ازاى؟
Post: #113 Title: Re: اسطورة ان اولاد الوسط تفاتيح( امدرمان.مدنى.كوستى) Author: وليد محمد المبارك Date: 06-01-2011, 06:24 AM Parent: #111
Quote: كمال عبد الوهاب
كدي النسالك بالمناسبة
كمال عبد الوهاب ده ساكن وين في ياتو حي تحديدا
Post: #114 Title: Re: اسطورة ان اولاد الوسط تفاتيح( امدرمان.مدنى.كوستى) Author: وليد محمد المبارك Date: 06-01-2011, 06:40 AM Parent: #113
يا ناظم انا ما مستنيك
بالمناسبة واحد من خيلاني الاتنين الذكرتهم ليك فوق لعب مع كمال عبد الوهاب في نفس الفترة وكان جلوسهم يوميا امام منزل كمال عبد الوهاب
تعال ورينا كمال عبد الوهاب مواليد وين واتربى وين
وطالما انك مقتنع بيه قدر ده .. فانا حا اعتمده في مجال الكورة .. ونقفل موضوع الكورة ده .. بريادة امدرمان
ونمشى معاك لموضوع الفن
Post: #115 Title: Re: اسطورة ان اولاد الوسط تفاتيح( امدرمان.مدنى.كوستى) Author: يازولyazoalيازول Date: 06-01-2011, 11:51 AM Parent: #114
يا جماعة أمدرمان دى حكاية تانية ، والمثل بيقول المابتلحقو جدعو ونحن عارفين أمدرمان محسودة بس العايز يعرف أمدرمان تمام يفتح الرابط الفوق ده عشان يشوف شريحة أمدرمانية لن يجود الزمان بمثلها مرة أخرى
وواجعى عليك يا أم درمان ، ووا اسفى على ما آلت له أم درمان ، ويكفينا منها أن نجتر أحلى الذكريات
وشكرا
امدرمانى موجوع بالحيل
Post: #116 Title: Re: اسطورة ان اولاد الوسط تفاتيح( امدرمان.مدنى.كوستى) Author: وليد عبد اللطيف Date: 06-02-2011, 08:14 AM Parent: #115
يازول سلامات ....
Quote: والمثل بيقول المابتلحقو جدعو ونحن عارفين أمدرمان محسودة بس العايز يعرف أمدرمان تمام يفتح الرابط الفوق ده عشان يشوف شريحة أمدرمانية لن يجود الزمان بمثلها مرة أخرى
ماقلنا ماعايزين نحت الاتو المشكلة ياناس امدرمان ياريت مره تشكرونا وتقولو ناس بحري ماقصروا معانا كل الجمال الذي يوجد في امدرمان سببه منطقة بحري العريقة التي كان ناس امدرمان يذهبون الى بحري لاستنشاق هواء بحري الجميل والاستمتاع بطبيعتها الجميله ودا طبعا بحسابات متى تم تكوين منطقة امدرمان بالنسبة لبحري العريقة حلفاية الملوك وحمد وخوجلي طبعا فرق السنين والدنين وكما قال فنان بحري الراحل المقيم خضر بشير عندما سالوه في يوم ماذا تهوى قال : اهوى الزهور في تبسمه واهوى الطيور في ترنمه واهوى الطبيعة الحالمة ودا كله في بحري ياناس امدرمان انتو نسيتو زمان ناس امدرمان بيجو يحبو في بحري ويزرفون الدموع وينسو هدومهم وعقولهم
في ربوع بحــــــــري لاقيته
في ربوع بحري لاقيتــــــه بسم حياني حيتـــــــــــــــو *************
في ربوع بحري لاقيتــــــه وماكان املي القــــــــــــاه فتح قلبي وسكن فيــــــــــه بخمره حبه اسقــــــــــــاه
قلبي علي الضني اتعلـــــم وحين ما اطراه اتالــــــــم مابسلاه يا احبــــــــــــــاب ومهما فؤادي اسقــــــــاه *************
طالعين كنا في نشــــــــوه علي البلديه مرينــــــــــــا ناجينا الطيور في الروض وقلنا ليها سامرينـــــــــــا
اها ياناس امدرمان اتحسسو قلوبكم لقيتوها وللا لا لسهة مادخلنا ليكم في عالم الرياضة والفن واحسن نخليها مستورة احدي هنا لذلك عندما يعتزون شاب امدرمان بمنطقتهم هذا يفرحنا لان لنا الفضل الكثير في ذلك (بحـــــري ســـــــر الهــــــــــوى ) وسر جمال منطقة امدرمان هلال مريخ وكباتنهم من بحري ( هيثم مصطفى والعجب )
قبة الشيخ خوجلي
مسجد السيد علي الميرغني
برضو نرجع نقول (امدرمان عالم جميل )
Post: #118 Title: Re: اسطورة ان اولاد الوسط تفاتيح( امدرمان.مدنى.كوستى) Author: حافظ عبدالعاطى احمد Date: 06-02-2011, 09:06 AM Parent: #116
ودمدنى
نشأت مدينة ودمدنى السودانية عام 1489م عندما حل بموقع المدينة الفقيه محمد الأمين ابن الفقيه مدني الذي يتصل نسبه بعقيل ابن آبى طالب ابن عبد المطلب الهاشمي.
بدأت منذ ذلك التاريخ تتكون الأحياء السكنية، حيث قام أول ما قام حي المدنين الذي كان يسكنه الدارسون والمريدون للفقيه محمد الأمين. وقامت خلال تلك الحقبة من الزمن صناعة المراكب الشراعية في إطار المركز التجاري الذي اتسمت به المدينة إلى جانب الصناعات المحلية، كدباغة الجلود والأحذية .
عندما غزا إسماعيل بن محمد على باشا السودان، إتخذ من مدينة ودمدنى قاعدة لقواته التي أرسلها لغزو سنار وفازقلى. وانتهت أهمية المدينة كقاعدة عسكرية لجيوش الأتراك بمقتل إسماعيل باشا . وعند بداية الحكم الثنائي، المصري- السوداني، اتخذت مدينة الكاملين كعاصمة لمديرية النيل الأزرق. إلا إنه وبحلول عام 1902م حولت العاصمة الى ودمدنى. وخلال العشرين عاما بعد 1900م أقيمت محطة للسكة الحديد والمستشفى الذي كان وحدة عسكرية تابعة للقوات البريطانية ومباني رئاسة المديرية والمحاكم والبريد والجامع الكبير على امتداد شارع النيل. كما بدأ أول تخطيط إسكاني بالحي السوداني وحي القسم الأول .
شهدت مدينة ودمدنى منذ ذلك التاريخ نشاطا تجارياً كبيراً وحلت بالمدينة أعداد كبيرة من التجار والحرفيين .
في عام 1929م ضعفت أهمية مدينة ودمدني كمركز تجاري كان يستقبل يوميا عشرات القوافل المحملة بحاصلات السودان لتتوجه إلى كسلا. وكان ذلك بسبب اكتمال الخط الحديدي إلى شرق السودان حتى مدينة كسلا. واستعادت ودمدنى أهميتها الاقتصادية مرة أخرى بقيام مشروع الجزيرة في عام 1925م وتوسعت حركة الأداء الحكومي فيها نسبة للتطور الاجتماعي والإنمائي الذي شمل مديرية النيل الأزرق بحجمها السابق، إلى أن جاء عام 1973م حيث بقيت المدينة عاصمة لمديرية الجزيرة بعد تقسيم المديريات.
تبلغ مساحة ودمدنى في الوقت الحاضر 65 كيلومتراً مربعاً ويبلغ عدد سكانها 106 آلاف نسمة، وتضم عددا من المؤسسات المهمة كرئاسة وزارة الري ورئاسة هيئة البحوث الزراعية ورئاسة مشروع الجزيرة وكلية أبو حراز الزراعية. كما أنها تضم صناعات متنوعة، من أهمها صناعة الغزل والنسيج وصناعة الجلود والصناعات الغذائية والكيميائية المختلفة. وتمتاز المدينة بأنها نقطة الالتقاء الرئيسة لشبكة الطرق التي تربط مناطق السودان المختلفة بالخرطوم وميناء بور سودان.
تعتبر مدينة ودمدني المدينة السودانية الرائدة في شتى المجالات، منها الرياضية والاجتماعية والاقتصادية، ولكن هنالك إغفال تام لدورها الفعّال في بدء ونهضة وتطور السودان، وذلك للاهتمام الكلي والتركيز الإعلامي على مدن ثالوث العاصمة القومية دون غيرها من مدن السودان.
ضم جيش محمد على باشا الغازي للسودان عام 1821 مجموعات من الأرمن والشراكسة والالبان والارناؤوط، واستقر أكثرهم في مدينة ودمدني بعد أن أصبحت العاصمة الجديدة للبلاد في ذلك الوقت. وبعد الفتح الثاني على يد اللورد كتشينر عام 1898م وفدت للبلاد هجرات جديدة من الأجانب، وخاصة من بلاد سوريا ولبنان ومصر واليونان، وكان يعمل جل هؤلاء بالتجارة وموظفين بدواوين الحكومة.
ساهم هؤلاء القادمون الجدد في إضافة معارف وثقافات جديده للمواطنين السودانيين، وخاصة في مجال الفنون والآداب، وشاعت مظاهر الحضارة والثقافة في كل مدن السودان التي استقروا فيها . ومما ساعد على ذلك ارتباط بعضهم كالشوام والمصريين مع سكان البلاد الأصليين برابطتي اللغة والدين، وهما من أقوى الروابط. ومن تلك المظاهر السالفة الذكر استخدام الآلات الموسيقية العربية الوافدة في الموسيقي السودانية . وتعتبر مدينة ودمدني من أولى مدن السودان التي ظهرت فيها تلك الآلات.
ترجّح الروايات أن ودمدني التي تقع على الضفة الغربية لنهر النيل الأزرق اتخذت اسمها من اسم الشيخ محمد بن مدني دشين قاضي العدالة الذى يقول عنه محمد النور ضيف الله فى كتابه الطبقات: كان واحدا من أهل زمانه فى الورع والزهد والصدق.
وبعد سقوط سنار على يد الغزو التركي- المصري، اتخذها اسماعيل باشا قاعدة لقواته، ثم أصبحت بعد ذلك عاصمة للسودان، ثم انتقلت العاصمة منها إلى الخرطوم واستمرت ودمدنى عاصمة للإقليم تحت الحكم الاستعماري التركي المصرى ثم الإنجليزي المصري تحت مسميات النيل الأزرق. والآن أصبحت ودمدنى عاصمة للولاية الوسطى، وهي عاصمة لكل من النيل الازرق ، الاقليم الاوسط، الولاية الوسطى وولاية الجزيرة. منقول
Post: #119 Title: Re: اسطورة ان اولاد الوسط تفاتيح( امدرمان.مدنى.كوستى) Author: حافظ عبدالعاطى احمد Date: 06-02-2011, 09:10 AM Parent: #118
الاحتفال بمرور 125عام على تأسيس امدرمان كتب : ابونون اقيمت ندوة امدرمان النشأة والتاريخ فى اطار الاحتفال بمرور 125عاما على تأسيس مدينة امدرمان تحدث فيها عدد من الاساتذة على رأسهم دالصادق الهادى المهدى والاستاذ الشاعر ابو قرون عبد الله ابو قرون فى نادى بيت المال بامدرمان وقد استهل الندوة الشاعر الفاتح عمر السراج بقصائد عن امدرمان وتلاه الدكتور الصادق الهادى المهدى مبينا اصل امدرمان ونشأتها وشارحا مراحل تطورها عبر الحقب الزمنية المختلفة وتوالى البرنامج من بعدها فى اطار الموضوع
منقول
Post: #120 Title: Re: اسطورة ان اولاد الوسط تفاتيح( امدرمان.مدنى.كوستى) Author: ahmed saeed Date: 06-02-2011, 12:37 PM Parent: #119
الناس بتحكي عن مدني وام درمان ما عرفنا كوستي دى غير السمك فيها شنو .........
يا ناظم خالد كودي جاوبك علي سوالك
بعدين هو اصلا الجاب سيرة ام درمان وكوستي مع مدني شنو التاريخ غير ...........
العجيبة تمبس بحكي عن البلي وشخيط الحيط في زقاقات ام درمان مفتكرا شفتنا وتفتيحه ..........
يا وليد شوف حافظ قال شنو
Quote: الاحتفال بمرور 125عام على تأسيس امدرمان
لحدي ما نرجع تاني ,,,,,,,
Post: #124 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 06-02-2011, 10:06 PM Parent: #120
احمد ازيك
المشكله الاساسيه انكم مصنفين اقاليم وضهاري من الامدرمانيين
دى تحلوها كيف
Post: #125 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 06-02-2011, 10:15 PM Parent: #116
وليد عبد اللطيف وهل هناك اجمل من (الجمعه فى شمبات)
Post: #122 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 06-02-2011, 06:01 PM Parent: #115
يا زول سلامات
نسيت حنتوب وخورطقت ولا شنو؟
Post: #121 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 06-02-2011, 05:56 PM Parent: #114
وليد سلامات
كمال عبد الوهاب من عباقره الكره السودانيه ولكن ليس وحده
عندك كمثال محمد حسين(كسلا) الدكتور جد مالقب
وعبد المحمود(شندى)
دحدوح(كوستى)
كوبري (بورتسودان)
ابو العز (الحصاحيصا)
الفاضل سانتو (مدنى)
والقائمه تطول
Post: #126 Title: Re: اسطورة ان اولاد الوسط تفاتيح( امدرمان.مدنى.كوستى) Author: ahmed saeed Date: 06-03-2011, 06:49 AM Parent: #121
يا ناظم عاوز توضح لينا انو اولاد بحري تفاتيح .......
اسمع دي .........
واحد بيدرس بيطرة عندو ورقة امتحان كسر ليها كسر مزبوط ما خلي حاجه ما زبطهادخل الامتحان لقي ورقة الامتحان عبارة عن صور أرجل طيور وعليها سؤال حدد نوع الطيور من ارجُلها ؟؟؟؟؟ قدر ما فكر وفكر ما لقي حاجه يجاوب بيها في النهاية قرر يسلم الورقة فاضية حتي اسمو ما كتبو سلم الاستاذ الورقة وقال ليه اسمح لي اقول ليك انت اسخف استاذ في الكلية والمادة بتاعتك سخيفه زيك الاستاذ:- اعتبر نفسك راسب يا ابني فجاة الاستاذ انتبه انو الاسم في الورقة مافي ياولد تعال هنا اسمك منو انت ؟ الطالب رفع ليهو البنطلون ووراه رجُلينو
عامل فيها شفت اها اعرفني ,,,,,,,,,,,,,,,
Post: #127 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 06-03-2011, 11:24 AM Parent: #126
احمد ازيك
تانى بقول الشفت ما بقول انا شفت
لكن اولاد مدنى وامدرمان بيقولوا هم تفاتيح
اسال عن اولاد حلة حمد وخوجلى والشعبيه والمزاد وديوم بحري
Post: #128 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 06-04-2011, 03:07 PM Parent: #127
(الديم )
....والديامه
Post: #129 Title: Re: اسطورة ان اولاد الوسط تفاتيح( امدرمان.مدنى.كوستى) Author: د.محمد بابكر Date: 06-04-2011, 03:58 PM Parent: #128
السودان ده ياناظم مافيهو زول تفتيحه لانه لو فى. ده ماكان حالنا..
Post: #130 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 06-04-2011, 04:13 PM Parent: #129
دكتور محمد بابكر تحياتى
بالفهم العامى والشعبى للتعبير يوجد تفاتيح وشفوت
يمكن تقصد لايوجد سياسين تفاتيح وده الوصل البلد لهذا الحال
Post: #131 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 06-07-2011, 11:37 PM Parent: #130
الشاعر الكبير (توفيق صالح جبريل )او ابو الوطنيه كما سماه الاستاذ شوقى بدري هو امدرمانى النشاة ولكنه هام بمدينة اخري وكتب فيها اجمل قصائده
جنة العشاق
نضّر اللهُ وجهَ ذاك الساقي إنه بالرحيق حلَّ وثاقي فتراءى الجمالُ مُزدوجَ الإشراق يَسبي مُعدّدَ الآفاق كان صبحاً طلقَ المحيّا نديّاً إذ حلَلْنا حديقةَ العشّاق نغمُ الساقياتِ حرّك أَشْجَاني وهاج الأسى أنينُ السواقي بين صبٍّ في حبّه متلاشٍ ومُحِبٍّ مستغرقٍ في عناق وتلاقتْ في حلبة الرقصِ أيدٍ وخدودٌ والتفّ ساقٌ بساق فظللنا والظلُّ والطلُّ هامٍ في انسجام وبهجة واتّساق وفتاةٌ تختال تختار كَرْماً وغريرٌ لمخدعٍ مُنْساق والغواني الحسانُ بين يدينا تتثنّى في القَيْد والإطلاق أقبل الصبحُ والشهودُ نُهودٌ مسفراتٌ، أَمَا لها من واق؟ ظلّتِ الغيدُ والقواريرُ صرعى والأباريقُ بِتْنَ في إطراق اِئتِني بالصبوح يا بهجةَ الرُّوْح تُرحْني إنْ كان في الكأس باق يا بنةَ «القاشِ» إن سرى الطيفُ وَهْناً واعتلى هائماً، فكيف لحاقي؟ والمنى بين خَصرها ويديها والسنى في ابتسامها البرّاق «كَسَلا» أشرقتْ بها كأسُ وَجْدي فَهْيَ في الحقّ جنّةُ الإشراق
Post: #132 Title: Re: اسطورة ان اولاد الوسط تفاتيح( امدرمان.مدنى.كوستى) Author: nazar hussien Date: 06-08-2011, 02:06 AM Parent: #131
Quote: ويستطيع الحياه فى اصعب الظروف
غايتو كان دا واحد من شروط التفتيح...
تمشي طوال من دربك دا تعلق جائزة نوبل في التفتيح في مدخل القرية...
حيث انقرضت كل الحيوانات الزاحفة...وطار الدباس بلا صوف...
قشة عينك من النوم...تطلع رأس البيت..تنفض ليك تمرتين من تراب...ماكل منهن الدباس ما تيسر له للبقاء حيا.. وتشرب فوقكن كوز موية من بير ...تنشله طازجا من اعماق سحيقه...والي ان يصلك الدلو تتبخر طاقة التمرتين كما الرهاب...وباقي يومك كلو تساكك في الرهاب الي ان ترجع في المساء يابس كرو.
ولو القيت نظرة علي شجر السيال...لقلدته وسام ايوب
Post: #133 Title: Re: اسطورة ان اولاد الوسط تفاتيح( امدرمان.مدنى.كوستى) Author: nazar hussien Date: 06-08-2011, 02:15 AM Parent: #132
ولا انسي مقولات تلاثة من ابناء المدن المنسوجة حولهم هذه الاساطير...ام درمان...مدني...الخرطوم...حينما زارونا في ازمان مختلفة
فالامدرماني...رجع في ساعته...دون ان يوافينا بتعليق والخرطومي...انتظر في مدخل القرية...عسي ان ننظر في امرنا ونغير ونبدل في الموضوع...ونصحبه الي حيث يظن انها قريتنا.. اما المدني...فبات ليلته...واستاك الدغش بي عود اراك ودرع شنطته في كتفه وتوجه الي درب العربات...والحلة كلها تحنس..يا زول عرس صاحبك الليلة بالليل ماشي وين؟ ان شاء الله ما يكون في زول غلّت عليك؟ ومالك؟ جاتك عوجة؟ واكتفي بهز رأسه بطريقة هندية...وحينما ضمن وسيلة مواصلات تقله الي حيث يمكن ان يرجع سالما...مدّ راسه من شباك عربية النقر وقال: والله انتو علا تكونوا مستنين يومكم... وهؤلاء كلهم احياء الآن ان لم يكن منهم من يكون بيننا في هذا المنبر.
Post: #134 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 06-08-2011, 02:38 AM Parent: #133
عزيزي نزار مرحب بيك
ياما فى القريه من تفاتيح
هى حقيقه واتفق معك تماما القروي له عقل نضيف وفصاحه فطريه وقادر على جعل الحياة ممكنه فى اقسى الظروف
Post: #135 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 06-08-2011, 08:51 PM Parent: #134
Post: #136 Title: Re: اسطورة ان اولاد الوسط تفاتيح( امدرمان.مدنى.كوستى) Author: ناظم ابراهيم Date: 08-23-2011, 07:30 AM Parent: #135
