Post: #1
Title: مبروك .. كسبت الجائزة الكبري! (قصّة حقيقيّة)
Author: Khalid Osman Jaafar
Date: 06-19-2011, 08:28 PM
فتحت الإيميل ولقيت مكتوب فيهو ما معناه ألف مبروك ياخ! كسبت الجائزة الكبري لمسابقة مدوّنات مايكروسوفت!
The Ultimate Steal Blogging Competition, sponsored by Microsoft
|
Post: #2
Title: Re: مبروك .. كسبت الجائزة الكبري! (قصّة حقيقيّة)
Author: Khalid Osman Jaafar
Date: 06-19-2011, 08:41 PM
Parent: #1
والجائزة الكبري كانت إجازة ربيع Spring break في حدود ١٢٠٠ جنيه استرليني لشخصين لوجهة من إختياري من وجهات إجازة الربيع في أمريكا!
وطبعاً، كالمعتاد، مرفق مع الإيميل إقرار لازم أملاه وأرجعه ليهم عشان يعتبروا إنّي قبلت الجائزة ويقدروا يدوني ليها!
|
Post: #3
Title: Re: مبروك .. كسبت الجائزة الكبري! (قصّة حقيقيّة)
Author: Khalid Osman Jaafar
Date: 06-19-2011, 08:43 PM
Parent: #2
طبعاً أغلبنا مرّ عليه علي الأقل إيميل واحد زي ده. وكتييير مرّت علي إيميلات بتقول إنّي كسبت اللوتري أو إيميلي تم إختياره لجائزة! 
ده طبعاً غير الإيميلات بتاعة عاوزين مساعدتك نطلّع كم مليون من وين كده ما عارف، وطبعاً نصيبك محفوظ!
وطبعاً الهدف من كل الإيميلات الزي دي إنّو الواحد يطمع ويدّي المحتالين ديل بيانات شخصيّة كافية لإنهم يفضّوا حسابو في البنك أو يفتحوا حساب بإسمه ويستلفوا قروش ويزوغوا!!
|
Post: #4
Title: Re: مبروك .. كسبت الجائزة الكبري! (قصّة حقيقيّة)
Author: Khalid Osman Jaafar
Date: 06-19-2011, 08:49 PM
Parent: #3
عشان كده قررررربت أمسح الإيميل زي ما بعمل مع الإيميلات المشابهة، وأنسي الموضوع
لولا إنّي فعلاً كنت شاركت في المسابقة دي!!
لكن لمّا مواعيد إعلان النتيجة جات وفاتت وما سمعت حاجة، قلت خلاص أكيد ما كسبت، ونسيت الموضوع
أهاااااا ... الكلام ده حقيقي، ولا صدفة ساكت؟!
|
Post: #5
Title: Re: مبروك .. كسبت الجائزة الكبري! (قصّة حقيقيّة)
Author: Khalid Osman Jaafar
Date: 06-19-2011, 09:04 PM
Parent: #4
عاينت للإيميل تاني، لقيت إنّو من جهة إسمها Sweepstakes Consulting
ولقيتهم طالبين إنّي أملأ الإقرار وأرسله ليهم في مدّة أقصاها نفس اليوم!!!! 
قمت قلت أنا أحسن أركّب قبعة المحقق كونان وأشوف القصة دي أخرتها شنو!
سألت عمّو قوقل بتعرف الناس ديل؟ قال لي بعرفهم، وساعدوا مايكروسوفت قبل كده في مسابقة! 
قلت ده كلام طيّب! لكن ما كفاية. يمكن يكون الموضوع فيهو إحتيال ولا كده!
قلت خلاص، أنا أحسن حاجة أعملها، أتجرجر مع الناس ديل وأحاول أشوف هل الموضوع ده حقيقي ولا لأ
رديت ليهم وقلت يا جماعة كتّر خيركم وكلامكم ده مفرح! لكن ما ممكن تقولوا لي رد في نفس اليوم! أدوني نفس كده وبرد عليكم 
لكن أنا الجائزة طبعاً قبلتها منكم!
|
Post: #6
Title: Re: مبروك .. كسبت الجائزة الكبري! (قصّة حقيقيّة)
Author: Khalid Osman Jaafar
Date: 06-19-2011, 09:15 PM
Parent: #5
حاولت أتصل بناس مايكروسوفت في بلدنا عشان اتأكّد من الموضوع، ما لقيت طريقة
في النهاية رسلت ليهم إيميل حكيت ليهم الحاصل وسألتهم الكلام ده حقيقي ولا لأ 
في الوقت ده ناس الشركة التانية رسلوا قالوا لي ياخ إنت أملأ الإقرار ورسّله، وإختار مواعيد الإجازة ومكانها براحتك!
المفاجأة كانت إنّو رد مايكروسوفت كان إنهم ما عندهم أي علاقة بالشركة دي، وإنّو شكّي في محلّو والموضوع كله إحتيال!!!
|
Post: #7
Title: Re: مبروك .. كسبت الجائزة الكبري! (قصّة حقيقيّة)
Author: Khalid Osman Jaafar
Date: 06-19-2011, 09:24 PM
Parent: #6
الحقيقة رد ناس مايكروسوفت ما جاني مباشرة
أخدوا ليهم حوالي أسبوع حتّي ردّوا! 
في الوقت ده ناس الشركة كانوا بيزرزروا فيني عشان املأ الإقرار
لمّا لقيت ناس مايكروسوفت إتأخّروا في الرد، وديل بهنا مقبقبنّي، قلت ياخ الصراحة راحة
رسلت لناس الشركة إيميل قلت ليهم بصراحة يا جماعة أنا كل يوم بتجيني إيميلات بتقول إنّي كسبت مسابقات وجوائز. معليش يعني، لكن أعرف كيف إنّو ده ما واحد منهم؟
|
Post: #8
Title: Re: مبروك .. كسبت الجائزة الكبري! (قصّة حقيقيّة)
Author: Khalid Osman Jaafar
Date: 06-19-2011, 09:30 PM
Parent: #7
بصراحة، خفت الحكاية تكون جد وتأخر ناس مايكروسوفت في الرد يفوّتني المسلسل!
خصوصاً وإنّي كنت بديت أحلم حأمشي وين 
وقلت أقوم أسوق الوالدة معاي ونمشي ديزني لاند للدنيا والزمان!
|
Post: #9
Title: Re: مبروك .. كسبت الجائزة الكبري! (قصّة حقيقيّة)
Author: Khalid Osman Jaafar
Date: 06-20-2011, 08:17 PM
Parent: #8
وبقيت أفكّر
يا ربّي حيردّوا ولا حيكونوا مستهبلين ويقولوا الزول ده طلع صعب. أنسوه وفتّشوا غيره 
طيّب ولو ردّوا، حيكون ردّهم شنو؟
لغاية ما لقيت إيميل منهم ...
|
Post: #10
Title: Re: مبروك .. كسبت الجائزة الكبري! (قصّة حقيقيّة)
Author: Khalid Osman Jaafar
Date: 06-21-2011, 07:43 PM
Parent: #9
ردهم حقيقة كان مشجّع. قالوا لي حنخلّي زول من مايكروسوفت يرسل ليك إيميل ومعاه الإقرار المفروض تملاه 
ألذ حاجة في ردهم كانت إنهم قالوا لي في العادة الناس لمّا تشترك في مساقة بتكون متذكّرة إنها إشتركت!!
لكن لسّه كان في إحتمال إنّو الزول الحيرسّل لي ده ما يكون شغال في مايكروسوفت أصلاً!
|
Post: #11
Title: Re: مبروك .. كسبت الجائزة الكبري! (قصّة حقيقيّة)
Author: Khalid Osman Jaafar
Date: 06-22-2011, 10:00 PM
Parent: #10
في نفس اليوم جاني إيميل تاني من واحد قال إنّو شغال مع مايكروسوفت
وقال لي متأسفين علي الخلط الحصل ده. والناس ديل تبعنا وكده، ولو سمحت املأ الإقرار عشان الموضوع يمشي
طيّب يا عمّك لو ما طلعت شغال معاهم، أتمقلب أنا؟
أعرف كيييييف إنّو الزول ده فعلاً شغال مع مايكروسوفت ولا لأ؟!!
|
Post: #12
Title: Re: مبروك .. كسبت الجائزة الكبري! (قصّة حقيقيّة)
Author: Khalid Osman Jaafar
Date: 06-22-2011, 10:18 PM
Parent: #11
قلت ما في حل غير إنّي ألبس قبعة المفتّش كرومبو تاني!
عاينت للعنوان الجاني منّو الإيميل لقيتو بينتهي ب @microsoft.com
حلو!
أخدت إسمه وما كذبت
طووووالي ضربت تلفون لناس مايكروسوفت عشان اسألهم بتعرفوا الزول ده ولا لأ
الكلام ده كان يوم جمعة تقريباً آخر اليوم. عشان كده ما قدرت أتكلم مع زول
لكن الحاجة الكويسة كانت إنّو نظام الهاتف عندهم بيقول ليك لو عارف إسم الزول العايز تتكلم معاه، قولو
وفعلاً تأكدت إنّو في زول بالإسم ده بيشتغل في مايكروسوفت
شكلو الموضوع جد!!!
لكن هل فعلاً مشيت الإجازة الموعودة مع الوالدة؟
لأ!
|
Post: #13
Title: Re: مبروك .. كسبت الجائزة الكبري! (قصّة حقيقيّة)
Author: Khalid Osman Jaafar
Date: 06-26-2011, 03:18 AM
Parent: #12
غايتو بعد البحث العملتو ده كلّو، توكلت ومليت الإقرار ورسّلتو ليهم
وفعلاً بعدها نشروا نتيجة المسابقة علي الموقع الكانت مطروحة عليه. وحوّلوني لشركة تانية كانت هي المسؤولة عن إرسال الجوائز
لكن بعد فترة بسيطة كده ناس الشركة الجديدة رسّلوا قالوا لي في مشكلة في موضوع ترتيب الإجازة وكده، والحل الأمثل نحن نرسّل ليك قيمة الجائزة قروش وإنت تتصرّف
قلت ليهم ما مشكلة! المهم الواحد يمسك القروش في يده!
وفعلاً رسّلوا لي شيك بقيمة الجائزة
لكن ما مشيت الإجازة لأنو بعد داك قروش الدراسة بتاعتي كانت علي وشك إنها تخلص. وفعلاً الحمد لله قروش الجائزة جات في وقتها!
سبحان الله!
لاحقاً عوّضت الوالدة بإنها تجي تحضر حفل تخرّجي
|
Post: #14
Title: Re: مبروك .. كسبت الجائزة الكبري! (قصّة حقيقيّة)
Author: Khalid Osman Jaafar
Date: 06-26-2011, 03:22 AM
Parent: #13
ما عارف، لكن جاني إحساس إنّي ندّمتهم علي إنهم إختاروني أصلاً
لكن الزمن ده الواحد لازم ياخد بالو شدييييييد
والبيدقس حقّو راح!
القصّة دي حصلت قبل زي ٣ سنين كده. عشان مافي زول يجي طاير يقول لي نصيبي ويييين!
|
Post: #15
Title: Re: مبروك .. كسبت الجائزة الكبري! (قصّة حقيقيّة)
Author: Khalid Osman Jaafar
Date: 06-29-2011, 02:03 AM
Parent: #14
الخلاصة:
يا جماعة أعملوا حسابكم
السماء ما بتمطّر كتاكيت زي ما بيقولوا
لو الحكاية ما بتتصدّق، تبقي ما صحيحة!
يعني ناس: مبروك كسبت اللوتري، وإيميلك إخترناه للفوز بجائزة و ما عارف شنو، ديل ما تضيّع زمنك معاهم
وإلا حتلقي نفسك ضيّعت زمنك وقروشك كمان!
|
|