Post: #1
Title: بنيتي حسابا ... معدلة مرتين - مرة عكس المعني، ومرة موجهة للحكومة
Author: Zien Elabdin Eltayeb
Date: 06-20-2011, 12:02 PM
Parent: #0
الأرجوزة الدارفورية اللطيفة ترد هنا في عكس معناها
مناصرة للمرأة وحقوقها :
بنيتي حسابا..
نضمي أسمعا.. ونضم راجل اوعى تسمعا
وكان طلقك ما يطلقك هو اصلو ما بينفعا بنيتي حسابا..
كان قال ولاعندو اوعى تصدقا .. غفليهو و بنطلونو فتشا ..
رجال زمن دا جنو يغشغشا بنيتي حسابا..
راجل كان جرا منك في ضنبو أمسكا..
واي نضم يقولو ليك حكحكا بنيتي حسابا..
راجل كان نضم في موبايل إتلبدا .. ونضم كلو أسمعا
باكر ما يقولو فوقك عرسا بنيتي حسابا ..
راجل اوعى تدلعا ..
وكان عاطت فوقك كورية أم قعار في نص راسو افلعا ..
كان زعل واتنفخ اوعى تهببا ..
بعد مرات يكون ولا زعلان لكن بيكضب ابنيتي حسابا..
إنتي اصحي بدري وتوبك الفحا ..
وبيوت حلة بيت بيت اتفسحا ..
وكيس زبالة في خشم باب اطرحا..
بعد شهر تجي عربية نفايات تلفحا بنيتي حسابا
راجل كان نزل انتخابات اوعى ترشحا ..
وحات الله يفوز فوقك يعرسا
وانتي تاكلي نيم ما تشبعا بنيتي حسابك
|
Post: #2
Title: Re: بنيتي حسابا ... معدلة مرتين - مرة عكس المعني، ومرة موجهة للحكومة
Author: Zien Elabdin Eltayeb
Date: 06-21-2011, 03:26 AM
نشر الأستاذ قرشي عوض فى صحيفة أجراس الحرية
هذه الأرجوزة الطريفة بلغة الفور وهى منظومة على نسق ارجوزة
تذاع بصورة منتظمة عبر إذاعة أف ام 100 عن أم
توصي ابنتها كيف تدير منزل زوجها وكيف تقيم علاقة مع نسابتها.. فإلى الأرجوزة
حكومتي.. كلام شعبك اسمعي
كلامي كان تابي
بكرة تدوري ما تلقي
أى حكومتي.. كلام شعبك اسمعي
وجيشك ده من أبيى أمرقي
وجرائدك المهوهوة دا لبيتك بخربي
ورياك مشار ده لخاطرو طيبي
وتاني ضيف كان جاك جنب النافورة ما توقفي
للمكتب الكبير دخلي
وفى الكرسي الكبير قعدي
وكباية ام قعر قدامو ختي
إنت مالك الواجب ما بتعرفي
|
Post: #3
Title: Re: بنيتي حسابا ... معدلة مرتين - مرة عكس المعني، ومرة موجهة للحكومة
Author: Zien Elabdin Eltayeb
Date: 06-22-2011, 01:28 PM
Parent: #2
ومجلس الأمن كان جا تاني اوعى ما تقابلي
طيارة أم ضنب كان ظهر
الكلام دا بتابي
ومشكلة دارفور ده اسرعي حلي
عشان اوكامبو ما تصاقري
وعبد الواحد ده امشي شوفي
خليل ده حاولي ترضي
وبأى طريقة جيبي
وكان داير نائب رئيس سوي
وتحالف المعارضة ما تهرشي
والصادق المهدي ما تجهجهي
ومالك عقار ما تزعلي
باكر تكوسي ما تلقي
وياسر عرمان بلا سبب الكلاب فوقو ما تشعشعي
وجيش شعبي ده هسع أنسي
والمشورة الشعبية سوي
والإنتخابات الجاية ما تزوري
وكلامي ده أكان تسوي
شوفي كان تنقدري
|
Post: #4
Title: Re: بنيتي حسابا ... معدلة مرتين - مرة عكس المعني، ومرة موجهة للحكومة
Author: Zien Elabdin Eltayeb
Date: 06-23-2011, 01:47 PM
Parent: #3
أحسن يا حكومتي
ركوب راس ده خلي
وكلام بجيب توما هوك ما تقولي
والسكر ساعة ساعة ما تزيدي
وأجراس حرية من المطبعة ما تصادري
وايدك المسمة دا قصري
والبطلع الشارع ما تضربي
والمسكين حقو ما تشيلي
وبى قروش شوية تشتري
دعوة المظلوم ما بتقدري من السماء تحوشي
والله كان غضب عنك لى راسك تكسري
ومن الدنيا تنمحي
وقروش لميتى دا ما بتلقي طريقة تاكلي
أى حكومتي.. كلام شعبك اسمعي
وكلامي أكان تابي
بكرة تدوري ولا تلقي
|
Post: #5
Title: Re: بنيتي حسابا ... معدلة مرتين - مرة عكس المعني، ومرة موجهة للحكومة
Author: Zien Elabdin Eltayeb
Date: 06-24-2011, 05:51 PM
Parent: #4
.
|
|