مجلس الفقه يُحلل الربا وشغال ليكم في حاجات تانية معطشاني !

بقلم الأستاذ/ المحبوب أحمد الأمين منتدي الحصاحيصا دوت كوم http://www.alhasahisa.com/t10132-topic


حكومتنا الطيبة وجنسا فريد
تأتـيها الفتاوى زي ما تريد
وفي "نِطيطا" تجد الصيد
وكل ما تقع في "زرة" تلقى ليـها فتوى
يعني كل ما أجيهو راجع كائيس لي حناني
يقوم يديني فتوى ويزيل الألم
عندها ناس شغالين فتاوي من بيت الكلاوي
يغرفوا من "الفقه" ما يقضي علي البلاوي
أي بلوى عندهم ليـها حل من "الفقه"
ولمن ما يلقوا الحل في الفقه "يعملوا فقه"
فتعددت التفقهات "على وزن "فقهة"
والتفقهات ذاتا عملوا ليها مجلس "متفيقهين"
وديل موزعين على جوامع الحكومة وشجر المحليات والولايات
و"المتقدرين" عينوهم في جامع والد الرئيس "دا على المستوى القومي"
شغالين يغنوا ساي وما بشبعو كلو كلو
بالله يا طير قدر ما تغرف تمر
على بلد أسير
من جيبو
من شيكاتو بيلمع ألف نور
تلقي الحكومة بتشتغل ..
تدمير عديل لحبيب قريب
تقيف لديها..
وتبوس كرعيها ..
وانقل اليها ..
فتواي ليها
وحبي الأكيد!!
عايز تغير غداك من سلطة دكوة لي آندومي عليك بـ
"فقه إبدال الطعام" للعلامة إبن تسويف عاصم الترجمستاني
عندك "لاندروبل" عايز تقلب مكنتو "تايوتا 78" عليك بـ
"الوافر ضراعو أمنتو الرسول مامون الوداعة برّ بي دار أبو"
ودا مرجع مهم متوفر لدى "دار الفتاوى الهندوسميكانيكية"
ولوكنت من المدسترين "ولغفت" جهة حكومية قومية ولا ولائية ما فارقة
فلا تحزن يابُني فهناك "فقه السترة والفضيحة ما فارقات"
والعجب "حبيبي" كان واجهتك مشكلة في تسجيل محترفي الكورة
تفتح كتاب "التجنيس في علوم كرة قدم التنحيس الأندية ميتة والمنتخب فطيس"
وتجنس وتدفع من مليارات الدولة علي كيفك إن شاء الله "الحداشر" يكونوا من موز أم بير
دا طبعاً غير فقه التمكين وإعادة التوطين في المـهاجر
وفقه إستحلال المال العام في مساعي إحلال السلام
و تحريم أكياس النيلو والهوا شايلو
و تجميع الحديد الخردة وبيع دقيق "الفينو" رِدة
و إستبدال الحواشات بـ "ضياع المحتوشات وحواشي الإمام الهمام" ودا كلو قومي
دا خلاف فتاوي "الفكة" الخاصة بالركشات والطبالي والأكشاك قومي وولائي ومحلي
والفتاوي "الفكة" الولائية والمحلية بصدرا مجلس الإفتاء الشرعي بالولايات والمحليات
والمجلس دا عادة بتم تكوينه من شخصيات رسمية في الولاية أو المحلية
ففي ولاية من الولايات الشبعانة وشحمانة مثلاً لا "حصرماً" عملوا
ود الوالي "طالب الثانوي" من مرتو الخامسة "رئيس" وبتاع اللجان الشعبية نائب له
وإمام المسجد "البصلي من الجمعة للجمعة بس" أميناً "للمال والمآل"
ومسئول الشئون الهندسية بالولاية أو المحلية لنزع ملكية الأراضي البور والمستصلحة
أها قالوا واحد إحتج على "لجنة الفتاوى" نزعت أرضه قلعوا ليـهو سنونو
مع إنو قال ليـهم قرار لجنتكم دي غير شرعي وغير دستوري
قروا ليـهو "ومن لم يحكم بما أنزل الله فأولئك هم الكافرون"
ولمن قال ليهم "أنا ما حكمت إنتو كلجنة فتوى غير مختصة بالنزع حكمتو وقلعتو أرضي"
قالوا ليهو "كمان معاها لماضة" طوالي سنونو لحقت أرضو
وياحليلو هداك زارع خشمو "أبسبعين"
وإن كتروا وقللوا أكان لحق مصنع الصداقة للعزل والتـهريج
وباعو أعضاء "جتته" لحم وعضام خردة للشركة السعودية
"مالكن ما سمعتوا بيـها مستغربين كِدا؟؟"
معليش يخوانا طلعنا من موضوعنا
قبال كم يوم قامت "دية " ودوشة في البرلمان "لي رب السما"
والسبب قروض لمشاريع "حووييه" من حاوي وسدود وكباري بماروي
والبرلمان "إسم الدلع للمجلس التابع للمؤتمر الوطني" قال أبداً دا ربا
والربا حرام وحلفوا "بالتقطعم حته حته" قالوا ما دايرين أي قروض ربوية
"الكاتل الله والبحيانا الله" والزارعنا غير الله اللجي يقلعنا
ناس مجلس الإفتاء الشرعي "ياضبعة جاك عشاك في خشم بابك"
إجتمعوا "مثنى وثلاث ورباع وخماس" وراجعوا كتب الفقه القديم والجديد
لكن ركزوا علي الجديد لأن الجديد شديد جداً جداً
وطلعوا "بفتة" بي توم "آند" جري علي الشمارات والمكرفونات والقنوات
والحمد لله "حللوه" أيوة الربا يعني يقعدوا ليكم "أمفكو" بدون كباري وسدود كمان ؟؟
والمرة دي إعتمدوا "جزاهم الله خير" علي فقه الضرورة القصوى
وأسي هديلك بباصروا ليكم في حاجات الضرورة غير القصوى
وتاني شامبيون أكان نشربو "بدل اللقيمات والشعيرية" مع شاي الصباح
وإن شاء الله يستعجلوا شوية قبال الناس ديل ما يفوتو ونحن نموتو ونلحق بوتو بوتو

عندما يتحول فقه الضرورة لفقه مصالح .... فهل تبرز ضرورة العلمانية؟

شكراً أخونا فقيري علي إيراد الرابط ، وأجاوب علي سؤالك بالقول أن مجرد وجود (إمكانية ) لتحول فقه ما لفقه ضرورة أو خلافه يُبرز ضرورة الدولة المدنية التي لاتعتمد علي فهم من يحتكرون الفهم الديني ويطوعونه لخدمة مصالحهم الأقتصادية والسياسية .

الأخ صداح وراق

تحياتي - يا أخي أهلنا قالواالزول بونسه غرضه . يعني الجماعة ديل بفصلوا حسب المقاس

بحيراوي

شكراًأخونا بحيراوي علي المرور بس الجماعة ديل ماخلو ليهم قماش لافي ما فصَلوهو ( بالتشديدالمُشدد للصاد)

سلام يا صداح..
حكومتنا غايتوا الله يريحنا منها قبل ما يريحا مننا...

ياخ سلم لي علي حسن وراق واديني تلفونو لو ممكن..
[email protected]