البورداب الآتية اسماؤهم/ن أتمني رؤيتهم في الاماكن التالية ....

هذا البوست كاد ان يكون مداخلة في بوست الاخت منال " من تحب رؤيته من البورداب"
ولكن بسبب التهميش الذي وجدناه نحن " البرالمة" في ذلك البوست كان " حمل السلاح" و هذا
الانفصال و لا نامت اعين " ديناصورات سودانيز اون لاين"
شكرا "منال"
** هذا البوست كله مزاح ماعدا بعض الفقرات الجاده.....
** اتمني رؤية البورداب الاتية اسماؤهم/ن في الاماكن التالية:



*الاخ عزام حسن فرح في فاشر السلطان وهو ياكل وجبة " كول " باستمتاااااااااااع و معاها " قزازة بزيانوس"

*الاخ هشام ادم في عمرة في الحرم وهو يطوف بالبيت رافعا يديه الي السماء " ربنا آتنا في الدنيا حسنة و في الاخرة
حسنة و قنا عذاب النار" " هذه اتمناها له بصدق"

*الاخ محمد عبد الماجد الصايم في مانهاتن بنيويورك بعد فوزه باللوتري " 2033" وهو متكئا علي تاكسيه الاصفر يرشف كوبا من قهوة
" استار بكس" و يوزع ضحكته المعهوده علي بني " اليانكي"

*الاخ دينق في الاوزون بالخرطوم بعد التاسع من يوليو " من غير فيزا" و من غير قوات اممية

*الاخ علاء الدين يوسف في فندق شالوم بجوبا بعد التاسع من يوليو "دا ما تحدي"..... الشايقي دا قلبو حاااار كان اتحديناهو بعملا .

*الاخ هارون دياب في مباراة هلال مريخ و هو يلبس الازرق و صوته قد "بح" وهو يصيح هلالنا فوووق
و مريخ ..مريخ "ح نفرمو" فسيخ.

*الاخوات دومة و نجاة محمود في زواج احد البورداب " من الزوجة الثانية" و هن فرحانات و يزغردن
" ده المستحيل بعينه"

*الاخوان حيدر "جني" و عبد العزيز عيسي و هم يلقون محاضرة في مجمع النور بكافوري عنوانها
" دولة الشريعة و أثرها في عودة الخلافة الاسلامية الراشدة " العمة ام عزبة و اللحي تقول يا ليل.

*الاخ الملا عمر في احدي قواعد الناتو في جبال تورا بورا و هو يجادلهم " خواجات مطرطشين..حصل شوفتو ليكم افغاني اخدااار زي كدا ... ده هظار ساي بتاع سودانيز اون لاين .. قال غوانتانامو قال"

*الاخت نادية عثمان في الكلاكلة اللفة في افتتاحية " نادية استايل 5 "

*الاخ متوكل علي في قرية " سالي" الجميله وهو يخطب الجمعة عن فضل الشيخان ابو بكر و عمر و ام المؤمنين
عائشة " رضي الله عنهم اجمعين " " اتمناها بصدق ايضا "

*الاخت ام حازم "تراجي" في الاراضي المحررة .. أقصد " القدس و تل ابيب "

*الاخ احمد موسي المحامي في الخرطوم لانه ظريف و دوغررري و اسمه انعكاس " مراية " لاسمي
اسمه : احمد موسي عمر
اسمي: عمر موسي احمد
و مولودين في نفس السنه " بس هو اكبر مني بشهرين " عجوز

*الاخوان عمر صديق ووليد قسم السيد في مظاهرة مناهضة للانقاذ في ميدان ابو جنزير و هما يهتفان .. الشعب يريد تغيير النظام " بس من غير بطاقات و كارنيهات "

*الاخ مدحت عثمان وهو المدير التنفيذي لسد كجبار و نائب اسامة عبد الله في وحدة السدود

*الاخ عمر "ود الباوقة " في مزرعته الحدادي مدادي "بتري " ....و السودان وقتها كاليابان " قبل ما يكجها " علي قول بت خالد.

*الاخ و الصديق سيف اليزل برعي و بوست " الصور لا تكذب ابدا " غير موجود في الصفحة الاولي .

*الاخوان صديق الموج و ابو ساندرا مرشحي المؤتمر الوطني لمنصب الوالي لاحدي ولايات السودان
عام " 2025 " نراهم امام الكاميرات رافعين اصبع السبابة " هي لله هي لله لا للسلطة ولا للجاه ".

*الاخ ابو حراز في جلسة عائلية في السودان و اثبات انو عندو مدام و اسمها " ست النفر " قال ست النفر قال" .

*الاخت آمنة مختار في العاصمة الفرنسية باريس وهي تدفع غرامة علي المخالفة وهي لبس البرقع " النقاب ".

*الاخ ود شيقوق في الكلاكلة القلعة حتي نثبت له انو نحنا " بنمشي لي ناس ما بجونا " و في القلعه كمان .

*الاخوة اسماعيل عباس, محمد المرتضي حامد,شول اشوانق ,أبو جهينه , د. ابوبكر شداد , عزان سعيد , وليد المبارك في اي مكان و زمان لانهم يتحبوا لله ساي كده من ادبهم و اخلاقهم " و مثلهم كثير في هذا البورد و لكن خانتني الذاكرة وضيق البوست "

*الاخوة نزار محمد عثمان , محمد الزبير , عبد العزيز الفاضلابي , عارف الركابي , أشرف مصطفي في جلسة في الحرم
"فهم القوم لا يشقي بهم جليسهم " نحسبهم كذلك و لا نزكي علي الله احد .

ان اصابت كلماتي احدا فليس عن قصد فلكم العتبي حتي ترضوا

يا دينق تعال لحق الزول دا اللستة













تحياتي اخونا عمر

اسمي مكتوب ........................ طيب !!!!!!!!

الاخ صلاح غريبة

شكرا علي المرور

تحياتي

عمر صديق سلامات
و عساك طيب

Quote: يا دينق تعال لحق الزول دا اللستة

هو بالله انا لسع ما في اللستة
بعدين دينق دا اخوي في وطنين
لو السودان انقسم , امريكا لسع قاعدة

تحياتي عمر

بوست ظريف فعلاً، ويدلّ على أنّ سودانيز بالنسبة للأخ عمر موسى عالم حقيقي!

منجي

تعال المزرعة على طول

وساستضيفك لمدة ثلاثة ايام بلياليها

وكل يوم خروف

وجكين حليب بعد العشاء

حبابك

كويس يامنجي

ده ارخ الجزا عاوز تبشتن اخوك

Quote: *الاخ هارون دياب في مباراة هلال مريخ و هو يلبس الازرق و صوته قد "بح" وهو يصيح هلالنا فوووق و مريخ ..مريخ "ح نفرمو" فسيخ.

ياخي حد يشعر بالسعادة ويمشي يختار البعاد

حسع لو كنت زي ماعاوز لي....

كنت اودي وشي وييييييييين من باصات شندي

الاخ صلاح فقير
اهلا و مرحبابك
صدقني اسمك كان يجب ان يكون مع المجموعة الاخيرة و لكنه سقط سهوا
اما عن سودانيز فهو فعلا عالم حقيقي بشخوصه و احداثه حتي لمن هم خارجها
تغضب و تضحك تحب و تكره تندهش و تبتئس وفي الاخر هو سودان مصغر بكل ما
فيه من حسنات و سيئات..

شكرا ليك كتيير علي المرور

مرحب بالعزيز ود الباوقة

عزومة المراكبية دي بعد ما المزرعة طلعت اشاعة " العب غيرها"
اضمن لي عزومة في الباوقة ان شاء الله بي " دوم" برضو اضمن

علي كل شكرا علي العزومة " كريم و ابن كرام يا عمر"

والاهدا لك ولكل المذكورين اعلاه

اخي و عزيزي هارون دياب

المشكلة اني زاتي مريخابي لكن ما شغال بالكورة كتير

Quote: كنت اودي وشي وييييييييين من باصات شندي

عاااادي تقلب علي الجهه التانية ولا تشرد " شردة حمار ود جودة"
و المثل ده لو ما سامع بيهو داير ليهو قعدة.

شكرا علي الزهور يا رائع

تحياتي

يا منجي يا عمكـ
يعني نهاية اللوتري دا إنو الواحد يبقى عندو تكسي أصفر!!
كان كـدا أخير الواحد يكون شغال في مجالو!



تحياتي ياخ! ولو حصلت اللوترة ح يكون شعارنا (كل القوة .. أريزونا جوووه)!!

Quote: *الاخ دينق في الاوزون بالخرطوم بعد التاسع من يوليو " من غير فيزا" و من غير قوات اممية

الأخ عمر منجي.

ياخ أنا قلت هسع ألقى لك طلب غالي جدا وصعب تحقيقه.

الحمد لله وقت ما عاوز تقابلنا برضو نفس الشعور

الاخ منجى سلامات

نتمنى رؤيتك فى .... ولا اقول ليك خليها فى سرك

Quote: *الاخ محمد عبد الماجد الصايم في مانهاتن بنيويورك بعد فوزه باللوتري " 2033" وهو متكئا علي تاكسيه الاصفر يرشف كوبا من قهوة " استار بكس" و يوزع ضحكته المعهوده علي بني " اليانكي"

دي ليلة القدر عندو........!!





______________
شكرا عمر..!!

Quote: *الاخوان حيدر "جني" و عبد العزيز عيسي و هم يلقون محاضرة في مجمع النور بكافوري عنوانها " دولة الشريعة و أثرها في عودة الخلافة الاسلامية الراشدة " العمة ام عزبة و اللحي تقول يا ليل.

عندما يبيض الديك ...

يامنجي والله انت حقااااااااار ..عزّلت مستنيريننا كوووولهم ووديتهم يمين ........ ؟؟؟؟

لا لا نحن نحتج ونجشب وندين

Quote: *الاخوان حيدر "جني" و عبد العزيز عيسي و هم يلقون محاضرة في مجمع النور بكافوري عنوانها " دولة الشريعة و أثرها في عودة الخلافة الاسلامية الراشدة " العمة ام عزبة و اللحي تقول يا ليل.

عزيزي/ موسى منجي

أولا: بوستيك عينة.. وخرت ليك البوست داك.. أقصد بوست السيرة...
ومفرداتك حلوة..
وجمعت ألوان الطيف بمحبة وصفاء..

قلت لي محاضرة بمجمع الضلام الكافر!!

أكيد طلبك ده بيتحقق بعد أن تقوم الدولة المدنية.. دولة لا يكون فيها الدين مطيّة لاهل اللحى.. ولا نسمع فيها هوس تهليل تكبير.. آمين يارب!!

وبالمرّة نوفر فلوس الامواس وكريم الحلاقة ونبعثها الى الجمعيات الخيرية بالدول الاخرى!!




مودتي

Quote: الاخ علاء الدين يوسف في فندق شالوم بجوبا بعد التاسع من يوليو

و بالصور كمان إن شاء الله

الاخ محمد عبد الماجد

قالوا الكديس كان ما لقي اللبن بيقول .......

تعرف الامريكان ديل صعبين شديد في معادلة الشهادات الاجنبية و مرات بتاخد سنوات

عشان كده شعار السودانيين هنا "كل ما هو دولار حلال فهو مجالووو"
و بعضهم حتي الحلال زاتو ما شغال بيهو " اب صلعه و السلام"

Quote: تحياتي ياخ! ولو حصلت اللوترة ح يكون شعارنا (كل القوة .. أريزونا جوووه)!!

اشمعني اريزونا؟؟؟ علشان محل " الريس " بينوم و "سودانيز" بتقوم ..؟

شكرا ود الصايم

الاخ دينق سلامات

Quote: ياخ أنا قلت هسع ألقى لك طلب غالي جدا وصعب تحقيقه.

بطلوا نشافت راس انت و علاء الدين

انت بس تعال الخرطوم و ليك علي اعزمك في اي مكان تتمناهو
عزومة "جد جد " مش زي بتاعت ود الباوقة في مزرعته الطلعت اشاعة.
نشوفك في الخرطوم .... سمح

تحياتي

الاخت هويدا شرف الدين سلام

Quote: الحمد لله وقت ما عاوز تقابلنا برضو نفس الشعور

لا حولاااااا... هويدا حرام عليكي ما تحملي البوست اكتر من طاقتو

شعورك اكيد من طرف واحد فانا اتمني مشاهدة كل عضوية سودانيز فردا فردا
بعدين ناس الشجرة و العزوزاب ديل رايعين عديل كده و لينا معاهم زكريات جميلة
من ايام مدرسة المقرن

سلام

الاخ شاكر حامد
عساك طيب

Quote: نتمنى رؤيتك فى .... ولا اقول ليك خليها فى سرك

خلي في سري ليه .. كبو طوالي ما عندنا اسرار

و بعدين زول باسمك ده نقابلو في اي حتة

اسمك ده " شاكر حامد " لو عمات ليهو مزاد علني " بتغني عديييل"

تحياتي شاكر حامد

الاخ مجدي احمد الشيخ
سلامات

Quote: دي ليلة القدر عندو........!!

و بعد دا " بينق" و قال ما عاوز

لكن بيني و بينك برضو زول حكيم
يكون حسبها لغاية 2033 بكون الامريكان زاتم عايزين لوتري للسودان.." انا مركب مكنة ود الباوقة "

تحياتي

الاخ محمد عبد الرحمن
تحية طيبة

Quote: عندما يبيض الديك ...

بل عندما يبيض الفيل

شكرا علي المرور

الاخت اميرة الشيخ ازيك

Quote: يامنجي والله انت حقااااااااار ..عزّلت مستنيريننا كوووولهم ووديتهم يمين ........ ؟؟؟؟ لا لا نحن نحتج ونجشب وندين

الدنيا مصالح و كلو زول يكبر كومو .... حتي لو بالخج .. ولا شنو ؟

شكرا اميرة

ألأخ/العزيز عمر....لك التحية

Quote: *الاخوة اسماعيل عباس, محمد المرتضي حامد,شول اشوانق ,أبو جهينه , د. ابوبكر شداد , عزان سعيد , وليد المبارك في اي مكان و زمان لانهم يتحبوا لله ساي كده من ادبهم و اخلاقهم " و مثلهم كثير في هذا البورد و لكن خانتني الذاكرة وضيق البوست "

بوست دمه خفيف....وإنت زول ظريف..بصراحة كمان حاجاتك حلوة..

شكرآ لك لآنك أضفتنى مع الناس الحلوين ديل وزى ما قلت الحلوين كتار ..

أمنيتى ان ألتقيك بشدة وفكر فى الطريقة ونسعد بلقاك وممكن تصطاد زولين فى المجموعة دى بزيارة واحدة..

لك التحية يازول يارائع.

Quote: انت بس تعال الخرطوم و ليك علي اعزمك في اي مكان تتمناهو عزومة "جد جد " مش زي بتاعت ود الباوقة في مزرعته الطلعت اشاعة.

منجي

طيب بلاش من المزرعة

نعزمك في الشاليهات

المطلة على مقرن النيلين

مشويات بس...

مودتي

بوست ظريف وحبوب للغاية وبعدين خالي من الدسم - اقصد المكاجرة -- يعني كلو يسار يمين قومي شايل ليهو وردة وخاشي ------- يعني ود الباوقة ودينق اتلاقوا هنا بدون اي لعبة خشنة ------ ياريت لو كلنا استلهمنا وبس انو اختلاف الراي لايفسد للود قضية وان هذا الفضاء الاسفيري يسع الجميع ولنتناول حاجاتنا بذوق وفهم وبدون تعصب ---------- غايتو البوست مع انو اجتماعي ودمو خفيف الا انه الهمني هذه الخاطرة واعتذر للمشاترة ولكن اعمل شنو بحب السودان وبحب ناسو كوولهم من اقصي اليمين لاقصي اليسار

Quote: بحب السودان وبحب ناسو كوولهم من اقصي اليمين لاقصي اليسار

باعراقهم ومعتقداتهم كمان

Quote: يعني ود الباوقة ودينق اتلاقوا هنا بدون اي لعبة خشنة

اخي عاطف

صدقني انا لا احب اللعب الخشن اطلاقا

لكن اذا ضربت بضرب في الانكل على طول

بيني وبين دينق هدنة من التراشقات

وما زلنا ملتزمين بها ..

حتى بعد الانفصال

شكرا

Quote: *الاخ و الصديق سيف اليزل برعي و بوست " الصور لا تكذب ابدا " غير موجود في الصفحة الاولي .

شكرا اخي عمر

كما اتمني انا ايضا لقاؤك علي شاطئ النيل الابيض في الكلاكلة

بعيدا عن زخم الحضارة الغم

شاي وونسة بس

نسيت اسمو:

Quote: بوست ظريف وحبوب للغاية وبعدين خالي من الدسم - اقصد المكاجرة -- يعني كلو يسار يمين قومي شايل ليهو وردة وخاشي ------- يعني ود الباوقة ودينق اتلاقوا هنا بدون اي لعبة خشنة ------ ياريت لو كلنا استلهمنا وبس انو اختلاف الراي لايفسد للود قضية وان هذا الفضاء الاسفيري يسع الجميع ولنتناول حاجاتنا بذوق وفهم وبدون تعصب ---------- غايتو البوست مع انو اجتماعي ودمو خفيف الا انه الهمني هذه الخاطرة واعتذر للمشاترة ولكن اعمل شنو بحب السودان وبحب ناسو كوولهم من اقصي اليمين لاقصي اليسار

أبداً ما فيش مشاترة، كلامك في الصميم، وأشعر بأن هذا البوست فعلاً استثار في كل المتداخلين أشياء حلوة جداً، ... وسالت مشاعر الناس جدااااااااااااااول!!!

اخي العزيز عبد العزيز ود عيسي

ياخي انت زول رائع و جميل و كلماتك صادقة و معبرة
الا انك في الشاطئ الاخر من النهر "اقبل الينا و ستجد ما يسرك " ههههه
اقبل علي دربنا ان كنت حيرانا.. اقبل علي نبعنا ان كنت ظمآنا

Quote: أولا: بوستيك عينة.. وخرت ليك البوست داك.. أقصد بوست السيرة... ومفرداتك حلوة.. وجمعت ألوان الطيف بمحبة وصفاء..

يا سلام عليك شكرا علي الكلمات الجميلة في حق البوست " ما قصرت "

Quote: أكيد طلبك ده بيتحقق بعد أن تقوم الدولة المدنية.. دولة لا يكون فيها الدين مطيّة لاهل اللحى.. ولا نسمع فيها هوس تهليل تكبير.. آمين يارب!!

يا ود عيسي ابان لحي ديل مش قلت ليك قبل كده "اختاهم" و بقولا ليك تاني " من عادي لي وليا فقد آذنته بالحرب "

العناد ما منك من البلاوي البتاكلوها في " سنغافوره " شي عقارب و شي جعارين و شي رجلين ضفادع

شكرا ليك مرة اخري عزيزي ود عيسي
و دمت بالف خير

Quote: *الاخ ود شيقوق في الكلاكلة القلعة حتي نثبت له انو نحنا " بنمشي لي ناس ما بجونا " و في القلعه كمان .

هيييييييييييييييع يا عمر اخوي جيتكم وشايل حزمة عنكوليب هدية لكل ناس الكلاكلات

تاني عندك كلام؟

الاخ العزيز علاء الدين يوسف

Quote: و بالصور كمان إن شاء الله

ارجوووووك ما تمشي " بعدين ذنب الوليدات يبقي لينا في رقبتنا " يقولوا عمو استفز ابونا و رسلو جوبا

ربنا يحفظك لي اولادك و أهلك

تحياتي

منجي حبابك والله

Quote: الاخت نادية عثمان في الكلاكلة اللفة في افتتاحية " نادية استايل 5 "

خمسة عددددددديل ؟


ياحليلي في الفارغة أم قدود هو ( الواحد) راح في حق الله !!

دعواتك لي بالتوفيق في ( الجن ) البعرفو بس سمح ؟

Quote: *الاخوة اسماعيل عباس, محمد المرتضي حامد,شول اشوانق ,أبو جهينه , د. ابوبكر شداد , عزان سعيد , وليد المبارك في اي مكان و زمان لانهم يتحبوا لله ساي كده من ادبهم و اخلاقهم " و مثلهم كثير في هذا البورد و لكن خانتني الذاكرة وضيق البوست "

الحبيب عمر

الشكر لك مرتين

الاولى على هذه الروح الطيبه تجاه التى تزخر بها كلماتك
والثانيه ان احسنت الظن بنا وجعلتنا مع هؤلاء الافاضل

فالتحيه لك ولهم ونرجو ان نلتفى فى سوح الفرح وساعات الخير

الاخ الخلوق اسماعيل عباس

اشكرك جدا علي الكلام الجميل و الله اخجلت تواضعنا " لا عدمناك "

بصراحة مافي اي مجاملة في الموضوع و ما قلته عنك لا يختلف عليه اثنان في سودانيز اون لاين
و كثيرون شهدوا بذلك في البوست المذكور.

Quote: أمنيتى ان ألتقيك بشدة وفكر فى الطريقة ونسعد بلقاك وممكن تصطاد زولين فى المجموعة دى بزيارة واحدة..

لي عظيم الشرف ان التقيك و الاخ المذكور ..... دعني اخمن اظنه الشاب المحترم جدا " محمد المرتضي حامد " ولا مش كده ؟

لكم كل الود و الاحترام

العزيز ود الباوقة

Quote: منجي طيب بلاش من المزرعة نعزمك في الشاليهات المطلة على مقرن النيلين مشويات بس... مودتي

اها يا عموري الشاليهات دي حقتك ولا حقت الحزب
بس ما تكون زي مزرعة البشير الفي " بتري " القالو تمنها عشرين مليون دولار " دي لو في هاواي ما بتكون بالسعر ده "

علي كل حال اصلك كريم و احنا بنستاهل " هههه" و العزومة مقبولة ... ممكن اجيب معاي أخوي " دينق "؟؟؟

سلام عمر

االاخ عاطف ابراهيم سلامات

Quote: بوست ظريف وحبوب للغاية وبعدين خالي من الدسم - اقصد المكاجرة -- يعني كلو يسار يمين قومي شايل ليهو وردة وخاشي ------- يعني ود الباوقة ودينق اتلاقوا هنا بدون اي لعبة خشنة ------ ياريت لو كلنا استلهمنا وبس انو اختلاف الراي لايفسد للود قضية وان هذا الفضاء الاسفيري يسع الجميع ولنتناول حاجاتنا بذوق وفهم وبدون تعصب ---------- غايتو البوست مع انو اجتماعي ودمو خفيف الا انه الهمني هذه الخاطرة واعتذر للمشاترة ولكن اعمل شنو بحب السودان وبحب ناسو كوولهم من اقصي اليمين لاقصي اليسار

ياخي ربنا يديك العافية علي الكلمات الرائعة في وصف البوست... و بعدين لا مشاترة ولا شيتين .. كلام في محلو..
و شكرا ليك مرة تانية

تحياتي

لووووووووووووول يا منجي

بالشايفاه دا بالجد ممكن تشوفنا في حتة ذي دي..



مودتي لك وبوست دمه خفيف

Quote: *الاخوان صديق الموج و ابو ساندرا مرشحي المؤتمر الوطني لمنصب الوالي لاحدي ولايات السودان عام " 2025 " نراهم امام الكاميرات رافعين اصبع السبابة " هي لله هي لله لا للسلطة ولا للجاه

".

عمر ياخوى ........سلام

غايتو الفيك اتعرفت ...
انت ما تقول ماداير تشوفنا ساكت انا وابوساندرا ده،،،

الاخ العزيز سيف اليزل برعي

Quote: شكرا اخي عمر كما اتمني انا ايضا لقاؤك علي شاطئ النيل الابيض في الكلاكلة بعيدا عن زخم الحضارة الغم شاي وونسة بس

يا سلام ياخي امنية جميلة ربنا يحققها في القريب العاجل " بس ما تنسي " الزلابية"
بالمناسبة ترقب قريب جدا بوست عن الكلاكلات و التريعة علي وجه الخصوص..
ياخي ديل ناس رائعين.. يستاهلوا كتاب مش بوست .

تحياتي ابو لينة

Quote: ياخي انت زول رائع و جميل و كلماتك صادقة و معبرة الا انك في الشاطئ الاخر من النهر "اقبل الينا و ستجد ما يسرك " ههههه اقبل علي دربنا ان كنت حيرانا.. اقبل علي نبعنا ان كنت ظمآنا

عزيزي عمر منجي

سلام

الكلام بدأ حلو.. بس جات كلمة "إلا" ..
ذكرتني زمن كورة الشراب..
الا
ياخوي انا معاك جنبك ومشتهيك يا عيون... كما غناها ودالريح حمد..
نخيط النيل الابيض بحري وقبلي في كل الظروف وبأعشابنا الخضرة

Quote: ا ود عيسي ابان لحي ديل مش قلت ليك قبل كده "اختاهم" و بقولا ليك تاني " من عادي لي وليا فقد آذنته بالحرب " العناد ما منك من البلاوي البتاكلوها في " سنغافوره " شي عقارب و شي جعارين و شي رجلين ضفادع

ياخوي نحن جوة القبة وبنفتش على الولي..
لكن لقيتك قاصد الوالي...!!
وجمال الوالي ليهو استثناء صفوي!!
وفي صفه نعلن الحرب على الارباب ومن لف لفه!!

السي فوود أكل الملوك.. دي مش بلاوي... دي من بيت الكلاوي!!
وفي معيته ترى الاشياء على حقيقتها..
يبان لك اي شئ شين داخل اللحى!!

ألاقيك وأجيب ليك نظارة شفافة عربون ...

مودتي

الاخ صلاح عباس فقير

Quote: أبداً ما فيش مشاترة، كلامك في الصميم، وأشعر بأن هذا البوست فعلاً استثار في كل المتداخلين أشياء حلوة جداً، ... وسالت مشاعر الناس جدااااااااااااااول!!!

اشكرك علي الكلام الجميل الذي استثار مشاعرنا برضو.... ربنا يفتحها عليك دنيا و آخرة

مودتي

الاخ الطيب شيقوق سلامات

اخيرا " شركنا " ليك و جيت لناس " ما كان بجوك "

Quote: هيييييييييييييييع يا عمر اخوي جيتكم وشايل حزمة عنكوليب هدية لكل ناس الكلاكلات

الهدية سمحة و مقبوووولة بس ناس الكلاكلات كتاااار " ممكن اقوم بيها براي ؟؟؟ سمح "

Quote: تاني عندك كلام؟

ابدا الكلام خلص تب ... ما قصرت يديك العافية

تحياتي

الاخ الحبيب المحترم د. شداد

Quote: الشكر لك مرتين الاولى على هذه الروح الطيبه تجاه التى تزخر بها كلماتك والثانيه ان احسنت الظن بنا وجعلتنا مع هؤلاء الافاضل

لم آتي بشي من عندي و لكنها الحقيقة و انتم اهلها بجدارة
ما يحز في النفس ان هناك الكثير الافاضل في هذا البورد الذين لم ياتي ذكرهم هنا
فالتحية لكل عضوية سودانيز ... فردا فردا

Quote: فالتحيه لك ولهم ونرجو ان نلتفى فى سوح الفرح وساعات الخير

اللهم آميييين يا رب

تحياتي

الاخت نادية عثمان

Quote: دعواتك لي بالتوفيق في ( الجن ) البعرفو بس سمح ؟

ربنا يوفقك في حلك و ترحالك ... دنيا و آخرة

مريت بتجربة زي تجربتك دي قبل سنتين ... و ما زالت اثارها .. لكن عادي بتنسيها

تحياتي

الاخت المحترمة د. نجاة
ازيك و عساك طيبة

Quote: لووووووووووووول يا منجي بالشايفاه دا بالجد ممكن تشوفنا في حتة ذي دي..

ما بين بوست " الوجبة الاخيرة " و هذا البوست هناك تغيير ملحوظ من الكلام الفوق ده " الحاصل شنو يا دكتورة "
عقبال لي خالتو دومة.....

شكرا ليكي كتيير علي الكلمات الجميلة

مودتي

الاخ صديق الموج
سلامات

Quote: عمر ياخوى ........سلام غايتو الفيك اتعرفت ... انت ما تقول ماداير تشوفنا ساكت انا وابوساندرا ده،،،

لا والله نتمني نشوفكم في اي مكان .. ... بس قلنا الدنيا ما معروفة
و الفرق دائما بتشطب لعيبة و تسجل لعيبة ... و التغيير واجب وطني

تحياتي لك و ابو ساندرا

أخي عمر موسى 00 تحية بمساحة الوطن

Quote: *الاخ ابو حراز في جلسة عائلية في السودان و اثبات انو عندو مدام و اسمها " ست النفر " قال ست النفر قال"

أول شيء شكراً كتير جداً على أن هناك أشخاص يتذكروننا ويسعون لأن نلتقي
طبعاً همشونا تهميش كبير جداً في بوست منال { من تريد أن تقابل من البورداب }
والله لاضكر ولانتاية مافكر حتى شوية تفكير يقول عاوز أقابل أبوحراز
كأننا مافي سودانيز أون لاين
يعني الواحد لو شالتو الحماقة بتاعت الجعليين
كان طوالي طلع ليهو في اقرب برج عالي لسوداتيل ووقع كسر رقبتو
لكن أعدتم لينا الأمل باننا مازلنا في القلوب
ولوكانت قلوب خشنة 00 غير مهم !!!

ست النفر قاعدة وزولة رائعة جداً
لكن بتكره المنتديات
لأنها بتفتكرها { ضرة } بالنسبة لها
لكن شيلو شيلتكم لو دخلت معانا هنا
والله تاني لاتشوفوا هيفاء وهبي
ولانانسي عجرم
تاني الا نكتب ليكم عن بوهيات المهندس { اكتصادية وقوية } !!!

شكراً لكل من سال عني

أخى الجميل عمر..........لك التحية مرة اخرى مرات ومرات بأذن الله.

Quote: لي عظيم الشرف ان التقيك و الاخ المذكور ..... دعني اخمن اظنه الشاب المحترم جدا " محمد المرتضي حامد " ولا مش كده ؟ لكم كل الود و الاحترام

أمنياتى بالجد أن نلتقى..أفرح جدآ عندما ألتقى بشخص إلتقيته إسفيريآ وتعرفت عليه عبره...وكم إلتقيت ببورداب من معظم بقاع الآرض ولم أنصدم بمعرفة واحد منهم والحمدالله حتى ألأن..كل واحد أجمل من ألأخر...

سعدت كثيرآ بملاقاة معظم بورداب الخرطوم أمنيتى أن ألتقى بودشيقوق فى أم درمان هو وهارون دياب وأجيب ليهم قصب سكر وأصورهم وهم بقشروا فيه.

وأقابل محمد السنى دفع الله وهو جاكى محصل أمر ضرورى.

ألأشخاص الذين ذكرتنى فى معيتهم قامات أكن لهم كل تقدير وشكرآ لحسن الظن بى.وأمنيتى أن ألتقيهم.. تخمينك غير صحيح والشخص هو العزيز ابوجهينة لأننا فى مكان واحد..محمد المرتضى حامد إن شاء الله يجينا مارى من هنا وتكتمل الصورة عندك.

تقديرى وأحترامى..

ياخ كتر خيرك ياخ

وربنا يحقق الاماني ( في ما يخصنا )

شكرا كتير على الكلام الحلو يا زوق

غداً نكون كما نود ونلتقي عند الغروب ، وغداً سنلتقي ولكن متى وكيف هذا من شان الأقدار ,
ومازلنا نجد التهميش هنا يعني ما في حد عايز شوفني لا في بوست الأخت منال ولا إنت حتى عايز تشوفني لكن بالجد انا عايز أشوفك وتقبل ودي ،

تحياتي : ياسر العيلفون

بوست روحه سمحة، ويدل علي خفة دمك يا عمر، وتصالحك مع نفسك




تشكر ياعمر علي مساحتك وسماحتك.

الاخ عثمان ابو حراز

ياخي منذ ان عرفنا سودانيز و ابو حراز رقم لا يستهان به
بقفشاتك الجميلة و روحك المرحة , و لكن في السنوات الاخيرة ظهورك قل الي ان اختفي
نهائيا فقلنا لعل " ست النفر " قداحكمت قبضتها, ثم شكلها انشغلت قليلا بكوم العيال
فرجعت الي الظهور قليلا " ربنا يرزقك كمان و كمان "

Quote: ست النفر قاعدة وزولة رائعة جداً

طبعا زولة رائعة لو ما كانت كده ما كان شفنا الجمال ده كلو "ابداع ابو حراز " في سودانيز اون لاين
و الحقيقة هي " وراء كل زول كتاااااب في سودانيز زولة رائعة "
بس انت كاتب في البروفايل انك "سنقل" قال سنقل قال....
و هذا ما دعانا الي التشكك

تحياتي وما تطول

الاخ اسماعيل

شكرا علي روحك الحلوه و انشاء الله يكون اللقاء بكل الناس الحلوين
في سودانيز و قرائها في ارض السودان و هي تنعم بالخير و الامن و السلام

Quote: ألأشخاص الذين ذكرتنى فى معيتهم قامات أكن لهم كل تقدير وشكرآ لحسن الظن بى.وأمنيتى أن ألتقيهم.. تخمينك غير صحيح والشخص هو العزيز ابوجهينة لأننا فى مكان واحد

اتمني ان التقيك و الاخ جلال " ابو جهينة" فان معرفة الكرام كنز و لكن اخاف اذا التقينا
انت حتروح فيها لانو حنشبكا " رطانة" رغم انو رطانتي عايزه ليها شغل , و الاخ ابو جهينة
يجيد الرطانتين " المحسية و الدنقلاوية " زي الموبايل ابو شريحتين " ماشاء الله عيني بارده"

تشكر اخي اسماعيل

الاخ عبد العزيز عيسي سلام

Quote: السي فوود أكل الملوك.. دي مش بلاوي... دي من بيت الكلاوي!!

هسي عليك الله السي فوود في ديل ياتن " عقارب و جعارين و رجلين ضفادع"
ما تقول لي الضفدع, المسكين ده زاتو ما عارف نفسو , يوم جوه و يوم بره

Quote: يبان لك اي شئ شين داخل اللحى!!

ليس في اللحي شين بل كله حسن اذا خلصت النية لله سبحانه و تعالي
" من اطاعني دخل الجنة و من عصاني فقد أبي " او كما قال صلي الله عليه و سلم

Quote: ألاقيك وأجيب ليك نظارة شفافة عربون ...

شفافة ليه انا الزول الشفاف من الابتدائية ما بريدو

لكن بقبل منك نظاره " كلير " CLEAR

سلامي

الاخ وليد

Quote: ياخ كتر خيرك ياخ وربنا يحقق الاماني ( في ما يخصنا ) شكرا كتير على الكلام الحلو يا زوق

تسلم و ربنا يحفظ ليك الحلوين و امهم

تحياتي

الاخ ياسر العيلفون
مرحبا بك في هذا البوست و في اي مكان

Quote: غداً نكون كما نود ونلتقي عند الغروب ، وغداً سنلتقي ولكن متى وكيف هذا من شان الأقدار , ومازلنا نجد التهميش هنا يعني ما في حد عايز شوفني لا في بوست الأخت منال ولا إنت حتى عايز تشوفني لكن بالجد انا عايز أشوفك وتقبل ودي ، تحياتي : ياسر العيلفون

ابدا و الله عايزين نشوفك و كل الاعضاء هنا و لكن البوست كان مازحا لخلاف ما عليه الاعضاء يعني هناك بعضهم
تتمني تشوفهم بس ما عندهم ما يخلف

اتمني ان اراك فانت اثبت ان روحك هي الاجمل

الاخ الفاضل

Quote: بوست روحه سمحة، ويدل علي خفة دمك يا عمر، وتصالحك مع نفسك تشكر ياعمر علي مساحتك وسماحتك.

ياخي انت الروحك سمحه يا فاضل وشكرا ليك كتير علي الكلام الجميل

يديك العافية

بوست مخستك وموغل في الانصرافية















تليشة:
موغل دي تحسسك انك بقيت مثقف ياخي

Quote: من تحب رؤيته من البورداب" ولكن بسبب التهميش الذي وجدناه نحن " البرالمة" في ذلك البوست كان " حمل السلاح" و هذا الانفصال و لا نامت اعين " ديناصورات سودانيز اون لاين"

المهمش عمر مجني
سلامي وتقديري
اولاً هنا انت همشتنا نحن (البرامكة) (يابرملي)
وهنا أقول لك(أحايا سنن البرامكه وعاجبني طول أيدوا سامكه)
وبعدين ديناصورات سودانيز اون لاين تصاقطوا واحد تلوالاخر
بوست راقي كصاحبه مابين السطور حلاوت الكلمه والاخاء والوطنيه
سلمت اخي منجي
شـــــطة

Quote: هسي عليك الله السي فوود في ديل ياتن " عقارب و جعارين و رجلين ضفادع" ما تقول لي الضفدع, المسكين ده زاتو ما عارف نفسو , يوم جوه و يوم بره

عزيزي/ عمر

سلامات

الاصناف الفوق دي لو شافها الصديق/ معتصم محمد صالح ريقه يبل الكيبورد...
العقارب والجعارين دي اسماء عائلات محترمة من المخلوقات كاملة الدسم..
وأسأل الاخ/ أشرف يعطيك المفيد من بركات البحار..
والضفدع هذا الوسيط الرائع يجمعك بين طعامي البر والبحر..

Quote: ليس في اللحي شين بل كله حسن اذا خلصت النية لله سبحانه و تعالي " من اطاعني دخل الجنة و من عصاني فقد أبي " او كما قال صلي الله عليه و سلم

شفت انت براك قلت:(اذا خلصت النية..))
وعشان النية دي ومافي مخلوق بيعرق مافي القلوب فنحن علينا بالظاهر...

Quote: شفافة ليه انا الزول الشفاف من الابتدائية ما بريدو لكن بقبل منك نظاره " كلير " CLEAR

النظارة الشفافة مهمة لكشف ما بين شعيرات اللحى...
وبعدين كلير بتكون في المرحلة التالية بعد الشفافية والكشف..

ياخي انت مصعب الامور وما عايز تلاقيني ساي..

الأخ الحبيب عمر
السلام عليكم ورحمة الله وبركاته
واضح انك مذاكر البورد كويس.

Quote: الاخ هارون دياب في مباراة هلال مريخ و هو يلبس الازرق و صوته قد "بح" وهو يصيح هلالنا فوووق و مريخ ..مريخ "ح نفرمو" فسيخ.

دى زي واحد يتمنى يشوف هيفاء وهبى فى قناة اقرأ.
يا اخى لك كل الحب على حسن ظنك بنا ونرجو ان نكون كذلك .. ونسأل الله ان يغفر لنا مالاتعلمون .

الاخ طارق جبريل
الشايقي الظريف اللطيف ازيك

Quote: بوست مخستك وموغل في الانصرافية

يا حاسد انت فاضي من بوستات " البواسير " و النساوين " الرهااااف " هههههههه

و بعدين تعال هنا فيييييي زمتك المخستك بوستي و لا بوست البواسير بتاعك داك الواحد يخشو بي كمامات
و يطلع منو يستحمه سبع مرات احداهن بي " ديتول "ههه

ما سمعت بالمثل " البوستاتو من "خ...ي" ما يفلع بوستات الناس "

لا وكمان تقول " واحد قريبي " كلامك ده قولو لي زول ما عندو "حديده"

الواحد يتبشتن و يتعولق و يجي يختو في قرايبو

و الغريبة اتصل بي واحد صاحبي شايقي من الاسكا مبسوط قال لي " عمر رسلت ليك ايميل ظريف بتاع واحد شايقي
عملولو عملية بواسير " قلت ليهو دا ما كلام المخستك طارق ود جبرين "

بالله بوستيك بقي حايم في الاسافير ؟؟... واااا شماتة المغاربة فيك و بني فاس و مكناس و من جاورهم من الاعراب .

مع السلامة " وان عدتم عدنا"
شكرا ليك والله بوستاتك كلها حلوه و ظريفه

تحياتي

الاخ المحترم خالد شطة
كل الود و الاحترام

Quote: المهمش عمر منجي سلامي وتقديري اولاً هنا انت همشتنا نحن (البرامكة) (يابرملي) وهنا أقول لك(أحايا سنن البرامكه وعاجبني طول أيدوا سامكه) وبعدين ديناصورات سودانيز اون لاين تصاقطوا واحد تلوالاخر بوست راقي كصاحبه مابين السطور حلاوت الكلمه والاخاء والوطنيه سلمت اخي منجي شـــــطة

و صدقني ما مهمش ولا انت شبه تهميش وليس هناك قصد لتهميش اي بوردابي و لكن البوست
جاء سريعا.
و نشكرك علي كلماتك الرائعة
تحياتي

Quote: يا حاسد انت فاضي من بوستات " البواسير " و النساوين " الرهااااف " هههههههه و بعدين تعال هنا فيييييي زمتك المخستك بوستي و لا بوست البواسير بتاعك داك الواحد يخشو بي كمامات و يطلع منو يستحمه سبع مرات احداهن بي " ديتول "ههه ما سمعت بالمثل " البوستاتو من "خ...ي" ما يفلع بوستات الناس " لا وكمان تقول " واحد قريبي " كلامك ده قولو لي زول ما عندو "حديده" الواحد يتبشتن و يتعولق و يجي يختو في قرايبو و الغريبة اتصل بي واحد صاحبي شايقي من الاسكا مبسوط قال لي " عمر رسلت ليك ايميل ظريف بتاع واحد شايقي عملولو عملية بواسير " قلت ليهو دا ما كلام المخستك طارق ود جبرين " بالله بوستيك بقي حايم في الاسافير ؟؟... واااا شماتة المغاربة فيك و بني فاس و مكناس و من جاورهم من الاعراب .

لاحول ولاقوة الا بالله

ده كله يطلع منك ياخوي منجي..

وبعدين في منو....!!

في السامر عشيق الليل.. الزول الرهيف البيقولوا عليه بالتلاقيط: ديليكيت!!

البرلوم مولود باضراسو!!!



تحياتي

اخي و عزيزي هارون دياب

ياخي و الله انت الرائع حد الدهشة

شكرا ليك كتيييير علي الحاجات الجميلة دي

تسلم من كل شر انت و وليداتك

قبلة العشاق.... هدية للاحباب

شفت ياخوي

الليلة ما تلحق ترد علي...
تحياتي

الاخ عمر منجي
سلام

Quote: *الاخت ام حازم "تراجي" في الاراضي المحررة .. أقصد " القدس و تل ابيب "

مسلط انت يا منجي يجازي محنك؟؟؟





آمين يا رب قريبا بّأذن الله.
من فمك لباب السماء!

اخي العزيز آكل البلاوي عبد العزيز عيسي
عساك طيب

Quote: شفت انت براك قلت:(اذا خلصت النية..)) وعشان النية دي ومافي مخلوق بيعرق مافي القلوب فنحن علينا بالظاهر...

بالظاهر كيف يعني ... واحد مربي لحيه معناها انو تاجر دين و منافق " مالكم كيف تحكمون "

Quote: لاحول ولاقوة الا بالله ده كله يطلع منك ياخوي منجي.. وبعدين في منو....!! في السامر عشيق الليل.. الزول الرهيف البيقولوا عليه بالتلاقيط: ديليكيت!! البرلوم مولود باضراسو!!!

هوي يا ود عيسي ما تخش بيني و بين ود جبريل " الزول المرهف الظريف "

بس كلامي هو عارفو براهو اسمو " الهظار الخشن " وهو من بدا و مشينا علي خطاهو..

Quote: الليلة ما تلحق ترد علي... تحياتي

الحق ارد عليك كيف و انت قاعد تاكل في البلاوي دي " ليك حق تنطط "
ِA man is what he eats
تصبح علي خير " بتوقيتنا"

الاخ عبد العزيز الفاضلابي
سلامات

Quote: دى زي واحد يتمنى يشوف هيفاء وهبى فى قناة اقرأ.

أو واحد عاوز ليهو ربطة برسيم من مزرعة ود الباوقة...

أو تقرأ بوست لحسين ملاسي اكتر من اربع سطور...

Quote: يا اخى لك كل الحب على حسن ظنك بنا ونرجو ان نكون كذلك .. ونسأل الله ان يغفر لنا مالاتعلمون .

و انت كذلك .. و دعواتك

تحياتي

الاخت ام حازم
سلامات

Quote: آمين يا رب قريبا بّأذن الله. من فمك لباب السماء!

آمين
وشكرا علي المرور الظريف و ربنا يخلي ليك حازم و سند و يقر عينك بهم

تحياتي

Quote: الحق ارد عليك كيف و انت قاعد تاكل في البلاوي دي " ليك حق تنطط " ِA man is what he eats تصبح علي خير " بتوقيتنا"

العزيز/ منجي


لسه الوقت بدري وقبل تنام جيب لي طلبي ده..

Quote: العزيز/ منجي لسه الوقت بدري وقبل تنام جيب لي طلبي ده..

غالي و الطلب رخيص

In your dreams cuz

عزيزي منجي

عدت من صلاة الظهر وقلت ألقاك نائما وردك باكر!!!

تفضل الغداء معنا بالبريدو قلبك...

الحاجات اللذيذة ديك بعدين في العشاء

مودتي

العزيز ود عيسي

Quote: عدت من صلاة الظهر وقلت ألقاك نائما وردك باكر!!!

لما صليت الظهر امامكم كان عندو لحية ولا لا و لو عندو اها رايك فيهو شنو ؟؟؟

بس اوعك تقولي انت كنت الامام ....

Quote: تفضل الغداء معنا بالبريدو قلبك... الحاجات اللذيذة ديك بعدين في العشاء

عارفك كريم .. تسلم يا ود عيسي ... كفاية علينا الغداء

مودتي

بوست اكثر من رائع
بوست الربع بلا منازع
شكرا يا منجي لهذا الابداع

Quote: لما صليت الظهر امامكم كان عندو لحية ولا لا و لو عندو اها رايك فيهو شنو ؟؟؟ بس اوعك تقولي انت كنت الامام ....

عزيزي منجي


كيف حالك؟
نحن بنشتت الكورة جاي وجاي.. وأنت كل مرّة بتجيبها في خط طمنطاشر!!!!!!!!!!!!!


طيب// تفتكر لما أصلي وراء واحد ملتحي ما شفاف بكون مطمئن على صلاتي!!!
عشان نخلص من الموضوع ده ونتجنب البلنتيات.. دولتنا المدنية الحديثة بنفصل فيها الدين عن السياسة ولا نسمح باقامة احزاب ذات تكوين ونهج ديني...

بعد ده انت تختار عايز تلاقيني في الوزارة ولا المسجد!!!


مودتي

الاخ ود البوش سلامات

Quote: بوست اكثر من رائع بوست الربع بلا منازع شكرا يا منجي لهذا الابداع

و الله سعدنا بطلتك البهية و كلماتك الرائعة الجميلة
ان شاء الله نكون عند حسن الظن دائما

تحياتي

اخي عبد العزيز

Quote: دولتنا المدنية الحديثة بنفصل فيها الدين عن السياسة ولا نسمح باقامة احزاب ذات تكوين ونهج ديني...

و من انتم حتي تفعلوا ذلك بكل هذه الثقة... الشعب هو من يحدد عن طريق صناديق الاقتراع " و حنخرتكم من غير خج "

Quote: بعد ده انت تختار عايز تلاقيني في الوزارة ولا المسجد!!!

مسجد الوزارة ............ سمح ؟؟؟

تحياتي عبدو

Quote: مسجد الوزارة ............ سمح ؟؟؟

عزيزي منجي


مكان العمل كمان!!
اي موظف اي عامل يصلي في مكتبه..
لا مجال للتسكع وتضييع وقت العمل في تجمع, ونسة, و و

تحياتي

الاخ عبد العزيز

Quote: لا مجال للتسكع وتضييع وقت العمل في تجمع, ونسة, و و

صلاة الجماعة تسكع ..؟؟؟؟؟

جاييك برواقة .... اصلو انت لسانك متبري منك ..

يديك العافية ود عيسي

Quote: صلاة الجماعة تسكع ..؟؟؟؟؟

Quote: Quote: لا مجال للتسكع وتضييع وقت العمل في تجمع, ونسة, و و

منجي
سلام
هسي انا جبت طاري صلاة الجماعة!!!

بعدين مكان العمل للعمل..
عايز تصلي ولا تنفل أمشي بيتكم وسوي العايزو....

مودتي

يا جماعة خلونا في الموضوع لو سمحتو

يا منجى انا متابع بوستات و عملت ليك كم مداخلة كده ... !!!

و متابع البوست ده من قولة تيت ..


لكن اتفق تماما مع اخوى خالد شطة فيما ذهب اليه ..!!!

الفيك اتعرفت ...

Quote: Quote: المهمش عمر منجي سلامي وتقديري اولاً هنا انت همشتنا نحن (البرامكة) (يابرملي) وهنا أقول لك(أحايا سنن البرامكه وعاجبني طول أيدوا سامكه) وبعدين ديناصورات سودانيز اون لاين تصاقطوا واحد تلوالاخر بوست راقي كصاحبه مابين السطور حلاوت الكلمه والاخاء والوطنيه سلمت اخي منجي شـــــطة

بوست لذيذ مرشوش بالزعفران والياسمين

ود عيسي سلام

Quote: هسي انا جبت طاري صلاة الجماعة!!!

طيب مسجد الوزارة ده لي شنو ؟...... بدقو فوقو " ظار "


و علشان خاطر ود الباوقة ...

و بصراحة نختلف معاك بكل "الود و الاحترام " يا ود عيسي

مودتي

اخونا ود الباوقة
سلامات

Quote: يا جماعة خلونا في الموضوع لو سمحتو

علشان خاطرك .............. المهم انا طالبك الآتي

تلاته خرفان ,جركانتين لبن , و مشويات

في اي مكان و زمان " اوعك تنط "

مودتي يا عمر

الحبيب الطيب رحمة قريمان

Quote: الفيك اتعرفت ...

ليه بس .. والله انا خايف يكون في بوراب كتاااار فاهمين انو البوست فيهو خيار و فقوس

و بعدين انت بالذات فكرت فيك و لكن ما لقيت الا انو اعملك "كوز" و بصراحة خفت عديييل كده

خفت انك تملا البوست " كوبي بيست " و " تدعو علي كما يدعون عليكم "

حاشاك من التهميش يا ود رحمة

و دمت يالف خير .. وارجوك ما تنقطع

تحياتي

Quote: بوست لذيذ مرشوش بالزعفران والياسمين

شكرا ليك كتييييير يا حامد محمد حامد

ربنا يديك العافية

تحياتي

up

Quote: اوعك تنط

منجي وكمان مع الحليب والمشويات

ليك مني ترايفل تحلية

البوست دا مفروض بكري يعلقو فوق ( بي شناكل )

مودتي

ود الباوقة سلامات

عارفك كريم .. ربنا يجمعنا في بلدنا و هي في أمن و رخاء

Quote: ليك مني ترايفل تحلية

ال "ترايفل " دي شنو .... بتاكل و لا شراب ؟؟؟؟

Quote: البوست دا مفروض بكري يعلقو فوق ( بي شناكل )

ان شاء الله بي خيط "دبارة"

بس انت اتوسط لينا عند بكوري ينوبك "ثواب"

Quote: طيب مسجد الوزارة ده لي شنو ؟...... بدقو فوقو " ظار "

هي وزارة ويكون فيها مسجد كمان؟
والله ياها الفوضى والتسكع بتاع العطالة في محل العمل..!!






(((غايتو.. الفيك اتعرفت..)))


بلاقيك!!

Quote: (((غايتو.. الفيك اتعرفت..))) بلاقيك!!

بلاقيك دي مش علي وزن "طالعني" بتاعة الابتدائية زمااااااان

ما بتتوب انت ؟؟؟؟؟

برضو مودتي

Quote: البوست دا مفروض بكري يعلقو فوق ( بي شناكل )

الحبيب عمر منجي
تحياتي و اشواقي يا دفعة
حقيقي بوست ظريف و دمو خفيف ..الفكرة اكثر من رائعة
تدل علي متابعتك لكل ما يدور في الحوش ...
وعلي قولة حبيبنا ودالباوقة مفروض الاخ بكري يعلق ليك
البوست ده فوق عاليا تشجيعا لكل البرالمه..
تحياتي لك يا عزيز

Quote: بلاقيك دي مش علي وزن "طالعني" بتاعة الابتدائية زمااااااان ما بتتوب انت ؟؟؟؟؟

ياها ذاتها وفي لفة الكلاكلة كمان.......

احمد الله على كل شئ ونتمنى التوبة لكل مهووس بالدين..
ربنا ينور بصيرة المتشدقين بالدين وناس تكبير وتهليل..


بلاقيك دي في روح البوست ده..
اتمنى أن لا تتركه وتفتح معاي شباك جانبي..

لو الاماني بايدي...........

الاخ العزيز والزميل في "البرلمة"امير طمبل
شكرا ليك كتيير علي طلتك البهية و كلماتك الرائعة

Quote: وعلي قولة حبيبنا ودالباوقة مفروض الاخ بكري يعلق ليك البوست ده فوق عاليا تشجيعا لكل البرالمه..

يا ريت !!!!
تسلم يا حبيب علي المرور الجميل
تحياتي

ود عيسي سلامات

Quote: ياها ذاتها وفي لفة الكلاكلة كمان.......

ما بتقدر علي في لفة الكلاكلة .. الكلاكلة نصها "رطانة"
و النص الباقي جيران كرام..

Quote: بلاقيك دي في روح البوست ده.. اتمنى أن لا تتركه وتفتح معاي شباك جانبي.. لو الاماني بايدي...........

ما انت روح البوست ...

كنت حا ارد عليك في الباقي لكن وعدنا ود الباوقة.

تحياتي

الأخ الكريم
عمر موسي منجي
لك التحية والود

Quote: *الاخوة نزار محمد عثمان , محمد الزبير , عبد العزيز الفاضلابي , عارف الركابي , أشرف مصطفي في جلسة في الحرم "فهم القوم لا يشقي بهم جليسهم " نحسبهم كذلك و لا نزكي علي الله احد .

هذا شرف عظيم لي أن تضعني بين هؤلاء الإخوة الأفاضل, فشخصي الضعيف يستحي أن يكون بين هؤلاء القامات السامقات, أما جلسة الحرم فهذه أمنية أسأل المولى (عز وجل) أن تتحقق لي في الحياة الدنيا وأن يرزقني حج بيته الحرام, وأن يجمعني وإياكم في تلك الأماكن المقدسة والمباركة ويحشرنا في ذمرة الصديقين والشهداء, كما(أسأله تعالى) أن أكون عند حسن ظنك بي.

خالص التقدير والإحترام

الاخ عمر موسى

تحياتى

انت انسان رائع بمعنى الكلمة.

بوست موفق......جمعت كل الوان الطيف فى غرفة واحدة دون تكشيرة واحدة.

نحن مهمشين من الجميع لكن من لم يكتشف الجواهر معزور (دى طبعا قشرة وكدة).

تحياتى للجميع.

الاخ اشرف مصطفي

سلامات

انا ما جبت حاجة من عندي و تستاهلوا كل خير !!
ربنا يستجيب دعائك

تحياتي

الاخ المحترم فوزي بابكر

ما عارفين نقول ليك شنو لكن والله ما خليت حاجة
شكرا ليك كتيير علي الكلام الجميل المنمق و ربنا يديك العافية

Quote: نحن مهمشين من الجميع لكن من لم يكتشف الجواهر معزور (دى طبعا قشرة وكدة).

فعلا معزورين لاننا لم نكتشف هذه الجواهر في وقتها و لك العتبي حتي ترضي
و لا عدمناك يااخي

مودتي

Quote: ما بتقدر علي في لفة الكلاكلة .. الكلاكلة نصها "رطانة" و النص الباقي جيران كرام..

الرطانة مقدورة.. لكن طالما هنالك كرام بجنبكم مافي عوجة تب..

Quote: كنت حا ارد عليك في الباقي لكن وعدنا ود الباوقة.

في دي بالذات أخير لو رديت..
كدا طبزتها شديد....

الاخ عبد العزيز

Quote: في دي بالذات أخير لو رديت.. كدا طبزتها شديد....

فليعفو عنا ود الباوقة اذا ...
مش قلت ليك ما بتتوب ..
ارجي الراجيك...

Quote: احمد الله على كل شئ ونتمنى التوبة لكل مهووس بالدين.. ربنا ينور بصيرة المتشدقين بالدين وناس تكبير وتهليل..

بل نتمني التوبة لكل مهووس بالعلمانية وهي سراب بقيعة يحسبه الظمآن ماء
يري ان " ما لله لله و ما لقيصر لقيصر" نسال الله ان يتوب عليه حتي يري ان
" ما لله لله و ما لقيصر لله " " لا يؤمن أحدكم حتي يكون هواه تبعا لما جئت به" أو كما قال "ص"
يقول تبارك وتعالى: {فَلاَ وَرَبِّكَ لاَ يُؤْمِنُونَ حَتَّىَ يُحَكِّمُوكَ فِيمَا شَجَرَ بَيْنَهُمْ ثُمَّ لاَ يَجِدُواْ فِي أَنفُسِهِمْ حَرَجًا مِّمَّا قَضَيْتَ وَيُسَلِّمُواْ تَسْلِيمًا} [(65) سورة النساء]
يقولون ان يكون حكم الشعب بالشعب.. اي اذا ارادوا زواج المثليين فما عليهم الا التصويت و الشعب يقرر" كما يحدث الان في امريكا"
اذا ارادوا اباحة الحشيش فالشعب يقرر .... و تستمر الدوامة

يقول تعالى : { وإذا أردنا أن نهلك قرية أمرنا مترفيها ففسقوا فيها فحق عليها القول فدمرناها تدميرا }

لسه ما انتهيت بس نمشي نشوف " معيشة الوليدات" و بجيك راجع ان شاء الله

و برضو تقول لي طبزتها
امش شوف ليك عقرب اكلو احسن ليك

تحياتي يا ود عيسي

Quote: بل نتمني التوبة لكل مهووس بالعلمانية وهي سراب بقيعة يحسبه الظمآن ماء يري ان " ما لله لله و ما لقيصر لقيصر" نسال الله ان يتوب عليه حتي يري ان " ما لله لله و ما لقيصر لله " " لا يؤمن أحدكم حتي يكون هواه تبعا لما جئت به" أو كما قال "ص" يقول تبارك وتعالى: {فَلاَ وَرَبِّكَ لاَ يُؤْمِنُونَ حَتَّىَ يُحَكِّمُوكَ فِيمَا شَجَرَ بَيْنَهُمْ ثُمَّ لاَ يَجِدُواْ فِي أَنفُسِهِمْ حَرَجًا مِّمَّا قَضَيْتَ وَيُسَلِّمُواْ تَسْلِيمًا} [(65) سورة النساء] يقولون ان يكون حكم الشعب بالشعب.. اي اذا ارادوا زواج المثليين فما عليهم الا التصويت و الشعب يقرر" كما يحدث الان في امريكا" اذا ارادوا اباحة الحشيش فالشعب يقرر .... و تستمر الدوامة يقول تعالى : { وإذا أردنا أن نهلك قرية أمرنا مترفيها ففسقوا فيها فحق عليها القول فدمرناها تدميرا } لسه ما انتهيت بس نمشي نشوف " معيشة الوليدات" و بجيك راجع ان شاء الله و برضو تقول لي طبزتها امش شوف ليك عقرب اكلو احسن ليك

الاخ منجي

سلام

اولا قبل أن نتحدث في شئ اسمه سياسة ومسميات يجب أن تعترف وتقر بأن الشعب السوداني ده فيهو المسلم وغير المسلم..
ويجب أن تعرف بأن لا اكراه في الدين
ويجب أن تعرف أنه لاتزر وازرة وزر أخرى
ويجب أن تعرف أن الدين لله.. فمن شاء منكم فليؤمن ومن شاء منكم فليكفر..

ثانيا:
اذا افترضنا أن الشعب السوداني كووووووووووله مسلم....
يبقى انتفى دور اي واحد يجي يعمل لي فيها ابو عرام.. تهليل ..تكبير وفارغة زي دي.
طالما الناس دي على دين واحد فرضا يبقى دور كل من يمتطي صهوة السياسة أن يأتي ببرنامج يقنع به الناس بأنه هو الاحسن لحل مشاكلهم ولتطوير البلد..
مشروع الجزيرة مثلا فهو الآن لا ينتج.. تمشي تشوف ليش لا ينتج.. ما تجي تقول لي لا ولاء لغير الله والكلام الفاضي ده..
عايزين منك طالما اعتبرت نفسك سياسي أن تأتي ببرنامج لحل المشكل..
شق الترع.. المبيدات.. الري.. دي حاجيات 1+1=2 ومافي داعي للهتيفة والرعاع وخم الناس بالفارغة..
ومافي داعي لاي دجال ومنافق يجي يطبز.. الاسلام هو الحل والكلام الفارغ من النوع ده..
عندك فكر لتطوير البلد تعال أطرحه في برنامج وأقنع به الناس..
حصان الدين ده ما ممكن تغش به الناس
فالرسالة اكتملت من 14 قرن ولا جديد
الرجاء التمعن جيدا فيما كتبته لك قبل أن ترد
تحياتي

الاخ عبدالعزيز
سلام

Quote: تهليل ..تكبير وفارغة زي دي.

Quote: ما تجي تقول لي لا ولاء لغير الله والكلام الفاضي ده..

Quote: ومافي داعي للهتيفة والرعاع وخم الناس بالفارغة..

Quote: الاسلام هو الحل والكلام الفارغ من النوع ده..

يا ود عيسي انت بتتكلم معاي و كلامك كلو قاصد بيهو جهه معينة و هي الحكومة او حزب المؤتمر الوطني او " الكيزان"

أولا .. لست و لم اكن يوما من حزب المؤتمر الوطني بمسمياته المختلفة " الجبهة الاسلامية , اتجاه اسلامي او او "
و لو كنت منهم لدافعت عنها بشده لانها ستكون قناعتي حينها.. و لكن هناك من يدافع عنها في هذا البورد.

ثانيا..(بعيد عن الكيزان) انت تتحدث و كان من سياتي للحكم انسان منافق فقط لانه تحدث باسم الدين او اراد تطبيق شرع الله
تتحدث عن التنمية و كان من سياتي بالعلمانية هو من سيحدث تنمية, و لكني اقول لك ان الانسان الصادق النظيف النزيه هو من يستطيع
ان يحدث تنمية اذا وجدت الخبرة و العزيمة و الامانة

Quote: عندك فكر لتطوير البلد تعال أطرحه في برنامج وأقنع به الناس..

نعم التطوير سيكون تطوير مادي و اخلاقي " باخلاق الشريعة الاسلامية السمحاء"
يسيران جنبا الي جنب في تناغم تام...فتذدهر حياة الانسان رقي في الحياة و طمانينة في النفس


قال تعالى : ( ولو أن أهل القري أمنوا واتقوا لفتحنا عليهم بركات من السماء والأرض)
تحياتي

Quote: سعدت كثيرآ بملاقاة معظم بورداب الخرطوم أمنيتى أن ألتقى بودشيقوق فى أم درمان هو وهارون دياب وأجيب ليهم قصب سكر وأصورهم وهم بقشروا فيه.

أخي إسماعيل

الله يخليك ويطول عمرك وكان ربنا مد في العمر حنتلاقا ان شاء الله

أنا نازل السودان في شهر يونيو المقبل ويا ريت تكون نازل كمان


سيد البوست

إت طيب؟

Quote: اقبل علي دربنا ان كنت حيرانا.. اقبل علي نبعنا ان كنت ظمآنا

here we go




وانا اقول ودالباوقه بتحاوم بهنا عشان شنو!!!



بوستك ظريف يا منجي _وكنتتك سرت_ يا ما كوز


___________________________
يا ود عيسي I hope you get the shades

العزيز عمر ،

ألفين سلام،
ياخ قول متمني تلاقيني في صحراء العيون إن شاء الله مجند بوليساريو،

يا سيدي أشكر لك حسن ظنك بي الذي لايأتي إلا من شخص زيَّك صحيح الدواخل أو من
(ظبيا في مقيلو غافل) ، بس الحمد لله يا منجي إنو المدام ما قاعده تتحاوم بي هنا
وإلا لكان تعليقها : بالله شوفو مرتضى دا غاشِّي الناس الطيبين ديل كيف !!
وياهو براك شايف في غيابها لاقي هواي وبضرِّي ، شي ساره نورو القيافه وشي المعلومه بنت الميداح
وشي بنات أودادن وشي جيفارا .. البديري طبعا ، وبحر غزل ما ليهو حد وما ليهو قيف ولا قيد..
أخوك إنتهازي برتبة مشير وأمين عام (كتاب الغفله) أو بالأحرى (كتبة) الغفلة.

محبتي يا عمر وتحايا سقفها السِماك الأعزل.

اها يا منجي
الواحد كدى متمني يقوم يفتش في ارشيفك لعام 2002 ويلقى بوستاتك متعنقلة

الاخ ود شيقوق
سلامات

Quote: سيد البوست إت طيب؟

الحمد لله ...و شكرا علي السؤال... بس ما تنسي الهدية احتمال نتقابل شهر سته..
تحياتي

الاخ بدر السنوسي



Quote:

Quote: اقبل علي دربنا ان كنت حيرانا.. اقبل علي نبعنا ان كنت ظمآنا here we go

يا بدر يا اخوي انت ما كنت بتشوف اولاد المدارس بيرددوا مع قيقم " دفاعنا الشعبي ياهو ديل" لا كانوا كيزان ولا دفاع شعبي
دي حاجات كده بتتخزن في " الناصية علي اليمين من " المخيخ العلوي " او كما قال اخونا وليد الكوز...

Quote: وانا اقول ودالباوقه بتحاوم بهنا عشان شنو!!!

ما تخلي يتحاوم مالك بيهو " اهو طلعنا منو بي تلاتة خرفان و حاجات كده...

Quote: بوستك ظريف يا منجي _وكنتتك سرت_ يا ما كوز

كوز جردل ما فارقة ... اصلو في سودانيز الواحد لو قال " قال رسول الله" صار كوزا أما لو قال " جزاك الله خيرا " طلعوا الترابي عدييل
شكرا علي الاطراء

Quote: يا ود عيسي I hope you get the shades

He got the shades 5 posts ago, that is why he is on my tail all post long.

تحياتي

Quote: يا بدر يا اخوي انت ما كنت بتشوف اولاد المدارس بيرددوا مع قيقم " دفاعنا الشعبي ياهو ديل" لا كانوا كيزان ولا دفاع شعبي دي حاجات كده بتتخزن في " الناصية علي اليمين من " المخيخ العلوي " او كما قال اخونا وليد الكوز...

يا منجي اتا البخليك تخزن الحاجات دي شنو ...

يا منجي في المنبر ده لو عندك (صوفه) ولا شعره واحده في حنكك معناتو اتا ده كوز ... ولو بقت تخزن حاجات ناس قيقم ديل كمان معناتو اتا ده كوز حتي لو دينق زاتو صاحبك







تخريمه ...

ياخي لقيتك ساكن في البورد ده سكنه



__________________________________________
يا منجي No hard feeling والله

Quote: Quote: يا ود عيسي I hope you get the shades He got the shades 5 posts ago, that is why he is on my tail all post long.

Dear brothers/ Munji and Sanosi

Salam

The one who want to hug the sun never needs a shade..

ya Munji, it is a matter of a concept and persuasion that never needs tendencies or NIF membership..

It could be better to keep on within the Post spindle..

Thank u

الاخ المحترم محمد المرتضي
سلام

اولا ناسف للتأخير
ثانيا: بطل التواضع ياخي ... لا مغشوشين ولا " ظبيا في مقيلو غافل " و المدام عااارفة البير و غطاهو
و" مبسووووطة " ربنا يحفظكم و العيال ..

بس انت ابعد من اهل " سارة القيافة " وآل " شنقيط " و ما بتجيك عوجة تب

تحياتي يا عزيز

اهلا و مرحبا بالاخ محمد الشيخ

Quote: اها يا منجي الواحد كدى متمني يقوم يفتش في ارشيفك لعام 2002 ويلقى بوستاتك متعنقلة

في الوقت داك كنا " من منازلهم "

شكرا ليك علي المرور

الاخ السنوسي ود بدر
نأسف علي التاخير " اسبوع مزدحم جدا"

Quote: يا منجي اتا البخليك تخزن الحاجات دي شنو ...

لو " بايدي ".... اصلو المخيخ العلوي دة بيعمل " auto save " وده كلو من الكيزان "22 سنة ما شوية"..

Quote: تخريمه ... ياخي لقيتك ساكن في البورد ده سكنه

والله الحكاية ما سكنة في البورد ولكن كلها ساعة ساعتين و شوية "اسكاننيق" و دي النتيجة

Quote: يا منجي No hard feeling والله

والله
It is never a hard feeling dear brother, otherwise you will be wearing a "hard hat" now

تحياتي اخي ود بدر

عزيزي عبد العزيز عيسي

Quote: The one who want to hug the sun never needs a shade..

Because it will melt in his eyes

Quote: It could be better to keep on within the Post spindle..

علشان خاطرك يا غالي " و احنا قبيل شن قلنا"

تحياتي ود عيسي

.

وكلوا من طيبات ما رزقناكم


العزيز/ عمر منجي

سلام


السفر قريب..
فنحن على موعد.........

العزيز ود عيسي سلامات

نعم نحن علي موعد ... و لا بد من الكلاكلة وان طال السفر.... ان شاء الله...

علي الاقل نظام اكلك يتصلح شوية..

Quote: علي الاقل نظام اكلك يتصلح شوية..

العزيز/ موسي منجي

سلام


نترك أكل الملوك ونمشي نأكل ايه...............

ياخي بتبالغ والله..
مافي ألذ وأطيب من أكل البحر ده..

نسأل الله أن يفتح شهيتك عليه عشان تعرف قدر ايه كنت مضيع نفسك..


تحياتي



الموعد قائم

Quote: الاخوان عمر صديق ووليد قسم السيد في مظاهرة مناهضة للانقاذ في ميدان ابو جنزير و هما يهتفان .. الشعب يريد تغيير النظام " بس من غير بطاقات و كارنيهات "

تحياتى متى ما خرجت الانقاذ عن حب السودان وشعب السودان بتجدنى اول من ينادى الشعب يريد اسقاط النظام

عمر منجي
بوست أظرف من ظريف
وعندك فراسة نظر وحاسة سابعة ومش سادسة ، وتحليل منطقي لشخصيات ربما تكون تعرفت عليها فقط في هذه الشبكة العنكبوتية
والله يديك العافية..
وانا كمان بتمنى اشوفك" اذا انت كنت معارض للحكومة" وانت شايل ليك يافطة كبيرة داخل قاعة مؤتمرات في قلب الخرطوم ومجتمعين فيها ناس المؤتمر الوطني بقيادة نافع على نافع ، واليافطة مكتوب فيها :" تسقط حكومة اللصوص والحرامية"
اما اذا كنت موال للحكومة وعضو مؤتمر وطني، متمنية اشوفك وسط مظاهرة امام الأمم المتحدة تطالب باسقاط حكومة الجبهة الاسلامية، وانت برضه شايل يافطة ومكتوب فيها:" يعيش البشير , الرئيس الجانا بالخير، ويعيش المؤتمر الوطني، وامريكا دنا عذابها..."
أه رأيك شنو"

عزيزي ود عيسي

Quote: الموعد قائم

باذن الواحد الاحد

تحياتي

الاخ الوليد قسم السيد
سلامات

Quote: متى ما خرجت الانقاذ عن حب السودان وشعب السودان بتجدنى اول من ينادى الشعب يريد اسقاط النظام

22 سنة و ما خرجت .. كان كدا الا تسلموها لسيدنا عيسي او كما قال أحدكم..

تحياتي أخي وليد

الاخت الاستاذة أميرة السيد

شكرا ليكي كتير علي الطلة البهية و الكلمات الرائعة الجميلة
ما قصرتي تب ربنا يديكي العافية

Quote: " اذا انت كنت معارض للحكومة" وانت شايل ليك يافطة كبيرة داخل قاعة مؤتمرات في قلب الخرطوم ومجتمعين فيها ناس المؤتمر الوطني بقيادة نافع على نافع ، واليافطة مكتوب فيها :" تسقط حكومة اللصوص والحرامية"

ذكية لكن ما علي انا " عاوزاني اكشف اوراقي" ... دا اذا في اوراق يكشفوها...
اليافطة الفوق دي خلي ود عيسي يشيلها و لو قبضوهو بودي ليهو "سي فود" في الحبس

تحياتي