دوبيت الخوف & دوكة وطرقة كسرة

ديوان: نحن شنو؟
دوبيت الخوف & دوكة وطرقة كسرة

د. محمد بدوي مصطفى
دوبيت الخوف


خلاص ما تقول، كفاك يا زول!
نحن شنو؟

ونحن منو؟

هدمت البيت

وفرمتو حتيت

غير الزفة ما باريت

لا اتيممت لا اتوضيت

لا بسملت، لا صليت

وبعد الشكلة أتواريت

وفوق رمل الخريف دوبيت

واتمرمغت واترويت

واتغمغمت ما سويت

وادغدغت ما اتغطيت

واتحزمت ما زحيت

واتجضمدت ما اتلويت

وخلفت العمة اضاريت

===============================================

دوكة وطرقة كسرة

خلاص ما تقول، ووقف قول!

نحن شنو؟

ونحن منو؟

وجنب منقد، من برد الصبح حميت

للخدام ورا حلاتو ادست

كلام ونست واتراويت

ما اصبرت ما ترويت

ضلع دسيت وما وريت

تنادي خميس تنادي زعيط

في الأفراح وفي التمويت

تنادي حسين تنادي عبيد

جيب صينية من الجار ومن البيت

وفتة كتير، سمن بي فوق وتحتو الزيت

مرارة وفشفشا حبّيت

وللشربوت شربت روّيت

وجنب دوكات رقدت حتيت

وجنب صاجات، عشان الكسرة ما بتبيت

والطايوق مدغتو دحين، خشم بلّيت

لا كليت ولا مليت

لا اتصبرت لا استنيت

تبدا براكَ زي السيد

ما غسلت، لا بسملت، لا سميت

تشوف العضة ما اغديت

ولي شيات جمر عضيت

وتقعد في الصواني تبيت

لا بالغت لا غاليت

ما لك إنت ما اتغديت؟